1. ¿Baʼaxten kiʼimak k-óol úuchik u tsʼáaiktoʼon Jéeoba le Bibliaoʼ?

 ¡TOʼONEʼ jach k-tsʼáaik u graciasil tiʼ Jéeoba úuchik u tsʼáaiktoʼon le Bibliaoʼ! Teʼeloʼ yaan consejoʼob jeʼel u yáantkoʼon kéen yanaktoʼon problemaseʼ. Tsʼoʼoleʼ ku yaʼaliktoʼon xan le jatsʼuts baʼaloʼob ken u beet Dios maʼ kun xáantaloʼ. Pero u maas jaʼtsileʼ ku yaʼaliktoʼon bix u jatsʼuts modos Jéeoba. Le kéen tuukulnakoʼon tiʼ u jatsʼuts modoseʼ k-maas yaabiltik, k-maas natsʼikba tu yiknal yéetel k-amigotik (Sal. 25:14).

2. ¿Baʼax tsʼoʼok u beetik Jéeoba utiaʼal ka kʼaj óoltaʼak?

² Jéeobaeʼ u kʼáat ka kʼaj óoltaʼak tumen le máakoʼoboʼ. Úuchjeakileʼ utiaʼal ka kʼaj óoltaʼak bix letiʼeʼ meyajnajtiʼ náayoʼob, tu tsʼáaj wa baʼax u yil le máakoʼoboʼ yéetel tu túuxtaj ángeloʼob way Luʼumeʼ (Núm. 12:6; Hech. 10:3, 4). Wa maʼ u tsʼíibtaʼal kaʼach tuláakal le baʼaloʼobaʼ bejlaʼa maʼ tu páajtal k-xakʼaltikoʼobeʼ. Le oʼolal Jéeobaeʼ tu péeksaj wíinikoʼob utiaʼal ka u tsʼíibtoʼob «tiʼ junpʼéel libro» tuláakal le baʼax u kʼáat ka k-ojéeltoʼ (Jer. 30:2). Le Bibliaoʼ ku yaʼalikeʼ «tuláakal baʼax ku beetik u jaajil Dioseʼ jach táaj maʼalob», le oʼolal k-ojel tuláakal le baʼax tu beetaj u tsʼíibtaʼal teʼ Bibliaoʼ utiaʼal k-utsil (Sal. 18:30).

3. ¿Baʼax tsʼoʼok u beetik Jéeoba utiaʼal ka yanaktoʼon le Biblia tak teʼ kʼiinoʼobaʼ? (Isaías 40:8).

³ (Xok Isaías 40:8). Le Bibliaoʼ desde úuchjeakil jach tsʼoʼok u yáantik le máaxoʼob adorartik Diosoʼ. Pero ¿baʼax tsʼoʼok u beetik Jéeoba utiaʼal ka yanaktoʼon tak teʼ kʼiinoʼobaʼ? Kʼaʼajaktoʼoneʼ le Bibliaoʼ tsʼíibtaʼab tiʼ baʼaloʼob  séeb u kʼastaloʼob jeʼex le pergaminooʼ, tsʼoʼoleʼ bejlaʼeʼ minaʼan mix junpʼéel tiʼ le úuchben documentoʼoboʼ. Chéen baʼaleʼ Jéeobaeʼ tu beetaj u copiartaʼal le Bibliaoʼ. U jaajileʼ le máaxoʼob copiartoʼ kʼeban máakoʼob, pero jach tu kanáantoʼob bix tu beetiloʼob le meyajoʼ. Juntúul máak jach ku xakʼaltik u xookiloʼob le Bibliaoʼ tu yaʼalaj yoʼolal le Tsʼíiboʼob ich Hebreooʼ: «Minaʼan uláakʼ libro jach kanáantaʼab bix úuchik u copiartaʼal yéetel jach maʼalob beetaʼanil». Le beetkeʼ kex tsʼíibtaʼab tiʼ baʼaloʼob séeb u kʼastaloʼob yéetel kʼeban máakoʼob tsʼíibteʼ le baʼaloʼob ku yaʼalikoʼ maʼ kʼexpajkiʼ tumen tiʼ Dios u taal.

4. ¿Baʼax ken k-il teʼ xookaʼ?

