1. ¿Baʼax kʼiin kun bisbil teʼ kaʼan le máaxoʼob yéeyaʼanoʼoboʼ?

 ICH yaʼab añoseʼ le máaxoʼob meyajtik Jéeobaoʼ taak u yojéeltikoʼob lelaʼ: «¿Baʼax kʼiin u láaj bisaʼal teʼ kaʼan le máaxoʼob yéeyaʼanoʼoboʼ?». Kaʼacheʼ k-tuklikeʼ jujuntúul tiʼ le máaxoʼob yéeyaʼanoʼoboʼ maʼ xaaneʼ yaan u yilkoʼob le Armagedónoʼ yéetel yaan u kuxtaloʼob junpʼéel tiempo teʼ Paraísooʼ. Pero tiʼ U Pʼíich Tulumil Kanan 15 tiʼ julio tiʼ 2013, tsoʼoleʼ tuláakal le máaxoʼob yéeyaʼanoʼoboʼ yaan u bisaʼaloʼob teʼ kaʼan antes tiʼ u káajal Armagedónoʼ (Mat. 24:31).

2. Maʼ xaaneʼ, ¿baʼax jeʼel u tuklik máakeʼ?

² Maʼ xaaneʼ jeʼel a tuklik lelaʼ: «¿Baʼax kun úuchul yéetel le ‹uláakʼ tamanoʼob› le táan le ‹nojoch muʼyajiloʼ›?» (Juan 10:16; Mat. 24:​21, nota). Maʼ xaaneʼ yaan sukuʼunoʼobeʼ chiʼichnakoʼob tumen ku tuklikoʼobeʼ yaan u yuʼubikubaʼob tu juunaloʼob le kéen bisaʼak tuláakal le yéeyaʼanoʼob teʼ kaʼanoʼ. Koʼoneʼex ilik kaʼapʼéel tsikbaliloʼob jeʼel u yáantkoʼon k-naʼat baʼaxten bey u yuʼubikubaʼoboʼ. Yaan xan k-ilik baʼaxten maʼ unaj u preocuparkubaʼobiʼ.

¿BAʼAX MAʼ KUN ÚUCHUL?

3, 4. Maʼ xaaneʼ, ¿baʼax ku tuklik jujuntúul sukuʼunoʼob?

³ Maʼ xaaneʼ yaneʼ ku tuklikeʼ le uláakʼ tamanoʼoboʼ yaan u náachtaloʼob tiʼ Jéeoba le kéen pʼáatak minaʼan le Cuerpo Gobernante way Luʼum utiaʼal u nuʼuktikoʼoboʼ. Koʼoneʼex ilik kaʼapʼéel ejemplo eʼesik baʼaxten bey u tuukuloʼoboʼ. Yáaxeʼ koʼoneʼex ilik u ejemplo Jeoyadá, u maas nojchil le sacerdoteʼoboʼ. Letiʼ yéetel Jeosabeat, u yataneʼ, tu kanáantoʼob juntúul chan xiʼipal ku kʼaabaʼtik Jeoás. Tu yáantoʼob utiaʼal ka u beetuba juntúul rey jach uts yéetel ka u meyajt Jéeoba. Le  kuxaʼan Jeoyadáoʼ Jeoáseʼ tu beetaj baʼax uts tu tʼaan Jéeoba. Pero le ka kíim Jeoyadáeʼ Jeoáseʼ káaj u beetik baʼaloʼob kʼaastak. Tu beetaj baʼax ku yaʼalik le kʼasaʼan príncipeʼoboʼ, le oʼolal náachchaj tiʼ Jéeoba (2 Cró. 24:​2, 15-19).

