1. ¿Baʼax tu yaʼalaj le profetaʼob tsʼaʼaboʼob tumen Jéeobaoʼ? ¿Baʼax úuch tu kaajil Jerusalén ka máan kʼiin?

TÁAN u bin u tʼúubul le Kʼiinoʼ. Yóokʼol u baʼpakʼiloʼob Jerusaléneʼ yaan juntúul máak kanáantik le kaajoʼ. Letiʼeʼ táan u pixik u yich utiaʼal maʼ u juʼulul tumen le Kʼiinoʼ tumen taak u yilik baʼax ku yúuchul teʼ náachiloʼ. Tu séebaʼanileʼ ku chʼaʼik le baakoʼ, ku taam chʼaʼik u yiikʼeʼ yéetel ku yustik utiaʼal u avisartik le kaaj táan u taal le babilonioʼoboʼ. Chéen baʼaleʼ tsʼoʼok maʼ tu páajtal u beetik mix baʼal le kaajoʼ. Jéeobaeʼ desde úuchjeakil tu túuxtaj u profetaʼob utiaʼal u yaʼalikoʼob tiʼ le kaaj yaniliʼ u kʼuchul le kʼiinaʼ, pero le kaajoʼ maʼ tu beetaj u cuentail le baʼax aʼalaʼabtiʼoʼ. Beoraaʼ u soldadoiloʼob Babiloniaeʼ u baʼpachtmoʼob le kaajoʼ. Ka máan kʼiineʼ le soldadoʼoboʼ tu nikoʼob u pakʼiloʼob le kaajoʼ, tu nikoʼob le templooʼ, tu kíimsoʼob yaʼab tiʼ u kajnáaliloʼob le kaajoʼ yéetel uláakʼoʼobeʼ bisaʼaboʼob bey esclavoʼobeʼ.

2, 3. 1) ¿Baʼax jeʼel u páajtal u beetik yaʼab máakoʼobeʼ? 2) ¿Baʼax kʼáatchiʼiloʼob ken k-il u núukil teʼ xookaʼ?

² Teʼ kʼiinoʼobaʼ táan xan u líiʼskuba le ejército kun meyaj tiʼ Jéeoba utiaʼal u xuʼulsik le máaxoʼob maʼ tu tsʼáaik u fejoʼob tiʼ letiʼoʼ (Apo. 17:12-14). Le baʼateloʼ yaan u beetik u xuʼulul le sen muʼyaj mix juntéen ilaʼak u yúuchloʼ (Mat. 24:21). Chéen baʼaleʼ láayliʼ yaan baʼax jeʼel u páajtal u beetik máakeʼ. Yaʼab máakoʼobeʼ láayliʼ jeʼel u páajtal u  yuʼubikoʼob u tʼaan le máaxoʼob tsʼaʼanoʼob tumen Jéeoba utiaʼal u yaʼalikoʼob baʼax ku taal u kʼiin u yúuchloʼ.

³ ¿Baʼaxten Jéeobaeʼ u tsʼaamaj máaxoʼob kanáantik u kaajal wa u tamanoʼob? ¿Baʼaxoʼob ku tsʼáaikoʼob ojéeltbil? ¿Máaxoʼob tsʼoʼok u beetkoʼob le meyajaʼ? ¿Baʼax unaj k-beetik toʼon? Koʼox ilik u núukil le kʼáatchiʼobaʼ.

4. ¿Baʼaxten Jéeobaeʼ tu tsʼáaj máakoʼob kanáantik u kaajal? (Ilawil le dibujo yaan tu káajbal le xookaʼ).

⁴ Xok Ezequiel 33:7. Úuchjeakileʼ le máaxoʼob tsʼaʼanoʼob utiaʼal u kanáantkoʼob le kaajoʼ ku waʼataloʼob tu maas kaʼanlil le pakʼoʼoboʼ. Leloʼ ku yeʼesikeʼ le máax gobernartik le kaajoʼ táan u kanáantik u kajnáaliloʼob. U jaajileʼ wa le máax kanáantik le kaaj ku yustik le baak chúumuk áakʼaboʼ jeʼel u beetik u jaʼakʼal u yóol máakeʼ. Chéen baʼaleʼ wa ku beetik u cuentail máakeʼ jeʼel u salvarkubaeʼ. Bey túun xanoʼ Jéeobaeʼ tu tsʼáaj máakoʼob utiaʼal u kanáantkoʼob u kaajal wa utiaʼal u meyajoʼob bey profetaʼobeʼ. Letiʼeʼ maʼ tu tsʼáajoʼob utiaʼal u sajakkúuntik u kaajaliʼ, baʼaxeʼ utiaʼal u kanáantkoʼob yéetel utiaʼal u salvarkoʼob.

