1. ¿Baʼax unaj u beetik le sukuʼunoʼob utiaʼal ka xiʼiktiʼob maʼalobiloʼ?

 APÓSTOL Pabloeʼ tu yaʼalaj tiʼ le sukuʼunoʼob yanoʼob Corintooʼ: «Sukuʼuneʼex, maʼ a beetkabaʼex jeʼex mejen paalal tiʼ bix a tuukuleʼexeʼ, baʼaxeʼ [ . . . ] tuukulneneʼex jeʼex u tuukul nukuch máakoʼobeʼ» (1 Cor. 14:20). Tuláakal le sukuʼunoʼoboʼ kʼaʼabéet u beetkoʼob le baʼax ku yaʼalik le tekstoaʼ. Utiaʼal ka xiʼiktiʼob maʼalobeʼ kʼaʼabéet u tsʼáaikoʼob ichil u kuxtaloʼob le baʼax ku yaʼalik Jéeoba teʼ Bibliaoʼ (Luc. 2:52). Le táankelmoʼoboʼ, ¿baʼaxten jach kʼaʼabéet u yiijchajal u tuukuloʼob?

2, 3. ¿Baʼaxten kʼaʼabéet u yiijchajal u tuukul le táankelmoʼoboʼ?

² Le sukuʼunoʼoboʼ jach yaʼab responsabilidad yaantiʼob ichil u familiaʼob yéetel teʼ múuchʼuliloʼ. Wa táankelmecheʼ maʼ xaaneʼ tsʼoʼok a tuukul tiʼ tuláakal le responsabilidadoʼob kun antaltech maas táaniloʼ. Maʼ xaaneʼ techeʼ taak a beetik a precursoril, a siervo ministerialil wa a ancianoil. Maʼ xaan xaneʼ taak u tsʼoʼokol a beel yéetel u yantal a paalal (Efe. 6:4; 1 Tim. 3:1). Utiaʼal a beetik tuláakal le baʼaloʼobaʼ yéetel utiaʼal ka xiʼiktech maʼalobileʼ kʼaʼabéet u yiijtal a tuukul. b

³ ¿Baʼax jeʼel u yáantkech utiaʼal ka yiijchajak a tuukuleʼ? ¿Baʼaxoʼob kʼaʼanaʼantak unaj a kanik? ¿Bix jeʼel a prepararkaba desde beora utiaʼal a beetik maʼalob le meyajoʼob kun tsʼaabiltech maas táaniloʼ? Koʼoneʼex ilik.

4. ¿Tuʼux jeʼel a wilik maʼalob ejemploʼobeʼ? (Ilawil xan le fotoʼoboʼ).

⁴ Seguert maʼalob ejemploʼob. Jeʼel u páajtal a wilik u ejemplo le máakoʼob jach chúukpajal u yóol u meyajtoʼob Jéeoba ku chʼaʼchiʼitaʼaloʼob teʼ Bibliaoʼ. Letiʼobeʼ tu yeʼesoʼob u yaabiltmoʼob Dios yéetel tu kanáantoʼob u kaajal. Teʼ kʼiinoʼob xanaʼ ichil  a familia bey xan teʼ múuchʼuliloʼ yaan sukuʼunoʼob yiijchajaʼan u tuukuloʼob jeʼel u páajtal a seguertik u ejemploʼobeʼ (Heb. 13:7). Pero le ejemplo maas maʼalob yaantoʼonoʼ Jesucristo (1 Ped. 2:21). Le kéen a xakʼalt u ejemplo tuláakal le máakoʼobaʼ, tuukulnen tiʼ le jatsʼuts modos yaantiʼoboʼ (Heb. 12:​1, 2). Kéen tsʼoʼokkeʼ ka wilik bix jeʼel u páajtal a beetik jeʼex letiʼobeʼ.

5. ¿Baʼax unaj a beetik utiaʼal ka yanaktech junpʼéel maʼalob tuukul yéetel baʼaxten kʼaʼanaʼan ka yanaktech? (Salmo 119:9).

