1. ¿Baʼax jeʼel u yúuchul yéetel jujuntúul máaxoʼob ku kʼebantaloʼobeʼ?

 TEʼ XOOK máanikoʼ t-ileʼ Pabloeʼ tu yaʼalaj tiʼ u múuchʼulil Corinto baʼax unaj u beetik le ka lúub juntúul máak tiʼ junpʼéel nojoch kʼebanoʼ. Le máakaʼ maʼ arrepentirnajiʼ, le oʼolal jóoʼsaʼab teʼ múuchʼuliloʼ. Chéen baʼaleʼ jeʼex u yeʼesik u tekstoil le xookaʼ yaan máaxoʼob ku lúubloʼob tiʼ junpʼéel nojoch kʼebaneʼ jeʼel u páajtal u yáantaʼaloʼob utiaʼal ka arrepentirnakoʼobeʼ (Rom. 2:4). ¿Bix jeʼel u yáantaʼaloʼob tumen le ancianoʼoboʼ?

2, 3. ¿Baʼax unaj k-beetik wa k-ojéeltik juntúul sukuʼuneʼ tsʼoʼok u lúubul tiʼ junpʼéel nojoch kʼeban, yéetel baʼaxten?

² Wa le ancianoʼob maʼ u yojloʼob tsʼoʼok u lúubul tiʼ junpʼéel nojoch kʼeban wa máaxeʼ maʼ tu páajtal u yáantkoʼob. Le oʼolaleʼ, ¿baʼax unaj k-beetik wa k-ojéeltik juntúul sukuʼun wa juntúul kiikeʼ tsʼoʼok u lúubul tiʼ junpʼéel nojoch kʼeban? Yáaxeʼ unaj k-aʼaliktiʼ ka u kʼáat áantaj tiʼ le ancianoʼoboʼ (Isa. 1:18; Hech. 20:28; 1 Ped. 5:2).

³ ¿Kux túun wa maʼ tu yóotik tʼaan yéetel le ancianoʼoboʼ? Wa beyoʼ toʼon unaj k-aʼaliktiʼob le baʼax úuchoʼ beyoʼ yaan u páajtal u tsʼaʼabaltiʼ le áantaj kʼaʼabéettiʼoʼ. Lelaʼ k-beetik tumen k-yaabiltmaj le sukuʼun wa le kiikoʼ. K-ojleʼ wa ku seguer u beetik le baʼax kʼaasoʼ jeʼel u xuʼulul u biskuba yéetel Jéeobaeʼ, tsʼoʼoleʼ jeʼel xan u beetik u tʼaan kʼaas u maasil yoʼolal le múuchʼuliloʼ. Le beetkeʼ kex maʼ chéen chʼaʼabileʼ unaj k-aʼalik tiʼ le  ancianoʼob le baʼax úuchoʼ tumen k-yaabiltmaj Jéeoba yéetel k-yaabiltmaj le máax kʼebanchajoʼ (Sal. 27:14).

BIX U YÁANTAʼAL TUMEN LE ANCIANOʼOB LE MÁAX KU KʼEBANTALOʼ

4. ¿Baʼax ku yilik u beetik le ancianoʼoboʼ?

⁴ Le kéen lúubuk juntúul sukuʼun tiʼ junpʼéel nojoch kʼebaneʼ ku yéeyaʼal óoxtúul ancianoʼob utiaʼal ka u formartoʼob junpʼéel comité. a Letiʼobeʼ kʼaʼabéet kabal u yóoloʼob. U yojloʼob xaneʼ kex kʼaʼabéet u yáantkoʼob le máax kʼebanchaj utiaʼal ka arrepentirnakoʼ maʼ tu páajtal u obligarkoʼob u beete (Deu. 30:19). Tsʼoʼoleʼ u yojloʼob xaneʼ maʼ tuláakal máak kun arrepentir jeʼex tu beetil rey Davideʼ (2 Sam. 12:13). Maʼ xaaneʼ jujuntúul tiʼ le máaxoʼob ku kʼebantaloʼoboʼ maʼ ken u kʼamoʼob le áantaj ku tsʼáaik Jéeobaoʼ (Gén. 4:​6-8). Pero kex beyoʼ le ancianoʼoboʼ yaan u yilik u yáantkoʼob le máax kʼebanchaj utiaʼal ka arrepentirnakoʼ. ¿Baʼax unaj u kʼaʼajsik le ancianoʼob kéen u muchʼubaʼob yéetel le máax kʼebanchajoʼ?

