1. ¿Baʼax ku beetik yaʼab máakoʼob bejlaʼeʼ?

 ¿TSʼOʼOK wa a tsʼáaik cuentaeʼ u maas yaʼabil tiʼ le máakoʼoboʼ u kʼáat ka alabartaʼakoʼob? Yaʼab tiʼ letiʼobeʼ ku meyajtiʼob le redes sociales utiaʼal ka kʼaj óoltaʼakoʼoboʼ bey xan utiaʼal u presumirkoʼob le baʼaxoʼob ku beetkoʼoboʼ. Bejlaʼeʼ jach junpʼíit le máakoʼob ku alabarkoʼob Diosoʼ. Teʼ xookaʼ yaan k-ilik bix u alabartaʼal Jéeoba yéetel baʼaxten kʼaʼabéet k-beetik. Yaan xan k-kanik bix jeʼel k-alabartikeʼ yéetel maʼ tun xáantaleʼ letiʼeʼ yaan u beetik ka alabartaʼak u kʼaabaʼ.

¿BIX U ALABARTAʼAL JÉEOBA?

2. ¿Bix úuchik u yeʼesik Jéeoba teʼ Montaña Sinaí le bukaʼaj poder yaantiʼoʼ? (Ilawil xan le dibujooʼ).

² Le Bibliaoʼ ku yaʼalikeʼ le bukaʼaj poder yaan tiʼ Jéeobaoʼ jeʼel u beetik u jaʼakʼal u yóol máakeʼ. Le taʼaytak u jáalkʼabtaʼal u kaajil Israel tu kʼab le egipcioʼoboʼ Jéeobaeʼ tu yeʼesaj le bukaʼaj poder yaantiʼoʼ. Máans ta tuukul lelaʼ: u millonesil israelitaʼobeʼ u muchʼmubaʼob teʼ Montaña Sinaí utiaʼal ka u yuʼuboʼob baʼax ken u yaʼal Jéeobaoʼ. Chéen ka tu yiloʼobeʼ tu yóokʼol le montañaoʼ yaan junpʼéel box múuyaliʼ yéetel káaj u sen tíitkuba le montañaoʼ. Joʼopʼ xan u butsʼilankil, tsʼoʼoleʼ tu yóokʼoleʼ táan kaʼach u léembal yéetel u kíilbal cháakiʼ. Chéen ka tu yuʼuboʼob xaneʼ kʼaʼam u yustaʼal baakiʼ (Éxo. 19:​16-18; 24:17; Sal. 68:8). Jach jaʼakʼ wal u yóol le israelitaʼob le ka tu yiloʼob bukaʼaj nojchil u poder Jéeobaoʼ.

3. ¿Bix u alabartaʼal Jéeoba?

³ Wíinikeʼ ¿jeʼel wa u páajtal u alabartik Jéeoba, le Dios jach  táaj yaan u poderoʼ? Jeʼeleʼ, junpʼéel bixeʼ letiʼe kéen u tsikbalt tiʼ uláakʼ máakoʼob le bukaʼaj poder yaantiʼoʼ bey xan u jatsʼuts modosoʼob. Uláakʼeʼ letiʼe kéen u yaʼal máak chéen tu yoʼolal Jéeoba ku páajtal u beetik tuláakal baʼaloʼ (Isa. 26:12). Rey Davideʼ bey tu beetiloʼ. Tiʼ junpʼéel oración tu beetaj tu táan u kaajil Israeleʼ tu yaʼalaj: «Jéeoba, techeʼ jach yaan a poder, jach yaan a muukʼ, jach kiʼichkelmech yéetel minaʼan uláakʼ máax jeʼex techeʼ, tumen a tiaʼal tuláakal le baʼaloʼob yaan teʼ kaʼan yéetel way luʼumeʼ». Ka tsʼoʼok u orareʼ «tuláakal [ . . . ] le kaajoʼ tu alabartaj Jéeoba» (1 Cró. 29:​11, 20).

