1, 2. ¿Baʼax maʼ unaj u tuklik le taatatsiloʼob le kéen joʼopʼok u beetik preguntaʼob u mejen paalaloʼoboʼ?

 TULÁAKAL máak u yojel jach nojoch le meyaj yaan tiʼ le taatatsiloʼoboʼ. Le oʼolal jach unaj k-felicitartik le máaxoʼob yaan u mejen paalaloʼob yéetel táan u yilik u yáantkoʼob utiaʼal ka u yaabiltoʼob Diosoʼ (Deu. 6:​6, 7). Maʼ xaaneʼ le kéen joʼopʼok u nojochtal le mejen paalaloʼoboʼ yaan u taaktal u yojéeltikoʼob baʼaxten k-creertik jujunpʼéel baʼaloʼob yéetel bix unaj k-kuxtal tu táan Dios.

² Maʼ xaaneʼ le kéen a wuʼuy táan u beetik preguntaʼob a mejen paalaleʼ jeʼel a chiʼichnaktaleʼ tumen jeʼel a tuklik táan u pʼáatal minaʼan u fejoʼobeʼ. Pero u jaajileʼ le mejen paalaloʼoboʼ deporsi unaj u beetkoʼob preguntaʼob utiaʼal u kʼaj óoltikoʼob yaʼab baʼaloʼob (1 Cor. 13:11). Le oʼolaleʼ maʼ unaj a sajaktal le kéen a wuʼuy táan u beetkoʼob preguntaʼob yoʼolal baʼaxoʼob ku kaʼansik le Bibliaoʼ, baʼaxeʼ unaj a wilik bey u súutukil utiaʼal a wáantkoʼob utiaʼal ka maas muʼukʼaʼanchajak u fejoʼobeʼ.

3. ¿Baʼax ken k-il teʼ xookaʼ?

³ Teʼ xookaʼ yaan k-ilik bix jeʼel a wáantik a paalal 1) utiaʼal ka muʼukʼaʼanchajak u fejoʼob, 2) utiaʼal u kuxtaloʼob jeʼex uts tu tʼaan Dioseʼ yéetel 3) utiaʼal u defenderkoʼob le baʼaxoʼob ku creerkoʼoboʼ. Yaan xan k-ilik le utsiloʼob ku taasik le preguntaʼob ku beetik le paalaloʼoboʼ yéetel bix jeʼel u aprovechartik le taatatsiloʼob le baʼaxoʼob suuk u beetkoʼob ich familia  utiaʼal u tʼaanoʼob tiʼ le baʼaxoʼob ku creerkoʼoboʼ.

ÁANT A PAALALEʼEX UTIAʼAL KA MUʼUKʼAʼANCHAJAK U FEJOʼOB

4. Yaan horaeʼ, ¿baʼax jeʼel u taaktal u yojéeltik le paalaloʼoboʼ yéetel baʼaxten?

⁴ Taatatsileʼex, kʼaʼajakteʼexeʼ le paalaloʼoboʼ maʼ kun yantal u fejoʼob chéen tumen teʼexeʼ yaan a fejeʼex. Le oʼolaleʼ maʼ jelaʼan u beetkoʼob preguntaʼob jeʼex lelaʼ: «¿Bix jeʼel in wojéeltik jach tu jaajil yaan Dioseʼ? ¿Bix jeʼel u páajtal in confiar tiʼ baʼax ku yaʼalik le Bibliaoʼ?». Le Bibliaoʼ ku yaʼaliktoʼon: «Xakʼalteʼex tuláakal baʼal utiaʼal ka a wileʼex wa maʼalob» (Rom. 12:1; 1 Tes. 5:21). Chéen baʼaleʼ, ¿bix jeʼel a wáantkeʼex a paalaleʼex utiaʼal ka muʼukʼaʼanchajak u fejoʼobeʼ?

5. ¿Bix jeʼel u yáantaʼal le paalaloʼob utiaʼal ka u naʼatoʼob jaaj le baʼax ku yaʼalik le Bibliaoʼ? (Romanos 12:2).

