1-3. ¿Baʼax beet u jach yaatal u yóol le judíoʼob yanoʼob kaʼach Babiloniaoʼ? (Ilawil le dibujo yaan tu káajbal le xookaʼ).

EZEQUIELEʼ tsʼoʼok u máan cinco años táan u tsʼáaik u yojéelt le judíoʼob bisaʼanoʼob Babilonia yaan u xuʼulsaʼal Jerusalénoʼ. Letiʼeʼ tu yaʼalajtiʼob baʼax ku taal u kʼiin, tsʼoʼoleʼ tu ketaj yéetel tu yeʼesajtiʼob bix kun xuʼulsbil le kaajoʼ. Chéen baʼaleʼ letiʼobeʼ maʼ tu beetoʼob u cuentailiʼ, tu tukloʼob chéen minaʼan u cuentail le baʼax tu beetaj yéetel tu yaʼalaj Ezequieloʼ. Le judíoʼoboʼ ku tuklikoʼob kaʼacheʼ Jéeobaeʼ maʼ ken u chaʼa u xuʼulsaʼal Jerusalén. Le oʼolal le ka baʼpachtaʼab tumen u soldadoiloʼob Babiloniaeʼ tu tukloʼob láayliʼ seguro yanil le máaxoʼob yanoʼob ichil le kaajoʼ.

² Chéen baʼaleʼ le ka máan dos años baʼpachtaʼan Jerusaléneʼ taal juntúul máakeʼ ka tu yaʼalaj tiʼ le judíoʼob yanoʼob Babiloniaoʼ: «¡Tsʼoʼok u chʼaʼabal le kaajoʼ!». Le judíoʼoboʼ jach yaachaj u yóoloʼob. Maʼ taak kaʼach u creerkoʼob wa tsʼoʼok u xuʼulsaʼal kaʼach: Jerusalén, le templooʼ yéetel u luʼumoʼoboʼ. ¡Tu yuʼuboʼob tsʼoʼoktiʼob beyoʼ! ¡Pʼáat minaʼan esperanza tiʼob! (Eze. 21:7; 33:21).

³ Chéen baʼaleʼ teʼ kʼiinoʼob jach yaachajaʼan u yóol le judíoʼoboʼ, Jéeobaeʼ tu tsʼáaj u yil Ezequiel junpʼéel baʼal beet u líikʼil u yóoloʼob.  ¿Baʼax taak kaʼach u tsʼáaik Jéeoba u yojéelt le judíoʼoboʼ? Le baʼax tu yilaj Ezequieloʼ, ¿baʼax yaan u yil yéetel u kaajal Dios teʼ kʼiinoʼobaʼ? ¿Bix jeʼel u yáantik cada juntúul tiʼ toʼoneʼ? Utiaʼal k-ojéeltikeʼ koʼox ilik le baʼax tu yeʼesaj Jéeoba tiʼ Ezequieloʼ.

4. ¿Baʼax tu tsʼáaj cuenta Ezequiel le táan u xíimbal teʼ táax luʼumoʼ?

⁴ Xok Ezequiel 37:1-10. Ezequieleʼ tu yileʼ kulukbal tiʼ junpʼéel táax luʼum chuup yéetel baakoʼob. Jéeoba túuneʼ tu beetaj u máan «chúumuk tiʼ le baakoʼob» utiaʼal maʼ u tuʼubsik le baʼax ku yilkoʼ. Le táan u bin u xíimbaloʼ Ezequieleʼ tu tsʼáaj cuentaeʼ «jach yaʼab baakoʼob yanoʼob teʼ táax luʼumoʼ yéetel jach tikinoʼob».

5. ¿Baʼax unaj kaʼach u profetizartik Ezequiel yoʼolal le baakoʼob yéetel le iikʼoʼ? ¿Baʼax úuch le ka tsʼoʼok u profetizar yoʼolal le baakoʼob yéetel le iikʼoʼ?