4. Jesúseʼ, ¿bix úuchik u alabartik Jéeoba?

⁴ Le tiaʼan Jesús way Luʼumeʼ jejeláas bix úuchik u alabartik u Taata. Por ejemploeʼ letiʼ kaʼacheʼ cada ken u beet milagroʼobeʼ ku yaʼalikeʼ chéen yoʼolal u Taata ku páajtal u beetik (Mar. 5:​18-20). Tu alabartaj xan yoʼolal bix tu tratartil la máakoʼoboʼ bey xan yoʼolal le baʼaxoʼob tu yaʼalaj yoʼolal Jéeobaoʼ. Juntéenjeak le táan kaʼach u kaʼansaj Jesús tiʼ junpʼéel sinagogaoʼ tu yilaj juntúul koʼolel tsʼoʼok 18 años beetaʼak u kʼojaʼantal tumen juntúul demonio. Le koʼolelaʼ wuutsʼul u paach yéetel junpuliʼ maʼ tu páajtal u toj waʼatal kaʼachi. Jach táaj yaj le baʼax táan u aktáantikoʼ. Le ka tu yilaj Jesús bix u sufrir le koʼolelaʼ, tu chʼaʼaj óotsilil tiʼeʼ ka tu yaʼalaj: «Koʼolel, beoraaʼ tsʼoʼok a wutstal tiʼ le baʼax beetik a kʼojaʼantaloʼ». Jesúseʼ tu tsʼáaj u kʼab yóokʼol le koʼoleloʼ, letiʼ túuneʼ tu séebaʼanil toj waʼalajeʼ «ka joʼopʼ u alabartik Dios» (Luc. 13:​10-13). Toʼon xaneʼ jach yaʼab baʼax oʼolal unaj k-alabartik.

¿BAʼAXTEN K-ALABARTIK JÉEOBA?

5. ¿Baʼaxten k-respetartik Jéeoba?

⁵ K-alabartik Jéeoba tumen jach k-respetartik. Jach yaʼab baʼax oʼolal k-respetartik Jéeoba. Letiʼeʼ «jach yaan u poder yéetel jach yaan u muukʼ» (Sal. 96:​4-7). Jéeobaeʼ jach yaan xan u naʼat, lelaʼ ku chíikpajal tiʼ tuláakal le baʼax u beetmoʼ. Letiʼeʼ tu tsʼáajtoʼon kuxtal bey xan tuláakal le baʼaxoʼob kʼaʼabéettoʼonoʼ (Apo. 4:11). Tsʼoʼoleʼ jach chúukaʼan xan u yóol (Apo. 15:4). Tuláakal le baʼax ku yaʼalikoʼ ku béeytal, mix junpʼéel ku fallariʼ (Jos. 23:14). Le oʼolal profeta Jeremíaseʼ tu yaʼalaj yoʼolal Jéeoba: «Ichil tuláakal le máaxoʼob yaan u naʼatoʼob yaan tiʼ tuláakal le kaajoʼob yéetel tiʼ tuláakal le luʼumoʼoboʼ minaʼan mix juntúul jeʼex techeʼ» (Jer. 10:​6, 7). Jeʼex k-ilkoʼ jach yaʼab baʼax oʼolal k-respetartik le k-Taata yaan teʼ kaʼanoʼ. Letiʼeʼ maʼ chéen unaj k-respetarkiʼ, baʼaxeʼ kʼaʼabéet xan k-yaabiltik.

6. ¿Baʼaxten k-yaabiltmaj Jéeoba?

⁶ K-alabartik Jéeoba tumen k-yaabiltmaj yéetel tuláakal k-puksiʼikʼal. Letiʼeʼ jach táaj jatsʼuts u modos, le oʼolal k-yaabiltmaj. Por ejemploeʼ jach ku chʼaʼiktoʼon óotsilil (Sal. 103:13; Isa. 49:15). Tsʼoʼoleʼ ku naʼatik bix k-uʼuyikba kéen sufrirnakoʼon yéetel ku yaatal xan u yóol (Zac. 2:8). Ku yáantkoʼon utiaʼal ka náatsʼkoʼon tu yiknal bey xan utiaʼal k-bisikba tu yéetel (Sal. 25:14; Hech. 17:27). Jéeobaeʼ jach kabal u yóol tumen «ku chintal u pakt le kaʼan yéetel le luʼumoʼ», yéetel «ku líiʼsik le máax ku pechʼ óoltaʼal kulukbal teʼ luʼumoʼ» (Sal. 113:​6, 7). Yoʼolal tuláakal le baʼaloʼobaʼ, ¿máasaʼ ku taaktal k-alabartik le Dios jach táaj uts u modosoʼ? (Sal. 86:12).