⁴ «Tuláakal le baʼaloʼob maʼalobtak yéetel chúukaʼantak ku siʼibiltoʼonoʼ» tiʼ Dios u taal (Sant. 1:17). Le Bibliaoʼ junpʼéel tiʼ le baʼaloʼob maʼalobtak tsʼoʼok u síiktoʼon Jéeobaoʼ. Yéetel le baʼaxoʼob ku síiktoʼon juntúul máakoʼ ku yeʼesik wa jach tu jaajil u kʼaj óoloʼon bey xan wa u yojel baʼax kʼaʼabéettoʼon. Úuchik u síiktoʼon le Bibliaoʼ Jéeobaeʼ ku yeʼesik jach u kʼaj óoloʼon yéetel u yojel baʼaxoʼob kʼaʼabéettoʼon. Teʼ xookaʼ yaan k-xakʼaltik óoxpʼéel u jatsʼuts modos Jéeoba ku chíikpajal teʼ Bibliaoʼ: u naʼat, u justicia yéetel u yaabilaj. Yáaxeʼ koʼoneʼex ilik baʼax ku yaʼalik yoʼolal u naʼat Dios.

5. Tsol baʼaxten le Bibliaoʼ ku yeʼesik le naʼat yaan tiʼ Diosoʼ.

⁵ Jéeobaeʼ u yojel jach kʼaʼabéettoʼon maʼalob consejoʼob. Le oʼolal teʼ Bibliaoʼ yaʼab consejoʼob yaniʼ. Leloʼobaʼ jach yaʼab u yáantajoʼob, jeʼel tak u kʼexik u kuxtal máakeʼ. Moiséseʼ tu tsʼíibtaj u yáax cinco librosil le Bibliaoʼ, tiʼ junpʼéeleʼ tu yaʼalaj tiʼ le israelitaʼoboʼ: «Le tʼaanoʼobaʼ maʼ chéen tʼaanoʼob minaʼan u biilaloʼobiʼ, baʼaxeʼ le tʼaanoʼobaʼ yaan u tsʼáaikteʼex kuxtal» (Deu. 32:47). Le máaxoʼob tu beetoʼob le baʼax ku yaʼalik u Tʼaan Diosoʼ kiʼimakchaj u yóoloʼob yéetel bin utsil tiʼob (Sal. 1:2, 3). Kex úuch tsʼíibtaʼak le Bibliaoʼ tak bejlaʼa ku páajtal u kʼexik u kuxtal máakeʼ. Por ejemploeʼ teʼ sitio jw.org, yaan junpʼéel jaats ku kʼaabaʼtik «Kʼeʼex u kuxtaloʼob tumen le Bibliaoʼ». Teʼeloʼ yaan maas tiʼ 50 experienciaʼob tuʼux ku tsikbaltik le sukuʼunoʼob bix áantaʼabikoʼob tumen le Biblia utiaʼal ka u kʼex u kuxtaloʼoboʼ (1 Tes. 2:13).

6. ¿Baʼaxten minaʼan uláakʼ libro jeʼex le Bibliaoʼ?

⁶ Minaʼan uláakʼ libro jeʼex le Bibliaoʼ. ¿Baʼaxten? Tumen tiʼ Jéeoba u taal, letiʼeʼ jach táaj yaan u poder, mix bikʼin kun xuʼulul yéetel jach táaj yaan u naʼat. Yaan libroʼob úuch tsʼíibtaʼakoʼobeʼ tak bejlaʼa ku xoʼokloʼobeʼ, chéen baʼaleʼ le consejoʼob ku tsʼáaikoʼoboʼ tsʼoʼok u pʼáatal maʼatech u yáantkoʼob máak. Pero le consejoʼob yaan teʼ Bibliaoʼ maʼ beyoʼobiʼ tumen tak bejlaʼa ku yáantkoʼob máakeʼ. Le kéen k-xok le Biblia yéetel kéen tuukulnakoʼon tiʼ le consejoʼob ku taaskoʼ Jéeobaeʼ ku tsʼáaiktoʼon u espíritu santo, lelaʼ ku yáantkoʼon utiaʼal k-tsʼáaik ichil k-kuxtal le baʼax t-kanoʼ (Sal. 119:27; Mal. 3:16; Heb. 4:12). Jeʼex k-ilkoʼ Jéeoba le máax beet u tsʼíibtaʼal le Bibliaoʼ jach u kʼáat u yáantoʼon. ¿Máasaʼ leloʼ ku péeksikoʼon utiaʼal k-xokik sáamsamal?

