UTIAʼAL TÁANKELEM PAALALOʼOB
9. Kʼaj óoltaba
¿BAʼAX TÁAKAʼANIʼ?
Le baʼax eʼesik jach bix máakoʼ maʼ letiʼe u kʼaabaʼoʼ mix le bix u yilaʼaloʼ, baʼaxeʼ letiʼe baʼaxoʼob ku creerkoʼ yéetel le bix u modosoʼ.
¿BAʼAXTEN KʼAʼABÉET?
Wa kʼaj óolmaba tubeel yéetel seguroech tiʼ baʼaxoʼob ka creerkeʼ maʼ ken a chaʼa a suʼusutaʼal tumen u maasil paalaloʼob.
«Yaʼab máakeʼ maʼ tu páajtal mix u yéeyik le nookʼ ken u tsʼáaoʼ, yaanal máax yéeyik tiʼ» (Adrian).
«Kex yaan hora maʼ chéen chʼaʼabileʼ tsʼoʼok in kanik in defendert baʼax maʼalob. Tsʼoʼok xan in kanik in wil máaxoʼob jach tu jaajil in amigoʼob; letiʼobeʼ jatsʼuts u modosoʼob yéetel ku yáantkenoʼob» (Courtney).
LE BIBLIAOʼ KU YAʼALIK: «Xuʼuluk xan a kuxtaleʼex jeʼex u máakiloʼob le yóokʼol kaabaʼ, baʼaxeʼ kʼex a tuukuleʼex utiaʼal ka páajchajak a kʼexik a kuxtaleʼex» (Romanos 12:2).
¿BAʼAX JEʼEL A BEETKEʼ?
Utiaʼal a wojéeltik jach bixech beora yéetel bix le modos a kʼáat a weʼes kéen nojochchajkechoʼ, tuukulnen tiʼ baʼaxoʼob ka creertik, tiʼ le baʼaloʼob maʼalobtak ka beetkoʼ bey xan tiʼ le baʼaloʼob maʼ maʼalobtak ka beetkoʼ. Utiaʼal leloʼ núuk le preguntaʼobaʼ.
Baʼaloʼob maʼalobtak kin beetik: «¿Máakalmáak le baʼaloʼob jach in wojel in beetoʼ? ¿In wojel wa in controlartinba? ¿Kin kʼuchul wa tu yorail teʼ tuʼux ku yaʼalaʼaltenoʼ? ¿Meeyjilen wa? ¿Kin síik wa le baʼaxoʼob yaantenoʼ wa tsʼuʼuten?».
JEʼEL U PÁAJTAL A BEETIK LELAʼ: Wa istikyaj a wilik le baʼaxoʼob maʼalobtak ka beetkoʼ kʼáat tiʼ a papáʼob wa tiʼ juntúul a amigo ka u yáantech a wil máakalmáakoʼobiʼ.
LE BIBLIAOʼ KU YAʼALIK: «Cada juntúuleʼ u xíixt baʼax ku beetik yéetel maʼ unaj u ketik yéetel le baʼax ku beetik u yéet máakiloʼ. Beyoʼ yaan u kiʼimaktal u yóol yoʼolal le baʼaxoʼob tsʼoʼok u beetik letiʼoʼ» (Gálatas 6:4).
Baʼaloʼob maʼ maʼalobtak kin beetkiʼ: «¿Baʼax modosil kʼaʼabéet in maʼalobkíintik? ¿Tiʼ baʼax súutukiloʼob kin wuʼuyik bey jeʼel in lúubul tiʼ baʼax kʼaaseʼ? ¿Tiʼ baʼax súutukiloʼob kʼaʼabéet in kanik in controlartinba?».
LE BIBLIAOʼ KU YAʼALIK: «Wa k-aʼalik: ‹Minaʼan k-kʼeban›, chéen t-juunal táan k-tusikba» (1 Juan 1:8).
Baʼaxoʼob ka creertik: «¿Baʼax kin chʼaʼik en cuenta utiaʼal in nuʼuktik in kuxtal, yéetel baʼaxten? ¿Kin creertik wa yaan Dios? ¿Baʼaxoʼob eʼesikten jach tu jaajil yaan? ¿Baʼaxoʼob jach junpuliʼ in pʼeek u beetaʼal yéetel baʼaxten? ¿Baʼax kin creertik kun úuchul ichil junpʼíit kʼiin?».
LE BIBLIAOʼ KU YAʼALIK: «Le maʼalob tuukuloʼ yaan u kanáantkech, le a kanik baʼax unaj a beetkoʼ yaan xan u kanáantkech» (Proverbios 2:11).
Maʼ xaaneʼ jeʼel u yutstal xan ta wicheʼ
U NÚUKIL 10 PREGUNTAʼOB KU BEETIK LE PAALALOʼOBOʼ
¿Máaxen jach tu jaajil?
Maʼ u tuʼubul tiʼ máak baʼax ku creertik, u kʼaʼajal tiʼ baʼaxoʼob ku páajtal u beetik, baʼaxoʼob maʼ tu páajtal u beetik yéetel baʼaxoʼob jeel u yáantik u chʼaʼtukult tubeel baʼax ken u beeteʼ.