7. ¿Baʼax jatsʼuts páajtalil yaantoʼon?

⁷ K-alabartik Jéeoba tumen k-kʼáat ka kʼaj óoltaʼak tumen le máakoʼoboʼ. Yaʼab máakeʼ ku tuklikeʼ Dioseʼ kʼasaʼan. ¿Baʼaxten bey u tuukuloʼoboʼ? Tumen Satanáseʼ tsʼoʼok u yaʼalik yaʼab baʼaloʼob maʼ jaajtak tu yoʼolal Jéeobaiʼ (2 Cor. 4:4). Ku yaʼalikeʼ Jéeobaeʼ chéen ku yilik baʼax ku yúuchultoʼon yéetel maʼ taak u  yáantkoʼoniʼ, ku yaʼalik xaneʼ u culpa tuláakal le baʼax ku yúuchul way yóokʼol kaabeʼ. Pero toʼoneʼ k-ojleʼ leloʼ maʼ jaajiʼ. Yaantoʼon u jatsʼuts páajtalil k-alabartik Jéeoba le kéen k-áant le máakoʼob u kʼaj óoltoʼob jach bix u modosoʼ (Isa. 43:10). Beoraaʼ yaan k-xakʼaltik jujunpʼéel u versículoiloʼob le Salmo 96, teʼeloʼ yaan k-kanik jejeláas bix jeʼel k-alabartik Jéeobaeʼ.

¿BIX JEʼEL K-ALABARTIK JÉEOBAEʼ?

8. ¿Bix jeʼel k-alabartik Jéeobaeʼ? (Salmo 96:​1-3).

⁸ (Xok Salmo 96:​1-3). Jeʼel u páajtal k-alabartik Jéeoba yoʼolal le baʼaxoʼob k-aʼalik tu yoʼolaloʼ. Le versículoʼobaʼ ku yeʼeskoʼobeʼ le máaxoʼob meyajtik Diosoʼ kʼaʼabéet u kʼaayoʼob tiʼ Jéeoba, u alabarkoʼob u kʼaabaʼ bey xan u tsikbaltikoʼob tiʼ le kaajoʼob bukaʼaj u poder yéetel le bix u salvartik máakoʼ. Le kéen k-beet tuláakal le baʼaloʼobaʼ táan k-alabartik Jéeoba. Le judíoʼob bey xan le sukuʼunoʼob kuxlajoʼob teʼ yáax siglooʼ tu kaxtoʼob jejeláas súutukiloʼob utiaʼal u defenderkoʼob u kʼaabaʼ Jéeoba. Tsʼoʼoleʼ tu tsikbaltoʼob tiʼ u maasil le jatsʼuts baʼaloʼob tu beetaj tu yoʼolaloʼoboʼ (Dan. 3:​16-18; Hech. 4:29). ¿Bix jeʼel u páajtal k-beetik jeʼex letiʼobeʼ?

9, 10. ¿Baʼax ku kaʼansiktoʼon le baʼax úuch tiʼ Angelinaoʼ? (Ilawil xan le fotooʼ).

⁹ Koʼoneʼex ilik baʼax úuch tiʼ juntúul kiik kajaʼan Estados Unidos ku kʼaabaʼtik Angelina. a Letiʼeʼ tu yeʼesaj maʼ saajkiʼ tumen tu defendertaj u kʼaabaʼ Jéeoba teʼ tuʼux ku meyajoʼ. Como maʼ úuch okok meyaj teʼ lugaroʼ invitartaʼab tiʼ junpʼéel reunión utiaʼal ka u presentartuba tiʼ u yéet meyajoʼob. Letiʼeʼ tu kaxtaj jujunpʼéel fotoʼob utiaʼal u yeʼesik le kiʼimak óolal ku taasik u beetkuba máak u testigo Jéeobaoʼ. Chéen baʼaleʼ le máak tu presentartuba antes tiʼ letiʼoʼ tu yaʼaleʼ líiʼsaʼab bey u testigo Jéeobaeʼ, pero joʼopʼ u burlarkuba tiʼ le baʼaxoʼob k-creerkoʼ. Angelinaeʼ tu yaʼalaj: «Jach táaj nerviosachajen. Chéen baʼaleʼ tin tuklaj: ‹¿Yaan wa in chaʼik u yaʼalaʼal tuusoʼob tu yoʼolal Jéeoba, wa yaan in defendertik?›».