5, 6. ¿Bix u yeʼesik u justicia Jéeoba?

⁵ Jéeobaeʼ le ka tu tsʼáaj Ezequiel utiaʼal u beetik u profetaileʼ tu yeʼesajtiʼ kaʼapʼéel jatsʼuts modos ku yáantkoʼon confiar tiʼ letiʼ. Koʼox ilik máakalmáakoʼobiʼ.

⁶ Justicia. U justicia Jéeobaeʼ ku yilaʼal yoʼolal le bix u tratartik cada juntúul tiʼ toʼonoʼ. Jeʼex tu kʼiiniloʼob Ezequieleʼ kex u maas yaʼabil le máakoʼob maʼ tu beetoʼob u cuentail le baʼax tu yaʼaloʼ, Jéeobaeʼ maʼ tu yaʼalaj wa tuláakal le israelitaʼob tercoʼoboʼ. Baʼaxeʼ u kʼáat u yil kaʼach baʼax ku beetik cada juntúul máak. Le oʼolal yaʼab u téenel tʼaanaj tiʼ «juntúul kʼasaʼan máak» yéetel «juntúul utsul máak». Jeʼex k-ilkoʼ Jéeobaeʼ táanil tiʼ u juzgartik máakeʼ ku yilik wa ku beetik baʼax uts wa maʼ (Eze. 33:8, 18-20).

7. ¿Baʼax ku chʼaʼik en cuenta Jéeoba kéen u juzgart wa máax?

⁷ U justicia Jéeobaeʼ ku yilaʼal xan yoʼolal le baʼaxoʼob ku chʼaʼik en cuenta kéen u juzgart wa máaxoʼ. Kéen u juzgart wa máaxeʼ maʼatech u yilik le baʼaxoʼob tu beetaj úuchjeakiloʼ, baʼaxeʼ ku chʼaʼik en cuenta le baʼaxoʼob ku beetik máak kéen tsʼoʼokok u tsoʼolol u nuʼuk tiʼoʼ. Letiʼeʼ tu yaʼalaj: «Koʼox aʼalikeʼ kin waʼalik tiʼ juntúul kʼasaʼan máak: ‹Techeʼ yaan a kíimil›. Le máak túunoʼ ku xuʼulul u kʼebantal, ku káajal u beetik baʼax uts, ku beetik baʼax toj [...]. Tu yoʼolal leloʼ le máakaʼ yaan u seguer u kuxtal, maʼ kun kíimil». Jéeobaeʼ tu yaʼalaj xan: «Maʼ kun kʼaʼajsbil mix junpʼéel tiʼ u kʼebanoʼob» (Eze. 33:14-16). Chéen baʼaleʼ wa juntúul máak úuch joʼopʼok u beetik baʼaloʼob maʼalobtak ku káajal u beetik baʼaloʼob kʼaastakeʼ, maʼ unaj u tuklik wa seguro u perdonartaʼal chéen tumen xáanchaj táan u beetik baʼax maʼalobiʼ. Jéeobaeʼ tu yaʼaleʼ yaan máakeʼ jeʼel u «tuklik yaan u salvarkuba tu yoʼolal le baʼaloʼob maʼalobtak u beetmoʼ yéetel ku joʼopʼol u beetik baʼax kʼaas». Chéen baʼaleʼ «le máakoʼ yaan u kíimil tu yoʼolal le baʼax kʼaas tsʼoʼok u  beetkoʼ, maʼ kun kʼaʼajsbil mix junpʼéel tiʼ le baʼaloʼob maʼalobtak u beetmoʼ» (Eze. 33:13).

8. ¿Baʼax uláakʼ eʼesik u justicia Jéeoba?