⁵ Yanaktech yéetel «kanáant [ . . . ] le maʼalob tuukul yaantechoʼ» (Pro. 3:21). Le máaxoʼob beetik le baʼax ku yaʼalik le tekstooʼ ku jóoʼskoʼob tiempo utiaʼal u tuklikoʼob baʼax ken u beetoʼob antes u chʼaʼikoʼob junpʼéel decisión. Le oʼolaleʼ beet tuláakal le ku páajtal utiaʼal ka yanaktech junpʼéel maʼalob tuukul mantatsʼ. ¿Baʼaxten unaj a beetik beyoʼ? Tumen teʼ yóokʼol kaabaʼ yaʼab táankelmoʼobeʼ chéen ku beetkoʼob le baʼax ku tuklikoʼoboʼ, wa chéen ku beetkoʼob wa baʼax yoʼolal bix u yuʼubikubaʼob teʼ súutukoʼ (Pro. 7:7; 29:11). Tsʼoʼoleʼ le baʼax ku máansaʼal teʼ televisiónoʼ, teʼ películaʼoboʼ, tiʼ Internet yéetel teʼ redes socialesoʼ jeʼel u kʼexik u tuukul máakeʼ. ¿Baʼax túun unaj a beetik utiaʼal ka yanaktech junpʼéel maʼalob tuukul? Yáaxeʼ kʼaʼabéet a kanik baʼax ku yaʼalik le Bibliaoʼ yéetel a tuklik baʼaxten maʼalob le baʼax ku yaʼalik ka k-beetoʼ. Kéen tsʼoʼokok túuneʼ chʼaʼ en cuenta tuláakal le baʼax tsʼoʼok a kanik utiaʼal ka páajchajak a chʼaʼik decisiónoʼob jeʼel u beetik u kiʼimaktal u yóol Jéeobaeʼ (xok Salmo 119:9). Utiaʼal ka yiijchajak a tuukuleʼ jach kʼaʼabéet u yantaltech junpʼéel maʼalob tuukul (Pro. 2:​11, 12; Heb. 5:14). Beoraaʼ koʼoneʼex ilik bix jeʼel u yáantkech le maʼalob tuukul utiaʼal a wilik 1) bix jeʼel a tratartik maʼalob le kiikoʼoboʼ yéetel 2) bix unaj a vestirkaba.

6. Juntúul táankelem maʼalob u tuukuleʼ, ¿bix jeʼel u yeʼesik ku respetartik le kiikoʼoboʼ?

⁶ Le maʼalob tuukuloʼ yaan u yáantkech a respetart le koʼoleloʼoboʼ. Por ejemploeʼ maʼ xaaneʼ juntúul sukuʼuneʼ uts tu yich juntúul kiik yéetel taak u maas kʼaj óoltik. U jaajileʼ maʼ kʼaas le baʼax ku beetkoʼ. Wa juntúul táankelem maʼalob u tuukuleʼ maʼ ken u yaʼal mix ken u túuxt mensajeʼob tiʼ juntúul kiik wa minaʼantiʼ u tuukulil u tsʼoʼokol u beel tu yéetel (1 Tim. 5:​1, 2). Tsʼoʼoleʼ wa tsʼoʼok u káajal u biskuba tu yéeteleʼ ku  kanáantik maʼ u beetik u yúuchul tʼaan kʼaas tiʼ le kiikoʼ. Yéetel ku yilik xan maʼ u pʼáatloʼob chéen tu juunaloʼob, baʼaxeʼ ku yilik ka láakʼintaʼakoʼob tumen wa máax yiijchajaʼan u tuukul (1 Cor. 6:18).

7. Le táankelem maʼalob u tuukuloʼ, ¿baʼax ken u chʼaʼ en cuenta tu yorail u chʼaʼtuklik bix ken u vestirtiluba?

⁷ Juntúul táankelmeʼ jeʼel u páajtal u yeʼesik ku tuukul jeʼex Jéeoba yoʼolal le nookʼ ku tsʼáaikoʼ bey xan yoʼolal bix u xáacheʼtik u pool. U suukileʼ le máaxoʼob diseñartik le nookʼoʼoboʼ maʼatech u respetarkoʼob Jéeoba yéetel jach kʼaas bix u kuxtaloʼob. Le oʼolal le nookʼ ku beetkoʼoboʼ jach tetepʼkil, yaan horaeʼ hasta jeʼel u beetik u yilaʼal bey koʼolel le xiiboʼoboʼ. Chéen baʼaleʼ juntúul táankelem yiijchajaʼan u tuukuleʼ tu yorail u chʼaʼtuklik bix ken u vestirtilubaeʼ unaj u chʼaʼik en cuenta le baʼax ku yaʼalik le Biblia yéetel le maʼalob ejemploʼob yaan teʼ múuchʼuliloʼ. Maʼ xaaneʼ jeʼel u páajtal u tuukul tiʼ lelaʼ: «Le baʼaxoʼob kin chʼaʼtuklikoʼ, ¿ku yeʼesik wa maʼalob in tuukul? ¿Ku yeʼesik wa xan kin respetartik le baʼax ku tuklik u maasiloʼ? Le bix in vestirkinbaoʼ, ¿ku yeʼesik wa táan in meyajtik Jéeoba?» (1 Cor. 10:​31-33; Tito 2:6). Le táankelmoʼob maʼalob u tuukuloʼoboʼ ku respetartaʼaloʼob tumen le sukuʼunoʼoboʼ bey xan tumen Jéeoba.