⁴ Beoraaʼ koʼoneʼex ilik u ejemplo le máaxoʼob meyajt Dios teʼ siglo dosoʼ. Juan, le u tsʼook apóstol kuxlaj way Luʼumeʼ, jach tu yáantaj le sukuʼunoʼob utiaʼal ka chúukpajak u yóoloʼob tiʼ Jéeobaoʼ (3 Juan 4). Jeʼex le u maasil apóstoloʼoboʼ letiʼeʼ tu yáantaj le sukuʼunoʼob utiaʼal ka u kanáantubaʼob tiʼ u kaʼansaj le apóstataʼoboʼ (1 Juan 2:18; 2 Tes. 2:7). Chéen baʼaleʼ le ka tsʼoʼok u kíimil Juaneʼ u kaʼansaj le apóstataʼoboʼ pʼáat bey junpʼéel pakʼbeʼen kʼojaʼanileʼ. Maʼ yaʼab años máan ka tu boʼontaj tuláakal le múuchʼuliloʼoboʼ.

5. ¿Baʼax maʼ unaj k-tuklik yoʼolal le uláakʼ tamanoʼoboʼ?

⁵ ¿Bey wa kun úuchul tiʼ le uláakʼ tamanoʼob kéen láaj bisaʼak le yéeyaʼanoʼob teʼ kaʼanoʼ? ¿Yaan wa u pʼatkoʼob Jéeoba jeʼex tu beetil Jeoásoʼ? ¿Yaan wa u creerkoʼob u kaʼansaj le apóstataʼob jeʼex tu beetil le máaxoʼob meyajt Jéeoba teʼ siglo dosoʼ? ¡Junpuliʼ maʼ bey kun úuchliʼ! Seguroʼoneʼ kex minaʼan mix juntúul yéeyaʼan way Luʼumeʼ, le uláakʼ tamanoʼoboʼ yaan u seguer u chúukpajal u yóoloʼob tiʼ Jéeoba tumen yaan u kanáantaʼaloʼob. ¿Bix k-ojéeltik?

MAʼ KUN KʼASKÚUNTBIL LE U JAAJIL ADORACIÓNOʼ

6. ¿Máakalmáak le óoxpʼéel época ken k-xakʼaltoʼ?

⁶ Kex le kuxtal yaan u maas kʼastalaʼ, ¿baʼaxten seguroʼon maʼ kun kʼaskúuntbil le u jaajil adoraciónoʼ? Tumen le Bibliaoʼ ku yaʼalikeʼ le kʼiinoʼob kuxlikoʼonaʼ jach jelaʼan tiʼ le kʼiinoʼob kuxlaj le israelitaʼob bey xan le máaxoʼob kuxlajoʼob teʼ siglo dosoʼ. Le oʼolaleʼ koʼoneʼex xakʼaltikeʼex le óoxpʼéel épocaʼobaʼ: 1) u kʼiiniloʼob u yúuchben kaajil Israel, 2) u kʼiiniloʼob le ka tsʼoʼok u kíimil le apóstoloʼoboʼ yéetel 3) «u kʼiinil u yutskíintaʼal tuláakal baʼal» wa le kʼiinoʼob kuxlikoʼonaʼ (Hech. 3:21).

7. ¿Baʼaxten le israelitaʼob chúukpaj u yóoloʼoboʼ maʼ desanimarnajoʼob yoʼolal le baʼax úuch tiʼ le kaajoʼ?

