1, 2. 1) ¿Bix u yilik Jéeoba u beetaʼal baʼax kʼaas? 2) ¿Baʼax u kʼáat Jéeoba ka u beet le máaxoʼob tsʼoʼok u kʼebantaloʼoboʼ?

 JÉEOBAEʼ u pʼeek u beetaʼal baʼax kʼaas (Sal. 5:​4-6). Letiʼeʼ u kʼáat ka k-tsʼáa ichil k-kuxtal baʼax ku yaʼalik le Bibliaoʼ. Chéen baʼaleʼ u yojel kʼeban máakoʼon, le oʼolal maʼ tu páajtal k-beetik tuláakal baʼal perfecto (Sal. 130:​3, 4). Jéeobaeʼ u pʼekmaj le j-kʼasaʼan máakoʼob «ku meyajtiʼob u yutsil k-Dios utiaʼal u yaʼalikoʼob maʼ kʼaas le kuxtal ku biskoʼob ichil x-maʼ suʼtaliloʼ» (Jud. 4). Le Bibliaoʼ ku yaʼalikeʼ yaan «u xuʼulsaʼal tiʼ le kʼasaʼan máakoʼob» teʼ Armagedónoʼ, u guerra Dios (2 Ped. 3:7; Apo. 16:16).

² Jéeobaeʼ maʼ u kʼáat ka xuʼulsaʼak tiʼ mix máakiʼ. Jeʼex tsʼoʼok k-ilik teʼ revistaaʼ Jéeobaeʼ «u kʼáat ka u kʼex u tuukul tuláakal máak»(2 Ped. 3:9). Le ancianoʼoboʼ ku yeʼeskoʼob paciencia jeʼex Jéeoba le kéen u yáantoʼob juntúul máak tsʼoʼok u kʼebantal utiaʼal u kaʼa náatsʼal yiknal Jéeobaoʼ. Pero maʼ tuláakal le máaxoʼob ku kʼebantaloʼob ku arrepentiroʼoboʼ (Isa. 6:9). Yaan tiʼ letiʼobeʼ kex taak u yáantaʼaloʼob tumen le ancianoʼoboʼ maʼ tu xuʼulul u beetkoʼob baʼaloʼob kʼaastak. ¿Baʼax jeʼel u beetik le ancianoʼob kéen úuchuk beyaʼ?

‹JÓOʼSEʼEX LE KʼASAʼAN MÁAKOʼ›

3. 1) ¿Baʼax ku yaʼalik le Biblia unaj u beetaʼal tiʼ le máaxoʼob maʼ tu arrepentiroʼoboʼ? 2) ¿Baʼaxten k-aʼalikeʼ le máax ku kʼebantal yéetel maʼ tu arrepentiroʼ letiʼ decidirtik ka jóoʼsaʼak teʼ múuchʼuliloʼ?

³ Wa le máax kʼebanchajaʼan maʼ tu arrepentiroʼ le ancianoʼoboʼ kʼaʼabéet u beetkoʼob baʼax ku yaʼalik 1 Corintios 5:13: «Jóoʼseʼex le kʼasaʼan máak ichileʼexoʼ». Le kʼasaʼan máakoʼ u  yojel wa maʼ tu arrepentireʼ yaan u jóoʼsaʼal teʼ múuchʼuliloʼ, le oʼolal jeʼel u páajtal k-aʼalikeʼ wa ku jóoʼsaʼaleʼ, letiʼ decidirte. Letiʼeʼ chéen táan u jochik le baʼax tu pakʼoʼ (Gál. 6:7). ¿Baʼaxten k-aʼalik leloʼ? Tumen kex tsʼoʼok u sen áantaʼal tumen le ancianoʼoboʼ letiʼeʼ maʼ u kʼáat arrepentiriʼ (2 Rey. 17:​12-15). Yéetel le baʼaxoʼob ku beetkoʼ ku yeʼesikeʼ maʼ taak u yuʼubik u tʼaan Jéeobaiʼ (Deu. 30:​19, 20).

4. ¿Baʼaxten ku tsʼaʼabal junpʼéel anuncio kéen jóoʼsaʼak wa máax teʼ múuchʼuliloʼ?

