1. ¿Baʼax tu aktáantaj le sukuʼunoʼob teʼ yáax siglooʼ?

TU YÁAMIL u añoil 62 tak 64, apóstol Pedroeʼ tu tsʼíibtaj junpʼéel carta «tiʼ le máaxoʼob kʼiʼitpajaʼanoʼob yéetel kajaʼanoʼob junpʼíit tiempo tu luʼumil Ponto, Galacia, Capadocia, Asia yéetel Bitinia[oʼ]» (1 Ped. 1:1). Le sukuʼunoʼobaʼ jejeláas bix líiʼsaʼabikoʼob. Kʼaʼabéet kaʼach u líiʼsaʼal u yóoloʼob yéetel u yáantaʼaloʼob, tumen táan kaʼach u aktáantkoʼob «yaayaj baʼaloʼob» ikil u chʼaʼpachtaʼaloʼob. Tsʼoʼoleʼ maʼ unaj u náayal u yóoloʼobiʼ. Pedroeʼ tu yaʼalaj: «Tsʼoʼok u náatsʼal u xuul tuláakal baʼal». Maʼ u tsʼáa diez años u yaʼal Pedro le tʼaanoʼobaʼ ka xuʼulsaʼab Jerusalén. ¿Baʼax áant le sukuʼunoʼob teʼ kʼiinoʼob jach talamtakoʼ? (1 Ped. 4:4, 7, 12.)

2, 3. ¿Baʼaxten tu yaʼalaj Pedro tiʼ le sukuʼunoʼob unaj u kʼamik u yuʼulaboʼoboʼ? (Ilawil le dibujo yaan tu káajbal le xookaʼ.)

² Pedroeʼ tu yaʼalajtiʼob: «Kʼamabaʼex yéetel utsil ta baatsileʼex» (1 Ped. 4:9). Ich griegoeʼ le tʼaan u kʼaʼamal máakoʼ u kʼáat u yaʼal «u yeʼesaʼal yaabilaj tiʼ máaxoʼob maʼ kʼaj óolaʼanoʼobiʼ». Baʼaleʼ wa k-tsʼáaik cuentaeʼ le apostoloʼ tu yaʼalaj ka u kʼamubaʼob yéetel utsil ‹tu baatsiloʼob›. Lelaʼ u kʼáat u yaʼaleʼ unaj u yeʼesik u yutsiloʼob tiʼ máaxoʼob u kʼaj óoloʼob yéetel suuk u biskubaʼob yéeteloʼob. ¿Bix kun bintiʼob wa ku beetkoʼob le baʼax aʼalaʼabtiʼoboʼ?

 ³ Wa ku beetkoʼobeʼ jeʼel u maas biskubaʼobeʼ. Tuukulnen tiʼ bix tsʼoʼok u bin tiʼ teech. ¿Máasaʼ láayliʼ ka kʼaʼajsik bix ta wuʼuyilaba le ka tu invitartech juntúul sukuʼun tu yotocheʼ? Tsʼoʼoleʼ le ka ta invitartaj wa máax sukuʼunil ta wotocheʼ, ¿máasaʼ joʼopʼ xan a maas biskaba tu yéetel? K-kʼamik maʼalob k-uʼulabeʼ ku yáantaj utiaʼal k-maas kʼaj óoltik k-sukuʼunoʼob. Tu kʼiiniloʼob Pedroeʼ le cristianoʼoboʼ kʼaʼabéetchaj u maas biskubaʼob tumen le kʼiinoʼoboʼ táan u bin kaʼach u maas talamtal. Bey u yúuchul xan bejlaʼoʼ, tumen tiaʼanoʼon «tu tsʼook kʼiinoʼo[beʼ]» (2 Tim. 3:1).

4. ¿Baʼax kʼáatchiʼiloʼob kun núukbil teʼ xookaʼ?

⁴ ¿Tiʼ baʼax súutukiloʼob jeʼel u páajtal ‹k-kʼamikba t-baatsileʼ›? Wa ku talamtaltoʼon k-kʼamik k-uʼulabeʼ, ¿baʼax jeʼel u yáantkoʼon utiaʼal u káajal k-beetik? ¿Baʼax jeʼel u yáantkoʼon utiaʼal k-eʼesik utsil kéen invitartaʼakoʼoneʼ?

