Táakaʼan u paklan aʼalik le taatatsiloʼob yéetel u paalaloʼob baʼax ku tuklikoʼoboʼ yéetel bix u yuʼubikubaʼob.

Le kéen nojochchajak le paalaloʼoboʼ maas istikyaj u tsikbaloʼob yéetel u papáʼob. Kaʼacheʼ maʼ xaaneʼ a paalaloʼobeʼ maas séeb u tsikbaltikoʼobtech baʼax ku yúuchultiʼob, pero beoraaʼ maʼ beyiʼ. Kex táan a wilik a jóoʼsik baʼax yaan tu puksiʼikʼaloʼobeʼ mix baʼal ku yaʼalikoʼob. Kex beyoʼ maʼ xaaneʼ letiʼe súutukil maas kʼaʼabéet áantaj tiʼoboʼ.

Tsikbalnen yéetel a paalal. Kex tsʼoʼok u sen áakʼabtaleʼ chʼenxikintoʼob wa taak u tsikbaloʼob.

«Yaan kʼiineʼ ku taaktal a waʼalik tiʼ a paalal: ‹Bul kʼiin tiaʼanen ta wéeteleʼ, ¿jach wa túun beora taak a tsikbalaʼ?›. Pero ¿bix ken a waʼalil tiʼ a paalal maʼ taak a wuʼuyik u tsikbaltikoʼobtech bix u yuʼubikubaʼobiʼ? Si letiʼe baʼax maas ka tsʼíiboltikoʼ» (Lisa).

«Teneʼ uts tin tʼaan in chital wenel temprano, chéen baʼaleʼ le súutukiloʼob ku maas kiʼital in tsikbal yéetel in paalaloʼ letiʼe kéen máanak chúumuk áakʼaboʼ» (Herbert).

LE BIBLIAOʼ KU YAʼALIK: «Cada juntúul máakeʼ maʼ u seguer u kaxtik chéen u yutsil, baʼaxeʼ u yutsil u yéet máakil» (1 Corintios 10:24).

Maʼ u náayal a wóol. Juntúul taatatsileʼ ku yaʼalik: «Yaan kʼiin le táan u tsikbaltik in paalal bix u yuʼubikubaʼoboʼ teneʼ ku joʼopʼol in tuukul tiʼ yaanal baʼal. Pero le paalaloʼoboʼ ku tsʼáaikoʼob cuenta».

Wa bey u yúuchultechoʼ, le kéen tsikbalnakech yéetel a paalaloʼobeʼ ilawil a tupik le televisión yéetel uláakʼ baʼaloʼob jeʼel u beetik u náayal a wóoleʼ. Beyoʼ yaan a weʼesiktiʼobeʼ kex maʼ jach nojoch le baʼax chiʼichnakkúuntikoʼoboʼ taak a wáantkoʼob.

«Unaj a weʼesik tiʼ a paalal taak a wojéeltik bix u yuʼubikubaʼob. Tumen wa maʼeʼ maʼ ken u tsikbaltoʼobtech bix u yuʼubikubaʼob yéetel yaan u kaxtikoʼob áantaj yaanal tuʼux» (Maranda).

«Le kéen u yaʼaltech a hijo junpʼéel baʼal minaʼan u cuentaileʼ, maʼ a séeb pʼuʼujul» (Anthony).

LE BIBLIAOʼ KU YAʼALIK: «Jach chʼenxikinteʼex tubeel baʼax ku yaʼalaʼalteʼex» (Lucas 8:18).

Aprovechart jeʼel baʼalak súutukileʼ. Yaan horaeʼ le táankelem paalaloʼoboʼ maas jeʼel u yóotkoʼob tsikbal yéetel u papáʼob wa kiʼimak u yóoloʼobeʼ.

«Toʼoneʼ k-aprovechartik k-tsikbal yéetel k-paalal le táan k-viajaroʼ. Como kulukbaloʼon tu tséeloʼobeʼ maas jeʼel u yantal tuʼux u tsikbaloʼobeʼ» (Nicole).

Uláakʼ súutukil jach maʼalob utiaʼal k-tsikbal yéetel le paalaloʼoboʼ letiʼe kéen kulakoʼon janaloʼ.

«Le táan k-cenaroʼ tuláakloʼon k-tsikbaltik le baʼax úuchtoʼon teʼ kʼiinoʼ. Ikil u suuktal k-beetik beyoʼ k-maas bisikba yéetel k-uʼuyik maʼ t-juunal yaniloʼon le kéen k-aktáant wa baʼax problemailiʼ» (Robin).

LE BIBLIAOʼ KU YAʼALIK: «Cada juntúuleʼ kʼaʼabéet u séeb uʼuyik baʼax ku yaʼalaʼaltiʼ, chéen baʼaleʼ maʼ unaj u séeb tʼaaniʼ» (Santiago 1:19).