Maʼ maʼalob in wilik kaʼach bix u vestirkubaʼobiʼ

TSIKBALTAʼAB TUMEN EILEEN BRUMBAUGH

LÍIʼSAʼABEN tiʼ junpʼéel religión jach chíikaʼan tiʼ le amish yéetel le menonitaʼoboʼ, u kʼaabaʼ le regiónoʼ: Antigua Orden de Hermanos Bautistas Alemanes (kʼaj óolaʼan xan bey dunkerseʼ). Le religiónaʼ káaj tu añoil 1708 tu luʼumil Alemania. Teʼ kʼiinoʼoboʼ le máakoʼoboʼ ku tuklikoʼobeʼ jach kʼaʼabéet u natsʼkubaʼob tiʼ Dios (le baʼax tu beetoʼoboʼ kʼaj óoltaʼab bey pietismoeʼ). Junpʼéel enciclopediaeʼ ku yaʼalik: «Letiʼobeʼ ku tuklikoʼob kaʼacheʼ tuláakal máak kʼaʼabéet u kaanbal tiʼ Cristo» (The Encyclopedia of Religion). Yoʼolal leloʼ tu túuxtoʼob yaʼab máakoʼob utiaʼal ka xiʼikoʼob u kaʼansoʼob le baʼax ku creerkoʼob tiʼ jejeláas luʼumiloʼoboʼ.

Tu añoil 1719, kʼuch Alexander Mack yéetel junjaats máakoʼob tu estadoil Pensilvania jeʼex kʼaj óolaʼanil bejlaʼoʼ. Chéen baʼaleʼ le máakoʼoboʼ joʼopʼ u beetkoʼob jejeláas religiónoʼob. Cada juntúuleʼ joʼopʼ u kaʼansik le baʼax ku tuklik yoʼolal Alexander Mackoʼ. Teen kaʼacheʼ tiaʼanen ichil junpʼéel grupo tuʼux chéen 50 máakoʼob yaniʼ. Jach kʼaʼanaʼan k-ilik k-xokik le Bibliaoʼ yéetel k-beetik le baʼax ku yaʼalaʼaltoʼon t-religiónoʼ.

In familiaeʼ desde úuch yanak teʼ religiónaʼ. Teneʼ okjaʼanajen le yaanten 13 añosoʼ. Tin kaneʼ maʼ maʼalob ka k-usart cocheiʼ, tractor, teléfono, radio mix uláakʼ nuʼukuloʼob beyoʼ. Le koʼoleloʼob yanoʼob ichil le religiónaʼ jach sencillo le nookʼ ku tsʼáaikoʼoboʼ, maʼatech u kʼosik u tsoʼotsel u pooloʼob yéetel mantatsʼ u pixmaj u pooloʼob yéetel junpʼéel chan gorro. Tsʼoʼoleʼ le xiiboʼoboʼ ku pʼatik u meʼexoʼob. Toʼon kaʼacheʼ k-tuklikeʼ maʼ unaj k-tsʼáaik le nookʼ ku tsʼáaik u maasil máakoʼoboʼ. Tsʼoʼoleʼ le koʼoleloʼoboʼ maʼ unaj u bonkubaʼobiʼ mix u tsʼáaikoʼob alhajasiʼ tumen bey jach ku creerkuba máak kéen u tsʼáa baʼaloʼob beyoʼ.

Sáamsamal antes tiʼ k-ukʼuleʼ k-muchʼikba utiaʼal k-uʼuyik u xokik yéetel u tsoliktoʼon in papá junpʼéel u capítuloil le Bibliaoʼ. Kéen tsʼoʼokkeʼ k-xoltal utiaʼal k-uʼuyik u orar in papá, yéetel kéen tsʼoʼokkeʼ in maamaeʼ ku rezartik le padrenuestrooʼ. Teneʼ jach uts tin tʼaan le súutukiloʼob beyaʼ tumen ku muchʼtal tuláakal le familia utiaʼal u yuʼubik baʼax ku yaʼalik le Bibliaoʼ.