5. ¿Baʼax jatsʼuts modosil unaj u yeʼesik le ancianoʼob utiaʼal u yáantkoʼob le máax kʼebanchajoʼ? (2 Timoteo 2:​24-26, ilawil xan le fotooʼ).

⁵ Le ancianoʼoboʼ ku yilkoʼob le máax kʼebanchaj bey juntúul taman saataleʼ (Luc. 15:​4, 6). Le oʼolaleʼ le kéen u muchʼubaʼob tu yéeteleʼ ku yeʼeskoʼob tiʼ yaabilaj. Letiʼobeʼ maʼ chéen ku beetkoʼobtiʼ preguntaʼob utiaʼal u yojéeltikoʼob le baʼax úuchoʼ, baʼaxeʼ ku yeʼeskoʼobtiʼ le jatsʼuts modos ku chíikpajal tiʼ 2 Timoteo 2:​24-26 (xoke). Le ancianoʼoboʼ jach unaj u yeʼeskoʼob utsil, wa ku beetkoʼobeʼ le baʼax ken u yaʼaloʼoboʼ yaan u kʼuchul tu puksiʼikʼal le máax kʼebanchajoʼ.

6. ¿Baʼax ku beetik le ancianoʼob antes tiʼ u muchʼkubaʼob yéetel le máax kʼebanchajoʼ? (Romanos 2:4).

⁶ Le ancianoʼoboʼ ku chaʼik u nuʼuktaʼaloʼob tumen Jéeoba. Letiʼobeʼ ku yilik u tratarkoʼob le máax kʼebanchaj jeʼex u beetik Jéeobaeʼ yéetel ku kʼaʼajsikoʼob le baʼax tu yaʼalaj Pabloaʼ: «Yoʼolal u yutsil Dioseʼ táan u yilik u nuʼuktikech utiaʼal ka a kʼex a tuukul» (xok Romanos 2:4). Le ancianoʼoboʼ kʼaʼabéet u chaʼik u nuʼuktaʼaloʼob tumen Jesús utiaʼal u kanáantkoʼob le múuchʼuliloʼ (Isa. 11:​3, 4; Mat. 18:​18-20). Letiʼobeʼ antes tiʼ u muchʼkubaʼob yéetel le máax kʼebanchajoʼ ku oraroʼob tiʼ Jéeoba utiaʼal u kʼáatkoʼobtiʼ ka u yáant le máax kʼebanchaj utiaʼal ka arrepentirnakoʼ. Le ancianoʼoboʼ yaan u xakʼaltikoʼob le Bibliaoʼ bey xan le publicaciónoʼoboʼ, yéetel yaan u kʼáatkoʼob u yáantaj Jéeoba utiaʼal u naʼatkoʼob le baʼax úuchoʼ bey xan bix u yuʼubikuba le máax kʼebanchajoʼ. Letiʼob xaneʼ yaan u chʼaʼikoʼob en cuenta bix u tuukul le máax  kʼebanchajoʼ yéetel baʼax péeks u beet le baʼax kʼaasoʼ (Pro. 20:5).

7, 8. Le ancianoʼoboʼ le kéen u yáantoʼob le máax kʼebanchajaʼanoʼ, ¿bix jeʼel u yeʼeskoʼob paciencia jeʼex u beetik Jéeobaeʼ?