⁵ Áanteʼexoʼob utiaʼal ka u naʼatoʼob jaaj le baʼaxoʼob ka creerkeʼexoʼ (xok Romanos 12:2). Le kéen joʼopʼok u beetik preguntaʼob a paalaloʼobeʼ aprovechart utiaʼal a wáantkoʼob u kaxtoʼob u núukil. Utiaʼal leloʼ jeʼel u páajtal u meyajtech le Áantaj utiaʼal u xakʼalxook u testigoʼob Jéeobaoʼ. Teʼ publicaciónaʼ jeʼel u páajtal a bin teʼ jaats ku yaʼalik «Biblia» yéetel a kaxtik le tuʼux ku yaʼalik «Dios beet u tsʼíibtaʼal» teʼeloʼ ku taasik pruebaʼob eʼesik le Bibliaoʼ maʼ chéen junpʼéel libro tsʼíibtaʼab tumen máakoʼobiʼ, baʼaxeʼ jach tu jaajil «u tʼaan Dios» (1 Tes. 2:13). Por ejemploeʼ jeʼel u páajtal a kaxtikeʼex información ku tʼaan tiʼ junpʼéel úuchben kaaj ku kʼaabaʼtik Asiria yaan tu luʼumil Níniveeʼ. Úuchjeakileʼ jujuntúul máakoʼob kaʼanchajaʼan u xookoʼobeʼ tu yaʼaloʼobeʼ maʼ anchaj bin le kaajaʼ. Chéen baʼaleʼ kex tu añoil 1850, kaxtaʼab u ruinasiloʼob, leloʼ tu yeʼeseʼ jach jaaj le baʼax ku yaʼalik le Bibliaoʼ (Sof. 2:​13-15). Jeʼel xan u páajtal a xakʼaltikeʼex bix béeychajik le profecíaʼob ku tʼaanoʼob tiʼ bix úuchik u xuʼulsaʼal Níniveoʼ, utiaʼal lelaʼ jeʼel u páajtal u meyajteʼex le jaats ku kʼaabaʼtik «¿A wojel wa?» ku taasik U Pʼíich Tulumil Kanan noviembre tiʼ 2021. Wa ka ketikeʼex le baʼaxoʼob ku kaʼansik k-publicaciónoʼob yéetel le baʼaxoʼob ku yaʼalik le enciclopediaʼob yéetel uláakʼ libroʼoboʼ a paalaleʼexeʼ yaan u maas creerkoʼob baʼax ku kaʼansik le Bibliaoʼ.

6. ¿Bix jeʼel u yáantaʼal le paalaloʼob u yiloʼob le pruebaʼob eʼesik jaaj baʼax ku yaʼalik le Bibliaoʼ? Aʼal junpʼéel ejemplo (ilawil xan le fotooʼ).

⁶ Áant u yiloʼob le pruebaʼob eʼesik jaaj le baʼax ku yaʼalik le Bibliaoʼ. Le taatatsiloʼoboʼ yaan yaʼab oportunidad tiʼob utiaʼal u tsikbaloʼob yéetel u paalaloʼob yoʼolal le Bibliaoʼ bey xan yoʼolal Dios. Jeʼel u páajtal u tsikbaloʼob tu  yéeteloʼob kéen xiʼikoʼob tiʼ junpʼéel jardín botánico, tiʼ junpʼéel museo wa tiʼ junpʼéel u najil Betel. Maʼ xaaneʼ jeʼel u páajtal u binoʼob teʼ museooʼ wa u yookloʼob ich Internet utiaʼal ka u yiloʼob baʼax yaniʼ. Le taatatsiloʼoboʼ jeʼel u páajtal u meyajtiʼob le baʼaxoʼob yaan teʼ museo utiaʼal u yáantik u paalaloʼob u creertoʼob jach jaaj le baʼax ku yaʼalik le Bibliaoʼ. Por ejemploeʼ, ¿u yojel wa a paalaloʼob ku chíikpajal u kʼaabaʼ Dios tiʼ junpʼéel tuunich yaan 3,000 años tiʼ? U kʼaabaʼ le tuunichaʼ piedra moabita yéetel jeʼel u páajtal u yilaʼal teʼ Museo del Louvre yaan París (Francia). Junpʼéel u copiail le tuunichaʼ tiaʼan teʼ central mundial yaan tiʼ u testigoʼob Jéeoba Warwick (Nueva York) teʼ exposición ku kʼaabaʼtik «La Biblia y el nombre divino». Teʼ tuunichaʼ tsʼíibtaʼan bix úuchik u líikʼil Mesá, u reyil Moab, tu contra Israel. Leloʼ igual yéetel baʼax ku yaʼalik le Bibliaoʼ (2 Rey. 3:​4, 5). A paalaloʼobeʼ jach yaan u muʼukʼaʼantal u fejoʼob le kéen u yiloʼob le pruebaʼob eʼesik jach jaaj le baʼax ku yaʼalik le Bibliaoʼ (ket yéetel 2 Crónicas 9:6).