⁸ Uláakʼ baʼax eʼesik u justicia Jéeobaeʼ letiʼe ken u yaʼal junpʼéel baʼal antes tiʼ u yúuchloʼ. Le ka káaj u profetizar Ezequieleʼ seis años u bin utiaʼal u xuʼulsaʼal Jerusalén tumen Babilonia. Pero maʼ chéen Ezequiel profetizart leloʼ. Maas tiʼ 100 años antes tiʼ u xuʼulsaʼal le kaajoʼ Jéeobaeʼ tu túuxtaj u profetaʼob utiaʼal u yaʼalikoʼob baʼax kun úuchul, tu túuxtaj Oseas, Isaías, Miqueas, Oded yéetel Jeremías. Jéeobaeʼ tu túuxtaj Jeremías utiaʼal u kʼaʼajsik tiʼ le israelitaʼob lelaʼ: «Tin tsʼáaj máakoʼob utiaʼal u yaʼalikoʼob: ‹Jach uʼuy a wuʼuyeʼex u juum le baakoʼ›» (Jer. 6:17). Jeʼex k-ilkoʼ maʼ u culpa Jéeoba mix u culpa le profetaʼob úuchik u kíimsaʼal yaʼab israelitaʼob tumen le babilonioʼoboʼ.

9. ¿Bix tu yeʼesil yaabilaj Jéeoba?

⁹ Yaabilaj. Jéeobaeʼ tu yeʼesaj yaabilaj úuchik u túuxtik u profetaʼob utiaʼal u yaʼalikoʼob tiʼ tuláakal máak baʼax ku taal u kʼiinil. Letiʼeʼ maʼ chéen tiʼ le utsoʼob tu tsʼáaj u yojéeltoʼoboʼ, baʼaxeʼ tak tiʼ le kʼasaʼan máakoʼob tu beetoʼob u yaatal u yóol yéetel tu pʼatoʼob kʼaasil u kʼaabaʼoʼ. Chéen tukle, tuláakal máak kaʼach u yojleʼ Israeleʼ u kaajal Jéeoba, chéen baʼaleʼ letiʼobeʼ yaʼab u téenel tu xúumpʼattoʼob utiaʼal u adorarkoʼob yaanal diosoʼob. Utiaʼal u yeʼesik bukaʼaj yaachajik u yóoleʼ Jéeobaeʼ tu ketaj u kaajil Israel yéetel juntúul atantsil ku tusik u yíicham yéetel yaanal xiib (Eze. 16:32). Kex tu beetoʼob u sen yaatal u yóoleʼ Jéeobaeʼ maʼ tu xúumpʼattoʼobiʼ. Tu lugar u jáan castigarkoʼobeʼ letiʼeʼ tu yilaj bix jeʼel u yáantkoʼob utiaʼal u kaʼa náatsʼloʼob tu yiknaleʼ. Maʼ tu tuklaj wa unaj u jáan xuʼulskoʼob junpuliʼiʼ. ¿Baʼaxten bey tu beetiloʼ? Letiʼeʼ tu yaʼalaj tiʼ Ezequiel: «Junpuliʼ maʼatech u kiʼimaktal in  wóol le kéen kíimik juntúul kʼasaʼan máak, baʼax kiʼimakkúuntik in wóoleʼ letiʼe u kʼexik u kuxtal juntúul kʼasaʼan máak utiaʼal u seguer u kuxtaloʼ» (Eze. 33:11). Jéeobaeʼ junpuliʼ maʼ kʼexpajak bix u tuukuliʼ, láayliʼ bey u tuukul teʼ kʼiinoʼobaʼ (Mal. 3:6).

10, 11. ¿Baʼax k-kanik tiʼ le justicia yéetel tiʼ le yaabilaj eʼesaʼab tiʼ le israelitaʼoboʼ?

¹⁰ ¿Baʼax jeʼel u páajtal k-kanik tiʼ le justicia yéetel tiʼ le yaabilaj eʼesaʼab tiʼ le israelitaʼob tumen Jéeobaoʼ? Ku kaʼansiktoʼoneʼ cada juntúul tiʼ le máaxoʼob k-tsikbaltik u tʼaan Diosoʼ jelaʼan tiʼ u maasil. Maʼ unaj k-tuklikeʼ wa chéen yoʼolal wa baʼaxeʼ juntúul máakeʼ maʼ tu náajaltik ka k-tsikbalttiʼ u tʼaan Dios. Maʼ unaj k-juzgartik máak chéen yoʼolal le baʼaloʼob kʼaastak u beetmaj úuchjeakiloʼ, chéen yoʼolal bix u yilaʼal, tuʼux u taal, tumen óotsil, ayikʼal wa chéen yoʼolal bix u tʼaan. ¡Jach junpuliʼ maʼ unaj k-tuukul beyoʼ! Jéeobaeʼ tu yaʼalaj tiʼ Pedro junpʼéel baʼal tak bejlaʼa maʼ kʼexpajkeʼ: «Dioseʼ mix máak jelaʼan u paktik, baʼaxeʼ tiʼ tuláakal kaajeʼ ku kʼamik jeʼel máaxak ku beetik baʼax maʼalobeʼ yéetel jeʼel máaxak u chʼaʼamaj saajkilil tiʼeʼ» (Hech. 10:34, 35).

