1-3. 1) ¿Baʼaxten wal líikʼ u yóol Ezequiel le ka tu yilaj u templo Jéeobaoʼ? (Ilawil le dibujo yaan tu káajbal le xookaʼ). 2) ¿Baʼax ken k-il teʼ xookaʼ?

MÁANS ta tuukul Ezequieleʼ yaan 50 años tiʼ yéetel tsʼoʼok 25 años bisaʼak Babilonia. Le templo yaan kaʼach Jerusalénoʼ tsʼoʼok u máan kʼiin xuʼulsaʼak. Maʼ xaaneʼ Ezequieleʼ ku tsʼíiboltik kaʼach u beetik u sacerdoteil teʼ templooʼ, chéen baʼaleʼ mix bikʼin kun béeytal leloʼ. ¿Baʼaxten? Tumen 56 años ku bineltik u jáalkʼabtaʼal le judíoʼob tiʼ u luʼumil Babiloniaoʼ. Maʼ xaaneʼ Ezequieleʼ maʼ kuxaʼan le kéen kʼuchuk u kʼiinil u suut le judíoʼob tu luʼumoʼob utiaʼal u jel líiʼskoʼob le templooʼ (Jer. 25:11). Lelaʼ tu beetaj wal u chan lúubul u yóoleʼ.

² Chéen baʼaleʼ teʼ súutuk jeʼeloʼ Jéeobaeʼ jach tu líiʼsaj u yóol le profetaoʼ. Lelaʼ tu beetaj úuchik u yeʼesiktiʼ junpʼéel baʼax jach jatsʼuts. Jéeobaeʼ tu yeʼesaj u luʼumil Israel tiʼ Ezequiel yéetel tu naʼaksaj tiʼ junpʼéel jach kaʼanal montaña. Teʼeloʼ tu yilaj xan «juntúul máak ku léembal jeʼex le cobreoʼ». Le máak tu yiloʼ juntúul ángel. Letiʼeʼ tu bisaj Ezequiel ichil le templooʼ (xok Ezequiel 40:1-4). ¡Jach túun jatsʼuts le baʼax tsʼaʼab u yiloʼ! Kex Ezequiel líikʼ u yóoleʼ yaan baʼaxoʼob beet u péek u yóol. Le templo tu yiloʼ jach  jelaʼan tiʼ le templo u kʼaj óol kaʼachoʼ maʼ bey jeʼex le templo yaan kaʼach Jerusalénoʼ.

³ Tu tsʼook nueve capítuloʼob tiʼ u libroil Ezequieleʼ tiʼ ku yúuchul tʼaan tiʼ le kiʼichkelem templo tsʼaʼab u yil tumen Jéeobaoʼ. Beoraaʼ yaan k-ilik baʼax unaj k-chʼaʼik en cuenta le kéen k-xakʼalt le templo tu yilaj Ezequieloʼ. Tsʼoʼoleʼ yaan k-ilik wa le templo tu yilaj Ezequieloʼ láayliʼ letiʼe kiʼichkelem templo tu yaʼalaj apóstol Pablooʼ. Tu tsʼookeʼ yaan k-ilik baʼax unaj kaʼach u péeksaʼal u beet le judíoʼob yoʼolal le baʼax aʼalaʼabtiʼob tumen Ezequieloʼ.

4. ¿Baʼax ku yaʼalaʼal kaʼach yoʼolal le templo tu yilaj Ezequieloʼ? ¿Chéen baʼaleʼ baʼax tu tsʼáaj cuenta u kaajal Dios?

