Apóstol Pabloeʼ tu tsʼíibtaj tiʼ le sukuʼunoʼob yanoʼob Tesalónicaoʼ: «Wa yaan máax maʼ u kʼáat u tsʼoʼokbes le baʼax k-aʼalikteʼex teʼ cartaaʼ unaj a kanáantkabaʼex tiʼ letiʼ» wa unaj a weʼeskeʼex máaxiʼ (2 Tes. 3:14). Kaʼacheʼ le ancianoʼoboʼ ku máanskoʼob junpʼéel discurso de señalamiento wa yaan juntúul wa máax teʼ múuchʼulil táan u beetik baʼaloʼob ku bin tu contra le Bibliaoʼ. Kéen tsʼoʼokkeʼ le publicadoroʼoboʼ chéen jeʼel u páajtal u tsikbaloʼob tu yéetel teʼ reuniónoʼoboʼ bey xan teʼ kʼaʼaytajoʼ, pero maʼ tu páajtal u náaysik u yóoloʼob tu yéetel.

Chéen baʼaleʼ kʼaʼabéetchaj u kʼeʼexel le baʼax ku beetaʼaloʼ tumen le baʼax ku yaʼalik Pablo teʼ tekstoaʼ, cada juntúul tiʼ le múuchʼulil kʼaʼabéet u chʼaʼtuklik baʼax ken u beet tu yoʼolaloʼ. Le oʼolal maʼ kʼaʼabéet u máansaʼal junpʼéel discurso tumen le ancianoʼob utiaʼal u yeʼeskoʼob máax le táan u beetik junpʼéel baʼax maʼ maʼaloboʼ. ¿Baʼaxten kʼeʼexi? Táanileʼ kʼaʼabéet k-naʼatik tiʼ baʼax táan u tʼaan apóstol Pablo.

Pabloeʼ tu tsʼáaj cuentaeʼ jujuntúul tiʼ le yanoʼob teʼ múuchʼuliloʼ ‹maʼ tu yuʼubikoʼob tʼaan›. Maʼ tu beetoʼob le baʼax tu yaʼalajtiʼob le ka yáax binoʼ. Letiʼeʼ tu yaʼalajtiʼob: «Wa yaan máax maʼ u kʼáat meyajeʼ, maʼ u janal xan». Yaneʼ kex jeʼel u páajtal u meyajeʼ maʼ tu yóotik u beete, baʼaleʼ chéen ku yoksikuba tiʼ baʼax maʼ unajiʼ. Le máakoʼob beyaʼ, ¿bix unaj u tratartaʼaloʼob tumen le múuchʼuliloʼ? (2 Tes. 3:​6, 10-12).

Apóstol Pabloeʼ tu yaʼalaj: «Unaj a weʼeskeʼex máaxiʼ» wa señalarteʼex. Le tʼaan griego ku meyaj teʼelaʼ ku tsʼáaik naʼatbileʼ unaj u kanáantkuba máak tiʼ. Le baʼax tu yaʼalaj Pablooʼ maʼ chéen tu yaʼalaj tiʼ le ancianoʼoboʼ, baʼaxeʼ tiʼ tuláakal le múuchʼuliloʼ (2 Tes. 1:1; 3:6). Le oʼolal cada juntúul tiʼ le máaxoʼob yanoʼob teʼ múuchʼuliloʼ wa ku yilik yaan juntúul sukuʼun maʼ tu yuʼubik tʼaaneʼ jeʼel u páajtal u chʼaʼtuklik u xuʼulul u biskuba tu yéeteleʼ.

¿U kʼáat wa túun u yaʼaleʼ unaj u tratartaʼal jeʼex juntúul máak jóoʼsaʼan teʼ múuchʼuliloʼ? Maʼatech. Pabloeʼ tu yaʼalaj: «Seguernak a tsolkeʼex u nuʼuk tiʼ jeʼex juntúul sukuʼuneʼ». Leloʼ u kʼáat u yaʼaleʼ le sukuʼunoʼob yanoʼob teʼ múuchʼuliloʼ jeʼel u páajtal u saludarkoʼob yéetel u jóokʼloʼob kʼaʼaytaj tu yéeteleʼ. Pero maʼ unaj u múul jóokʼloʼob xíimbal tu yéeteliʼ mix u yantaloʼob tiʼ junpʼéel reunión socialiʼ. ¿Baʼaxten? Pabloeʼ tu yaʼalaj: «Utiaʼal ka suʼlakchajak». Maʼ xaaneʼ yoʼolal leloʼ le máax maʼ tu beetik baʼax maʼaloboʼ jeʼel u suʼlaktaleʼ yéetel jeʼel u kʼexik le baʼax ku beetkoʼ (2 Tes. 3:​14, 15).

¿Bix jeʼel k-tsʼáaik cuenta wa unaj k-señalartik wa máaxeʼ? Yáaxeʼ jeʼex tu yaʼalil Pabloeʼ unaj k-asegurartikba wa jach tu jaajil maʼ tu yuʼubik tʼaan juntúul sukuʼun teʼ múuchʼuliloʼ. Tumen Pabloeʼ maʼ táan kaʼach u tʼaan tiʼ máaxoʼob ku beetkoʼob baʼaloʼob yaan yil yéetel u conciencia máakiʼ wa uláakʼ baʼaloʼob maʼ tu bin tu contra le baʼax ku yaʼalik le Bibliaoʼ. Yéetel maʼ táan kaʼach u tʼaan tiʼ máaxoʼob tsʼoʼok u beetik u yaatal k-óoliʼ. Baʼaxeʼ Pabloeʼ tʼaanaj tiʼ máakoʼob taaliʼtiʼob u beetkoʼob baʼaloʼob ku bin tu contra le Bibliaoʼ.

Wa yaan juntúul sukuʼun junpuliʼ maʼ tu yuʼubik tʼaaneʼ a jeʼel u páajtal k-chʼaʼtuklik u xuʼulul k-múul jóokʼol xíimbal tu yéeteleʼ wa k-múul náaysik k-óol tu yéeteliʼ. Chéen baʼaleʼ maʼ unaj k-aʼalik tiʼ u maasil sukuʼunoʼob teʼ múuchʼulil ka xuʼuluk u biskubaʼob tu yéeteliʼ. Teʼ muchʼtáambaloʼoboʼ jeʼel u páajtal k-saludarkeʼ yéetel jeʼel u páajtal k-múul jóokʼol kʼaʼaytaj tu yéeteleʼ. Le kéen u yutskíint le baʼax ku beetkoʼ jeʼel u béeytal k-kaʼa bisikba tu yéeteleʼ.