⁵ Le ka tsʼoʼokeʼ Jéeobaeʼ tu yaʼalaj tiʼ Ezequiel: «Aʼal baʼax ku taal u kʼiinil u yúuchul tiʼ le baakoʼoboʼ». Letiʼeʼ unaj u yaʼalik tiʼ le baakoʼoboʼ: «Yaan a kaʼa kuxtaleʼex» (Eze. 37:4-6). Chéen pʼelak tsʼoʼokik u yaʼalik baʼax kun úuchul tiʼ le baakoʼoboʼ Ezequieleʼ tu yuʼubaj «yaan baʼax ku juum, u juum baʼaloʼob ku kʼoʼokʼolkubaʼob, le baakoʼob túunoʼ joʼopʼ u nupkubaʼob», tsʼoʼoleʼ tu yilaj xan «bix úuchik u yantal u xiichʼeloʼob yéetel u bakʼeloʼob yéetel bix úuchik u piʼixiloʼob yéetel u yootʼeloʼob» (Eze. 37:7, 8). Tsʼoʼoleʼ Jéeobaeʼ tu yaʼalaj tiʼ Ezequiel: «Profetizarneneʼ ka a waʼal tiʼ le iikʼoʼ: [...] ‹Máankech tu yóokʼol le máakoʼob kíimsaʼanoʼoboʼ›». Le ka tsʼoʼok u profetizar Ezequieleʼ «le iikʼ ku tsʼáaik kuxtaloʼ ooktiʼobeʼ ka káaj u kuxtaloʼob yéetel u waʼataloʼob, beyoʼob junpʼéel nojoch ejércitoeʼ» (Eze. 37:9, 10).

6. ¿Baʼax tu yaʼalaj Jéeoba tiʼ Ezequiel yoʼolal le baakoʼoboʼ?

⁶ Le ka tsʼoʼokeʼ Jéeobaeʼ tu yaʼalaj tiʼ Ezequiel baʼax u kʼáat u yaʼal le baʼax tu tsʼáaj u yiloʼ. Letiʼeʼ tu yaʼalajtiʼ: «Le baakoʼobaʼ ku chíikbeskoʼob u kaajil Israel». Lelaʼ jach jaaj, tumen le ka tu yojéeltaj le judíoʼob yanoʼob Babilonia tsʼoʼok u xuʼulsaʼal Jerusaléneʼ tu yuʼuboʼob bey kíimil tu beetoʼobeʼ. Le táan u yokʼoloʼoboʼ joʼopʼ u yaʼalikoʼob: «K-baakeloʼobeʼ tsʼoʼok u tijloʼob yéetel tsʼoʼok u pʼáatal minaʼantoʼon esperanza. Tsʼoʼok u xuʼulsaʼaltoʼon junpuliʼ» (Eze. 37:11; Jer. 34:20). Le oʼolaleʼ utiaʼal u líiʼsik u yóoloʼobeʼ Jéeobaeʼ tu yaʼaleʼ le baʼax tu tsʼáaj u yil Ezequieloʼ ku yeʼesik junpʼéel jatsʼuts baʼal ku taal u kʼiin u yúuchul.

7. Le baʼax ku yaʼalik Ezequiel 37:12-14, ¿baʼax tu yeʼesaj tiʼ le judíoʼoboʼ? ¿Bix wal tu yuʼubiluba le judíoʼoboʼ?

⁷ Xok Ezequiel 37:12-14. Le baʼax tu yilaj Ezequieloʼ ku yeʼesikeʼ Jéeobaeʼ yaan u kaʼa kuxkíintik le judíoʼob tu yuʼuboʼob bey kíimil tu beetoʼoboʼ, yaan u kaʼa biskoʼob tu luʼumoʼob yéetel tiʼ kun pʼáatloʼob kajtaliʼ. Tsʼoʼoleʼ le ka tʼaʼanoʼob tumen Jéeobaeʼ aʼalaʼabtiʼob: «In kaajal». ¡Bukaʼaj wal kiʼimakchajik u yóol le judíoʼob yanoʼob Babiloniaoʼ! ¿Baʼaxten jeʼel u páajtal u creerkoʼob yaan u béeytal le baʼax  aʼalaʼabtiʼoboʼ? Tumen Jéeoba aʼal yaan u yúuchul. Letiʼeʼ tu yaʼalaj: «Teen Jéeoba, teen aʼale yéetel teen beete».