⁴ Úuchjeakileʼ u kaajal Dioseʼ ku yaʼalikeʼ le templo tu yilaj Ezequieloʼ láayliʼ letiʼe templo tu yaʼalaj apóstol Pablo teʼ carta tu tsʼíibtaj tiʼ le hebreoʼoboʼ. * Le oʼolaleʼ ku kaxtaʼal kaʼach «baʼaxoʼob ku chíikbesik» le templo tu yilaj Ezequieloʼ, utiaʼal leloʼ ku chʼaʼabal kaʼach en cuenta le baʼaxoʼob tu tsolaj apóstol Pablo tu yoʼolal le tabernáculooʼ. Chéen baʼaleʼ u kaajal Dioseʼ orarnaj yéetel tu maas xakʼaltaj lelaʼ, ka túun tu tsʼáaj cuenta yaanal bix unaj u naʼataʼal le baʼax tu yilaj Ezequieloʼ yéetel maʼ jach talamiʼ.

5, 6. 1) ¿Baʼax maʼ tu beetaj Pablo le ka tʼaanaj tiʼ le tabernáculooʼ? 2) ¿Baʼaxten maʼ tu tsolaj u maasil baʼaloʼob Pablo yoʼolal le tabernáculooʼ? 3) ¿Baʼax unaj k-beetik kéen k-xakʼalt le baʼax tu yilaj Ezequieloʼ?

⁵ Jeʼex k-ilkoʼ maʼ unaj k-ilik k-kaxtik baʼax ku chíikbesik cada junpʼéel tiʼ le baʼaxoʼob tu yaʼalaj Ezequiel yoʼolal le templo tu yiloʼ. ¿Baʼaxten? Koʼox ilik. Le ka tʼaanaj Pablo tiʼ le tabernáculo yéetel tiʼ le templo tu yiloʼ tʼaanaj xan tiʼ le incensario beetaʼan yéetel orooʼ, u cajail le pactooʼ yéetel le jarro de oro tuʼux líiʼsaʼan le manáoʼ. Chéen baʼaleʼ maʼ tu yaʼalaj wa yaan baʼax ku chíikbesik cada junpʼéel tiʼ le baʼaloʼobaʼ. ¿Baʼaxten maʼ tu tsolaj u maasiliʼ? Tumen Dioseʼ tu yilaj maʼ u súutukil utiaʼal u beetaʼal leloʼ. Le oʼolal Pabloeʼ tu yaʼalaj: «Beoraaʼ maʼ u súutukil utiaʼal k-maas tsolik le baʼaloʼobaʼ» (Heb. 9:4, 5). Jeʼex k-ilkoʼ Pabloeʼ tu páaʼtaj u kʼuchul u kʼiinil u maas tsolik Jéeoba le baʼaloʼobaʼ (Heb. 9:8).

⁶ Toʼon xaneʼ unaj k-beetik jeʼex Pablo le kéen k-xakʼalt le baʼax tu yilaj Ezequieloʼ. Maas maʼalob ka k-páaʼt u kʼuchul u kʼiinil u tsolik Jéeoba baʼax ku chíikbesik cada junpʼéel tiʼ le baʼaxoʼob tu yilaj Ezequiel yoʼolal le templooʼ (xok Miqueas 7:7). ¿U kʼáat wa túun u yaʼal jach mix baʼal maas u tsol Jéeoba yoʼolal leloʼ? Maʼatech.

7, 8. 1) ¿Baʼax kʼuch u naʼat u kaajal Dios yoʼolal le templo tu yilaj Ezequieloʼ? 2) ¿Baʼax u jelaʼanil le templo tu yilaj Ezequiel tiʼ le tu yaʼalaj Pablooʼ?

⁷ Jeʼex tsʼoʼok k-aʼalikoʼ u kaajal Dioseʼ ichil yaʼab añoseʼ tu yaʼaleʼ le templo tu yilaj Ezequieloʼ láayliʼ letiʼe templo tu yaʼalaj apóstol Pablo teʼ carta tu tsʼíibtaj tiʼ le hebreoʼoboʼ. Chéen baʼaleʼ ka tu maas xakʼaltaj u kaajal Dios lelaʼ kʼuch u naʼateʼ le templo tu yilaj Ezequieloʼ maʼ letiʼe tu yaʼalaj Pablooʼ. ¿Baʼaxten k-aʼalik beyoʼ?