⁷ U kʼiiniloʼob u yúuchben kaajil Israel. Le taʼaytak u kíimil Moisésoʼ tu yaʼalaj tiʼ le israelitaʼoboʼ: «Kéen kíimkeneʼ yaan a beetkeʼex baʼax kʼaas yéetel yaan a pʼatkeʼex le bej tin waʼalajteʼex ka a biseʼexoʼ» (Deu. 31:29). Tsʼoʼoleʼ tu yaʼalajtiʼobeʼ wa maʼ tu yuʼubikoʼob tʼaaneʼ yaan u esclavizartaʼaloʼob táanxel luʼumil (Deu. 28:​35, 36). ¿Béeychaj wa le baʼax aʼalaʼabtiʼoboʼ? Béeychaji. Ich yaʼab añoseʼ yaʼab reyoʼobeʼ maʼ tu yuʼuboʼob u tʼaan Jéeobaiʼ, tsʼoʼoleʼ le kaajoʼ bey xan tu beetiloʼ. Le oʼolal Jéeobaeʼ tu castigartoʼob yéetel maʼ tu chaʼaj u yantal uláakʼ reyoʼob israelitaʼobiʼ (Eze. 21:​25-27). Le israelitaʼob chúukpaj u yóoloʼoboʼ maʼ desanimarnajoʼob yéetel le baʼax úuchoʼ, baʼaxeʼ líikʼ u yóoloʼob tumen tu yiloʼob béeychaj le baʼax tu yaʼalaj Jéeoba tiʼ le kaajoʼ (Isa. 55:​10, 11).

8. ¿Baʼaxten maʼ tu jaʼakʼal k-óol k-ojéeltik kʼaschaj le múuchʼulil teʼ siglo dosoʼ? Tsole.

⁸ U kʼiiniloʼob le ka tsʼoʼok u kíimil le apóstoloʼoboʼ. Maʼ unaj u jaʼakʼal k-óol k-ojéeltik kʼaschaj le múuchʼulil teʼ siglo dosoʼ. ¿Baʼaxten? Tumen Jesúseʼ u yaʼalmiliʼ yaan u yúuchleʼ (Mat. 7:​21-23; 13:​24-30, 36-43). Teʼ yáax siglooʼ apóstol Pablo, Pedro yéetel Juaneʼ tu yaʼaloʼobeʼ tsʼokaʼaniliʼ u káajal u kʼiʼitpajal u kaʼansaj le apóstataʼoboʼ (2 Tes. 2:​3, 7; 2 Ped. 2:1; 1 Juan 2:18). Le maʼ úuch kíimik u tsʼook apóstoloʼ le cristianoʼob suunajoʼob apóstatailoʼ táakpajoʼob ichil le Nojoch Babiloniaoʼ. Jeʼex k-ilkoʼ béeychaj le baʼax tu yaʼalaj Jéeobaoʼ.

9. ¿Baʼax u jelaʼanil le kʼiinoʼob kuxlikoʼonaʼ tiʼ le uláakʼ kaʼapʼéel tsʼoʼok k-yáax chʼaʼchiʼitikoʼ?

 ⁹ «U kʼiinil u yutskíintaʼal tuláakal baʼal». Le kʼiinoʼob kuxlikoʼonaʼ jach jelaʼan tiʼ u kʼiiniloʼob u yúuchben kaajil Israel bey xan tiʼ le kʼiinoʼob ka kʼaschaj le múuchʼulil teʼ siglo dosoʼ. ¿Bix túun kʼaj óolaʼanil le kʼiinoʼob kuxlikoʼonaʼ? U suukileʼ k-aʼalikeʼ kuxaʼanoʼon «tu tsʼook kʼiinoʼob» (2 Tim. 3:1). Pero le Bibliaoʼ ku yaʼalik xaneʼ teʼ tu tsʼook kʼiinoʼobaʼ káaj uláakʼ época maas jach táaj chowak, u kʼaabaʼeʼ «u kʼiinil u yutskíintaʼal tuláakal baʼal» (Hech. 3:21). Lelaʼ káaj 1914 yéetel yaan u tsʼoʼokol le kéen suunak paraísoil le Luʼumaʼ bey xan kéen pʼáatak perfectoil tuláakal máak. ¿Baʼax káaj u yutskíintaʼal teʼ año jeʼeloʼ? Jesúseʼ káaj u reinar teʼ kaʼanoʼ, bey úuchik u kaʼa antal juntúul gobernante representartik Jéeoba ku taal tiʼ u chʼiʼibal Davidoʼ. Maʼ úuch tiʼ le jeʼeloʼ Jéeobaeʼ káaj xan u yutskíintik le adoración ku tsʼaʼabaltiʼoʼ bey úuchik u káajal u kaʼa adorartaʼal jeʼex uts tu tʼaanoʼ (Isa. 2:​2-4; Eze. 11:​17-20). ¿Yaan wa u kʼastal tu kaʼatéen?

