XOOK 19
Bix jeʼel k-maas creertik yaan u yantal le Paraísooʼ
«[Jéeobaeʼ] le kéen u yaʼal wa baʼaxeʼ, ¿maʼ wa ken u beete?» (NÚM. 23:19).
KʼAAY 142 Tsʼáa a fe tiʼ baʼax u yaʼalmaj Dios
TIʼ BAʼAX KUN TʼAAN a
1, 2. ¿Baʼax unaj k-beetik le táan k-pʼáatik u suut paraísoil le Luʼumaʼ?
TOʼONEʼ jach kiʼimak k-óol tumen k-ojel Jéeobaeʼ yaan u sutik paraísoil le yóokʼol kaabaʼ (2 Ped. 3:13). Kex maʼ k-ojel jach baʼax kʼiin u beetkeʼ tuláakal le baʼax ku yúuchloʼ ku yeʼesikeʼ maʼ yaʼab u biniʼ (Mat. 24:32-34, 36; Hech. 1:7).
2 Kex jeʼel bukaʼaj tiempo káajak k-meyajtik Jéeobaeʼ tuláakloʼon unaj k-muʼukʼankúuntik k-fe tiʼ u promesail le Paraísooʼ. Apóstol Pabloeʼ tu yaʼaleʼ wa jach débil u fe máakeʼ séeb jeʼel u lúubul tiʼ kʼebaneʼ (Heb. 12:1). Utiaʼal maʼ u yúuchultoʼon leloʼ kʼaʼabéet u suuktal k-xakʼaltik le baʼaxoʼob eʼesik yaan u suut paraísoil le Luʼumaʼ (Heb. 11:1).
3. ¿Baʼax ken k-xakʼalt teʼ xookaʼ?
3 Teʼ xookaʼ yaan k-ilik óoxpʼéel baʼaloʼob yaan u yáantkoʼon k-maas creert yaan u suut paraísoil le Luʼumaʼ: 1) k-tuukul tiʼ le u kuxtal Jesús tu kʼuboʼ, 2) k-tuukul tiʼ u poder Jéeoba yéetel 3) k-beetik baʼaloʼob jeʼel u maas natsʼkoʼon yiknal Jéeobaeʼ. Kéen tsʼoʼokkeʼ yaan k-ilik bix u muʼukʼaʼankúuntik k-fe le baʼax tu yaʼalaj Jéeoba tiʼ profeta Habacukoʼ. Pero yáaxeʼ koʼox k-ilik baʼaxten jach unaj k-creertik yaan u yantal le Paraísooʼ.
¿BAʼAXTEN KʼAʼABÉET K-MUʼUKʼAʼANKÚUNTIK K-FE?
4. ¿Baʼaxoʼob unaj k-chʼaʼtuklik sáamsamal?
4 Sáamsamal kʼaʼabéet u yeʼesik máak wa muʼukʼaʼan u fe. Por ejemploeʼ le kéen u chʼaʼtukult máaxoʼob ken u amigote, baʼax yéetel ken u náays u yóol, tuʼux kun náakal u xook, máax yéetel kun tsʼoʼokol u beel, bix ken u líiʼsil u paalal wa baʼax meyajil ken u beete. Tukulte: «¿Baʼax ku yeʼesik le decisiónoʼob kin chʼaʼikoʼ? ¿Ku yeʼesik wa kin creertik taʼaytak u xuʼulsaʼal tiʼ le kʼasaʼan yóokʼol kaabaʼ? ¿Wa beyen jeʼex u maasil máakoʼob ku tuklikoʼob kʼaʼabéet in disfrutartik le kuxtal beoraaʼ?» (Mat. 6:19, 20; Luc. 12:16-21). Wa desde bejlaʼa jach k-creertik yaan u béeykuntik Jéeoba le baʼax u yaʼalmoʼ yaan k-chʼaʼik maʼalob decisiónoʼob.
5, 6. Aʼal junpʼéel ejemplo eʼesik baʼaxten kʼaʼabéet muʼukʼaʼan k-fe le kéen k-aktáant pruebaʼob.