⁷ Le ancianoʼoboʼ ku yeʼeskoʼob paciencia jeʼex Jéeobaeʼ. Kʼajaʼantiʼob bix úuchik u tratartik Jéeoba le máaxoʼob kʼebanchajoʼob úuchjeakiloʼ. Por ejemploeʼ letiʼeʼ yéetel paciencia tu tsolaj tiʼ Caín baʼaxoʼob kun úuchultiʼ yoʼolal le baʼax maʼ maʼalob tu beetoʼ bey xan bix jeʼel u yutskíintikeʼ (Gén. 4:​6, 7). Juntéenjeakeʼ meyajnaj profeta Natán tiʼ Jéeoba utiaʼal u tsolik u nuʼuk tiʼ David. Le ejemplo meyajnaj tiʼ Natánoʼ tu yáantaj le rey utiaʼal ka arrepentirnakoʼ (2 Sam. 12:​1-7). Jéeobaeʼ ‹maʼ xuʼul u túuxtik› profetaʼob utiaʼal u yáantik u kaajil Israeliʼ, ‹mantatsʼ bey tu beetiloʼ› (Jer. 7:​24, 25). Jeʼex k-ilkoʼ maʼ tu páaʼtaj u arrepentiroʼob utiaʼal u yáantkoʼobiʼ, baʼaxeʼ tu séebaʼanil tu yilaj u beetik.

⁸ Le ancianoʼoboʼ utiaʼal u seguerkoʼob u ejemplo Jéeobaeʼ, ¿bix unaj u tratarkoʼob le máaxoʼob ku lúubloʼob tiʼ junpʼéel nojoch kʼebanoʼ? 2 Timoteo 4:​2, ku yaʼalikeʼ unaj u yeʼeskoʼob «paciencia». Le ancianoʼoboʼ mantatsʼ kʼaʼabéet tranquiloʼob bey xan u tʼankoʼob yéetel utsil le máax kʼebanchajaʼanoʼ. Tumen wa ku pʼuʼujuloʼob bey xan wa ku kʼuuxiloʼobeʼ le máax kʼebanchajaʼanoʼ maʼ ken u yuʼub le consejo kun tsʼaabiltiʼoʼ wa maʼ ken u yóot arrepentir.

9, 10. Le ancianoʼoboʼ, ¿bix jeʼel u yáantkoʼob le máax tsʼoʼok u kʼebantal utiaʼal ka u tsʼáaj cuenta maʼ maʼalob le baʼax tu beetoʼ?

⁹ Le ancianoʼoboʼ ku averiguarkoʼob baʼax beet u kʼebantal le sukuʼunoʼ. Por ejemploeʼ, ¿xuʼul wa u xokik le Biblia bey xan u jóokʼol kʼaʼaytajoʼ? ¿Xuʼul wa u orar yéetel u jaajil u yóol tiʼ Jéeoba? ¿Táan wa u chaʼik u nuʼuktaʼal tumen u kʼaakʼas tsʼíibolal? ¿Táan wa u náaysik u yóol yéetel baʼaloʼob maʼ maʼalobtakiʼ? ¿Táan wa u biskuba yéetel máaxoʼob maʼ unajiʼ? ¿Bix u afectartaʼal u puksiʼikʼal yéetel u tuukul tumen le baʼaloʼobaʼ? ¿Ku naʼatik wa bix u yuʼubikuba Jéeoba yoʼolal le decisiónoʼob ku chʼaʼikoʼ?

¹⁰ Le ancianoʼoboʼ jeʼel u páajtal u beetkoʼob preguntaʼob tiʼ le sukuʼun utiaʼal u tsʼáaik cuenta baʼax beet u lúubul tiʼ le nojoch kʼebanoʼ. Chéen baʼaleʼ unaj u beetkoʼob yéetel yaabilaj yéetel unaj u yilkoʼob maʼ u beetkoʼob u suʼlaktal le sukuʼunoʼ (Pro. 20:5). Tsʼoʼoleʼ le ancianoʼoboʼ jeʼel u páajtal u beetkoʼob jeʼex Natán le ka tu yáantaj Davidoʼ, jeʼel u páajtal u meyajtiʼob ejemploʼob utiaʼal u yáantkoʼob le sukuʼun u tsʼáa cuentaeʼ le baʼax tu beetoʼ maʼ maʼalobiʼ. Maʼ xaaneʼ le yáax kéen u muchʼubaʼob tu yéeteloʼ jach jeʼel u yaatal u yóol yoʼolal le baʼax tu beetoʼ yéetel jeʼel tak u arrepentireʼ.