 ⁸ Yáaxeʼ tumen le templo tu yilaj Ezequieloʼ jelaʼan tiʼ le tu yaʼalaj Pablooʼ. Koʼox ilik baʼax u jelaʼanil. Pabloeʼ tu yaʼaleʼ le tabernáculo beetaʼab tu kʼiiniloʼob Moisésoʼ meyajnaj utiaʼal u yeʼesaʼal junpʼéel baʼax maas nojoch kun úuchul. Ichil le tabernáculooʼ yaan kaʼach junpʼéel chan cuarto ku kʼaabaʼtik: «Cuarto Maas Jach Santo». Ka máan kʼiineʼ le templo tu beetaj Salomón yéetel le jel líiʼsaʼab tu kʼiiniloʼob Zorobabeloʼ yanchajtiʼob xan junpʼéel cuarto jeʼex leloʼ. Chéen baʼaleʼ Pabloeʼ tu yaʼaleʼ le cuartoaʼ beetaʼab «tumen u kʼab wíinikoʼob» yéetel yaan baʼax «ku chíikbesik». ¿Baʼax túun tu chíikbesaj? Pabloeʼ tu yaʼaleʼ letiʼe «kaʼanoʼ» (Heb. 9:3, 24). ¿Tu yilaj wa túun Ezequiel le baʼaxoʼob yaan teʼ kaʼanoʼ? Maʼatech. Mix baʼal eʼesik wa Ezequieleʼ táan kaʼach u tsʼaʼabal u yil le baʼaxoʼob yaan teʼ kaʼan jeʼex tu beetil Jéeoba yéetel uláakʼ máaxoʼob meyajt úuchjeakiloʼ (ket yéetel Daniel 7:9, 10, 13, 14).

9, 10. ¿Baʼax u jelaʼanil le sacrificioʼob ku beetaʼal teʼ templo tu yilaj Ezequiel tiʼ le tu yaʼalaj Pablooʼ?

⁹ Uláakʼ baʼax eʼesik maʼ igual le templo tu yilaj Ezequiel yéetel le tu yaʼalaj Pablooʼ, letiʼe sacrificioʼob ku kʼubloʼoboʼ. Ezequieleʼ tu yuʼubaj u yaʼalaʼal jach bix le sacrificioʼob unaj u kʼubloʼob teʼ templooʼ yéetel bix unaj u beetaʼal. Le baʼaxoʼob aʼalaʼabaʼ utiaʼal kaʼach le kaajoʼ, u nuuktakil le kaajoʼ bey xan le sacerdoteʼoboʼ. Tuláakloʼob unaj kaʼach u kʼubkoʼob sacrificioʼob yoʼolal u kʼebanoʼob. Tsʼoʼoleʼ unaj u kʼubkoʼob xan ofrendaʼob utiaʼal múul janal, lelaʼ jeʼel u béeytal u jaantikoʼob teʼ lugaroʼob tsʼaʼanoʼob teʼ templo utiaʼal u yúuchul jaanloʼ (Eze. 43:18, 19; 44:11, 15, 27; 45:15-20, 22-25). ¿Bey wa xan u sen kʼuʼubul sacrificioʼob teʼ templo tu yaʼalaj Pablooʼ?

