1. ¿Baʼaxten kʼaʼabéet k-kʼaʼajsik cada año le u kuxtal Jesús tu kʼuboʼ?

 LE BOʼOL tsʼaʼab utiaʼal k-salvartaʼaloʼ junpʼéel regalo jach koʼoj u tojol (2 Cor. 9:15). Úuchik u tsʼáaik u kuxtal Jesúseʼ ku páajtal k-bisikba yéetel Jéeoba yéetel jeʼel xan u páajtal u yantaltoʼon kuxtal minaʼan u xuuleʼ. Jach yaʼab baʼax oʼolal kʼaʼabéet k-tsʼáaik gracias tiʼ Jéeoba, letiʼeʼ yoʼolal u nojoch yaabilajeʼ tu tsʼáaj junpʼéel boʼol utiaʼal k-salvartaʼal (Rom. 5:8). Utiaʼal maʼ u xuʼulul k-tsʼáaik u graciasileʼ, Jesúseʼ tu yaʼalaj ka k-kʼaʼajs cada año le u kuxtal tu kʼubaj t-oʼolaloʼ (Luc. 22:​19, 20).

2. ¿Baʼax ken k-il teʼ xookaʼ?

² Teʼ añoaʼ le Kʼaʼajsajiloʼ yaan u lúubul sábado 12 tiʼ abril tiʼ 2025. Tuláakloʼon jach táan k-tsʼíiboltik k-antaliʼ. Tu kʼiiniloʼob le Kʼaʼajsajiloʼ jach maʼalob ka k-jóoʼs tiempo utiaʼal k-tuukul tiʼ le baʼaxoʼob u beetmaj Jéeoba yéetel u Hijo t-oʼolaloʼ. Teʼ xookaʼ yaan k-xakʼaltik baʼax ku kaʼansiktoʼon yoʼolal Jéeoba bey xan yoʼolal Jesús le boʼol tu tsʼáajoʼob utiaʼal u salvarkoʼonoʼoboʼ. Teʼ tuláakʼ xookoʼ yaan k-kanik baʼax utsiloʼob ku taasiktoʼon le boʼoloʼ yéetel yaan xan k-ilik bix jeʼel k-tsʼáaik u graciasileʼ.

LE BAʼAX KU KAʼANSIKTOʼON YOʼOLAL JÉEOBAOʼ

3. ¿Bix jeʼel u páajtal u salvartaʼal u millonesil máakoʼob chéen tumen juntúul wíinikeʼ? (Ilawil xan le dibujoʼoboʼ).

³ Le boʼoloʼ ku kaʼansiktoʼoneʼ Jéeobaeʼ u yaabiltmaj le justiciaoʼ  (Deu. 32:4). ¿Baʼaxten k-aʼalik leloʼ? Kʼaʼajaktoʼoneʼ tumen maʼ tu yuʼubaj tʼaan Adáneʼ tuláakloʼoneʼ kʼebanoʼon yéetel k-kíimil (Rom. 5:12). Utiaʼal túun u salvarkoʼon Jéeoba tiʼ le kʼeban yéetel tiʼ le kíimiloʼ tu túuxtaj u Hijo way Luʼumeʼ. Chéen baʼaleʼ, ¿bix túun kun salvarbil u millonesil máakoʼob chéen tumen juntúul máak perfecto? Apóstol Pabloeʼ ku tsolik: «Jeʼex yaʼab máakoʼob aʼalaʼab yaan u kʼebanoʼob tumen maʼ tu yuʼubaj tʼaan juntúul máakeʼ [Adán], yaʼab máakoʼob xan kun aʼalbil toj u kuxtaloʼob úuchik u yuʼubik tʼaan le juntúuliliʼ máakoʼ [Jesús]» (Rom. 5:19; 1 Tim. 2:6). Jeʼex k-ilkoʼ yoʼolal juntúul máak perfecto, pero maʼ tu yuʼubaj tʼaaneʼ láaj kʼebanoʼon yéetel k-kíimil. Le oʼolal kʼaʼabéetchaj k-salvartaʼal xan tumen juntúul máak perfecto, pero ku yuʼubik tʼaan.