5. ¿Bix jeʼel k-kʼamik le máaxoʼob ku binoʼob muchʼtáambaloʼ?

⁵ Teʼ muchʼtáambaloʼoboʼ. Jéeoba yéetel u kaajal invitartikoʼon teʼ muchʼtáambaloʼoboʼ. Toʼoneʼ k-kʼáat ka u yuʼububa maʼalobil tuláakal le máaxoʼob ku taaloʼob teʼ Najil Reinooʼ (Rom. 15:7). Lelaʼ maases kʼaʼabéet k-beetik wa yaan máax yáax u taaloʼ. Jéeoba xan invitarmil, le oʼolal unaj k-beetik u yuʼubikuba maʼalobil kex jelaʼan bix u vestirmiluba wa u arreglarmiluba (Sant. 2:1-4). Wa k-ilik mix máak ku beetik u cuentaileʼ, ¿jeʼel wa u páajtal k-aʼaliktiʼ ka kulak t-tséeleʼ? Jach jeʼel u kiʼimaktal u yóol wa k-áantik u kaxt le tekstoʼoboʼ. Wa k-beetik beyoʼ táan k-tsʼoʼokbesik baʼax ku yaʼalik le tekstoaʼ: «Maʼ u xuʼulul a kʼamkeʼex maʼalob le uʼulaboʼoboʼ» (Rom. 12:13).

6. ¿Máaxoʼob maases unaj k-invitartik t-otoch?

⁶ Kéen k-invitart wa máax u yukʼ wa u jaant wa baʼax. Úuchjeakileʼ le israelitaʼoboʼ suuk u invitarkoʼob janal tu yotochoʼob wa máax tumen u kʼáat u yeʼesoʼobtiʼ maʼalob u biskubaʼob tu yéetel (Gén. 18:1-8; Jue. 13:15; Luc. 24:28-30). ¿Máaxoʼob maases unaj k-invitarkoʼob? Letiʼe sukuʼunoʼob yaan teʼ múuchʼuliloʼ, tumen letiʼe máaxoʼob suuk k-ilkoʼoboʼ. Kʼaʼabéet u yantaltoʼon maʼalob amigoʼob tumen kéen maas yaachajak le kuxtalaʼ yaan u maas kʼaʼabéettal k-paklan áantikba. Tu añoil 2011, le Cuerpo Gobernanteoʼ tu yaʼalaj ka kʼeʼexek u yorail u máansaʼal U Xookil U Pʼíich Tulumil Kanan tu Betelil Estados Unidos; kaʼacheʼ láas 6:45 chíinil kʼiin, bejlaʼeʼ láas 6:15 chíinil kʼiin. ¿Baʼaxten? Tumen jeʼex aʼalaʼabikoʼ yaan u yantal tiempo tiʼ le betelitaʼob utiaʼal u múuchʼ antaloʼob yéetel u maasiloʼ. Bey beetaʼabik xan tiʼ uláakʼ u najiloʼob Beteloʼ. Úuchik u beetaʼal lelaʼ le betelitaʼoboʼ maas jatsʼutschaj bix u biskubaʼob.

7, 8. ¿Bix jeʼel k-kʼamik yéetel utsil le sukuʼunoʼob ku taal u máansoʼob tsoltʼaan t-múuchʼuliloʼ?

⁷ Kéen taalak sukuʼunoʼob u máansoʼob tsoltʼaanoʼob t-múuchʼulil, kéen taalak le superintendente tiʼ circuito wa le sukuʼunoʼob ku túuxtaʼaloʼob tumen u Najil Beteloʼ, ku yantal tuʼux k-kʼamkoʼob yéetel utsil (xok 3 Juan 5-8). Jeʼel u páajtal k-invitarkoʼob ka xiʼikoʼob janal t-otocheʼ wa chéen utiaʼal k-ukʼik u síisil. ¿Máasaʼ maʼalob ka invitart le sukuʼunoʼob kéen taalak u xíimbaltoʼonoʼoboʼ?