7, 8. 1) ¿Baʼax ku yeʼesik le bix jatsʼutsil beetaʼanil tuláakal baʼaloʼ? Aʼal junpʼéel ejemplo (ilawil xan le fotoʼoboʼ). 2) ¿Baʼax preguntailoʼob jeʼel u yáantik a paalaloʼob u creertoʼob jach tu jaajil yaan Máax beetmiloʼoneʼ?

⁷ Áanteʼexoʼob utiaʼal ka u yiloʼob bix beetaʼanil tuláakal baʼal. Le kéen jóokʼkeʼex xíimbal wa le kéen múul meyajnakeʼexeʼ eʼeseʼex tiʼ a paalaleʼex bix jatsʼutsil beetaʼanil tuláakal baʼal. Le bix beetaʼaniloʼoboʼ ku yeʼesik jach yaan u naʼat le máax beetoʼoboʼ. Por ejemploeʼ yaan científicoʼobeʼ ich yaʼab añoseʼ tsʼoʼok u xakʼaltikoʼob le baʼaloʼob yaan u forma caracol tiʼoboʼ (espiral). Nicola Fameli, juntúul biofísicoeʼ tu yaʼaleʼ yaʼab tiʼ le baʼaloʼob yaan u forma caracol tiʼoboʼ kʼaj óolaʼan bey la sucesión de Fibonacci. Ichil leloʼobaʼ tiaʼan le galaxiaʼoboʼ, le concha de nautilooʼ, u leʼ jujunkúul cheʼob yéetel u tsʼuʼ le girasoloʼoboʼ. a

⁸ Teʼ escuelaoʼ a paalaleʼ yaan u kankoʼob baʼax forma yaan tiʼ le baʼaloʼoboʼ. Por ejemploeʼ le cheʼoboʼ yaan u chuunoʼob, yaan u kʼaboʼob yéetel yaan u jéejekʼaloʼob, tiʼ lelaʼ ku yaʼalaʼal fractales. Le bix u formar le cheʼoʼ bey xan u formar uláakʼ baʼaloʼoboʼ. Chéen baʼaleʼ, ¿máax beet u yantal le forma tiʼob beyoʼ? ¿Máax beet tuláakal baʼal jach jatsʼuts yéetel tu tsoolol? Wa a paalal mantatsʼ ku beetik le preguntaʼobaʼ yaan u creerkoʼobeʼ jach tu jaajil Dios beet tuláakal baʼal (Heb. 3:4). Le kéen a wil maʼalobeʼ jeʼel u páajtal a kʼáatik tiʼ a paalaloʼob lelaʼ: «Wa Dios beetmiloʼoneʼ, ¿máasaʼ letiʼ xan unaj u yaʼaliktoʼon bix unaj k-kuxtal utiaʼal ka yanaktoʼon kiʼimak óolal?». Le kéen tsʼoʼokkeʼ jeʼel u páajtal a weʼesiktiʼob baʼax ku yaʼalik le Biblia yoʼolal leloʼ.

 ÁANT U APRECIART LE BAʼALOʼOB KU YAʼALIK LE BIBLIAOʼ

9. ¿Baʼaxten a paalaleʼ jeʼel u beetkoʼob preguntaʼob yoʼolal baʼax ku yaʼalik le Bibliaoʼ?

⁹ Wa juntúul a hijo ku kʼáatiktech baʼaxten le Bibliaoʼ ku yaʼalik yaan baʼaloʼob maʼ unaj u beetik máakeʼ, ilawil a naʼatik baʼaxten táan u kʼáatik. Maʼ xaaneʼ letiʼeʼ maʼ maʼalob u yilik baʼax ku yaʼalik le Bibliaoʼ wa chéen maʼ u yojel bix jeʼel u núukik le preguntaʼob ku beetaʼaltiʼoʼ. Junpʼéel baʼax jach jeʼel u yáantik a paalaleʼ letiʼe ka u xakʼalxoktoʼob le libro ¡Disfrutart le kuxtaloʼ! Leloʼ yaan u yáantik u apreciart le bix u yaʼalik le Biblia kʼaʼabéet k-kuxtaloʼ. b

10. ¿Bix jeʼel a wáantik a paalal utiaʼal ka u maas bisubaʼob yéetel Jéeobaeʼ?