8. 1) ¿Baʼaxten jeʼel u páajtal u yaʼalaʼaleʼ tuláakal u kaajil Israeleʼ bey kimen kaʼacheʼ? 2) ¿Bix u yeʼesik Ezequiel 37:9 maʼ chéen bey úuchik u kíimil le máakoʼoboʼ? (Ilawil le notaoʼ).

⁸ ¿Bix béeychajik tiʼ u kaajil Israel junjaats tiʼ le baʼax tu yilaj Ezequieloʼ? Tu añoil 740 t.t.J., xuʼulsaʼab u reinoil le diez tribuʼoboʼ yéetel u kajnáaliloʼobeʼ bisaʼaboʼob táanxel luʼumil, jeʼel u páajtal u yaʼalaʼaleʼ teʼ kʼiinoʼoboʼ káaj u kíimil u kaajil Israel. Ka máan 130 añoseʼ bisaʼab xan táanxel luʼumil u reinoil le kaʼapʼéel tribuʼoboʼ. Bey úuchik u bisaʼal táanxel luʼumil tuláakal «u kaajil Israel[oʼ]» (Eze. 37:11). Le máaxoʼob bisaʼaboʼoboʼ bey kíimoʼobeʼ, beyoʼob jeʼex le baakoʼob tu yilaj Ezequieloʼ. * Kʼaʼajaktoʼon xaneʼ Ezequieleʼ tu yileʼ le baakoʼoboʼ «jach tikinoʼob», leloʼ ku yeʼesikeʼ u kaajil Israeleʼ yaan u xáantal bey kimen yanileʼ. Wa k-sumartik le bukaʼaj tiempo bisaʼan táanxel luʼumil u reinoil le diez tribuʼob yéetel le kaʼapʼéel tribuʼoboʼ ku chukik maas tiʼ 200 años, desde 740 tak 537 t.t.J. (Jer. 50:33).

9. ¿Baʼaxten chíikaʼan le baʼax úuch tiʼ u kaajil Israel yéetel le baʼax úuch tiʼ «u Israel Dios» teʼ kʼiinoʼobaʼ?

⁹ Le profecíaʼob tu yaʼalaj Ezequiel yoʼolal u kaajil Israeloʼ yaan baʼax u yil yéetel le máaxoʼob adorartik Jéeoba teʼ kʼiinoʼobaʼ (Hech. 3:21). Úuchjeakileʼ u kaajil Israeleʼ bey kíimsaʼabeʼ yéetel xáanchaj bey kimeneʼ. «U Israel Dios», wa le máaxoʼob yéeyaʼanoʼob utiaʼal u binoʼob kaʼanoʼ, bey kíimsaʼaboʼob xaneʼ yéetel xáanchaj bey kimenoʼobeʼ (Gál. 6:16). Jeʼel u páajtal u yaʼalaʼaleʼ pʼáatoʼob beyoʼob jeʼex le baakoʼob jach tikinoʼoboʼ (Eze. 37:2). Jeʼex tsoʼolik teʼ xook 9 teʼ kaʼapʼéel siglo tsʼ.t.J., káaj u esclavizartaʼal le sukuʼunoʼob yéeyaʼanoʼoboʼ yéetel jach xáanchaj bey yaniloʼoboʼ, úuch jach jeʼex tu yaʼalil Jesús le ka tʼaanaj tiʼ le maʼalob trigo yéetel le kʼaakʼas xíiwoʼ (Mat. 13:24-30).

10. 1) ¿Baʼax ku yaʼalik Ezequiel 37:7, 8 yoʼolal u kaajal Dios? 2) ¿Baʼax áant le judíoʼob utiaʼal u creerkoʼob yaan u suutoʼob tu luʼumoʼoboʼ?

