1. ¿Baʼaxten k-comentar teʼ reuniónoʼoboʼ?

 ¿BAʼAXTEN k-bin reunión? K-bin tumen taak k-alabartik Jéeoba (Sal. 26:12; 111:1). Tsʼoʼoleʼ tumen jach talam le kʼiinoʼob kuxlikoʼonaʼ ku páajtal k-paklan líiʼsik k-óol (1 Tes. 5:11). Cada ken comentarnakoʼoneʼ k-beetik le kaʼapʼéel baʼaloʼob tsʼoʼok k-aʼalikaʼ.

2. ¿Tiʼ baʼax súutukiloʼob jeʼel u páajtal k-comentar teʼ reuniónoʼoboʼ?

² Cada semana jeʼel u páajtal k-comentar teʼ reuniónoʼoboʼ. Por ejemploeʼ jeʼel u páajtal k-comentar tu xookil le revista Le Máax ku Kananoʼ. Tsʼoʼoleʼ teʼ reunión ku beetaʼal yáam semanaoʼ jeʼel u páajtal k-comentar teʼ jaats «Baʼax jeʼel u páajtal k-kanikeʼ», «U xookil le Biblia teʼ múuchʼuliloʼ» yéetel tiʼ uláakʼ jaatsoʼob ku kʼáataʼal ka comentarnak máak.

3. 1) ¿Bey baʼaxoʼob jeʼel u beetik maʼ k-comentareʼ? 2) ¿Bix u yáantkoʼon Hebreos 10:24 yéetel 25?

³ Tuláakloʼon taak k-alabartik Jéeoba yéetel k-líiʼsik u yóol u maasil kéen comentarnakoʼon. Chéen baʼaleʼ yaan kaʼapʼéel baʼax jeʼel u beetik maʼ k-comentareʼ: ka pʼáatkoʼon sen nerviosoil wa maʼ u tsʼaʼabaltoʼon tuláakal le comentarioʼob cada ken k-líiʼs k-kʼaboʼ. Wa bey u yúuchultoʼonoʼ jach jeʼel u yáantkoʼon le baʼax tu yaʼalaj apóstol Pablo tiʼ le hebreoʼoboʼ. Le ka tu yaʼalaj jach kʼaʼanaʼan k-bin teʼ reuniónoʼoboʼ tu yaʼalaj xan jach kʼaʼabéet k-paklan líiʼsik k-óol (xok Hebreos 10:24, 25). Wa k-kʼaʼajsik jeʼel k-líiʼsik u yóol u maasil yéetel junpʼéel comentario maʼ sen chowakeʼ,  maʼ ten k-sen nerviosotal kéen k-líiʼs k-kʼab. Tsoʼoleʼ kex maʼ tu páajtal k-comentar le jaytéen k-kʼáatoʼ yaan u kiʼimaktal k-óol le kéen k-il táan u comentar u maasil (1 Ped. 3:8).

4. ¿Máakalmáak le óoxpʼéel baʼaloʼob ken k-il teʼ xookaʼ?

⁴ Teʼ xookaʼ yaan k-ilik bix jeʼel k-paklan líiʼsik k-óol tiʼ junpʼéel múuchʼulil maʼ sen nojocheʼ tuʼux jeʼel u páajtal u comentar máak yaʼab u téeneleʼ. Kéen tsʼoʼokkeʼ yaan k-ilik bix jeʼel k-paklan líiʼsik k-óol wa tiaʼanoʼon tiʼ junpʼéel múuchʼulil nojocheʼ tuʼux yaʼab sukuʼunoʼob taak u comentaroʼob. Tu tsʼookeʼ yaan k-ilik bix unaj k-comentar utiaʼal k-líiʼsik u yóol u maasil.

5. ¿Baʼax jeʼel u páajtal k-beetik utiaʼal k-paklan líiʼsik k-óol wa chichan le múuchʼuliloʼ?

