1, 2. 1) ¿Baʼax t-kanaj teʼ xook máanik yoʼolal le templo tu yilaj Ezequieloʼ? 2) ¿Baʼax ken k-il teʼ xookaʼ?

TEʼ XOOK máanikoʼ t-kaneʼ le templo tu yilaj Ezequieloʼ maʼ igual yéetel le templo tu yaʼalaj apóstol Pablooʼ. T-kanaj xaneʼ le baʼax tsʼaʼab u yil Ezequieloʼ tu kaʼansaj tiʼ le israelitaʼob bix u kʼáat Jéeoba ka adorartaʼakoʼ. Wa ku beetkoʼob kaʼach le baʼax ku kʼáatik Jéeobaoʼ yaan u kaʼa biskubaʼob tu yéetel. Utiaʼal u yeʼesiktiʼob jach kʼaʼabéet u beetkoʼob le baʼax ku kʼáatikoʼ Jéeobaeʼ kaʼatéen tu yaʼalaj: «Lelaʼ u leyil le templooʼ» (xok Ezequiel 43:12).

² Teʼ xookaʼ yaan k-ilik baʼax ku kaʼansik tiʼ máak le templo tu yilaj Ezequieloʼ. Yáaxeʼ yaan k-ilkeʼ tu kaʼansaj tiʼ le judíoʼob bix u kʼáat Jéeoba ka adorartaʼakoʼ. Tsʼoʼoleʼ yaan k-ilik baʼax ku kaʼansik tiʼ toʼon kuxaʼanoʼon teʼ tu tsʼook kʼiinoʼobaʼ.

3. ¿Baʼaxten suʼlakchaj le judíoʼob le ka tu yojéeltoʼob yaan u kaʼa tsʼaʼabal kaʼanal le adoración ku tsʼaʼabal tiʼ Jéeobaoʼ?

³ Utiaʼal k-ilik baʼaxoʼob tu kanaj le judíoʼoboʼ, koʼox ilik baʼax u kʼáat u yaʼal jujunpʼéel tiʼ le baʼaxoʼob tu yilaj Ezequieloʼ. Le kaʼanal montañaoʼ. Maʼ xaaneʼ le judíoʼoboʼ tu tukloʼobeʼ le baʼax tu yilaj  Ezequieloʼ chíikaʼan tiʼ le baʼax u yaʼalmaj Isaíasoʼ (Isa. 2:2). Ezequieleʼ tu yileʼ u yotoch Jéeobaeʼ jach kaʼanal yanil, ¿baʼax tu kaʼansaj tiʼ le judíoʼoboʼ? Tu kaʼansajtiʼobeʼ le adoración ku tsʼaʼabal tiʼ Jéeobaoʼ yaan u kaʼa tsʼaʼabal kaʼanal, tu yóokʼol u maasil baʼaloʼob. U jaajileʼ le u adorartaʼal Jéeobaoʼ deporsi tiaʼan tu yóokʼol u maasil baʼaloʼobeʼ, tumen tu táan letiʼeʼ «mix baʼal le u maasil diosoʼoboʼ» (Sal. 97:9). Chéen baʼaleʼ le kaajoʼ maʼ táan kaʼach u yáantajiʼ. Letiʼobeʼ yaʼab u téenel tu chaʼajoʼob u kʼastal le bix u adorarkoʼob Jéeobaoʼ yéetel yaʼab u téenel tu xúumpʼattoʼob. Le oʼolaleʼ le ka tu yojéeltoʼob yaan u kaʼa tsʼaʼabal kaʼanal le adoración ku tsʼaʼabal tiʼ Jéeobaoʼ, le judíoʼob uts u puksiʼikʼaloʼoboʼ seguro suʼlakchajoʼob yoʼolal le baʼaxoʼob kʼaastak ku beetkoʼoboʼ.

4, 5. ¿Baʼax wal tu kanaj le judíoʼob yoʼolal u nukuch entradailoʼob le templooʼ?

⁴ Le nukuch entradaʼoboʼ. Ezequieleʼ tu yileʼ le ángel láakʼintikoʼ táan kaʼach u pʼisik le entradaʼoboʼ. ¡Kex 30 metros u kaʼanliloʼob! (Eze. 40:14). Ichil le entradaʼoboʼ tiaʼan kaʼach le cuartoʼob tuʼux ku yantal le guardiaʼoboʼ. ¿Baʼax jeʼel u kanik kaʼach le judíoʼob kéen u xakʼaltoʼob u planoil le templooʼ? Jéeobaeʼ tu yaʼalaj tiʼ Ezequiel: «Jach ilawil u yookbal le templooʼ». ¿Baʼaxten tu yaʼalajtiʼ? Tumen le judíoʼoboʼ tu yoksoʼob máaxoʼob «maʼ circuncidartaʼan u puksiʼikʼaloʼob yéetel u bakʼeloʼob» tu yotoch Jéeoba, le lugar santooʼ. Le oʼolal Jéeobaeʼ tu yaʼalaj: «Ka taaskeʼex mix baʼalil in templo» (Eze. 44:5, 7).