⁸ Juntúul kiik estados unidosileʼ, ku yaʼalik: «Ichil le bukaʼaj jaʼaboʼob tsʼoʼok u máanoʼ, teen yéetel in wíichameʼ tsʼoʼok k-invitartik t-otoch yaʼab sukuʼunoʼob ku taal u máansoʼob tsoltʼaan teʼ múuchʼuliloʼ. Cada ken k-invitartoʼobeʼ jach ku kiʼimaktal k-óol, k-sen cheʼej, baʼaleʼ u maas jatsʼutsileʼ ku muʼukʼaʼantal k-fe. Mix juntéen k-tukult wa junpʼéel kuuch k-eʼesik utsil tiʼ le sukuʼunoʼoboʼ».

9, 10. 1) ¿Máaxoʼob jeʼel u kʼaʼabéettal k-kʼamkoʼob t-otocheʼ? 2) ¿Tak wa le máaxoʼob chichan u yotochoʼob jeʼel u páajtal u kʼamkoʼob le sukuʼunoʼoboʼ? Tsikbalt junpʼéel baʼax uchaʼan.

⁹ Kéen k-kʼam k-uʼulaboʼob t-otoch. Úuchjeakileʼ yaʼab máak ku kʼamik u yuʼulaboʼob tu yotoch (Job 31:32; File. 22). Bejlaʼa xaneʼ bey kʼaʼabéet k-beetkoʼ. Jeʼex kéen xíimbaltaʼak le  múuchʼulil tumen le superintendente tiʼ circuitooʼ, u suukileʼ kʼaʼabéet u kaxtaʼal tuʼux ken u kʼubéentuba. Bey u yúuchul xan yéetel le máaxoʼob ku binoʼob teʼ escuelaʼob ku beetaʼal ichil u kaajal Jéeobaoʼ bey xan yéetel le ku meyajoʼob tiʼ construccionoʼ. Tsʼoʼoleʼ kéen úuchuk nukuch loobiloʼobeʼ yaan horaeʼ ku kʼaʼabéettal u kʼubéentkuba le sukuʼunoʼob tu yotoch wa máax mientras u yutskíintaʼal u yotochoʼoboʼ. Maʼ unaj k-tuklik wa chéen le máaxoʼob nojoch u yotochoʼob yéetel maʼalob kajlikoʼob jeʼel u páajtal u kʼamkoʼob le sukuʼunoʼoboʼ. U jaajileʼ yaʼab u téenel tsʼoʼok u beetkoʼob waleʼ. Chéen baʼaleʼ kex chichan k-otoch wa kex óotsiloʼoneʼ, ¿jeʼel wa k-kʼamik le sukuʼunoʼoboʼ?

¹⁰ Juntúul sukuʼun kajaʼan Corea del Sureʼ ku kiʼimaktal u yóol kéen u kʼaʼajs tu kʼamaj le sukuʼunoʼob binoʼob tiʼ wa baʼax escuelail ku beetik u kaajal Jéeobaoʼ. Tu yaʼalaj: «Ka káajeʼ maʼ jach taak in kʼamkoʼobiʼ tumen maʼ úuch tsʼoʼokok in beeliʼ yéetel jach chichan le naj tuʼux kajaʼanen kaʼachoʼ. Baʼaleʼ jach kiʼimakchaj in wóol in kʼamik le sukuʼunoʼob tin wotochoʼ. Béeychaj k-ilik bix kiʼimakil u yóol le máaxoʼob tsʼokaʼan u beeloʼob ku múul meyajtikoʼob Jéeoba yéetel bix u paklan áantkubaʼob utiaʼal u beetkoʼob u maasiloʼ».

11. ¿Baʼaxten kʼaʼabéet k-eʼesik utsil tiʼ le máaxoʼob ku kʼuchloʼob t-múuchʼuliloʼ?

¹¹ Kéen kʼuchuk túumben sukuʼunoʼob t-múuchʼulil. Yaan horaeʼ ku pʼáatloʼob kajtal naatsʼ t-otoch, ku taaloʼob áantaj teʼ kʼaʼaytajoʼ wa precursoroʼob ku túuxtaʼaloʼob t-múuchʼulil. Tu káajbaleʼ ku chan talamtaltiʼob tumen kʼaʼabéet u suuktaloʼob tiʼ junpʼéel túumben kaaj, túumben múuchʼulil, túumben idioma yéetel tiʼ uláakʼ baʼaloʼob. Utiaʼal u yantaltiʼob uláakʼ amigoʼobeʼ jeʼel u páajtal k-invitarkoʼob jaanleʼ, k-ukʼik wa baʼax yéeteloʼob wa k-invitarkoʼob xíimbal, k-beetik lelaʼ yaan u yáantaj utiaʼal ka suukchajkoʼob tuʼux kʼuchoʼoboʼ.