10. 1) ¿Baʼax profecíail táan u béeytal teʼ kʼiinoʼobaʼ? (Isaías 54:17). 2) ¿Bix u líiʼsik k-óol le profecía tu yaʼalaj Isaíasoʼ?

¹⁰ (Xok Isaías 54:17). Koʼoneʼex ilik baʼax ku yaʼalik le profecíaaʼ: «Jeʼel baʼaxak nuʼukulil baʼateʼel ka beetaʼak ta contraeʼ maʼ kun páajtal ta wéetel». Le baʼax ku yaʼalik le tekstoaʼ táan u béeytal teʼ kʼiinoʼobaʼ. Tsʼoʼoleʼ táan xan u béeytal le uláakʼ profecíaaʼ: «Tuláakal a paalaleʼ yaan u kaʼansaʼaloʼob tumen Jéeoba. A paalaleʼ jach yaan u yantal jeetsʼelil tiʼob. Yaan a pʼáatal firmeil tu yoʼolal le justiciaoʼ [ . . . ]. Maʼ kan sajaktal tiʼ mix baʼal yéetel mix baʼal xan kun beetik a kikilankil tumen mix baʼal kun náatsʼal ta wiknal» (Isa. 54:​13, 14). Mix Satanás, «u diosil le yóokʼol kaab», jeʼel u páajtal u jeʼelsik le kaʼansaj ku beetaʼal utiaʼal u kʼaj óoltaʼal Jéeobaoʼ (2 Cor. 4:4). Tsʼoʼok u káajal u kaʼa adorartaʼal Jéeoba jeʼex uts tu tʼaanoʼ yéetel maʼ kun kaʼa kʼaskúuntbil. ¡U jaajileʼ mix junpʼéel u nuʼukulil baʼateʼel jeʼel u páajtal t-contraeʼ!

LE BAʼAX KUN ÚUCHLOʼ

11. Le kéen bisaʼak tuláakal le yéeyaʼanoʼob teʼ kaʼanoʼ, ¿baʼaxten seguroʼon yaan u seguer k-nuʼuktaʼal?

¹¹ ¿Baʼax kun úuchul le kéen bisaʼak tuláakal le yéeyaʼanoʼob teʼ kaʼanoʼ? Yáaxeʼ kʼaʼajaktoʼoneʼ Jesúseʼ letiʼ u poolil le múuchʼuliloʼ. Letiʼeʼ tu yaʼalaj: «Chéen juntúul a Nojchileʼex, Cristo» (Mat. 23:10). Toʼoneʼ seguroʼon maʼ ken u pʼatoʼon, yaan u kanáantkoʼon.  Como letiʼ tsʼaʼan tumen Jéeoba utiaʼal u nuʼuktikoʼoneʼ maʼ unaj k-sajaktaliʼ. Kex maʼ k-jach ojel bix ken u beetileʼ teʼ súutuk jeʼeloʼ kʼaʼabéet k-confiar tiʼ. Koʼoneʼex ilik jujunpʼéel ejemploʼob eʼesik baʼaxten maʼ unaj k-chiʼichnaktaliʼ.

12. 1) ¿Bix úuchik u kanáantik u kaajal Jéeoba le ka kíim Moisésoʼ? 2) ¿Bix úuchik u kanáantik u kaajal le ka tu kʼubéentaj tiʼ Elías uláakʼ meyajoʼ? (Ilawil xan le dibujooʼ).