¹⁰ Ka tsʼoʼok u tʼaan le máakoʼ, Angelinaeʼ jáan orarnaji. Tsʼoʼoleʼ yéetel utsileʼ tu yaʼalajtiʼ: «Yaan tiʼ baʼax chíikaʼanoʼon. Teen xaneʼ líiʼsaʼaben bey u testigo Jéeobaeʼ, tak bejlaʼa Testigoʼeneʼ». Tuláakal le máakoʼob yanoʼob kaʼach teʼeloʼ jaʼakʼ u yóoloʼob. Angelina  túuneʼ tu yeʼesajtiʼob jujunpʼéel fotoʼob tiʼ le jatsʼuts baʼaloʼob tsʼoʼok u beetik ichil u kaajal Jéeobaoʼ, ka tsʼoʼokeʼ tu tsolajtiʼob jujunpʼéel tiʼ le baʼaxoʼob ku creerkoʼ (1 Ped. 3:15). Le ka tsʼoʼok u tʼaan Angelinaeʼ, le máak tu yaʼalaj baʼaloʼ tu yaʼaleʼ yaan xan baʼaxoʼob jatsʼutstak úuchtiʼ le táan kaʼach u líiʼsaʼal bey u testigo Jéeobaoʼ. Angelinaeʼ ku yaʼalik: «Jéeobaeʼ jach ku merecertik ka k-alabart u kʼaabaʼ. Leloʼ junpʼéel nojoch privilegio». Toʼon xaneʼ k-ilik bey junpʼéel privilegio k-alabartik u kʼaabaʼ Jéeoba kex yaan kʼiin yaan máakoʼob ku yaʼalikoʼob tuusoʼob tu yoʼolal.

11. Le máaxoʼob meyajtik Dios úuchjeakiloʼ, ¿bix tu beetiloʼob le baʼax ku yaʼalik Salmo 96:8?

¹¹ (Xok Salmo 96:8). K-alabartik Jéeoba yéetel le baʼaloʼob maas maʼalobtak yaantoʼonoʼ. Desde úuchjeakileʼ le máaxoʼob meyajtik Jéeobaoʼ bey u alabarkoʼoboʼ (Pro. 3:9). Por ejemploeʼ le israelitaʼoboʼ tu síiʼob baʼaloʼob utiaʼal u beetaʼal bey xan utiaʼal u yutskíintaʼal le templooʼ (2 Rey. 12:​4, 5; 1 Cró. 29:​3-9). Jujuntúul u discípuloʼob Jesús xaneʼ «meyajnajtiʼob baʼaxoʼob yaantiʼob» utiaʼal u maʼanal baʼax kʼaʼabéet tiʼ letiʼob bey xan tiʼ le apóstoloʼoboʼ (Luc. 8:​1-3). Le sukuʼunoʼob teʼ yáax siglo xanoʼ tu túuxtoʼob áantaj tiʼ uláakʼ sukuʼunoʼob (Hech. 11:​27-29). Teʼ kʼiinoʼob xanaʼ ku páajtal k-alabartik Jéeoba le kéen k-tsʼáa k-donaciónoʼob.

12. ¿Bix k-alabartik Jéeoba yéetel k-donaciónoʼob? (Ilawil xan le fotooʼ).

