UTIAʼAL LE TSʼOKAʼAN U BEELOʼOBOʼ
1. Maʼ u tuʼubultech le compromiso ta beetoʼ
¿BAʼAX TÁAKAʼANIʼ?
Le máaxoʼob ku tsʼoʼokol u beeloʼob yéetel u tuukulil u comprometerkubaʼobeʼ kiʼimak u yóoloʼob tumen u yojloʼobeʼ maʼ ken u jáan pʼatubaʼob chéen yoʼolal jeʼel baʼaxakeʼ.
Yaan máaxoʼob tsʼokaʼan u beeloʼobeʼ maʼ tu pʼatkubaʼob pero chéen tumen bey u yaʼalaʼaltiʼob tumen u familiaʼob yéetel u amigoʼoboʼ. Chéen baʼaleʼ maas maʼalob maʼ u pʼatkubaʼob yoʼolal le yaabilaj yaan ichiloʼoboʼ bey xan tumen ku respetarkubaʼob.
LE BIBLIAOʼ KU YAʼALIK: «Le íichamtsiloʼ maʼ unaj u pʼatik u yataniʼ» (1 Corintios 7:11).
«Wa ka wuʼuyik yaantech junpʼéel compromiso yéetel a núupeʼ maʼ kan tsʼíikil tu yéetel yoʼolal jeʼel baʼaxakeʼ. Tsʼoʼoleʼ maas chéen chʼaʼabil ken a perdonartabaʼex, yéetel le kéen yanakteʼex problemaseʼ maʼ ken a pʼatabaʼex, baʼaxeʼ yaan a múul utskíintikeʼex» (Micah).
¿BAʼAXTEN KʼAʼABÉET?
Wa le máaxoʼob tsʼokaʼan u beeloʼob maʼ tu yuʼubikoʼob yaantiʼob junpʼéel compromiso yéetel u núupoʼobeʼ, le kéen yanak problemas tiʼobeʼ maas séeb jeʼel u tuklik u pʼatkubaʼobeʼ. Jeʼel u tuklikoʼob deporsi maʼ kun páajtal u biskubaʼob maʼalobeʼ.
«Yaan máaxeʼ le kéen tsʼoʼokok u beeleʼ u tukultmiliʼ u divorciarkuba wa maʼ tu bin maʼalobil tiʼeʼ. Chéen baʼaleʼ le máax ku tuukul beyoʼ maʼ táan u comprometerkuba yéetel le máax ku tsʼoʼokol u beeloʼ» (Jean).
¿BAʼAX JEʼEL A BEETKEʼ?
TUUKULNEN TIʼ LELAʼ
¿Baʼax ka beetik le kéen discutirnakech yéetel a núup?
-
¿Ka arrepentir wa úuchik u tsʼoʼokol a beel?
-
¿Ka tuklik wa maas jeʼel u bintech utsil wa ka tsʼoʼokok a beel yéetel yaanaleʼ?
-
¿Ka waʼalik wa baʼaloʼob jeʼex «yaan in xúumpʼatkech» wa «yaan in kaxtik máax jach tu jaajil u yaabiltmen»?
Wa bey u yúuchultechoʼ kʼaʼabéet a wilik baʼax ken a beet utiaʼal maʼ u tuʼubultech le compromiso a beetmaj yéetel a núupoʼ.
MÚUL TSIKBALTEʼEX LELAʼ
-
¿Táan wa u tuʼubultoʼon le compromiso k-beetmoʼ? Wa beyoʼ, ¿baʼaxten?
-
¿Baʼax jeʼel u páajtal k-beetik utiaʼal maʼ u tuʼubultoʼon le compromiso k-beetmoʼ?
BEETEʼEX LELAʼ
-
Cada wa baʼax kʼiineʼ ilawil a tsʼíibtik tiʼ a núup wa baʼax utiaʼal a weʼesiktiʼ a yaabiltmaj.
-
Ilawil u yantaltech u foto a núup teʼ tuʼux ka meyajoʼ.
-
Ilawil a tʼanik a núup sáamsamal, maʼ xaaneʼ desde tuʼux ka meyaj wa kéen kʼaʼabéetchajak a viajar wa tuʼux.
LE BIBLIAOʼ KU YAʼALIK: «Le baʼax tsʼoʼok u nuʼupul tumen Diosoʼ mix máak unaj u jatsik» (Mateo 19:6).
