Maʼ tun xáantaleʼ u Reino Dios tsʼoʼok k-sen kʼáatik ka taalakoʼ yaan u beetik ka kuxlakoʼon junmúuchʼ yéetel ich jeetsʼelil. Jeʼex u yaʼalik Salmo 72:7, ‹le jeetsʼeliloʼ mantatsʼ kun antal› way Luʼumeʼ. ¿Baʼax kʼiin kéen káajak u gobernar u Reino Dios? ¿Bix ken u beetil? Yéetel ¿bix jeʼel a kʼamik le utsiloʼob ken u taas le Reinooʼ?

Le Bibliaoʼ u yaʼalmaj baʼaxoʼob kun eʼesik taʼaytak u taal u Reino Dios. Ichil le baʼaxoʼob kun ilbiloʼ táakaʼan nukuch baʼateltáambaloʼob, wiʼijil, kʼojaʼaniloʼob, u sen tíitkuba le luʼumoʼ yéetel u sen yaʼabtal le kʼasaʼan máakoʼoboʼ (Mateo 24:3, 7, 12; Lucas 21:11; Apocalipsis 6:2-8).

Uláakʼ baʼaxoʼob aʼalaʼan kun ilbil: «Tu tsʼook kʼiinoʼobeʼ yaan u yilaʼal yaayaj kʼiinoʼob yéetel istikyaj ken u máansil u kuxtal máak. Tumen le máakoʼoboʼ yaan u kaxtikoʼob chéen u yutsiloʼob, yaan u yaabiltikoʼob taakʼin, [...] maʼ ken u yuʼuboʼob u tʼaan u taataʼob, maʼ ken u tsʼáaʼob u diosboʼotikil mix baʼal, yaan u xúumpʼatkoʼob u amigoʼob, yaan u pʼáatal minaʼan u yaabilajoʼob, junpuliʼ maʼ ken u yóotoʼob u tsʼáaubaʼob de acuerdoil, yaan u yaʼalikoʼob baʼaloʼob maʼ jaajtak tu contra u maasil, maʼ ken u kan u controlartubaʼob, jach yaan u tsʼíiktaloʼob, maʼ ken u yaabiltoʼob baʼax uts, [...] yaan u taaskubaʼob jach nojbaʼalil yéetel tu lugar u yaabiltikoʼob Dioseʼ yaan u yaabiltikoʼob chéen le baʼaloʼob taasik kiʼimak óolal tiʼoboʼ» (2 Timoteo 3:1-4). U jaajileʼ desde úuchjeakil yanak máakoʼob beyaʼ, baʼaleʼ teʼ kʼiinoʼobaʼ tsʼoʼok u maas yaʼabtaloʼob tumen tuláakal tuʼux ku yilaʼaloʼob.

Le profecíaʼobaʼ káaj u béeytaloʼob tu añoil 1914. Jujuntúul politicoʼob, historiadoroʼob yéetel máaxoʼob ku tsʼíibtikoʼob baʼax uchaʼaneʼ, ku yaʼalikoʼobeʼ le yóokʼol kaabaʼ káaj u kʼexpajal desde teʼ año jeʼeloʼ. Le historiador danés Peter Munchoʼ tu yaʼalaj: «Le baʼateltáambal káaj tu añoil 1914, tu beetaj u kʼexpajal le bix u kuxtal le máakoʼoboʼ. Jach maʼalob yanil kaʼach tuláakal, [...] chéen ka téek káaj u yúuchul baʼaloʼob kʼaastak, káaj u pʼektikuba yéetel u kíimskuba le máakoʼoboʼ yéetel tuláakal tuʼux pʼáat minaʼan jeetsʼelil».

Chéen baʼaleʼ yaan xan baʼaloʼob maʼalobtak ku yúuchul, lelaʼ bey jeʼex kéen jatsʼutschajak le kaʼan kéen tsʼoʼokok u kʼáaxal le jaʼoʼ. Le baʼaxoʼob tsʼoʼok k-aʼalikoʼ ku yeʼesikeʼ maʼ tun xáantal kéen káajak u gobernar u Reino Dios way Luʼumeʼ. Ichil le baʼaxoʼob tu yaʼalaj Jesusoʼ yaan junpʼéel baʼal kun beetbil teʼ kʼiinoʼobaʼ: «Le baʼaloʼob maʼalobtak ken u beet le Reinooʼ yaan u tsikbaltaʼal tiʼ tuláakal yóokʼol kaab utiaʼal ka ojéeltaʼak tumen u kajnáaliloʼob tuláakal kaajoʼob, le kéen tsʼoʼokkeʼ ku taal u xuul» (Mateo 24:14).

