1. ¿Baʼax le paraíso espiritualoʼ yéetel baʼax maʼ taak u beetik le máaxoʼob yanoʼob ichiloʼ?

 TEʼ KʼIINOʼOBAʼ yaan junpʼéel paraíso way Luʼumeʼ. Teʼelaʼ u millonesil máakoʼob kajaʼanoʼob ich jeetsʼeliliʼ yéetel maʼ taak u jóokʼloʼob teʼ paraísoaʼ. Tsʼoʼoleʼ letiʼobeʼ u kʼáatoʼob xan ka okok u maasil máakoʼobiʼ. ¿Tiʼ baʼax paraísoil táan k-tʼaan? ¡Tiʼ le paraíso espiritualoʼ! a

2. ¿Baʼaxten jach jatsʼuts le paraíso espiritualoʼ?

² ¿Baʼaxten jach jatsʼuts le paraíso espiritualoʼ? Tumen tiaʼan ichil junpʼéel yóokʼol kaab chuup yéetel kʼasaʼanil yéetel pʼektajileʼ. Jéeobaeʼ u yojel jach jeʼel u afectarkoʼon le baʼaxoʼob ku yúuchul way yóokʼol kaabeʼ (1 Juan 5:19; Apo. 12:12). Le oʼolal tu tsʼáaj junpʼéel lugar tuʼux jeʼel k-kanáantaʼaleʼ yéetel jeʼel u yáantkoʼon utiaʼal ka seguernak k-adorartik yéetel kiʼimak óolaleʼ. Le Bibliaoʼ ku yaʼalikeʼ le paraíso espiritualoʼ bey junpʼéel lugar «utiaʼal u taʼakikuba máak[eʼ]» yéetel «bey junpʼéel jardín maʼalob jóoyabtaʼanileʼ» (Isa. 4:6; 58:11). Le oʼolaleʼ kex jach yaj le kʼiinoʼob kuxlikoʼonaʼ le máaxoʼob yanoʼob teʼ paraísoaʼ kiʼimak u yóoloʼob (Isa. 54:14; 2 Tim. 3:1).

3. ¿Bix yáax béeychajik Isaías capítulo 65?

³ Teʼ Isaías 65, Jéeobaeʼ ku tsolik bix le paraíso espiritualoʼ. Le baʼax tu yaʼalaj profeta Isaíasoʼ yáax béeychaj teʼ año 537 táanil tiʼ u taal Jesúsoʼ. Teʼ kʼiinoʼoboʼ le judíoʼob arrepentirnajoʼoboʼ jáalkʼabtaʼaboʼob tumen Babilonia yéetel suunajoʼob tu kaajaloʼob. Yéetel u yáantaj Jéeobaeʼ tu jel líiʼsoʼob yéetel tu jatsʼutskíintoʼob u kaajil Jerusalén. Tsʼoʼoleʼ tu yutskíintoʼob le templo utiaʼal u kaʼa adorartaʼal chéen Jéeobaoʼ (Isa. 51:11; Zac. 8:3).

4. Le profecía ku yaʼalik Isaías capítulo 65, ¿bix u béeytal teʼ kʼiinoʼobaʼ?

 ⁴ Le profecía ku yaʼalik Isaías 65, ¿bix u béeytal teʼ kʼiinoʼobaʼ? Lelaʼ káaj u béeytal tu añoil 1919 le ka jáalkʼabtaʼab le máaxoʼob meyajtik Jéeoba tumen le Nojoch Babiloniaoʼ. Desde teʼ kʼiinoʼob jeʼeloʼ káaj u nojochtal le paraíso espiritual way Luʼumoʼ. Le sukuʼunoʼoboʼ jach tu tsʼáaj u yóol u meyajtoʼob Jéeoba, bey úuchik u yantal yaʼab múuchʼuliloʼoboʼ. Yaʼab xiiboʼob yéetel koʼoleloʼob jach kʼaas u modosoʼobeʼ tu kʼexaj bix u kuxtaloʼob yéetel tu búukintoʼob «le túumben modos beetaʼan jeʼex uts tu tʼaan Dioseʼ» (Efe. 4:24). U jaajileʼ yaʼab tiʼ le bendiciónoʼob tu yaʼalaj profeta Isaíasoʼ yaan u yilaʼal u béeytaloʼob teʼ túumben luʼumoʼ, pero kex beyoʼ bejlaʼeʼ ku páajtal k-disfrutartik yaʼab bendiciónoʼob. Koʼoneʼex ilik baʼax utsiloʼob ku taasiktoʼon le paraíso espiritualoʼ yéetel baʼaxten maʼ unaj k-jóokʼoliʼ.