11. ¿Bix tu yáantil Jesús le máaxoʼob tu beetoʼob baʼaloʼob kʼaastakoʼ?

¹¹ Le ancianoʼoboʼ ku yilik u beetkoʼob jeʼex Jesúseʼ. Juntéenjeakeʼ Jesúseʼ utiaʼal u beetik u tuukul Sauloeʼ tu yaʼalajtiʼ: «Saulo, Saulo, ¿baʼaxten táan a chʼaʼpachtiken?». Yéetel lelaʼ Jesúseʼ tu yáantaj Saulo ka u yil maʼ maʼalob le baʼax táan u beetkoʼ (Hech. 9:​3-6). Le ka tʼaanaj xan Jesús yoʼolal le koʼolel ku kʼaabaʼtik «Jezabeloʼ» tu yaʼalaj: «Tin tsʼáaj tiempo tiʼ utiaʼal u kʼexik u tuukul» (Apo. 2:​20, 21).

12, 13. Le ancianoʼoboʼ, ¿baʼax ku beetkoʼob utiaʼal u tsʼáaikoʼob tiempo tiʼ le máax kʼebanchajaʼan utiaʼal ka arrepentirnakoʼ? (Ilawil xan le fotooʼ).

¹² Jeʼex Jesúseʼ le ancianoʼoboʼ maʼ tu jáan tuklikoʼob wa junpuliʼ maʼ kun arrepentir le máax kʼebanchajoʼ. Yaan tiʼ le máaxoʼob tsʼoʼok u kʼebantaloʼoboʼ le yáax ken u muchʼubaʼob yéetel le ancianoʼoboʼ ku arrepentiroʼob, pero yanoʼob xaneʼ kʼaʼabéet maas tiempo tiʼob utiaʼal u beetkoʼob. Yoʼolal leloʼ le ancianoʼoboʼ  jeʼel u páajtal u muchʼkubaʼob yéetel le máax tsʼoʼok u kʼebantal le jaytéen kun kʼaʼabéettaloʼ. Maʼ xaaneʼ jeʼel u joʼopʼol u tuukul tiʼ le consejoʼob tsʼaʼabtiʼ tumen le ancianoʼob le yáax ka tu muchʼubaʼob tu yéeteloʼ yéetel jeʼel u orar tiʼ Jéeoba yéetel kabal óolal utiaʼal u kʼáatik ka perdonartaʼakeʼ (Sal. 32:5; 38:18). Maʼ xaaneʼ le kéen u kaʼa muchʼuba le ancianoʼob tu yéeteloʼ maas jeʼel u kʼamik le consejoʼob kun tsʼaabiltiʼoʼ.

¹³ Le ancianoʼoboʼ utiaʼal u yáantkoʼob ka arrepentirnak le máax tsʼoʼok u kʼebantaloʼ ku yeʼeskoʼob utsil tiʼ yéetel ku yilik u naʼatkoʼob bix u yuʼubikuba. Tsʼoʼoleʼ ku kʼáatkoʼob tiʼ Jéeoba ka áantaʼakoʼob utiaʼal u páajtal u yáantkoʼob le máax kʼebanchajaʼan utiaʼal ka arrepentirnakoʼ (2 Tim. 2:​25, 26).

14. ¿Máax unaj u alabartaʼal le kéen arrepentirnak juntúul máak kʼebanchajaʼan, yéetel baʼaxten?

¹⁴ ¡Jach yaʼab kiʼimak óolal ku yantal kéen arrepentirnak juntúul máak kʼebanchajaʼan! (Luc. 15:​7, 10). ¿Letiʼe ancianoʼob wa unaj u alabartaʼaloʼob yoʼolal leloʼ? Koʼoneʼex kʼaʼajsik baʼax tu yaʼalaj apóstol Pablo yoʼolal le máaxoʼob ku kʼebantaloʼoboʼ: «Maʼ xaaneʼ jeʼel u yáantaʼaloʼob tumen Dios utiaʼal u kʼexik u tuukuloʼob[eʼ]» (2 Tim. 2:25). Jeʼex k-ilkoʼ Jéeoba áantik máak utiaʼal ka u kʼex u tuukul yéetel utiaʼal ka arrepentirnak. Pabloeʼ tʼaanaj xan tiʼ le utsiloʼob ku taasik tiʼ máak le u arrepentiroʼ: jeʼel u maas kʼaj óoltik baʼax ku kaʼansik le Bibliaoʼ, jeʼel u maʼalobtal u tuukuleʼ yéetel jeʼel u béeytal u púutsʼul tiʼ le Kʼaasilbaʼaloʼ (2Tim. 2:26).

