1. ¿Bix u yeʼesik máak tsʼoʼok u arrepentir?

 JACH kʼaʼabéet u arrepentir máak le kéen u beet junpʼéel baʼal maʼ maʼalobiʼ. Le Bibliaoʼ ku yaʼalikeʼ juntúul máakeʼ ku yeʼesik tsʼoʼok u arrepentir le kéen káajak u pʼektik le baʼax maʼ maʼalob tu beetoʼ, beyoʼ ku yeʼesik tsʼoʼok u kʼexik u tuukul yéetel tsʼoʼok u xuʼulul u beetik le baʼax maʼ maʼaloboʼ (ilawil «U kʼexik u tuukul máak», tiaʼan teʼ jaats Tʼaanoʼob ku tsoʼolol).

2. ¿Baʼaxten tuláakloʼon kʼaʼabéet k-kanik baʼax u kʼáat u yaʼal u arrepentir máak? (Nehemías 8:​9-11).

² ¿Baʼaxten tuláakloʼon kʼaʼabéet k-kanik baʼax u kʼáat u yaʼal u arrepentir máak? Tumen tuláakloʼon k-kʼebantal sáamsamal. Kʼaʼajaktoʼoneʼ k-taataʼobeʼ Adán yéetel Eva, le oʼolal k-heredarmaj le kʼeban yéetel le kíimiloʼ (Rom. 3:23; 5:12). Tak le máaxoʼob jach táaj yaan u fejoʼob jeʼex apóstol Pabloeʼ kʼaʼabéetchaj u baʼateloʼob tu contra le kʼebanoʼ (Rom. 7:​21-24). ¿U kʼáat wa túun u yaʼaleʼ kʼaʼabéet u yaatal k-óol mantatsʼ yoʼolal k-kʼebanoʼob? Maʼatech, Jéeobaeʼ jach ku chʼaʼiktoʼon óotsilil yéetel letiʼeʼ jach u kʼáat ka kiʼimakchajak k-óol. Koʼoneʼex ilik baʼax úuch tiʼ le judíoʼob tu kʼiiniloʼob Nehemíasoʼ (xok Nehemías 8:​9-11). Jéeobaeʼ maʼ u kʼáat kaʼach ka pʼáatkoʼob mantatsʼ tristeʼob yoʼolal le kʼeban u beetmoʼoboʼ, baʼaxeʼ u kʼáat kaʼach ka adorartaʼak yéetel kiʼimak óolal. Letiʼeʼ u yojel le máax ku arrepentiroʼ ku kiʼimaktal u yóol, le oʼolal ku yaʼalik ka arrepentirnakoʼon tiʼ k-kʼebanoʼob. Wa k-beetik beyoʼ Jéeobaeʼ yaan u perdonarkoʼon tumen jach ku chʼaʼik óotsilil.

3. ¿Baʼax ken k-il teʼ xookaʼ?

³ Teʼ xookaʼ yaan k-kanik u maasil yoʼolal bix u arrepentir máak. Yáaxeʼ yaan k-ilik baʼax tu kaʼansaj Jéeoba tiʼ u kaajil  Israel yoʼolal bix u arrepentir máakoʼ. Kéen tsʼoʼokkeʼ yaan k-ilik bix tsʼoʼok u yáantik Jéeoba yaʼab máak utiaʼal ka arrepentirnakoʼob. Tu tsʼookeʼ yaan k-ilik le baʼax tu kaʼansaj Jesús tiʼ u discípuloʼob yoʼolal le máaxoʼob ku arrepentiroʼoboʼ.

JÉEOBAEʼ TU KAʼANSAJ TIʼ U KAAJAL BIX U ARREPENTIR MÁAK

4. ¿Bix úuchik u kaʼansik Jéeoba tiʼ u kaajil Israel bix u arrepentir máak?

