XOOK 5
KʼAAY 108 U nojoch yaabilaj Dios
Baʼax utsil ku taasiktoʼon u nojoch yaabilaj Jéeoba
«Cristo Jesúseʼ taal way yóokʼol kaab utiaʼal u salvartik le j-kʼeban máakoʼoboʼ» (1 TIM. 1:15).
BAʼAX KEN K-KANE
Baʼax utsil ku taasiktoʼon le boʼol tu tsʼáaj Jéeobaoʼ yéetel bix jeʼel k-tsʼáaik u graciasil tiʼeʼ.
1. ¿Bix jeʼel k-kiʼimakkúuntik u yóol Jéeobaeʼ?
MÁANS ta tuukuleʼ ka síik tiʼ juntúul máak a yaabiltmaj junpʼéel baʼal jach jatsʼuts yéetel jeʼel u usartikeʼ. Chéen baʼaleʼ, ¿máasaʼ jeʼel a tristetal wa ka wilik chéen ku tsʼáaik tiʼ junpʼéel tséel yéetel maʼ tu usartik? ¿Baʼax ku kaʼansiktoʼon lelaʼ? Jéeobaeʼ yaan junpʼéel baʼal jach táaj jatsʼuts u siimajtoʼon: le u kuxtal u Hijo tu kʼuboʼ. ¡Letiʼeʼ jach ku kiʼimaktal u yóol le kéen k-tsʼáa u graciasil le siibalaʼ bey xan yoʼolal le nojoch yaabilaj ku yeʼesiktoʼonoʼ! (Juan 3:16; Rom. 5:7, 8).
2. ¿Baʼax ken k-il teʼ xookaʼ?
2 Jeʼel bix u máan le añosoʼ maʼ xaaneʼ jeʼel u xuʼulul k-ilik koʼoj u tojol le boʼol tu tsʼáaj Jéeobaoʼ. Lelaʼ bey jeʼex ka k-líiʼs le regalo tu síiajtoʼonoʼ yéetel maʼ t-kaʼa machik. Utiaʼal maʼ yúuchultoʼon beyoʼ mantatsʼ kʼaʼabéet k-kʼaʼajsik baʼaxten unaj k-tsʼáaik u graciasil tiʼ Jéeoba yéetel tiʼ Jesús yoʼolal le baʼax tu beetoʼoboʼ. Le xookaʼ yaan u yáantkoʼon utiaʼal ka k-beet beyoʼ. Tsʼoʼoleʼ yaan k-kanik baʼax utsiloʼob ku taasiktoʼon le boʼol teʼ kʼiinoʼobaʼ bey xan teʼ kʼiinoʼob ku taaloʼoboʼ. Yaan xan k-ilik bix jeʼel u páajtal k-tsʼáaik u graciasil tiʼ Jéeoba yoʼolal le nojoch yaabilaj ku yeʼesiktoʼonoʼ, lelaʼ maases unaj k-beetik tu kʼiiniloʼob le Kʼaʼajsajiloʼ.
BAʼAX UTSIL K-KʼAMIK BEORAAʼ
3. Teʼ kʼiinoʼobaʼ, ¿baʼax utsiloʼob ku taasiktoʼon le boʼol tsʼaʼaboʼ?
3 Teʼ kʼiinoʼobaʼ táan k-jóoʼsik u yutsil le boʼol tsʼaʼab utiaʼal k-salvartaʼaloʼ. Tumen tu yoʼolal leloʼ Jéeobaeʼ ku perdonartik k-kʼebanoʼob. Letiʼeʼ maʼ obligado utiaʼal ka u beetiʼ, pero u kʼáat u perdonartoʼon. Yoʼolal leloʼ rey Davideʼ tu yaʼalaj: «Jéeoba Dios, techeʼ jach ka weʼesik a wutsil, listoech utiaʼal perdonar» (Sal. 86:5; 103:3, 10-13).