¹⁰ U jaajileʼ maʼ bey u beetaʼaliʼ. Pabloeʼ tu yaʼalaj: «Le ka taal Cristo, u maas nojoch sacerdoteil le baʼaloʼob maʼalobtak tsʼoʼok u béeytaloʼoboʼ, ook ichil le maas nojoch yéetel maas maʼalob tabernáculooʼ. Le tuʼux ookaʼ maʼ u kʼab wíinik beetmiliʼ yéetel maʼ way luʼum yaneʼ. Letiʼeʼ chéen juntéeniliʼ ook teʼ Cuarto Maas Jach Santooʼ, le ka ookeʼ maʼ tu bisaj u kʼiʼikʼel chivoʼobiʼ mix u kʼiʼikʼel táankelem wakaxoʼobiʼ, baʼaxeʼ u kʼiʼikʼel letiʼ tu bisaj. Lelaʼ tu beetaj utiaʼal u jáalkʼabtikoʼon utiaʼal mantatsʼ» (Heb. 9:11, 12). Bey túunoʼ Jesús, u maas nojchil le sacerdoteʼoboʼ, chéen juntéeniliʼ ook teʼ Cuarto Maas Jach Santo utiaʼal u kʼubik u kʼiʼikʼeloʼ. Jeʼex k-ilkoʼ teʼ templo tu yaʼalaj Pablooʼ chéen junpʼéel sacrificio ku kʼuʼubuliʼ, le oʼolal maʼ igual yéetel le templo tu yilaj Ezequieloʼ.

11. ¿Baʼaxten k-aʼalik tu kʼiiniloʼob Ezequieleʼ maʼ kʼuchuk kaʼach u kʼiinil u tsʼaʼabal ojéeltbil uláakʼ baʼaloʼob yoʼolal le templo yaan teʼ kaʼanoʼ?

¹¹ Koʼox ilik u kaʼapʼéel baʼax eʼesik maʼ igual le temploʼobaʼ. Ezequieleʼ maʼ letiʼe templo yaan teʼ kaʼan tu yiloʼ tumen maʼ kʼuchuk kaʼach u kʼiinil u tsʼaʼabal ojéeltbil tumen Dios uláakʼ baʼaloʼob tu yoʼolaliʼ. Kʼaʼajaktoʼoneʼ le baʼax tsʼaʼab u yil Ezequieloʼ maases utiaʼal le judíoʼob yanoʼob kaʼach Babiloniaoʼ. Letiʼobeʼ unaj kaʼach u beetkoʼob baʼax ku yaʼalik le Ley tsʼaʼab tiʼ Moisésoʼ. Le kéen suunakoʼob kaʼach Jerusaléneʼ unaj u adorarkoʼob Jéeoba jeʼex u yaʼalik le Leyoʼ. Utiaʼal  leloʼ unaj u jel líiʼskoʼob le templooʼ bey xan le altar tuʼux ken u kʼuboʼob le sacrificioʼoboʼ. Le ka suunajoʼob tu luʼumoʼobeʼ máan kex 600 años bey tu beetiloʼoboʼ. Chéen tukult bix jeʼel u yuʼubikuba le judíoʼob wa ka tsʼaʼabak kaʼach u yojéeltoʼob bix le templo yaan teʼ kaʼanoʼ. ¿Bix jeʼel u yuʼubikubaʼob wa ka aʼalaʼaktiʼob yaan u kʼubik u kuxtal le u maas nojchil le sacerdoteʼob utiaʼal ka xuʼuluk u kʼubkoʼob u maasil sacrificioʼoboʼ? ¿Yaan wa kaʼach u naʼatkoʼob baʼax ku chíikbesik le templo yaan teʼ kaʼanoʼ? ¿Yaan wa u yáantkoʼob kaʼach utiaʼal u seguer u beetkoʼob baʼax ku yaʼalik le Leyoʼ? Jeʼex suukil u beetkeʼ Jéeobaeʼ tu páaʼtaj u kʼuchul u tiempoil utiaʼal u tsʼáaik ojéeltbil le baʼaloʼob yaan yil yéetel le templo yaan teʼ kaʼanoʼ.

12-14. ¿Baʼax ku kaʼansiktoʼon le templo tu yilaj Ezequiel yéetel le tu yaʼalaj Pablooʼ? (Ilawil le cuadro «Kaʼapʼéel templo yaanal baʼax ku chíikbeskoʼob»).