5 Yaan horaeʼ ku kʼaʼabéettal xan k-eʼesik muʼukʼaʼan k-fe le kéen tsʼaʼabakoʼon a pruebail. Por ejemploeʼ le kéen chʼaʼpachtaʼakoʼon, le kéen kʼojaʼanchajkoʼon wa kéen úuchuk wa baʼax ichil k-kuxtal. Maʼ xaaneʼ tu káajbaleʼ maʼ tu jáan lúubul k-óol. Pero wa ku xáantal le baʼax k-muʼyajtikoʼ kʼaʼabéet muʼukʼaʼan k-fe utiaʼal k-aguantartik bey xan utiaʼal u seguer k-meyajtik Jéeoba yéetel kiʼimak óolal (Rom. 12:12; 1 Ped. 1:6, 7).
6 Le kéen k-aktáant junpʼéel pruebaeʼ maʼ xaaneʼ jeʼel u káajal k-tuklikeʼ Jéeobaeʼ maʼ ken u séeb taas le Paraísooʼ. Wa k-tuukul beyaʼ, ¿u kʼáat wa u yaʼal tsʼoʼok u débiltal k-fe? U jaajileʼ maʼ. Tuukulnakoʼon tiʼ lelaʼ: Wa tiaʼanoʼon tu épocail yáaxkʼiineʼ como sen ooxoleʼ jeʼel u káajal k-tuklikeʼ maʼ tun séeb kʼáaxal jaʼ. Pero kex beyoʼ k-ojel yaan u kʼuchul u épocail jaʼajaʼal. Toʼon xaneʼ wa jach lubaʼan k-óoleʼ jeʼel u káajal k-tuklikeʼ maʼ tun séeb sutbil paraísoil le Luʼumaʼ. Chéen baʼaleʼ wa muʼukʼaʼan k-fejeʼ k-ojel yaan u béeytal le promesaaʼ (Sal. 94:3, 14, 15; Heb. 6:17-19). Le fejoʼ le kun áantkoʼon utiaʼal k-tsʼáaik táanil Jéeoba ichil k-kuxtal.
7. ¿Baʼax clase tuukulil maʼ unaj u yantaltoʼoniʼ?
7 Kʼaʼabéet xan k-eʼesik muʼukʼaʼan k-fe kéen kʼaʼaytajnakoʼon. Yaʼab máakoʼobeʼ maʼ tu creerkoʼob wa Dioseʼ yaan u sutik paraísoil le Luʼumaʼ (Mat. 24:14; Eze. 33:32). Chéen baʼaleʼ maʼ unaj k-tuukul jeʼex le máakoʼobaʼ. Unaj u seguer k-muʼukʼaʼankúuntik k-fe. Koʼox ilik óoxpʼéel baʼal jeʼel u yáantkoʼoneʼ.
TUUKULNAKOʼON TIʼ LE U KUXTAL JESÚS TU KʼUBOʼ
8, 9. ¿Bix u muʼukʼaʼankúuntik k-fe k-tuukul tiʼ le sacrificio tu beetaj Jesúsoʼ?
8 Wa k-tuukul tiʼ le sacrificio tu beetaj Jesús t-oʼolaloʼ yaan u muʼukʼaʼantal k-fe. Le baʼax tu beetoʼ ku yeʼesik yaan u béeykuntik Dios le baʼaxoʼob u prometermoʼ. Le oʼolal kʼaʼabéet k-jóoʼsik tiempo utiaʼal k-tuukul tiʼ le baʼax tu beetaj Jéeobaoʼ bey xan tiʼ le sacrificio tu beetaj Jesúsoʼ. Wa k-beetkeʼ yaan k-maas creertik Jéeobaeʼ yaan u sutik paraísoil le Luʼum utiaʼal ka kuxlakoʼon mantatsʼoʼ. ¿Baʼaxten k-aʼalik leloʼ?