Kajaʼanoʼon kaʼach tiʼ junpʼéel chan rancho yaan naatsʼ tiʼ u kaajil Delphi (Indiana). Teʼeloʼ k-pakʼik kaʼach baʼaloʼob utiaʼal jaantbil yéetel k-bin kon teʼ kaajoʼoboʼ, teʼ calleʼoboʼ yéetel joonaj joonajil. Utiaʼal k-biskeʼ k-naʼaksik tiʼ junpʼéel carreta ku jíitaʼal tumen juntúul tsíimin. K-tuklik kaʼacheʼ Dioseʼ jach uts tu tʼaan u meyaj máak, le oʼolal jach k-tsʼáaik k-óol meyaj. Chéen utiaʼal domingos maʼatech k-beetik mix baʼal tumen mix junpʼéel clase meyaj unaj u beetaʼal teʼ kʼiin jeʼeloʼ. Pero como jach yaʼab meyaj kʼaʼabéet u beetaʼal teʼ granjaoʼ yaan kʼiineʼ k-meyaj tak utiaʼal domingos.

Ku tsʼoʼokol in beel yéetel ku yantal in paalal

Tu añoil 1963 le yaanten 17 añosoʼ tsʼoʼok in beel yéetel James, letiʼ yéetel tuláakal u familiaeʼ desde úuch yanakoʼob teʼ religión tuʼux yanen kaʼachoʼ. Tu kaʼatúulaloʼon k-creertik kaʼach tiaʼanoʼon ichil le religión kaʼansik u jaajiloʼ.

Tu añoil 1975, tsʼokaʼaniliʼ u yantal seis in paalal, yéetel tu añoil 1983 ka síij le u tsʼookoʼ. Chéen juntúul in chan hija anchaji: Rebeca. Jach yaʼab k-meyaj kaʼachi yéetel maʼ yaʼab k-xuupiʼ tumen k-ilik k-kuxtal chéen yéetel junpʼíit baʼaloʼob. Toʼoneʼ k-kaʼansik tiʼ k-paalaloʼob le baʼax tu kaʼansajtoʼon k-papáʼoboʼ yéetel le baʼax ku kaʼansaʼaltoʼon teʼ t-religiónoʼ.

Ichil k-religióneʼ jach ku chʼaʼabal en cuenta bix u vestirkuba máak. K-tuklik kaʼacheʼ como maʼ tu páajtal k-ilik baʼax yaan ichil u puksiʼikʼal máakeʼ le bix u vestirkuba máakoʼ ku yeʼesik le baʼax yaan ichil u puksiʼikʼaloʼ. Wa jach ku xáacheʼtik u pool le koʼoleloʼob yéetel wa jach nojoch u looliloʼob u nookʼoʼobeʼ ku yilaʼal bey jach kaʼanal u yichoʼobeʼ. Yaan kʼiineʼ hasta ku yilaʼal bey maas kʼaʼanaʼan le baʼax ku yaʼalaʼal teʼ religiónoʼ ke le baʼax ku yaʼalik le Bibliaoʼ.

Junpʼéel baʼax úuch teʼ cárceloʼ

In cuñado Jesseeʼ tiaʼan kaʼach teʼ religión tuʼux yanoʼonoʼ. Tu tsʼoʼokbal u añoiloʼob 1960, letiʼeʼ kʼaʼal cárcel tumen maʼ tu yóotaj u beet u soldadoiliʼ. Le tiaʼan teʼeloʼ tu kʼaj óoltaj u testigoʼob Jéeoba, letiʼobeʼ kʼaʼaloʼob cárcel tumen maʼatech u yóotkoʼob bin guerra jeʼex u yaʼalik le Bibliaoʼ (Isaías 2:4; Mateo 26:52). Le tiaʼan in cuñado teʼ cárceloʼ yaʼab u téenel tsikbalnaj yéetel u testigoʼob Jéeoba yoʼolal le Bibliaoʼ. Le ka maas kaanbalnajeʼ okjaʼanaj ichil u testigoʼob Jéeoba, chéen baʼaleʼ toʼoneʼ jach maʼ maʼalob t-ilil le baʼax tu beetoʼ.