4. ¿Yoʼolal máaxoʼob tsʼaʼab le boʼoloʼ? (Lucas 5:32; 1 Timoteo 1:15).
4 Yaan máaxeʼ jeʼel u tuklikeʼ maʼ u náajaltmaj ka perdonartaʼak tumen Jéeobaiʼ. Pero u jaajileʼ mix máak u náajaltmaj leloʼ. Tak apóstol Pabloeʼ bey tu yuʼubilubaoʼ, letiʼeʼ tu yaʼalaj: «Maʼ tin náajmatik ka aʼalaʼakten apóstol». Pero kex beyoʼ despuéseʼ tu yaʼalaj: «Chéen baʼaleʼ tu yoʼolal u nojoch utsil Dioseʼ yaanten le meyajaʼ» (1 Cor. 15:9, 10). Le kéen arrepentirnakoʼon tiʼ k-kʼebanoʼobeʼ Jéeobaeʼ ku perdonarkoʼon. ¿Baʼaxten? Maʼ tumen wa k-náajaltmiʼ, baʼaxeʼ ku beetik tumen u yaabiltmoʼon. Le beetkeʼ le kéen káajak a tuklik maʼ a náajaltmaj ka u perdonartech Jéeobaeʼ kʼaʼajaktecheʼ letiʼeʼ tu tsʼáaj junpʼéel boʼol, tsʼoʼoleʼ lelaʼ tu beetaj maʼ utiaʼal le máaxoʼob minaʼan u kʼebanoʼoboʼ, baʼaxeʼ utiaʼal le j-kʼeban máakoʼob tsʼoʼok u arrepentiroʼoboʼ (xok Lucas 5:32; 1 Timoteo 1:15).
5. ¿Maʼalob wa ka k-tukult k-náajaltmaj ka u chʼaʼtoʼon óotsilil Jéeoba? Tsole.
5 Kex úuch joʼopʼok k-meyajtik Jéeobaeʼ mix juntéen unaj k-tuklik wa k-náajaltmaj ka u chʼaʼtoʼon óotsilil. Lelaʼ maʼ u kʼáat u yaʼal wa Jéeobaeʼ maʼ tu chʼaʼik en cuenta le años táan k-meyajtikoʼ (Heb. 6:10). Letiʼeʼ maʼ tu tsʼáaj u Hijo utiaʼal u boʼotik le años táan k-meyajtikoʼ, baʼaxeʼ tu tsʼáaj bey junpʼéel siibaleʼ. Tumen wa k-tuklik k-náajaltmaj ka chʼaʼabaktoʼon óotsilileʼ bey táan k-aʼalikeʼ chéen kunel úuchik u kíimil Cristo (ket yéetel Gálatas 2:21).
6. ¿Baʼaxten jach tu tsʼáaj u yóol apóstol Pablo u meyajt Jéeoba?
6 Pabloeʼ u yojel kaʼacheʼ wíinikeʼ maʼ tu páajtal u náajaltik ka perdonartaʼak. ¿Baʼaxten túun letiʼeʼ jach tu tsʼáaj u yóol u meyajt Jéeoba? Letiʼeʼ tu beetaj maʼ utiaʼal u náajaltik ka perdonartaʼakiʼ, baʼaxeʼ utiaʼal u tsʼáaik u graciasil tiʼ Jéeoba ikil u yeʼesaʼal utsil tiʼ (Efe. 3:7). Jeʼex Pabloeʼ toʼon xaneʼ k-tsʼáaik k-óol k-meyajt Jéeoba maʼ utiaʼal k-náajaltik ka chʼaʼabaktoʼon óotsililiʼ. Baʼaxeʼ utiaʼal k-tsʼáaik u graciasil tiʼ Jéeoba ikil u yeʼesiktoʼon yaabilaj.