12. ¿Baʼax úuch tiʼ kaʼatúul misioneroʼob eʼesik maʼ tsaaj k-beetik yaʼab baʼaloʼob utiaʼal k-kʼamik le uʼulaboʼoboʼ?

¹² Maʼ tsaaj k-beetik yaʼab baʼaloʼob utiaʼal k-invitartik le sukuʼunoʼoboʼ (xok Lucas 10:41, 42). Juntúul sukuʼuneʼ ku yaʼalikeʼ le ka káaj u beetik u misioneroiloʼob letiʼ yéetel u yataneʼ jach ku kʼaʼajsikoʼob kaʼach u kaajaloʼob. Ku yaʼalik: «Junpʼéel kʼiineʼ jach lubaʼan u yóol in watan yéetel maʼ tin kaxtik bix jeʼel in líiʼsik u yóoleʼ. Kex bey láas 7:30 u chíinil kʼiineʼ t-uʼuyaj yaan máax ku kʼoop teʼ jooloʼ. Juntúul x-chʼúupal ku tsʼaʼabal xook tiʼ yéetel le Bibliaoʼ tu taasajtoʼon óoxpʼéel chinaʼob utiaʼal u yeʼesik kiʼimak u yóol úuchik k-kʼuchliʼ. T-aʼalajtiʼ ka ookkeʼ ka t-tsʼáaj junpʼíit jaʼ u yukʼe. Tsʼoʼoleʼ ka t-beetaj té yéetel chukwaʼ. Teʼ kʼiinoʼoboʼ maʼ káajak k-tʼanik suajiliiʼ yéetel le x-chʼúupaloʼ maʼatech u tʼanik k-idioma. Baʼaleʼ desde le kʼiin jeʼeloʼ káaj k-bisikba yéetel le sukuʼunoʼob kajaʼanoʼob teʼ luʼum tuʼux kʼuchoʼonoʼ, ka joʼopʼ u maas kiʼimaktal k-óol».

13. ¿Baʼaxten unaj k-invitartik le sukuʼunoʼob t-otochoʼ?

¹³ ¿Ku talamtal wa k-invitartik le sukuʼunoʼob t-otochoʼ? Wa bey u yúuchultoʼonoʼ, maʼ xaaneʼ maʼ béeyak k-disfrutartik jatsʼuts súutukiloʼob yéetel le sukuʼunoʼoboʼ yéetel maʼ anaktoʼon yaʼab amigoʼobiʼ. K-eʼesik utsil tiʼ u maasileʼ jach ku yáantaj utiaʼal maʼ k-uʼuyikba t-juunaliʼ. ¿Baʼaxten túun yaan máakeʼ maʼ suuk u invitartik le sukuʼunoʼob tu yotochoʼ? Koʼoneʼex ilik.

14. Wa k-tuklik minaʼantoʼon tiempo wa jach kaʼanaʼanoʼoneʼ, ¿baʼax jeʼel k-beetik utiaʼal k-máansik tiempo yéetel le sukuʼunoʼoboʼ?

¹⁴ K-tuklik minaʼantoʼon tiempo yéetel kaʼanaʼanoʼon. Toʼon k-meyajtik Jéeobaeʼ yaʼab baʼaxoʼob yaan k-beete. Le oʼolaleʼ yaan máax jeʼel u tuklikeʼ minaʼan tiempo tiʼ utiaʼal u invitartik uláakʼ sukuʼunoʼob tu yotoch wa kaʼanaʼan u yuʼubikuba. Wa bey k-tuukuloʼ, maʼ xaaneʼ kʼaʼabéet k-ilik baʼaxoʼob k-sen beetik yéetel bukaʼaj tiempo ku bisiktoʼon. ¿Yaan wa baʼax jeʼel u páajtal k-kʼexik utiaʼal maʼ k-sen kaʼanal yéetel ka yanak tiempo k-máans yéetel le  sukuʼunoʼoboʼ? Le Bibliaoʼ ku yaʼalikeʼ kʼaʼabéet k-kʼamik yéetel utsil le uʼulaboʼoboʼ (Heb. 13:2). Maʼ kʼaas ka k-jóoʼs tiempo utiaʼal k-antal yéetel le sukuʼunoʼoboʼ; u jaajileʼ letiʼe baʼax unaj k-beetkoʼ. Utiaʼal leloʼ maʼ xaaneʼ yaan u kʼaʼabéettal k-jóoʼsik tiempo ichil le baʼaloʼob maʼ jach kʼaʼanaʼantakoʼ.