Jesseeʼ tu tsikbaltaj tiʼ in wíicham le baʼax tsʼoʼok u kanikoʼ yéetel tu yaʼalajtiʼ ka túuxtaʼaktiʼ le revista ¡Aajkech! yéetel U Pʼíich Tulumil Kananoʼ. Tu yoʼolal leloʼ Jameseʼ taakchaj u maas kaanbal tiʼ le Bibliaoʼ. Letiʼeʼ jach jatsʼuts tu yuʼubil jeʼel u páajtal u natsʼkuba yiknal Dioseʼ tumen kex tiaʼan ichil junpʼéel religióneʼ jach náach u yuʼubikuba tiʼ letiʼ.

U nuuktakil le religión tuʼux yanoʼon kaʼachoʼ tu yaʼaloʼob ka k-xok le revistaʼob ku jóoʼsik le Antigua Ordenoʼ, le amishoʼoboʼ yéetel le menonitaʼoboʼ. Chéen baʼaleʼ toʼoneʼ k-tuklik kaʼacheʼ le religiónoʼob jeʼeloʼ ku beetkoʼob le baʼaxoʼob suuk u beetaʼal way yóokʼol kaabeʼ. In papá kaʼacheʼ jach maʼ maʼalob u yilik le baʼax ku kaʼansik u testigoʼob Jéeobaoʼ. Le oʼolal u yaʼalmajtoʼon maʼ k-xokik le revista ¡Aajkech! mix u U Pʼíich Tulumil Kananoʼ. Le oʼolal le kéen in wil táan u xokik James le revistaʼoboʼ jach kin chiʼichnaktal tumen kin tuklikeʼ táan u tuʼusul.

Jameseʼ tsʼokaʼaniliʼ u káajal u tuklik maʼ teʼ Biblia ku taal le baʼax ku kaʼansik le máakoʼob yanoʼob t-religiónoʼ, por ejemploeʼ le ku yaʼalikoʼob maʼ u meyaj máak utiaʼal domingosoʼ. Ku yaʼalikoʼob kaʼach xaneʼ jeʼel u páajtal u bisaʼal le wakaxoʼob u yukʼoʼob jaʼoʼ, pero maʼ tu páajtal u jokik máak mix junpʼéel xíiw. U nuuktakil le religiónoʼ maʼ tu páajtal kaʼach u yeʼeskoʼob tuʼux ku yaʼalik le Biblia le baʼax ku kaʼansoʼoboʼ. Le oʼolal teen xaneʼ joʼopʼ u kaʼapʼéeltal in tuukul.

Máan yaʼab tiempo táan k-tuklik tiaʼanoʼon ichil le religión kʼamaʼan tumen Diosoʼ, le oʼolal jach istikyaj úuchik k-pʼatik. Tsʼoʼoleʼ k-ojel baʼax kun úuchul le kéen xuʼuluk k-bin teʼ religiónoʼ. Chéen baʼaleʼ k-conciencia kaʼacheʼ maʼ tu chaʼik k-pʼáatal tiʼ junpʼéel religión tuʼux maʼatech u kaʼansaʼal baʼax ku yaʼalik le Bibliaoʼ. Le oʼolal tu añoil 1983, t-beetaj junpʼéel carta utiaʼal ka xoʼokok tu táan tuláakal le máaxoʼob ku binoʼob teʼ religión jeʼeloʼ. Teʼ cartaoʼ k-aʼalik baʼaxten táan k-lukʼliʼ, le oʼolal jóoʼsaʼaboʼon teʼ religiónoʼ.