¹² Moiséseʼ kíim antes u yokol u kaajil Israel teʼ Luʼum aʼalaʼan u tsʼaʼabaltiʼoboʼ. ¿Baʼax túun úuch tiʼ le kaaj le ka kíim Moisésoʼ? ¿Pʼáat wa minaʼan mix máak nuʼuktikoʼob? Maʼatech. Jéeobaeʼ mantatsʼ tu kanáantoʼob teʼ kʼiinoʼob chúukaʼan u yóoloʼoboʼ. Por ejemploeʼ, antes tiʼ u kíimil Moiséseʼ, Jéeobaeʼ tu yaʼalajtiʼeʼ Josué ken u nuʼukt le kaajoʼ. Josuéeʼ úuch joʼopʼok u kaʼansaʼal kaʼach tumen Moisés (Éxo. 33:11; Deu. 34:9). Tsʼoʼoleʼ yaan xan uláakʼ máakoʼob jach yaan u naʼatoʼob tsʼaʼaboʼob utiaʼal u nuʼuktikoʼob le kaajoʼ. Letiʼobeʼ tu nuʼuktoʼob grupoʼob de 1,000, de 100, de 50 yéetel de 10 máakoʼob (Deu. 1:15). Jeʼex k-ilkoʼ u kaajal Jéeobaeʼ jach maʼalob kanáantaʼabik. Tsʼoʼoleʼ yaantoʼon xan u ejemplo Elías. Ich yaʼab añoseʼ tu yáantaj le israelitaʼob utiaʼal ka u adorartoʼob Jéeobaoʼ. Pero junpʼéel kʼiineʼ Jéeobaeʼ tu yaʼalajtiʼ ka xiʼik tu noojolil Judá (2 Rey. 2:1; 2 Cró. 21:12). ¿Pʼáat wa túun mix máak kanáantik u 10 tribuiloʼob Israel? Maʼatech. Elíaseʼ tsʼokaʼaniliʼ u káajal u kaʼansik Eliseoeʼ. Tsʼoʼoleʼ le kaajoʼ táan xan u yáantaʼal tumen «u hijoʼob le profetaʼoboʼ», maʼ xaaneʼ letiʼobeʼ ku kaʼansaʼaloʼob tiʼ junpʼéel escuela tuʼux ku kaʼansaʼal profetaʼob (2 Rey. 2:​3, nota). Jeʼex k-ilkoʼ yanchaj yaʼab xiiboʼob chúukaʼan u yóoloʼob tu nuʼuktoʼob u kaajal Dios. Bey úuchik u nuʼuktik u kaajal Jéeobaoʼ.

13. ¿Baʼax ku yaʼaliktoʼon Hebreos13:5b? (Ilawil xan le fotoʼoboʼ).

¹³ Le ejemploʼobaʼ ku yeʼesikeʼ maʼ unaj k-chiʼichnaktal yoʼolal baʼax kun úuchul kéen láaj bisaʼak le yéeyaʼanoʼob teʼ kaʼanoʼ, tumen le Bibliaoʼ ku yaʼalikeʼ Jéeobaeʼ junpuliʼ maʼ ken u xúumpʼat u kaajal yaan way Luʼumeʼ (xok Hebreos 13:5b). Jeʼex tu beetil Moisés yéetel Elíaseʼ, le junmúuchʼ sukuʼunoʼob nuʼuktik u kaajal Jéeoba way Luʼumeʼ u yojloʼob jach kʼaʼabéet u kaʼansaʼal uláakʼ sukuʼunoʼob. Le oʼolal le Cuerpo Gobernanteoʼ tsʼoʼok u máan yaʼab años joʼopʼok u kaʼansik le sukuʼunoʼob táakaʼanoʼob ichil le uláakʼ tamanoʼob utiaʼal u nuʼuktoʼob u kaajal Jéeobaoʼ. Tsʼoʼok u beetaʼal escuelaʼob utiaʼal u kaʼansaʼal ancianoʼob, superintendenteʼob tiʼ circuito, sukuʼunoʼob  táakaʼanoʼob ichil le Comitéʼob tiʼ Sucursaloʼ bey xan le superintendenteʼob yanoʼob Beteloʼ. Tsʼoʼoleʼ le sukuʼunoʼob táakaʼanoʼob ichil le Cuerpo Gobernanteoʼ tsʼoʼok u yilik u kaʼanskoʼob le sukuʼunoʼob áantkoʼob ichil le jejeláas comitéʼob yaantiʼoboʼ. Le sukuʼunoʼob áantkoʼoboʼ yaʼab nukuch meyajoʼob yaantiʼob yéetel jach maʼalob bix u beetkoʼob, jeʼel u páajtal k-aʼalikeʼ letiʼobeʼ preparadoʼob utiaʼal u nuʼuktikoʼob u tamanoʼob Cristo.