⁴ Le ka tu yéeyaj Jéeoba le israelitaʼob utiaʼal ka u beetubaʼob u kaajaloʼ, tu beetaj junpʼéel pacto tu yéeteloʼob. Tu yaʼalajtiʼobeʼ wa ku beetkoʼob le baʼax ku yaʼalik le Leyoʼ yaan u kanáantkoʼob yéetel yaan u bendecirkoʼob. Tu yaʼalaj: «Le mandamientoʼob táan in tsʼáaiktech bejlaʼoʼ maʼ junpʼéel baʼal jach istikyaj a beetkiʼ mix junpʼéel baʼal jach náach yanil tiʼ techiʼ» (Deu. 30:​11, 16). Chéen baʼaleʼ wa ka pʼáatak maʼ tu yuʼubikoʼob tʼaan, por ejemplo ku káajal u adorarkoʼob yaanal diosoʼobeʼ, Jéeobaeʼ yaan u xuʼulul u bendecirkoʼob. ¿U kʼáat wa túun u yaʼaleʼ tsʼoʼoktiʼob beyoʼ? Maʼ, tumen le Leyoʼ ku yaʼalik kaʼacheʼ jeʼel u páajtal u kaʼa natsʼkubaʼob tu yiknal Jéeoba yéetel u yuʼubikoʼob u tʼaaneʼ (Deu. 30:​1-3, 17-20). Beyoʼ yaan u yeʼeskoʼob arrepentidoʼob, Jéeoba túuneʼ yaan u náatsʼal tu yiknaloʼob yéetel yaan u kaʼa bendecirkoʼob.

5. ¿Bix úuchik u yeʼesik Jéeoba maʼ tu tuklaj wa tsʼoʼok tiʼ u kaajal beyoʼ? (2 Reyes 17:​13, 14).

⁵ U kaajil Israeleʼ yaʼab u téenel maʼ tu yuʼubaj u tʼaan Jéeobaiʼ. Letiʼobeʼ tu adorartoʼob yaanal diosoʼob yéetel tu beetoʼob baʼaloʼob jach kʼaastak. Yoʼolal leloʼ jach sufrirnajoʼob. Pero Jéeobaeʼ maʼ tu tuklaj wa tsʼoʼoktiʼob beyoʼ. Letiʼeʼ yaʼab u téenel tu túuxtaj profetaʼob utiaʼal u yaʼaliktiʼob ka arrepentirnakoʼob yéetel ka suunakoʼob tu yiknal (xok 2 Reyes 17:​13, 14).

6. ¿Bix úuchik u meyaj tiʼ Jéeoba le profetaʼob utiaʼal u yáantik u kaajal utiaʼal ka arrepentirnakoʼoboʼ? (Ilawil xan le dibujooʼ).

⁶ Jéeobaeʼ mantatsʼ tu túuxtaj u profetaʼob utiaʼal ka u tsolnuʼuktoʼob u kaajal. Por ejemploeʼ tu túuxtaj Jeremías u yaʼal: «Israel, x-terca kaaj, suunakech tin wiknal […].  Maʼ ken in pakteʼex yéetel kʼuuxilil, tumen teneʼ chúukaʼan in wóol […]. Maʼ mantatsʼ kin pʼáatal kʼuuxilnajaʼaneniʼ. In kaajal, tsʼáa cuenta jach kʼaas baʼax tsʼoʼok a beetik, tumen tsʼoʼok a tsʼáaikaba tu contra Jéeoba a Dios» (Jer. 3:​12, 13). Tsʼoʼoleʼ tu túuxtaj xan u yaʼal Joel: «Suuneneʼex tin wiknal yéetel tuláakal a puksiʼikʼaleʼex» (Joel 2:​12, 13). Isaías xaneʼ tu yaʼalaj: «Ilawil a limpiokíinkabaʼex tin táan. Luʼseʼex tin táan le baʼaloʼob kʼaastak ka beetkeʼexoʼ. Xuʼuluk a beetkeʼex le baʼax maʼ maʼaloboʼ» (Isa. 1:​16-19). Jéeobaeʼ tu túuxtaj Ezequiel u yaʼal xan: «Teneʼ jach junpuliʼ maʼatech u kiʼimaktal in wóol le kéen kíimik juntúul kʼasaʼan máak, baʼax kiʼimakkúuntik in wóoleʼ ka xuʼuluk u beetik baʼaloʼob kʼaastak utiaʼal ka seguernak u kuxtal». «Teneʼ jach junpuliʼ maʼatech u kiʼimaktal in wóol le kéen kíimik wa máax, le oʼolaleʼ suuneneʼex tin wiknal utiaʼal u seguer a kuxtaleʼex» (Eze. 18:​23, 32). Jeʼex k-ilkoʼ Jéeobaeʼ jach uts tu tʼaan u arrepentir máak tumen u yojel wa ku beetik beyoʼ yaan u kuxtal utiaʼal mantatsʼ. Le oʼolal letiʼeʼ yaan baʼax ku beetik, maʼ chéen ku méekʼik u kʼab u páaʼt u arrepentir le máax tsʼoʼok u kʼebantaloʼ. Koʼoneʼex ilik jujunpʼéel ejemploʼob.