7. ¿Bix úuchik u yáantaj le Biblia utiaʼal u múul meyaj u kaajal Dios úuchjeakiloʼ?

⁷ Le Bibliaoʼ ku yeʼesik le naʼat yaan tiʼ Diosoʼ tumen ku yáantik u kaajal utiaʼal ka múul meyajnak. Le ka ook le israelitaʼob teʼ luʼum aʼalaʼan u tsʼaʼabaltiʼoboʼ jejeláas  tuʼux binoʼob kajtal. Yanoʼobeʼ káaj u chukikoʼob kay, yaneʼ káaj u tséentik wakax yéetel uláakʼoʼobeʼ káaj u meyajtikoʼob le kʼáaxoʼ, leloʼ jeʼel kaʼach u beetik u xuʼulul u biskubaʼob yéetel u paklan áantkubaʼobeʼ. Pero utiaʼal maʼ u yúuchul leloʼ Jéeobaeʼ tu yaʼaleʼ kʼaʼabéet u muchʼkubaʼob utiaʼal u yuʼubikoʼob u xoʼokol u Tʼaan Dios yéetel u kaanbaloʼob tiʼ (Deu. 31:10-13; Neh. 8:2, 8, 18). Máans ta tuukul bix wal u yuʼubikuba juntúul israelita le kéen xiʼik adorar tu kaajil Jerusaléneʼ. Kéen kʼuchkeʼ maʼ xaaneʼ ku yilik u millonesil israelitaʼob ku taaloʼob jejeláas tuʼuxoʼob utiaʼal u adorarkoʼob Jéeoba. Bey áantaʼabikoʼob tumen Jéeoba utiaʼal u pʼáatloʼob junmúuchʼoʼ. Teʼ yáax siglo xanoʼ ichil u kaajal Dioseʼ yaan kaʼach xiiboʼob yéetel koʼoleloʼob jejeláas u idiomaʼob, yaneʼ ayikʼaloʼob yéetel uláakʼoʼobeʼ óotsiloʼob. Pero como tuláakloʼob u yaabiltmoʼob u Tʼaan Dioseʼ tu múul adorartoʼob Jéeoba. Tak le máaxoʼob káajal ku beetik u adorarkoʼob Jéeobaoʼ ku naʼatkoʼob baʼax ku yaʼalik u Tʼaan Dios tumen le sukuʼunoʼoboʼ ku tsolkoʼob tiʼob yéetel ku máanskoʼob tiempo tu yéeteloʼob (Hech. 2:42; 8:30, 31).

8. ¿Bix u meyaj tiʼ Jéeoba le Biblia utiaʼal u múul adorartaʼal teʼ kʼiinoʼobaʼ?

⁸ Teʼ kʼiinoʼobaʼ tiʼ Jéeobaeʼ ku meyaj le Biblia utiaʼal u kaʼansik u kaajal bey xan utiaʼal u múul meyajoʼoboʼ. Teʼ Biblia ku  taal tuláakal le janal espiritual ku tsʼaʼabaltoʼonoʼ. Toʼoneʼ mantatsʼ k-xakʼaltik baʼax ku yaʼalik teʼ asambleaʼoboʼ bey xan teʼ reuniónoʼoboʼ. Jeʼex k-ilkoʼ tiʼ Jéeobaeʼ ku meyaj le Biblia utiaʼal u múul adorartaʼal tumen u kaajaloʼ (Sof. 3:9).

9. ¿Baʼax jatsʼuts modos kʼaʼabéet u yantal tiʼ máak utiaʼal u naʼatik baʼax ku yaʼalik le Bibliaoʼ? (Lucas 10:21).