4. ¿Baʼaxten maʼ tu chaʼaj Jéeoba ka yanak kuxtal minaʼan u xuul tiʼ u paalal Adán ku yuʼubikoʼob tʼaanoʼ?

⁴ ¿Jach wa túun kʼaʼabéet kaʼach u kíimil Jesús utiaʼal u salvarkoʼon? ¿Baʼaxten maʼ tu chaʼaj Jéeoba ka yanak kuxtal minaʼan u xuul tiʼ u paalal Adán ku yuʼubikoʼob tʼaanoʼ? Utiaʼal juntúul kʼeban máakeʼ bey maas maʼalob leloʼ, chéen baʼaleʼ maʼ táan k-chʼaʼik en cuenta u justicia Jéeobaiʼ. Letiʼeʼ juntúul Dios justo, le oʼolal le baʼax tu beetaj Adánoʼ maʼ ken u pʼat kaʼach chéen beyoʼ.

5. ¿Baʼaxten seguroʼon de ke Jéeobaeʼ mantatsʼ ken u beet baʼax toj?

⁵ ¿Baʼax jeʼel u yúuchul kaʼach wa maʼ u tsʼáaik Jéeoba le boʼol utiaʼal u salvarkoʼon, yéetel ka u chaʼa u kuxtal utiaʼal mantatsʼ u paalal Adán yéetel Eva kex kʼebanoʼobeʼ? Leloʼ yaan u yeʼesik kaʼacheʼ Jéeobaeʼ maʼ juntúul Dios justoiʼ. Yoʼolal leloʼ máakeʼ jeʼel u tuklikeʼ Dioseʼ maʼatech u béeykuntik le baʼax ku yaʼalikoʼ. Jeʼel tak u tuklaʼaleʼ letiʼeʼ maʼ ken u béeykunt le promesaʼob u beetmoʼ. U maʼalobileʼ maʼ bey úuchikiʼ. U jaajileʼ maʼ chéen chʼaʼabil le baʼax tu beetaj Jéeobaoʼ tumen tu tsʼáaj u kuxtal u Hijo. Pero leloʼ tu yeʼeseʼ letiʼeʼ mantatsʼ ken u beet baʼax toj.

6. ¿Le boʼoloʼ bix u yeʼesik u nojoch yaabilaj Jéeoba? (1 Juan 4:​9, 10).

⁶ Le boʼoloʼ ku yáantkoʼon k-ileʼ Jéeobaeʼ maʼ chéen juntúul Dios justoiʼ, baʼaxeʼ letiʼeʼ jach táaj nojoch xan u yaabilaj (Juan 3:16; xok 1 Juan 4:​9, 10). Le boʼoloʼ ku yeʼesik xaneʼ Jéeobaeʼ u kʼáat ka yanaktoʼon kuxtal minaʼan u xuul yéetel u kʼáat ka ookkoʼon ichil u familia. Tukult lelaʼ: le ka kʼebanchaj Adáneʼ Jéeobaeʼ tu jóoʼsaj ichil u familia. Yoʼolal leloʼ tuláakloʼoneʼ maʼ síijoʼon ichil u familia Diosiʼ. Pero yoʼolal le boʼol tu tsʼáaj Jéeoba utiaʼal u salvarkoʼonoʼ tuláakal le máaxoʼob yaan u fejoʼob yéetel ku yuʼubikoʼob tʼaanoʼ maʼ  tun xáantaleʼ yaan u páajtal u yookloʼob ichil u familia Dios. Beoraaʼ toʼoneʼ jeʼel u páajtal k-bisikba maʼalob yéetel Jéeoba bey xan yéetel le máaxoʼob meyajtikoʼ. Jach táaj u yaabiltmoʼon Jéeoba (Rom. 5:​10, 11).