⁴ Le kéen kʼebanchajak juntúul máak yéetel maʼ tu arrepentireʼ ku jóoʼsaʼal teʼ múuchʼuliloʼ, ku tsʼaʼabal junpʼéel anuncio tuʼux ku yaʼalaʼaleʼ letiʼeʼ desde beoraaʼ maʼ u testigo Jéeobaiʼ. a Lelaʼ maʼ tu beetaʼal utiaʼal u suʼlakkíintaʼal le máax kʼebanchajoʼ, baʼaxeʼ utiaʼal u beetaʼal le baʼax ku yaʼalik le Bibliaaʼ: «Xuʼuluk a biskabaʼex» tu yéetel, «mix a janaleʼex yéetel juntúul máak beyoʼ» (1 Cor. 5:​9-11). Apóstol Pabloeʼ tu yaʼalaj baʼaxten unaj u beetaʼal lelaʼ, tu yaʼalaj: «Junpʼíit levaduraeʼ ku beetik u líikʼil tuláakal le harinaoʼ» (1 Cor. 5:6). Wa ka chaʼabak u pʼáatal teʼ múuchʼulil le máax kʼebanchaj yéetel maʼ tu arrepentiroʼ jeʼel u kʼaskúuntik u tuukul le máaxoʼob táan u tsʼáaik u yóol u meyajtoʼob Jéeobaoʼ (Pro. 13:20; 1 Cor. 15:33).

5. ¿Bix unaj k-ilik le máax ku jóoʼsaʼal teʼ múuchʼuliloʼ, yéetel baʼaxten?

⁵ ¿Bix unaj k-ilik le máax ku jóoʼsaʼal teʼ múuchʼuliloʼ? Kex maʼ t-bisikba tu yéeteleʼ maʼ unaj k-tuklik wa tsʼoʼok tiʼ beyoʼ, baʼaxeʼ unaj k-ilik bey juntúul chan taman saatleʼ. Juntúul chan taman saatleʼ jeʼel u páajtal u suut yiknal u maasileʼ. Maʼ unaj u tuʼubultoʼoneʼ u kʼubmaj u kuxtal tiʼ Jéeoba, chéen baʼaleʼ beoraaʼ maʼ táan u béeykuntik le promesa tu beetaj tiʼ Jéeobaoʼ (Eze. 18:31). Leloʼ maʼ maʼalobiʼ, pero Jéeobaeʼ jach ku chʼaʼik óotsilil. Le beetkeʼ wa le máak u kʼáatoʼ jeʼel u páajtal u suut tu yiknaleʼ. Le ancianoʼoboʼ, ¿bix jeʼel u yáantkoʼob le máaxoʼob tsʼoʼok u jóoʼsaʼaloʼob teʼ múuchʼuliloʼ?

BIX U YÁANTAʼAL LE MÁAXOʼOB KU JÓOʼSAʼALOʼOB TEʼ MÚUCHʼULILOʼ

6. ¿Baʼax unaj u beetik le ancianoʼob utiaʼal u yáantkoʼob le máaxoʼob ku jóoʼsaʼaloʼob teʼ múuchʼuliloʼ?

⁶ Le máaxoʼob ku jóoʼsaʼaloʼob teʼ múuchʼuliloʼ, ¿chéen wa tu juunaloʼob kéen u yiloʼob bix jeʼel u suutoʼob yiknal Jéeobaeʼ? Maʼ beyiʼ. Le comité de ancianosoʼ le kéen u yaʼaloʼob tiʼ wa máax yaan u jóoʼsaʼal teʼ múuchʼuliloʼ, ku yaʼalikoʼobtiʼ xan baʼax jeʼel u beetik utiaʼal u kaʼa suuteʼ. Chéen baʼaleʼ yaan uláakʼ baʼax ku beetkoʼob. U suukileʼ ku yaʼalikoʼob tiʼ le máax kʼebanchajoʼ kéen máanak wa jaypʼéel meseseʼ taak u kaʼa tsikbaloʼob tu yéetel utiaʼal u yilkoʼob wa tsʼoʼok u kʼexik u tuukul. Wa le máax kʼebanchajaʼan ku yóotkoʼ, le ancianoʼob túunoʼ le kéen u kaʼa muchʼubaʼob tu yéeteleʼ yéetel yaabilaj ken u yáantoʼob utiaʼal ka arrepentirnak bey xan utiaʼal u kaʼa suut ichil u kaajal Jéeoba. Pero kex wa maʼ u kʼex u tuukuleʼ, cada wa baʼax kʼiineʼ le ancianoʼoboʼ yaan u yilik u kaʼa muchʼkubaʼob tu yéetel utiaʼal u líiʼskoʼob u yóol utiaʼal ka arrepentirnak.