⁵ Le máaxoʼob «maʼ circuncidartaʼan u [...] bakʼeloʼoboʼ» maʼ táan kaʼach u beetkoʼob junpʼéel baʼax u yaʼalmaj Dios desde tu kʼiiniloʼob Abrahániʼ (Gén. 17:9, 10; Lev. 12:1-3). Chéen baʼaleʼ le máaxoʼob «maʼ circuncidartaʼan u puksiʼikʼaloʼob[oʼ]» maas kʼaas baʼax ku beetkoʼob kaʼachi, tumen táan kaʼach u binoʼob tu contra le baʼaxoʼob ku yaʼalik Jéeobaoʼ. Le máakoʼob beyoʼ junpuliʼ maʼ unaj u chaʼabal kaʼach u yookloʼob tu yotoch Jéeobaiʼ, junpʼéel lugar santo. Jéeobaeʼ u pʼekmaj le j-kaʼapʼéel ichoʼoboʼ, chéen baʼaleʼ u kaajaleʼ tu chaʼaj u yokol le máakoʼob bey ichil le templooʼ. Le nukuch entradaʼob yéetel le cuartoʼob tuʼux ku yantal le guardiaʼoboʼ ku yeʼesik junpuliʼ maʼ unaj u kaʼa chaʼabal u yúuchul junpʼéel baʼal beyoʼ. Utiaʼal u páajtal u yokol máak tu yotoch Dioseʼ unaj u tsʼoʼokbesik le baʼaxoʼob ku yaʼalik Jéeobaoʼ. Chéen jaʼaliʼ bey jeʼel u kʼamik le adoración ku tsʼaʼabaltiʼ tumen u kaajaloʼ.

6, 7. 1) ¿Baʼax tu yeʼesaj tiʼ le judíoʼob le pakʼ baʼpachtmil u terrenoil le templooʼ? 2) ¿Bix u pʼatmiloʼob kaʼach u yotoch Jéeoba? (Ilawil le notaoʼ).

⁶ Le pakʼ baʼpachtmil u terrenoil le templooʼ. Uláakʼ baʼax tu yilaj Ezequieleʼ letiʼe pakʼ baʼpachtmil u terrenoil le templooʼ. Letiʼeʼ tu yileʼ cada tséel tiʼ le pakʼoʼ 1,555 metros u chowakil (500 u cheʼiloʼob pʼiis). ¡Maas tiʼ junpʼéel kilómetro y medio yaan tiʼ cada tséel! (Eze. 42:15-20). Chéen baʼaleʼ chúumuk tiʼ le terrenoaʼ yaan junpʼéel cuadro ku pʼisik 259 metros cada tséel (500 codos), teʼeloʼ  tiaʼan le templo yéetel u táankabiloʼobiʼ (Eze. 45:2). Leloʼ ku yeʼesikeʼ yaan junpʼéel nojoch terreno entre le pakʼ baʼpachtmil le templo bey xan le pakʼ baʼpachtmil u terrenoil le templooʼ. * ¿Baʼaxten bey beetaʼaniloʼ?

⁷ Jéeobaeʼ tu yaʼalaj: «Beoraaʼ letiʼobeʼ unaj u xuʼulul u traicionarkenoʼob yéetel uláakʼ diosoʼob bey xan yéetel le imagenoʼob ku meyajtikoʼob jeʼex u beetkoʼob yéetel u reyoʼoboʼ. Teen túuneʼ mantatsʼ kin antal chúumuk tiʼ letiʼob» (Eze. 43:9). Jeʼex k-ilkoʼ Jéeobaeʼ tu yaʼaleʼ yaan u xuʼulul u traicionartaʼal yéetel uláakʼ diosoʼob. Tiʼ Jéeobaeʼ meyajnaj u nojoch terrenoil le templo utiaʼal u yeʼesik tiʼ le judíoʼob kʼaʼabéet u náachkuntkoʼob le baʼaxoʼob kʼaastak ku beetkoʼoboʼ, tumen mix taak u paktikiʼ. Wa ku adorarkoʼob Jéeoba jeʼex uts tu tʼaaneʼ, letiʼeʼ yaan u yantal ichiloʼob.

8, 9. ¿Baʼax wal tu kanaj le judíoʼob úuchik u kʼeʼeyel u nuuktakil le kaaj tumen Jéeobaoʼ?