¹² Koʼoneʼex ilik bix jeʼel k-alabartik Jéeoba yéetel k-donaciónoʼobeʼ. Tu añoil 2020, anchaj junpʼéel nojoch sequía Zimbabue. U millonesil máakoʼob pʼáat minaʼan baʼal u jaantoʼob, hasta jeʼel tak u kíimloʼob kaʼacheʼ. Ichil letiʼobeʼ tiaʼan kaʼach juntúul kiik ku kʼaabaʼtik Prisca. Kex yaj le baʼax ku aktáantkoʼoboʼ letiʼeʼ cada miércoles yéetel viernes ku jóokʼol kʼaʼaytaj, bey u beetik tak teʼ kʼiinoʼob ku yúuchul paakʼaloʼ. U vecinoʼobeʼ ku burlarkoʼob kaʼach le kiikoʼ tumen tu lugar u bin meyajeʼ, ku jóokʼol kʼaʼaytaj. Ku yaʼalikoʼobtiʼ: «¡Yaan a kíimil yéetel wiʼijil!». Pero le kiikoʼ yéetel u jaajil u yóol ku yaʼaliktiʼob: «Jéeobaeʼ mix juntéen u pʼaten». Maʼ xáanchajeʼ yoʼolal le donaciónoʼob ku tsʼaʼabaloʼ u kaajal Jéeobaeʼ tu túuxtaj áantajiʼ. Jujuntúul tiʼ le vecinoʼoboʼ jach jaʼakʼ u yóoloʼob yoʼolal le baʼax úuchoʼ, ka tu yaʼaloʼob: «Dioseʼ mix juntéen tu pʼatech. K-kʼáat ka a kaʼansoʼon tu yoʼolal». Siete tiʼ letiʼobeʼ káaj u binoʼob reunión.

13. ¿Bix jeʼel k-alabartik Jéeoba yéetel le baʼaxoʼob k-beetkoʼ? (Salmo 96:9).

 ¹³ (Xok Salmo 96:9). K-alabartik Jéeoba yéetel le baʼaxoʼob k-beetkoʼ. Le sacerdoteʼob úuchjeakiloʼ antes tiʼ u yookloʼob teʼ tabernáculo yéetel teʼ templooʼ ku pʼoʼik u kʼaboʼob yéetel u yookoʼob (Éxo. 40:​30-32). Teʼ kʼiinoʼob xanaʼ toʼoneʼ k-beetik tuláakal le ku páajtal utiaʼal k-pʼatik limpioil k-wíinklil bey xan k-kuxtal (Sal. 24:​3, 4; 1 Ped. 1:​15, 16). K-ilik pitik le «úuchben modos[oʼ]» utiaʼal ka k-búukint «le túumben[oʼ]». Lelaʼ u kʼáat u yaʼaleʼ k-pʼatik le kʼaakʼas modos yaantoʼon kaʼachoʼ bey xan le baʼaloʼob maʼ maʼalobtak k-beetkoʼ, utiaʼal ka káajak k-tuukul jeʼex Jéeobaeʼ yéetel utiaʼal k-eʼesik le jatsʼuts modos yaan tiʼ letiʼoʼ (Col. 3:​9, 10). Yéetel u yáantaj Dioseʼ tak le máaxoʼob ku núupkʼebantaloʼob yéetel jach kʼasaʼanoʼoboʼ jeʼel u páajtal u pitkoʼob le úuchben modosoʼ utiaʼal ka u búukintoʼob le túumbenoʼ.

14. ¿Baʼax ku kaʼansiktoʼon u ejemplo Jack? (Ilawil xan le fotooʼ).

¹⁴ Koʼoneʼex ilik baʼax úuch tiʼ Jack. Letiʼeʼ jach kʼaas u modos kaʼachi yéetel jach ku baʼateʼel, u apodoeʼ Demonio. Yoʼolal le baʼaxoʼob kʼaastak tu beetoʼ le juezoʼ tu yaʼaleʼ u castigoeʼ: u kíimsaʼal. Chéen baʼaleʼ le táan u páaʼtik u kʼiinil u kíimsaʼaloʼ, tu yóotaj ka tsʼaʼabak xook tiʼ tumen juntúul sukuʼun ku bin kʼaʼaytaj teʼ cárceloʼ. Kex jach kʼaas tuláakal le baʼax u beetmaj Jackoʼ tu kʼexaj u kuxtal, ka máan kʼiineʼ okjaʼanajeʼ ka tu beetuba u testigo Jéeoba. Le ka kʼuch u kʼiinil u kíimsaʼaleʼ jujuntúul guardiaʼobeʼ bin u despedirtubaʼob tiʼ letiʼeʼ ka káaj u yáalal u jaʼil u yichoʼob. Juntúul soldado tiaʼan kaʼach teʼeloʼ tu yaʼalaj: «Kaʼacheʼ Jack u maas kʼasaʼanil le máaxoʼob kʼalaʼanoʼoboʼ, pero beoraaʼ letiʼ u maas utsil». Ka máan junpʼéel semanaeʼ le sukuʼunoʼoboʼ suunajoʼob utiaʼal ka u máansoʼob le reunión teʼ cárceloʼ, pero tu tsʼáajoʼob cuentaeʼ yaan juntúul máak yáax u bin reuniónoʼ. ¿Baʼaxten tu chʼaʼtuklaj u biniʼ? Tumen le máakaʼ jach jaʼakʼ u yóol yoʼolal bix tu kʼexil u kuxtal Jack, yéetel taak kaʼach u yojéeltik baʼax unaj u beetik utiaʼal u adorartik Jéeoba. Le ejemploaʼ ku yeʼesikeʼ jeʼel u páajtal k-alabartik Jéeoba yéetel le baʼaxoʼob k-beetkoʼ (1 Ped. 2:12).