7. Jeʼex Jéeobaeʼ le ancianoʼoboʼ, ¿bix u yeʼeskoʼob ku chʼaʼikoʼob óotsilil tiʼ le máaxoʼob ku jóoʼsaʼaloʼob teʼ múuchʼuliloʼ? (Jeremías 3:12).

⁷ Jeʼex Jéeobaeʼ le ancianoʼoboʼ ku chʼaʼikoʼob óotsilil tiʼ le máaxoʼob ku jóoʼsaʼaloʼob teʼ múuchʼuliloʼ. Jéeobaeʼ maʼ tu páaʼtaj ka arrepentirnak u kaajil Israel utiaʼal u yáantkoʼobiʼ. Letiʼeʼ kex todavía maʼ u yojel wa yaan  u arrepentiroʼobeʼ tu natsʼuba tu yiknaloʼob. Teʼ tu kaʼapʼéel xookil le revistaaʼ t-ilaj bix u chʼaʼik óotsilil Jéeoba le ka tu yaʼalaj tiʼ profeta Oseas ka suunak yéetel u yatan, kex láayliʼ táan u kʼebantaleʼ (Ose. 3:1; Mal. 3:7). Jeʼex Jéeobaeʼ le ancianoʼoboʼ jach u kʼáatoʼob ka suunak yiknal Jéeoba le máaxoʼob kʼebanchajoʼoboʼ, letiʼobeʼ ku beetkoʼob tuláakal le ku páajtal utiaʼal u yáantkoʼob (xok Jeremías 3:12).

8. U tsikbalil le xiʼipal tu xuʼuxupaj u taakʼinoʼ, ¿bix u yáantkoʼon k-naʼat bix u chʼaʼik óotsilil Jéeoba? (Lucas 15:7).

⁸ Teʼ tu kaʼapʼéel xookil le revistaaʼ t-ilaj u tsikbalil le xiʼipal tu xuʼuxupaj u taakʼin tu yaʼalaj Jesúsoʼ. Le ka tu yilaj u papá le xiʼipal táan u suut tu yotochoʼ «bin áalkabil tu yiknaleʼ tu méekʼeʼ ka tu tsʼuʼutsʼaj» (Luc. 15:20). Jeʼex k-ilkoʼ le taatatsiloʼ maʼ tu páaʼtaj ka taak u hijo u kʼáat perdón tiʼiʼ, baʼaxeʼ letiʼ bin áalkabil yiknal u hijo tumen jach u yaabiltmaj. Le ancianoʼoboʼ bey xan u beetkoʼoboʼ, letiʼobeʼ jach ku tsʼáaik u yóol u yáantoʼob le máaxoʼob beyoʼob mejen tamanoʼob saatloʼob utiaʼal ka suunakoʼob yiknal Jéeobaoʼ (Luc. 15:​22-24, 32). ¡Jach ku yantal kiʼimak óolal teʼ kaʼan bey xan way Luʼum le kéen u kʼex u tuukul juntúul máak kʼebanchajaʼaneʼ! (Xok Lucas 15:7).

9. ¿Baʼax u kʼáat Jéeoba ka u beet le máaxoʼob kʼebanchajaʼanoʼoboʼ?