8. ¿Bix jeʼel u yeʼesik responsable juntúul táankelmeʼ?

⁸ Eʼes responsableech. Ichil leloʼ táakaʼan a tsʼoʼokbesik tuláakal le baʼax ku kʼubéentaʼaltechoʼ (Luc. 16:10). Tuukulnen tiʼ u ejemplo Jesús, letiʼeʼ mantatsʼ tu tsʼoʼokbesaj le baʼax kʼubéentaʼabtiʼoʼ tak le baʼaloʼob maʼ chéen chʼaʼabil u beetaʼaloʼ. Letiʼeʼ jach u yaabiltmaj tuláakal máak, tsʼoʼoleʼ jach u yaabiltmaj xan u discípuloʼob le oʼolal tu yóotaj u kʼub u kuxtal tu yoʼolaloʼob (Juan 13:1). Jeʼex Jesúseʼ beet tuláakal le ku páajtal utiaʼal a tsʼoʼokbesik le asignaciónoʼob ku tsʼaʼabaltechoʼ. Wa maʼ a wojel bix jeʼel a beetkeʼ eʼes kabal óolal, kʼáat tiʼ juntúul sukuʼun yiijchajaʼan u tuukul ka u kaʼansech. Maʼ a conformar chéen ka a beet junpʼíitiʼ (Rom. 12:11). Beet tuláakal le ku yaʼalaʼaltechoʼ beet «bey utiaʼal Jéeobaeʼ maʼ bey utiaʼal wíinikoʼobiʼ» (Col. 3:23). Chéen baʼaleʼ kʼaʼabéet xan a reconocerkeʼ techeʼ maʼ perfectoechiʼ, maʼ tu páajtal a beetik tuláakal baʼal yéetel yaan baʼaloʼob maʼ maʼalobtak ka beetkiʼ (Pro. 11:2).

9. ¿Baʼaxten le táankelmoʼoboʼ kʼaʼabéet u kanik u beetoʼob jejeláas baʼaloʼob?

⁹ Utiaʼal ka a beetaba juntúul sukuʼun yiijchajaʼan u tuukuleʼ kʼaʼabéet a kanik a beet uláakʼ baʼaloʼob. Leloʼ yaan u yáantkech utiaʼal a tsʼoʼokbesik le meyajoʼob ku kʼubéentaʼaltech teʼ múuchʼuliloʼ, utiaʼal a kaxtik meyaj bey xan utiaʼal u yilaʼal maʼalob a meyaj. Tsʼoʼoleʼ yaan xan u yáantkech a man le baʼaloʼob kʼaʼabéettechoʼ wa baʼaloʼob kʼaʼabéet tiʼ a familiaoʼ. Tsʼoʼoleʼ jeʼel xan u yáantkech utiaʼal a biskaba maʼalob yéetel u maasileʼ. Koʼoneʼex ilik bey máakalmáak le baʼaloʼob jeʼel a kanikoʼ.

10, 11. Wa ku kanik xook yéetel tsʼíib tubeel le táankelmoʼ, ¿baʼax utsil jeʼel u taasik tiʼ letiʼ bey xan tiʼ le múuchʼuliloʼ? (Salmo 1:​1-3; ilawil xan le fotooʼ).

¹⁰ Kan xook yéetel tsʼíib tubeel. Le Bibliaoʼ ku  yaʼalikeʼ kiʼimak u yóol le máax ku xokik sáamsamal u Tʼaan Dios yéetel ku tuukul tiʼ baʼax ku yaʼalikoʼ (xok Salmo 1:​1-3). Beyoʼ yaan u kʼuchul u yojéelt baʼax ku tuklik Jéeoba yéetel yaan xan u yantaltiʼ junpʼéel maʼalob tuukul (Pro. 1:​3, 4). Teʼ múuchʼuliloʼ jach kʼaʼabéettoʼon sukuʼunoʼob beyoʼ. ¿Baʼaxten?