⁸ Kʼeʼey le máaxoʼob nuʼuktik le kaajoʼ. Kex yaj le baʼax tu yaʼalaj Jéeoba tiʼ le máaxoʼob tsʼaʼan autoridad tiʼoboʼ le bix tu beetiloʼ tu yeʼesaj u yaabiltmoʼob. Letiʼeʼ tu kʼeyaj le levitaʼoboʼ tumen tak letiʼob tu adorartoʼob yaanal diosoʼob jeʼex tu beetil u maas yaʼabil le judíoʼoboʼ. Chéen baʼaleʼ letiʼeʼ tu felicitartaj u paalaloʼob Sadok, tu yaʼalaj: «Tu tsʼoʼokbes[oʼob] le meyajoʼob tin lugar santo le ka pʼaʼaten tumen le israelitaʼoboʼ». Jeʼex k-ilkoʼ Jéeobaeʼ maʼ tu kʼeyaj tuláakal máakiʼ, baʼaxeʼ tu chʼaʼaj en cuenta baʼax ku beetik cada juntúul (Eze. 44:10, 12-16). Jéeobaeʼ tu kʼeyaj xan u nuuktakil u kaajil Israel (Eze. 45:9).

⁹ Le baʼax tu yaʼalaj Jéeoba yoʼolal le máaxoʼob tsʼaʼan autoridad tiʼoboʼ tu yeʼesaj yaan u kʼáatik cuenta tiʼob yoʼolal le bix u beetkoʼob le meyajoʼob tsʼaʼantiʼoboʼ. Letiʼobeʼ kʼaʼabéet kaʼach u tsolnuktaʼaloʼob yéetel u kʼeʼeyloʼob. Ku páaʼtaʼaleʼ letiʼob táanil unaj u tsʼoʼokbeskoʼob u leyoʼob Jéeobaoʼ.

10, 11. ¿Baʼaxten jeʼel u páajtal k-aʼalikeʼ le judíoʼob suunajoʼob Jerusalénoʼ tu beetoʼob le baʼax aʼalaʼabtiʼoboʼ?

¹⁰ Le judíoʼob suunajoʼob Jerusalénoʼ, ¿tu beetoʼob wa le baʼax aʼalaʼabtiʼoboʼ? U jaajileʼ maʼ tu páajtal jach k-ojéeltik baʼax tu tukloʼob yoʼolal le baʼax tu yilaj Ezequieloʼ. Chéen baʼaleʼ le Bibliaoʼ ku yeʼesiktoʼon baʼax tu beetoʼob le ka suunajoʼob Jerusalén yéetel bix úuchik u adorarkoʼob Jéeobaoʼ. ¿Baʼaxten jeʼel u páajtal k-aʼalik tu beetoʼob le baʼax tu kanoʼoboʼ? Tumen maʼ tu beetoʼob le baʼaxoʼob kʼaastak tu beetaj u úuchben láakʼtsiloʼob bisaʼaboʼob Babiloniaoʼ.

¹¹ Jujuntúul máaxoʼob chúukaʼan u yóoloʼobeʼ tu yiloʼob ka adorartaʼak Jéeoba jeʼex úuchik u yeʼesaʼal tiʼ Ezequieloʼ. Ichiloʼobeʼ tiaʼan le profeta Ageo yéetel Zacaríasoʼ, le sacerdote yéetel escriba Esdras bey xan le gobernador Nehemíasoʼ (Esd. 5:1, 2). Letiʼobeʼ tu kaʼansoʼob tiʼ le kaaj maas kʼaʼabéet u tsʼáaikoʼob táanil u adorarkoʼob Jéeoba ke u kaxtikoʼob ayikʼaliloʼob wa u kaxtik chéen u yutsiloʼob (Ageo 1:3, 4). Tu yaʼaloʼob xaneʼ jach kʼaʼabéet u beetkoʼob  baʼax ku yaʼalik Jéeoba utiaʼal u kʼaʼamal u adoraciónoʼoboʼ. Esdras yéetel Nehemíaseʼ maʼ sajakchaj u yaʼaloʼob tiʼ le judíoʼob ka u pʼat u yatanoʼob táanxel luʼumil u taaloʼoboʼ, tumen le koʼoleloʼobaʼ táan kaʼach u beetkoʼob u náachtaloʼob tiʼ Jéeoba (xok Esdras 10:10, 11; Neh. 13:23-27, 30). ¿Xuʼul wa túun u adorarkoʼob uláakʼ diosoʼob? Yaan baʼaxoʼob eʼesik xuʼul u beetkoʼob, kʼuch u pʼektoʼob le baʼax jach suukaʼan u beetkoʼob kaʼachoʼ. ¿Baʼax túun úuch yéetel le sacerdoteʼob bey xan yéetel u nuuktakil le kaajoʼ? Jeʼex eʼesaʼabik tiʼ Ezequieloʼ, Jéeobaeʼ tu tsolnuʼuktoʼob yéetel tu yáantoʼob utiaʼal u beetkoʼob baʼax uts tu tʼaan (Neh. 13:22, 28). Yaʼab tiʼ letiʼobeʼ tu beetoʼob le baʼaxoʼob tu yaʼalaj Jéeobaoʼ (Esd. 10:7-9, 12-14; Neh. 9:1-3, 38).

12. ¿Bix úuchik u bendecirtaʼal le kaaj tumen Jéeobaoʼ?