LE BENDICIÓNOʼOB KU TAASIK LE PARAÍSO ESPIRITUALOʼ

5. Jeʼex u yaʼalik Isaías 65:​13, ¿baʼax bendicióniloʼob k-kʼamik ichil le paraíso espiritualoʼ?

⁵ Yaan yaʼab baʼal jaantbiliʼ. Le profeta Isaíasoʼ jach claro u yeʼesik u jelaʼanil bix u kuxtal le máaxoʼob yanoʼob teʼ paraíso espiritualoʼ yéetel le máaxoʼob minaʼanoʼob ichiloʼ (xok Isaías 65:13). Jéeobaeʼ ku tsʼáaik tuláakal le baʼaxoʼob kʼaʼabéet tiʼ le máaxoʼob meyajtikoʼ. Ku tsʼáaiktoʼon u espíritu santo, le Bibliaoʼ yéetel yaʼab janal espiritual (ket yéetel Apocalipsis 22:17). Pero le máaxoʼob minaʼanoʼob ichil le paraíso espiritualoʼ minaʼan le baʼaxoʼob kʼaʼabéettiʼoboʼ. Minaʼan baʼal u jaantoʼob, minaʼan jaʼ u yukʼoʼob yéetel tiaʼanoʼob ich suʼtsilileʼ (Amós 8:11).

6. ¿Baʼax jaanliloʼob ku chʼaʼchiʼitaʼal teʼ Joel 2:​21-24, yéetel baʼax utsiloʼob ku taasiktoʼon?

⁶ Tiʼ junpʼéel profecíaeʼ profeta Joeleʼ tu yaʼaleʼ Jéeobaeʼ yaan u tsʼáaik yaʼab janal tiʼ le máaxoʼob meyajtikoʼ. Tu yaʼaleʼ yaan u tsʼáaik vino yéetel aceite de oliva tiʼob. Lelaʼ u kʼáat u yaʼaleʼ Jéeobaeʼ yaan u tsʼáaik tuláakal le baʼax kʼaʼabéet tiʼ u kaajaloʼ tak le janal espiritualoʼ (Joel 2:​21-24). ¿Bix u tsʼáaik Jéeoba le baʼax kʼaʼabéet tiʼ u kaajal teʼ kʼiinoʼobaʼ? Letiʼeʼ ku tsʼáaik le Bibliaoʼ, le publicaciónoʼoboʼ, le reuniónoʼoboʼ, le asambleaʼoboʼ bey xan le sitio ich Internetoʼ. Wa sáamsamal ka wilik a jóoʼsik u yutsil le baʼaloʼobaʼ yaan u muʼukʼaʼantal a fe yéetel yaan u kiʼimaktal a wóol ikil a meyajtik Dios.

7. ¿Baʼaxten jach kiʼimak u yóol le máaxoʼob meyajtik Jéeobaoʼ? (Isaías 65:14).

⁷ Jach kiʼimak k-óol. Le máaxoʼob meyajtik Diosoʼ ku «yawatoʼob yéetel kiʼimak óolal» tumen jach uts tu tʼaan u meyajtikoʼob Jéeoba (xok Isaías 65:14). ¿Baʼaxten bey u yuʼubikubaʼoboʼ? Tumen tsʼoʼok u kankoʼob u jaajil teʼ Bibliaoʼ yéetel jach ku líiʼsaʼal u yóoloʼob tumen le promesaʼob ku yaʼalikoʼ. Tsʼoʼoleʼ yoʼolal le u kuxtal Jesús tu kʼuboʼ yaantiʼob junpʼéel jatsʼuts esperanza. ¡Letiʼobeʼ jach ku kiʼimaktal u yóoloʼob le kéen u tsikbaltoʼob yéetel le sukuʼunoʼob le baʼaloʼobaʼ! (Sal. 34:8; 133:​1-3).

8. ¿Máakalmáak le kaʼapʼéel baʼaloʼob maases ku yilaʼal ichil le paraíso espiritualoʼ?

