Teʼ xookoʼ t-kaneʼ le baʼax maas kʼaʼanaʼan utiaʼal wíinik bey xan utiaʼal le ángeloʼoboʼ letiʼe u santificartaʼal u kʼaabaʼ Diosoʼ. Ichil lelaʼ táakaʼan u yilaʼal wa Jéeobaeʼ maʼalob bix u gobernar bey xan u yilaʼal wa jeʼel u chúukpajal u yóol wíinik tiʼ Dioseʼ.

¿Baʼaxten túun beoraaʼ ku yaʼalaʼaleʼ maas kʼaʼanaʼan u santificartaʼal u kʼaabaʼ Jéeoba? Koʼox ilik óoxpʼéel baʼaloʼob eʼesik.

Yáaxeʼ tu jardínil Edéneʼ, Satanáseʼ tu pʼataj kʼaasil u kʼaabaʼ Dios. Yéetel le baʼax tu yaʼalaj tiʼ Evaoʼ tu tsʼáaj naʼatbileʼ Dioseʼ kʼasaʼan, jach estricto yéetel ku tuus. Letiʼeʼ bey úuchik u pʼatik kʼaasil u kʼaabaʼ Diosoʼ yéetel suunaj Kʼaasilbaʼal, lelaʼ u kʼáat u yaʼal j-Líiʼsaj Tʼaan (Juan 8:44). Como tu creertaj Eva le baʼax tu yaʼalaj Satanásoʼ maʼ tu yuʼubaj u tʼaan Diosiʼ yéetel tu tsʼáajuba tu contra u gobernación (Gén. 3:1-6). Teʼ kʼiinoʼobaʼ Satanáseʼ láayliʼ táan u pʼatik kʼaasil u kʼaabaʼ Dioseʼ tumen ku beetik u tuklaʼal kʼasaʼan. Le oʼolal yaʼab máakeʼ maʼ taak u beetik baʼax ku yaʼalik Diosiʼ tumen ku creerkoʼob le baʼax ku yaʼalik le Kʼaasilbaʼaloʼ. Le máaxoʼob meyajtik Diosoʼ jach ku yaatal u yóoloʼob ken u yiloʼob bix tsʼoʼok u pʼaʼatal kʼaasil u kʼaabaʼ Dios, tumen yoʼolal leloʼ jach yaʼab máak táan u muʼyaj yéetel jach yaan kʼasaʼanil way yóokʼol kaabeʼ.

U kaʼapʼéeleʼ Jéeobaeʼ u chʼaʼtukultmaj u santificartik u kʼaabaʼ utiaʼal u yutsil wíinik bey xan le ángeloʼoboʼ. Letiʼeʼ jach kʼaʼanaʼan u yilik leloʼ, le oʼolal ku yaʼalik: «Teneʼ jach tu jaajil yaan in santificartik [...] in kiʼichkelem kʼaabaʼ» (Eze. 36:23). Tsʼoʼoleʼ tu oraciónil le padrenuestrooʼ Jesúseʼ tu yaʼalaj xan: «Santificartaʼak a kʼaabaʼ». Beyoʼ tu yeʼeseʼ kéen orarnakoʼoneʼ kʼaʼabéet k-kʼáatik ka limpiokíintaʼak u kʼaabaʼ Dios (Mat. 6:9). Le Bibliaoʼ yaʼab u téenel ku yaʼalik kʼaʼabéet u santificartaʼal u kʼaabaʼ Jéeoba. Koʼox ilik jujunpʼéel tekstoʼob eʼesik. «Alabarteʼex Jéeoba tu yoʼolal u kiʼichkelem kʼaabaʼ» (1 Cró. 16:29; Sal. 96:8). «Kʼaayneneʼex utiaʼal a alabarkeʼex u kiʼichkelem kʼaabaʼ» (Sal. 66:2). «Mantatsʼ ken in alabart a kʼaabaʼ» (Sal. 86:12). Tsʼoʼoleʼ juntéenjeak le tiaʼan Jesús tu temploil Jerusalénoʼ tu yaʼalaj tiʼ u Taata: «Beet u alabartaʼal a kʼaabaʼ». Jéeoba túuneʼ tu núukajtiʼ: «Tsʼoʼok in beetik u alabartaʼal, yéetel yaan in beetik u alabartaʼal tu kaʼatéen» (Juan 12:28). a