Joʼopʼ k-kaxtik u jaajil religión

Desde teʼ kʼiin jeʼeloʼ joʼopʼ k-kaxtik máakalmáak le religión ku kaʼansik u jaajiloʼ. Le máaxoʼob yanoʼob ichil le religión k-kaxtikoʼ unaj u beetkoʼob le baʼax ku kaʼanskoʼoboʼ. Yáaxeʼ maʼ unaj u táakpajloʼob tiʼ guerraiʼ, tsʼoʼoleʼ unaj u vestirkubaʼob sencillo, beyoʼ yaan u yeʼeskoʼob maʼ tu táakpajloʼob tiʼ le baʼaxoʼob ku beetaʼal way yóokʼol kaabeʼ. Le oʼolal tu añoil 1983 yéetel 1985, joʼopʼ k-viajar tiʼ tuláakal u luʼumil Estados Unidos utiaʼal k-kʼaj óoltik jejeláas religiónoʼob jeʼex le menonitaʼoboʼ, le cuáqueroʼoboʼ yéetel uláakʼ religiónoʼob.

Teʼ kʼiinoʼob jeʼeloʼ yaʼab u téenel bin u testigoʼob Jéeoba u xíimbaltoʼon teʼ granja yaantoʼon naatsʼ tiʼ u kaajil Camdenoʼ (Indiana). Kex jatsʼuts k-uʼuyik le baʼax ku yaʼalikoʼoboʼ le kéen u xokoʼob le tekstoʼoboʼ k-aʼaliktiʼob ka u xokoʼob teʼ Biblia King James Versionoʼ (Versión del Rey Jacobo). Teneʼ kin respetartik kaʼach le testigoʼoboʼ tumen maʼatech u táakpajloʼob tiʼ guerraʼob. Chéen baʼaleʼ maʼ maʼalob in wilik kaʼach bix u vestirkubaʼobiʼ. Kin tuklikeʼ kʼaʼabéet u tsʼáaikoʼob le nookʼ jeʼex le kin tsʼáaikoʼ tumen beyoʼ yaan u yilaʼal maʼ beyoʼob jeʼex u maasil máakoʼoboʼ. Kin tuklik kaʼacheʼ le máaxoʼob yaantiʼob yaʼab baʼaloʼob bey xan le máaxoʼob maʼatech u vestirkubaʼob jeʼex toʼonoʼ jach ku creerkubaʼob.

Jach kʼuuxilnajen le ka joʼopʼ u bisik James le mejen paalaloʼob teʼ tuʼux ku muchʼkuba u testigoʼob Jéeobaoʼ. Letiʼ kaʼacheʼ ku yaʼalikten ka xiʼiken tu yéetel, pero maʼ in kʼáat kaʼachiʼ. Juntéenjeakeʼ tu yaʼalajten: «Kex maʼ de acuerdoech yéetel tuláakal le baʼax ku kaʼanskoʼoboʼ koʼox utiaʼal a wilik bix u tratarkubaʼob». Letiʼ kaʼacheʼ jach uts tu tʼaan bix u tratartaʼal máak tumen u testigoʼob Jéeoba.

Tu tsʼookeʼ binen teʼ reunión yéetel le vestido suuk in tsʼáaikoʼ bey xan yéetel in chan gorro. In paalaloʼobeʼ binoʼob x-maʼ xanabil yéetel u nookʼoʼobeʼ jach sencillo. Kex beyoʼ u testigoʼob Jéeobaeʼ náatsʼoʼob u saludartoʼon, tsʼoʼoleʼ tu tratartoʼonoʼob yéetel yaabilaj. Ka túun tin tuklaj: «Kex jelaʼanoʼon tiʼ u maasileʼ maʼalob u tratarkoʼonoʼob».