⁹ Le baʼaxoʼob tsʼoʼok k-ilik tak beoraaʼ ku yeʼesiktoʼoneʼ Jéeobaeʼ maʼ tu chaʼik u pʼáatal teʼ múuchʼulil le máaxoʼob ku kʼebantaloʼob maʼ tu arrepentiroʼoboʼ. Chéen baʼaleʼ t-ilaj xaneʼ maʼ tu pʼatkoʼob chéen beyoʼ. Letiʼeʼ u kʼáat ka suunakoʼob tu yiknal. Le baʼax ku yaʼalik Oseas 14:​4, ku yeʼesik bix u yuʼubikuba Jéeoba kéen u kʼex u tuukul juntúul máak tsʼoʼok u kʼebantal, ku yaʼalik: «Teneʼ yaan in tsʼakikoʼob, letiʼob túuneʼ maʼ kun suut u traicionartenoʼob. Yaan in yaabiltikoʼob yéetel tuláakal in puksiʼikʼal, tumen teneʼ tsʼoʼok u xuʼulul in pʼuʼujul tu contraʼob». Le ancianoʼoboʼ ku chʼaʼikoʼob en cuenta tuláakal baʼax jeʼel u yeʼesik táan u arrepentir juntúul máak kʼebanchajaʼaneʼ. Lelaʼ jach ku líiʼsik u yóol le máax náachchajaʼan tiʼ Jéeoba utiaʼal u kaʼa suut tu yiknaloʼ.

10, 11. ¿Bix jeʼel u yáantaʼal tumen le ancianoʼob le máaxoʼob úuch jóoʼsaʼakoʼob ichil u kaajal Jéeobaoʼ?

¹⁰ Le ancianoʼoboʼ, ¿bix jeʼel u yáantkoʼob juntúul máak úuch jóoʼsaʼak ichil u kaajal Jéeobaeʼ? Maʼ xaaneʼ yaan tiʼ letiʼobeʼ tsʼoʼok u xuʼulul u kʼebantaloʼob wa maʼ xaaneʼ hasta maʼ kʼajaʼantiʼob baʼax oʼolal jóoʼsaʼaboʼob teʼ múuchʼuliloʼ. Le ancianoʼoboʼ kʼaʼabéet u kaxtikoʼob yéetel u xíimbaltikoʼob le máaxoʼob úuch jóoʼsaʼakoʼob ichil u kaajal Jéeobaoʼ. Le kéen xíimbaltaʼakoʼobeʼ le ancianoʼoboʼ yaan u oraroʼob tu yéeteloʼob, tsʼoʼoleʼ yéetel yaabilaj kéen u yaʼaltiʼob ka suunakoʼob ichil u kaajal Jéeoba. Le máaxoʼob úuch náachchajkoʼob tiʼ u kaajal Jéeobaoʼ kʼaʼabéet u yáantaʼaloʼob utiaʼal u kaʼa muʼukʼaʼantal u fejoʼob. Wa juntúul máax ku yaʼalik taak u kaʼa suut ichil u kaajal Jéeobaeʼ, le ancianoʼoboʼ yaan u yéeyikoʼob wa máax utiaʼal u tsʼáaik xook tiʼ, kex todavía maʼ kʼaʼamak tu kaʼatéen teʼ múuchʼuliloʼ. Chéen baʼaleʼ letiʼe ancianoʼob ken u chʼaʼtukloʼob máax ken u tsʼáa le xookoʼ.

¹¹ Le ancianoʼoboʼ jach ku yeʼeskoʼob yaabilaj jeʼex u beetik Jéeobaeʼ. Le oʼolal jach ku tsʼáaik u yóoloʼob u kaxtoʼob le máaxoʼob náachchajaʼanoʼob tiʼ Jéeoba utiaʼal u kaʼa suutoʼob tu yiknaloʼ. Le kéen arrepentirnak wa máax yéetel ku xuʼulul u beetik baʼax kʼaaseʼ, jeʼel u páajtal u kaʼa kʼaʼamal teʼ múuchʼuliloʼ (2 Cor. 2:​6-8).

12. 1) ¿Baʼaxten yaan kʼiineʼ le ancianoʼoboʼ kʼaʼabéet u jach ilkoʼob máaxoʼob kun kaʼa kʼambil teʼ múuchʼuliloʼ? 2) ¿Baʼaxten maʼ unaj k-tuklik wa yaan máakoʼob tsʼoʼok u kʼebantaloʼobeʼ mix bikʼin kun kaʼa kʼambiloʼob tumen Jéeoba? (Ilawil xan le notaoʼ).