⁹ Koʼox ilik uláakʼ baʼax eʼesik jach yaan u naʼat Jéeoba. Yaʼab tiʼ le baʼaxoʼob tu beetaj u tsʼíibtaʼal teʼ Bibliaoʼ chéen jeʼel u páajtal u naʼataʼal tumen le máaxoʼob kabal u yóoloʼoboʼ (xok Lucas 10:21). Le Bibliaoʼ ku xoʼokol tumen máakoʼob tiʼ tuláakal yóokʼol kaab. Juntúul máak kaʼanchajaʼan u xookeʼ tu yaʼaleʼ «le Bibliaoʼ maʼ chéen letiʼe libro tsʼoʼok u maas xoʼokloʼ, baʼaxeʼ letiʼe libro tsʼoʼok u maas xakʼaltaʼaloʼ». Chéen baʼaleʼ chéen le máaxoʼob kabal u yóoloʼob jeʼel u páajtal u naʼatkoʼob yéetel u tsʼáaik ichil u kuxtaloʼob le baʼax ku yaʼalikoʼ (2 Cor. 3:15, 16).

10. ¿Bix uláakʼ u yeʼesik le Biblia le naʼat yaan tiʼ Jéeobaoʼ?

¹⁰ Koʼox ilik uláakʼ bix u yeʼesik le Biblia jach yaan u naʼat Jéeobaoʼ. Tiʼ letiʼeʼ maʼ tu meyaj le Biblia chéen utiaʼal u kaʼanskoʼon junmúuchʼoʼ, baʼaxeʼ tak kéen k-xok t-juunaleʼ ku kaʼanskoʼon yéetel ku líiʼsik k-óol. Tsʼoʼoleʼ k-tsʼáaik cuenta xaneʼ letiʼeʼ pendiente yanil tiʼ cada juntúul tiʼ toʼon (Isa. 30:21). Maʼ xaaneʼ le ka anchajtech problemaseʼ ta xokaj junpʼéel tekstoeʼ ka ta waʼalaj: «Jach letiʼe baʼax kʼaʼabéettenaʼ». Seguro yaʼab u téenel tsʼoʼok u yúuchultech beyoʼ. Le Bibliaoʼ tsʼíibtaʼan utiaʼal u millonesil máakoʼob jejeláas bix kuxlikoʼob. Chéen baʼaleʼ ku páajtal u yáantik cada juntúul tiʼ letiʼob tumen le máax beet u tsʼíibtaʼaloʼ jach táaj yaan u naʼat (2 Tim. 3:16, 17).

11. ¿Bix tu yeʼesil Jéeoba ku kʼamik tuláakal máak le ka tsʼíibtaʼab le Bibliaoʼ?

¹¹ Le justiciaoʼ junpʼéel tiʼ le jatsʼuts modos maas ku yeʼesik Jéeobaoʼ (Deu. 32:4). Juntúul máak justoeʼ mix máak jelaʼan u paktik, leloʼ jach bey u beetik Jéeobaoʼ (Hech. 10:34, 35; Rom. 2:11). Junpʼéel baʼax eʼesik de ke beyoʼ letiʼe idiomaʼob tu yéeyaj utiaʼal u tsʼíibtaʼal le Bibliaoʼ. Por ejemploeʼ le yáax 39 libroʼoboʼ óoliʼ tuláakal tsʼíibtaʼab ich hebreo, lelaʼ letiʼe idioma ku tʼaʼanal tumen u kaajal Jéeoba teʼ kʼiinoʼob jeʼeloʼ. Chéen baʼaleʼ teʼ yáax siglooʼ le máakoʼoboʼ maases ku tʼaanoʼob kaʼach ich griego. Le oʼolal le u tsʼook 27 libroʼoboʼ tsʼíibtaʼab ich griego. Jeʼex k-ilkoʼ Jéeobaeʼ maʼ tu yéeyaj chéen junpʼéel idioma utiaʼal u tsʼíibtaʼal le Bibliaoʼ. Teʼ kʼiinoʼobaʼ le óoliʼ 8,000 millones máakoʼob kajaʼanoʼob way Luʼumeʼ jejeláas idiomaʼob ku tʼankoʼob. ¿Bix jeʼel u páajtal u kʼaj óoltaʼal Jéeoba tumen le bukaʼaj máakoʼobaʼ?

12. ¿Bix táan u béeytal Daniel 12:4 teʼ tu tsʼook kʼiinoʼobaʼ?

