¿A wojel wa?
¿Baʼaxten yaan kaʼach j-táanxel luʼumiloʼob tu ejército David?
ICHIL u ejército kaʼach Davideʼ yaan máakoʼob maʼ israelitaʼobiʼ. Tiaʼan kaʼach Zélek le ammonitaoʼ, Urías le ititaoʼ yéetel Itmá le moabitaoʼ (1 Cró. 11:39, 41, 46). a Tiaʼan xan kaʼach ‹le keretitaʼoboʼ, le peletitaʼoboʼ yéetel le guititaʼoboʼ› (2 Sam. 15:18). Ku tuklaʼaleʼ le keretitaʼob yéetel le peletitaʼoboʼ láakʼtsiloʼob yéetel le filisteoʼoboʼ (Eze. 25:16). Yéetel le guititaʼoboʼ letiʼob u kajnáaliloʼob Gat, junpʼéel u kaajal le filisteoʼoboʼ (Jos. 13:2, 3; 1 Sam. 6:17, 18).
Davideʼ tu chaʼaj u yantal j-táanxel luʼumiloʼob ichil u ejército tumen u yojel maʼ chéen kun chúukpajal u yóoloʼob u yuʼuboʼob u tʼaan letiʼiʼ baʼaxeʼ yaan xan u chúukpajal u yóoloʼob u yuʼuboʼob u tʼaan Jéeoba. Por ejemploeʼ junpʼéel diccionarioeʼ tu yaʼalaj yoʼolal le keretitaʼob yéetel le peletitaʼoboʼ: «Letiʼobeʼ maʼ tu xúumpʼattoʼob David teʼ kʼiinoʼob ka yanchajtiʼ problemas le táan u gobernaroʼ» (The New Interpreterʼs Dictionary of the Bible). ¿Bix k-ojéeltik leloʼ? Tumen le ka xuʼul u seguertaʼal David tumen ‹tuláakal u máakiloʼob Israel› utiaʼal u tsʼáaikubaʼob tu tséel «juntúul máak kaxan baʼateʼel ku kʼaabaʼtik Seba[eʼ]» le keretitaʼob yéetel le peletitaʼoboʼ maʼ tu pʼatoʼob Davidiʼ baʼaxeʼ tu yáantoʼob u xuʼuls tiʼ Seba (2 Sam. 20:1, 2, 7). Le ka taakchaj xan u chʼaʼabal u trono David tumen Adonías u hijoeʼ, le keretitaʼob yéetel le peletitaʼoboʼ maʼ tu xúumpʼattoʼob Davidiʼ. Letiʼobeʼ áantajnajoʼob utiaʼal ka u beetuba reyil Salomón, tumen u yojloʼob letiʼ yéeyaʼan tumen Jéeoba utiaʼal u jeelintik David (1 Rey. 1:24-27, 38, 39).
Uláakʼ juntúul j-táanxel luʼumil maʼ tu xúumpʼattaj Davideʼ Itaay, juntúul guitita. Letiʼ yéetel u 600 soldadoʼobeʼ maʼ tu pʼatoʼob David le ka líikʼ Absalón tu contraiʼ. Teʼ kʼiinoʼob jeʼeloʼ Absalóneʼ joʼopʼ u jach tratartik maʼalob le israelitaʼob utiaʼal ka beetaʼak reyiloʼ. David túuneʼ tu yaʼalaj tiʼ Itaayeʼ como j-táanxel luʼumileʼ maʼ u obligación u láakʼintik David teʼ baʼateloʼ. Chéen baʼaleʼ Itaayeʼ tu yaʼalajtiʼ: «¡Yuum rey, kin jurartik tu kʼaabaʼ Jéeoba, le Dios kuxaʼanoʼ, yéetel kin jurartik xan tu yoʼolal a kuxtaleʼ, teneʼ yaan in bin jeʼel tuʼuxak ka xiʼikecheʼ, teneʼ preparadoen utiaʼal in kíimil ta wéetel!» (2 Sam. 15:6, 18-21).
Itaayeʼ maʼ tu xúumpʼattaj David, le rey yéeyaʼan tumen Jéeobaoʼ
Le keretitaʼob, le peletitaʼob yéetel le guititaʼoboʼ kex j-táanxel luʼumiloʼobeʼ u yojloʼobeʼ Jéeoba u jaajil Dios yéetel ku respetarkoʼob David, le máax yéeyaʼan tumen Jéeobaoʼ. ¡Seguramente Davideʼ jach kiʼimakchaj u yóol tumen ichil u ejércitoeʼ yanchaj j-táanxel luʼumiloʼob jeʼex le tsʼoʼok k-aʼalikoʼ!
a Deuteronomio 23:3-6, ku yaʼalikeʼ «mix juntúul ammonita wa moabita jeʼel u páajtal u yantal ichil le máaxoʼob adorartik Jéeobaoʼ». Maʼ xaaneʼ lelaʼ u kʼáat u yaʼaleʼ maʼ tu páajtal kaʼach u beetkubaʼob israelitail mix u yantaltiʼob le derechoʼob yaan tiʼ le israelitaʼoboʼ. Chéen baʼaleʼ jeʼel u páajtal kaʼach u kajtaloʼob teʼ tuʼux yaan le israelitaʼoboʼ bey xan u biskubaʼob tu yéeteloʼob (ilawil Perspicacia para comprender las Escrituras teʼ jaats «Ammonitas», tsʼoʼoleʼ ka kaxtik le subtítulo «Se casan con israelitas»).