7. Le baʼaxoʼob tu muʼyajtaj Jesúsoʼ, ¿bix u yeʼesiktoʼon jach u yaabiltmoʼon Jéeoba?

⁷ Wa k-chʼaʼik en cuenta tuláakal le baʼax tu beetaj Jéeoba utiaʼal u salvarkoʼonoʼ yaan k-ilik jach bukaʼaj u yaabiltmiloʼon. Satanáseʼ tu yaʼaleʼ mix máak jeʼel u chúukpajal u yóol tiʼ Dioseʼ. Jéeoba túuneʼ utiaʼal u yeʼesik maʼ jaaj le baʼax tu yaʼalaj Satanásoʼ tu chaʼaj u sufrir u Hijo (Job 2:​1-5; 1 Ped. 2:21). Letiʼeʼ desde teʼ kaʼanoʼ tu yilaj bix u burlartaʼal Jesús tumen le máaxoʼob pʼekmiloʼ, bix jaʼajatsʼaʼabik yéetel bix baʼajik tiʼ junpʼéel cheʼ tumen le soldadoʼoboʼ. Tu yilaj xan bix u muʼyaj u Hijo antes u kíimiloʼ (Mat. 27:​28-31, 39). Jéeobaeʼ wa u kʼáateʼ jeʼel u páajtal u jeʼelsik kaʼach le baʼax táan u yúuchloʼ. Letiʼeʼ jeʼel u páajtal kaʼach u salvartik Jesús le ka aʼalaʼabtiʼ tumen le máakoʼoboʼ: «Wa jach jaaj yaabiltaʼanech tumen Dioseʼ salvartaʼakech beoraaʼ» (Mat. 27:​42, 43). Chéen baʼaleʼ wa ka u beet kaʼacheʼ maʼ kun páajtal u tsʼáaik le boʼol utiaʼal k-salvartaʼaloʼ yéetel maʼ tun yantaltoʼon mix junpʼéel esperanza. Le oʼolal letiʼeʼ tu chaʼaj u sufrir u Hijo tak teʼ súutukil nukaʼaj kíimiloʼ.

8. Tsol bix tu yuʼubiluba Jéeoba le ka tu yilaj u sufrir u Hijooʼ (Ilawil xan le dibujooʼ).

⁸ Maʼ unaj k-tuklik wa tumen Jéeoba jach táaj yaan u podereʼ maʼatech u yaatal u yóol. Toʼoneʼ beetaʼanoʼon jeʼel bix letiʼeʼ, le oʼolal ku páajtal k-eʼesik jatsʼuts modos. Le Bibliaoʼ ku yaʼalikeʼ Jéeobaeʼ ku «yaatal u yóol» (Sal. 78:​40, 41). Koʼoneʼex kʼaʼajsik le baʼax úuch tiʼ Abrahán yéetel Isaakoʼ. Abraháneʼ aʼalaʼabtiʼ ka u tsʼáa u hijo bey sacrificioeʼ (Gén. 22:​9-12; Heb. 11:​17-19). Máans ta tuukul bix wal tu yuʼubiluba Abrahán le táan u preparartik tuláakal utiaʼal u kíimsik u hijooʼ. Jéeoba xaneʼ jach yaachaj u yóol le ka tu yilaj u sen beetaʼal u muʼyaj Jesús le taʼaytak u kíimiloʼ (ilawil le video Yanaktoʼon le fe anchajtiʼoboʼ: Abrahán [Kaʼa jaats] lelaʼ tiaʼan teʼ jw.org).

