XOOK 7
KʼAAY 15 Koʼox nojbeʼenkúuntik le Reyoʼ
¿Baʼax utsiloʼob ku taasiktoʼon u perdonarkoʼon Jéeoba?
«Techeʼ tu jaajil ka perdonartik máak» (SAL. 130:4).
BAʼAX KEN K-KANE
Teʼ Bibliaoʼ yaan comparaciónoʼob ku yáantkoʼon k-naʼat bix u perdonarkoʼon Jéeoba yéetel utiaʼal k-maas apreciartik le baʼax ku beetkoʼ.
1. Le kéen u yaʼal juntúul máak ku perdonarkoʼoneʼ, ¿baʼaxten maʼ chéen chʼaʼabil k-ojéeltik baʼax u kʼáat u yaʼaliʼ?
LE KÉEN u yaʼaltoʼon juntúul máak k-beetmaj u yaatal u yóol: «Kin perdonarkech», ¿máasaʼ jach ku kiʼimaktal k-óol? Chéen baʼaleʼ, ¿jach baʼax u kʼáat u yaʼal le tʼaanoʼobaʼ? Yaan kʼiineʼ maʼ chéen chʼaʼabil k-ojéeltkiʼ tumen maʼ tuláakal máak igual bix u yilik le perdónoʼ. Maʼ xaaneʼ yaneʼ jeʼel u yaʼalikeʼ ku perdonarkech yéetel yaan u seguer a biskabaʼex jeʼex suukileʼ. Pero yaan xaneʼ jeʼel u yaʼaliktecheʼ ku perdonarkech, chéen baʼaleʼ maʼ kun seguer a biskabaʼex jeʼex kaʼacheʼ.
2. Jeʼex u yaʼalik le Bibliaoʼ, ¿bix u perdonar Jéeoba? (Ilawil xan le notaoʼ).
2 Jéeobaeʼ junpuliʼ maʼ bey jeʼex wíinikeʼ. U jaajileʼ mix máak jeʼel u perdonar jeʼex letiʼeʼ. Juntúul salmistaeʼ tu yaʼalaj: «Techeʼ tu jaajil ka perdonartik máak, le oʼolal yaan a adorartaʼal» (Sal. 130:4). a Beyoʼ, Jéeobaeʼ jach especial bix u perdonartik máak tumen letiʼeʼ ‹tu jaajil ku perdonar›. Le beetkeʼ wa taak k-ojéeltik bix u perdonar máak jach tu jaajil u yóoleʼ kʼaʼabéet k-ilik u ejemplo. Teʼ Tsʼíiboʼob ich Hebreooʼ yaan kʼiineʼ ku meyaj junpʼéel tʼaan utiaʼal u yaʼalaʼal bix u perdonar Jéeoba, le tʼaanaʼ maʼatech u meyaj utiaʼal u yúuchul tʼaan tiʼ bix u perdonar wíinik.
3. ¿Baʼaxten táaj jatsʼuts bix u perdonar Jéeoba? (Isaías 55:6, 7).
3 Jéeobaeʼ le kéen u perdonart máakeʼ ku borrartik tu chúukaʼanil u kʼeban, tsʼoʼoleʼ ku kaʼa biskuba maʼalob yéetel le máax kʼebanchajoʼ. Letiʼeʼ jach táaj uts, mantatsʼ ku perdonarkoʼon tu chúukaʼanil (xok Isaías 55:6, 7).
4. ¿Baʼax tsʼoʼok u beetik Jéeoba utiaʼal u yáantkoʼon k-naʼat bix u perdonar?