U yóoxpʼéeleʼ Jéeobaeʼ u kʼáat ka alabartaʼak u kʼaabaʼ utiaʼal mantatsʼ. Tuukulnakoʼon tiʼ bix kun pʼáatal u kʼaabaʼ Jéeoba le kéen tsʼoʼokok le Mil Años kun reinar Cristooʼ yéetel le kéen tsʼoʼokok le u tsʼook pruebaoʼ. ¿Yaan wa u seguer u tuklik wíinik bey xan le ángeloʼob láayliʼ kʼaʼabéet u santificartaʼal u kʼaabaʼ Dioseʼ? Utiaʼal k-ojéeltikeʼ koʼox kʼaʼajsik le kaʼapʼéel baʼax táakaʼanoʼ: wa maʼalob u gobernar Jéeoba bey xan wa jeʼel u chúukpajal u yóol wíinik tiʼ Dioseʼ. U jaajileʼ  kéen tsʼoʼokok le Mil añosoʼ maʼ tun kʼaʼabéettal u yeʼesik wíinik wa yaan u chúukpajal u yóol tiʼ Dios. ¿Baʼaxten? Tumen yaan u pʼáatloʼob perfectoil, tsʼokaʼaniliʼ u máanskoʼob le u tsʼook pruebaoʼ yéetel maʼ tun kíimloʼob. ¿Láayliʼ wa túun yaan u kʼaʼabéettal u yilaʼal wa maʼalob bix u gobernar Jéeobaeʼ? Maʼatech, tumen teʼ kʼiinoʼoboʼ le ángeloʼob bey xan wíinikeʼ yaan u yilkoʼob maʼalob bix u gobernar. U kʼaabaʼ Jéeobaeʼ yaan u pʼáatal santoil yéetel mix máak kun pʼatik kʼaasil tu kaʼatéen.

Chéen baʼaleʼ teʼ kʼiinoʼoboʼ u kʼaabaʼ Jéeobaeʼ láayliʼ jach kʼaʼanaʼan kun ilbil tumen le máaxoʼob meyajtik teʼ kaʼan bey xan way Luʼumeʼ. ¿Baʼaxten? Tumen Jéeobaeʼ yaan u seguer u beetik baʼaloʼob jach jatsʼutstak tu yoʼolaloʼob. Por ejemploeʼ Jesúseʼ yaan u kʼubik le Reino tiʼ u Taataoʼ «utiaʼal beyoʼ chéen Dios ka gobernarnak» (1 Cor. 15:28). Kéen tsʼoʼokkeʼ le máaxoʼob kun pʼáatloʼob kajtal way Luʼumeʼ «yaan u yantaltiʼob u kiʼichkelem jáalkʼabtajil u paalal Dios» (Rom. 8:21). Bey túunoʼ Jéeobaeʼ yaan u béeykuntik le baʼax u tukultmaj tu káajbaloʼ, yaan u muchʼik tuláakal u familia yaan teʼ kaʼanoʼ yéetel le yaan way Luʼumeʼ (Efe. 1:10).

¿Baʼax túun ken u beet u familia Jéeoba kéen úuchuk lelaʼ? Le ángeloʼob yéetel le máaxoʼob yanoʼob way Luʼumeʼ yaan u tsʼíiboltkoʼob u seguer u alabarkoʼob u kiʼichkelem kʼaabaʼ Jéeoba. Davideʼ tu tsʼíibtaj: «Alabartaʼak Jéeoba Dios […]. Mantatsʼ ka alabartaʼak u kiʼichkelem kʼaabaʼ» (Sal. 72:18, 19). Mantatsʼ kun antal baʼax oʼolal k-alabartik u kʼaabaʼ Jéeoba.

U kʼaabaʼ Jéeobaeʼ ku yeʼesik jach bix letiʼ. Le oʼolal le kéen aʼalaʼak u kʼaabaʼeʼ ku taal k-tuukul le nojoch yaabilaj ku yeʼesikoʼ (1 Juan 4:8). Teʼ Paraísooʼ mantatsʼ ken k-kʼaʼajseʼ yoʼolal u yaabilajeʼ Jéeobaeʼ tu beetoʼon, tu kʼubaj u Hijo t-oʼolal yéetel tu yeʼesaj jach maʼalob u gobernar. Tsʼoʼoleʼ mantatsʼ ken k-il bix u bendecirtik le máaxoʼob meyajtikoʼ. Mix bikʼin kun xuʼulul k-natsʼikba yiknal Jéeoba yéetel yaan k-kʼaay mantatsʼ utiaʼal k-alabartik u kʼaabaʼ (Sal. 73:28).