Apóstol Pabloeʼ tu tsʼíibtaj tiʼ Timoteo: «Kin kʼubéentiktech tu táan Dios, tu táan Cristo yéetel tu táan le ángeloʼob yéeyaʼanoʼoboʼ ka a tsʼoʼokbes le baʼaxoʼob kin waʼaliktechaʼ. Kanáant maʼ a beetik wa baʼax tu yoʼolal juntúul máak chéen yoʼolal bix u yilaʼal yéetel ilawil a tratartik tuláakal jeʼex unajeʼ» (1 Tim. 5:21).

Yáaxeʼ koʼoneʼex ilik máaxoʼob maʼ táakaʼanoʼob ichil le ángeloʼob yéeyaʼanoʼoboʼ. Maʼ táakaʼan le 144,000, tumen le ka tsʼíibnaj Pablo tiʼ Timoteoeʼ maʼ káajak u kaʼa kuxkíintaʼal teʼ kaʼan le yéeyaʼanoʼoboʼ. Le apóstoloʼob yéetel le uláakʼ cristianoʼoboʼ maʼ káajak u kaʼa kuxkíintaʼaloʼob teʼ kaʼanoʼ, le oʼolal maʼ táakaʼanoʼob ichil le «ángeloʼob yéeyaʼanoʼob» tu chʼaʼchiʼitaj Pablooʼ (1 Cor. 15:​50-54; 1 Tes. 4:​13-17; 1 Juan 3:2).

Le «ángeloʼob yéeyaʼanoʼoboʼ» maʼ xan letiʼe ángeloʼob maʼ tu yuʼuboʼob u tʼaan Jéeoba tu kʼiiniloʼob le Búulkabaloʼ. Le ángeloʼobaʼ tu tsʼáajubaʼob tu tséel Satanáseʼ ka suunajoʼob demonioʼob, yéetel pʼáatoʼob u enemigoʼob Jesús (Gén. 6:2; Luc. 8:​30, 31; 2 Ped. 2:4). Maʼ kun xáantaleʼ yaan u kʼaʼalaloʼob 1,000 años teʼ taamkach jooloʼ yéetel kéen tsʼoʼokkeʼ yaan u xuʼulsaʼaloʼob paʼteʼ yéetel le Kʼaasilbaʼaloʼ (Jud. 6; Apo. 20: 1-3, 10).

«Le ángeloʼob yéeyaʼanoʼob» tu chʼaʼchiʼitaj Pablooʼ maʼ xaaneʼ letiʼe ángeloʼob yanoʼob teʼ kaʼan tu apoyartoʼob Dios bey xan Cristo Jesúsoʼ.

Yaʼab u milesil ángeloʼob chúukaʼan u yóoloʼob tiʼ Jéeoba (Heb. 12:​22, 23). Maʼ unaj k-tuklik wa tuláakal le ángeloʼobaʼ junpʼéeliliʼ baʼax tsʼaʼan u beetoʼob (Apo. 14:​17, 18). Kʼaʼajaktoʼoneʼ ichil junsúutukeʼ chéen juntúul ángeleʼ tu xuʼulsaj 185,000 soldadoʼob asirioʼob (2 Rey. 19:35). Maʼ xaan xaneʼ tiʼ yaʼab ángeloʼobeʼ kʼubéentaʼantiʼob «ka u luʼsoʼob ichil u Reino [Jesús] tuláakal le baʼaloʼob ku beetik u tʼóochpajal máakoʼ bey xan le máaxoʼob beetik baʼax kʼaasoʼ» (Mat. 13:​39-41). Uláakʼoʼobeʼ kʼubéentaʼantiʼob ka u «muchʼkíintoʼob tuláakal le máaxoʼob [yéeyaʼanoʼob]» utiaʼal u binoʼob kaʼanoʼ (Mat. 24:31). Yanoʼob xaneʼ kʼubéentaʼantiʼob ka u kanáantoʼonoʼob jeʼel tuʼuxak k-máaneʼ (Sal. 91:11; Mat. 18:10; ket yéetel Mateo 4:11; Lucas 22:43).

«Le ángeloʼob yéeyaʼanoʼob» ku chʼaʼchiʼitaʼal teʼ 1 Timoteo 5:​21, maʼ xaaneʼ ángeloʼob kʼubéentaʼabtiʼob meyajoʼob especialoʼob yaan u yil yéetel u kanáantaʼal le múuchʼuliloʼoboʼ. Le táan u tʼaan Pablo tiʼ le baʼaloʼobaʼ tu tsʼáaj xan maʼalob consejoʼob yoʼolal le ancianoʼoboʼ, tu yaʼaleʼ letiʼobeʼ ku náajmatikoʼob ka respetartaʼakoʼob. Chéen baʼaleʼ tu yaʼaleʼ le ancianoʼob xanoʼ unaj u kanáantkoʼob maʼ u beetkoʼob wa baʼax tu yoʼolal juntúul máak chéen yoʼolal bix u yilaʼal, yéetel unaj u yilkoʼob u tratarkoʼob tuláakal máak jeʼex unajeʼ. Tsʼoʼoleʼ unaj xan u tuklikoʼob tubeel le decisiónoʼob ken u chʼaʼoboʼ wa unaj u kanáantkoʼob bix u juzgaroʼob. Junpʼéel baʼax oʼolal unaj u beetkoʼob le baʼax tu yaʼalaj Pabloaʼ tumen táan u meyajoʼob «tu táan Dios, tu táan Cristo yéetel tu táan le ángeloʼob yéeyaʼanoʼoboʼ». Lelaʼ u kʼáat u yaʼaleʼ Jéeoba, Jesús yéetel le ángeloʼobaʼ táan u yilkoʼob bix u kanáantaʼal le múuchʼulil tumen le ancianoʼoboʼ. Jeʼex tsʼoʼok k-ilkoʼ yaan ángeloʼobeʼ kʼubéentaʼantiʼob meyajoʼob yaan yil yéetel le múuchʼuliloʼ: ku kanáantkoʼob le máaxoʼob meyajtik Diosoʼ, ku yáantajoʼob teʼ kʼaʼaytajoʼ yéetel ku yaʼalikoʼob tiʼ Jéeoba le baʼax ku yilkoʼoboʼ (Mat. 18:10; Apo. 14:6).