15. Le ancianoʼoboʼ, ¿bix jeʼel u seguer u yáantkoʼob le máax tsʼoʼok u arrepentiroʼ?

¹⁵ Le ancianoʼoboʼ yaan u seguer u beetkoʼob visitaʼob de pastoreo tiʼ le máax tsʼoʼok u arrepentiroʼ. Beyoʼ yaan u yáantkoʼob utiaʼal ka muʼukʼaʼanchajak u fe yéetel utiaʼal maʼ u lúubul tiʼ le trampaʼob ku tsʼaʼabaltiʼ tumen le Kʼaasilbaʼaloʼ (Heb. 12:​12, 13). Le ancianoʼoboʼ maʼ ken u tsikbaltoʼob tiʼ mix máak le baʼax tu beetaj le sukuʼunoʼ, pero maʼ xaaneʼ yaan u kʼaʼabéettal u yaʼalikoʼob jujunpʼéel baʼaloʼob tiʼ le múuchʼuliloʼ.

 ‹TU TÁAN TULÁAKAL LE MÁAXOʼOB YANOʼOBOʼ AʼAL U NUʼUK TIʼOB›

16. ¿Tiʼ máaxoʼob ku tʼaan 1 Timoteo 5:20 le kéen u yaʼal «tuláakal le máaxoʼob yanoʼoboʼ»?

¹⁶ (Xok 1 Timoteo 5:20). Pabloeʼ tu yaʼalaj tiʼ Timoteo, u yéet ancianoil, ka u tsol u nuʼuk «tiʼ le máaxoʼob táan u kʼebantaloʼob [ . . . ] tu táan tuláakal le máaxoʼob yanoʼoboʼ». ¿Táan wa kaʼach u yaʼalik Pablo tu táan le múuchʼulil unaj u tsoʼolol u nuʼuk tiʼ le máax tsʼoʼok u kʼebantaloʼ? Maʼatech. Teʼelaʼ táan u tʼaan tiʼ le máaxoʼob ojéelt le baʼax tu beetaj le máax kʼebanchajoʼ, maʼ xaaneʼ tumen tu yiloʼob wa tumen le máax kʼebanchajoʼ tu tsikbaltajtiʼob le baʼax tu beetoʼ. Le ancianoʼoboʼ chéen tiʼ letiʼob ken u yaʼal tsʼoʼok u tsikbaloʼob yéetel le sukuʼunoʼ yéetel tsʼoʼok u tsolnuʼuktikoʼob.

17. ¿Baʼax ken u beet juntúul anciano wa tuláakal le múuchʼulil u yojel tsʼoʼok u lúubul wa máax tiʼ junpʼéel nojoch kʼebanoʼ?

¹⁷ Yaan kʼiin xaneʼ tuláakal le múuchʼulil ku kʼuchul u yojéelt tsʼoʼok u lúubul wa máax tiʼ junpʼéel nojoch kʼebanoʼ. Le kéen úuchuk beyaʼ, le tʼaan «tuláakal le máaxoʼob yanoʼoboʼ» táan u tʼaan tiʼ tuláakal le múuchʼuliloʼ. Le oʼolal juntúul ancianoeʼ yaan u tsʼáaik u yojéelt tuláakal le múuchʼulil tsʼoʼok u censurartaʼal juntúul sukuʼun wa juntúul kiikoʼ. ¿Baʼaxten ku beetaʼal beyoʼ? Apóstol Pabloeʼ tu yaʼalaj: «Beyoʼ u maasileʼ yaan xan u kanáantkoʼob maʼ u kʼebantaloʼob».