¹² Jéeobaeʼ tu yaʼalaj tiʼ profeta Danieleʼ teʼ tu tsʼook kʼiinoʼobaʼ «le u jaajil kʼaj óolaloʼ yaan u sen yaʼabtal», lelaʼ u kʼáat u yaʼaleʼ yaʼab máak kun naʼatik le baʼax ku yaʼalik le Bibliaoʼ (xok Daniel 12:4). Teʼ kʼiinoʼobaʼ táan u béeytal le profecíaaʼ tumen le Bibliaoʼ letiʼe libro tsʼoʼok u maas traducirtaʼaloʼ, u imprimirtaʼaloʼ yéetel tsʼoʼok u maas tʼoʼoxloʼ. Chéen baʼaleʼ yaʼab tiʼ le bibliaʼob tsʼoʼok u jóoʼsaʼaloʼ jach táaj koʼojtakoʼob. U maʼalobileʼ u kaajal Jéeobaeʼ tsʼoʼok u traducirtik tu chúukaʼanil wa junjaats le Biblia ich maas tiʼ 240 idiomaʼoboʼ. ¡Tiʼ tuláakal máak jeʼel u páajtal u yantal le Biblia gratisoʼ! Yoʼolal leloʼ u millonesil  máakoʼob tiʼ tuláakal yóokʼol kaabeʼ táan u kankoʼob «le baʼaloʼob maʼalobtak ken u beet le Reino» antes tiʼ u taal le xuʼulsajoʼ (Mat. 24:14). Jéeobaeʼ jach nojoch u justicia, le oʼolal u kʼáat ka kaanbalnak yaʼab máak tiʼ le Bibliaoʼ utiaʼal ka u natsʼubaʼob tu yiknal. ¿Baʼaxten? Tumen jach u yaabiltmoʼon.

13. ¿Baʼaxten k-aʼalik de ke le Bibliaoʼ ku yeʼesik u yaabilaj Dios? (Juan 21:25).

¹³ Le Bibliaoʼ ku yeʼesik le modo maas importante yaan tiʼ Jéeobaoʼ: le yaabilajoʼ (1 Juan 4:8). Lelaʼ k-ilik tumen maʼ tu beetaj u tsʼíibtaʼal tuláakal baʼal teʼ Bibliaoʼ. Letiʼeʼ chéen tu beetaj u tsʼíibtaʼal baʼax kʼaʼabéet k-ojéeltik utiaʼal k-bisikba tu yéetel, utiaʼal u kiʼimaktal k-óol yéetel utiaʼal u yantaltoʼon kuxtal minaʼan u xuul. Como jach u yaabiltmoʼoneʼ chéen tu beetaj u tsʼíibtaʼal baʼax kʼaʼabéet k-ojéeltik, maʼ tu beetaj u nikkúuntaʼaltoʼon yaʼab informacióniʼ (xok Juan 21:25).

14. Aʼal uláakʼ bix u yeʼesik le Biblia u yaabilaj Diosoʼ.

¹⁴ Jéeobaeʼ ku yeʼesik u yaabiltmoʼon tumen maʼ tu beetaj u tsʼaʼabal teʼ Biblia junpʼéel nuxiʼ lista tuʼux ku yaʼalik tuláakal le baʼaxoʼob unaj k-beetkoʼ. Baʼaxeʼ ku meyajtiʼ u tsikbalil u kuxtal le máakoʼob ku chʼaʼchiʼitaʼaloʼob teʼ Bibliaoʼ, profecíaʼob yéetel maʼalob consejoʼob utiaʼal u yaʼaliktoʼon baʼax unaj k-beetik. Bey u yáantkoʼon le Biblia utiaʼal ka k-yaabilt Jéeoba yéetel ka k-beet baʼax uts tu tʼaanoʼ.

15. 1) ¿Bix u yeʼesik le Biblia jach u yaabiltmoʼon Jéeobaoʼ? 2) Teʼ fotooʼ, ¿tiʼ baʼax tsikbalil táan u tuukul le chan x-chʼúupaloʼ, le táankelmoʼ yéetel le kiik yaan u jaʼabiloʼ? (Gén. 39:1, 10-12; 2 Rey. 5:1-3; Luc. 2:25-38).