 ¹² Yaan kʼiineʼ le ancianoʼoboʼ kʼaʼabéet u jach ilkoʼob máaxoʼob kun kaʼa kʼambil teʼ múuchʼuliloʼ. Por ejemploeʼ wa juntúul máak tu violartaj juntúul chan paal, apóstata kaʼachi, wa tu planeartaj u núupkʼebantal utiaʼal u divorciarkuba tiʼ u núup utiaʼal u tsʼoʼokol u beel yéetel yaanal máakeʼ, le ancianoʼoboʼ táanil tiʼ u kʼamkoʼobeʼ kʼaʼabéet u yilkoʼob wa jach tu jaajil arrepentido (Mal. 2:14; 2 Tim. 3:6). Jach kʼaʼabéet u kanáantaʼal le múuchʼuliloʼ. Chéen baʼaleʼ k-ojel xaneʼ Jéeobaeʼ yaan u kʼamik jeʼel máaxak ku arrepentir yéetel u jaajil u yóol yéetel ku xuʼulul u beetik baʼax kʼaasoʼ. Le beetkeʼ kex le ancianoʼob kʼaʼabéet  u kanáantkoʼob le múuchʼuliloʼ, mix juntéen unaj u tuklikoʼob wa yaan máakoʼob tsʼoʼok u kʼebantaloʼobeʼ mix bikʼin kun kaʼa kʼambiloʼob tumen Jéeobaiʼ (1 Ped. 2:10). b

BIX U YÁANTAJ LE MÚUCHʼULILOʼ

13. 1) ¿Bix u tratartaʼal juntúul máak tsʼoʼok u censurartaʼal? 2) ¿Bix u tratartaʼal juntúul máak tsʼoʼok u jóoʼsaʼal teʼ múuchʼuliloʼ?

¹³ Jeʼex t-ilaj teʼ xook máanikoʼ le kéen anunciartaʼak tsʼoʼok u censurartaʼal juntúul máak teʼ múuchʼuliloʼ jeʼel u páajtal u seguer k-bisikba tu yéeteleʼ tumen k-ojel arrepentirnaji yéetel tsʼoʼok u tojkíintik u kuxtal (1 Tim. 5:20). Letiʼeʼ todavía tiaʼan ichil le múuchʼuliloʼ yéetel kʼaʼabéet u líiʼsaʼal u yóol tumen le sukuʼunoʼoboʼ (Heb. 10:​24, 25). Chéen baʼaleʼ maʼ bey u yúuchul yéetel juntúul máak ku jóoʼsaʼal teʼ múuchʼuliloʼ. Le Bibliaoʼ ku yaʼalik: «Xuʼuluk a biskabaʼex» tu yéetel, «mix a janaleʼex yéetel juntúul máak beyoʼ» (1 Cor. 5:11).

14. Wa a conciencia nuʼuktaʼan tumen le Biblia ku chaʼiktecheʼ, ¿baʼax jeʼel a chʼaʼtuklik a beetkeʼ? (Ilawil xan le fotooʼ).

¹⁴ Le baʼax tsʼoʼok k-ilik tak beoraaʼ, ¿u kʼáat wa u yaʼal junpuliʼ maʼ ken k-tʼan juntúul máak tsʼoʼok u jóoʼsaʼal teʼ múuchʼuliloʼ? Maʼ beyiʼ. U kʼáat u yaʼaleʼ maʼ ken k-bisba tu yéetel. Chéen baʼaleʼ wa k-conciencia nuʼuktaʼan tumen le Biblia ku chaʼiktoʼonoʼ jeʼel u páajtal k-invitartik utiaʼal ka xiʼik reunión juntúul máax jóoʼsaʼan teʼ múuchʼuliloʼ wa k-láakʼtsil bey xan wa k-amigo kaʼachi. Wa ku bineʼ, ¿baʼax unaj k-beetik? Kaʼacheʼ maʼatech k-saludartik le máaxoʼob ku jóoʼsaʼaloʼob teʼ múuchʼuliloʼ, pero beoraaʼ wa k-conciencia nuʼuktaʼan tumen le Biblia ku chaʼiktoʼoneʼ jeʼel u páajtal k-saludarkeʼ. Yaneʼ ku chʼaʼtuklik u saludartik yéetel u tsʼáaik u bienvenidail tiʼ le máak kéen xiʼik reuniónoʼ. Wa k-chʼaʼtuklik k-beetik beyoʼ, leloʼ maʼ u kʼáat u yaʼal wa yaan k-bisikba tu yéeteliʼ bey xan wa yaan u xáantal táan k-tsikbal tu yéeteliʼ.