14. ¿Baʼax ku kaʼansiktoʼon tuláakal le baʼax tsʼoʼok k-ilik teʼ xookaʼ?

¹⁴ Tuláakal le baʼax tsʼoʼok k-ilik teʼ xookaʼ ku yeʼesiktoʼoneʼ le kéen bisaʼak tuláakal le yéeyaʼanoʼob teʼ kaʼan tu tsʼoʼokbal le nojoch muʼyajiloʼ, u kaajal Dioseʼ yaan u seguer u adorartik Jéeoba jeʼex unajeʼ tumen Jesucristo nuʼuktik. U jaajileʼ teʼ kʼiinoʼob jeʼeloʼ le máaxoʼob adorartik Diosoʼ yaan u atacartaʼaloʼob tumen junmúuchʼ kaajoʼob ku yaʼalaʼaltiʼob Gog ku taal tiʼ u luʼumil Magog (Eze. 38:​18-20). Chéen baʼaleʼ u kaajal Dioseʼ maʼ kun xáantal táan u atacartaʼal. Le máaxoʼob atacarkoʼoboʼ maʼ ken u xuʼulsoʼob le adoración ku tsʼaʼabal tiʼ Jéeobaoʼ, tumen letiʼeʼ yaan u salvartik u kaajal. Lelaʼ k-ojel tumen apóstol Juaneʼ tu yilaj «yaʼabkach máakoʼob» wa le uláakʼ tamanoʼoboʼ, ka aʼalaʼabtiʼeʼ letiʼobeʼ táan u «jóokʼloʼob tiʼ le nojoch muʼyajiloʼ» (Apo. 7:​9, 14).

15, 16. Jeʼex u yaʼalik Apocalipsis 17:​14, ¿baʼax ken u beet le sukuʼunoʼob yéeyaʼanoʼob tu kʼiinil Armagedónoʼ yéetel baʼaxten ku líiʼsik k-óol leloʼ?

¹⁵ Pero maʼ xaaneʼ láayliʼ taak u yojéeltaʼal u núukil le preguntaʼobaʼ: Kux túun le yéeyaʼanoʼoboʼ, ¿baʼax ken u beetoʼob kéen láaj bisaʼakoʼob teʼ kaʼanoʼ? U núukileʼ tiaʼan teʼ Bibliaoʼ. Ku yaʼalikeʼ le gobiernoʼoboʼ «yaan u baʼateloʼob tu contra le Tamanoʼ». Pero ku yaʼalik xaneʼ yaan u ganartaʼaloʼob tumen le Tamanoʼ. ¿Máaxoʼob kun áantik le Tamanoʼ? Le Bibliaoʼ ku yaʼalikeʼ yaan u yáantaʼal tumen «le máaxoʼob tʼanaʼanoʼob, yéeyaʼanoʼob yéetel chúukaʼan u yóoloʼoboʼ» (xok Apocalipsis17:14). Le máaxoʼob ku yaʼalik le tekstoaʼ letiʼe sukuʼunoʼob yéeyaʼanoʼob tsʼoʼok u kaʼa kuxkíintaʼaloʼoboʼ. Le kéen láaj bisaʼak le yéeyaʼanoʼob teʼ kaʼanoʼ le yáax baʼax ken  u beetoʼoboʼ letiʼe u táakpajloʼob tiʼ junpʼéel guerraoʼ. Jach nojoch le meyaj kʼubéentaʼantiʼoboʼ. U jaajileʼ jujuntúul tiʼ le sukuʼunoʼob yéeyaʼanoʼoboʼ uts tu tʼaan kaʼach u baʼateloʼob antes tiʼ u beetkubaʼob u testigoʼob Jéeoba. Yaan tak tiʼ letiʼobeʼ tu beetaj u soldadoiloʼob, pero le ka tu beetubaʼob cristianoʼobeʼ xuʼul u baʼateloʼobeʼ ka yanchajtiʼob jatsʼuts modos (Gál. 5:22; 2 Tes. 3:16). Chéen baʼaleʼ le kéen yanakoʼob teʼ kaʼan yéetel Cristo bey xan le ángeloʼoboʼ yaan u táakpajloʼob tiʼ le u tsʼook baʼateʼel kun antal tu contra u enemigoʼob Diosoʼ.