4 Wa maʼ igual bix u perdonar Jéeoba tiʼ wíinikeʼ, ¿bix túun jeʼel k-naʼatik bix u perdonar wa chéen kʼeban máakoʼoneʼ? Utiaʼal k-naʼatik bix u perdonareʼ Jéeobaeʼ tu beetaj u tsʼaʼabal comparaciónoʼob teʼ Bibliaoʼ. Teʼ xookaʼ yaan k-xakʼaltik jujunpʼéeloʼobiʼ. Lelaʼ yaan u yáantkoʼon k-il bix u borrartik Jéeoba le kʼebanoʼoboʼ yéetel baʼax ku beetik utiaʼal k-kaʼa bisikba tu yéetel. Le táan k-xakʼaltik le comparaciónoʼobaʼ yaan k-naʼatik bix u perdonar Jéeoba yéetel yaan k-maas apreciartik le baʼax ku beetkoʼ.
JÉEOBAEʼ KU BISIK K-KʼEBANOʼOB
5. ¿Baʼax ku yúuchul le kéen u perdonart Jéeoba k-kʼebanoʼob?
5 Teʼ Bibliaoʼ le kʼebanoʼoboʼ ku comparartaʼal yéetel baʼaloʼob aal u bisaʼal. Por ejemploeʼ rey Davideʼ tu yaʼalaj: «Kin wuʼuyik táan u pechʼken le baʼaxoʼob maʼ maʼalobtak in beetmoʼ, beyoʼob junpʼéel baʼal jach aal maʼ tu páajtal in kuchkeʼ» (Sal. 38:4). Chéen baʼaleʼ le Salmo 25:18 yéetel 32:5, ku yaʼalikeʼ Jéeobaeʼ ku perdonartik le máaxoʼob ku arrepentiroʼob tiʼ u kʼebanoʼoboʼ. Le tʼaanoʼob ich hebreo meyajnaj teʼ versículoʼob utiaʼal u yaʼalaʼal «perdonaroʼ» u kʼáat u yaʼal u «kuʼuchul» wa u «bisaʼal». Jéeobaeʼ bey juntúul máak jach yaan u muukʼ ku luʼsiktoʼon le kʼebanoʼob jach táaj aaltak k-biskoʼ yéetel ku kuchik u bis letiʼ.
«Ta perdonartaj» (Sal. 32:5)
6. ¿Tuʼux ku bisik Jéeoba k-kʼebanoʼob?
6 ¿Tuʼux túun ku bisik Jéeoba k-kʼebanoʼob? Le Salmo 103:12, ku yáantkoʼon k-naʼate. Ku yaʼalik: «Jeʼex bukaʼaj náachil yanil lakʼin tiʼ chikʼinoʼ, letiʼe bukaʼaj xan tsʼoʼok u náachkuntik tiʼ toʼon le baʼaxoʼob maʼ maʼalob k-beetmoʼ». Le lakʼinoʼ letiʼe tuʼux ku jóokʼol le Kʼiinoʼ, le chikʼinoʼ letiʼe tuʼux ku tʼúubuloʼ. Le kaʼapʼéel lugaroʼobaʼ jach náach yaniloʼob, cada junpʼéeleʼ táanxel tséel yaan. Le tekstoaʼ ku kaʼansiktoʼoneʼ le kéen u perdonartoʼon Jéeobaeʼ ku bisik k-kʼebanoʼob, hasta maʼ tu páajtal k-naʼatik bukaʼaj náachil tuʼux ku bisik. ¡Jach táaj jatsʼuts le baʼax ku beetkoʼ!
«Jeʼex bukaʼaj náachil yanil lakʼin tiʼ chikʼinoʼ» (Sal. 103:12)
7. ¿Bix u tsolik le Biblia le baʼax ku beetik Jéeoba yéetel k-kʼebanoʼoboʼ? (Miqueas 7:18, 19).