9 Koʼox tuukul tiʼ tuláakal le baʼax anchaj u beetik Jéeoba utiaʼal u salvarkoʼonoʼ. Letiʼeʼ kajaʼan kaʼach yéetel Jesús teʼ kaʼanoʼ, tsʼoʼoleʼ como u yáax Hijoeʼ jach maʼalob u biskubaʼob. Kex beyoʼ tu túuxtaj way Luʼum utiaʼal u kʼubik u kuxtal. Le tiaʼan Jesús way Luʼumeʼ jach sufrirnaji yéetel jach kʼaas úuchik u kíimsaʼal. ¿Máasaʼ maʼ chéen chʼaʼabil le baʼax tu beetaj Jéeobaoʼ? Letiʼeʼ maʼ tu túuxtaj u Hijo kíimil t-oʼolal chéen utiaʼal ka kuxlakoʼon wa jaypʼéel añosiʼ (Juan 3:16; 1 Ped. 1:18, 19). Como jach nojoch le sacrificio tu beetoʼ yaan u yilik ka kuxlakoʼon mantatsʼ teʼ Paraísooʼ.
TUUKULNAKOʼON TIʼ U PODER JÉEOBA
10. Jeʼex u yaʼalik Efesios 3:20, ¿baʼax jeʼel u páajtal u beetik Jéeobaeʼ?
10 Uláakʼ baʼax jeʼel u beetik u muʼukʼaʼantal k-fejeʼ letiʼe k-tuukul tiʼ u poder Jéeobaoʼ. Tumen yéetel u podereʼ jeʼel u béeykuntik tuláakal le baʼaxoʼob u prometermoʼ. Maʼ xaaneʼ wíinikeʼ maʼ tu creertik wa jeʼel u páajtal u kuxtal máak utiaʼal mantatsʼeʼ. Pero kʼaʼajaktoʼoneʼ Jéeobaeʼ tuláakal baʼal jeʼel u páajtal u beetkeʼ tumen letiʼe Dios jach táaj yaan u poderoʼ (Job 42:2; Mar. 10:27). Yoʼolal leloʼ, ¿máasaʼ maʼ jelaʼan k-uʼuyik le promesaʼob ku beetkoʼ? (Xok Efesios 3:20).
11. Aʼal junpʼéel promesa tu béeykuntaj Jéeoba (ilawil le cuadro « Promesaʼob tuklaʼab maʼ tun béeytaloʼob»).
11 Tuukulnakoʼon tiʼ le promesaʼob tu beetaj Jéeoba tiʼ le máaxoʼob meyajt úuchjeakiloʼ. Maʼ xaaneʼ jeʼel u tuklaʼal maʼ tun béeytaloʼobeʼ. Por ejemploeʼ tiʼ Abrahán yéetel Saraeʼ tu yaʼalajtiʼob yaan u yantal juntúul u chaambaloʼob kex tsʼoʼok u chʼíijloʼob (Gén. 17:15-17). Tsʼoʼoleʼ Jéeobaeʼ tu yaʼalaj tiʼ Abrahán yaan u tsʼáaik u luʼumil Canaán tiʼ u paalal. Jeʼel u tuklaʼal maʼ tun béeytal le promesaaʼ tumen máan yaʼab años esclavizartaʼab le israelitaʼob tu luʼumil Egiptooʼ, pero Jéeobaeʼ tu béeykuntaj le baʼax tu yaʼaloʼ. Tsʼoʼoleʼ ka máan yaʼab añoseʼ Jéeobaeʼ tu yaʼalaj tiʼ Elisabeteʼ yaan u yantal juntúul u hijo kex tsʼoʼok u chʼíijil. Tu yaʼalaj xan tiʼ juntúul x-chʼúupal ku kʼaabaʼtik Maríaeʼ yaan u síijsik Jesús, u Hijo. Bey úuchik u béeytal le promesa tu beetaj Jéeoba tu jardínil Edénoʼ (Gén. 3:15).