¹⁰ Jéeobaeʼ tu yaʼaleʼ u kaajaleʼ jujunpʼíitil kun kaʼa kuxtal (Eze. 37:7, 8). Le judíoʼoboʼ jujunpʼíitil úuchik u kaʼa creerkoʼob yaan u kʼuchul u kʼiinil u suutoʼob tu luʼumil Israel. ¿Baʼax áantoʼob utiaʼal u kaʼa creerkoʼob? Junpʼéel baʼax áantoʼobeʼ letiʼe baʼax u yaʼalmaj uláakʼ profetaʼob jeʼex Isaíaseʼ. Letiʼeʼ tu yaʼaleʼ yaan judíoʼob kun suutoʼob tu luʼumoʼob, letiʼobeʼ santoʼob tu táan Dios (Isa. 6:13; Job 14:7-9). Yaan xan uláakʼ baʼaloʼob tu yaʼalaj Ezequiel jach tu líiʼsaj u yóol le judíoʼoboʼ. Uláakʼ baʼax áantoʼobeʼ letiʼe u yantal ichiloʼob máaxoʼob chúukaʼan u yóol u meyajtoʼob Dios jeʼex Danieleʼ. Tsʼoʼoleʼ le judíoʼoboʼ tu yiloʼob xan bix xuʼulsaʼabik Babilonia tu añoil 539 t.t.J.

11, 12. 1) ¿Bix úuchik u kaʼa kuxtal «u Israel Dios»? (Ilawil le cuadro «Jujunpʼíitil káajik u kaʼa adorartaʼal Jéeoba»). 2) Tu yoʼolal le baʼax ku yaʼalik Ezequiel 37:10, ¿baʼax ku taaktal u yojéeltaʼal?

¹¹ «U Israel Dios» wa le máaxoʼob yéeyaʼanoʼob utiaʼal u binoʼob kaʼanoʼ jujunpʼíitil xan úuchik u kaʼa kuxtaloʼob. ¿Baʼaxten k-aʼalik beyoʼ? Tumen máan yaʼab tiempo bey kimenoʼobeʼ tak ka kʼuch u kʼiinil u yuʼubaʼal «yaan baʼax ku juum», u juum le máakoʼob chúukaʼan u yóol u meyajtoʼob Diosoʼ, letiʼobeʼ joʼopʼ u defenderkoʼob u jaajil adoración. Jeʼex teʼ siglo 16, William Tyndaleeʼ tu traducirtaj le Biblia ich inglésoʼ, le oʼolal yaʼab máakoʼob jeʼel u páajtal kaʼach u xokikoʼob le Bibliaoʼ. Chéen baʼaleʼ u nuuktakil le Iglesiaoʼ junpuliʼ maʼ utschaj tu tʼaanoʼob le baʼax tu beetoʼ ka tu kíimsoʼob. Kex beyoʼ yaan uláakʼ máakoʼob maʼ sajakchaj u traducirtoʼob le Biblia ichil uláakʼ idiomaʼoboʼ. Bey túunoʼ le sáasil ku taal tiʼ u Tʼaan Diosoʼ joʼopʼ u juul teʼ yóokʼol kaab yaan ich éeʼjochʼeʼeniloʼ.

 ¹² Le ka máan kʼiineʼ Charles T. Russell yéetel le máaxoʼob áantkoʼ joʼopʼ u xakʼalxoktikoʼob le Biblia utiaʼal u kaxtikoʼob u jaajiloʼ. Jeʼel u páajtal u yaʼalaʼaleʼ teʼ kʼiinoʼoboʼ bey káaj u yantal «xiichʼ yéetel bakʼ» tu yóokʼol le baakoʼoboʼ. Le revista La Torre del Vigía de Sion (Zionʼs Watch Tower) yéetel uláakʼ publicaciónoʼobeʼ tu yáantoʼob le máakoʼob uts u puksiʼikʼaloʼob utiaʼal u kankoʼob u jaajiloʼ, le oʼolal tu chʼaʼtukloʼob u muchʼkubaʼob yéetel le máaxoʼob yéeyaʼanoʼob tumen Diosoʼ. Tu káajbal le siglo 20, le sukuʼunoʼob yéeyaʼanoʼoboʼ jach áantaʼaboʼob tumen le «Foto-Drama de la Creaciónoʼ» bey xan tumen le libro El misterio terminado (The Finished Mystery). Maʼ sen úuch tiʼ leloʼ, jeʼex u yaʼalmil Diosoʼ, kʼuch u kʼiinil u «waʼatal» u kaajal (Eze. 37:10). ¿Baʼax kʼiin ka waʼalaj u kaajal Dios yéetel bix úuchik u beetik? Utiaʼal k-núukik le kʼáatchiʼaʼ koʼox kʼaʼajsik le baʼax úuch tu kʼiinil le judíoʼob yanoʼob Babiloniaoʼ.

