Maʼ tu páajtal u tsolkoʼob bix anchajik le universooʼ bey xan le kuxtaloʼ. Yaʼab máax tuklikeʼ le científicoʼob estudiartik le universooʼ yaan u kʼuchul u kʼiinil u tsolkoʼob bix anchajik. Marcelo Gleiser, juntúul maestro ku kaʼansaj tu Universidadil Dartmoutheʼ, ku yaʼalik: «U jaajileʼ maʼ béeyak k-tsolik bix úuchik u yantal le universooʼ».

¿Jeʼel wa túun u béeytal u tsolkoʼob bix anchajik le kuxtal way Luʼumoʼ? Junpʼéel artículo tu jóoʼsaj le revista Science News ku yaʼalik: «Maʼ tu páajtal u tsoʼolol jach bix anchajik le kuxtal way Luʼumoʼ. Le pruebaʼob jeʼel u yeʼeskoʼob jach bix anchajikoʼ úuch suunakoʼob luʼumil». Le kaʼapʼéel baʼaloʼob tsʼoʼok u yaʼalaʼalaʼ ku yeʼesikeʼ le científicoʼoboʼ maʼ u yojloʼob bix anchajik le universooʼ bey xan le kuxtaloʼ.

Maʼ xaaneʼ ka tuklik: «Wa yaan Máax beet u yantal le kuxtaloʼ, ¿máax waleʼ? Tsʼoʼoleʼ wa le Máax beet tuláakal baʼal jach uts yéetel yaan u naʼatoʼ, ¿baʼaxten túun ku chaʼik k-sufrir? ¿Baʼaxten ku chaʼik u yantal yaʼab religiónoʼob? ¿Baʼaxten ku chaʼik u beetaʼal baʼaloʼob kʼaastak tumen le máaxoʼob yaan u religiónoʼoboʼ?».

Le científicoʼoboʼ maʼ tu páajtal u núukikoʼob le preguntaʼobaʼ, pero leloʼ maʼ u kʼáat u yaʼal wa maʼ tu páajtal u yojéeltaʼaliʼ. Yaʼab máakoʼobeʼ tsʼoʼok u kaxtikoʼob u núukil teʼ Bibliaoʼ.

Jujuntúul científicoʼobeʼ tsʼoʼok u xakʼaltikoʼob baʼax ku yaʼalik le Bibliaoʼ. ¿A kʼáat wa a wojéelt baʼaxten ku creerkoʼob yaan Máax beet tuláakal le baʼaloʼoboʼ? Ooken jw.org yéetel kaxt le jaats: «Bix u tuklaʼal anchajik le kuxtaloʼ».