12. Josué 23:14 yéetel Isaías 55:10 yéetel 11, ¿bix u yáantkoʼon k-il bukaʼaj u poder Jéeoba?
12 K-tsʼáaik cuenta bukaʼaj u poder Jéeoba le kéen tuukulnakoʼon tiʼ le promesaʼob tsʼoʼok u béeykuntikoʼ. Lelaʼ ku beetik k-maas creertik yaan u sutik paraísoil le Luʼumaʼ (xok Josué 23:14; Isaías 55:10, 11). Wa jach k-creerkeʼ yaan u páajtal k-áantik u maasil u creertoʼob xan jach tu jaajil yaan u yantal le Paraísooʼ. Jéeobaeʼ tu yaʼaleʼ yaan u yantal «junpʼéel túumben kaʼan yéetel junpʼéel túumben luʼum». Ka tsʼoʼok u yaʼalik le promesaaʼ, tu yaʼalaj: «Le tʼaanoʼobaʼ [...] jach jaajtakoʼob yéetel yaan u béeytaloʼob» (Apo. 21:1, 5).
BEET BAʼALOʼOB JEʼEL U NATSʼKECH YIKNAL JÉEOBAEʼ
LE REUNIÓNOʼOBOʼ
¿Bix jeʼel u yáantkoʼon k-muʼukʼaʼankúunt k-fe le baʼaloʼobaʼ? (Ilawil párrafo 13)
13. ¿Bix u muʼukʼaʼankúuntik k-fe le reuniónoʼoboʼ?
13 Uláakʼ baʼax jeʼel u yáantkoʼon k-creert u promesaʼob Jéeobaeʼ letiʼe ka k-beet baʼaloʼob jeʼel u natsʼkoʼon tu yiknaloʼ. Koʼox ilik bix jeʼel u yáantkoʼon le reuniónoʼoboʼ. Anna, b juntúul kiik jach u tsʼaamaj u yóol u meyajt Jéeobaeʼ, ku yaʼalik: «Le reuniónoʼoboʼ bey junpʼéel ancla ku yáantken utiaʼal maʼ u péek mix u junpʼíittal in fejeʼ. Kex wa le sukuʼun máansik le reunión maʼ jach maʼalob u kaʼansaj yéetel maʼ tu kaʼansik junpʼéel baʼal túumbeneʼ, kin wilik in kanik wa baʼax jeʼel u yáantken in naʼat baʼax ku yaʼalik le Bibliaoʼ, beyoʼ ku maas muʼukʼaʼantal in fe». Tsʼoʼoleʼ teʼ reuniónoʼob xanoʼ ku muʼukʼaʼantal k-fe le kéen k-uʼuy u comentario le sukuʼunoʼoboʼ (Rom. 1:11, 12; 10:17).
LE KʼAʼAYTAJOʼ
¿Bix jeʼel u yáantkoʼon k-muʼukʼaʼankúunt k-fe le baʼaloʼobaʼ? (Ilawil párrafo 14)
14. ¿Bix u muʼukʼaʼankúuntik k-fe le kʼaʼaytajoʼ?
14 Uláakʼ baʼax muʼukʼaʼankúuntik k-fejeʼ letiʼe kʼaʼaytajoʼ (Heb. 10:23). Barbaraeʼ tsʼoʼok 70 años joʼopʼok u meyajtik Jéeoba, letiʼeʼ ku yaʼalik: «Le kʼaʼaytajoʼ jach ku muʼukʼaʼankúuntik in fe. Tsʼoʼok in wilkeʼ mientras maas tin tʼaan tiʼ Jéeoba yéetel tiʼ le jatsʼuts promesaʼob u beetmoʼ, maas ku muʼukʼaʼantal in fe».
LE XAKʼALXOOKOʼ
¿Bix jeʼel u yáantkoʼon k-muʼukʼaʼankúunt k-fe le baʼaloʼobaʼ? (Ilawil párrafo 15)
15. ¿Bix u muʼukʼaʼankúuntik k-fe le xakʼalxookoʼ? (Ilawil xan le dibujoʼoboʼ).
