Síijen 1955 yéetel teen u maas chichnil tiʼ óoxtúul paalaloʼob. Líikʼen tu noojolil Finlandia tiʼ junpʼéel kaaj ku kʼaabaʼtik Vantaa.

Le ka tu beetuba u testigo Jéeoba in maamaeʼ todavía maʼ síijkeniʼ. Chéen baʼaleʼ in papáeʼ tu tsʼáajuba tu contra yéetel tu prohibirtajtiʼ u tsʼáaiktoʼon xook yéetel le Bibliaoʼ bey xan u biskoʼon teʼ reuniónoʼoboʼ. Le oʼolal in maamaeʼ le kéen u yil maʼ kulaʼan in papáeʼ ku aprovechartik utiaʼal u kaʼanskoʼon yoʼolal Jéeoba.

Desde tin chan paalil ka tin chʼaʼtuklaj in meyajtik Jéeoba. Por ejemploeʼ le yaanten siete añosoʼ in maestraeʼ jach pʼuʼuji tumen maʼ tin wóotaj in jaant verilättyjä (junpʼéel waaj beetaʼan yéetel kʼiʼikʼ). Le maestraoʼ yéetel junpʼéel u kʼabeʼ tu yóotaj u jap in chiʼ, yéetel uláakʼ junpʼéeloʼ u chʼaʼamaj junpʼéel tenedor utiaʼal u yoksil le waaj tin chiʼoʼ. Chéen baʼaleʼ tin páaʼlajtaj u kʼabeʼ ka lúub le tenedoroʼ.

Doce años yaanten ka kíim in papá, le oʼolal páajchaj in bin teʼ reuniónoʼoboʼ. Le sukuʼunoʼoboʼ tu yeʼesoʼobten yaabilaj, leloʼ le áanten utiaʼal in progresar ichil u kaajal Jéeoba. Káaj in xokik sáamsamal le Bibliaoʼ bey xan in xakʼalxoktik le publicaciónoʼoboʼ. Tuláakal le baʼaloʼobaʼ le áanten utiaʼal in wokjaʼ 8 tiʼ agosto tiʼ 1969 le yaanten 14 añosoʼ.

 Ka tsʼoʼok in xook teʼ escuelaoʼ tin beetaj in precursor regularil. Maʼ xáanchajeʼ binen áantaj Pielavesi, junpʼéel chan kaaj yaan Finlandia.

Tu kaajil Pielavesi tin kʼaj óoltaj Sirkka, ka máan kʼiineʼ tsʼoʼok in beel tu yéetel. Jach utschaj tin wich tumen kabal u yóol yéetel jach espiritual. Letiʼeʼ kiʼimak u yóol kaʼach chéen yéetel le baʼax yaantiʼoʼ, maʼ u kʼáat u maasiliʼ. Tu kaʼatúulaloʼon taak k-maas meyajtik Jéeoba yéetel taak k-bin le tuʼux kun aʼalbiltoʼonoʼ. Tsʼoʼok k-beel 23 tiʼ marzo tiʼ 1974. Tu lugar k-bin luna de mieleʼ binoʼon áantaj Karttula, tuʼux maʼ yaʼab Testigoʼob yaniʼ.

Desde ka tsʼoʼok k-beeleʼ Jéeobaeʼ tu yeʼesajtoʼon yaan u tsʼáaik tuláakal baʼax kʼaʼabéettoʼon wa k-tsʼáaik táanil u Reino ichil k-kuxtal (Mat. 6:33). Por ejemploeʼ le tiaʼanoʼon kaʼach Karttulaoʼ minaʼan k-coche. Tu káajbaleʼ tiʼ bicicleta k-máan. Chéen baʼaleʼ tu kʼiiniloʼob keʼeleʼ maʼ tu páajtal k-jóokʼol. Como jach nojoch u territorioil le múuchʼuliloʼ kʼaʼabéettoʼon junpʼéel coche utiaʼal k-biniʼ. Pero minaʼantoʼon kaʼach u tojol utiaʼal k-manik.