¹¹ K-kanik xaneʼ maʼ unaj u joʼopʼol k-tuklik jeʼel u páajtal k-beetik baʼaloʼob kʼaastak chéen tumen xáanchaj táan k-beetik baʼax uts tu tʼaan Jéeoba. Kʼaʼajaktoʼoneʼ toʼon xaneʼ kʼeban máakoʼon jeʼex le máaxoʼob k-kaʼansik u tʼaan Dios tiʼoboʼ. Le baʼax tu yaʼalaj apóstol Pablo tiʼ le sukuʼunoʼob yanoʼob Corintooʼ tak bejlaʼa jeʼel u yáantkoʼoneʼ: «Le máax ku tuklik waʼalakbal maʼalobeʼ u kanáant maʼ u lúubul. Le pruebaʼob ka aktáantkeʼexoʼ letiʼe ku aktáantik xan tuláakal máakoʼ» (1 Cor. 10:12, 13). Mix juntéen unaj k-tuklik wa yaan u salvarkoʼon le baʼaloʼob maʼalobtak k-beetmoʼ. Maʼ unaj k-tuklikeʼ mientras táan k-beetik baʼaloʼob maʼalobtakeʼ maʼ ken k-castigarbil yoʼolal le baʼaloʼob kʼaastak k-beetkoʼ  (Eze. 33:13). Kex úuch joʼopʼok k-meyajtik Jéeobaeʼ jach kʼaʼabéet u seguer k-eʼesik kabal óolal yéetel k-uʼuyik u tʼaan.

12. ¿Baʼax unaj k-kʼaʼajsik wa láayliʼ yaachajaʼan k-óol tumen kʼebanchajoʼoneʼ?

¹² Chéen baʼaleʼ, ¿kux túun wa láayliʼ yaachajaʼan k-óol tumen lúuboʼon tiʼ junpʼéel nojoch kʼebaneʼ? Le baʼax tu yaʼalaj Ezequieloʼ ku kaʼansiktoʼoneʼ Jéeobaeʼ yaan u castigartik le máaxoʼob ku kʼebantaloʼob yéetel maʼ tu arrepentiroʼoboʼ. K-kanik xaneʼ Jéeobaeʼ yaabilaj, chéen baʼaleʼ ku castigartik le máaxoʼob ku kʼebantaloʼoboʼ (1 Juan 4:8). Wa k-eʼesik yéetel le baʼaxoʼob k-beetik jach tu jaajil arrepentidoʼonoʼ mix juntéen unaj u máan t-tuukul wa maʼ ken u perdonartoʼon Jéeobaiʼ (Sant. 5:14, 15). Kex traicionartaʼab tumen le israelitaʼoboʼ letiʼeʼ tu perdonartoʼob, leloʼ ku yeʼesikeʼ láayliʼ jeʼel u perdonarkoʼon xaneʼ (Sal. 86:5).

13, 14. 1) ¿Baʼax tu tsʼáajoʼob ojéeltbil le profetaʼob tʼaanajoʼob tu kʼaabaʼ Jéeobaoʼ? 2) ¿Baʼax tu tsʼáaj ojéeltbil Isaías?

¹³ Xok Ezequiel 33:2, 3. ¿Baʼax tu tsʼáaj ojéeltbil le profetaʼob tʼaanajoʼob tu kʼaabaʼ Jéeobaoʼ? Tiʼ letiʼobeʼ kʼubéentaʼabtiʼob ka u yaʼaloʼob le castigo ken u taas Diosoʼ bey xan le baʼaloʼob maʼalobtak ken u beetoʼ. Koʼox ilik jujunpʼéel tiʼ le baʼaloʼob tu tsʼáajoʼob ojéeltbiloʼ.

