¿Baʼaxten casi maʼ tu yeʼesaʼal respeto ichil le familiaoʼ?
BAʼAXTEN IMPORTANTE KA EʼESAʼAK RESPETO ICHIL LE FAMILIAOʼ
Tiʼ junpʼéel familia tuʼux ku yeʼesaʼal respetoeʼ, le íichamtsiloʼ, le atantsiloʼ yéetel le paalaloʼoboʼ ku yuʼubikoʼob kanáantaʼanoʼob.
-
Le libro Siete reglas de oro para vivir en pareja, ku yaʼalikeʼ wa le íichamtsil yéetel le atantsil ku respetarkubaʼoboʼ yaan u yeʼeskoʼob u yaabiltmubaʼob sáamsamal «yéetel mejen detalles, maʼ tsaaj u beetkoʼob nukuch baʼaloʼobiʼ» (traducirtaʼan tumen Sonia Tapia Sánchez).
-
Tsʼoʼok u yilaʼaleʼ le paalaloʼob ku kanik u yeʼesoʼob respetooʼ maas kiʼimak u yóoloʼob, maʼalob u biskubaʼob yéetel u papáʼob, tsʼoʼoleʼ maʼ tu kʼaʼabéettal u sen binoʼob yiknal doctor wa yiknal psicólogo.
BAʼAX JEʼEL U PÁAJTAL A BEETKEʼ
Tukleʼex baʼax jeʼel u páajtal a beetkeʼexeʼ. Yáaxeʼ ilawil a naʼatik baʼax u kʼáat u yaʼal le respetooʼ. U kaʼapʼéel, tsʼíibt baʼaxoʼob a kʼáat ka u beet a paalal bey xan baʼaxoʼob maʼ unaj u beetkoʼobiʼ. U yóoxpʼéeleʼ, tsikbalt tiʼ a familia le baʼax tsʼoʼok a chʼaʼtuklikoʼ, beyoʼ tuláakloʼob ken u yojéeltoʼob baʼax unaj u beetkoʼob utiaʼal u yeʼeskoʼob respeto.
Tsʼáa u ejemploil. Tukult lelaʼ: «¿Suuk wa in criticartik in familia yoʼolal le baʼaloʼob maʼ maʼalobtak ku beetkoʼoboʼ? ¿Kin burlarkinba wa tiʼ le baʼax ku tuklikoʼoboʼ? ¿Kin interrumpirkoʼob wa kéen tʼaanakoʼob? ¿Kin beetik wa u cuentail baʼax ku yaʼalikoʼob?». Maʼ a tuʼubsikeʼ yáax teech kʼaʼabéet a respetartik u maasil.
Beet lelaʼ: Mantatsʼ kʼaʼabéet a respetartik a familia, maʼ letiʼob kʼaʼabéet u ganarkoʼobiʼ.
Eʼes respeto kex maʼ igual baʼax ka tuklikeʼexiʼ. Maʼ a waʼalik baʼaloʼob jeʼex, «Es ke techeʼ mantatsʼ bey a beetkoʼ» wa «Techeʼ mix juntéen ka beetik baʼax uts». Le tʼaanoʼob beyaʼ jeʼel u beetik u yuʼubikuba kʼaasil a familiaeʼ, tsʼoʼoleʼ kex chichan le problemaoʼ jeʼel a beetik u nojochtaleʼ.
BAʼAX TÁAN U BEETIK U TESTIGOʼOB JÉEOBA
U testigoʼob Jéeobaeʼ ku kaʼanskoʼob tiʼ le máakoʼob bix jeʼel u yeʼeskoʼob respeto ichil u familiaʼobeʼ. Utiaʼal lelaʼ tsʼoʼok u jóoʼskoʼob xookoʼob, libroʼob, folletoʼob yéetel videoʼob ku tʼaanoʼob yoʼolal le familiaoʼ, tsʼoʼoleʼ gratis.
UTIAʼAL LE MÁAXOʼOB TSʼOKAʼAN U BEELOʼOBOʼ: Le jaats «Áantaj utiaʼal le familiaʼoboʼ» jeʼel u yáantik le íichamtsil yéetel le atantsil utiaʼal. . .
-
. . . ka u kanoʼob múul tsikbal.
-
. . . maʼ u xuʼulul u tʼankubaʼob kéen yanak problemas tiʼob.
-
… maʼ u seguer u baʼateʼel tʼaanoʼob.
(Teʼ jw.org tsʼíibt teʼ buscador «Áantaj utiaʼal le familiaʼoboʼ»).
UTIAʼAL LE TAATATSILOʼOBOʼ: Le jaats «Áantaj utiaʼal le familiaʼoboʼ» jeʼel u yáantik le taatatsiloʼob u kaʼans u paalaloʼob utiaʼal. . .
-
. . . u kankoʼob obedecer.
-
. . . u yáantajoʼob ichil u yotochoʼob.
-
… u kanik u yaʼaloʼob «por favor» yéetel «gracias».
(Teʼ jw.org tsʼíibt teʼ buscador «U kaʼansaʼal le paaloʼoboʼ» wa «U kaʼansaʼal le táankelem paalaloʼoboʼ»).
Ilawil le xook «Los padres preguntan» ku taasik le libro Lo que los jóvenes preguntan. Respuestas prácticas (volumen 1) (teʼ jw.org tsʼíibt teʼ buscador «Los padres preguntan»).
UTIAʼAL LE TÁANKELMOʼOBOʼ: Le jaats «Paalaloʼob yéetel táankelmoʼob» teʼ jw.org, ku taasik xookoʼob, videoʼob yéetel uláakʼ baʼaloʼob jeʼel u yáantik le táankelmoʼob utiaʼal. . .
-
. . . u biskubaʼob maʼalob yéetel u papáʼob bey xan yéetel u sukuʼunoʼob.
-
. . . u tʼaanoʼob yéetel respeto yoʼolal jujunpʼéel reglas kʼaʼabéet u cumplirtikoʼob.
-
… u maas confiar u papáʼob tiʼob.
(Teʼ jw.org tsʼíibt teʼ buscador «Paalaloʼob yéetel táankelmoʼob»).
Le sitio jw.org gratis. Maʼ kʼaʼabéet a registrarkabaiʼ yéetel maʼatech u kʼáataʼal a datos personales.