¹¹ Jach kʼaʼabéet sukuʼunoʼob maʼalob u kaʼansajoʼob yéetel ku tsʼáaikoʼob maʼalob consejoʼob yéetel le Bibliaoʼ (Tito 1:9). Wa a wojel xook yéetel tsʼíib tubeeleʼ yaan u páajtal a preparartik a discursoʼob yéetel a tsʼáaik maʼalob comentarioʼob utiaʼal a muʼukʼaʼankúuntik u fe u maasil. Tsʼoʼoleʼ le kéen xakʼalxooknakech yéetel le kéen a wuʼuy le discursoʼob ku máansaʼal teʼ reuniónoʼob yéetel teʼ asambleaʼoboʼ yaan u páajtal a tsʼíibtik le baʼaxoʼob ka kanikoʼ. Leloʼ yaan u yáantkech utiaʼal u muʼukʼaʼantal a fe yéetel beyoʼ yaan xan u páajtal a líiʼsik u yóol u maasil.

12. ¿Baʼax jeʼel u yáantkech utiaʼal a kanik tsikbal yéetel u maasileʼ?

¹² Kan tsikbal. Lelaʼ junpʼéel baʼal jach unaj u kanik le sukuʼunoʼoboʼ. Ichil le tsikbaloʼ táakaʼan a chʼenxikintik baʼax ku yaʼalaʼal utiaʼal ka a naʼat yéetel utiaʼal a wojéeltik bix u yuʼubikuba le máax yéetel ka tsikbaloʼ (Pro. 20:5). Tsʼoʼoleʼ jeʼel u páajtal a kanik a wil bix u yuʼubikuba juntúul máak yoʼolal bix u tʼaan, bix yanik u táan u yich yéetel bix u péeksik u wíinklil. Pero utiaʼal leloʼ kʼaʼabéet a máansik tiempo táan a tsikbal yéetel u maasil. Chéen baʼaleʼ wa chéen tiʼ mensajes yéetel tiʼ correo ka tʼaan yéetel u maasileʼ jach difícil ken a wilil a tʼaan en personail yéetel wa máax. Le oʼolaleʼ tsʼáa tuʼux a tsikbal yéetel u maasil (2 Juan 12).

13. ¿Baʼax uláakʼ unaj u kanik le táankelmoʼoboʼ? (1 Timoteo 5:8; ilawil xan le fotooʼ).

¹³ Kan meyaj. Le sukuʼun yiijchajaʼan u tuukuloʼ ku páajtal u costeartik u gastos yéetel u gastos u familia (xok 1 Timoteo 5:8). Yaan tuʼuxoʼobeʼ le táankelmoʼoboʼ ku kaʼansaʼaltiʼob tumen u papáʼob junpʼéel oficio wa ku kaʼansaʼaltiʼob wa baʼax meyajil tumen juntúul u láakʼtsilil. Yaan xan uláakʼ táankelmoʼobeʼ ku bin u kanoʼob junpʼéel meyaj tiʼ junpʼéel escuela wa ku chʼaʼikoʼob junpʼéel curso. Jeʼel bixak ka u kanoʼobeʼ, kʼaʼabéet u manikoʼob tu juunaloʼob le baʼaxoʼob kʼaʼabéettiʼoboʼ (Hech. 18:​2, 3; 20:34; Efe. 4:28). Kéen káajak a meyajeʼ, tsʼáa a wóoliʼ, ilawil a tsʼoʼoksik le baʼax ku yaʼalaʼaltech ka a beetoʼ, beyoʼ yaan u yaʼalaʼal meeyjilech. Tsʼoʼoleʼ maʼ kun luʼsbiltech meyaj tumen jach maʼalob a beetik. Le jatsʼuts modos yéetel le uláakʼ baʼaloʼob unaj a kanikoʼ yaan u yáantkech utiaʼal a tsʼoʼokbesik le meyajoʼob kun tsʼaabiltech maas táaniloʼ. Koʼoneʼex ilik bey máakalmáakoʼobeʼ.

14. ¿Baʼax jeʼel u yáantik le táankelmoʼob u maas meyajtoʼob Jéeobaoʼ?