¹⁴ Isaíaseʼ meyajnaj bey profeta tu yáamil u añoil 778 tak 732 t.t.J. Letiʼeʼ tu yaʼaleʼ le babilonioʼoboʼ yaan u xuʼulskoʼob Jerusalén yéetel yaan u bisaʼal u kajnáaliloʼob bey esclavoʼobeʼ (Isa. 39:5-7). Chéen baʼaleʼ tu yaʼalaj xan: «¡Uʼuy a wuʼuye! Uʼuy bix u kʼaʼam tʼaan le máaxoʼob kanáantkechoʼ. Tuláakloʼob táan u múul awatoʼob yéetel kiʼimak óolal, tumen yaan u yilkoʼob le kéen beetaʼak u suut u kajnáaliloʼob Sión tumen Jéeoba» (Isa. 52:8). Jeʼex k-ilkoʼ Isaíaseʼ tu tsʼáaj ojéeltbil junpʼéel baʼal jach maʼalob: yaan u kaʼa adorartaʼal chéen Jéeoba.

15. ¿Baʼax tu tsʼáaj ojéeltbil Jeremías?

¹⁵ Jeremíaseʼ meyajnaj bey profeta tu yáamil u añoil 647 tak 580 t.t.J. Le máakoʼoboʼ ku yaʼalikoʼob kaʼacheʼ Jeremíaseʼ chéen baʼaloʼob kʼaastak ku yaʼalik kun úuchul. Letiʼeʼ jach maʼalob tu beetil le meyaj kʼubéentaʼabtiʼoʼ, tu yaʼalaj tiʼ le kʼasaʼan israelitaʼob le castigo ken u taas Jéeobaoʼ. * Chéen baʼaleʼ letiʼeʼ tu tsʼáaj ojéeltbil baʼaloʼob maʼalobtak xan, tu yaʼaleʼ u kaajal Dioseʼ yaan u kaʼa suut tu luʼum yéetel yaan u kaʼa adorartaʼal chéen Jéeoba (Jer. 29:10-14; 33:10, 11).

16. Le baʼax tu yaʼalaj Ezequieloʼ, ¿bix tu yáantil le judíoʼob yanoʼob kaʼach Babiloniaoʼ?

¹⁶ Ezequieleʼ káaj u beetik u profetail tu añoil 613 t.t.J., maʼ xaaneʼ lelaʼ tu beetaj tak tu añoil 591 t.t.J. Le xook 5 yéetel 6 yaan teʼ libroaʼ ku yeʼesik bix tu tsʼáaj ojéeltbil Ezequiel tiʼ u kajnáaliloʼob Israel le xuʼulsajil kun taal tu yóokʼoloʼoboʼ. Úuchik u beetik beyoʼ maʼ yanchaj u culpa yoʼolal le yaʼabkach máakoʼob kíimoʼoboʼ. Chéen baʼaleʼ Ezequieleʼ maʼ chéen tu yaʼalaj tiʼ le judíoʼob bisaʼanoʼob Babilonia yaan u castigartaʼal le apóstataʼob yanoʼob Jerusalénoʼ. Le baʼax tu yaʼaloʼ tu yáantaj xan le judíoʼob utiaʼal u pʼáatloʼob naatsʼ tiʼ Jéeoba yéetel ka u líiʼsubaʼob utiaʼal le baʼax ku taal u kʼiin u beetkoʼ. Kéen tsʼoʼokok u máan 70 años esclavizartaʼanoʼobeʼ Jéeobaeʼ yaan u beetik u suut junmúuchʼ judíoʼob utiaʼal u kajtaloʼob tu luʼumil Israel (Eze. 36:7-11). Le máaxoʼob kun suutoʼob kaʼachoʼ maases u paalal yéetel u yáabil le  judíoʼob tu beetoʼob u cuentail le baʼax tu yaʼalaj Ezequieloʼ. Le xookoʼob yanoʼob tu yóoxpʼéel jaats le libroaʼ ku yeʼeskoʼobeʼ Ezequieleʼ tu yaʼaleʼ yaʼab baʼaloʼob maʼalobtak kun úuchul. Le baʼaxoʼob tu yaʼaloʼ tu yeʼesoʼobeʼ yaan u kaʼa adorartaʼal Jéeoba tu kaajil Jerusalén.