⁵ Tiʼ junpʼéel grupo wa múuchʼulil chichaneʼ maʼ yaʼab sukuʼunoʼob yaan utiaʼal u comentaroʼobiʼ. Yaan kʼiineʼ le sukuʼun ku nuʼuktajoʼ kʼaʼabéet u páaʼtik junsúutuk utiaʼal u yilik wa yaan u líiʼsik u kʼab wa máax. Leloʼ jeʼel u beetik u xáantal le reuniónoʼ, tsʼoʼoleʼ jeʼel u beetik u lúubul u yóol máakeʼ. ¿Baʼax túun jeʼel u páajtal k-beetkeʼ? Kʼaʼabéet k-ilik comentar yaʼab u téenel, wa k-beetkeʼ yaan k-animartik u maasil comentar.

6, 7. ¿Baʼax jeʼel u yáantkech utiaʼal maʼ a sen nerviosotaleʼ?

⁶ Yaʼab sukuʼunoʼobeʼ ken u tukloʼob yaan u comentaroʼobeʼ jach ku nerviosotaloʼob. Wa bey u yúuchultechoʼ, ¿baʼax jeʼel a beetkeʼ? Jeʼel u páajtal a kaxtik baʼaloʼob jeʼel u yáantkech utiaʼal maʼ a sen nerviosotaleʼ. Beyoʼ yaan u páajtal a líiʼsik u yóol u maasil kéen comentarnakech.

⁷ Jeʼel u yáantkech le xookoʼob jokʼaʼan teʼ revista Le Máax ku Kananoʼ. b Junpʼéel tiʼ le xookoʼoboʼ ku yaʼalikeʼ kʼaʼabéet k-preparartikba maʼalob (Pro. 21:5). Wa jach a wojel tiʼ baʼax ku tʼaan le xookoʼ maas chéen chʼaʼabil ken a líiʼsil a kʼab utiaʼal a comentar. Tsʼoʼoleʼ ilawil xan maʼ u sen chowaktal a comentario (Pro. 15:23; 17:27). Como maʼ yaʼab baʼax ken a waʼaleʼ maʼ ken sen nerviosochajkech. Tsʼoʼoleʼ le sukuʼunoʼoboʼ maas jeʼel u naʼatkoʼob junpʼéel comentario kóomeʼ ke junpʼéel comentario tuʼux ku yaʼalaʼal jach yaʼab baʼaloʼobiʼ. Wa kóom a comentario yéetel ka tsolik le baʼax ta xokoʼ u maasileʼ yaan u tsʼáaikoʼob cuenta jach maʼalob ta preparartilaba yéetel ta naʼataj le baʼax ta xokoʼ.

8. ¿Bix u yilik Jéeoba tuláakal le baʼax k-beetik utiaʼal k-comentaroʼ?

⁸ Yaan horaeʼ kex tsʼoʼok u beetik máak yaʼab baʼaloʼobeʼ láayliʼ ku pʼáatal nerviosoileʼ, le oʼolal chéen juntéen wa kaʼatéen ku comentar. Wa bey u yúuchultechoʼ kʼaʼajaktecheʼ Jéeobaeʼ jach ku apreciartik tuláakal le baʼax ka beetik utiaʼal a comentaroʼ (Luc. 21:1-4). Jéeobaeʼ maʼatech u kʼáatiktoʼon junpʼéel baʼal maʼ tu páajtal k-beetik (Fili. 4:5). Le oʼolaleʼ preparart wa jaypʼéel comentario yéetel kʼáat tiʼ Jéeoba ka u yáantech utiaʼal maʼ a sen nerviosotal. Maʼ xaaneʼ junpʼéel baʼax jeʼel u yáantkecheʼ letiʼe a preparartik junpʼéel comentario maʼ sen chowakoʼ.

9. ¿Baʼax jeʼel u yúuchul wa tiaʼanech tiʼ junpʼéel múuchʼulil nojocheʼ?