⁸ Le kaʼapʼéel baʼaloʼob maases ku yilaʼal ichil le paraíso espiritualoʼ letiʼe yaabilajoʼ bey xan le bix k-múuchʼ meyajtik Jéeobaoʼ. Le yaabilaj jeʼelaʼ «jach tu jaajil ku muchʼik máak», le oʼolal ku yáantkoʼon k-il bix le kuxtal kun antal teʼ túumben luʼumoʼ. Teʼeloʼ le máaxoʼob meyajtik Jéeobaoʼ maas yaan u yeʼeskoʼob yaabilaj yéetel maas yaan u múuchʼ antaloʼob (Col. 3:14). Juntúul kiikeʼ ku yaʼalik bix tu yuʼubiluba le ka tu kʼaj óoltaj le Testigoʼoboʼ. Ku yaʼalik: «Teneʼ jach maʼ kiʼimak in wóol kaʼachiʼ, mix yéetel in familia. Le ka tin kʼaj óoltaj le Testigoʼoboʼ bey úuchik in wilik bix u yeʼesaʼal yaabilajoʼ». Le  beetik tuláakal le máaxoʼob u kʼáatoʼob ka kiʼimakchajak u yóoloʼob yéetel ka u yuʼuboʼob yaabiltaʼanoʼoboʼ kʼaʼabéet u yookloʼob ichil le paraíso espiritualoʼ. Kex jeʼel baʼaxak ka aʼalaʼak t-oʼolaleʼ maʼalob yanil k-kʼaabaʼ tu táan Jéeoba bey xan ichil u kaajal (Isa. 65:15).

9. Jeʼex u yaʼalik Isaías 65:​16, 17, ¿baʼax kun úuchul yéetel le baʼaxoʼob beetik k-muʼyajoʼ?

⁹ K-uʼuyikba tranquiloil. Isaías 65:​14, ku yaʼalik bix yanil le máakoʼob maʼ tu yookloʼob ichil le paraíso espiritualoʼ, ku yaʼalik: «Teʼexeʼ yaan a waawteʼex tumen yaj yanil a puksiʼikʼaleʼex, yéetel yaan a wáakameʼex tumen yaachajaʼan a wóoleʼex». Kux túun le máaxoʼob meyajtik Jéeobaoʼ, ¿bix yaniloʼob? ¿Baʼax kun úuchul yéetel le baʼaxoʼob beetik k-muʼyajoʼ? Jéeobaeʼ ku yaʼalik: «Yaan u tuʼubsaʼal le yaayaj baʼaloʼob uchaʼanoʼ. Le baʼaloʼobaʼ maʼ kun kaʼa ilbil tumen in wichoʼob» (xok Isaías 65:​16, 17). Jéeobaeʼ yaan u beetik u xuʼulul tuláakal le problemas yéetel le baʼaxoʼob beetik k-muʼyajoʼ, hasta mix kun kʼaʼajsbiloʼob.

10. ¿Baʼaxten junpʼéel nojoch bendición k-antal ichil u kaajal Jéeoba? (Ilawil xan le fotooʼ).

¹⁰ Tak teʼ kʼiinoʼobaʼ k-uʼuyik kanáantaʼanoʼon yéetel tranquilo yaniloʼon le kéen xiʼikoʼon teʼ muchʼtáambaloʼoboʼ tumen teʼeloʼ maʼ t-tuukul tiʼ le baʼaloʼob kʼaastak ku yúuchul teʼ yóokʼol kaabaʼ. ¿Bix jeʼel k-áantaj utiaʼal ka seguernak u yuʼubikuba máak jach maʼalobil ichil le paraíso espiritualoʼ? Letiʼe kéen k-eʼes le jatsʼuts modos ku taal tiʼ le espíritu santooʼ jeʼex yaabilaj, kiʼimak óolal, jeetsʼelil, paciencia, utsil puksiʼikʼal yéetel utsil (Gál. 5:​22, 23). Jach junpʼéel nojoch bendición k-antal ichil u kaajal Jéeoba. Tsʼoʼoleʼ wa maʼ t-jóokʼol teʼ paraíso espiritualoʼ yaan u páajtal k-ilik u béeykuntik Jéeoba le promesa jeʼelaʼ: «Teneʼ táan in beetik túumben kaʼan yéetel túumben luʼum».