9. Romanos 8:​32, 38, 39, ¿bix u yáantkoʼon k-naʼat bukaʼaj u yaabiltmoʼon Jéeoba?

⁹ Le boʼol tu tsʼáaj Jéeobaoʼ ku yeʼesiktoʼoneʼ mix máak u yaabiltmoʼon jeʼel bix letiʼeʼ mix k-láakʼtsiloʼob mix k-amigoʼob (xok Romanos 8:​32, 38, 39). ¿A yaabiltmaba wa? Pues Jéeobaeʼ maas u yaabiltmech. ¿A kʼáat ka yanaktech kuxtal minaʼan u xuul? Pues Jéeobaeʼ jach u kʼáat ka kuxlakech utiaʼal mantatsʼ. ¿A kʼáat ka perdonartaʼak a kʼebanoʼob? Jéeobaeʼ jach taak u perdonarkech. Chéen le baʼax ku kʼáatiktoʼon Diosoʼ ka yanaktoʼon fe yéetel ka k-uʼuy tʼaan. Le boʼol tu tsʼáaj Jéeobaoʼ ku yeʼesiktoʼon jach u yaabiltmoʼon.  Tsʼoʼoleʼ teʼ túumben luʼumoʼ yaan k-maas kanik bukaʼaj nojchil u yaabilaj Jéeoba (Ecl. 3:11).

BAʼAX KU KAʼANSIKTOʼON YOʼOLAL JESÚS

10. 1) ¿Baʼax beet u chiʼichnaktal Jesús? 2) ¿Bix úuchik u yeʼesik Jesús maʼ jaaj le baʼax aʼalaʼab tu contra Jéeobaoʼ? (Ilawil xan le cuadro « Le chúukaʼan óolal tu yeʼesaj Jesúsoʼ tu santificartaj u kʼaabaʼ Jéeoba»).

¹⁰ Jesúseʼ jach chiʼichnakchaji tumen maʼ u kʼáat ka tʼaanak kʼaas le máakoʼob tiʼ u kʼaabaʼ Jéeobaoʼ (Juan 14:31). Letiʼeʼ jach lúub u yóol tumen aʼalaʼabeʼ maʼ tu respetartik Dios yéetel jach kʼasaʼan, Jesúseʼ u yojleʼ la baʼax ku yaʼalaʼal tu yoʼolaloʼ jeʼel u beetik u yúuchul tʼaan kʼaas tiʼ u kʼaabaʼ Jéeobaeʼ. Le beetik le ka orarnajeʼ tu yaʼalaj tiʼ Jéeoba: «In Yuum, wa ku páajtaleʼ luʼsten le copaaʼ» (Mat. 26:39). Úuchik u chúukpajal u yóol Jesús tak ka kíimeʼ tu yeʼesaj maʼ jaaj le baʼax tu yaʼalaj Satanás tu contra Jéeobaoʼ.

11. ¿Bix úuchik u yeʼesik Jesús jach u yaabiltmaj wíinik? (Juan 13:1).

¹¹ Le boʼoloʼ ku kaʼansiktoʼoneʼ Jesúseʼ jach taak u yáantik máak, pero maases taak u yáantik u discípuloʼob (Pro. 8:31; xok Juan 13:1). Por ejemploeʼ letiʼeʼ u yojliliʼ yaan u aktáantik yaʼab baʼaloʼob le kéen taalak way Luʼumeʼ yéetel jach yaan u muʼyaj le kéen kíimsaʼak. Pero kex beyoʼ letiʼeʼ tu yóotaj taal. Lelaʼ tu beetaj maʼ chéen tumen Jéeoba aʼaltiʼiʼ, baʼaxeʼ tumen u yaabiltmaj wíinik. Letiʼeʼ tu tsʼáaj u yóol kʼaʼaytaj, kaʼansaj yéetel u yáantik u maasil. Le áakʼab antes tiʼ u kíimsaʼaloʼ tu jóoʼsaj tiempo utiaʼal u pʼoʼik u yook u apóstoloʼob bey xan utiaʼal u líiʼsik u yóoloʼob yéetel u nuʼuktikoʼob (Juan 13:​12-15). Le chʼuyukbal teʼ cheʼoʼ Jesúseʼ kex táan u sen sufrireʼ tsikbalnaj yéetel juntúul kʼasaʼan máak tiaʼan tu tséeleʼ. Tu tsikbaltajtiʼ yoʼolal le Paraísooʼ. Tsʼoʼoleʼ tu yaʼalaj xan tiʼ Juan ka u kanáant u maama  (Luc. 23:​42, 43; Juan 19:​26, 27). Jesúseʼ tu yeʼesaj jach u yaabiltmoʼon maʼ chéen ikil tu tsʼáajil u kuxtal t-oʼolaliʼ, baʼaxeʼ tumen tu tratartaj máak yéetel yaabilaj.