¹² Úuchik u beetik le kaaj beyaʼ bendecirtaʼaboʼob tumen Jéeoba. Letiʼobeʼ tu kaʼa bisubaʼob tu yéetel, yanchaj toj óolal tiʼob bey xan jeetsʼelil (Esd. 6:19-22; Neh. 8:9-12; 12:27-30, 43). ¿Baʼaxten kaʼa bendecirtaʼaboʼob? Tumen le kaajoʼ joʼopʼ u kaʼa uʼuyik u tʼaan Jéeoba yéetel u kaʼa adorarkoʼob jeʼex uts tu tʼaaneʼ. Le baʼaxoʼob kaʼansaʼabtiʼob tumen le baʼax tu yilaj Ezequieloʼ jach kʼuch tu puksiʼikʼaloʼob. Jeʼel u páajtal k-aʼalikeʼ le baʼax tu yilaj Ezequieloʼ kaʼapʼéel bix úuchik u yáantik le judíoʼob yanoʼob kaʼach Babiloniaoʼ: 1) tu kaʼansajtiʼob bix u kʼáat Jéeoba ka adorartaʼak yéetel  baʼaxten unaj u beetkoʼob, yéetel 2) tu yeʼesajtiʼobeʼ Jéeobaeʼ yaan u beetik u kaʼa adorartaʼal chéen letiʼ yéetel yaan u bendecirtik le kaaj wa ku yuʼubaʼal u tʼaanoʼ. Le baʼax tu yilaj Ezequieloʼ, ¿yaan wa uláakʼ bix u béeytal teʼ kʼiinoʼobaʼ?

13, 14. 1) Le baʼax tu yilaj Ezequieloʼ, ¿baʼaxten k-aʼalik táan u béeytal teʼ kʼiinoʼobaʼ? 2) ¿Bix u yáantkoʼon le baʼax tu yilaj Ezequieloʼ? (Ilawil le cuadro 13A, «Kaʼapʼéel templo yaanal baʼax ku chíikbeskoʼob»).

¹³ Le baʼax tu yilaj Ezequieloʼ, ¿jach wa tu jaajil táan u béeytal teʼ kʼiinoʼobaʼ? U jaajileʼ táan. Kʼaʼajaktoʼoneʼ le baʼax tu yilaj Ezequieloʼ chíikaʼan tiʼ le baʼax tu profetizartaj Isaíasoʼ. Ezequieleʼ tu yileʼ u yotoch Jéeobaeʼ tiaʼan «yóokʼol junpʼéel jach kaʼanal montaña[eʼ]», yéetel Isaíaseʼ tu yileʼ «u yotoch Jéeoba[eʼ] yaan u yetsʼkúuntaʼal maʼalob tu yóokʼol le montañaʼoboʼ». Tsʼoʼoleʼ Isaíaseʼ tu yaʼaleʼ le baʼax tu yiloʼ yaan u béeytal tu «tsʼook kʼiinoʼob» (Eze. 40:2; Isa. 2:2-4; ket yéetel Miqueas 4:1-4). Jeʼex k-ilkoʼ le kaʼapʼéel profecíaʼobaʼ táan u béeytaloʼob teʼ tu tsʼook kʼiinoʼobaʼ, maases béeychajoʼob 1919 le ka joʼopʼ u kaʼa adorartaʼal Jéeoba jeʼex uts tu tʼaaneʼ. Le ka úuch lelaʼ bey ka tsʼaʼabak u adoración yóokʼol junpʼéel kaʼanal montañaeʼ. *

¹⁴ Jeʼex túun k-ilkoʼ le baʼax tsʼaʼab u yil Ezequieloʼ yaan baʼax u yil yéetel le adoración ku tsʼaʼabal tiʼ Jéeoba teʼ kʼiinoʼobaʼ. Jeʼel bix tu yáantil le judíoʼob yanoʼob kaʼach Babiloniaoʼ, toʼon xaneʼ kaʼapʼéel bix jeʼel u yáantkoʼoneʼ: 1) ku kaʼansiktoʼon baʼaxoʼob unaj k-beetik utiaʼal k-adorartik Jéeoba jeʼex uts tu tʼaaneʼ, yéetel 2) ku yeʼesiktoʼon yaan u kʼuchul u kʼiinil u adorartaʼal chéen Jéeoba tuláakal yóokʼol kaab, leloʼ yaan u taasik yaʼab bendiciónoʼob.

15. ¿Baʼax unaj u kʼaʼajaltoʼon yoʼolal le templo tu yilaj Ezequieloʼ?

¹⁵ Koʼox ilik jujunpʼéel tiʼ le baʼaxoʼob tu yilaj Ezequiel teʼ templooʼ. Tukulteʼ táan a láakʼintik Ezequiel, chéen baʼaleʼ kʼaʼajaktecheʼ le baʼax táan a wilkoʼ maʼ letiʼe templo yaan teʼ kaʼanoʼ. Le baʼax ken a wileʼexoʼ yaan u kaʼansiktoʼon jujunpʼéel baʼaxoʼob yoʼolal le adoración k-tsʼáaik tiʼ Jéeoba teʼ kʼiinoʼobaʼ. Koʼox ilik jujunpʼéeliʼ.