Junpʼéel kʼiineʼ taal juntúul tiʼ in sukuʼunoʼob u xíimbaltoʼoneʼ ka tu yaʼalaj yaan u pʼatiktoʼon u coche yéetel maʼ kʼaʼabéetchaj k-boʼotik mix baʼaliʼ, mix u seguroil. Chéen kʼaʼabéet kaʼach k-tsʼáaik u gasolinail. Jeʼeloʼ hasta ka yanchaj k-coche.

Jéeobaeʼ jach claro u yeʼesik yaan u tsʼáaik tuláakal baʼax kʼaʼabéettoʼon. Chéen baʼax kʼaʼabéet kaʼach k-beetkeʼ k-tsʼáaik táanil u Reino ichil k-kuxtal.

Tu añoil 1978 le tiaʼanoʼon teʼ Escuela utiaʼal le Precursoroʼoboʼ, Raimo Kuokkanen, a juntúul tiʼ le instructoroʼoboʼ tu animartoʼon utiaʼal ka xiʼikoʼon tu Escuelail Galaad, le oʼolal káaj k-kanik inglés. Pero maʼ t-chupaj u solicitudiliʼ tumen tu añoil 1980, invitartaʼaboʼon ka xiʼikoʼon meyaj tu Betelil Finlandia. Teʼ kʼiinoʼob jeʼeloʼ le betelitaʼoboʼ maʼ tu páajtal kaʼach u binoʼob tu Escuelail Galaad. Toʼoneʼ deporsi k-chʼaʼtukultmaj k-bin le tuʼux ken u túuxtoʼon Jéeobaeʼ, maʼ le tuʼux k-kʼáat toʼoneʼ. Le oʼolal t-kʼamaj le invitaciónoʼ. Chéen baʼaleʼ seguernaj k-kanik inglés tumen wa maas táanil k-invitartaʼal tu Escuelail Galaadeʼ preparadoʼon utiaʼal k-biniʼ.

 Ka máan kʼiineʼ le Cuerpo Gobernanteoʼ tu yaʼaleʼ le betelitaʼoboʼ jeʼel u páajtal u binoʼob tu Escuelail Galaadeʼ. Toʼoneʼ tu séebaʼanil t-túuxtaj k-solicitud. U jaajileʼ jach kiʼimak k-óol k-meyaj Betel, chéen baʼaleʼ wa k-chupik u requisitosileʼ taak k-bin xan tuʼux maas kʼaʼabéet áantaj. Invitartaʼaboʼon tu Escuelail Galaad teʼ xook número 79, le graduaciónoʼ úuch septiembre tiʼ 1985. ¿A wojleʼex tuʼux túuxtaʼaboʼon? ¡Colombia!

Ka kʼuchoʼon Colombiaeʼ meyajnajoʼon teʼ sucursaloʼ. Tin tsʼáaj in wóol meyaj, pero le ka tu tsʼáaj junpʼéel añoeʼ tin wuʼuyaj kʼaʼabéet u kʼeʼexel le meyaj kin beetkoʼ. Yáax in kʼáatik ka kʼeʼexek in asignaciónoʼ. Ka túun túuxtaʼaboʼon k-beet k-misioneroil tu kaajil Neiva, tu estadoil Huila.

Deporsi jach uts tin wich in kʼaʼaytaj. Le tiaʼanen kaʼach Finlandia maʼ tsʼokaʼan in beel yéetel táan in beetik in precursoriloʼ, bul kʼiin táan in kʼaʼaytaj. Yéetel le táant u tsʼoʼokol in beel yéetel Sirkkaoʼ bul kʼiin táan xan k-kʼaʼaytaj. Yaan kʼiin xaneʼ le kéen xiʼikoʼon teʼ territorioʼob náach yaniloʼoboʼ k-pʼáatal wenel teʼ cocheoʼ utiaʼal maʼ k-bin yéetel k-suut, beyoʼ le kéen sáaschajkeʼ k-káajsik k-kʼaʼaytaj.

Jach kiʼimak k-óol ka túuxtaʼaboʼon k-beet k-misioneroil tumen kʼaʼajtoʼon le kiʼimak óolal k-uʼuyik le táan k-kʼaʼaytaj kaʼachoʼ. Le múuchʼuliloʼob tuʼux túuxtaʼaboʼonoʼ jujunpʼíitil nojochchajkoʼob, le sukuʼunoʼob yanoʼob Colombiaoʼ jach ku respetarkoʼob máak yéetel jach ku yeʼeskoʼob yaabilaj.