11. Jeʼex u yaʼalik Isaías 65:​18, 19, ¿bix unaj u yuʼubikuba máak ikil u yantal teʼ paraíso espiritualoʼ?

¹¹ Jach táaj kiʼimak k-óol yéetel k-tsʼáaik u graciasil ikil k-antal ichil u kaajal Jéeoba. Isaíaseʼ ku tsolik baʼaxten unaj u kiʼimaktal k-óol ikil k-antal ichil le paraíso espiritualoʼ. Le paraísoaʼ Jéeoba beetmil (xok Isaías 65:​18, 19). Letiʼeʼ u kʼáat ka k-áant le máakoʼob utiaʼal ka jóokʼkoʼob teʼ religiónoʼob maʼ tu kaʼanskoʼob u jaajiloʼ yéetel ka ookkoʼob teʼ paraíso espiritualoʼ. Toʼoneʼ jach kiʼimak k-óol k-antal ichil u jaajil le oʼolal k-kʼáat k-tsikbalt tiʼ u maasil le jatsʼuts bendiciónoʼob táan k-kʼamkoʼ (Jer. 31:12).

12. ¿Bix a wuʼuyikaba le kéen a xok le promesaʼob ku yaʼalik Isaías 65:​20-24, yéetel baʼaxten bey a wuʼuyikabaoʼ?

¹² Le máaxoʼob yanoʼob ichil le paraíso espiritualoʼ jach kiʼimak u yóoloʼob yoʼolal le jatsʼuts esperanza yaantiʼoboʼ. Chéen máans ta  tuukul tuláakal le baʼax kun páajtal u beetik máak teʼ túumben luʼumoʼ. Le Bibliaoʼ ku yaʼalik: «Teʼeloʼ yaan u pʼáatal maʼ chéen junpʼíit u kʼiiniloʼob u kuxtal le mejen paalaloʼ, le chʼijaʼanoʼoboʼ maʼ kun pʼáatal maʼ u chúukbesikoʼob u kʼiiniloʼob u kuxtaloʼob». Tsʼoʼoleʼ ku yaʼalikeʼ le máakoʼoboʼ «yaan u beetik u yotochoʼob yéetel letiʼob kun kajtaloʼobiʼ, letiʼobeʼ yaan u pakʼikoʼob uva yéetel letiʼob kun jaantik u yich». Tsʼoʼoleʼ ku yaʼalikeʼ le máakoʼoboʼ «maʼ chéen kunel ken u tsʼáa u yóoloʼob meyajiʼ». Jéeobaeʼ ku prometerkeʼ yaan u yantal u biilal u kuxtal máak, tumen «maʼiliʼ u kʼáatoʼob junpʼéel baʼaleʼ» letiʼeʼ u yojel baʼax kʼaʼabéet tiʼ wíinik yéetel yaan u tsʼáaik baʼax ku tsʼíiboltik tuláakal baʼal kuxaʼan (Isa. 65:​20-24; Sal. 145:16).

13. Jeʼex u yaʼalik Isaías 65:​25, ¿baʼax kʼeexiloʼob unaj u beetik máak ichil u kuxtal utiaʼal ka u meyajt Jéeoba?

¹³ Kuxaʼanoʼon ich jeetsʼelil. Le espíritu santooʼ tsʼoʼok u yáantik yaʼab máakoʼob beyoʼob tsʼíitsʼik baʼalcheʼob utiaʼal ka u kʼex u modosoʼobeʼ (xok Isaías 65:25). Letiʼobeʼ tsʼoʼok u pitkoʼob le úuchben modos yaantiʼoboʼ ka tu búukintoʼob junpʼéel túumbeniʼ (Rom. 12:2; Efe. 4:​22-24). Letiʼobeʼ láayliʼ kʼebanoʼobeʼ le oʼolal yaan horaeʼ ku beetkoʼob baʼaloʼob maʼ maʼalobtakiʼ. Kex beyoʼ Jéeobaeʼ tsʼoʼok u muchʼik «tuláakal u jejeláasil máakoʼob» yaanal tuʼux u taaloʼob utiaʼal ka kuxlakoʼob ich jeetsʼelil bey xan ka u yeʼesoʼob yaabilaj tu baatsiloʼob (Tito 2:11). ¡Chéen Jéeoba jeʼel u páajtal u beetik junpʼéel baʼal beyaʼ!

14. ¿Bix úuchik u béeytal Isaías 65:25 ichil u kuxtal juntúul sukuʼun?