7. Yoʼolal le boʼol tsʼaʼaboʼ, ¿baʼax ku páajtal k-beetik? (Romanos 5:1; Santiago 2:23).
7 Yoʼolal le boʼol tsʼaʼaboʼ ku páajtal k-bisikba maʼalob yéetel Jéeoba. a Jeʼex t-kanil teʼ xook máanikoʼ le kéen síijikoʼoneʼ minaʼanoʼon ichil u familia Jéeoba. Pero yoʼolal le boʼol tsʼaʼaboʼ ku páajtal u ‹yantaltoʼon jeetsʼelil yéetel Dios›, tsʼoʼoleʼ yoʼolal leloʼ ku páajtal xan k-natsʼikba tu yiknal (xok Romanos 5:1; Santiago 2:23).
8. ¿Baʼaxten jach k-agradecertik tiʼ Jéeoba ikil u yuʼubik k-oraciónoʼob?
8 Ikil k-bisikba yéetel Jéeobaeʼ ku páajtal k-orar tiʼ letiʼ. Letiʼeʼ maʼ tu yuʼubik chéen le oraciónoʼob k-beetik kéen xiʼikoʼon reuniónoʼ, baʼaxeʼ ku yuʼubik xan le k-beetik t-juunaloʼ. Le oraciónoʼ ku beetik u yantal jeetsʼelil tiʼ máak, pero toʼoneʼ maʼ t-orar chéen tu yoʼolal leloʼ. Baʼaxeʼ k-orar tumen taak k-maas bisikba yéetel Jéeoba (Sal. 65:2; Sant. 4:8; 1 Juan 5:14). Le tiaʼan Jesús way Luʼumeʼ mantatsʼ orarnaj tiʼ Jéeoba, tumen u yojel táan u chʼenxikintaʼal yéetel u yojel xaneʼ leloʼ yaan u yáantik utiaʼal ka u maas bisuba yéetel u Taata (Luc. 5:16). ¡Jach k-agradecertik le u kuxtal tu kʼubaj Jesúsoʼ, tumen tu yoʼolal leloʼ ku páajtal k-bisikba yéetel Jéeoba bey xan k-tsikbal tu yéetel ich oración!
BIX JEʼEL K-KʼAMIK LE UTSILOʼOB KUN ANTALOʼ
9. Yoʼolal le boʼol tsʼaʼaboʼ, ¿baʼax utsiloʼob ken u kʼam le máaxoʼob meyajtik Jéeobaoʼ?
9 Yoʼolal le boʼol tsʼaʼaboʼ, ¿baʼax utsiloʼob ken u kʼam le máaxoʼob meyajtik Jéeobaoʼ? Yaan u tsʼaʼabaltiʼob kuxtal minaʼan u xuul. Yaʼab máakeʼ maʼ tu creertik lelaʼ tumen tuláakal máak ku kíimil, pero kʼaʼajaktoʼoneʼ Jéeobaeʼ tu káajbaleʼ tu beetaj wíinik utiaʼal ka kuxlak mantatsʼ. Wa maʼ u kʼebantal Adán kaʼacheʼ bejlaʼa mix máak kun kíimileʼ. Le beetkeʼ kex difícil u creertik máak ka yanak le kuxtal minaʼan u xuuloʼ yaan u béeytal, tumen Jéeobaeʼ tu tsʼáaj junpʼéel boʼol utiaʼal ka béeychajak le promesaaʼ. Letiʼeʼ tu tsʼáaj u kuxtal u Hijo utiaʼal u salvarkoʼon (Rom. 8:32).
10. ¿Baʼax esperanzail yaan tiʼ le yéeyaʼanoʼob yéetel tiʼ le uláakʼ tamanoʼoboʼ?