¹⁴ ¿Jeʼel wa u páajtal a maas meyajtik Jéeobaeʼ? Yaʼab sukuʼunoʼob yiijchajaʼan u tuukuloʼobeʼ tu táankelmiloʼob ka káaj u beetik u precursoriloʼob. Wa desde beora ka beetik a precursorileʼ yaan a kanik múul meyaj yéetel jejeláas máakoʼob yéetel yaan a kanik bix ken a xupil a taakʼin (Fili. 4:​11-13). ¿Jeʼel wa u páajtal a beetik a precursor auxiliaril beoraaʼ? Leloʼ yaan u yáantkech a wil wa jeʼel u páajtal a beetik a precursor regularileʼ. Yéetel leloʼ yaan xan u yáantkech a beet uláakʼ meyajoʼob ichil u kaajal Jéeoba jeʼex por ejemplo a bin meyaj construcción wa tiʼ u najil Betel.

15, 16. Le táankelem taak u beetik u siervo ministerialil wa u ancianoiloʼ, ¿baʼax unaj u beetik?

¹⁵ Jeʼel u páajtal a beetik a siervo ministerialil wa a ancianoileʼ. Tuláakal le sukuʼunoʼoboʼ ku beetkoʼob tuláakal le ku páajtal utiaʼal u chupikoʼob u requisitosil utiaʼal u beetik u ancianoiloʼob. Le Bibliaoʼ ku yaʼalikeʼ le máax taak u beetik u ancianoiloʼ «jach maʼalob le baʼax ku tsʼíiboltikoʼ» (1 Tim. 3:1). Chéen baʼaleʼ utiaʼal leloʼ táanileʼ kʼaʼabéet u beetik u siervo ministerialil. Le siervo ministerialoʼoboʼ letiʼe máaxoʼob áantik le ancianoʼoboʼ. Le ancianoʼob yéetel siervo ministerialoʼoboʼ yéetel kabal óolal ku yáantkoʼob le sukuʼunoʼoboʼ yéetel jach ku tsʼáaik u yóoloʼob kʼaʼaytaj. Juntúul táankelmeʼ jeʼel u páajtal u chupik u requisitosil utiaʼal u beetik u siervo ministerialil kex maʼ u tsʼáaj 20 años tiʼeʼ. Yéetel le siervo ministerial jach maʼalob u beetik u meyajoʼ kex chéen 20 años yaantiʼeʼ jeʼel u páajtal u tsʼaʼabal u beet u ancianoileʼ.

¹⁶ Le requisitos unaj u chupik le máaxoʼob taak u beetik u ancianoiloʼob yéetel u siervo ministerialiloʼoboʼ tiaʼan teʼ Bibliaoʼ. Tsʼoʼoleʼ le requisitosoʼobaʼ yaan yil yéetel le yaabilaj ku yuʼubikoʼob yoʼolal Jéeobaoʼ, le yaabilaj ku yuʼubikoʼob yoʼolal u familiaoʼ bey xan tiʼ le múuchʼuliloʼ (1 Tim. 3:​1-13; Tito 1:​6-9; 1 Ped. 5:​2, 3). Junpʼéel baʼax jeʼel u yáantkecheʼ letiʼe a naʼatik baʼax táakaʼan ichil cada junpʼéel tiʼ le requisitoʼobaʼ, yéetel jeʼel xan u páajtal a kʼáatik tiʼ Jéeoba ka u yáantech a tsʼoʼokbes le baʼax ku kʼáataʼal utiaʼal a beetik junpʼéel tiʼ le meyajoʼobaʼ. c

17. Juntúul táankelmeʼ, ¿bix jeʼel u beetkuba juntúul maʼalob íichamtsileʼ? (Ilawil xan le fotooʼ).

¹⁷ Wa ku tsʼoʼokol a beel yéetel ka beetkaba u poolil a familia. Jesúseʼ tu yaʼaleʼ yaan sukuʼunoʼob yiijchajaʼan u tuukuloʼobeʼ ku chʼaʼtuklik maʼ u tsʼoʼokol u beeloʼob (Mat. 19:12). Chéen  baʼaleʼ wa ka chʼaʼtuklik u tsʼoʼokol a beeleʼ yaan u yantaltech le responsabilidad ku yantal tiʼ le íichamtsiloʼoboʼ yéetel yaan a beetkaba u poolil a familia (1 Cor. 11:3). Jéeobaeʼ ku páaʼtikeʼ le íichamtsiloʼ ka u yaabilt u yatan, ka u tsʼáa baʼax kʼaʼabéettiʼ, ka u bisuba maʼalob tu yéetel bey xan ka u yáant u yaabilt Jéeoba (Efe. 5:​28, 29). Teʼ xookaʼ tsʼoʼok k-kanikeʼ jeʼel u páajtal u yantaltech jatsʼuts modoseʼ, yéetel yaan uláakʼ baʼaxoʼob jeʼel u páajtal a kanikeʼ. Por ejemploeʼ jeʼel u páajtal u yantaltecheʼ maʼalob tuukuleʼ, a respetartik le koʼoleloʼoboʼ, bey xan a weʼesik responsableech. Wa ka beetik tuláakal le baʼaloʼobaʼ yaan u yáantkech utiaʼal ka a beetaba juntúul maʼalob íichamtsil yéetel utiaʼal ka a nuʼukt tubeel a familia.