15. ¿Baʼax jeʼel u beetik k-tuklik maʼ tu páajtal k-kʼamik le sukuʼunoʼoboʼ?

¹⁵ Baʼax k-tuklik t-oʼolal. ¿Taakchaj wa k-invitartik wa máax, baʼaleʼ t-uʼuyaj maʼ tu páajtal k-beetik? Maʼ xaaneʼ suʼlakoʼon wa saajkoʼon u náakal u yóoloʼob tumen maʼ k-ojel baʼax jeʼel k-tsikbaltik yéeteloʼobeʼ. Maʼ xaan xaneʼ junpʼíit taakʼin yaantoʼon yéetel k-tuklik maʼ tu páajtal k-tsʼáaiktiʼob le bukaʼaj jeʼel u tsʼaʼabaltiʼob tumen uláakʼ sukuʼunoʼobeʼ. Baʼaleʼ unaj k-kʼaʼajsikeʼ maʼ tsaaj wa táaj jatsʼuts t-otoch utiaʼal k-invitartik le sukuʼunoʼoboʼ. U maas kʼaʼanaʼanileʼ u yilaʼal limpio yéetel k-beetik u yuʼubikuba maʼalobil le uʼulaboʼoboʼ.

16, 17. ¿Baʼax jeʼel u yáantkoʼon wa maʼ tu jach taaktal k-invitartik wa máax t-otocheʼ?

¹⁶ Wa yaan kʼiin maʼ tu jach taaktal a invitartik wa máaxeʼ, maʼ a tuklik wa chéen tiʼ teech ku yúuchliʼ. Juntúul anciano gran bretañaileʼ ku yaʼalik: «Yaan horaeʼ kéen káajak k-preparartik le baʼaxoʼob kʼaʼabéet utiaʼal k-kʼamik k-uʼulaboʼoboʼ, maʼ t-kaxtik baʼax k-beete. Baʼaleʼ unaj kʼaʼajsikeʼ leloʼ táakaʼan ichil le meyaj k-tsʼáaik tiʼ Jéeobaoʼ yéetel kex jeʼel u beetik k-chiʼichnaktaleʼ yaʼab utsiloʼob ku taasiktoʼon. Yaʼab súutukiloʼob tsʼoʼok in máansik yéetel le sukuʼunoʼoboʼ; yaan kʼiineʼ chéen kulukbaloʼon tsikbal yéetel táan k-ukʼik café». Kʼaʼajaktoʼoneʼ kʼaʼabéet k-atendertik maʼalob k-uʼulaboʼob (Fili. 2:4). Yaʼab máakeʼ uts tu tʼaan u tsikbaltik baʼaxoʼob uchaʼan ichil u kuxtal. Kéen múul anakoʼon yéetel k-sukuʼunoʼobeʼ letiʼe súutukil maas maʼalob utiaʼal k-tsikbaltikoʼ. Uláakʼ juntúul ancianoeʼ ku yaʼalik: «In invitartik le sukuʼunoʼob tin wotochoʼ ku yáantken in kʼaj óoltoʼob tubeel; maases uts tin tʼaan in wuʼuyik u tsikbaltikoʼob bix tu kʼaj óoltiloʼob Jéeoba». Wa k-ilik atendertik maʼalob k-uʼulaboʼobeʼ yaan u béeytal k-disfrutartik le súutukil k-máansik yéeteloʼoboʼ.