10 Kex todavía maʼ béeychajak le kuxtal minaʼan u xuuloʼ Jéeobaeʼ u kʼáat ka k-creert jach tu jaajil yaan u yúuchul. Le máaxoʼob yéeyaʼanoʼob utiaʼal u binoʼob kaʼanoʼ jach ku tsʼíiboltkoʼob u yantaloʼob teʼ kaʼan yéetel Jesús utiaʼal u gobernarkoʼob le Luʼumaʼ (Apo. 20:6). Le uláakʼ tamanoʼoboʼ yaantiʼob u jatsʼuts esperanzail u kuxtaloʼob way Luʼum tiʼ junpʼéel jatsʼuts Paraíso tuʼux maʼ kun antal okʼol mix muʼyajil (Apo. 21:3, 4). ¿Tiaʼanech wa ichil le uláakʼ tamanoʼob kun kajtaloʼob teʼ Paraísooʼ? ¡Le promesa jeʼelaʼ jach táaj jatsʼuts! Jéeobaeʼ tu beetoʼon utiaʼal ka kuxlakoʼon mantatsʼ way Luʼumeʼ. Le oʼolaleʼ le kéen kuxlakoʼon teʼ Paraísooʼ jach yaan u kiʼimaktal k-óol.
11, 12. ¿Baʼaxoʼob kun páajtal k-beetik teʼ Paraísooʼ? (Ilawil xan le dibujoʼoboʼ).
11 Máans ta tuukul bukaʼaj baʼaloʼob ken a beet teʼ Paraísooʼ. Teʼeloʼ maʼ kun antal kʼojaʼanil mix kíimil, le beetik maʼ kan chiʼichnaktal yoʼolal le baʼaloʼobaʼ (Isa. 25:8; 33:24). Jéeobaeʼ yaan u tsʼáaik tiʼ máak tuláakal le baʼax ku tsʼíiboltikoʼ. ¿Baʼax taak a kanik? ¿Taak wa a maas kʼaj óoltik le baʼalcheʼob yéetel le chʼíichʼoʼoboʼ? ¿Taak wa a kanik a pax guitarra wa uláakʼ baʼal? ¿Taak wa a kanik dibujar? Teʼ Paraísooʼ yaan xan u kʼaʼabéettal máakoʼob u yojloʼob u beetoʼob najoʼob, u yojloʼob paakʼal, u beetoʼob janal, u beetoʼob u nuʼukulil meyaj, u jatsʼutskíintikoʼob le jardínoʼoboʼ yéetel uláakʼ baʼaloʼob (Isa. 35:1; 65:21). ¡Yaan u yantal tiempo tiʼ máak utiaʼal u kanik yaʼab baʼaloʼob!
12 ¡Jach yaan u kiʼimaktal k-óol kéen k-kʼam le máaxoʼob kun kaʼa kuxtaloʼoboʼ! (Hech. 24:15). Teʼ Paraísooʼ yaan u páajtal k-maas kaanbal tiʼ Jéeoba bey xan tiʼ le baʼaxoʼob u beetmoʼ (Sal. 104:24; Isa. 11:9). Tsʼoʼoleʼ teʼ Paraíso xanoʼ yaan u páajtal k-adorartik Jéeoba jeʼex uts tu tʼaaneʼ tumen maʼ ken k-beet baʼax kʼaas tu táan. Tuláakal le bendiciónoʼobaʼ, ¿máasaʼ maʼ t-kʼexik utiaʼal ka k-kiʼimakkúunt k-óol «junsúutuk yéetel le kʼebanoʼ»? (Heb. 11:25). U jaajileʼ jeʼel baʼaxak sacrificioil ka a beet beoraaʼ mix baʼal tu táan le bendiciónoʼob ken a kʼamoʼ. Kʼaʼajaktecheʼ yaan u kʼuchul u kʼiinil u yantal le Paraísooʼ yéetel yaan a kajtaliʼ. Pero lelaʼ chéen ku béeytal tumen Jéeobaeʼ jach u yaabiltmoʼon, le oʼolal tu tsʼáaj u kuxtal u Hijo utiaʼal u salvarkoʼon.