16. ¿Baʼax ku kaʼansiktoʼon le bix úuchik u pʼiʼisil le templooʼ? (Ilawil le dibujo yaan tu káajbal le xookaʼ).

¹⁶ ¿Baʼaxten pʼiʼis tuláakal le templooʼ? Ezequieleʼ tu yileʼ le ángel bey de cobre u wíinkliloʼ jach maʼalob bix u pʼisik le pakʼoʼoboʼ, le entradaʼoboʼ, le cuartoʼob tuʼux ku yantal le guardiaʼoboʼ, le altaroʼ yéetel u táankabiloʼob le templooʼ. Maʼ xaaneʼ le bukaʼaj baʼaloʼob ku chʼaʼchiʼitaʼaloʼ jeʼel u beetik u chiʼibal u pool máakeʼ (Eze. 40:1–42:20; 43:13, 14). Chéen baʼaleʼ maʼalob ka tuukulnakoʼon tiʼ baʼaxoʼob jeʼel u páajtal k-kanikeʼ. Jéeobaeʼ tu beetaj u tsʼíibtaʼal tuláakal le baʼaloʼobaʼ utiaʼal u yeʼesik jach kʼaʼanaʼan u adorartaʼal jeʼex uts tu tʼaaneʼ. Letiʼeʼ u yaʼalmaj bix u kʼáat ka adorartaʼak. Le oʼolaleʼ le máaxoʼob aʼalik jeʼel u páajtal u adorartaʼal Dios jeʼel bixak u kʼáat máakeʼ chéen táan u tuskubaʼob. ¿Baʼax ku kaʼansiktoʼon  le bix úuchik u pʼiʼisil le templooʼ? Ku kaʼansiktoʼoneʼ Jéeobaeʼ seguro u beetik u kaʼa adorartaʼal teʼ tu tsʼook kʼiinoʼobaʼ. Yéetel le baʼaxoʼob u prometermoʼ yaan u béeytal jach jeʼex u yaʼalmiloʼ.

17. ¿Baʼax ku kʼaʼajsik tiʼ le máaxoʼob meyajtik Dios le pakʼ baʼpachtmil u terrenoil le templooʼ?

¹⁷ Le pakʼ baʼpachtmil u terrenoil le templooʼ. Le pakʼ tu yilaj Ezequieloʼ tu kʼaʼajsaj tiʼ le máaxoʼob meyajtik Diosoʼ maʼ unaj u chaʼikoʼob u náatsʼal tu yotoch Jéeoba le baʼaloʼob jeʼel u kʼaskúuntik le adoración ku tsʼáaikoʼob tiʼoʼ (xok Ezequiel 43:7-9). Le baʼax kʼaʼajsaʼabtiʼoboʼ jach jeʼel u yáantkoʼon xan teʼ kʼiinoʼobaʼ. Tu añoil 1919, jáalkʼabtaʼab u kaajal Dios tiʼ le nojoch Babiloniaoʼ. Teʼ año jeʼeloʼ Cristoeʼ tu tsʼáaj le esclavo chúukaʼan u yóol yéetel yaan u naʼatoʼ. Desde leloʼ u kaajal Dioseʼ ku kanáantkuba tiʼ le kaʼansajoʼob maʼ jaajtakoʼob bey xan tiʼ le baʼaloʼob mix baʼal yaan u yil yéetel le adoración ku tsʼaʼabal tiʼ Jéeobaoʼ. Le oʼolal tak teʼ kʼiinoʼobaʼ jach k-kanáantikba tiʼ le kaʼansajoʼob jeʼel u kʼaskúuntikoʼob le adoración k-tsʼáaik tiʼ Jéeobaoʼ. Tsʼoʼoleʼ maʼatech k-beetik xan negocioʼob teʼ naj tuʼux ku muchʼkuba u testigoʼob Jéeobaoʼ, tumen k-ojel le baʼaloʼob beyaʼ maʼ unaj k-xaʼakʼtik yéetel le adoración k-tsʼáaiktiʼoʼ (Mar. 11:15, 16).

18, 19. 1) ¿Baʼax ku kaʼansiktoʼon le nukuch entradaʼob tu yilaj Ezequieloʼ? 2) Tsol tiʼ baʼax tuukuliloʼob unaj k-kanáantikba yéetel baʼaxten.