¹⁰ Áant a paalal utiaʼal ka u maas bisubaʼob yéetel Jéeoba. Utiaʼal ka u yaʼal a paalal baʼax ku tuklikoʼobeʼ le kéen a xakʼalxokteʼex le Bibliaoʼ meyajnakteʼex le ejemploʼob yéetel le preguntaʼob yaan teʼ libro ¡Disfrutart le kuxtaloʼ! (Pro. 20:5). Por ejemploeʼ teʼ xook 8, ku yaʼalikeʼ Jéeobaeʼ bey juntúul maʼalob amigo ku kʼaʼajsiktoʼon baʼax unaj k-beetik utiaʼal ka xiʼiktoʼon maʼalobileʼ. Kéen tsʼoʼokok a xakʼaltikeʼex 1 Juan 5:​3, kʼáat tiʼ a paalal: «Wa Jéeoba bey juntúul maʼalob amigoeʼ, ¿bix unaj k-ilik le baʼaxoʼob ku yaʼalik ka k-beetoʼ?». Maʼ xaaneʼ jeʼel a tuklikeʼ le preguntaaʼ maʼ tu yáantaj. Pero u jaajileʼ yaan u yáantik a paalal u yileʼ le bix u beetmil Dios tuláakal baʼaloʼ ku yeʼesik u yaabiltmoʼon (Isa. 48:​17, 18).

11. ¿Baʼax jeʼel u yáantik a paalal u maas apreciart le baʼax ku kaʼansik le Bibliaoʼ? (Proverbios 2:​10, 11).

¹¹ Tsikbalteʼex le utsiloʼob ku taasik u beetaʼal le baʼax ku kaʼansik le Bibliaoʼ. Le kéen a múul xokeʼex le Biblia wa u tekstoil le kʼiinoʼ tsikbalteʼex bix tsʼoʼok u yáantik a familiaʼex le principioʼob yaan teʼ Bibliaoʼ. Por ejemploeʼ a paalaleʼ, ¿ku yilkoʼob wa le utsil ku taasik u tsʼáaik u yóol máak meyaj yéetel u beetik tuláakal baʼal tu núukoʼ? (Heb. 13:18). Tsikbalteʼex xan bix u kanáantik le Biblia k-wíinkliloʼ bey xan le baʼaxoʼob k-tuklikoʼ (Pro. 14:​29, 30). Wa ka tsikbaltikeʼex le baʼaloʼobaʼ maʼ xaaneʼ leloʼ yaan u yáantik a paalal u maas valorart le consejoʼob ku tsʼáaik le Bibliaoʼ (xok Proverbios 2:​10, 11).

12. ¿Baʼax ku beetik Steve utiaʼal u yáantik u hijo u naʼat jach maʼalob ka k-tsʼáa ichil k-kuxtal le baʼax ku yaʼalik le Bibliaoʼ?

¹² Steve yéetel u yataneʼ kajaʼanoʼob Francia yéetel yaan juntúul u hijoʼob ku kʼaabaʼtik Ethan. Steveeʼ ku yáantik u hijo u yileʼ Jéeobaeʼ jach u yaabiltmoʼon, le oʼolal ku yaʼalik bix unaj k-kuxtal. Utiaʼal leloʼ ku beetiktiʼ le preguntaʼobaʼ: «¿Baʼaxten ku yaʼalik Jéeoba ka k-tsʼáa ichil k-kuxtal le baʼax ku yaʼalik le tekstoaʼ? Le tekstoaʼ, ¿bix u yeʼesik u yaabiltmoʼon Jéeoba? ¿Baʼax jeʼel u yúuchul wa maʼ t-tsʼáaik ichil k-kuxtaleʼ?». Le preguntaʼob ku beetik tiʼ Ethanoʼ ku yáantik u naʼateʼ jach maʼalob le baʼax ku yaʼalik Jéeoba ka k-beetoʼ. Steveeʼ ku yaʼalik xan: «Toʼoneʼ jach k-kʼáat ka u naʼat Ethaneʼ maas maʼalob le naʼatil ku taal teʼ Bibliaoʼ ke le naʼatil ku taal tiʼ wíinikoʼ».

13. ¿Bix jeʼel u kaʼansaʼal tiʼ le paalaloʼob bix jeʼel u tsʼáaik ichil u kuxtaloʼob le baʼax ku yaʼalik le Bibliaoʼ? Aʼal junpʼéel ejemplo.