Kex jatsʼuts tin wilil bix úuchik k-tratartaʼaleʼ tin chʼaʼtuklaj maʼ in beetik le baʼax ku beetkoʼoboʼ. Por ejemploeʼ kin pʼáatal kutal le kéen waʼalakoʼoboʼ, tsʼoʼoleʼ maʼ xan tin kʼaay le kéen kʼaaynakoʼoboʼ. Kéen tsʼoʼokok le reuniónoʼ ku joʼopʼol in beetik preguntaʼob tiʼob yoʼolal le baʼaloʼob kin tuklik maʼ maʼalob ku beetkoʼoboʼ bey xan yoʼolal jujunpʼéel u tekstoiloʼob le Bibliaoʼ. Kex maʼ tin weʼesaj jatsʼuts modos le ka tin beetaj le preguntaʼoboʼ, letiʼobeʼ tu yeʼesoʼob jach tu jaajil u kʼáat u yáantenoʼob. Tsʼoʼoleʼ kex tiʼ jejeláas máaxoʼob tin beetaj le preguntaʼoboʼ junpʼéeliliʼ bix úuchik u núukikoʼobeʼ. Yaan kʼiin kaʼacheʼ ku tsʼíibtikoʼob u núukil, leloʼ jach tu yáanten tumen beyoʼ páajchaj in kaʼa xokik tuláakʼ kʼiin.

Tu añoil 1985, binoʼon tiʼ junpʼéel asamblea tu beetaj u testigoʼob Jéeoba tu kaajil Memphis (Tennessee). Teʼ kʼiinoʼoboʼ Jameseʼ láayliʼ yaan u meʼexeʼ yéetel t-bisaj le nookʼ suuk k-tsʼáaikoʼ. Tu yorail le janaloʼ yaʼab máaxoʼob taal tsikbal t-éetel. Jach eʼesaʼabtoʼon utsil yéetel yaabilaj teʼ asambleaoʼ. T-tsʼáaj cuenta xaneʼ kex jeʼel tuʼuxak ka beetaʼak le asambleaʼoboʼ junpʼéeliliʼ baʼax ku kaʼansaʼaleʼ.

Yoʼolal le yaabilaj eʼesaʼab tiʼ James tumen le Testigoʼoboʼ tu yóotaj u xok le Biblia tu yéeteloʼoboʼ. Chéen baʼaleʼ jach tu xakʼaltaj tubeel le baʼax ku kaʼansaʼaltiʼoʼ utiaʼal u yilik wa jach jaaj (Hechos 17:11; 1 Tesalonicenses 5:​21). Bey úuchik u tsʼáaik cuenta James tsʼoʼok u kaxtik u jaajil religiónoʼ. Pero teneʼ kaʼapʼéelchajaʼan in tuukul tumen maʼ taak kaʼach in usartik le baʼaxoʼob ku usartik u maasil máakoʼoboʼ. Tu tsʼookeʼ tin wóotaj in xok le Biblia tu yéeteloʼoboʼ, pero kaʼapʼéel Biblia kin usartik. Junpʼéeleʼ letiʼe King James Versionoʼ yéetel le uláakʼ junpʼéeloʼ letiʼe Traducción del Nuevo Mundooʼ (U Tʼaan Dios utiaʼal u Kajnáaliloʼob le Túumben Luʼumoʼ). Bey in beetkoʼ tumen in kʼáat in comparart baʼax ku yaʼalik le tekstoʼob utiaʼal maʼ in tuʼusloʼ.

Bix tin tsʼáaj cuenta letiʼe u jaajiloʼ

Úuchik in xook yéetel le Testigoʼoboʼ tin kaneʼ Jéeobaeʼ maʼ junpʼéel Trinidadiʼ yéetel minaʼan junpʼéel alma ku jóokʼol kéen kíimik máak, baʼaxeʼ toʼon le almaoʼ (Génesis 2:7; Deuteronomio 6:4; Ezequiel 18:4; 1 Corintios 8:​5, 6). T-kanaj xaneʼ le infiernooʼ maʼ junpʼéel lugar tuʼux ku tóokaʼal máakiʼ, baʼaxeʼ letiʼe muknaloʼ (Job 14:13; Salmo 16:10; Eclesiastés 9:​5, 10; Hechos 2:​31). Jach tu yáanten in wojéeltik u jaajil yoʼolal le infiernooʼ tumen teʼ religión tuʼux yanen kaʼachoʼ mix máak u yojel jach baʼaxiʼ.

