LE TʼAAN «carreta» ku meyaj teʼ Biblia Túumben Luʼumoʼ, ich griegoeʼ jeʼel u naʼataʼal jejeláas clase carretaʼobeʼ (Hech. 8:​28, 29, 38). Chéen baʼaleʼ le carreta tuʼux ku bin kaʼach le eunuco etíopeoʼ maʼ xaaneʼ maas nojoch tiʼ le ku meyaj tiʼ le soldadoʼoboʼ wa le ku meyaj utiaʼal u beetaʼal carreraʼoboʼ. Koʼoneʼex ilik baʼaxoʼob eʼesik.

Le etíopeoʼ yaan kaʼach junpʼéel nojoch puesto tiʼ yéetel náach tuʼux u taal. «Le máakaʼ tsʼaʼan autoridad tiʼ tumen Candace, u reinail Etiopía, yéetel letiʼ kanáantik tuláakal u ayikʼalil le reinaoʼ» (Hech. 8:27). Úuchjeakileʼ Etiopíaeʼ tiaʼan kaʼach teʼ tuʼux yaan bejlaʼa u luʼumil Sudánoʼ, yéetel u noojolil u luʼumil Egipto. Le etíopeoʼ maʼ tiʼ junpʼéeliliʼ carreta viajarnajiʼ, yéetel tumen náach le viajeoʼ jach yaʼab baʼaloʼob táan kaʼach u bisik. Teʼ yáax siglooʼ jejeláas baʼaloʼob ku meyaj utiaʼal u viajar máak. Junpʼéel tiʼ le baʼaloʼobaʼ junpʼéel carreta yaan u yóokʼol, pixaʼan u baʼpach yéetel cuatro u ruedasil. Junpʼéel libro ku tsolik le tʼaanoʼob yaan teʼ Bibliaoʼ ku yaʼalik: «Le clase carretaʼobaʼ maas yaʼab baʼaloʼob ku bisik yéetel maas maʼalob u bin máakiʼ, le oʼolal ku páajtal u viajar máak maas náach» (Acts—An Exegetical Commentary).

Le etíopeoʼ táan kaʼach u xook le ka náatsʼ Felipe tu yiknaloʼ. Le Bibliaoʼ ku yaʼalik: «Felipe túuneʼ áalkabnaj tu tséel le carretaoʼ ka tu yuʼubeʼ le máakoʼ táan u kʼaʼam xokik u tsʼíib profeta Isaías» (Hech. 8:30). Le carretaʼob utiaʼal u viajar máakoʼ maʼ tu páajtal u bin kaʼach jach chich. Le oʼolal le etiopíailoʼ ku páajtal u xook, yéetel Felipeeʼ páajchaj u chukpachtik.

«Tu sen kʼáataj tiʼ Felipe ka naʼakak kutal tu tséel» (Hech. 8:31). Le máakoʼob manejartik le carretaʼob utiaʼal carreraʼoboʼ maʼatech u kutaloʼob, waʼatalil u binoʼob. Pero le carretaʼob ku meyaj utiaʼal u viajar máakoʼ yaan kaʼach tuʼux utiaʼal u kutal le etiopíailoʼ bey xan Felipe.

Yoʼolal baʼax ku yaʼalik Hechos capítulo 8, bey xan yoʼolal le baʼaxoʼob tsʼoʼok u kaxtaʼaloʼoboʼ, beoraaʼ maʼatech k-dibujartik le eunuco etíope tiʼ junpʼéel carreta ku meyaj utiaʼal guerra wa carreraʼoboʼ, baʼaxeʼ tiʼ junpʼéel carreta maas nojoch.