¹² ¿Baʼax túun ku kaʼansiktoʼon le templo tu yilaj Ezequiel yéetel le templo tu yaʼalaj Pablooʼ? Kʼaʼajaktoʼoneʼ Pabloeʼ tʼaanaj tiʼ le tabernáculo yaan kaʼach tu kʼiiniloʼob Moisésoʼ, maʼ tiʼ le templo tsʼaʼab u yil Ezequieloʼ. U jaajileʼ Pabloeʼ tʼaanaj tiʼ jujunpʼéel baʼaxoʼob yanoʼob ichil le templo yanchaj tu kʼiiniloʼob Salomón, Zorobabel bey xan le tsʼaʼab u yil Ezequieloʼ. Kex beyoʼ Ezequiel yéetel Pabloeʼ maʼ tiʼ junpʼéeliliʼ baʼax tʼaanajoʼobiʼ. * Chéen baʼaleʼ le baʼax tu yaʼaloʼoboʼ yaan baʼax ku kaʼansiktoʼon.

 ¹³ Tu kaʼatúulaloʼobeʼ ku tʼaanoʼob tiʼ le adoración ku tsʼaʼabal tiʼ Diosoʼ: Pabloeʼ ku kaʼansiktoʼon baʼaxoʼob u tsʼaamaj Dios utiaʼal k-náatsʼal tu yiknal teʼ kʼiinoʼobaʼ, yéetel Ezequieleʼ ku kaʼansiktoʼon bix u kʼáat Jéeoba ka k-adorarte. Utiaʼal u kaʼansiktoʼon Jéeoba baʼaxoʼob u tsʼaamaj utiaʼal k-náatsʼal tu yiknaleʼ, Pabloeʼ tu tsolaj baʼax u kʼáat u yaʼal jujunpʼéel baʼaxoʼob yaan teʼ templo jeʼex u maas nojchil le sacerdoteʼoboʼ, le sacrificioʼoboʼ, le altaroʼ bey xan le Cuarto Maas Jach Santooʼ. Chéen baʼaleʼ utiaʼal u kaʼansiktoʼon bix u kʼáat Jéeoba ka k-adorarteʼ, Ezequieleʼ ku tʼaan tiʼ jejeláas baʼaloʼob yaan teʼ templo tu yiloʼ. Tuláakal le baʼaxoʼob tu yaʼaloʼ ku péeksik k-puksiʼikʼal utiaʼal ka k-adorart Jéeoba jeʼex u kʼáatoʼ.

¹⁴ ¿Yaan wa baʼax unaj u péeksikoʼon k-beet le baʼax tu yilaj Ezequieloʼ? Yaan, chéen baʼaleʼ táanileʼ yaan k-ilik baʼax tu kaʼansaj tiʼ le judíoʼob chúukaʼan u yóoloʼob tiʼ Jéeobaoʼ.

15. 1) ¿Baʼax taak kaʼach u kaʼansik Jéeoba tiʼ le judíoʼob yéetel le baʼax tu tsʼáaj u yil Ezequieloʼ? 2) ¿Baʼaxten jach jelaʼan le baʼax ku yaʼalik le capítulo 8 tiʼ le capítulo 40 tak 48 tiʼ u libroil Ezequieloʼ?