7. Le baʼax úuch tiʼ profeta Oseas yéetel u yatanoʼ, ¿baʼax tu kaʼansaj tiʼ u kaajil Israel?

⁷ Koʼoneʼex ilik baʼax tu kaʼansaj Jéeoba tiʼ u kaajal yoʼolal le baʼax úuch tiʼ Gómer, u yatan profeta Oseasoʼ. Gómereʼ lúub tiʼ núupkʼeban, tsʼoʼoleʼ tu pʼataj Oseaseʼ ka bin tu paach uláakʼ xiiboʼob. ¿Tsʼoʼok wa tiʼ Gómer beyoʼ? Kʼaʼajaktoʼoneʼ Jéeobaeʼ ku páajtal u yilik baʼax yaan tu puksiʼikʼal máak, tu yaʼalaj tiʼ Oseas: «Xeen, yaabilt tu kaʼatéen le koʼolel yaabiltaʼan tumen uláakʼ xiiboʼ, le koʼolel bin tu paach uláakʼ xiiboʼ. Yaabilt jeʼex u yaabiltmil Jéeoba u kajnáaliloʼob Israeloʼ, letiʼeʼ u yaabiltmoʼob kex táan u adorarkoʼob uláakʼ diosoʼob» (Ose. 3:1; Pro. 16:2). Kʼaʼabéet k-chʼaʼik en cuentaeʼ u yatan Oseaseʼ láayliʼ táan u kʼebantaleʼ. Pero kex beyoʼ Jéeobaeʼ tu yaʼalaj tiʼ Oseas ka u perdonarte yéetel ka suunak tu yéetel. a Leloʼ ku yeʼesikeʼ Jéeobaeʼ yaan kaʼach u tsʼáaik uláakʼ oportunidad tiʼ u kaajal. Kex letiʼob táan kaʼach u beetkoʼob baʼaloʼob jach kʼaastakeʼ, letiʼeʼ todavía u yaabiltmoʼob yéetel yaan u yáantkoʼob utiaʼal ka arrepentirnakoʼob bey xan utiaʼal u kaʼa tojkíint u kuxtaloʼob. Le ejemploaʼ ku kaʼansiktoʼoneʼ Jéeobaeʼ ku yilik baʼax yaan ichil u puksiʼikʼal máak yéetel taak xan u yáantik le máaxoʼob ku kʼebantaloʼob utiaʼal ka arrepentirnakoʼoboʼ (Pro. 17:3).

BIX U YAANTIK MÁAK JÉEOBA UTIAʼAL KA ARREPENTIRNAK

8. ¿Baʼax tu beetaj Jéeoba utiaʼal u yáantik Caín? (Génesis 4:​3-7; ilawil xan le dibujooʼ).

