Le tecnologíaoʼ jeʼel u afectartik a tuukuleʼ
Máakeʼ maʼ tu xuʼulul u kaanbal kex jeʼel tuʼuxak yaneʼ, jeʼex teʼ escuelaoʼ wa tuʼux ku meyaj. Le tecnología xanoʼ jach jeʼel u yáantik máak u kan yaʼab baʼaloʼobeʼ. Bejlaʼeʼ jach fácil u kanik máak yaʼab baʼaloʼob, maʼ kʼaʼabéet u jóokʼol tu yotochiʼ mix u bin tuláakʼ tuʼuxoʼobiʼ.
Pero le máaxoʼob ku sen meyajtiʼob le tecnologíaoʼ jeʼel u yúuchultiʼob le baʼaloʼobaʼ:
-
Ku difíciltal u concentrarkubaʼob le táan u xookoʼoboʼ.
-
Séebaʼan u distraeroʼob yéetel uláakʼ baʼaloʼob.
-
Séebaʼan u náakal u yóoloʼob le kéen pʼáatkoʼob tu juunaloʼob.
LE BAʼAX UNAJ A WOJÉELTIKOʼ
A XOOK
Yaan máaxeʼ maʼ uts tu tʼaan u xookiʼ, le oʼolal chéen jáajan xook ku beetik.
U jáajan xook máakeʼ jeʼel u yáantaj utiaʼal u séeb kaxtik junpʼéel wa baʼaxeʼ, pero le clase xook beyaʼ maʼ tu yáantik u naʼat le baʼaloʼob maʼ fácil u naʼataʼaloʼ.
TUKULT LELAʼ: ¿Nak óol wa a wilik a xokik jaatsoʼob chowaktakoʼob? A tuklikeʼ, ¿jeʼel wa a kanik u maasil baʼaloʼob wa ka tsʼáaik a wóol xookeʼ? (PROVERBIOS 18:15).
A CONCENTRARKABA
Yaan máakeʼ ku tuklikeʼ jeʼel u páajtal u beetik kaʼapʼéel baʼal junpuuleʼ, mientras táan u xookeʼ táan xan u túuxtik mensajeʼob. Pero wa yaan baʼax jach importante ku beetik máak yéetel maʼ tu concentrarkubaeʼ tu tsʼookeʼ maʼ kun jóokʼol maʼalobil.
Jach maʼalob ka u kan u concentrartuba máak tumen beyoʼ jeʼel u kanik uláakʼ baʼaloʼobeʼ. Juntúul x-chʼúupal ku kʼaabaʼtik Graceeʼ ku yaʼalik: «Wa concentradoecheʼ maas jeʼel u jóokʼol maʼalobil baʼax ka beetkeʼ yéetel maʼ ta jach estresar. Tsʼoʼok in tsʼáaik cuentaeʼ maas maʼalob ka u concentrartuba máak u beet junpʼéeliliʼ baʼal».
TUKULT LELAʼ: Wa jejeláas baʼaxoʼob táan a beetkeʼ, ¿maas wa chéen chʼaʼabil a kʼaʼajsik baʼaxoʼob tsʼoʼok a xokik? (PROVERBIOS 17:24).
LE KÉEN PʼÁATKECH TA JUUNAL
Yaan máakeʼ maʼ uts tu tʼaan u pʼáatal tu juunaliʼ, le oʼolal yaʼab u meyajtiʼob le tecnologíaoʼ. Juntúul koʼolel ku kʼaabaʼtik Oliviaeʼ ku yaʼalik: «Maʼ tu máan mix 15 minutos maʼ in mach in celulariʼ, in tablet wa in tʼab le televisiónoʼ tumen jach séebaʼan u náakal in wóol».
Kex táankelem máak wa kex tsʼoʼok u nojochtaleʼ unaj u jóoʼsik tiempo utiaʼal u tuukul tiʼ baʼax tsʼoʼok u kanik, jaʼaliʼ bey jeʼel u tʼíilil tu pool le baʼax ku kanikoʼ.
TUKULT LELAʼ: Kéen pʼáatkech ta juunaleʼ, ¿suuk wa a tuukul tiʼ baʼaxoʼob tsʼoʼok a kanik? (1 TIMOTEO 4:15).
LE BAʼAX JEʼEL U PÁAJTAL A BEETKOʼ
BIX TÁAN U MEYAJTECH LE TECNOLOGÍAOʼ
¿Bix jeʼel u yáantkech le tecnología utiaʼal a kanik u maasil baʼaloʼoboʼ? ¿Ku beetik wa u difíciltal a concentrarkaba?
TEKSTO JEʼEL U YÁANTAJEʼ: «Kanáant le naʼatoʼ bey xan le maʼalob tuukul yaantechoʼ» (PROVERBIOS 3:21).
Maʼ xaaneʼ jeʼel u yutstal xan ta wicheʼ
LE PAALALOʼOBOʼ TAAK U YOJÉELTIKOʼOB
¿Baʼax jeʼel u yáantken in concentrartinbaeʼ?
Ilawil tiʼ baʼax súutukiloʼob jeʼel u pʼáatal maʼ tu chaʼik a concentrarkaba le tecnologíaoʼ.
LE PAALALOʼOBOʼ TAAK U YOJÉELTIKOʼOB
¿Maʼalob wa ka u beet máak yaʼab baʼaloʼob tiʼ junpʼéeliliʼ súutukil?
Wa jejeláas baʼaloʼob ka beetik tiʼ junpʼéeliliʼ súutukileʼ, ¿jeʼel wa ta tʼaan u jóokʼol maʼalobileʼ?