 MAʼ TUN XÁANTALEʼ JÉEOBAEʼ YAAN U ALABARTIK U KʼAABAʼ

15. Maʼ tun xáantaleʼ, ¿baʼax ken u beet Jéeoba utiaʼal u alabartaʼal u kʼaabaʼ? (Salmo 96:​10-13).

¹⁵ (Xok Salmo 96:​10-13). Le Salmo 96, ku yaʼalikeʼ Jéeobaeʼ juntúul Rey ku juzgar yéetel justicia. Maʼ tun xáantaleʼ, ¿bix ken u alabartil Jéeoba u kʼaabaʼ? Yaan u beetik yéetel juicioʼob. Yaan u xuʼulsik tiʼ le Nojoch Babiloniaoʼ tumen jach tu pʼataj kʼaasil u kʼaabaʼ (Apo. 17:​5, 16; 19:​1, 2). Jujuntúul tiʼ le máaxoʼob ken u yiloʼob u xuʼulsaʼal tiʼ le religiónoʼob maʼ jaajtakoʼ yaan u chʼaʼtuklikoʼob u adorarkoʼob Jéeoba. Teʼ Armagedónoʼ Jéeobaeʼ yaan u xuʼulsik tiʼ u kʼasaʼan yóokʼol kaab Satanás. Yaan u xuʼulsik tuláakal le máaxoʼob pʼekmiloʼ yéetel tu kʼaskúuntoʼob u kʼaabaʼoʼ, pero yaan u salvartik le máaxoʼob yaabiltmiloʼ, le ku yuʼubikoʼob tʼaanoʼ yéetel ku alabarkoʼob u kʼaabaʼoʼ (Mar. 8:38; 2 Tes. 1:​6-10). Jéeobaeʼ yaan u santificartik u kʼaabaʼ yéetel yaan u alabartik kéen tsʼoʼokok le Mil Años kun Reinar Jesúsoʼ yéetel le u tsʼook pruebaoʼ (Apo. 20:​7-10). Teʼ kʼiinoʼob jeʼeloʼ «le luʼumaʼ yaan u chuʼupul yéetel máakoʼob u kʼaj óoloʼob bukaʼaj u poder Jéeoba, yaan u chuʼupul jeʼex chuupil le kʼáaʼnáab yéetel jaʼoʼ» (Hab. 2:14).

16. ¿Baʼax kʼaʼabéet k-beetik? (Ilawil xan le dibujooʼ).

¹⁶ ¡Bukaʼaj jatsʼutsil ken kʼuchuk u kʼiinil u alabartaʼal u kʼaabaʼ Jéeoba tiʼ tuláakal yóokʼol kaab! Mientras táan k-páaʼtik u kʼuchul le kʼiin jeʼeloʼ kʼaʼabéet k-alabartik Jéeoba tiʼ tuláakal súutukil. Lelaʼ junpʼéel baʼal jach kʼaʼanaʼan, le oʼolal le Cuerpo Gobernanteoʼ utiaʼal u tekstoil le año 2025, tu yéeyaj Salmo 96:8 tuʼux ku yaʼalik: «Alabarteʼex Jéeoba tu yoʼolal u kiʼichkelem kʼaabaʼ».