⁸ Caíneʼ u yáax hijo Adán yéetel Eva, letiʼeʼ tu heredartaj le kʼebanoʼ. Le Bibliaoʼ ku yaʼalikeʼ Caíneʼ «kʼaastak le baʼaxoʼob ku beetkoʼ» (1 Juan 3:12). Le oʼolal ku yaʼalik xaneʼ «Caíneʼ maʼ lúub utsil tiʼ Diosiʼ mix xan le baʼax tu kʼuboʼ». Tu lugar u kʼexik bix u tuukuleʼ «Caíneʼ sen pʼuʼuji yéetel jach lúub u yóol». ¿Baʼax túun tu beetaj Jéeoba? Tu tʼanaj Caín (xok Génesis 4:​3-7). Jéeobaeʼ yéetel yaabilaj tu yaʼalajtiʼ ka u kʼex u tuukul tumen wa maʼ tu beetkeʼ yaan u lúubul tiʼ baʼax kʼaas. Pero Caíneʼ maʼ tu yuʼubaj tʼaaniʼ. Maʼ tu chaʼaj u yáantaʼal tumen Jéeobaiʼ. Yoʼolal le baʼax tu beetaj Caínoʼ, ¿xuʼul wa u taaktal u yáantik Jéeoba le máaxoʼob ku lúubloʼob tiʼ kʼeban utiaʼal ka arrepentirnakoʼoboʼ? Maʼatech.

9. ¿Bix úuchik u yáantaʼal David tumen Jéeoba utiaʼal ka arrepentirnak?

 ⁹ Jéeobaeʼ jach u yaabiltmaj kaʼach rey David. Tu yaʼalaj tu yoʼolal: «Letiʼeʼ jach ku lúubulten utsil» (Hech. 13:22). Chéen baʼaleʼ Davideʼ lúub tiʼ nukuch kʼebanoʼob, núupkʼebanchaji yéetel tu túuxtaj kíimsbil juntúul máak. Le Ley tsʼaʼab tiʼ Moisésoʼ ku yaʼalikeʼ le máax beetik le baʼaloʼob beyaʼ kʼaʼabéet u kíimil (Lev. 20:10; Núm. 35:31). Pero Jéeobaeʼ como jach utseʼ tu yáantaj utiaʼal ka arrepentirnak. Tu túuxtaj profeta Natán utiaʼal ka xiʼik u yil David kex letiʼ maʼ u yeʼes wa arrepentidoiʼ. b Natáneʼ meyajnajtiʼ junpʼéel ejemplo utiaʼal u péeksik u yóol David. Le baʼax aʼalaʼab tiʼ Davidoʼ jach kʼuch tu puksiʼikʼal, ka túun arrepentirnaji (2 Sam. 12:​1-14). Letiʼeʼ tu tsʼíibtaj junpʼéel salmo tuʼux ku yeʼesik jach tu jaajil arrepentido (Sal. 51, encabezamiento). Le salmoaʼ tsʼoʼok u yáantik yaʼab máakoʼob utiaʼal ka arrepentirnakoʼob. ¿Máasaʼ jach ku kiʼimakkúuntik k-óol k-ilik bix úuchik u yáantaʼal David tumen Jéeoba utiaʼal ka arrepentirnak?

10. ¿Bix a wuʼuyikaba ikil a wojéeltik Jéeobaeʼ jach ku yeʼesiktoʼon paciencia yéetel ku perdonarkoʼon?

¹⁰ Jéeobaeʼ jach u pʼekmaj le kʼebanoʼ (Sal. 5:​4, 5). Pero letiʼeʼ u yojel deporsi kʼebanoʼon, tsʼoʼoleʼ como u yaabiltmoʼoneʼ ku yáantkoʼon kéen lúubkoʼon tiʼ kʼeban. Ku taaktal u yáantik tak le máaxoʼob u beetmoʼob baʼaloʼob jach kʼaastak utiaʼal ka arrepentirnakoʼoboʼ. ¡Jach ku kiʼimaktal k-óol k-ojéeltik leloʼ! Wa k-tuukul tiʼ le paciencia ku yeʼesik Jéeoba yéetel bix u perdonarkoʼonoʼ, ku taaktal u chúukpajal k-óol tiʼ yéetel wa k-lúubul tiʼ kʼebaneʼ ka séeb arrepentirnakoʼon. Beoraaʼ koʼoneʼex ilik bix tu kaʼansil Jesús tiʼ u discípuloʼob u kʼaʼanaʼanil u arrepentir máak.