Tiʼ le bendiciónoʼob ken u tsʼáa Jéeoba teʼ Paraísooʼ, ¿máakalmáak maas taak a wilkiʼ? (Ilawil párrafo 11 yéetel 12)
AGRADECERT LE YAABILAJ KU YEʼESIKTECH JÉEOBAOʼ
13. ¿Bix jeʼel k-eʼesik k-agradecertik le yaabilaj ku yeʼesiktoʼon Jéeobaoʼ? (2 Corintios 6:1).
13 ¿Bix jeʼel k-agradecertik tiʼ Jéeoba le boʼol tu tsʼáajoʼ? Letiʼe kéen k-tsʼáa táanil ichil k-kuxtal k-meyajtikoʼ (Mat. 6:33). Jesúseʼ tu tsʼáaj u kuxtal «utiaʼal beyoʼ le máaxoʼob kuxaʼanoʼoboʼ maʼ u kuxtaloʼob utiaʼal u beetkoʼob chéen baʼax u kʼáatoʼob, baʼaxeʼ ka kuxlakoʼob utiaʼal ka u beetoʼob baʼax u kʼáat le máax kíim tu yoʼolaloʼob yéetel kaʼa kuxkíintaʼaboʼ» (2 Cor. 5:15). Le kéen k-meyajt Jéeoba yéetel u jaajil k-óoleʼ k-eʼesik k-agradecertik tuláakal le baʼaxoʼob tsʼoʼok u beetik t-oʼolaloʼ (xok 2 Corintios 6:1).
14. ¿Bix jeʼel k-eʼesik k-chaʼik k-nuʼuktaʼal tumen Jéeobaeʼ?
14 Ku páajtal xan k-eʼesik k-yaabiltmaj Jéeoba le kéen k-chaʼa u nuʼuktikoʼon. Lelaʼ k-beetik le kéen k-chʼaʼ en cuenta baʼax ku tuklik le kéen k-chʼaʼ decisiónoʼob jeʼex wa yaan u kaʼantal k-xook bey xan baʼax meyajil ken k-kʼame (1 Cor. 10:31; 2 Cor. 5:7). Le fe yaantoʼon tiʼ Jéeobaoʼ yaan k-eʼesik yéetel le baʼaxoʼob k-beetkoʼ. Leloʼ yaan u yáantaj utiaʼal ka maas muʼukʼaʼanchajak k-fe tiʼ Jéeoba bey xan utiaʼal k-maas bisikba tu yéetel. Tsʼoʼoleʼ beyoʼ k-maas creertik yaan u béeytal le jatsʼuts esperanza yaantoʼonoʼ (Rom. 5:3-5; Sant. 2:21, 22).
15. Tu kʼiiniloʼob le Kʼaʼajsajiloʼ, ¿bix jeʼel k-eʼesik tiʼ Jéeoba k-agradecertik le boʼol tu tsʼáaj utiaʼal u salvarkoʼonoʼ?
15 Uláakʼ bix jeʼel k-agradecertik le boʼol tu tsʼáaj Jéeoba bey xan u nojoch yaabilajoʼ letiʼe kéen meyajnaktoʼon tubeel k-tiempo tu kʼiiniloʼob le Kʼaʼajsajiloʼ. Jach kʼaʼabéet k-ilik k-bin teʼ Kʼaʼajsajiloʼ yéetel k-invitartik uláakʼ máakoʼob utiaʼal ka xiʼikoʼobiʼ (1 Tim. 2:4). Tsol tiʼ le máaxoʼob ka invitartik baʼaxoʼob kun beetbil teʼ Kʼaʼajsajiloʼ. Jeʼel u páajtal a weʼesiktiʼob le video ¿Baʼaxten kíim Jesús? yéetel Kʼaʼajs úuchik u kíimil Cristo, tiaʼan teʼ jw.org. Le ancianoʼob xanoʼ kʼaʼabéet u yilkoʼob u invitarkoʼob le inactivoʼoboʼ. ¡Máans ta tuukul bukaʼaj kiʼimak óolal kun antal teʼ kaʼan yéetel way Luʼum le kéen suunak ichil u kaajal Jéeoba juntúul chan taman saatloʼ! (Luc. 15:4-7). Le kéen xiʼikech teʼ Kʼaʼajsajiloʼ ilawil a saludartik tuláakal, maases le túumbenoʼoboʼ yéetel le máaxoʼob úuch pʼáatak maʼ tu muchʼkubaʼob t-éeteloʼ. ¡Jach k-kʼáat ka u yuʼuboʼob yaabiltaʼanoʼob! (Rom. 12:13).