17. ¿Baʼax ku beetik Jéeoba táanil tiʼ u béeykuntik baʼax ku tuklik?

¹⁷ Le profetaʼob tsʼoʼok k-aʼalikoʼ tu beetoʼob le meyaj kʼubéentaʼabtiʼob antes u xuʼulsaʼal tiʼ Jerusalén tu añoil 607 t.t.J., bey xan le ka tsʼoʼok u xuʼulsaʼaloʼ. ¿Chéen wa túun letiʼob tsʼaʼaboʼob utiaʼal u kanáantkoʼob u kaajal Jéeoba? Maʼatech. Letiʼeʼ táanil tiʼ u béeykuntik le baʼax ku tuklikoʼ ku yéeyik máakoʼob utiaʼal u yaʼalikoʼob yaan u castigartaʼal le kʼasaʼan máakoʼoboʼ yéetel utiaʼal u yaʼalikoʼob le baʼaloʼob maʼalobtak ken u beetoʼ.

18. ¿Baʼaxten Jéeobaeʼ tu yéeyaj Juan Bautista?

¹⁸ Teʼ yáax siglooʼ Jéeobaeʼ tu yéeyaj Juan Bautista utiaʼal u yaʼalik baʼax ku taal u kʼiin u yúuchul. Letiʼeʼ tu yaʼalaj tiʼ u kaajil Israeleʼ yaan u xúumpʼattaʼaloʼob tumen Jéeoba (Mat. 3:1, 2, 9-11). Chéen baʼaleʼ maʼ chéen letiʼe baʼax tu yaʼaloʼ. Jesúseʼ tu yaʼaleʼ Juaneʼ letiʼe máax túuxtaʼab utiaʼal u preparartik le bej tuʼux kun máan le Mesíasoʼ (Mal. 3:1; Mat. 11:7-10). Junpʼéel tiʼ le baʼaxoʼob ken u tsʼáa ojéeltbiloʼ letiʼe u yaʼalik de ke Jesús, «u Taman Dios[eʼ]», tsʼoʼok kaʼach u kʼuchul yéetel yaan u luʼsik «u kʼeban le yóokʼol kaaboʼ» (Juan 1:29, 30).

19, 20. ¿Baʼaxoʼob tu yaʼalaj Jesús yéetel u discípuloʼob kun úuchul?

¹⁹ Jesúseʼ letiʼe máax maas kʼaj óoltaʼab ichil le máaxoʼob tu tsʼáajoʼob ojéeltbil baʼax ku taal u kʼiin u yúuchloʼ. Jeʼex Ezequieleʼ, Jesúseʼ yéeyaʼab xan tumen Jéeoba utiaʼal u yáantik «u kaajil Israel» (Eze. 3:17; Mat. 15:24). Letiʼeʼ tu yaʼaleʼ yaan u xúumpʼattaʼal u kaajil Israel tumen Jéeoba yéetel yaan u xuʼulsaʼal u kaajil Jerusalén (Mat. 23:37, 38; 24:1, 2; Luc. 21:20-24). Chéen baʼaleʼ Jesúseʼ maases yéeyaʼab utiaʼal u yaʼalik le baʼaloʼob maʼalobtak ku taal u kʼiin u yúuchloʼ (Luc. 4:17-21).

²⁰ Le tiaʼan kaʼach way Luʼumeʼ Jesúseʼ tu yaʼalaj tiʼ u discípuloʼob: «Maʼ u náayal a wóoleʼex» (Mat. 24:42). Letiʼobeʼ tu beetoʼob le baʼax aʼalaʼabtiʼoboʼ, tu yaʼaloʼob tiʼ u kaajil Israeleʼ Jéeobaeʼ tsʼoʼok u xúumpʼatkoʼob yéetel tsʼoʼok u xúumpʼattik xan u kaajil Jerusalén (Rom. 9:6-8; Gál. 4:25, 26). Jeʼex le profetaʼob yéeyaʼaboʼob úuchjeakiloʼ, letiʼob xaneʼ tu yaʼaloʼob le baʼaloʼob maʼalobtak kun úuchloʼ. Tu yaʼaloʼobeʼ ichil le máaxoʼob yéeyaʼanoʼob utiaʼal u binoʼob kaʼan wa «u Israel Dios[eʼ]» yaan u yantal máakoʼob kun taaloʼob tiʼ uláakʼ kaajoʼob. Letiʼobeʼ yaan u múul meyajoʼob yéetel Cristo utiaʼal ka adorartaʼak chéen Jéeoba way Luʼumeʼ (Hech. 15:14; Gál. 6:15, 16; Apo. 5:9, 10).