15 Uláakʼ baʼal jeʼel u yáantkoʼoneʼ letiʼe k-xakʼalxookoʼ. Susaneʼ ku yaʼalikeʼ le baʼax áant utiaʼal u xakʼalxookoʼ letiʼe u jóoʼsik u kʼiinil yéetel u yorail utiaʼal u beetkoʼ. Letiʼeʼ ku yaʼalik: «Utiaʼal domingoeʼ kin xakʼaltik le xook kun ilbil teʼ tuláakʼ semana tiʼ le revista Le Máax ku Kananoʼ. Utiaʼal lunes yéetel marteseʼ kin prepararkinba yéetel le reunión ku beetaʼal yáam semanaoʼ, yéetel tiʼ uláakʼ kʼiinoʼobeʼ kin xokik uláakʼ publicaciónoʼob». Le baʼax ku beetik Susanoʼ ku beetik u maas muʼukʼaʼantal u fe. Irene, juntúul kiik úuch joʼopʼok u meyaj teʼ sede mundialoʼ, ku yaʼalikeʼ jach ku muʼukʼaʼantal u fe ikil u xakʼaltik le profecíaʼoboʼ. Letiʼeʼ ku yaʼalik: «Jach jatsʼuts in wilik u béeytal le profecíaʼob jach jeʼex u yaʼalmil Jéeobaoʼ». c
«JACH TU JAAJIL YAAN U BÉEYTAL»
16. ¿Baʼaxten tak toʼon ku líikʼil k-óol le ken k-xok le baʼax tu yaʼalaj Jéeoba tiʼ Habacukoʼ? (Hebreos 10:36, 37).
16 Yaʼab tiʼ le máaxoʼob meyajtik Jéeobaoʼ úuch joʼopʼok u páaʼtkoʼob ka taalak le xuʼulsajoʼ. Yaan máaxeʼ jeʼel u tuklikeʼ tsʼoʼok u sen xáantal maʼ taalakiʼ. Jéeobaeʼ u yojel bix u yuʼubikubaʼob, le oʼolal tu yaʼalaj tiʼ profeta Habacuk: «Le baʼax ken a wiloʼ yaan u béeytal teʼ kʼiin aʼalaʼan kun úuchloʼ, maʼ chéen junpʼéel tuusiʼ, le kʼiin jeʼeloʼ séebaʼan kun kʼuchul. ¡Maʼ u náayal a wóol, kex ka a wil táan u xáantaleʼ páaʼte! Tumen jach tu jaajil yaan u béeytal. ¡Yaan u kʼuchul jach tu yorail!» (Hab. 2:3). Le tʼaanoʼobaʼ maʼ tu yaʼalaj Jéeoba chéen utiaʼal u líiʼsik u yóol Habacukiʼ, baʼaxeʼ tu yaʼalaj xan utiaʼal u líiʼsik k-óol teʼ kʼiinoʼobaʼ. Le beetik Jéeobaeʼ tu beetaj u kaʼa aʼalik apóstol Pablo le tʼaanoʼobaʼ utiaʼal u líiʼsik u yóol le máaxoʼob táan u páaʼtkoʼob le túumben luʼumoʼ (xok Hebreos 10:36, 37). Le oʼolaleʼ wa k-uʼuyik bey tsʼoʼok u xáantal maʼ béeychajak le baʼax u prometermaj Jéeobaoʼ kʼaʼajaktoʼoneʼ «jach tu jaajil yaan u béeytal. ¡Yaan u kʼuchul jach tu yorail!».
17. ¿Baʼax tu beetaj juntúul kiik utiaʼal maʼ u náayal u yóol?
17 Yaʼab sukuʼunoʼob úuch joʼopʼok u meyajtikoʼob Jéeobaeʼ ku yilik maʼ u náayal u yóoloʼob le táan u páaʼtkoʼob u béeytal u promesaʼob Jéeobaoʼ. Koʼox ilik baʼax úuch tiʼ Louise, juntúul kiik káaj u meyajtik Jéeoba tu añoil 1939. Letiʼeʼ ku yaʼalik: «Tin tuklaj yaan u taal Armagedón antes tiʼ in cumplirtik 18 añoseʼ. Pero maʼ bey úuchikiʼ. Le baʼax tsʼoʼok u yáantken tak beoraaʼ letiʼe in xokik u tsikbalil le máaxoʼob jach táaj anchaj u pacienciaʼoboʼ jeʼex Noé, Abrahán, José yéetel uláakʼ máaxoʼob meyajt Jéeoba úuchjeakiloʼ. Letiʼobeʼ anchaj u páaʼtkoʼob yaʼab tiempo utiaʼal u tsʼaʼabaltiʼob le baʼax prometertaʼabtiʼob tumen Jéeobaoʼ. Le baʼax kin beetkoʼ jach tsʼoʼok u yáantken utiaʼal maʼ u xuʼulul in páaʼtik u béeytal u promesaʼob Jéeoba tumen jach taʼaytak u béeytaloʼob». Yaʼab sukuʼunoʼob úuch joʼopʼok u meyajtikoʼob Jéeobaeʼ bey u tuukuloʼob jeʼex le kiikoʼ.