Chéen baʼaleʼ láayliʼ maʼ convencidaen kaʼach wa le Testigoʼoboʼ letiʼob u jaajil religiónoʼ tumen maʼ tu kuxtaloʼob jeʼex toʼonoʼ. Letiʼobeʼ kin wilkoʼob kaʼach jeʼex u maasil máakoʼoboʼ. Pero kin tsʼáaik cuenta xaneʼ ku beetkoʼob le baʼax tu yaʼalaj Jesúsoʼ, ku kaʼanskoʼob tiʼ tuláakal máak le baʼax ken u beet u Reino Diosoʼ. Yoʼolal tuláakal le baʼaloʼoboʼ kaʼapʼéelchajaʼan in tuukul kaʼachi (Mateo 24:14; 28:19, 20).

Teʼ kʼiinoʼoboʼ jach tu yáantoʼon le yaabilaj eʼesaʼabtoʼon tumen le Testigoʼoboʼ, tuláakal le múuchʼuliloʼ tu yáantaj k-familia. Letiʼobeʼ ku bin u manoʼob jeʼ yéetel leche t-otoch, pero toʼoneʼ k-ojleʼ chéen taak u binoʼob u xíimbaltoʼon, bey úuchik k-tsʼáaik cuenta jach táaj utsoʼoboʼ. Kex u yojloʼob táan u tsʼaʼabaltoʼon xookeʼ le kéen jóokʼkoʼob kʼaʼaytajeʼ ku jáan máanoʼob t-otoch. Jach tu yáantoʼon úuchik k-xíimbaltaʼal tumen le sukuʼunoʼoboʼ tumen beyoʼ páajchaj k-kʼaj óoltikoʼob tubeel yéetel t-tsʼáaj cuentaeʼ jach tu jaajil u yaabiltmoʼonoʼob.

Maʼ chéen le sukuʼunoʼob yanoʼob teʼ múuchʼulil áantenoʼ. Teʼ kʼiinoʼob kaʼapʼéelchajaʼan in tuukul yoʼolal bix unaj u vestirkuba máakoʼ taal u xíimbalten Kay Briggs, letiʼeʼ juntúul Testigo tiʼ uláakʼ múuchʼulil, letiʼeʼ jach sencillo u vestirkuba yéetel maʼatech u bonkuba. Jach uts tin tʼaan in tsikbal kaʼach tu yéetel. Juntéenjeak xaneʼ taal u xíimbalten sukuʼun Lewis Flora, letiʼ xaneʼ líikʼ tiʼ junpʼéel religión tuʼux ku tsʼáaik u nookʼ máak jach sencillo. Letiʼeʼ tu yilaj tu táan in wich jach kaʼapʼéelchajaʼan in tuukul, le oʼolal tu túuxtajten junpʼéel carta de diez páginas utiaʼal ka in xoke. Ka tin wilaj taak u yáantkeneʼ joʼopʼ in wokʼol, yaʼab u téenel tin xokaj le carta tu túuxtajtenoʼ.