⁹ Wa nojoch a múuchʼulileʼ maʼ xaaneʼ jeʼel tak u pʼáatal maʼ ta comentareʼ tumen yaʼab sukuʼunoʼob ku tichʼik u kʼaboʼob. Juntúul kiik ku kʼaabaʼtik Danielleeʼ, jach uts tu tʼaan u comentar. c Letiʼeʼ ku yaʼalikeʼ kéen comentarnakeʼ táan u adorartik Jéeoba, ku líiʼsik u yóol u maasil yéetel maas ku pʼáatal tu tuukul le baʼax ku yaʼalik le Bibliaoʼ. Chéen baʼaleʼ ka káaj u yáantaj tiʼ junpʼéel múuchʼulil maas nojocheʼ pʼáat maʼ tu tsʼaʼabaltiʼ comentario, hasta yaan horaeʼ mix junpʼéel. Letiʼeʼ ku yaʼalik: «Jach lúub in wóol, tin wuʼuyaj bey luʼsaʼabten junpʼéel jatsʼuts privilegioeʼ. Wa ka tichʼik a kʼab yaʼab u téenel pero maʼ tu tsʼaʼabaltech comentarioeʼ ku káajal a tuklikeʼ u yóoliliʼ le sukuʼun maʼ u tsʼáaiktech comentariooʼ».

10. ¿Baʼax jeʼel a beetik utiaʼal ka páajchajak a comentareʼ?

¹⁰ ¿Bey wa a wuʼuyikaba jeʼex kiik Danielleeʼ? Wa beyoʼ maʼ xaaneʼ jeʼel a tuklikeʼ maʼ ken a kaʼa líiʼs a kʼab, chéen yaan a wuʼuyik le reuniónoʼ. Pero maʼ u lúubul a wóol. ¿Baʼax jeʼel a beetik utiaʼal a comentareʼ? Preparart jejeláas comentarioʼob, maʼ chéen junpʼéeliʼ. Beyoʼ wa maʼ ta comentar teʼ yáax párrafoʼoboʼ jeʼel u páajtal a comentar tiʼ uláakʼeʼ. Le kéen a preparartaba yéetel u xookil le revistaoʼ tukult baʼax yaan u yil cada párrafo yéetel le baʼax ku tsoʼolol teʼ xookoʼ, beyoʼ yaan u yantal uláakʼ baʼax a comentarte. Uláakʼ baʼax jeʼel a beetkeʼ letiʼe a prepararkaba utiaʼal a comentar teʼ párrafoʼob tuʼux ku tsoʼolol le baʼaloʼob maas difícil u naʼataʼaloʼ (1 Cor. 2:10). Como maas difícil u tsoʼololeʼ u suukileʼ le sukuʼunoʼoboʼ maʼ tu líiʼsik u kʼaboʼob. Chéen baʼaleʼ, ¿kux túun wa láayliʼ maʼ tu tsʼaʼabaltech comentario kex tsʼoʼok a beetik tuláakal le baʼaloʼobaʼ? Maʼ xaaneʼ antes tiʼ le reuniónoʼ jeʼel u páajtal a waʼalik tiʼ le sukuʼun  kun nuʼuktik le xookoʼ tiʼ baʼax párrafoil a kʼáat comentar.

11. Jeʼex u yaʼalik Filipenses 2:4, ¿baʼax unaj k-beetik?

¹¹ (Xok Filipenses 2:4). Apóstol Pabloeʼ tu yaʼaleʼ maʼ unaj k-kaxtik chéen k-utsiliʼ baʼaxeʼ unaj k-kaxtik u yutsil u maasil. ¿Bix jeʼel k-beetik le baʼax ku yaʼalik le teksto teʼ reuniónoʼoboʼ? Letiʼe kéen k-chʼaʼ en cuenta yaan uláakʼ sukuʼunoʼob taak u comentaroʼoboʼ.

12. ¿Bix jeʼel k-beetik u líikʼil u yóol le sukuʼunoʼoboʼ? (Ilawil xan le fotooʼ).