¹⁵ Utiaʼal k-ilik baʼax ku yaʼalik le Biblia yoʼolal leloʼ, koʼox ilik óoxpʼéel baʼaloʼob. Yáaxeʼ, ¿baʼax taak kaʼach u kaʼansik Jéeoba tiʼ le judíoʼoboʼ? Letiʼeʼ taak kaʼach u kaʼansiktiʼobeʼ yaan u kʼuchul u  kʼiinil u kaʼa adorartaʼal jeʼex uts tu tʼaaneʼ. Ezequieleʼ u yojel yaan u béeytal le baʼax tu yaʼalaj Jéeobaoʼ tumen teʼ kʼiinoʼob jeʼeloʼ tsʼokaʼaniliʼ u tsʼíibtik le capítulo ocho tiʼ u librooʼ. Teʼeloʼ Jéeobaeʼ tu yeʼesajtiʼ tuláakal le baʼaxoʼob jach kʼaastak táan kaʼach u beetaʼal teʼ templooʼ. Chéen baʼaleʼ lelaʼ jach jelaʼan tiʼ le baʼax ku yaʼalik le capítulo 40 tak 48 yoʼolal le bix u adorartaʼal Jéeobaoʼ. Ezequieleʼ kiʼimakchaj u yóol le ka tu tsʼíibtaj yaan u xuʼulul u beetaʼal baʼaloʼob kʼaastak teʼ templooʼ yéetel yaan u kaʼa adorartaʼal Jéeoba jeʼex uts tu tʼaaneʼ. Teʼ kʼiinoʼoboʼ tuláakal u máakiloʼob Jerusaléneʼ yaan u adorarkoʼob Jéeoba jach jeʼex u yaʼalik le Ley tsʼaʼab tiʼ Moisésoʼ.

16. Le baʼax tu yilaj Ezequieloʼ, ¿bix tu yeʼesil yaan u béeytal le baʼax tu yaʼalaj Isaíasoʼ?

¹⁶ Utiaʼal u kaʼa adorartaʼal Jéeoba jeʼex uts tu tʼaaneʼ kʼaʼabéet u beetaʼal jujunpʼéel kʼeexoʼob. Maas tiʼ 100 años antes tiʼ u yúuchul lelaʼ le profeta Isaíasoʼ tu yaʼalaj: «Tu tsʼook kʼiinoʼobeʼ le montaña tuʼux yaan u yotoch Jéeobaoʼ yaan u yetsʼkúuntaʼal maʼalob tu yóokʼol le montañaʼoboʼ, yéetel yaan u chʼúuyaʼal utiaʼal ka yanak tu yóokʼol le puʼukoʼoboʼ» (Isa. 2:2). Jeʼex k-ilkoʼ Isaíaseʼ tu yaʼalaj yaan u kʼuchul u kʼiinil u kaʼa adorartaʼal Jéeoba jeʼex uts tu tʼaaneʼ. Tsʼoʼoleʼ yaan u yantal tu yóokʼol u maasil montañaʼoboʼ. ¿Tuʼux túun yaan Ezequiel le ka tsʼaʼab u yil le templooʼ? Tiaʼan «yóokʼol junpʼéel jach kaʼanal montaña» yaan kaʼach tu tojil u yotoch Jéeobaeʼ (Eze. 40:2). Le baʼax tsʼaʼab u yil Ezequieloʼ tu yeʼesaj jach tu jaajil yaan u kaʼa adorartaʼal chéen Jéeoba.

17. ¿Tiʼ baʼax ku tʼaan le capítulo 40 tak 48 tiʼ u libroil Ezequieloʼ?

¹⁷ Le capítulo 40 tak 48 tiʼ u libroil Ezequieloʼ ku tʼaan tiʼ baʼax tu yilaj yéetel baʼax tu yuʼubaj le profetaoʼ. Yáaxeʼ tu yilaj juntúul ángel táan u pʼisik le pakʼ baʼpachtik le templooʼ, le joonajoʼ, u pakʼil le templooʼ, u táankabiloʼob bey xan le Cuarto Santooʼ (Eze. 40-42). Ka tsʼoʼok leloʼ Ezequieleʼ tu yilaj u juul u sáasilil u kiʼichkelmil Dios. Tu yilaj xan baʼax tu beetaj Jéeoba utiaʼal u kaʼa adorartaʼal tumen le kaajoʼ, le sacerdoteʼoboʼ bey xan u nuuktakiloʼob le kaajoʼ (Eze. 43:1-12; 44:10-31; 45:9-12). Ezequieleʼ tu yilaj xan le jaʼ ku jóokʼol desde teʼ templooʼ, le tuʼux ku máan le jaʼoʼ yaʼab baʼaloʼob ku kuxtaliʼ yéetel ku kʼuchul tak teʼ kʼáaʼnáaboʼ (Eze. 47:1-12). Le luʼumoʼ parejo úuchik u jaʼatsal yéetel tu chúumukeʼ tiʼ ku adorartaʼal Jéeobaiʼ (Eze. 45:1-8; 47:13–48:35). ¿Baʼax tu yóotaj u kaʼans Jéeoba yéetel lelaʼ? Táan kaʼach u yeʼesik tiʼ u kaajal yaan u kʼuchul u kʼiinil u adorartaʼal chéen letiʼ. Tsʼoʼoleʼ yaan u beetik u juul u sáasilil u kiʼichkelmil ichil u yotoch yéetel yaan u tsʼáaik yaʼab bendiciónoʼob ku keʼetel yéetel junpʼéel río. Le bendiciónoʼobaʼ yaan u beetik ka yanak toj óolal bey xan jeetsʼelil teʼ luʼum tuʼux kun suutoʼoboʼ.