¹⁸ Le nukuch entradaʼoboʼ. ¿Baʼax ku kaʼansiktoʼon le nukuch entradaʼob tu yilaj Ezequieloʼ? Tiʼ le judíoʼoboʼ tu kaʼansajtiʼobeʼ maʼ chéen jeʼel bixak unaj u adorartaʼal Jéeobaiʼ. Kux túun teʼ kʼiinoʼobaʼ, ¿baʼax ku kaʼansiktoʼon? Bejlaʼa xaneʼ táan k-adorartik Jéeoba tu táankabil le nojoch templo tu yaʼalaj Pablooʼ, le oʼolal jach unaj k-kuxtal jeʼex uts tu tʼaanoʼ yéetel maʼ unaj k-beetik baʼaloʼob u pʼekmaj Jéeobaiʼ (Rom. 12:9; 1 Ped. 1:14, 15). Teʼ tu tsʼook kʼiinoʼobaʼ Jéeobaeʼ táan u nuʼuktik u kaajal utiaʼal ka kuxlak jach jeʼex u yaʼalik letiʼoʼ. * Le oʼolaleʼ le máaxoʼob maʼ tu arrepentiroʼoboʼ ku jóoʼsaʼaloʼob teʼ múuchʼuliloʼ (1 Cor. 5:11-13). Kʼaʼajaktoʼon xaneʼ ichil le nukuch entradaʼoboʼ tiaʼan kaʼach le cuartoʼob tuʼux ku yantal le guardiaʼoboʼ. Leloʼ ku kaʼansiktoʼoneʼ le máax maʼ maʼalob yanil tu táan Dioseʼ chéen kunel le bix u adorartik Jéeobaoʼ. Utiaʼal k-okol tu templo Jéeobaeʼ maʼ chéen unaj k-muchʼikba yéetel u testigoʼob Jéeobaiʼ, baʼaxeʼ unaj k-kuxtal jach jeʼex u yaʼalik letiʼoʼ (Sant. 4:8). Beyoʼ kex chuup le yóokʼol kaab yéetel baʼaloʼob kʼaastakoʼ, le adoración ku tsʼaʼabal tiʼ Jéeobaoʼ maʼ tu kʼastal.

¹⁹ Le yóokʼol kaabaʼ yaan u bin u maas kʼastal táanil tiʼ u kʼuchul le xuʼulsajiloʼ. Le Bibliaoʼ ku yaʼalik: «Le kʼasaʼan máakoʼob bey xan le máakoʼob yaanal máax u taaskubaʼoboʼ yaan u bin u maas kʼastaloʼob táan u tuskoʼob uláakʼ máakoʼob yéetel táan u tuʼusloʼob xan» (2 Tim. 3:13). Bejlaʼeʼ yaʼab máax tuklikeʼ le baʼaxoʼob ku yaʼalik le Bibliaoʼ jach úuchben, maʼ patal baʼax ku yaʼalikiʼ yéetel maʼ tu chaʼik u beetik máak chéen baʼax u kʼáat. ¿Yaan wa xan a tuukul jeʼex letiʼoboʼ? Le Bibliaoʼ kéen tʼaanak tiʼ le homosexualoʼoboʼ ku  yaʼalikeʼ jach kʼaas le baʼax ku beetkoʼoboʼ. Le oʼolal Jéeobaeʼ ku yaʼaliktoʼon baʼax jeʼel u yúuchultoʼon wa ku joʼopʼol k-tuukul jeʼex le yóokʼol kaabaʼ (Rom. 1:24-27, 32). ¿Baʼax jeʼel a beetik wa yaan máax ku káajal u yaʼaliktech maʼ maʼalob le baʼax ku yaʼalik le Bibliaoʼ? ¿Yaan wa a beetik baʼax ku yaʼalik wa maas yaan a wuʼuyik u tʼaan Jéeoba? Teʼ súutukiloʼob beyoʼ maʼalob ka tuukulnakech tiʼ u nukuch entradaʼob le templo tu yilaj Ezequieloʼ. Lelaʼ yaan u kʼaʼajsiktecheʼ kex jeʼel baʼaxak ka u beet wa ka u yaʼal le yóokʼol kaabaʼ Jéeobaeʼ maʼatech u kʼexik le baʼaxoʼob u yaʼalmoʼ. ¿Yaan wa a beetik baʼax maʼalob utiaʼal a weʼesik tiaʼanech tu tséel Jéeobaeʼ?

20. ¿Baʼaxten ku kiʼimaktal u yóol le yaʼabkach máakoʼob yoʼolal u táankabiloʼob le templo tu yilaj Ezequieloʼ?