¹² Tuukulnen tiʼ lelaʼ, ¿máasaʼ le kéen tsikbalnakech yéetel a amigoʼobeʼ maʼ chéen teech ka tʼaaniʼ? Baʼaxeʼ ka chaʼik xan u tʼaanoʼob. Lelaʼ bey xan unaj k-beetik teʼ reuniónoʼoboʼ. Kʼaʼabéet k-chaʼik u comentar le sukuʼunoʼoboʼ tumen beyoʼ yaan u líikʼil u yóoloʼob yéetel yaan u taaktal u maas tichʼik u kʼaboʼob (1 Cor. 10:24). Koʼox ilik baʼax jeʼel u páajtal k-beetik utiaʼal ka comentarnak u maasileʼ.

13. ¿Baʼax jeʼel k-beetik utiaʼal ka páajchajak u comentar u maasileʼ?

¹³ Uláakʼ baʼax jeʼel u páajtal k-beetkeʼ letiʼe k-ilik maʼ u sen chowaktal k-comentariooʼ tumen beyoʼ yaan u yantal tiempo utiaʼal u comentar u maasil. Le ancianoʼob yéetel le sukuʼunoʼob úuch joʼopʼok u meyajtikoʼob Jéeobaoʼ letiʼob unaj u tsʼáaikoʼob u ejemploil. K-comentarioeʼ kʼaʼabéet kóom, maʼ unaj k-aʼalik sen yaʼab baʼaloʼobiʼ. Wa ka waʼalik tuláakal le baʼax ku yaʼalik le párrafooʼ, ¿baʼax ken u comentart u maasil? Por ejemploeʼ, le párrafoaʼ ku yaʼalik kaʼapʼéel baʼal: kʼaʼabéet maʼ chowak k-comentarioiʼ yéetel maʼ k-aʼalik yaʼab baʼaloʼob. Wa ku tsʼaʼabaltech u comentarioil le párrafoaʼ aʼal chéen junpʼéeliʼ.

14. ¿Baʼax unaj k-chʼaʼik en cuenta le kéen k-il jaytéen ken k-líiʼs k-kʼab? (Ilawil xan le fotoʼoboʼ)

¹⁴ Chʼaʼ en cuenta u maasil le kéen a chʼaʼtukult jaytéen ken a líiʼsil a kʼab utiaʼal a comentar. Wa láalaj hora táan k-líiʼsik  k-kʼabeʼ maʼ xaaneʼ le sukuʼun nuʼuktik le xookoʼ jeʼel u yuʼubik obligado u tsʼáatoʼon comentario kex u maasil le sukuʼunoʼob u tichʼmaj u kʼaboʼoboʼ. Wa k-beetik beyoʼ maʼ xaaneʼ yaan sukuʼunoʼob jeʼel u tuklikoʼobeʼ: «Baʼax tiaʼal kin líiʼsik in kʼab, si deporsi maʼ tun tsʼaabilten» (Ecl. 3:7).

15. 1) ¿Baʼax unaj k-beetik wa maʼ tu tsʼaʼabaltoʼon mix junpʼéel comentario? 2) ¿Baʼax unaj u chʼaʼik en cuenta le sukuʼun nuʼuktik le xookoʼ? (Ilawil le cuadro « Bix unaj u nuʼuktaʼal le jaatsoʼob ku taasik preguntaʼoboʼ»).

¹⁵ Wa yaʼab sukuʼunoʼob ku líiʼsik u kʼaboʼob utiaʼal comentareʼ maʼ xaaneʼ maʼ tun béeytal k-comentar le jaytéen k-kʼáateʼ. Jeʼel tak u tsʼoʼokol le reuniónoʼ maʼ tsʼaʼabtoʼon mix junpʼéeliʼ. Maʼ xaaneʼ leloʼ jeʼel u beetik u lúubul k-óoleʼ, pero maʼ unaj kʼuuxiliʼ (Ecl. 7:9).

16. ¿Bix jeʼel k-líiʼsik u yóol le máaxoʼob comentarnajoʼoboʼ?

¹⁶ Maʼ xaaneʼ maʼ sen comentarnajech jeʼex a kʼáateʼ, pero jeʼel u páajtal a wuʼuyik bix u comentar u maasileʼ yéetel a felicitarkoʼob kéen tsʼoʼokok le reuniónoʼ. Maʼ xaaneʼ taak kaʼach a líiʼsik u yóoloʼob yéetel a comentario pero láayliʼ jeʼel a líiʼsik u yóoloʼob le kéen a felicitartoʼobeʼ (Pro. 10:21).