18. Tsol baʼaxten k-aʼalik le baʼax tsʼaʼab u yil Ezequieloʼ maʼ unaj u naʼataʼal jach jeʼex tu yililoʼ.

¹⁸ U kaʼapʼéeleʼ, ¿bix tu naʼatil le judíoʼob le baʼax tsʼaʼab u yil Ezequieloʼ? Maʼ xaaneʼ Ezequiel yéetel le judíoʼoboʼ u yojloʼobeʼ le  baʼax tsʼaʼab u yiloʼ yaan u béeytal, chéen baʼaleʼ maʼ jach jeʼex tu yililoʼ. ¿Baʼaxten k-aʼalik beyoʼ? Kʼaʼajaktoʼoneʼ le templo tu yilaj Ezequieloʼ tiaʼan kaʼach «yóokʼol junpʼéel jach kaʼanal montaña[eʼ]». Maʼ xaaneʼ lelaʼ ku kʼaʼajsiktoʼon baʼax u yaʼalmaj Isaías yoʼolal le lugar tuʼux kun adorarbil Jéeobaoʼ yéetel jeʼel k-tuklik béeychaj teʼ kʼiinoʼob jeʼeloʼ. Chéen baʼaleʼ maʼ bey úuchikoʼ tumen le templo beetaʼab tu kʼiiniloʼob Salomónoʼ tiaʼan kaʼach Jerusalén, teʼ Montaña Moriaoʼ yéetel kéen máanak kʼiineʼ tiʼ kun kaʼa líiʼsbiliʼ. ¿Jach wa túun kaʼanal le montaña jeʼeloʼ? Maʼatech, baʼaxeʼ hasta baʼpachtaʼan tumen uláakʼ montañaʼob igual u kaʼanliloʼob wa hasta maas kaʼanaltakoʼob. Tsʼoʼoleʼ le templo tu yilaj Ezequieloʼ jach táaj nojoch. Tuláakal le templo yéetel u baʼpakʼiloʼ maʼ tu caber tu yóokʼol le Montaña Moriaoʼ. Hasta maas nojoch tiʼ u kaajil Jerusalén yanchaj tu kʼiiniloʼob Salomónoʼ. Tsʼoʼoleʼ maʼ tu páaʼtkoʼob ka jóokʼok junpʼéel río desde teʼ templooʼ yéetel ka kʼuchuk u jaʼil tak teʼ Mar Muerto utiaʼal ka maʼalobchajak u jaʼil. Yoʼolal le montañaʼob yanoʼob teʼ luʼum xanoʼ maʼ tu páajtal u tʼoʼoxol jach parejo le luʼum tiʼ tuláakal le tribuʼoboʼ. Tuláakal lelaʼ ku yeʼesikeʼ le baʼax tsʼaʼab u yil Ezequieloʼ maʼ kun béeytal jach jeʼex tu yililoʼ.