BIX TU KAʼANSIL JESÚS U KʼAʼANAʼANIL U ARREPENTIR MÁAK

11, 12. ¿Baʼax ejemploil meyajnaj tiʼ Jesús utiaʼal u kaʼansik Jéeobaeʼ jach taak u perdonarkoʼon? (Ilawil le dibujooʼ).

¹¹ Teʼ yáax siglo chíikpaj le Mesíasoʼ. Teʼ xook máanikoʼ t-kaneʼ Juan Bautista yéetel Jesúseʼ  tu kaʼansoʼob tiʼ le máakoʼob u kʼaʼanaʼanil u arrepentiroʼoboʼ (Mat. 3:​1, 2; 4:17).

¹² Teʼ tiempo táan u kaʼansaj Jesús way Luʼumeʼ tu yeʼesaj bix u perdonar Jéeoba. Lelaʼ tu beetaj yéetel u tsikbalil le xiʼipal tu xuʼuxupaj u taakʼineʼ. Le xiʼipalaʼ tiʼ junpʼéel tiempoeʼ tu bisaj junpʼéel kʼaakʼas kuxtal. Chéen baʼaleʼ «kʼaʼaj u yiikʼeʼ», ka suunaj tu yotoch. ¿Baʼax tu beetaj u papá le ka suunajoʼ? Jesúseʼ tu yaʼalaj: «Desde náach u taaleʼ ilaʼab tumen u papáeʼ ka chʼaʼab óotsilil tiʼ. U papá túuneʼ bin áalkabil tu yiknaleʼ tu méekʼeʼ ka tu tsʼuʼutsʼaj». Le xiʼipalaʼ u kʼáat kaʼach ka tratartaʼak bey juntúul u j-meyajoʼob u papáeʼ, pero u papáeʼ tu yaʼalaj: «Le in hijoaʼ [ . . . ] saatal kaʼachi, chéen baʼaleʼ kaxtaʼabi» (Luc. 15:​11-32). Le tiaʼan kaʼach Jesús teʼ kaʼan antes tiʼ u taal way Luʼumeʼ, tu yilaj yaʼab u téenel bix u chʼaʼik óotsilil Jéeoba tiʼ le máaxoʼob ku kʼebantaloʼob ku arrepentiroʼobo. Le oʼolal jach jatsʼuts bix úuchik u yeʼesik bix u chʼaʼik óotsilil Jéeoba.

13, 14. ¿Baʼax tu kanaj Pedro yoʼolal bix tratartaʼabik tumen Jesús, yéetel baʼax tu kaʼansaj tiʼ u maasil? (Ilawil xan le dibujooʼ).

¹³ Le bix tratartaʼabik Pedro tumen Jesúsoʼ tu kaʼansajtiʼeʼ Jéeobaeʼ ku perdonartik le máaxoʼob ku arrepentiroʼoboʼ. Pedroeʼ yaʼab u téenel tu beetaj baʼaloʼob maʼ maʼalobtakiʼ, le beetik Jesúseʼ yaʼab u téenel xan kʼaʼabéetchaj u perdonartik. Por ejemploeʼ Pedroeʼ óoxtéen tu yaʼalaj maʼ u kʼaj óol Jesúsiʼ, ka tsʼoʼokeʼ jach yaachaj u yóol yoʼolal le baʼax tu beetoʼ (Mat. 26:​34, 35, 69-75). Pero le ka kaʼa kuxlaj Jesúseʼ tu chíikbesuba tiʼ Pedro le tiaʼan chéen tu juunaloʼ (Luc. 24:​33, 34; 1 Cor. 15:​3-5). Teʼ kʼiin jeʼeloʼ Jesúseʼ tu perdonartaj yéetel tu líiʼsaj u yóol tumen tu yilaj jach tu jaajil tsʼoʼok u arrepentir (Mar. 16:7).

