Kanáant a wíinklil
Le Bibliaoʼ maʼ junpʼéel libro ku tʼaan tiʼ tsʼaakoʼobiʼ chéen baʼaleʼ ku yaʼalik tiʼ máak ka u kanáantuba. Koʼox ilik jujunpʼéel baʼaxoʼob jeʼel u yáantkech ichil a kuxtaleʼ.
KANÁANTABA
BAʼAX KU YAʼALIK LE BIBLIAOʼ: «Tumen mix máak ku pʼektik u wíinklil, baʼaxeʼ ku tséentik yéetel ku kanáantik» (Efesoiloʼob 5:29).
BAʼAX U KʼÁAT U YAʼALE: Le tekstoaʼ ku yeʼesik yaan baʼax jeʼel u páajtal u beetik máak utiaʼal maʼ u jáan kʼojaʼantaleʼ. Yaʼab baʼaxoʼob eʼesikeʼ le u jach kʼojaʼantal máakoʼ yaan baʼax u yil yéetel baʼaxoʼob ku beetik. Le baʼaxoʼob maʼalobtak ku beetik máakoʼ jach jeʼel u yáantaj utiaʼal maʼ u jáan kʼojaʼantaleʼ.
BAʼAX JEʼEL U PÁAJTAL A BEETKEʼ:
-
Kanáant baʼax ka jaantik yéetel baʼax ka wukʼik. Jaant baʼaloʼob jeʼel u beetiktech utseʼ yéetel ukʼ yaʼab jaʼ.
-
Beet ejercicio. Lelaʼ jach ku yáantik máak, kex jeʼel baʼalak edabil yaan tiʼeʼ wa kex yaan junpʼéel talam kʼojaʼanil tiʼ. Maʼ xaaneʼ jeʼel u páajtal u yáantaʼal máak tumen u láakʼtsiloʼob, u amigoʼob wa yaanal máakoʼobeʼ, chéen baʼaleʼ maases cada juntúul tiʼ toʼon kʼaʼabéet u tsʼáaik u yóoliʼ.
-
Tsʼoʼoks a wenel. Yaʼab máakoʼobeʼ óoliʼ maʼatech u weenloʼob tumen táan u beetkoʼob uláakʼ baʼaloʼob. U suuktal tiʼ máak maʼ u weenleʼ jeʼel u beetik u sen kʼojaʼantaleʼ. Utiaʼal maʼ u yúuchul tiʼ máak beyoʼ, jach maʼalob ka u tsʼoʼoks u wenel.
PʼAT BAʼAX JEʼEL U BEETIKTECH KʼAASEʼ
BAʼAX KU YAʼALIK LE BIBLIAOʼ: «Koʼoneʼex limpiokíintikba tiʼ tuláakal baʼax jeʼel u yéekʼkuntik k-wíinklil yéetel k-tuukuleʼ» (2 Corintoiloʼob 7:1).
BAʼAX U KʼÁAT U YAʼALE: Utiaʼal maʼ u kʼojaʼantal máakeʼ kʼaʼabéet u kanáantik baʼaxoʼob ku yoksik tu wíinklil. Jeʼex le chamaloʼ jach ku beetik loob tiʼ máak yéetel yaʼab máakoʼob ku kíimsik.
BAʼAX JEʼEL U PÁAJTAL A BEETKEʼ: Tsʼáa u kʼiinil u xuʼulul a tsʼuʼutsʼik chamal, tsʼíibt baʼax kʼiin a xulik yéetel aʼal tiʼ a láakʼtsiloʼob bey xan a amigoʼob ka u yáantechoʼob a beet le baʼax ka tuklikoʼ. Jeʼel u páajtal u káajal a pulik le chamaloʼ bey xan tuláakal le baʼaxoʼob suuk u meyajtechoʼ. Maʼ a náatsʼal tuʼux ku tsʼuʼutsʼaʼal chamal.
ULÁAKʼ BAʼAX KU YAʼALIK LE BIBLIAOʼ
Wa a kʼáat ka yanak a Bibliaeʼ, kʼáat tiʼ u testigoʼob Jéeoba kajaʼanoʼob teʼ tuʼux yanechoʼ
KANÁANT U MAASIL
«Kéen a beet junpʼéel najeʼ techeʼ unaj a beetik junpʼéel pretil yóokʼol le techooʼ, utiaʼal maʼ u lúubul mix máakiʼ yéetel utiaʼal maʼ u kíimil mix máak tu culpa a familia» (DEUTERONOMIO 22:8, TNM).
MAʼ A KʼUUXIL
«Le máax maʼ tu jáan pʼuʼujuloʼ jach yaan u naʼat, pero le máax séeb u náakal u yóoloʼ ku yeʼesik minaʼan u naʼat» (PROVERBIOS 14:29, TNM).
MAʼ A SEN JANAL
«Maʼ a nupikaba yéetel [...] le sen yaʼab u janaloʼoboʼ» (PROVERBIOS 23:20).