17. 1) ¿Baʼax jeʼel u páajtal u beetik le taatatsiloʼoboʼ? 2) Jeʼex u yeʼesik le videooʼ, ¿máakalmáak le baʼaloʼob jeʼel u beetik máak utiaʼal u preparartik u comentariooʼ? (Ilawil xan le notaoʼ).

¹⁷ ¿Bix uláakʼ jeʼel k-paklan líiʼsik k-óol teʼ reuniónoʼoboʼ? Wa yaan a mejen paalaleʼ áantoʼob u preparartoʼob junpʼéel comentario (Mat. 21:16). Yaan horaeʼ teʼ reuniónoʼ ku xakʼaltaʼal baʼaloʼob maʼ utiaʼal mejen paalaliʼ jeʼex le problemas ku yantal ichil le tsʼokaʼan u beeloʼoboʼ, núupkʼeban wa uláakʼ baʼaloʼob beyoʼ. Kex beyoʼ maʼ xaaneʼ jeʼel u yantal junpʼéel wa kaʼapʼéel párrafo jeʼel u páajtal u comentartik le mejen paalaloʼoboʼ. Maʼalob xan ka a tsol tiʼ a mejen paalaleʼ maʼ tun tsʼaabiltiʼob comentario cada ken u tichʼ u kʼaboʼob. Beyoʼ maʼ tun lúubul u yóoloʼob kéen u yiloʼob maʼ tsʼaʼabtiʼob comentarioiʼ (1 Tim. 6:18). d

18. ¿Baʼax maases unaj k-aʼalik kéen comentarnakoʼon? (Proverbios 27:2).

¹⁸ Tuláakloʼon jeʼel u páajtal k-tsʼáaik comentarioʼob ka u alabart Jéeoba yéetel ka u líiʼs u yóol u maasileʼ (Pro. 25:11). Yaan horaeʼ jeʼel u páajtal k-tsikbaltik wa baʼax uchaʼantoʼoneʼ, pero maʼ unaj k-tʼaan chéen t-oʼolaliʼ (xok Proverbios 27:2; 2 Cor. 10:18). Baʼaxeʼ maases unaj k-tʼaan tiʼ Jéeoba, tiʼ u kaajal bey xan tiʼ le Bibliaoʼ (Apo. 4:11). Wa le pregunta ku yaʼalik ka k-tsikbalt baʼax k-tuklikoʼ jeʼel u páajtal k-beetkeʼ. Teʼ párrafo ku segueroʼ ku taasik junpʼéel pregunta jeʼex le tsʼoʼok k-aʼalikoʼ.

19. 1) ¿Baʼax utsil ken k-kʼam wa k-chʼaʼik en cuenta u maasil teʼ reuniónoʼoboʼ? (Romanos 1:11, 12). 2) ¿Baʼaxten uts ta tʼaan a comentar?

¹⁹ U jaajileʼ minaʼan junpʼéel lista ku yaʼalik jach bix unaj k-comentar, chéen baʼaleʼ kʼaʼajaktoʼoneʼ kʼaʼabéet k-líiʼsik u yóol u maasil yéetel le baʼaxoʼob ken k-aʼaloʼ. Wa tiaʼanech tiʼ junpʼéel múuchʼulil maʼ nojocheʼ maʼ xaaneʼ yaan u kʼaʼabéettal a comentar junpʼíit maas. Pero wa tiaʼanech tiʼ junpʼéel múuchʼulil nojocheʼ maʼ unaj a kʼuuxil wa maʼ tu tsʼaʼabaltech yaʼab comentarioʼobiʼ, baʼaxeʼ unaj u kiʼimaktal a wóol tumen táan a wilik u comentar u maasil. Wa k-chʼaʼik en cuenta u maasileʼ yaan u páajtal k-paklan líiʼsik k-óol teʼ reuniónoʼoboʼ (xok Romanos 1:11, 12).