18. Juntúul táankelmeʼ, ¿bix jeʼel u prepararkuba desde beora utiaʼal u beetkuba juntúul maʼalob taatatsileʼ?

¹⁸ Wa ku yantal a paalal. Wa ku tsʼoʼokol a beeleʼ maʼ xaaneʼ jeʼel u yantal a paalaleʼ. Wa ku yúuchul beyoʼ u ejemplo Jéeobaeʼ jach jeʼel u yáantkech utiaʼal a wilik bix juntúul maʼalob taatatsileʼ (Efe. 6:4). Letiʼeʼ jach junpuliʼ maʼ suʼlakchaj u yaʼal tiʼ Jesús jach u yaabiltmiʼ (Mat. 3:17). Le beetkeʼ wa ku yantal a paalaleʼ kʼaʼabéet u suuktal a waʼaliktiʼob a yaabiltmoʼob. Tsʼoʼoleʼ wa ku beetkoʼob wa baʼax maʼalobeʼ maʼalob xan ka a felicitartoʼob. Le taatatsiloʼob ku kaʼansik u paalaloʼob jeʼex Jéeobaeʼ ku yáantik u paalaloʼob utiaʼal ka yiijchajak u tuukuloʼob. ¿Bix jeʼel a prepararkaba desde beora utiaʼal a beetkaba juntúul maʼalob taatatsileʼ? Letiʼe ken a tratart maʼalob yéetel yaabilaj a familia bey xan le sukuʼunoʼob teʼ múuchʼuliloʼ. Kʼaʼabéet a waʼaliktiʼob mantatsʼ a yaabiltmoʼob yéetel ka valorartik baʼax ku beetkoʼob (Juan 15:9). Lelaʼ yaan u yáantkech le kéen tsʼoʼokok a beel yéetel kéen yanak a paalal. Tsʼoʼoleʼ yaan xan a lúubul utsil tiʼ Jéeoba, tiʼ a familia, bey xan tiʼ le sukuʼunoʼob yanoʼob teʼ múuchʼuliloʼ.

19, 20. ¿Baʼax unaj u beetik juntúul táankelem utiaʼal ka yiijchajak u tuukul? (Ilawil le fotoʼob yaan tu yáax páginail le revistaaʼ).

¹⁹ Wa juntúul táankelmecheʼ kʼaʼajaktecheʼ utiaʼal ka yiijchajak a tuukuleʼ yaan baʼax kʼaʼabéet a beetik. Kʼaʼabéet a yéeyik maʼalob ejemploʼob utiaʼal ka a seguerte, kʼaʼabéet u yantaltech junpʼéel maʼalob tuukul, a weʼesik responsableech, a kanik a beet uláakʼ baʼaloʼob yéetel a prepararkaba utiaʼal le baʼax ku taal u kʼiinoʼ.

²⁰ Maʼ xaaneʼ jeʼel a wuʼuyik jach yaʼab tuláakal le baʼax ku yaʼalaʼal ka a beetoʼ, pero maʼ u lúubul a wóol jeʼel u páajtal a beetkeʼ. Maʼ u tuʼubultecheʼ Jéeobaeʼ taak u yáantkech (Isa. 41:​10, 13). Tsʼoʼoleʼ le sukuʼunoʼob yéetel le kiikoʼob yanoʼob teʼ múuchʼuliloʼ taak xan u yáantkechoʼob. Jach yaan u taasiktech kiʼimak óolal le kéen káajak a tuukul jeʼex Jéeobaeʼ. Maʼ u tuʼubultecheʼ jach k-yaabiltmech yéetel k-tsʼíiboltik ka u bendecirt Jéeoba tuláakal le baʼax ka beetik utiaʼal ka yiijchajak a tuukuloʼ (Pro. 22:4).