21. ¿Baʼaxten k-aʼalikeʼ apóstol Pabloeʼ jach maʼalob úuchik u beetik le meyaj kʼubéentaʼabtiʼoʼ?

²¹ Apóstol Pabloeʼ jach maʼalob úuchik u beetik le meyaj kʼubéentaʼabtiʼoʼ. Jeʼex Ezequieleʼ letiʼ xaneʼ u yojleʼ wa ku beetik tubeel le meyaj kʼubéentaʼantiʼ kaʼachoʼ maʼ kun antal u culpa yoʼolal le máaxoʼob kun kíimloʼoboʼ (Hech. 20:26, 27). Jeʼex tu beetil le profetaʼoboʼ Pablo xaneʼ maʼ chéen tu yaʼalaj baʼax ku taal u kʼiinil u yúuchliʼ, baʼaxeʼ tu yaʼalaj xan le baʼaloʼob maʼalobtak kun úuchloʼ (Hech. 15:35; Rom.  1:1-4). Le ka tʼaanaj tiʼ le meyaj ku beetik le máaxoʼob tsʼáaik ojéeltbil u Reino Diosoʼ, letiʼeʼ tu chʼaʼchiʼitaj junpʼéel baʼax u yaʼalmaj profeta Isaías: «Jach kiʼichkelem u yookoʼob le máax ku taal tu yóokʼol le montañaʼob utiaʼal u tsʼáaik ojéeltbil baʼaloʼob maʼalobtakoʼ» (Isa. 52:7, 8; Rom. 10:13-15).

22. ¿Baʼax úuch le ka láaj kíim le apóstoloʼoboʼ?

²² Le ka tsʼoʼok u kíimil le apóstoloʼoboʼ joʼopʼ u yokol ichil le múuchʼulil le apóstataʼob aʼalaʼanoʼ (Hech. 20:29, 30; 2 Tes. 2:3-8). Xáanchaj táan u yaʼabtal le apóstataʼob wa le máaxoʼob ku keʼeteloʼob yéetel kʼaakʼas xíiwoʼ, yéetel le máaxoʼob ku keʼeteloʼob yéetel maʼalob trigooʼ pʼáat chéen junpʼíitoʼob. Tsʼoʼoleʼ yoʼolal le kaʼansajoʼob maʼ jaajtakoʼ pʼáat maʼ tu jach naʼataʼal le baʼaxoʼob ku kaʼansaʼal yoʼolal u Reino Diosoʼ (Mat. 13:36-43). Chéen baʼaleʼ le ka kʼuch u súutukil utiaʼal u adorartaʼal chéen Jéeoba way Luʼumeʼ letiʼeʼ tu yeʼesaj u yaabilaj yéetel u justicia úuchik u tsʼáaik máaxoʼob utiaʼal u kanáantkoʼob u kaajal. Le máaxoʼob yéeyaʼaboʼoboʼ unaj u yaʼalikoʼob baʼax ku taal u kʼiin bey xan le baʼaloʼob maʼalobtak kun úuchloʼ. ¿Máax túun le tsʼaʼaboʼob utiaʼal u beetkoʼob le meyajoʼ?

23. ¿Baʼax tu beetaj Charles T. Russell bey xan le máaxoʼob áantkoʼoboʼ?

²³ Táanil tiʼ u añoil 1914, Charles T. Russell yéetel le máaxoʼob áantkoʼoboʼ tu preparartoʼob le bej utiaʼal ka káajak u gobernar le Mesíasoʼ (Mal. 3:1). * Utiaʼal u yaʼalikoʼob baʼax ku taal u kʼiin u yúuchleʼ meyajnajtiʼob le revista La Torre del Vigía de Sion y Heraldo de la  Presencia de Cristo (Zionʼs Watch Tower and Herald of Christʼs Presence). Meyajnajtiʼob xan utiaʼal u yaʼalikoʼob tsʼoʼok u náatsʼal u kʼiinil u juicio Dios bey xan utiaʼal u yaʼalikoʼob le baʼaloʼob maʼalobtak ken u beet u Reinooʼ.