Juntéenjeakeʼ tin kʼáataj tiʼ sukuʼun O’Dell, le superintendente tiʼ circuito, ka u tsolten le baʼax ku yaʼalik Isaías 3:18-23 yéetel 1 Pedro 3:3, 4. Tin waʼalajtiʼ: «¿Maʼ wa tu yeʼesik le tekstoʼob de ke Dioseʼ u kʼáat ka k-bis junpʼéel nookʼ sencillo?». Le sukuʼunoʼ tu núukajten: «¿Kʼaas wa ka u usart máak junpʼéel chan gorro? ¿Kʼeban wa u jitʼik u pool máak?». Letiʼeʼ tu beetaj in tuukul yéetel le preguntaʼoboʼ tumen teʼ religión tuʼux yanen kaʼachoʼ suuk kaʼach k-jitʼik u pool le mejen x-chʼúupalaloʼoboʼ yéetel le koʼoleloʼoboʼ suuk u usarkoʼob gorroʼob. Bey úuchik in tsʼáaik cuentaeʼ le baʼax kaʼansaʼantenoʼ maʼ bey jeʼex u yaʼalik le Bibliaoʼ, jach jatsʼuts tin wilil le paciencia tu yeʼesajten le superintendenteoʼ.

Jujunpʼíitil úuchik in kʼamik le baʼax ku kaʼanskoʼoboʼ. Chéen baʼaleʼ láayliʼ yaan junpʼéel baʼal chiʼichnakkúuntikeneʼ, letiʼe u kʼosik u pool le koʼoleloʼoboʼ. Le ancianoʼoboʼ tsikbalnajoʼob tin wéetel ka tu yaʼaloʼobteneʼ yaan koʼoleloʼobeʼ maas séeb u chowaktal u tsoʼotsel u pooloʼob ke uláakʼoʼob. Chéen baʼaleʼ mix juntúul maas maʼalob tiʼ uláakʼiʼ. Tu yáantenoʼob xan in wileʼ kʼaʼabéet u meyaj k-conciencia utiaʼal k-ilik bix ken k-vestirtba, tu tsʼáajoʼobten xan publicaciónoʼob utiaʼal in xokik tin wotoch.

K-tsʼáaik ichil k-kuxtal baʼax táan k-kanik

Hasta ka t-kaxtaj le u jaajil religiónoʼ. Jesúseʼ tu yaʼalaj bix jeʼel u kʼaj óoltik máakeʼ: «Wa ka paklan yaabiltikabaʼexeʼ tuláakal máak ken u yojéelteʼ teʼexeʼ in discípuloʼex» (Juan 13:35). Toʼoneʼ t-tsʼáaj cuentaeʼ u testigoʼob Jéeobaeʼ jach tu jaajil ku yeʼeskoʼob yaabilaj. Chéen baʼaleʼ Nathan yéetel Rebecca, u maas nojchil k-paalaloʼobeʼ maʼ bey tu yiloʼobiʼ tumen letiʼobeʼ pʼáatoʼob teʼ religión tuʼux k-bin kaʼachoʼ yéetel okjaʼanajoʼobiʼ. Pero ka máan kʼiineʼ kʼuch tu puksiʼikʼaloʼob le baʼax ku kaʼansik le Bibliaoʼ bey xan le yaabilaj yaan ichil le Testigoʼoboʼ.

Rebeccaeʼ desde úuch jach taak u biskuba yéetel Dios. Desde le ka tu kanaj maʼ Dios aʼalik baʼax kun úuchul ichil u kuxtal máakeʼ maas chéen chʼaʼabil tu yilil u orar tiʼ letiʼ. Tu kanaj xaneʼ Dioseʼ maʼ junpʼéel Trinidadiʼ, baʼaxeʼ juntúul Dios jach tu jaajil yaan yéetel jeʼel u páajtal u yeʼesik le jatsʼuts modos yaantiʼoʼ (Efesios 5:1). Tsʼoʼoleʼ kiʼimak u yóol tumen kéen orarnak tiʼ Dioseʼ maʼ tsaaj u usartik le úuchben tʼaanoʼob yaan teʼ Biblia ku usartik kaʼachoʼ. Tu yuʼubaj maas naatsʼ yanil tiʼ Dios le ka tu kanaj bix unaj u orar máak yéetel le ka tu kanaj Dioseʼ u kʼáat ka kuxlak wíinik tiʼ junpʼéel paraíso utiaʼal mantatsʼ (Salmo 37:29; Apocalipsis 21:​3, 4).