Naatsʼ tiʼ u kaajil Neivaeʼ yaan kaʼach yaʼab mejen kaajoʼob tuʼux minaʼan mix juntúul Testigoiʼ. Yoʼolal le guerrilleroʼoboʼ jach peligroso utiaʼal le máaxoʼob táanxel tuʼux u taaloʼoboʼ. ¿Bix túun ken u kan u jaajil le máakoʼobaʼ? Jach letiʼe baʼax kin sen tuklik kaʼachoʼ. Káaj in orar tiʼ Jéeoba utiaʼal in waʼaliktiʼ ka u beetuba Testigoil juntúul tiʼ le máaxoʼob ku taaloʼob tiʼ le mejen kaajoʼobaʼ, pero kajaʼan Neiva. Tin waʼalaj xan tiʼ Jéeobaeʼ le kéen tsʼoʼokok u yokjaʼeʼ ka yiijchajak u tuukul yéetel ka suunak tu kaajal utiaʼal u kʼaʼaytajiʼ. Tin tukleʼ letiʼe baʼax maas maʼalob jeʼel u yúuchloʼ, pero Jéeobaeʼ maas maʼalob baʼax u tukultmaj u beetik.

Maʼ xáanchajeʼ káaj in tsʼáaik xook tiʼ juntúul xiʼipal ku kʼaabaʼtik Fernando González, letiʼeʼ kajaʼan Algeciras, junpʼéel tiʼ le kaajoʼob tuʼux minaʼan kaʼach mix juntúul Testigooʼ. Letiʼeʼ cada semana ku bin meyaj kaʼach tu kaajil Neiva, utiaʼal leloʼ ku viajar maas tiʼ 50 kilómetros. Letiʼeʼ jach maʼalob u prepararkuba utiaʼal le xookoʼ, desde tu káajbal xaneʼ káaj u bin tiʼ tuláakal le reuniónoʼoboʼ. Desde le yáax semana ka káaj u xookoʼ, le kéen xiʼik tu kaajaleʼ ku muchʼik jujuntúul máakoʼob utiaʼal u kaʼansiktiʼob le baʼax ku kanikoʼ.

Fernandoeʼ okjaʼanaj enero tiʼ 1990, chéen seis meses káajak u xook ka okjaʼanaji yéetel tu séebaʼanil káaj u beetik u precursor regularil. Beoraaʼ yaan kaʼach juntúul Testigo Algeciras, le oʼolaleʼ le sucursaloʼ páajchaj u túuxtik precursor especialoʼob teʼ kaajoʼ. Febrero tiʼ 1992 ka yanchaj junpʼéel múuchʼuliliʼ.

 Fernandoeʼ maʼ pʼáat kʼaʼaytaj tu kaajil Algecirasiʼ. Ka tsʼoʼok u beel yéetel Olgaeʼ binoʼob áantaj San Vicente del Caguán, teʼ kaajoʼ minaʼan kaʼach mix juntúul Testigoiʼ. Letiʼobeʼ áantajnajoʼob utiaʼal u yantal junpʼéel múuchʼuliliʼ. Tu añoil 2002, tsʼaʼab u beet u circuitoiloʼob, tak bejlaʼa táan u beetkoʼob le meyajaʼ.

Le baʼax úuchoʼ ku yeʼesiktoʼon u kʼaʼanaʼanil k-jach aʼalik tiʼ Jéeoba le baʼaloʼob yaan yil yéetel k-asignaciónoʼoboʼ. Tumen letiʼeʼ ku páajtal u beetik baʼaloʼob maʼ tu páajtal k-beetiktoʼon. Jeʼex k-ojliloʼ Jéeoba u Yuumil le cosechaoʼ (Mat. 9:38).

