TU KʼIINIL 18 tiʼ enero tiʼ 2023, tsʼaʼab junpʼéel anuncio jach importante teʼ jw.org, aʼalaʼabeʼ le sukuʼun Gage Fleegle yéetel Jeffrey Winderoʼ oksaʼaboʼob ichil le Cuerpo Gobernante tiʼ u testigoʼob Jéeobaoʼ. Tu kaʼatúulaloʼobeʼ úuch joʼopʼok u meyajtikoʼob Jéeoba yéetel chúukaʼan óolal.

Le sukuʼun Fleegleoʼ líikʼ tu chikʼinil Pensilvania (Estados Unidos), u papáʼob kaʼanstiʼ le baʼax ku yaʼalik le Bibliaoʼ. Le táan u bin u chan nojochtaloʼ binoʼob kajtal tiʼ junpʼéel chan kaaj tuʼux kʼaʼabéet uláakʼ sukuʼunoʼob utiaʼal kʼaʼaytaj. Le sukuʼun Fleegleoʼ okjaʼanaj 20 tiʼ noviembre tiʼ 1988.

Mantatsʼ ku animartaʼal kaʼach tumen u papáʼob utiaʼal u tsʼáaik u metail u maas meyajtik Jéeoba. U papáʼobeʼ suuk kaʼach u invitarkoʼob tu yotochoʼob le superintendenteʼob tiʼ circuitoʼoboʼ yéetel le betelitaʼoboʼ. Bey túunoʼ letiʼeʼ tu tsʼáaj cuentaeʼ le sukuʼunoʼobaʼ jach kiʼimak u yóoloʼob. Le oʼolaleʼ 1 tiʼ septiembre tiʼ 1989, le maʼ úuch okjaʼanakoʼ, káaj u beetik u precursor regularil. Le ka máan dos añoseʼ bin Betel, junpʼéel meta u chʼaʼtukultmaj u béeykuntik desde le yaan 12 años tiʼoʼ. Káaj u meyaj tu Betelil Brooklyn octubre tiʼ 1991.

Teʼ Beteloʼ meyajnaj ocho años tu talleril encuadernación. Le ka tsʼoʼokeʼ túuxtaʼab meyaj tu Departamentoil Servicio. Teʼ kʼiinoʼob jeʼeloʼ ku yáantaj kaʼach tiʼ junpʼéel múuchʼulil ich ruso. Tu añoil 2006, tsʼoʼok u beel yéetel Nadia, desde teʼ kʼiin jeʼeloʼ tiʼ ku múul meyajoʼob Beteleʼ. Tu kaʼatúulaloʼobeʼ áantajnajoʼob teʼ múuchʼuliloʼob ich portuguésoʼ, yéetel teʼ kʼiinoʼobaʼ tsʼoʼok maas tiʼ diez años joʼopʼok u yáantajoʼob teʼ múuchʼuliloʼob ich españoloʼ. Le ka tsʼoʼok u máansik yaʼab años teʼ Departamento tiʼ Serviciooʼ le sukuʼun Fleegleoʼ tsʼaʼab meyaj tu Oficinail le Comité tiʼ Enseñanzaoʼ yéetel ka tsʼoʼokeʼ túuxtaʼab tu Oficinail le Comité tiʼ Serviciooʼ. Tu mesil marzo tiʼ  2022, aʼalaʼab yaan u yáantik le Comité tiʼ Servicio tiʼ le Cuerpo Gobernanteoʼ.

Le sukuʼun Winderoʼ líikʼ tu kaajil Murrieta (California). U papáʼob kaʼanstiʼ u jaajil tumen letiʼobeʼ u testigoʼob Jéeoba. Le sukuʼun Winderoʼ okjaʼanaj 29 tiʼ marzo tiʼ 1986. Le ka máan junpʼéel meseʼ káaj u beetik u precursor auxiliaril, tumen jach utschaj tu yicheʼ tu kʼiinil 1 tiʼ octubre tiʼ 1986, káaj u beetik u precursor regularil.

Le tsʼoʼok u chan nojochtaloʼ le sukuʼun Winderoʼ bin u xíimbalt kaʼatúul u sukuʼunoʼob ku meyajoʼob kaʼach Betel. Yoʼolal leloʼ tu chʼaʼtukleʼ kéen u tsʼáa u edadil tiʼeʼ yaan u chupik u solicitud utiaʼal u bin meyaj Betel. Tu mesil mayo tiʼ 1990, invitartaʼab utiaʼal u bin meyaj tu Betelil Wallkill.

Teʼ Beteloʼ jejeláas meyaj tu beetiʼ, meyajnaj tu Departamentoil Limpieza, tu Departamentoil le Haciendaoʼ yéetel teʼ Oficina de Beteloʼ. Tu añoil 1997, tsʼoʼok u beel yéetel Angela, desde teʼ kʼiin jeʼeloʼ tiʼ ku múul meyajoʼob Beteleʼ. Tu añoil 2014, asignartaʼab Warwick, le sukuʼun Winderoʼ áantajnaj utiaʼal u beetaʼal le Central Mundialoʼ. Tu añoil 2016, asignartaʼab Patterson teʼ Centro Educativo tiʼ le Watchtoweroʼ. Teʼeloʼ meyajnaj tiʼ Servicios de Audio yéetel Video. Le ka máan cuatro añoseʼ kaʼa túuxtaʼab Warwick, le sukuʼun Winderoʼ asignartaʼab tu Oficinail le Comité de Personaloʼ. Tu mesil marzo tiʼ 2022, aʼalaʼab yaan u yáantaj teʼ Comité de Personal tiʼ le Cuerpo Gobernanteoʼ.

Le sukuʼunoʼobaʼ beyoʼob regaloʼob ku tsʼáaiktoʼon Jéeobaeʼ, k-orar tu yoʼolaloʼob utiaʼal u seguer u bendecirtaʼaloʼob yoʼolal le bukaʼaj meyaj ku beetkoʼob yoʼolal le Reinooʼ (Efe. 4:8).