19-21. ¿Bix unaj u yuʼubikuba kaʼach le judíoʼob yéetel le baʼax tsʼaʼab u yil Ezequieloʼ? ¿Baʼax tu yóotaj u kaʼans Jéeoba tiʼ le judíoʼoboʼ?

¹⁹ U yóoxpʼéeleʼ, ¿bix unaj u yuʼubikuba kaʼach le judíoʼob yoʼolal le baʼax tsʼaʼab u yil Ezequieloʼ? Le judíoʼoboʼ unaj u suʼlaktaloʼob  le kéen u yiloʼob maʼ táan u adorarkoʼob Jéeoba jeʼex uts tu tʼaanoʼ. Jéeobaeʼ tu yaʼalaj tiʼ Ezequiel: «Unaj a waʼalik tiʼ u kaajil Israel jach bix le templooʼ». Ezequieleʼ unaj u tsolik tiʼ le judíoʼob jach bix le templooʼ, beyoʼ letiʼobeʼ yaan «u jach xakʼaltikoʼob u planoil». ¿Baʼax oʼolal ken u beetoʼob leloʼ? Maʼ utiaʼal u líiʼskoʼob le templooʼ, baʼaxeʼ jeʼex tu yaʼalil Jéeobaoʼ utiaʼal «u suʼlaktaloʼob yoʼolal le baʼaxoʼob kʼaastak ku beetkoʼoboʼ» (xok Ezequiel 43:10-12).

²⁰ Le baʼax tu yilaj Ezequieloʼ, ¿baʼaxten unaj kaʼach u beetik u suʼlaktal yéetel u péeksik le judíoʼob u kaʼa natsʼubaʼob tiʼ Jéeobaoʼ? Ilawil baʼax aʼalaʼab tiʼ Ezequiel ka u beete: «U paal máak, pʼil a wich, jach ilawil yéetel jach uʼuy a wuʼuy tuláakal le baʼax ken in waʼaltech tu yoʼolal le baʼaxoʼob unaj u beetaʼal tu templo Jéeobaoʼ bey xan tu yoʼolal u leyiloʼob» (Eze. 44:5). Ezequieleʼ yaʼab u téenel tu yuʼubaj u yúuchul tʼaan tiʼ u leyoʼob Dios (Eze. 43:11, 12; 44:24; 46:14). Yaʼab u téenel kʼaʼajsaʼab xan tiʼ baʼaxoʼob u kʼáat Jéeoba ka beetaʼak, bukaʼaj ku pʼisik junpʼéel codo yéetel uláakʼ baʼaloʼob ku meyaj utiaʼal u pʼiʼisil wa baʼax (Eze. 40:5; 45:10-12; ket yéetel Proverbios 16:11). Le ka tsʼíibtaʼab úuchjeakil le baʼax tsʼaʼab u yil Ezequieloʼ kex 50 u téenel ku chíikpajal kaʼach le tʼaan «pʼiisoʼ».

²¹ ¿Baʼax tu yóotaj u kaʼans Jéeoba tiʼ le judíoʼob le ka tu chʼaʼchiʼitaj le leyoʼob bey xan le nuʼukuloʼob utiaʼal u yúuchul pʼiisoʼ? Tuláakal le baʼaxoʼob tu yaʼalaj Jéeobaoʼ meyajnajtiʼ utiaʼal u kaʼansik junpʼéel baʼal: chéen tiʼ letiʼ yaan u derechoil u yaʼalik bix unaj u adorartaʼal. Le máaxoʼob xuʼul u beetkoʼob beyoʼ jach yaan baʼax oʼolal u suʼlaktaloʼob. ¿Bix áantaʼabik le judíoʼob tumen le baʼax tsʼaʼab u yil Ezequieloʼ? Tuláakʼ xookoʼ yaan k-ilik jujunpʼéel bix áantaʼabikoʼob. Tsʼoʼoleʼ yaan k-ilik xan bix u yáantkoʼon teʼ kʼiinoʼobaʼ.