Le máaxoʼob yanoʼob teʼ religiónaʼ ku creerkoʼobeʼ tuláakloʼon k-muʼyaj yoʼolal le baʼaxoʼob maʼ maʼalobtak táan k-beetik teʼ kʼiinoʼobaʼ wa tiʼ uláakʼ kuxtal anchajtoʼon antes. Ku creerkoʼobeʼ juntúul máakeʼ ku jáawal u muʼyaj kéen xuʼuluk u kíimil yéetel u kaʼa kuxtal tiʼ uláakʼ wíinklil wa uláakʼ baʼal (moksha). Utiaʼal lelaʼ kʼaʼabéet u pʼáatal jeetsʼel u tuukul yéetel maʼ u chiʼichnaktal.

Le musulmanoʼoboʼ ku creerkoʼobeʼ ku muʼyajoʼob yoʼolal le kʼebanoʼ yéetel ku muʼyajoʼob xan utiaʼal u yeʼeskoʼob wa yaan u fejoʼob. Sayyid Syeed, le máax nuʼuktik kaʼach le Sociedad Islámica yaan América del Norteoʼ, ku yaʼalikeʼ kéen muʼyajnak máakeʼ ku kʼaʼajsik «unaj u tsʼaʼabal gracias tiʼ Dios yoʼolal le baʼaxoʼob ku tsʼáaik tiʼ wíinikoʼ yéetel unaj u yáantaʼal le máaxoʼob kʼaʼabéettiʼoboʼ».

Le judíoʼoboʼ ku yaʼalikoʼobeʼ k-muʼyaj yoʼolal le baʼaxoʼob maʼ maʼalobtak k-beetkoʼ. Yaan judíoʼobeʼ ku yaʼalikoʼob xaneʼ yaan u kaʼa kuxtal le kimenoʼoboʼ yéetel yaan u beetaʼal justicia tiʼ le máaxoʼob muʼyajnajoʼob kex maʼ tu beetoʼob mix baʼal kʼaasoʼ. Uláakʼ clase judíoʼobeʼ (místico wa cabalístico), ku yaʼalikoʼobeʼ le u kaʼa síijil máak tiʼ uláakʼ wíinkliloʼ (reencarnación), ku tsʼáaik u páajtalil tiʼ máak utiaʼal u yutskíintik le baʼaxoʼob kʼaastak tu beetaj tiʼ uláakʼ u kuxtal anchajoʼ.

Le budistaʼoboʼ ku creerkoʼobeʼ yaʼab u téenel k-síijil yéetel k-kíimil, tsʼoʼoleʼ cada ken úuchuk lelaʼ k-muʼyaj, lelaʼ chéen jeʼel u xuʼulul wa ku jáawal k-tsʼíiboltik yéetel k-beetik baʼaloʼob maʼ maʼalobtakiʼ. Wa juntúul máak ku yantal u naʼat, ku kanik u controlart baʼaxoʼob ku tuklik yéetel ku beetik baʼaloʼob maʼalobtakeʼ ku náajaltik u xuʼulul u muʼyaj (nirvana).

Le máaxoʼob yanoʼob ichil le confucionismooʼ ku creerkoʼobeʼ ku muʼyaj máak «yoʼolal le baʼaloʼob maʼ maʼalobtak ku beetik wíinikoʼ» (Diccionario de religiones comparadas). Ku yaʼalikoʼobeʼ jeʼel u xuʼulul u muʼyaj máak wa ku bisik «junpʼéel maʼalob kuxtaleʼ». Chéen baʼaleʼ ku yaʼalikoʼob xaneʼ maases letiʼe espírituʼob beetik u muʼyaj máakoʼ. Le oʼolal cada juntúuleʼ unaj u pʼatik u kuxtal tu kʼab le Destinooʼ.

Jujunpʼéel religiónoʼobeʼ ku yaʼalikoʼobeʼ máakeʼ ku muʼyaj tumen táan u beetaʼal kʼaas tiʼ. Yanoʼobeʼ ku yaʼalikoʼobeʼ le j-meenoʼoboʼ jeʼel u beetkoʼob u bin utsil tiʼ máakeʼ, u beetkoʼob loob tiʼ uláakʼ máak yéetel ku yaʼalikoʼobeʼ wa tsʼoʼok u beetaʼaltech kʼaaseʼ ka santiguartaʼal utiaʼal a maʼalobtal. Le oʼolaleʼ kéen kʼojaʼanchajkoʼobeʼ ku binoʼob yiknal le j-meen utiaʼal ka tsʼaʼakakoʼoboʼ.

Le cristianoʼoboʼ ku creerkoʼobeʼ ku muʼyaj máak úuchik u kʼebantal Adán yéetel Eva, jeʼex u yaʼalik u libroil Génesisoʼ. Chéen baʼaleʼ yanoʼobeʼ tsʼoʼok u yoksikoʼob uláakʼ kaʼansajoʼobiʼ. Jeʼex le católicoʼoboʼ ku creerkoʼobeʼ utiaʼal u bendecirtaʼal u religiónoʼob wa utiaʼal u yáantaʼal wa máax tumen Dioseʼ ku castigarkubaʼob utiaʼal u yeʼeskoʼob jach tu jaajil táan u muʼyajoʼob.