¹³ Kaʼanstiʼob bix jeʼel u tsʼáaik ichil u kuxtaloʼob le baʼax ku yaʼalik le Bibliaoʼ. Junpʼéel bix jeʼel a beetkeʼexeʼ letiʼe kéen aʼalaʼak tiʼ a paalal teʼ escuela ka u xokoʼob junpʼéel librooʼ. Chéen baʼaleʼ teʼ librooʼ ku chʼaʼchiʼitaʼal máakoʼob ku núupkʼebantaloʼob yéetel jach ku baʼateloʼob. Teʼ súutukiloʼob beyaʼ maʼ xaaneʼ jeʼel a kʼáatik tiʼ a paalaloʼob: «¿Bix wal u yuʼubikuba Jéeoba le kéen u yil u beetaʼal baʼaloʼob beyaʼ?» (Pro. 22:​24, 25; 1 Cor. 15:33; Fili. 4:8). Beyoʼ  le kéen u tsol teʼ escuela le baʼax tu xokaj teʼ librooʼ jeʼel u yaʼalik le baʼax ku creertik tiʼ u maestroʼob bey xan tiʼ u yéet xookoʼoboʼ.

KAʼANS U DEFENDERTOʼOB BAʼAXOʼOB KU CREERKOʼOB

14. ¿Baʼax jeʼel u sajaktal u tsol jujuntúul táankelem Testigoʼobeʼ, yéetel baʼaxten?

¹⁴ Maʼ xaaneʼ jujuntúul táankelmoʼob u testigoʼob Jéeobaeʼ yaan kʼiineʼ ku sajaktal u defendertoʼob baʼax ku creerkoʼob. Lelaʼ maases ku yúuchul le kéen tʼaanak le maestro tiʼ evoluciónoʼ tumen yaʼab maestroʼobeʼ jach ku creerkoʼob le kaʼansajaʼ. Le taatatsiloʼoboʼ, ¿bix jeʼel u yáantik u paalaloʼob utiaʼal maʼ u sajaktal u defendertoʼob le baʼax ku creerkoʼoboʼ?

15. ¿Baʼax jeʼel u yáantik le táankelmoʼob u maas creertoʼob yaan Máax beetoʼonoʼ?

¹⁵ Áantoʼob utiaʼal maʼ u sajaktal u tsoloʼob baʼax ku creerkoʼob. Le paalaloʼoboʼ maʼ unaj u suʼlaktal u yaʼaloʼob yaan Máax beetoʼoniʼ (2 Tim. 1:8). U jaajileʼ yaʼab científicoʼob u yojloʼob maʼ chéen bey anchajik máakoʼ. Le kéen u yiloʼob tuláakal le baʼaxoʼob beetaʼanoʼ ku tsʼáaikoʼob cuentaeʼ yaan juntúul máax jach yaan u naʼat beetoʼon. Le beetkeʼ kex tiʼ yaʼab escuelaʼob ku kaʼansaʼal le evoluciónoʼ letiʼobeʼ maʼ de acuerdoʼob yéetel le kaʼansajaʼ. A paalaloʼobeʼ jeʼel u muʼukʼaʼankúuntik u fejoʼob le kéen u yojéeltoʼob baʼax convencert u maasil sukuʼunoʼob de ke yaan juntúul Máax beetoʼonoʼ. c

16. ¿Bix jeʼel a kaʼansik tiʼ a paalal u defendertoʼob yaan Máax beetoʼoneʼ? (1 Pedro 3:15; ilawil xan le fotooʼ).

¹⁶ Kaʼans tiʼ a paalal bix jeʼel u defenderkoʼob yaan Máax beetoʼoneʼ (xok 1 Pedro 3:15). Jeʼel u yáantkeʼex a múul xakʼaltikeʼex le xook «Bix yanchajik tuláakal baʼal». Lelaʼ tiaʼan tiʼ jw.org teʼ jaats «Le paalaloʼoboʼ taak u yojéeltikoʼob». Kéen tsʼoʼokok a xokikeʼexeʼ kʼáat tiʼ a paalal bix jeʼel u tsolkoʼob tiʼ u maasil yaan juntúul Máax beetoʼoneʼ, chéen baʼaleʼ aʼaltiʼob xaneʼ le kéen u yaʼaloʼob tiʼ u yéet xookoʼob le baʼax ku creerkoʼoboʼ maʼ unaj u discutiroʼob tu yéeteloʼobiʼ. Wa juntúul u yéet xook taak u tsikbaleʼ aʼaltiʼob ka meyajnaktiʼob ejemploʼob séebaʼan u naʼataʼaloʼob. Maʼ xaaneʼ juntúul tiʼ u yéet xookeʼ jeʼel u yaʼalik: «Teneʼ chéen kin creertik le baʼax kin wilkoʼ yéetel Dioseʼ mix juntéen in wile». Le táankelem Testigooʼ jeʼel u páajtal u yaʼalik: «Máans ta tuukuleʼ tiaʼanech tu tsʼuʼ kʼáaxeʼ yéetel mix junpʼéel naj yaniʼ.  Pero ka wilkeʼ yaan junpʼéel chʼeʼen jach maʼalob beetaʼaniliʼ, ¿máasaʼ jeʼel a tuklikeʼ yanchaj juntúul máax beet le chʼeʼenoʼ? Wa chéen junpʼéel chʼeʼen kʼaʼabéetchaj u beetaʼal tumen juntúul máakeʼ, ¿kux túun tuláakal le baʼaloʼob yaan way yóokʼol kaabeʼ? Kʼaʼabéetchaj xan u beetaʼal tumen juntúul máax jach táaj yaan u naʼat.