18. ¿Baʼax unaj u beetik le ancianoʼob wa ku kʼebantal juntúul paal okjaʼanajaʼanoʼ? (Ilawil xan le fotooʼ).

¹⁸ ¿Kux túun wa ku lúubul tiʼ junpʼéel nojoch kʼeban juntúul paal okjaʼanajaʼan maʼ u tsʼáa 18 años tiʼiʼ? Yaan u yaʼalaʼal tiʼ kaʼatúul ancianoʼob  ka u muchʼubaʼob yéetel le paaloʼ bey xan yéetel u papáʼob Testigoʼoboʼ. b Le ancianoʼobaʼ yaan u kʼáatkoʼob tiʼ le taatatsiloʼob baʼax tsʼoʼok u beetkoʼob utiaʼal u yáantkoʼob u hijoʼob utiaʼal ka arrepentirnakoʼ. Wa le paal ku yuʼubik le consejo ku tsʼaʼabaltiʼ tumen u papáʼoboʼ, maʼ kun kʼaʼabéettal u beetaʼal junpʼéel comité utiaʼal u muchʼkubaʼob tu yéetel. Tumen Dioseʼ tiʼ le taatatsiloʼob u tsʼaamaj u páajtalil u tsolnuʼuktik u paalaloʼob yéetel yaabilajoʼ (Deu. 6:​6, 7; Pro. 6:20; 22:6; Efe. 6:​2-4). Chéen baʼaleʼ cada wa baʼax kʼiineʼ le ancianoʼoboʼ yaan u kʼáatkoʼob tiʼ le taatatsiloʼob wa láayliʼ táan u tsʼáaikoʼob le áantaj kʼaʼabéet tiʼ u hijoʼoboʼ. Pero ¿kux túun wa maʼ tu arrepentir le paal kʼebanchajaʼanoʼ? Wa beyoʼ yaan u beetaʼal junpʼéel comité de ancianos utiaʼal u muchʼkubaʼob tu yéetel bey xan yéetel u papáʼob Testigoʼoboʼ.

«JÉEOBAEʼ JACH NOJOCH U YAABILAJ YÉETEL U CHʼAʼ ÓOTSILIL»

19. ¿Bix u beetik le ancianoʼob jeʼex Jéeoba le kéen u yáantoʼob juntúul máax tsʼoʼok u kʼebantaloʼ?

¹⁹ Le ancianoʼob yanoʼob tiʼ junpʼéel comitéoʼ u meyajoʼobeʼ u yilkoʼob u pʼáatal limpioil le múuchʼuliloʼ (1 Cor. 5:7). Chéen baʼaleʼ ku kaxtikoʼob xan ka arrepentirnak le máax tsʼoʼok u kʼebantaloʼ. Le oʼolal kéen joʼopʼok u yáantkoʼob wa máaxeʼ ku beetkoʼob yéetel u tuukulil ka arrepentirnak. ¿Baʼaxten? Tumen u kʼáat u beetoʼob jeʼex Jéeobaeʼ, letiʼeʼ «jach nojoch u yaabilaj yéetel ku chʼaʼik óotsilil» (Sant. 5: 11). Apóstol Juaneʼ, tu yaʼalaj: «In mejen paalaleʼex, táan in tsʼíibtikteʼex le baʼaloʼobaʼ utiaʼal maʼ a kʼebantaleʼex. Chéen baʼaleʼ wa yaan máax ku kʼebantaleʼ, tu yiknal le Taataoʼ yaan juntúul máax áantkoʼon, Jesucristo, juntúul máax beetik baʼax toj» (1 Juan 2:1).

20. ¿Baʼax ken k-il teʼ tuláakʼ xookoʼ?

²⁰ Yaan kʼiin xaneʼ le máax ku kʼebantaloʼ jach maʼ tu yóotik arrepentir. Wa beyoʼ unaj u jóoʼsaʼal teʼ múuchʼuliloʼ. ¿Baʼax ku beetik le ancianoʼob le kéen úuchuk junpʼéel baʼal beyaʼ? Lelaʼ yaan k-ilik teʼ tuláakʼ xookoʼ.