¹⁴ ¿Jach wa tu jaajil jeʼel u páajtal u kʼexik u modos máakeʼ? Koʼoneʼex ilik junpʼéel ejemplo eʼesik jeʼel u béeytaleʼ. Juntúul xiʼipal yaan 20 años tiʼeʼ jach kʼaas u modos kaʼachi yéetel jach ku núupkʼebantal. Letiʼeʼ yaʼab u téenel oksaʼab cárcel tumen tu yoklaj cocheʼob yéetel tu beetaj uláakʼ baʼaloʼob kʼaastak. Tsʼoʼoleʼ mantatsʼ kaʼach táan u kaxtik baʼateʼel. Chéen baʼaleʼ desde ka tu yáax uʼuyaj baʼax ku yaʼalik le Biblia yéetel ka káaj u bin muchʼtáambaloʼ jach jatsʼuts tu yilil le baʼax ku kanikoʼ yéetel yanchaj u biilal u kuxtal. Beoraaʼ letiʼeʼ taak u pʼáatal ichil le paraíso espiritualoʼ. Le ka tsʼoʼok u yokjaʼ le xiʼipalaʼ yaʼab u téenel tu máansaj tu tuukul bix úuchik u béeytal ichil u kuxtal Isaías 65:25. Letiʼeʼ bey juntúul tsʼíitsʼik león kaʼacheʼ, pero suunaj juntúul chan taman.

15. ¿Baʼaxten taak k-áantik u maasil utiaʼal ka ookkoʼob teʼ paraíso espiritualoʼ, yéetel bix jeʼel k-beetkeʼ?

¹⁵ Isaías 65:​13, ku káajal yéetel le tʼaanoʼobaʼ: «Jéeoba, le máax yaan tuláakal autoridad tiʼoʼ ku yaʼalik». Le versículo 25, bey u tsʼoʼokolaʼ: «Leloʼ Jéeoba aʼalik». U jaajileʼ tuláakal le baʼax ku prometertik Jéeobaoʼ ku láaj béeytal (Isa. 55:​10, 11). Por ejemploeʼ le baʼaloʼob tu yaʼalaj yoʼolal le paraíso espiritualoʼ tsʼoʼok u béeytaloʼob. Kex kuxaʼanoʼon tiʼ junpʼéel yóokʼol kaab jach kʼaaseʼ, toʼoneʼ tiaʼanoʼon tiʼ junpʼéel lugar tuʼux yaan jeetsʼelil yéetel tuʼux k-kanáantaʼaleʼ (Sal. 72:7). Yoʼolal leloʼ taak xan k-áantik uláakʼ máakoʼob utiaʼal ka ookkoʼob teʼ paraísoaʼ. ¿Bix jeʼel k-beetkeʼ? Letiʼe kéen k-tsʼáa k-óol k-beet discípuloʼoboʼ (Mat. 28:​19, 20).

¿BIX JEʼEL K-ÁANTIK LE MÁAKOʼOB UTIAʼAL KA OOKKOʼOB TEʼ PARAÍSO ESPIRITUALOʼ?

16. ¿Baʼax jeʼel u beetik u taaktal u yokol le máakoʼob ichil le paraíso espiritualoʼ?

¹⁶ Utiaʼal ka u tsʼíibolt le máakoʼob u yokloʼob teʼ paraíso espiritualoʼ yaan baʼax kʼaʼabéet k-beetik utiaʼal ka maas jatsʼutschajak. ¿Baʼax túun jeʼel k-beetkeʼ? Unaj k-seguertik u ejemplo Jéeoba. Letiʼeʼ maʼ tu obligartik mix máak utiaʼal ka okok teʼ paraísoaʼ. Baʼaxeʼ yéetel yaabilaj ku natsʼik máak tu yiknal (Juan 6:44; Jer. 31:3). Le máaxoʼob ku kʼuchul u kʼaj óoltoʼob Jéeobaoʼ ku tsʼáaikoʼob cuentaeʼ letiʼeʼ  jach táaj uts u modos. Yoʼolal leloʼ ku pʼáatloʼob tu yiknal. ¿Baʼax jeʼel u páajtal k-beetik utiaʼal ka maas jatsʼutschajak k-modos yéetel utiaʼal ka k-maas natsʼ le máakoʼob ichil u kaajal Jéeobaoʼ?

17. ¿Baʼax jeʼel u páajtal k-beetik utiaʼal ka taakchajak u yokol u maasil máakoʼob teʼ paraíso espiritualoʼ?