²⁰ U táankabiloʼob. Maʼ xaaneʼ Ezequieleʼ jach kiʼimakchaj u yóol le ka eʼesaʼabtiʼ u nojoch táankabil le templooʼ, tumen tu yileʼ yaʼab máakoʼob jeʼel u páajtal u adorarkoʼob Jéeoba teʼeloʼ. Teʼ kʼiinoʼobaʼ le máaxoʼob adorartik Jéeobaoʼ bey tiaʼanoʼob tu nojoch táankabil le templooʼ. Le baʼax tu yilaj Ezequieloʼ jach ku kiʼimakkúuntik u yóol le «yaʼabkach máakoʼob[oʼ]», tumen letiʼobeʼ táan u adorarkoʼob Jéeoba tu nojoch táankabil u templooʼ (Apo. 7:9, 10, 14, 15). Ezequieleʼ tu yileʼ tu nojoch táankabil le templooʼ yaan yaʼab lugaroʼob tuʼux ku páajtal u jaantaʼal u ofrendailoʼob múul janal (Eze. 40:17). Kéen janak le judíoʼob teʼeloʼ bey táan u janaloʼob yéetel Jéeobaeʼ, lelaʼ ku yeʼesik maʼalob u biskubaʼob tu yéetel. Teʼ kʼiinoʼobaʼ maʼatech k-kʼubik sacrificioʼob jeʼex u yaʼalik le Ley ka  beetaʼak kaʼach tumen le judíoʼoboʼ. Chéen baʼaleʼ yaan sacrificioʼob jeʼel u páajtal k-kʼubik tiʼ Dioseʼ, lelaʼ k-beetik le kéen comentarnakoʼon teʼ muchʼtáambaloʼoboʼ bey xan kéen k-tsikbalt u tʼaan Dios tiʼ le máakoʼoboʼ (Heb. 13:15). Tsʼoʼoleʼ k-múul janal yéetel Jéeoba kéen k-jóoʼs u yutsil le kaʼansajoʼob ku tsʼáaiktoʼonoʼ. Le oʼolaleʼ k-uʼuyikba jeʼex u paalaloʼob Coréoʼ, letiʼobeʼ tu kʼayoʼob tiʼ Jéeoba: «¡Tak chéen junpʼéel kʼiin ka yanaken tu táankabil a wotocheʼ maas maʼalob ke ka yanaken mil u téenel yaanal lugar!» (Sal. 84:10).

21. ¿Baʼax jeʼel u kanik le yéeyaʼanoʼob tiʼ le sacerdoteʼob tu yilaj Ezequieloʼ?

²¹ Le sacerdoteʼoboʼ. Ezequieleʼ tu yileʼ u entradailoʼob le chan táankab tuʼux ku yokol le sacerdoteʼob yéetel le levitaʼoboʼ, jach igualoʼob tiʼ u entradailoʼob le nojoch táankab tuʼux ku yokol le máakoʼob maʼ sacerdoteʼoboʼ mix levitaʼoboʼ. Leloʼ ku kʼaʼajsik kaʼach tiʼ le sacerdoteʼoboʼ letiʼob xaneʼ unaj u adorarkoʼob Jéeoba jeʼex uts tu tʼaaneʼ. Teʼ kʼiinoʼobaʼ le máaxoʼob yéeyaʼanoʼob utiaʼal u binoʼob kaʼanoʼ maʼ chéen tiʼ junpʼéel tribu u taaloʼobiʼ. Chéen baʼaleʼ ku yaʼalaʼaltiʼob: «Teʼexeʼ ‹junpʼéel tribu yéeyaʼaneʼex, sacerdoteʼex yéetel reyeʼex, junpʼéel kaaj santoʼex›» (1 Ped. 2:9). Úuchjeakileʼ le sacerdoteʼoboʼ ku adorarkoʼob Jéeoba teʼ chan táankaboʼ, chéen baʼaleʼ u maasil israelitaʼoboʼ teʼ nojoch táankaboʼ. Teʼ kʼiinoʼobaʼ junmúuchʼ k-adorartik Jéeoba yéetel le sukuʼunoʼob yéeyaʼanoʼoboʼ, chéen baʼaleʼ letiʼobeʼ maas naatsʼ yanikoʼob tiʼ Dios tumen máataʼanoʼob bey u paalaloʼobeʼ (Gál. 4:4-6). Le yéeyaʼanoʼoboʼ yaan baʼax ku kankoʼob tiʼ le baʼax tu yilaj Ezequieloʼ. Letiʼobeʼ u yojloʼobeʼ tak le sacerdoteʼob kaʼachoʼ jeʼel u páajtal u tsolnuʼuktaʼaloʼob yéetel u castigartaʼaloʼobeʼ. Le máaxoʼob yéeyaʼanoʼob yéetel le u maasil sukuʼunoʼoboʼ unaj u kʼaʼajskoʼobeʼ letiʼobeʼ junmúuchʼ tamanoʼob «yáanal u kʼab juntúuliliʼ j-kanan taman» (xok Juan 10:16).

22, 23. 1) ¿Baʼax jeʼel u kanik le ancianoʼob tiʼ u nojchil le kaajoʼ? 2) ¿Baʼax wal ken u beet Jéeoba kéen máanak kʼiineʼ?