Tuláakloʼon k-meyajtik Jéeoba

Teen yéetel Jameseʼ okjaʼanajoʼon tu añoil 1987. Teʼ año jeʼeloʼ okjaʼanaj xan Nathan, Rebecca, George, Daniel yéetel John, u maas nojchil k-paalaloʼoboʼ. Harleyeʼ okjaʼanaj tu añoil 1989 yéetel Simoneʼ 1994. Tuláakal k-familia jach u tsʼaamaj u yóol u tsikbaltoʼob u Reino Dios tiʼ tuláakal máak jeʼex tu yaʼalil Jesús ka beetaʼakoʼ.

Nathan, George, Daniel, John, Harley yéetel k-hija Rebeccaeʼ meyajnajoʼob junpʼéel tiempo tu Betelil Estados Unidos. Georgeʼ láayliʼ tiʼ ku meyajiʼ, tsʼoʼok 14 años yanak teʼeloʼ. Tsʼoʼoleʼ le ka tu tsʼoʼoksaj u xook Simon tu añoil 2001, bin xan meyaj Betel. Tuláakal k-hijoʼobeʼ táan u meyajoʼob bey ancianoʼob wa siervo ministerialoʼob tiʼ junpʼéel múuchʼulileʼ. In wíicham xaneʼ táan u beetik u ancianoil teʼ múuchʼulil yaan tu kaajil Thayeroʼ (Misuri), teen xaneʼ jach in tsʼaamaj in wóol in tsikbalt baʼax ku yaʼalik u Tʼaan Dios tiʼ tuláakal le máakoʼoboʼ.

Bejlaʼeʼ yaan óoxtúul k-áabiloʼob: Jessica, Latisha yéetel Caleb. Kiʼimak k-óol k-ilkeʼ u taataʼobeʼ táan u kaʼanskoʼob u yaabiltoʼob Jéeoba yéetel tuláakal u puksiʼikʼaloʼob. Tuláakloʼon ichil in familiaeʼ kiʼimak k-óol tumen Jéeobaeʼ tu natsʼoʼon tu yiknal, tsʼoʼoleʼ yoʼolal le yaabilaj ku yeʼesik u kaajaloʼ tu yáantoʼon k-il máakalmáak le jaajil religiónoʼ.

Toʼoneʼ k-naʼatik bix u yuʼubikuba le máaxoʼob taak u beetkoʼob baʼax uts tu tʼaan Diosoʼ, chéen baʼaleʼ yoʼolal bix líiʼsaʼaniloʼobeʼ maʼ chéen chʼaʼabil u beetkoʼobiʼ. Jach k-tsʼíiboltik ka yanaktiʼob le kiʼimak óolal yaantoʼon bejlaʼoʼ, kaʼacheʼ k-máan joonaj joonajil k-kon le baʼaxoʼob k-pakʼikoʼ, pero bejlaʼeʼ k-máan k-tsikbalt le jatsʼuts baʼaloʼob ken u beet u Reino Diosoʼ. Hasta ku taaktal in wokʼol kéen in kʼaʼajs le paciencia yéetel le yaabilaj eʼesaʼabtoʼon tumen u kaajal Jéeobaoʼ.

[Oocheloʼob]

Le yaanten siete añosoʼ yéetel le tsʼoʼok in nojochtaloʼ

[Oochel]

James, George, Harley yéetel Simon u búukintmoʼob le nookʼ suuk u tsʼáaikoʼob kaʼachoʼ

[Oochel]

In foto jóoʼsaʼab teʼ periódico le táan in konik le baʼaxoʼob k-pakʼikoʼ

[Máax tsʼáaik le fotooʼ]

Journal and Courier (Lafayette, Indiana)

[Oochel]

K-familia teʼ kʼiinoʼobaʼ