13. 1) Le baʼax ku yaʼalik Ezequiel 37:10, 14, ¿bix béeychajik tu añoil 537? 2) ¿Baʼax tekstoiloʼob eʼesik yaan tiʼ u kajnáaliloʼob u reinoil le diez tribuʼob suunajoʼob tu luʼumil Israeloʼ?

¹³ Tu káajbal le año 537 t.t.J., le judíoʼob yanoʼob Babiloniaoʼ tu yiloʼob u béeytal le baʼax tsʼaʼab u yil Ezequieloʼ. ¿Baʼax úuch teʼ kʼiinoʼoboʼ? Jéeobaeʼ bey tu kaʼa kuxkíintaj le judíoʼoboʼ yéetel tu beetaj «u waʼataloʼob», lelaʼ úuch le ka tu jáalkʼabtoʼob yéetel le ka tu beetaj u suutoʼob tu luʼumil Israeloʼ. Teʼ kʼiinoʼoboʼ kex 42,360 israelita’ob  yéetel kex 7,000 máakoʼob maʼ judíoʼob jóokʼoʼob Babilonia. Letiʼobeʼ binoʼob kajtal tu luʼumil Israel utiaʼal u jel líiʼskoʼob u kaajil Jerusalén yéetel u temploil (Esd. 1:1-4; 2:64, 65; Eze. 37:14). Le ka máan 70 añoseʼ kex 1,750 judíoʼob suunajoʼob yéetel Esdras tu kaajil Jerusalén (Esd. 8:1-20). Bey túunoʼ maas tiʼ 44,000 judíoʼob suunajoʼob Jerusalén, beyoʼob «junpʼéel nojoch ejércitoeʼ» (Eze. 37:10). Tsʼoʼoleʼ le Bibliaoʼ ku yaʼalikeʼ ichil le judíoʼob suunajoʼob tu luʼumil Israeloʼ yaan máaxoʼob ku taaloʼob kaʼach tiʼ u reinoil le diez tribuʼoboʼ. Kʼaʼajaktoʼoneʼ tu añoil 740 t.t.J., le asirioʼoboʼ tu bisoʼob táanxel luʼumil u kajnáaliloʼob le u reinoil le diez tribuʼoboʼ. Beoraaʼ u chʼiʼibal le máaxoʼob bisaʼaboʼoboʼ táan xan u suutoʼob utiaʼal u jel líiʼskoʼob le templooʼ (1 Cró. 9:3; Esd. 6:17; Jer. 33:7; Eze. 36:10).

14. 1) ¿Baʼax eʼesik maʼ chéen tu kʼiinil le judíoʼob béeychaj le baʼax ku yaʼalik Ezequiel 37:24? 2) ¿Baʼax úuch tu añoil 1919? (Ilawil le cuadro «Le ‹tikin baakoʼoboʼ› yéetel le ‹kaʼatúul testigoʼoboʼ›»).

¹⁴ Le baʼax tu yilaj Ezequieloʼ maʼ chéen tu kʼiinil le judíoʼob béeychajoʼ. Tiʼ uláakʼ junpʼéel profecíaeʼ Jéeobaeʼ tu yaʼalaj tiʼ Ezequieleʼ yaan u kaʼa béeytal teʼ kʼiinoʼob kéen káajak u beetik u Reyil Jesucristo, le maas Nojoch Davidoʼ (Eze. 37:24). * Le ka tu tsʼáaj u espíritu santo Jéeoba yóokʼol u kaajal tu añoil 1919, kaʼa béeychaj le baʼax tu yilaj Ezequieloʼ. U kaajal túuneʼ kaʼa kuxlaji yéetel béeychaj u jóokʼloʼob tiʼ le Nojoch Babiloniaoʼ (Isa. 66:8). Le ka tsʼoʼokeʼ Jéeobaeʼ tu chaʼaj u suutoʼob ‹tu luʼumoʼob›: lelaʼ u kʼáat u yaʼaleʼ yanchaj  jeetsʼelil ichiloʼob yéetel joʼopʼ u kaʼa biskubaʼob yéetel Dios. ¿Bix úuchik u pʼáatal «junpʼéel nojoch ejército» u kaajal Jéeoba teʼ kʼiinoʼobaʼ?