²² U nojchil le kaajoʼ. Ezequieleʼ tu yileʼ u nojchil le kaajoʼ yaan autoridad tiʼ yéetel ku yáantaj utiaʼal u kʼuʼubul le ofrendaʼoboʼ. Chéen baʼaleʼ le kéen xiʼik teʼ templooʼ unaj u tsʼáaikuba yáanal u autoridad le sacerdoteʼoboʼ, tumen letiʼeʼ maʼ sacerdoteiʼ (Eze. 44:2, 3; 45:16, 17; 46:2). Leloʼ ku yeʼesik baʼax ku páaʼtaʼal tiʼ le máaxoʼob tsʼaʼan autoridad tiʼob teʼ múuchʼulil teʼ kʼiinoʼobaʼ. Tuláakal le ancianoʼob yéetel le superintendenteʼob tiʼ circuitooʼ unaj u tsʼáaikubaʼob yáanal u autoridad le esclavo chúukaʼan u yóol yéetel yaan u naʼatoʼ (Heb. 13:17). Le ancianoʼoboʼ ku yáantkoʼob u maasil sukuʼunoʼob utiaʼal u alabarkoʼob Dios teʼ muchʼtáambaloʼoboʼ bey xan le kéen jóokʼkoʼob u tsikbaltoʼob u tʼaan Dios (Efe. 4:11, 12). Maʼ tu tuʼubultiʼobeʼ Jéeobaeʼ tu tsolaj u nuʼuk tiʼ u nuuktakil Israel úuchik u píitmáan u kʼaboʼob yéetel le autoridad tsʼaʼantiʼoboʼ (Eze. 45:9). Teʼ kʼiinoʼobaʼ le ancianoʼoboʼ u yojloʼob jeʼel u páajtal xan u tsoʼolol u nuʼuktiʼobeʼ. Hasta ku tsʼáaikoʼob u diosboʼotikil  tumen ku yilkoʼob táan u yáantaʼaloʼob tumen Jéeoba utiaʼal u beetkubaʼob maas maʼalob j-kanan tamanoʼob (xok 1 Pedro 5:1-3).

²³ Teʼ Paraíso xanoʼ Jéeobaeʼ yaan u tsʼáaik máakoʼob nuʼuktik u kaajal. Teʼ kʼiinoʼobaʼ yaʼab ancianoʼob táan u kaʼansaʼaloʼob tumen Jéeoba utiaʼal ka u kanáantoʼob u tamanoʼob kéen yanakoʼob teʼ Paraísooʼ (Sal. 45:16). ¿Máasaʼ jach maʼalob ka tsʼaʼabakoʼob u nuʼuktoʼob máak teʼ túumben luʼumoʼ? Maʼ xaaneʼ kéen máanak kʼiineʼ Jéeobaeʼ yaan u yáantkoʼon k-maas naʼat bix uláakʼ u béeytal le baʼax tu yilaj Ezequieloʼ bey xan le uláakʼ promesaʼob u beetmoʼ. Maʼ xaaneʼ jujunpʼéel baʼaloʼobeʼ yaan u béeytaloʼob junpʼéel bix maʼ t-tuklik teʼ kʼiinoʼobaʼ. Chéen kʼaʼabéet k-páaʼtik k-il baʼax kun úuchul.

24, 25. ¿Baʼax kaʼapʼéel baʼaloʼob tu yilaj Ezequiel eʼesik le bendiciónoʼob ken u kʼam u kaajal Jéeobaoʼ?

²⁴ Kʼaʼajaktoʼoneʼ le baʼax maas kʼaʼanaʼan tu yilaj Ezequieloʼ letiʼe u yokol Jéeobaeʼ teʼ templooʼ. Utiaʼal u pʼáatal mantatsʼ teʼ templooʼ Jéeobaeʼ tu yaʼalaj tiʼ le kaaj kʼaʼabéet u adorarkoʼob jach jeʼex uts tu tʼaanoʼ (Eze. 43:4-9). ¿Baʼax utsil ken u taas tiʼ le máakoʼob yéetel tiʼ le luʼum wa ku yantal Jéeoba chúumuk tiʼ letiʼoboʼ?

²⁵ Ezequieleʼ tʼaanaj tiʼ kaʼapʼéel baʼaloʼob eʼesik le bendiciónoʼob ken u kʼam máakoʼ. Yáaxeʼ tu yilaj junpʼéel río ku jóokʼol teʼ templooʼ, yéetel le tuʼux ku máan le jaʼoʼ yaʼab baʼax ku kuxtaliʼ. U kaʼapʼéeleʼ tu yilaj bix jaʼatsik le luʼumoʼ yéetel bix pʼáatik le templo jach tu chúumukil le luʼumoʼ. ¿Yaan wa baʼax ku kaʼansiktoʼon le baʼax tu yiloʼ? Yaan. Teʼ kʼiinoʼobaʼ Jéeobaeʼ tsʼoʼok u limpiartik u templo yéetel tsʼoʼok u yokol ichil, lelaʼ ku yeʼesiktoʼoneʼ letiʼeʼ jach u kʼáat ka k-adorart jeʼex uts tu tʼaaneʼ (Mal. 3:1-4). Tu xookil 19 tak 21 tiʼ le libroaʼ yaan k-xakʼaltik le kaʼapʼéel baʼal tu yilaj Ezequieloʼ.