¹⁶ Jujuntúul tiʼ le yéeyaʼanoʼob yanoʼob way Luʼumeʼ tsʼoʼok u chʼíijloʼob yéetel maʼ jach yaan u muukʼoʼobiʼ. Chéen baʼaleʼ le kéen bisaʼakoʼob teʼ kaʼanoʼ yaan u tsʼaʼabaltiʼob junpʼéel wíinklil maʼ tu páajtal u kíimsaʼal yéetel jach yaan u yantal u poderoʼob. Le oʼolal yaan u béeytal u yáantkoʼob Jesucristo utiaʼal le baʼateloʼ. Le kéen tsʼoʼokok le Armagedónoʼ yaan u yáantkoʼob le uláakʼ tamanoʼob utiaʼal ka pʼáatkoʼob perfectoiloʼoboʼ. Jeʼex k-ilkoʼ maas yaan u béeytal u yáantkoʼob le uláakʼ tamanoʼob le tiaʼanoʼob teʼ kaʼanoʼ ke le tiaʼanoʼob way Luʼumeʼ.

17. ¿Baʼaxten k-ojel mix baʼal kun úuchul tiʼ le máaxoʼob meyajtik Dios teʼ Armagedónoʼ?

¹⁷ ¿Táakaʼanech wa ichil le uláakʼ tamanoʼoboʼ? Wa beyoʼ, ¿baʼax kun kʼaʼabéettal a beetik tu kʼiinil Armagedón? Chéen yaan u kʼaʼabéettal a confiar tiʼ Jéeoba yéetel a beetik baʼax ku yaʼalik. Maʼ xaaneʼ yaan u kʼaʼabéettal a beetik le baʼax ku yaʼalik Isaías 26:20: «Ookkech ta wotocheʼ ka a kʼalaba ta cuarto. Taʼakaba junsúutuk, páaʼt u máan u pʼujaʼanil Dios». Jach ku kiʼimaktal k-óol k-ojéeltikeʼ teʼ Armagedónoʼ mix baʼal kun úuchul tiʼ le máaxoʼob meyajtik Dios way Luʼumeʼ bey xan teʼ kaʼanoʼ. Jeʼex apóstol Pabloeʼ toʼoneʼ k-ojleʼ «mix gobiernoʼob, mix le baʼaloʼob yanoʼob bejlaʼeʼ, mix le baʼaloʼob ku taal u kʼiinoʼ, [ . . . ] jeʼel u náachkuntkoʼon tiʼ u yaabilaj Dios[eʼ]» (Rom. 8:​38, 39). Le oʼolaleʼ maʼ a tuʼubsikeʼ Jéeobaeʼ u yaabiltmech yéetel junpuliʼ maʼ ken u xúumpʼattech.