17. ¿Bix jeʼel a wáantik a paalal utiaʼal maʼ u sajaktal u tsoloʼob baʼax ku yaʼalik le Bibliaoʼ? Aʼal junpʼéel ejemplo.

¹⁷ Aʼaltiʼob ka u kaxtoʼob u súutukil u tsolkoʼob baʼax ku yaʼalik le Bibliaoʼ (Rom. 10:10). U tsikbal máak tiʼ le Bibliaoʼ jeʼel u páajtal u comparartaʼal yéetel u kanik máak u paax guitarraeʼ. Tu káajbaleʼ maʼ chéen chʼaʼabil u beetaʼaliʼ yéetel ka kanik a pax le baʼaloʼob maas fáciltakoʼoboʼ, pero kéen máanak kʼiineʼ ku káajal a paxik le baʼaloʼob maas difíciltakoʼ. Lelaʼ bey xan u yúuchul le kéen k-tsikbalt tiʼ u maasil le baʼaxoʼob k-creerkoʼ. Tu káajbaleʼ k-tsolik baʼaloʼob chéen chʼaʼabil u naʼataʼal. Por ejemploeʼ juntúul táankelem Testigoeʼ jeʼel u páajtal u kʼáatik tiʼ u yéet xook: «¿A wojel wa de ke le ingenieroʼoboʼ ku copiarkoʼob le baʼaloʼob yaan way yóokʼol kaabeʼ? Taak in weʼesiktech le videoaʼ». Jeʼel u páajtal a weʼesiktiʼ le jaats videoʼob «¿Chéen wa bey anchajikoʼ?». Kéen tsʼoʼokkeʼ ka kʼáatiktiʼ: «Wa juntúul científico ku alabartaʼal ikil u copiartik le baʼaloʼob yaan way yóokʼol kaabeʼ, ¿maʼ wa maas unaj u alabartaʼal le máax beetoʼ?». Yéetel le ejemploaʼ jeʼel u páajtal a beetik u taaktal u yojéeltik u maasil a wéet xookeʼ.

ÁANTOʼOB UTIAʼAL KA U MAAS MUʼUKʼAʼANKÚUNT U FEJOʼOB

18. ¿Bix jeʼel a wáantik a paalal u maas muʼukʼaʼankúunt u fejoʼobeʼ?

¹⁸ U maas yaʼabil le máakoʼoboʼ maʼ tu creerkoʼob Dios (2 Ped. 3:3). Le beetkeʼ taatatsileʼex le kéen a xokeʼex le Biblia yéetel a paalaleʼexoʼ líiʼseʼex u yóoloʼob utiaʼal ka u xakʼaltoʼob baʼaloʼob jeʼel u beetik u maas creerkoʼob baʼax ku yaʼalik le Bibliaoʼ bey xan ka u naʼatoʼob le bix u kʼáat Dios ka kuxlakoʼonoʼ. Aʼaleʼextiʼob ka u yiloʼob le baʼaxoʼob u beetmaj Jéeobaoʼ yéetel ka tuukulnakoʼob tu yoʼolal. Xakʼalteʼex xan le profecíaʼob tsʼoʼok u béeytaloʼoboʼ. Pero u maas kʼaʼanaʼanileʼ orarneneʼex yéetel a paalaleʼex, kʼáat óolneneʼex tu yoʼolaloʼob. Jéeobaeʼ jach yaan u bendecirkeʼex ikil a wáantik a paalaleʼex u muʼukʼaʼankúunt u fejoʼob (2 Cró. 15:7).