¹⁴ Pedroeʼ beoraaʼ jeʼel u páajtal kaʼach u kaʼansik tiʼ u maasil bix u arrepentir yéetel bix u perdonartaʼal máakeʼ. Ka máan junpʼéel tiempo tsʼoʼokok le Pentecostésoʼ, Pedroeʼ tu  máansaj junpʼéel discurso tu táan yaʼab judíoʼob maʼ tu kʼamoʼob Jesúsiʼ. Tu yaʼalajtiʼobeʼ letiʼob kíims le Mesíasoʼ. Yéetel yaabilajeʼ tu yaʼalajtiʼob xan: «Kʼex a tuukuleʼex yéetel utskíint a kuxtaleʼex utiaʼal ka perdonartaʼak a kʼebaneʼex. Bey túunoʼ Jéeobaeʼ yaan u beetik u yantalteʼex jeetsʼelil» (Hech. 3:​14, 15, 17, 19). Pedroeʼ tu kaʼanseʼ le máax ku arrepentiroʼ ku kʼexik u tuukul, ku xuʼulul u beetik le baʼax kʼaasoʼ utiaʼal u kuxtal jeʼex uts tu tʼaan Dioseʼ. Tu yaʼalaj xaneʼ le kéen u perdonart máak Jéeobaeʼ, bey ka u borrart tuláakal u kʼebanoʼobeʼ. Ka máan yaʼab añoseʼ Pedroeʼ tu yaʼalaj tiʼ le sukuʼunoʼoboʼ: «Jéeobaeʼ […] maʼ u kʼáat ka xuʼulsaʼak tiʼ mix máakiʼ, baʼaxeʼ u kʼáat ka u kʼex u tuukul tuláakal máak» (2 Ped. 3:9). Jach jatsʼuts le esperanza yaan tiʼ le máaxoʼob ku kʼebantaloʼoboʼ, tak tiʼ le máaxoʼob ku beetkoʼob baʼaloʼob jach kʼaastakoʼ.

15, 16. 1) ¿Baʼax tu kanaj apóstol Pablo yoʼolal bix perdonartaʼabik letiʼ? (1 Timoteo 1:​12-15). 2) ¿Baʼax ken k-il teʼ tuláakʼ xookoʼ?

¹⁵ Sauloeʼ juntúul máak jach tu beetaj baʼaloʼob kʼaastak. Letiʼeʼ tu chʼaʼpachtaj u discípuloʼob Jesús. Maʼ xaaneʼ yaʼab máakoʼob tukleʼ minaʼan utskíinajil tiʼ yéetel mix bikʼin kun arrepentir. Pero Jesúseʼ maʼ tu tuukul jeʼex u tuukul máakeʼ. Letiʼ yéetel u Taataeʼ tu yiloʼob le jatsʼuts modos yaan tiʼ Saulooʼ. Jesúseʼ tu yaʼalaj: «Letiʼeʼ bey junpʼéel nuʼukul in yéeymaj[eʼ]» (Hech. 9:15). Jesúseʼ yéetel junpʼéel milagro tu yáantaj Saulo utiaʼal ka arrepentirnak (Hech. 7:58–8:3; 9:​1-9, 17-20). Ka tu beetuba u discípulo Jesúseʼ, Sauloeʼ kʼuch kʼaj óoltbil bey apóstol Pabloeʼ. Letiʼeʼ mantatsʼ kaʼach ku agradecertik tiʼ Jéeoba yéetel tiʼ Jesús úuchik u chʼaʼikoʼob óotsilil tiʼ (xok 1 Timoteo 1:​12-15). Pabloeʼ tu yaʼalaj: «Yoʼolal u yutsil Dioseʼ táan u yilik u nuʼuktikech utiaʼal ka a kʼex a tuukul» (Rom. 2:4).

¹⁶ Apóstol Pabloeʼ tu yojéelteʼ tu múuchʼulil Corintoeʼ táan kaʼach u yúuchul núupkʼebaniʼ. ¿Baʼax túun tu beetaj? Tu kaʼanseʼ Jéeobaeʼ yéetel yaabilaj ku tsolnuʼuktik máak yéetel ku chʼaʼik óotsilil. Teʼ tuláakʼ xookoʼ yaan k-kanik u maasil yoʼolal le baʼax tu yaʼaloʼ.