12. ¿Máakalmáak le sacrificioʼob táan u beetik Jesús tak bejlaʼeʼ?

¹² Kex «chéen juntéen kíim utiaʼal u luʼsik le kʼebanoʼ», Jesúseʼ tak bejlaʼa láayliʼ táan u beetik sacrificioʼob t-oʼolaleʼ (Rom. 6:10). ¿Bix u beetik? Letiʼeʼ láayliʼ táan u xupik u tiempo yéetel u muukʼ utiaʼal k-jóoʼsik u yutsil le boʼol tsʼaʼaboʼ. Máans ta tuukul bukaʼaj baʼaloʼob ku beetik Jesús. Letiʼeʼ k-Rey, le maas Nojoch Sacerdoteoʼ yéetel u poolil le múuchʼuliloʼ (1 Cor. 15:25; Efe. 5:23; Heb. 2:17). Letiʼ xaneʼ táan u muchʼik le máaxoʼob yéeyaʼanoʼob utiaʼal u binoʼob kaʼanoʼ yéetel le yaʼabkach máakoʼob kun pʼáatloʼob kuxtal way Luʼumeʼ. Tuláakal le baʼaloʼobaʼ yaan u beetik antes u tsʼoʼokol le nojoch muʼyajiloʼ (Mat. 25:32; Mar. 13:27). a Letiʼ xaneʼ táan u yilik ka tsʼaʼabak le janal espiritual tiʼ le máaxoʼob meyajtik Dios teʼ tu tsʼook kʼiinoʼobaʼ (Mat. 24:45). Tu yáamil xan le mil años kun reinaroʼ yaan u tsʼáaiktoʼon tuláakal baʼax kʼaʼabéettoʼon. Jéeobaeʼ maʼ tu tsʼáaj u Hijo chéen utiaʼal ka kíimik t-oʼolaliʼ, baʼaxeʼ tu tsʼáaj utiaʼal ka u beet yaʼab uláakʼ baʼaloʼob t-oʼolal.

MAʼ U XUʼULUL A KAAMBAL

13. ¿Baʼaxoʼob jeʼel u yáantkoʼon tuukul tiʼ le yaabilaj ku yeʼesiktoʼon Jéeoba yéetel Jesúsoʼ?

¹³ Wa ka tuukul tiʼ tuláakal le baʼaxoʼob tsʼoʼok u beetik Jéeoba yéetel Jesús t-oʼolaloʼ yaan a kanik u maasil yoʼolal le yaabilaj ku yeʼeskoʼobtoʼonoʼ. Teʼ añoaʼ tu kʼiiniloʼob le Kʼaʼajsajiloʼ ilawil a xokik junpʼéel wa tuláakal le Evangelioʼoboʼ. Maʼ a xokik yaʼab capítuloʼob, tu lugar leloʼ ilawil a xokik chaambelil. Yéetel tuukulnen baʼaxten kʼaʼabéet k-yaabiltik Jéeoba yéetel Jesús. Kéen tsʼoʼokkeʼ tsikbalt tiʼ u maasil le baʼax ta kanoʼ.

14. Jeʼex u yeʼesik Salmo 119:​97, le xakʼalxookoʼ ¿bix jeʼel u yáantkoʼon kaanbal tiʼ le boʼol tsʼaʼaboʼ bey xan tiʼ uláakʼ kaʼansajoʼob? (Ilawil xan le fotooʼ).