U maʼalob péektsilil le Reinoaʼ, wa le baʼaxoʼob maʼalobtak ken u beetoʼ, letiʼe ku tsʼáaik ojéeltbil u testigoʼob Jéeoba teʼ kʼiinoʼobaʼ. Tsʼoʼoleʼ yaantoʼon junpʼéel revista jach kʼaj óolaʼan tuláakal tuʼux, lelaʼ ku kʼaabaʼtik U Pʼíich Tulumil Kanan. Táan u kʼaʼaytik u Reino Jéeoba. Le revistaaʼ ku tʼaan tiʼ baʼax ken u beet u Reino Dios yoʼolal wíinik bey xan yoʼolal le Luʼumaʼ.

Utiaʼal k-núukikeʼ, koʼox ilik kanpʼéel baʼaloʼob kun úuchul:

1. Ichil u Reino Dioseʼ maʼ tun táakpajal mix juntúul politicoiʼ.

2. U nuuktakil le politicoʼoboʼ maʼ ken u yóot u pʼatoʼob le páajtalil yaantiʼoboʼ, le oʼolal yaan u tsʼáaikubaʼob tu contra u Reino Dios (Salmo 2:2-9).

3. U Reino Dioseʼ yaan u xuʼulsik tiʼ le gobiernoʼoboʼ tumen letiʼobeʼ maʼ ken u yóot u pʼatoʼob le páajtalil yaantiʼoboʼ (Daniel 2:44; Apocalipsis 19:17-21). Le nojoch baʼateʼel kun antaloʼ ku kʼaabaʼtik Armagedón (Apocalipsis 16:14, 16).

4.   Le máaxoʼob ken u tsʼáajubaʼob tu tséel le Reinooʼ yaan u kanáantaʼaloʼob tu kʼiinil Armagedón yéetel yaan u kuxtaloʼob tiʼ junpʼéel túumben yóokʼol kaab. Le Bibliaoʼ ku yaʼalikeʼ «yaʼabkach máakoʼob», maʼ xaaneʼ u millonesil u jejeláasil máakoʼob (Apocalipsis 7:9, 10, 13, 14).

Wa k-kʼáat antal yáanal le Reinooʼ táanil unaj k-kʼaj óoltik Dios. Lelaʼ bey tu yaʼalil Jesús le ka orarnaj tiʼ Diosoʼ, letiʼeʼ tu yaʼalaj: «Lelaʼ letiʼe baʼax kun tsʼáaik kuxtal minaʼan u xuul tiʼ le máakoʼoboʼ: ka kʼuchuk u kʼaj óoltechoʼob, teech le u juntúuliliʼ jaajil Diosoʼ, bey xan ka u kʼaj óoltoʼob Jesucristo, le máax ta túuxtoʼ» (Juan 17:3).

Yaʼab utsil ku taasik u kʼaj óoltaʼal Dios. Koʼox ilik kaʼapʼéeliʼ. Yáaxeʼ ku yáantkoʼon utiaʼal ka muʼukʼaʼanchajak k-fe tiʼ Dios. Le fejaʼ ku taal yoʼolal baʼaxoʼob tsʼoʼok k-ilik bix u béeytaloʼob, tsʼoʼoleʼ ku beetik k-creertik u Reino Dioseʼ jach tu jaajil yaan, yéetel maʼ kun xáantal kéen káajak u gobernar (Hebreos 11:1). U kaʼapʼéeleʼ ku péeksikoʼon k-yaabilt Dios yéetel k-éet máakil. Le yaabilaj k-uʼuyik yoʼolal Diosoʼ yaan u yáantkoʼon k-beet baʼax ku yaʼalik. Tsʼoʼoleʼ wa k-yaabiltmaj k-éet máakileʼ yaan u péeksikoʼon k-beet le baʼax tu yaʼalaj Jesusaʼ: «Le baʼax a kʼáateʼex ka beetaʼakteʼex tumen le máakoʼoboʼ teʼex xaneʼ bey unaj a beetkeʼextiʼoboʼ» (Lucas 6:31).

Jeʼel bix juntúul utsul taatatsileʼ, Dioseʼ u kʼáat ka xiʼiktoʼon utsil. Tsʼoʼoleʼ u kʼáat ka yanaktoʼon «le kuxtal jach tu jaajil kuxtaloʼ» (1 Timoteo 6:19). Le kuxtalaʼ maʼ jeʼex le yaantoʼon bejlaʼaʼ, tumen u millonesil máakoʼobeʼ jach talam bix kuxlikoʼob. Utiaʼal k-naʼatik bix «le kuxtal jach tu jaajil kuxtaloʼ», koʼox ilik jujunpʼéel tiʼ le baʼaxoʼob jatsʼutstak ken u beet u Reino Dios yoʼolal le máaxoʼob ken u gobernartoʼ.