¡Jeʼel a tsaʼayleʼ!

«MAʼ a chʼaʼik saajkil yéetel tsʼáaba meyaj» (1 Crónicas 28:10). ¿Baʼax ku bineltik a beetik utiaʼal a pʼatik le chamaloʼ?

Tsʼáa u fechail. Le Departamento de Salud yéetel Servicios Humanos yaan Estados Unidosoʼ ku yaʼalikeʼ le kéen tsʼoʼokok a chʼaʼtuklik a pʼatik a tsʼuʼutsʼik chamaleʼ ichil le dos semanas ku segueroʼ yéey junpʼéel fecha utiaʼal a pʼatik. Maʼ chaʼik u máan yaʼab tiempo tumen wa maʼeʼ maʼ kun taaktal a pʼatik. Marcart le fecha ta calendariooʼ yéetel aʼaltiʼ a láakʼtsiloʼob bey xan tiʼ a amigoʼob. Kex jeʼel baʼalak ka úuchkeʼ beet le baʼax tsʼoʼok a chʼaʼtuklikoʼ.

Beet junpʼéel tarjeta. Ichileʼ tsʼíibt baʼax jeʼel u yáantkecheʼ yéetel tsʼíibt xan le baʼaloʼobaʼ.

● Baʼax oʼolal taak a pʼatik a tsʼuʼutsʼik chamal

● U número le máaxoʼob jeʼel u yáantkechoʼob le kéen a wuʼuy taak a kaʼa lúubul tiʼ le viciooʼ

● Baʼaloʼob jeʼel u yáantkecheʼ, por ejemploeʼ tekstoʼob jeʼex Gálatas 5:​22, 23

Jeʼel tuʼuxak ka xiʼikecheʼ bis le tarjetaoʼ yéetel xok yaʼab u téenel. Kex tsʼoʼok u xuʼulul a tsʼuʼutsʼik chamaleʼ le kéen taakak a beetkeʼ jóoʼs le tarjeta utiaʼal a xokikoʼ.

Ilawil bey baʼaxoʼob jeʼel a beetkeʼ. Antes u kʼuchul le fecha a yéeymoʼ kʼex le baʼaloʼob suuk a beetik le kéen a tsʼuʼutsʼ chamaloʼ. Por ejemploeʼ wa chéen pʼelak a líikʼil ka tsʼuʼutsʼik chamaleʼ maʼ jáan tʼabik páaʼt kex junpʼéel hora. Tsʼoʼoleʼ wa suuk a tsʼuʼutsʼik chamal antes a janal wa kéen tsʼoʼokkeʼ maʼ a beetik beyoʼ. Maʼ a bin teʼ lugaroʼob tuʼux ku tsʼuʼutsʼaʼal chamaloʼ. Ensayart le baʼax ken a waʼalaʼ: «Diosboʼotik, tsʼoʼok u xuʼulul in tsʼuʼutsʼik chamal». Le baʼaloʼobaʼ yaan u yáantkech utiaʼal u xuʼulul a tsʼuʼutsʼik chamal teʼ kʼiin a waʼalmoʼ. Tsʼoʼoleʼ yaan u kʼaʼajsiktecheʼ maʼ tun xáantal ken a pʼat le viciooʼ.

Uláakʼ baʼaloʼob jeʼel a beetkeʼ. Le taʼaytak u kʼuchul le kʼiin a yéeymoʼ man baʼaloʼob utiaʼal a jaant jeʼex zanahoria, chicleʼob, bey xan baʼaloʼob jeʼex cacahuate yéetel x-tóopʼoʼ. Kʼaʼajs tiʼ a láakʼtsiloʼob bey xan tiʼ a amigoʼob le fecha ta yéeyaj utiaʼal u xuʼulul a tsʼuʼutsʼik chamaloʼ yéetel baʼax jeʼel u beetkoʼob utiaʼal u yáantkechoʼobeʼ. Junpʼéel kʼiin antes tiʼ le fecha ta yéeyoʼ pul tuláakal le chamal yaan ta wotochoʼ, ta coche, le yanoʼob tu bolsail a nookʼoʼ yéetel le yaan teʼ tuʼux ka meyajoʼ. Pul xan ceniceroʼob, encendedoroʼob yéetel jeʼel baʼaxak jeʼel u beetik u taaktal a kaʼa tsʼuʼutsʼik chamaleʼ. Tumen maas chéen chʼaʼabil a tsʼuʼutsʼik junpʼéel chamal yaan ta wotoch ke a bin a man tienda wa a kʼáatik tiʼ juntúul a amigo. Tsʼoʼoleʼ seguernak a kʼáatik tiʼ Dios ka u yáantech, maases le kéen tsʼoʼokok a tsʼuʼutsʼik le u tsʼook chamaloʼ (Lucas 11:13).

Yaʼab máakoʼobeʼ tsʼoʼok u pʼatik u tsʼuʼutsʼkoʼob chamal tumen tu tsʼáajoʼob cuentaeʼ le chamaloʼ bey juntúul kʼasaʼan amigoeʼ. Teech xaneʼ jeʼel u páajtal u xuʼulul a tsʼuʼutsʼik chamaleʼ. Beyoʼ yaan u xuʼulul u esclavizarkech yéetel yaan u maas yantaltech toj óolal.

[Oochel]

Jeʼel tuʼuxak ka xiʼikecheʼ bis le tarjetaoʼ yéetel xok yaʼab u téenel