15, 16. 1) ¿Bix úuchik u pʼáatal «junpʼéel nojoch ejército» u kaajal Jéeoba teʼ kʼiinoʼobaʼ? 2) Le baʼax tu yilaj Ezequieloʼ, ¿bix jeʼel u yáantkoʼon k-aktáant le baʼaxoʼob k-muʼyajtikoʼ? (Ilawil le cuadro «Jéeobaeʼ ku yáantkoʼon líikʼil tu kaʼatéen»).

¹⁵ Cristoeʼ tu tsʼáaj le esclavo chúukaʼan u yóol yéetel yaan u naʼat tu añoil 1919. Maʼ sen úuch tiʼ leloʼ, le máaxoʼob meyajtik Diosoʼ káaj u yilkoʼob u béeytal le baʼax tu yaʼalaj Zacaríasoʼ, letiʼeʼ juntúul profeta yaan kaʼach ichil le máaxoʼob suunajoʼob tu luʼumil Israeloʼ. Zacaríaseʼ u yaʼalmaj: «Yaʼabkach kaajoʼob yéetel naciónoʼob jach yaan u páajtaliloʼobeʼ yaan u taaloʼob [...] utiaʼal u meyajtikoʼob Jéeoba». Le máakoʼobaʼ tiaʼanoʼob ichil le «diez máakoʼob tiʼ tuláakal le idiomaʼob yaan teʼ naciónoʼob» tu yaʼalaj Zacaríasoʼ. Letiʼobeʼ «yaan u chʼuytaloʼob tiʼ u nookʼ juntúul judío», wa u Israel Dios, yéetel yaan u yaʼalikoʼob: «Taak k-bin ta wéeteleʼex, tumen tsʼoʼok k-uʼuyikeʼ Dioseʼ tiaʼan ta wéeteleʼexeʼ» (Zac. 8:20-23).

¹⁶ Teʼ kʼiinoʼobaʼ u millonesil máaxoʼob meyajtik Dioseʼ «beyoʼob junpʼéel nojoch ejércitoeʼ». Ichiloʼobeʼ táakaʼan u Israel Dios (wa le máaxoʼob yéeyaʼanoʼob utiaʼal u binoʼob kaʼanoʼ) yéetel le «diez máakoʼob» (wa le uláakʼ tamanoʼoboʼ) (Eze. 37:10). Tsʼoʼoleʼ le nojoch ejércitoaʼ táan u bin u maas yaʼabtal. Toʼoneʼ u soldadoʼon Rey Jesucristo yéetel k-ilik k-beetik le baʼaxoʼob ku yaʼalikoʼ, tsʼoʼoleʼ jach táan k-páaʼtik le jatsʼuts baʼaloʼob ku taal u kʼiin u yúuchloʼ (Sal. 37:29; Eze. 37:24; Fili. 2:25; 1 Tes. 4:16, 17).

17. ¿Baʼax ken k-xakʼalt teʼ tuláakʼ xookoʼ?

¹⁷ U jaajileʼ u táakpajal máak utiaʼal u kaʼa adorartaʼal Jéeoba jeʼex unajeʼ junpʼéel nojoch responsabilidad. ¿Baʼaxten k-aʼalik leloʼ? Utiaʼal k-ilik u núukil le kʼáatchiʼaʼ unaj k-xakʼaltik junpʼéel baʼal kʼubéentaʼab tiʼ Ezequiel tumen Jéeoba antes tiʼ u xuʼulsaʼal Jerusalén. Teʼ tuláakʼ xookoʼ yaan k-xakʼaltik le baʼax kʼubéentaʼabtiʼoʼ.