¹⁴ Wa úuch káajak a meyajtik Jéeobaeʼ maʼ xaaneʼ jeʼel a tuklikeʼ: «¿Yaan wa túumben baʼaloʼob jeʼel in kanik tiʼ u justicia Dioseʼ, tiʼ u yaabilaj bey xan tiʼ le boʼol tu tsʼáajoʼ?». U jaajileʼ minaʼan u xuul le baʼaloʼob jeʼel u páajtal k-kanikoʼ. ¿Baʼax túun jeʼel u páajtal a beetkeʼ? Ilawil a xokik le publicaciónoʼob  ku tsʼáaik u kaajal Jéeobaoʼ. Le kéen a xok junpʼéel teksto maʼ ta jach naʼatikeʼ, investigarnen utiaʼal ka páajchajak a naʼatik. Teʼ kʼiin jeʼeloʼ máans ta tuukul le baʼaxoʼob ta kanoʼ, baʼax tu kaʼansajtech tu yoʼolal Jéeoba, tu yoʼolal Jesús bey xan yoʼolal le yaabilaj ku yeʼeskoʼobtoʼonoʼ (xok Salmo 119:97).

15. ¿Baʼaxten unaj k-kaxtik túumben baʼaloʼob teʼ Bibliaoʼ?

¹⁵ Maʼ u lúubul a wóol wa maʼ ta kanik junpʼéel túumben baʼal cada ken xakʼalxooknakech. Jeʼel u páajtal k-aʼalikeʼ techeʼ beyech juntúul máak ku kaxtik oroeʼ. Le máakoʼob beyaʼ jach kʼaʼabéet paciencia tiʼob tumen jeʼel u máan horaʼob wa tak días utiaʼal ka páajchajak u kaxtikoʼob u chan xóotʼ oroeʼ. Pero kex beyoʼ ku beetkoʼob le meyajaʼ tumen u yojloʼobeʼ le orooʼ jach koʼoj u tojol. Le baʼaxoʼob ku kaʼansik le Bibliaoʼ maas koʼoj u tojol ke le orooʼ (Sal. 119:127; Pro. 8:10). Le beetkeʼ yanaktech paciencia yéetel ilawil a xokik le Biblia teʼ hora a waʼalmoʼ (Sal. 1:2).

16. ¿Bix jeʼel k-seguertik u ejemplo Jéeoba yéetel Jesúseʼ?

¹⁶ Le táan a xakʼalxookoʼ ilawil bix jeʼel a tsʼáaik ichil a kuxtal le baʼax ka kanikoʼ. Por ejemploeʼ jeʼel u páajtal a weʼesik u justicia Jéeoba le kéen a tratart yéetel utsil u maasileʼ. ¿Bix túun jeʼel a weʼesik le yaabilaj ku yuʼubik Jesús yoʼolal u Taata bey xan yoʼolal le uláakʼ máakoʼoboʼ? Lelaʼ jeʼel a weʼesik le kéen a wóot sufrir yoʼolal u kʼaabaʼ Jéeobaeʼ bey xan wa dispuestoʼech utiaʼal a wáantik uláakʼ sukuʼunoʼob. Uláakʼ bix jeʼel a beetkeʼ letiʼe kéen kʼaʼaytajnakechoʼ, beyoʼ ka wáantik uláakʼ máakoʼob utiaʼal ka u jóoʼsoʼob u yutsil le boʼol tsʼaʼaboʼ.

17. ¿Baʼax ken k-il teʼ tuláakʼ xookoʼ?

¹⁷ Jeʼex u bin k-maas naʼatik baʼax táakaʼan ichil le boʼol tsʼaʼaboʼ maas yaan k-yaabiltik Jéeoba yéetel u Hijo. Tsʼoʼoleʼ letiʼob xaneʼ maas yaan u yaabiltikoʼon (Juan 14:21; Sant. 4:8). Le beetkeʼ meyajnaktoʼon tuláakal le baʼaxoʼob u tsʼaamaj Jéeoba utiaʼal k-kaanbal tiʼ le boʼol tu tsʼáajoʼ. Teʼ tuláakʼ xookoʼ yaan k-xakʼaltik baʼax utsiloʼob ku taasiktoʼon le u kuxtal Jesús tu kʼuboʼ bey xan bix jeʼel k-tsʼáaik u graciasil tiʼ Jéeoba yoʼolal le nojoch yaabilaj ku yeʼesiktoʼonoʼ.