Yaʼab máakoʼobeʼ ku tuklikoʼob Dios beetik u muʼyajoʼob, le oʼolal maʼ tu taaktal u natsʼkubaʼob tiʼ.

Yaan kʼiineʼ u nuuktakil le religiónoʼoboʼ ku kaʼanskoʼob Dios beetik u muʼyaj máak. Yanoʼobeʼ ku yaʼalikoʼob le baʼaloʼobaʼ:

• Dios beetik u yantal le nukuch loobiloʼob utiaʼal u castigartik máakoʼ

• Le mejen paalaloʼoboʼ ku kíimloʼob tumen kʼaʼabéet uláakʼ juntúul ángel tiʼ Dios teʼ kaʼanoʼ

• Dioseʼ ku bendecirtik le guerraʼoboʼ

Baʼaleʼ ¿jaaj wa le baʼax ku yaʼalikoʼobaʼ? ¿Bix u yilik Dios le baʼaxoʼob ku yaʼalikoʼoboʼ?

Maʼ Dios beetik k-muʼyajiʼ

Letiʼeʼ jatsʼuts u modos, le oʼolal maʼ tu páajtal u beetik u muʼyaj máak. Le Bibliaoʼ ku yaʼalik:

«Tuláakal u beeloʼobeʼ tojtak. [...] Letiʼeʼ justo yéetel toj baʼax ku beetik» (DEUTERONOMIO 32:4).

«¡U jaajil Dioseʼ junpuliʼ maʼ tu beetik baʼax kʼaas! ¡Le Máax jach táaj yaan u poderoʼ junpuliʼ maʼ tu beetik baʼax maʼ maʼalobiʼ!» (JOB 34:10).

«Le Máax jach táaj yaan u poderoʼ mantatsʼ ku beetik baʼax maʼalob» (JOB 34:12).

Dioseʼ maʼ tu kʼamik le religiónoʼob kaʼansik baʼaloʼob maʼ jaajtak tu yoʼolaloʼ

Maʼ tu kʼamik le religiónoʼob kaʼansik letiʼ beetik u muʼyaj máakoʼ mix le ku yoksikubaʼob tiʼ guerra wa uláakʼ baʼaloʼob kʼaastakoʼ.

«Maʼ jaaj le baʼax ku yaʼalik le profetaʼob tin kʼaabaʼoʼ. Maʼ teen túuxtoʼobiʼ, maʼ teen tusbeltoʼobiʼ, mix tʼaanaken tu yéeteloʼobiʼ. Maʼ jaaj baʼax ku wayakʼtikoʼobiʼ, [...] letiʼobeʼ chéen ku yaʼalikoʼobteʼex le tuusoʼob yaan tu puksiʼikʼaloʼoboʼ» (JEREMÍAS 14:14).

Jesúseʼ tu yeʼesaj maʼ maʼalob le baʼax ku kaʼansik le religiónoʼoboʼ

«Maʼ tuláakal le máaxoʼob aʼalikten ‹Yuumtsil, Yuumtsil› kun ookloʼob tu Reinoil le kaʼanoʼ, baʼaxeʼ chéen le máaxoʼob ku beetkoʼob baʼax u kʼáat in Taata yaan teʼ kaʼanoʼ. Teʼ kʼiin jeʼeloʼ yaʼab máakoʼob ken u yaʼaloʼobten: ‹Yuumtsil, Yuumtsil, ¿maʼ wa profetizarnajoʼon ta kʼaabaʼiʼ? ¿Maʼ wa t-jóoʼsaj demonioʼob yéetel t-beetaj yaʼab milagroʼob ta kʼaabaʼiʼ?›. Teen túuneʼ yaan in waʼaliktiʼob: kʼasaʼan máakeʼex, ¡junpuliʼ maʼ in kʼaj óoleʼexiʼ! ¡Náachkuntabaʼex tiʼ teen!» (MATEO 7:21-23).