18. Le baʼaxoʼob beetaʼanoʼoboʼ, ¿bix u yáantkoʼon k-creert yaan u suut Paraísoil le Luʼumaʼ?
18 Utiaʼal ka k-maas creert yaan u yantal le Paraísooʼ maʼalob ka tuukulnakoʼon tiʼ le estrellaʼoboʼ, le cheʼoboʼ, le baʼalcheʼoboʼ yéetel tiʼ wíinik. U jaajileʼ minaʼan kaʼach le baʼaloʼobaʼ, pero Jéeoba beet u yantaloʼob (Gén. 1:1, 26, 27). Leloʼ ku yeʼesikeʼ wa Jéeoba u yaʼalmaj yaan u sutik Paraísoil le Luʼumaʼ yaan u béeykuntik. Teʼeloʼ yaan k-kajtal utiaʼal mantatsʼiʼ yéetel mix máak kun kʼojaʼantal. Jeʼex túun k-ilkoʼ le Luʼumaʼ yaan u suut Paraísoil jach teʼ kʼiin u yaʼalmaj Jéeobaoʼ (Isa. 65:17; Apo. 21:3, 4).
19. ¿Bix jeʼel k-muʼukʼaʼankúuntik k-fejeʼ?
19 Mientras táan k-páaʼtik u yantal le Paraísooʼ kʼaʼabéet u seguer k-muʼukʼaʼankúuntik k-fe. Utiaʼal leloʼ kʼaʼabéet k-tuukul tiʼ le u kuxtal Jesús tu kʼuboʼ, tiʼ u poder Jéeoba yéetel unaj u seguer k-beetik baʼaloʼob jeʼel u natsʼkoʼon yiknal Dioseʼ. Wa k-beetik tuláakal leloʼ yaan k-antal ichil le máaxoʼob yaan u fejoʼob yéetel táan u páaʼtkoʼob le baʼax ku yaʼalik Diosoʼ (Heb. 6:11, 12; Rom. 5:5).
KʼAAY 139 ¿Ka wilkaba wa teʼ túumben luʼumoʼ?
a Bejlaʼeʼ yaʼab máak maʼ tu creertik wa yaan u yantal le Paraísooʼ. Pero toʼoneʼ k-ojel yaan u yantal tumen Jéeobaeʼ ku béeykuntik tuláakal u promesaʼob. Chéen baʼaleʼ utiaʼal maʼ u xuʼulul k-creerkeʼ kʼaʼabéet u seguer k-muʼukʼaʼankúuntik k-fe tiʼ u promesaʼob Dios. Teʼ xookaʼ yaan k-ilik bix jeʼel u páajtal k-beetkeʼ.
b Kʼexaʼan jujunpʼéel kʼaabaʼob.
c Teʼ Áantaj utiaʼal u xakʼalxook u testigoʼob Jéeobaoʼ, teʼ jaats ku kʼaabaʼtik «Profecía» ku taasik yaʼab publicaciónoʼob ku tʼaanoʼob tiʼ le profecíaʼob ku yaʼalik le Bibliaoʼ. Por ejemploeʼ ku taasik le xook «Le baʼax ku yaʼalik Jéeobaoʼ ku béeychajal», lelaʼ jóokʼ tiʼ U Pʼíich Tulumil Kanan 1 tiʼ enero tiʼ 2008.