Tu añoil 1990, tsʼaʼab in beet in superintendente viajanteil, le yáax tuʼux túuxtaʼaboʼon meyajoʼ Bogotá, u noj kaajil le luʼumiloʼ. Teen yéetel Sirkkaeʼ beyoʼon jeʼex u maasil máakoʼoboʼ. Tsʼoʼoleʼ maʼ suuk k-kajtal tiʼ junpʼéel nojoch kaajiʼ. Le oʼolal chan sajakchajoʼon ka túuxtaʼaboʼon Bogotá. Chéen baʼaleʼ Jéeobaeʼ tu béeykuntaj ichil k-kuxtal baʼax ku yaʼalik Filipenses 2:13: «Tumen Dioseʼ letiʼ muʼukʼaʼankúuntikeʼex ikil u tsʼáaikteʼex u tsʼíibolalil yéetel u páajtalil a beetkeʼex wa baʼax; letiʼeʼ bey uts tu tʼaan u beetkoʼ».

Ka tsʼoʼokeʼ kʼeʼex in circuito, túuxtaʼaben Medellín, le kaaj tin chʼaʼchiʼitaj tu káajbaloʼ. Teʼeloʼ le máakoʼoboʼ suukaʼan u yilkoʼob le baʼateʼel ku yúuchul teʼ calleʼoboʼ, hasta maʼatech u sajaktaloʼob. Kʼajaʼanten juntéenjeak táan in tsʼáaik xook tiʼ juntúul máakeʼ chéen ka káaj u waʼakʼal tsʼoonoʼob teʼ calleoʼ. Teneʼ taakchaj in pulkinba luʼum utiaʼal in defenderkinba, pero le máax kin tsʼáaik xook tiʼoʼ seguernaj u xook hasta bey mix baʼal ku yúuchleʼ. Le ka tsʼoʼokeʼ tu yaʼalajteneʼ yaan u jáan jóokʼol junsúutuk. Ka suunajeʼ tu taasaj kaʼatúul mejen paalal, yéetel tranquilamenteil tu yaʼalajten: «Disculparteniʼ kʼaʼabéetchaj in bin in chʼaʼa in mejen paalaloʼob».

Uláakʼ juntéeneʼ le táan k-kʼaʼaytaj joonaj joonajiloʼ chéen ka taal áalkabil in watan tin wiknal hasta sakpileʼen. Letiʼeʼ jach sajak ka tu yaʼalajten táan u tsʼoʼonol, teen xaneʼ sajakchajen. Tsʼoʼok ka t-ojéelteʼ maʼ letiʼ kaʼach ku tsʼoʼonoliʼ baʼaxeʼ letiʼe máax ku máan tu tséeloʼ.

Ka máan kʼiineʼ joʼopʼ u suuktal k-ilik le baʼaxoʼob ku yúuchloʼ. Le sukuʼunoʼob kajaʼanoʼob teʼeloʼ jach chúukaʼan u yóoloʼob yéetel muʼukʼaʼan u fejoʼob tiʼ Dios kex jach yaj baʼax ku yúuchloʼ. Kʼuchoʼon k-naʼateʼ wa letiʼob ku yáantaʼaloʼob tumen Jéeobaeʼ, letiʼeʼ yaan xan u yáantkoʼon. Mantatsʼ k-ilik xan k-beetik le baʼax ku yaʼalik le ancianoʼob teʼ múuchʼuliloʼoboʼ. U jaajileʼ k-kanáantikba tak tuʼux ku páajtal, pero u maasileʼ k-pʼatik tu kʼab Jéeoba.

Yaan kʼiineʼ k-tuklik bey táan u yúuchul baʼateleʼ, pero kéen k-tsʼáa cuentaeʼ maʼ beyoʼ. Juntéenjeak le bijaʼanoʼon xíimbal tiʼ junpʼéel najoʼ t-uʼuyaj bey táan u baʼateʼel kaʼatúul koʼoleloʼobeʼ, t-uʼuyaj bey táan u pochʼkubaʼob yéetel táan u yawattʼaanoʼobeʼ. Teneʼ maʼ jach taak kaʼach in jóokʼol in wil le baʼax ku yúuchloʼ, pero u yuumil le najoʼ tu yaʼalajten ka chʼeenebnaken ka in wile. Le ka chʼeenebnajeneʼ tin wilaj kaʼatúul mejen loroʼob táan u yawattʼaanoʼob jeʼex u beetik le vecinooʼ.