 ¹⁵ Le Bibliaoʼ ku yeʼesik u yaabiltmoʼon Jéeoba tumen ichil u Tʼaaneʼ ku yeʼesik jach bix u yuʼubikuba wíinik. Yoʼolal leloʼ ku páajtal k-naʼatik bix tu yuʼubiluba le máakoʼob ku chʼaʼchiʼitikoʼ tumen letiʼobeʼ máakoʼob beyoʼob jeʼex toʼoneʼ (Sant. 5:17). Tsʼoʼoleʼ kéen k-il bix tu tratartil le máakoʼobaʼ k-tsʼáaik cuentaeʼ «Jéeobaeʼ jach nojoch u yaabilaj yéetel ku chʼaʼik óotsilil» (Sant. 5:11).

16. ¿Baʼax ku kaʼansiktoʼon yoʼolal Jéeoba u tsikbalil le máaxoʼob lúuboʼob tiʼ kʼebanoʼ? (Isaías 55:7).

¹⁶ Le Bibliaoʼ ku yaʼalik uláakʼ bix u yeʼesik Jéeoba u yaabiltmoʼon. Ku yaʼalikeʼ letiʼeʼ maʼ ken u xúumpʼattoʼon kéen k-beet baʼax maʼ maʼalobiʼ. Jeʼex le israelitaʼoboʼ mantatsʼ ku kʼebantaloʼob kaʼach tu contra Jéeoba, pero kéen arrepentirnakoʼob tu jaajil u yóoloʼobeʼ ku perdonarkoʼob (xok Isaías 55:7). Le máaxoʼob meyajt Jéeoba teʼ yáax siglooʼ u yojloʼob jach yaabiltaʼanoʼob yoʼolal le baʼax aʼalaʼabtiʼob tumen apóstol Pablooʼ. Aʼalaʼabtiʼobeʼ kʼaʼabéet u perdonarkoʼob yéetel u líiʼskoʼob u yóol juntúul máak tsʼoʼok u arrepentir úuchik u lúubul tiʼ junpʼéel nojoch kʼeban (2 Cor. 2:6, 7; 1 Cor. 5:1-5). Jach ku kiʼimakkúuntik k-óol k-ojéeltikeʼ Jéeobaeʼ maʼ tu xúumpʼattaj le sukuʼunoʼob lúuboʼob tiʼ kʼebanoʼ. Baʼaxeʼ tu yeʼesajtiʼob yaabilaj, tu yáantoʼob u tojkíintoʼob u beeloʼob yéetel tu yeʼesaj u kʼáat u kaʼa bisuba tu yéeteloʼob. Teʼ kʼiinoʼobaʼ bey xan ken u beetil Jéeoba yéetel le máaxoʼob ku lúubloʼob tiʼ kʼeban, pero ku arrepentiroʼoboʼ (Sant. 4:8-10).

17. ¿Baʼaxten jach jatsʼuts le baʼax tu síiajtoʼon Jéeobaoʼ?

¹⁷ Jach jatsʼuts le baʼax tsʼoʼok u síiktoʼon Jéeobaoʼ. ¿Baʼaxten? Tumen jeʼex tsʼoʼok k-kanikoʼ le Bibliaoʼ ku kaʼansiktoʼoneʼ Dioseʼ ku yeʼesik justicia, jach yaan u naʼat yéetel jach u yaabiltmoʼon. Tsʼoʼoleʼ ku yeʼesikeʼ Jéeobaeʼ u kʼáat ka k-kʼaj óolte yéetel ka k-bisba tu yéetel.

18. ¿Bix jeʼel k-eʼesik k-apreciartik le regalo u tsʼaamajtoʼon Diosoʼ?

¹⁸ Maʼ u tuʼubultoʼoneʼ le Bibliaoʼ junpʼéel tiʼ «le baʼaloʼob maʼalobtak» u siimajtoʼon Diosoʼ (Sant. 1:17). Kʼaʼabéet k-eʼesik k-apreciartik le regaloaʼ, lelaʼ k-beetik kéen orarnakoʼon antes tiʼ k-xokik le Bibliaoʼ bey xan kéen tuukulnakoʼon tiʼ baʼax ku yaʼalik. Wa k-beetik beyoʼ Jéeobaeʼ yaan u bendecirkoʼon, tsʼoʼoleʼ ‹yaan u béeytal k-kanik baʼaloʼob yaan yil yéetel Dios› (Pro. 2:5).