¹⁷ Juntúul precursora suuk u kʼamik tu yotoch le sukuʼunoʼob ku binoʼob tiʼ wa baʼax escuelail ichil u kaajal Jéeobaoʼ, ku yaʼalik: «In wotocheʼ maʼ junpʼéel nuxiʼ najiʼ yéetel maʼ túumbentak le muebleʼob yaantenoʼ. Le oʼolal suʼlaken. Baʼaleʼ tu yáanten le baʼax tu yaʼalaj u yatan juntúul tiʼ le sukuʼunoʼob tsʼaʼanoʼob kaʼansajoʼ. Tu yaʼalajteneʼ kaʼach superintendente tiʼ circuito u yíichameʼ, jach ku kiʼimaktal u yóoloʼob kéen anakoʼob yiknal le sukuʼunoʼob u tsʼaamaj u yóol u meyajtoʼob Jéeoba kex maʼ yaʼab baʼax yaantiʼobiʼ. Kʼaʼajten le baʼax suuk u yaʼalikten in maama tin chichniloʼ: ‹U jaantaʼal janalbeʼen xíiwoʼob ich yaakunajeʼ maas maʼalob [...] tiʼ u jaantaʼal u bakʼel wakax ich pʼektajil›» (Pro. 15:17). Maʼ unaj k-chiʼichnaktaliʼ, baʼaxeʼ unaj k-eʼesik yaabilaj tiʼ k-uʼulaboʼob tumen letiʼe baʼax maas kʼaʼanaʼanoʼ.

18, 19. K-kʼamikba t-baatsileʼ, ¿bix u yáantkoʼon utiaʼal k-bisikba yéetel u maasil?

¹⁸ Bix k-ilik u maasil. ¿Yaan wa máax teʼ múuchʼulil maʼ tu lúubultoʼon utsiloʼ? Maʼ xaaneʼ maʼ k-kʼáat k-invitart juntúul sukuʼun tumen maʼ jatsʼuts k-ilik bix u modosiʼ wa tumen maʼ tuʼubuktoʼon baʼax u beetmajtoʼoniʼ. Wa maʼ t-beetik mix baʼaleʼ mix bikʼin kun kʼexpajal baʼax k-tuklik tu yoʼolal.

¹⁹ Le Bibliaoʼ ku yaʼalikeʼ k-kʼamik yéetel utsil k-sukuʼunoʼobeʼ yaan u yáantaj utiaʼal k-bisikba maʼalob yéetel u maasil, tak yéetel k-enemigoʼob (xok Proverbios 25:21, 22). Wa k-invitartik le sukuʼunoʼoboʼ yaan u yáantaj utiaʼal k-utskíintik le kʼuuxilil ku yantaltoʼon yéetel wa máaxoʼ yéetel yaan k-maas bisikba yéetel u maasil. Tsʼoʼoleʼ jeʼel u yáantkoʼon k-il le jatsʼuts modos tu yilaj Jéeoba tiʼoboʼ (Juan 6:44). Wa yoʼolal yaabilaj k-invitartik juntúul sukuʼun wa juntúul kiikeʼ, jeʼel u káajal k-bisikba tu yéetel  jujunpʼíitileʼ. ¿Bix jeʼel k-ojéeltik wa letiʼe yaabilaj péeksikoʼon k-beetoʼ? Unaj k-eʼesik kabal óolal yéetel unaj k-tuklikeʼ k-sukuʼunoʼobeʼ maas kʼaʼanaʼanoʼob tiʼ toʼon, jeʼex u yaʼalik Filiposiloʼob 2:3. U jaajileʼ tuláakal le sukuʼunoʼoboʼ yaan tiʼ baʼax maas kʼaʼanaʼanoʼob tiʼ toʼon, maʼ xaaneʼ yoʼolal bix u yeʼeskoʼob fe, bix u chúukpajal u yóoloʼob, tumen maas maʼ saajkoʼobiʼ wa yoʼolal uláakʼ baʼaloʼob. Wa k-kaxtik baʼax tiʼ maas kʼaʼanaʼan juntúul sukuʼun tiʼ toʼoneʼ, yaan k-maas yaabiltik yéetel chéen chʼaʼabil ken k-eʼes utsil tiʼ.

20. ¿Baʼax unaj k-beetik wa k-kʼamik junpʼéel invitación, yéetel baʼaxten?