24. 1) ¿Baʼaxoʼob ku tsʼáaik ojéeltbil le esclavo chúukaʼan u yóoloʼ? 2) ¿Baʼax ka kanik tiʼ le máaxoʼob yéeyaʼaboʼob tumen Jéeoba utiaʼal u yaʼalikoʼob baʼaxoʼob ku taal u kʼiinoʼ? (Ilawil le cuadro «Máaxoʼob aʼal baʼax ku taal u kʼiin»).

²⁴ Le maʼ úuch káajak u gobernaroʼ Jesúseʼ tu tsʼáaj «le esclavo chúukaʼan u yóol yéetel yaan u naʼat[oʼ]» (Mat. 24:45-47). Desde leloʼ le esclavo chúukaʼan u yóol wa le Cuerpo Gobernanteoʼ ku yaʼalik le baʼaxoʼob ku taal u kʼiin u yúuchloʼ. Maʼ chéen ku yaʼalik yaan u kʼuchul «u kʼiinil u vengarkuba k-Dios» tiʼ le kʼasaʼan máakoʼoboʼ, baʼaxeʼ ku yaʼalik xan kuxaʼanoʼon tu «añoil u yeʼesik u yutsil Jéeoba» (Isa. 61:2; ilawil xan 2 Corintios 6:1, 2).

25, 26. 1) ¿Baʼax unaj u beetik tuláakal le máaxoʼob tsaypachtik Cristooʼ, yéetel bix táan u beetkoʼob? 2) ¿Baʼax ken k-xakʼalt teʼ tuláakʼ xookoʼ?

²⁵ Kex letiʼe esclavo tsʼaʼan utiaʼal u yaʼalik baʼax ku taal u kʼiin u yúuchloʼ, Jesúseʼ tu yaʼaleʼ «tuláakal» le máaxoʼob tsaypachtikoʼ maʼ unaj u náayal u yóoloʼobiʼ (Mar. 13:33-37). Wa maʼ t-náachtal tiʼ Jéeoba yéetel k-múul meyaj yéetel le esclavo chúukaʼan u yóoloʼ k-eʼesik táan k-beetik le baʼax tu yaʼalaj Jesúsoʼ. Kéen k-tsʼáa k-óol utiaʼal k-tsikbaltik u tʼaan Dioseʼ k-eʼesik xan maʼ naayal k-óoliʼ (2 Tim. 4:2). ¿Baʼax péeksikoʼon k-tsikbalt u tʼaan Dios? Tumen k-kʼáat ka u salvartuba le máakoʼoboʼ (1 Tim. 4:16). Ichil junpʼíit kʼiineʼ yaʼab máakoʼob kun kíimloʼob tumen maʼ tu beetoʼob u cuentail le baʼax ku yaʼalik le esclavo chúukaʼan u yóoloʼ (Eze. 3:19). Chéen baʼaleʼ maases k-ilik k-tsʼoʼoksik le meyaj kʼubéentaʼantoʼonoʼ tumen taak k-tsʼáaik u yojéelt le máakoʼob lelaʼ: ¡Tsʼoʼok u káajal u adorartaʼal chéen Jéeoba! Bejlaʼeʼ tiaʼanoʼon tu «añoil u yeʼesik u yutsil Jéeoba», le oʼolaleʼ jeʼel máaxak u kʼáateʼ jeʼel u páajtal u náatsʼal utiaʼal u adorarte. Maʼ kun xáantaleʼ tuláakal le máaxoʼob ken u salvartubaʼoboʼ yaan u tsʼaʼabaltiʼob yaʼab bendiciónoʼob tumen Jesús. Le oʼolaleʼ, ¿máasaʼ unaj u seguer k-áantik le esclavo chúukaʼan u yóol utiaʼal u tsʼaʼabal ojéeltbil le baʼaloʼob maʼalobtak kun úuchloʼobaʼ? (Mat. 24:14).

²⁶ Antes tiʼ u xuʼulsik le kʼasaʼan yóokʼol kaabaʼ Jéeobaeʼ tu muchʼaj u kaajal. Teʼ tuláakʼ xookoʼ yaan k-xakʼaltik u profecíail le kaʼapʼéel cheʼoboʼ, lelaʼ yaan u yeʼesik bix úuchik u muchʼik u kaajal.