Chéen baʼaleʼ wa maʼ tu kanik u usartoʼob tubeeleʼ jeʼel u yúuchultiʼob le baʼaloʼobaʼ:

• Jeʼel u yoklik tiempo tiʼob utiaʼal u múul beetkoʼob wa baʼaxeʼ.

• Jeʼel u biskoʼob u meyajoʼob tu yotochoʼob kex maʼ kʼaʼabéet u beetkoʼobeʼ.

• Jeʼel u pʼáatal minaʼan confianza ichiloʼobeʼ yéetel jeʼel tak u tusik u núupoʼobeʼ.

KU YOKLIK A TIEMPOʼEX

Juntúul íichamtsil ku kʼaabaʼtik Michaeleʼ ku yaʼalik: «Yaan horaeʼ kex tu tséel in watan yaneneʼ kin wuʼuyik maʼatech u beetik in cuentail tumen chéen táan u báaxtik u celular yéetel ku yaʼalikten: ‹¿Maʼ wa ta wilik táan in jáan xokik le mensajeʼob túuxtaʼantenoʼ?›». Jonathan, máax tsʼokaʼan u beeleʼ, ku yaʼalikeʼ juntúul máax tsʼokaʼan u beeleʼ kex naatsʼ yanik tiʼ u núupeʼ yaan horaeʼ jeʼel u yuʼubik bey náach yanil tiʼeʼ.

TUKULT LELAʼ: Wa in jóoʼsmaj tiempo utiaʼal in wantal yéetel in núupeʼ, ¿jaytéen kin interrumpirtaʼal tumen ku kʼuchulten junpʼéel llamada wa junpʼéel mensaje? (EFESIOS 5:33).

A MEYAJEʼEX

Yanoʼobeʼ yoʼolal le clase meyaj ku beetkoʼoboʼ láalaj hora ku kaxtaʼaloʼob, pero yanoʼobeʼ maʼatech. Kex beyoʼ le tiaʼanoʼob tu yotochoʼoboʼ maʼ tu chan chaʼik u jeʼelel u celularoʼob. Juntúul íichamtsil ku kʼaabaʼtik Leeeʼ ku yaʼalik: «Le tiempo in jóoʼsmaj utiaʼal in wantal yéetel in watanoʼ jach ku taaktal in checartik le mensajeʼob yéetel le llamadaʼob ku túuxtaʼalten yaan yil yéetel in meyajoʼ». Juntúul atantsil ku kʼaabaʼtik Joyeʼ ku yaʼalik xan: «Teneʼ desde tin wotoch kin meyaj yéetel desde tin machaj in meyajeʼ jach ku difíciltal in pʼatik, le oʼolal unaj in kanik in tsʼáa u pʼiis in meyaj».

TUKULT LELAʼ: ¿Suukaʼan wa a chʼenxikintik baʼax ku yaʼaliktech a núup? (LUCAS 8:18).

MAʼ A TUSIK A NÚUP

Junpʼéel encuesta beetaʼabeʼ tu yaʼaleʼ yaʼab tiʼ le máaxoʼob tsʼokaʼan u beeloʼoboʼ suukaʼan u baʼateltʼaanoʼob yoʼolal baʼax ku naʼaksik u núupoʼob teʼ redes socialesoʼ. U diez porcientoil tiʼ le máaxoʼob beetaʼab le encuestaoʼ tu yaʼaloʼobeʼ tsʼoʼok u naʼaksikoʼob baʼaloʼob teʼ redes sociales sin ke u yojéeltaʼal tumen u núupoʼoboʼ.

Tsʼoʼok u yilaʼaleʼ le redes socialesoʼ jach yaʼab problemas jeʼel u taasik tiʼ le máaxoʼob tsʼokaʼan u beeloʼoboʼ. Jeʼel tak u tsʼáaik tuʼux u tusik u núup máak yéetel yaanaleʼ. Jujuntúul abogadoʼobeʼ ku yaʼalikoʼobeʼ le redes socialesoʼ tsʼoʼok u beetik u pʼatkuba yaʼab tiʼ le máaxoʼob tsʼokaʼan u beeloʼoboʼ.

TUKULT LELAʼ: ¿Saajkech wa u xoʼokol tumen a núup le mensajeʼob ka túuxtik tiʼ máax maʼ a núupoʼ? (PROVERBIOS 4:23).

MAʼ U XUʼULUL A YAABILTIKABAʼEX

Juntúul máax maʼ tu kanáantik baʼax ku jaantikeʼ yaan u kʼojaʼantal. Bey xan jeʼel u yúuchul yéetel juntúul máax maʼ tu máansik tiempo yéetel u núupoʼ, jeʼel u yantal problemas tiʼobeʼ (Efesios 5:28, 29).

Tukult bey baʼaxoʼob jeʼel u yáantkecheʼ yéetel tsʼíibte.

• Sáamsamaleʼ ilawil a múul janaleʼex.

• Cada wa baʼax horaeʼ ilawileʼex maʼ u meyajteʼex a celulareʼex.

• Planearteʼex junpʼéel baʼal jeʼel u beetik u kiʼimaktal a wóoleʼexeʼ.

• Táanil tiʼ a weenleʼexeʼ tup a celulareʼex.

• Sáamsamaleʼ jóoʼseʼex 15 minutos utiaʼal a tsikbaleʼex, teʼ súutukil jeʼeloʼ tup a celulareʼex.

• Chʼaʼtukleʼex tak baʼax hora kun meyajteʼex le Internetoʼ.