¹⁷ Junpʼéel bix jeʼel k-áantaj utiaʼal ka taakchajak u yokol le máakoʼob teʼ paraíso espiritualoʼ letiʼe kéen k-tratart yéetel yaabilaj bey xan yéetel utsil le sukuʼunoʼoboʼ. Lelaʼ maʼ xaaneʼ bey úuchik yéetel le máaxoʼob maʼ tu adorarkoʼob Dios káaj u binoʼob teʼ muchʼtáambaloʼob ku beetaʼal kaʼach tu kaajil Corintooʼ. Letiʼobeʼ tu yaʼaloʼob: «Dioseʼ jach tu jaajil tiaʼan ichileʼexeʼ» (1 Cor. 14:​24, 25; Zac. 8:23). Toʼoneʼ jach k-kʼáat xan ka aʼalaʼak t-oʼolal leloʼ, le oʼolal jach kʼaʼabéet k-tsʼáaik ichil k-kuxtal le consejoaʼ: «Ilawileʼex a kuxtaleʼex ich jeetsʼelil ta baatsileʼex» (1 Tes. 5:13).

18. ¿Baʼax jeʼel u beetik u taaktal u yokol le máakoʼob ichil u kaajal Jéeobaoʼ?

¹⁸ Kʼaʼabéet k-beetik tuláakal le ku páajtal utiaʼal k-ilik le sukuʼunoʼob jeʼex u yilaʼaloʼob tumen Jéeobaoʼ. Kʼaʼabéet xan k-chʼíikil k-il u jatsʼuts modosoʼob maʼ le baʼaloʼob maʼ maʼalob ku beetkoʼoboʼ. Kʼaʼajaktoʼoneʼ maʼ tun xáantaleʼ le baʼaloʼob maʼ maʼalobtak ku beetkoʼoboʼ yaan u xuʼululoʼob. Tsʼoʼoleʼ wa ku yantal problemaseʼ le yaabilajoʼ le kun áantkoʼon utiaʼal ka k-utskíinte. Le Bibliaoʼ ku yaʼalik: «Eʼes a wutsileʼex ta baatsileʼex, paklan chʼaʼ óotsiltabaʼex yéetel paklan perdonartabaʼex tu jaajil a wóoleʼex» (Efe. 4:32). Tuláakal le máaxoʼob ku tsʼíiboltikoʼob ka tratartaʼakoʼob yéetel yaabilajoʼ yaan u taaktal u yokloʼob teʼ paraíso espiritualoʼ. b

 MAʼ A JÓOKʼOL TEʼ PARAÍSO ESPIRITUALOʼ

19. 1) ¿Baʼax tsʼoʼok u yaʼalik jujuntúul máakoʼob suunajoʼob ichil le paraíso espiritualoʼ? (Ilawil le cuadro « Binoʼob, pero kaʼa suunajoʼob»). 2) ¿Baʼax kʼaʼabéet k-chʼaʼtuklik k-beetik? (Ilawil xan le dibujooʼ).

¹⁹ Jach kiʼimak k-óol k-antal teʼ paraíso espiritualoʼ. Bejlaʼeʼ maas jach táaj jatsʼuts yéetel maas yaʼab máakoʼob yaniʼ. K-tsʼáaik u graciasil tiʼ Jéeoba úuchik u beetik le paraísoaʼ. Tuláakal le máaxoʼob u kʼáatoʼob ka kiʼimakchajak u yóoloʼob, u kʼáat u yuʼububaʼob tranquiloʼob yéetel kanáantaʼanoʼobeʼ kʼaʼabéet u yookloʼobiʼ, yéetel maʼ unaj u jóokʼloʼobiʼ. Chéen baʼaleʼ kʼaʼabéet xan k-kanáantikba utiaʼal maʼ k-tuʼusul tumen Satanás tumen letiʼeʼ u kʼáat ka jóokʼkoʼon teʼ paraísoaʼ (1 Ped. 5:8; Apo. 12:9). Maʼ unaj k-chaʼiktiʼiʼ. Kʼaʼabéet k-chʼaʼtuklik k-beetik tuláakal le baʼax yaan t-kʼab utiaʼal ka seguernak u jatsʼutstal bey xan utiaʼal ka seguernak u yantal jeetsʼelil ichil paraíso espiritualoʼ.