15. ¿Tiʼ baʼax clase kʼebanoʼob táan u tʼaan 2 Juan 9-11? (Ilawil xan le cuadro « Juan yéetel Pabloeʼ, ¿táan wa kaʼach u tʼaanoʼob tiʼ junpʼéeliliʼ clase kʼeban?»).

¹⁵ Maʼ xaaneʼ yaan máax jeʼel u tuklikeʼ:  «¿Baʼaxten túun le Bibliaoʼ ku yaʼalikeʼ wa k-saludartik juntúul máax beyoʼ táan k-táakpajal tiʼ le baʼaxoʼob kʼaastak ku beetkoʼ?» (xok 2 Juan 9-11). U contekstoil le versículoaʼ ku yeʼesikeʼ le ka aʼalaʼab le tʼaanoʼobaʼ táan kaʼach u yúuchul tʼaan tiʼ le apóstataʼoboʼ bey xan tiʼ le máaxoʼob ku péeksikoʼob u maasil u beetoʼob baʼaloʼob kʼaastakoʼ (Apo. 2:20). Le beetkeʼ wa yaan máax táan u kʼiʼitbesik u kaʼansaj le apóstataʼoboʼ bey xan wa táan u túulchʼintik u maasil u beet baʼaloʼob kʼaastakeʼ, le ancianoʼoboʼ maʼ ken u xíimbaltoʼob le máakaʼ. Pero maʼ unaj k-tuklik wa tsʼoʼok tiʼ beyoʼ, chéen baʼaleʼ wa maʼ tu xuʼulul u beetik le baʼaloʼob kʼaastakaʼ maʼ ken k-saludarte mix ken k-invitart utiaʼal ka xiʼik reunión.

EʼES U CHʼAʼ ÓOTSILIL JÉEOBA

16, 17. 1) ¿Baʼax u kʼáat Jéeoba ka u beet le máaxoʼob kʼebanchajaʼanoʼoboʼ? (Ezequiel 18:32). 2) ¿Le ancianoʼoboʼ bix u múul meyajoʼob yéetel Jéeoba le kéen u yáantoʼob arrepentir juntúul máax kʼebanchajaʼanoʼ?

¹⁶ ¿Baʼax tsʼoʼok k-kanik tiʼ le cinco xookoʼob tu taasaj le revistaaʼ? Tsʼoʼok k-kanikeʼ Jéeobaeʼ maʼ u kʼáat ka xuʼulsaʼal tiʼ mix máakiʼ (xok Ezequiel 18:32). Letiʼeʼ u kʼáateʼ le máaxoʼob tsʼoʼok u kʼebantaloʼoboʼ ka u kaʼa bisubaʼob tu yéetel (2 Cor. 5:20). Tiʼ tuláakal le años tsʼoʼok u máanoʼ Jéeobaeʼ tu yaʼalaj tiʼ le máaxoʼob tsʼoʼok u náachtaloʼob tiʼ letiʼoʼ ka arrepentirnakoʼob yéetel ka suunakoʼob tu yiknal. Le ancianoʼoboʼ yaantiʼob u privilegioil u múul meyajoʼob yéetel Jéeoba utiaʼal u yáantkoʼob arrepentir le máaxoʼob tsʼoʼok u kʼebantaloʼoboʼ (Rom. 2:4; 1 Cor. 3:9).

¹⁷ Jach ku yantal kiʼimak óolal teʼ kaʼan le kéen arrepentirnak juntúul máak tsʼoʼok u kʼebantaloʼ. Jéeobaeʼ letiʼe máax maas ku kiʼimaktal u yóol le kéen u yil u suut ichil u kaajal juntúul chan taman saatal kaʼachoʼ. Wa k-tuukul tiʼ bix u chʼaʼik óotsilil Jéeobaeʼ yaan k-maas yaabiltik (Luc. 1:78).