²⁰ Tu libroil Salmoseʼ Davideʼ tu kʼáataj tiʼ Jéeoba baʼax modosil unaj u yantal tiʼ juntúul máak utiaʼal ka u kʼam bey uʼulab tu yotocheʼ (Sal. 15:1). Junpʼéel tiʼ le modosoʼ letiʼe u beetik máak baʼax u yaʼalmaj kex maʼ chéen chʼaʼabiloʼ (Sal. 15:4). Le oʼolaleʼ wa k-kʼamik junpʼéel invitacioneʼ maʼ unaj k-pʼatik kʼaasil máax invitartoʼon chéen yoʼolal junpʼéel baʼal maʼ kʼaʼanaʼaniʼ. Wa maʼ t-bineʼ chéen kunel tuláakal le baʼax tu beetaj le máax invitartoʼonoʼ (Mat. 5:37). Yaan máaxoʼobeʼ kex tsʼoʼok u kʼamkoʼob junpʼéel invitacioneʼ ku pʼáatal maʼ tu binoʼob tumen ku invitartaʼaloʼob tiʼ junpʼéel tuʼux ku tuklikoʼob maas maʼalob. ¿Máasaʼ leloʼ maʼ tu yeʼesik wa u yaabiltmoʼob yéetel ku respetartikoʼob le máax invitartoʼoboʼ? Le oʼolaleʼ unaj k-bin teʼ tuʼux tsʼoʼok k-aʼalikoʼ yéetel unaj k-kʼamik yéetel kiʼimak óolal le baʼax ku tsʼáaikoʼobtoʼon le sukuʼunoʼoboʼ (Luc. 10:7). Wa yaan baʼax oʼolal maʼ tu páajtal k-bineʼ unaj k-aʼalik tu séebaʼanil maʼ tun béeytal k-biniʼ. Beyoʼ k-eʼesik yaabilaj yéetel utsil.

21. ¿Baʼaxoʼob unaj k-chʼaʼik en cuenta kéen invitartaʼakoʼon tumen wa máax?

²¹ Kʼaʼabéet k-chʼaʼik en cuenta baʼax suuk u beetaʼal tuʼux yanoʼon. Yaan tuʼuxeʼ maʼ jelaʼan u yilaʼal ka téek kʼuchkech tu yotoch wa máax kex maʼ a waʼalmajtiʼiʼ, baʼaleʼ uláakʼ tuʼuxoʼobeʼ maas maʼalob ka a yáax aʼal yaan a bin xíimbaliʼ. Yaan tuʼuxoʼob xaneʼ u yuumil najeʼ ku tsʼáaik u maas maʼalobil tiʼ u yuʼulaboʼob, baʼaleʼ tuláakʼ tuʼuxoʼobeʼ junpʼéeliliʼ bix u tʼoʼoxol le janal tiʼ tuláakaloʼ. Tiʼ uláakʼ kaajoʼobeʼ le máax invitartaʼaboʼ suuk u bisik wa baʼax jaantbil, baʼaleʼ yaan tuʼuxeʼ maʼ tsaaj u beetkiʼ. Uláakʼ tuʼuxoʼobeʼ maʼ suuk u jáan aʼalik máak wa jeʼel u bin tuʼux ku invitartaʼaleʼ. Tak tu yóoxtéen kéen aʼalaʼaktiʼeʼ ku yaʼalik jeʼel u bineʼ. Baʼaleʼ tiʼ uláakʼ tuʼuxoʼobeʼ jelaʼan ka u beet máak beyoʼ. Jeʼel bixakeʼ toʼoneʼ unaj k-beetik u kiʼimaktal u yóol le máax invitartoʼonoʼ.

22. ¿Baʼaxten unaj u suuktal ‹k-kʼamikba yéetel utsil›?

²² Jach jaaj baʼax u yaʼalmaj apóstol Pedro: «Tsʼoʼok u náatsʼal u xuul tuláakal baʼal» (1 Ped. 4:7). Mix juntéen anak muʼyajil jeʼex le ku yilaʼal bejlaʼoʼ. Jeʼex u bin u maas talamtal le kuxtaloʼ bey unaj k-maas k-paklan yaabiltikba. Le oʼolaleʼ maʼ u xuʼulul ‹k-kʼamikba yéetel utsil t-baatsil› jeʼex tu yaʼalil Pedrooʼ (1 Ped. 4:9). Jeʼex k-ilkoʼ mantatsʼ kun kʼaʼabéettal k-kʼamikba yéetel utsil, tsʼoʼoleʼ yaʼab kiʼimak óolal xan ku taasiktoʼon.