16. ¿Baʼaxten maʼalob ka k-maas meyajt Jéeoba tu kʼiiniloʼob le Kʼaʼajsajiloʼ?
16 ¿Jeʼel wa u páajtal a maas meyajtik Jéeoba tu kʼiiniloʼob le Kʼaʼajsajiloʼ? Wa ka beetkeʼ yaan a weʼesik tiʼ Jéeoba yéetel tiʼ Jesús jach ka agradecertik le baʼaxoʼob u beetmoʼob t-oʼolaloʼ. Wa k-maas jóoʼsik tiempo utiaʼal k-kʼaʼaytajeʼ yaan k-ilik bix u yáantkoʼon Jéeoba yéetel yaan k-maas confiar tiʼ letiʼ (1 Cor. 3:9). Tsʼoʼoleʼ ilawil a xokik u xookil le Biblia tu kʼiiniloʼob le Kʼaʼajsajil yaan teʼ folleto Xakʼalxokt sáamsamal le Bibliaoʼ wa le programa ku chíikpajal teʼ U juʼunil xookoʼ. Wa ku páajtaleʼ investigart u maasil le baʼaxoʼob ka xokik teʼ tekstoʼoboʼ.
17. ¿Bix jeʼel a kiʼimakkúuntik u yóol Jéeobaeʼ? (Ilawil xan le cuadro « Jejeláas bix k-tsʼáaik gracias tiʼ Jéeoba»).
17 Maʼ xaaneʼ maʼ kun páajtal a beetik tuláakal le baʼaxoʼob tsʼoʼok a kanik teʼ xookaʼ. Pero kex beyoʼ kʼaʼajaktecheʼ Jéeobaeʼ maʼatech u comparartik le baʼaxoʼob ka beetik yéetel le baʼaxoʼob ku beetik u maasiloʼ. Letiʼeʼ maases ku yilik le baʼax yaan ta puksiʼikʼaloʼ. Tsʼoʼoleʼ jach ku kiʼimaktal u yóol kéen u yil jach ka agradecertik le jatsʼuts siibal tu tsʼáajtoʼonoʼ: le boʼoloʼ (1 Sam. 16:7; Mar. 12:41-44).
18. ¿Baʼaxten jach k-tsʼáaik u graciasil tiʼ Jéeoba yéetel tiʼ Jesús yoʼolal le boʼol tu tsʼáajoʼoboʼ?
18 Chéen yoʼolal le boʼol tu tsʼáaj Jéeobaoʼ ku páajtal k-bisikba tu yéetel, ku páajtal u perdonartaʼal k-kʼebanoʼob yéetel ku páajtal u yantaltoʼon kuxtal minaʼan u xuul. Mantatsʼ kʼaʼabéet k-agradecertik u nojoch yaabilaj Jéeoba, tumen leloʼ letiʼe baʼax péeks u bendecirtoʼonoʼ (1 Juan 4:19). Kʼaʼabéet xan k-agradecertik tiʼ Jesús le nojoch yaabilaj ku yeʼesiktoʼonoʼ, tumen lelaʼ letiʼe baʼax péeks u tsʼáa u kuxtal t-oʼolaloʼ (Juan 15:13).
KʼAAY 154 Le yaabilajoʼ mix bikʼin kun xuʼulul