Tu añoil 1997, tsʼaʼab in beet in instructoril tiʼ le Escuela de Entrenamiento Ministerialo. b Jach uts tin tʼaan in táakpajal teʼ escuelaʼob ku tsʼaʼabal ichil u kaajal Diosoʼ. Chéen baʼaleʼ mix juntéen tin tuklaj wa yaan u tsʼaʼabalten u jatsʼuts privilegioil in kaʼansaj tiʼ junpʼéel tiʼ le escuelaʼobaʼ.

Ka tsʼoʼokeʼ tin beetaj xan in superintendenteil tiʼ distrito. Pero le ka xuʼul u yantal le distritoʼoboʼ tin chʼaʼjoʼoltaj in beetik in circuitoil. Beoraaʼ tsʼoʼok maas tiʼ 30 años káajak in beetik in instructoril bey xan in superintendenteil. Le meyaj kin beetkaʼ jach yaʼab bendiciónoʼob tsʼoʼok u tsʼáaikten, pero yaʼab baʼaxoʼob tsʼoʼok xan in aktáantik.

In wojel chan fuerte in carácter, pero leloʼ tsʼoʼok u yáantken in aktáant le problemas tsʼoʼok u yantaltenoʼ. Chéen baʼaleʼ tsʼoʼok xan u beetik in jach estrictotal le kéen in waʼal ka utskíintaʼak jujunpʼéel baʼaloʼob teʼ múuchʼuliloʼoboʼ. Por ejemploeʼ kin tsʼíikiltik le sukuʼunoʼob le kéen in waʼaltiʼob kʼaʼabéet u yeʼeskoʼob yaabilaj yéetel u naʼatkoʼob bix u yuʼubikuba le sukuʼunoʼoboʼ. Chéen baʼaleʼ jach letiʼe baʼax maʼ táan in beet xanoʼ (Rom. 7:​21-23).

Yaan kʼiineʼ jach ku lúubul in wóol yoʼolal bix in modos (Rom. 7:24). Juntéenjeak jach maʼ maʼalob bix in wuʼuyikinbaeʼ tin waʼalaj tiʼ Jéeoba maas maʼalob ka in pʼat in beetik in misioneroil yéetel maas maʼalob ka suunaken Finlandia. Chéen baʼaleʼ teʼ kʼiin jeʼeloʼ tiʼ junpʼéel reunióneʼ aʼalaʼab junpʼéel baʼal áanten utiaʼal in maʼ in pʼatik in asignación yéetel utiaʼal ka in wutskíintik in modos. Junpuliʼ maʼ ken in tuʼubs bix úuchik u núukik Jéeoba in oración. Jach kin tsʼáaik xan u graciasil tiʼ tumen yéetel yaabilaj ku yáantken in wutskíint le baʼaxoʼob kin beetkoʼ.

Jach k-tsʼáaik u graciasil tiʼ Jéeoba úuchik u yáantkoʼon k-meyajt teʼ asignaciónoʼob tsʼaʼabtoʼonoʼ. Jach kin tsʼáaik xan u graciasil tiʼ tumen tu tsʼáajten juntúul atantsil jach u yaabiltmen yéetel múul meyajnaj tin wéetel teʼ bukaʼaj años tsʼoʼok u máanoʼ.

Jach taʼaytak in cumplirtik 70 años. Maʼ tun xáantal ken xuʼuluk in beetik in instructoril yéetel in superintendenteil. Pero leloʼ maʼ tu beetik u lúubul in wóol. Tumen in wojel utiaʼal u alabartaʼal Jéeobaeʼ maʼ tsaaj u yantal tiʼ máak nukuch privilegioʼobiʼ. Le baʼax maas kʼaʼanaʼan u yilik letiʼoʼ ka k-meyajt yéetel kabal óolal bey xan ka k-alabart yéetel tuláakal k-puksiʼikʼal (Miq. 6:8; Mar. 12:​32-34).

Tsʼoʼok in disfrutartik jatsʼuts asignaciónoʼob. Le kéen in kʼaʼajs tuláakal le baʼax tsʼoʼok in beetkoʼ kin tsʼáaik cuentaeʼ páajchaj in beetik chéen yéetel u yáantaj Jéeoba. Maʼ tu páajtal in beetik mix baʼal wa maʼ tu yáantken, le oʼolal kin waʼalikeʼ le kéen in wuʼuy minaʼan in muukʼeʼ Dios tsʼáaik in muukʼ (2 Cor. 12:9).