7 Jéeobaeʼ le kéen u chʼaʼ u bis k-kʼebanoʼobeʼ, ¿ku pʼáatal wa tiʼ u kuche? Maʼatech, le rey Ezequíasoʼ tu yaʼalaj: «Tsʼoʼok a pulik tuláakal in kʼebanoʼob paachil tiʼ teech». Le notaoʼ ku yaʼalik: «Tsʼoʼok a luʼsik tuláakal in kʼebanoʼob ta táan» (Isa. 38:9, 17; nota). Leloʼ ku yeʼesikeʼ le kéen arrepentirnakoʼoneʼ Jéeobaeʼ bey ka u chʼaʼ k-kʼebanoʼobeʼ, le kéen tsʼoʼokkeʼ ku pulik tiʼ junpʼéel tuʼux maʼ ken u kaʼa ile. Le tekstoaʼ ku páajtal xan u traducirtaʼal beyaʼ: «Tsʼoʼok a beetik in wuʼuyik bey mix juntéen kʼebanchajkeneʼ». Le Bibliaoʼ ku yeʼesik jach tu jaajil bey u beetik Jéeobaoʼ, lelaʼ bey u yeʼesik Miqueas 7:18, 19 (xoke). Teʼeloʼ ku yaʼalikeʼ Jéeobaeʼ ku píikchʼintik tuláakal k-kʼebanoʼob tu taamil le kʼáaʼnáaboʼ. Úuchjeakileʼ wa ku lúubul junpʼéel baʼal tu taamil le kʼáaʼnáaboʼ junpuliʼ maʼ tu páajtal u kaʼa jóoʼsaʼal.
«Tsʼoʼok a pulik tuláakal in kʼebanoʼob paachil tiʼ teech» (Isa. 38:17)
«Techeʼ yaan a píikchʼintik tuláakal k-kʼebanoʼob tu taamil le kʼáaʼnáaboʼ» (Miq. 7:19)
8. Tak beoraaʼ, ¿baʼax tsʼoʼok k-kanik?
8 Yéetel u yáantaj le comparaciónoʼobaʼ tsʼoʼok k-kanikeʼ le kéen u perdonartoʼon Jéeobaeʼ ku bisik k-kʼebanoʼob yéetel ku luʼsiktoʼon le kuuch táan k-biskoʼ. Le oʼolal Davideʼ tu yaʼalaj: «Kiʼimak u yóol le máaxoʼob ku perdonartaʼal le baʼaloʼob tu beetoʼob tu contra le ley yéetel tsʼoʼok u tuʼubsaʼal u kʼebanoʼoboʼ; kiʼimak u yóol le máax junpuliʼ maʼ kun chʼaʼabil en cuenta u kʼebanoʼob tumen Jéeobaoʼ» (Rom. 4:7, 8). ¡Lelaʼ jach tu jaajil perdonar!
JÉEOBAEʼ KU TUPIK K-KʼEBANOʼOB
9. ¿Baʼax comparacióniloʼob áantkoʼon k-naʼat bix u perdonarkoʼon Jéeoba?
9 Beoraaʼ yaan k-ilik uláakʼ comparaciónoʼob yaan u yáantkoʼon k-naʼat bix u luʼsik Jéeoba u kʼeban le máaxoʼob ku arrepentiroʼoboʼ. Lelaʼ ku beetik yoʼolal le u kuxtal Jesús tu kʼuboʼ. Por ejemploeʼ le Bibliaoʼ ku yaʼalikeʼ Jéeobaeʼ ku pʼoʼik yéetel ku chalik le kʼebanoʼoboʼ, bey u pʼatik limpioil le máax ku kʼebantaloʼ (Sal. 51:7; Isa. 4:4; Jer. 33:8). Jéeobaeʼ ku tsolik baʼax ku yúuchul kéen tsʼoʼokok u limpiokíintik máak: «Kex jach chak a kʼebaneʼexeʼ yaan u saktal bey jeʼex le nieveoʼ, kex bey junpʼéel nookʼ jach chakeʼ yaan u saktal bey jeʼex u tsoʼotsel tamaneʼ» (Isa. 1:18). Jeʼex k-ojliloʼ le manchaʼob jach chaktakoʼoboʼ jach difícil u luʼsaʼaloʼob. Lelaʼ ku kaʼansiktoʼoneʼ Jéeobaeʼ le kéen u pʼoʼ k-kʼebanoʼobeʼ ku pʼatik limpioil, hasta ku pʼáatal bey mix juntéen kʼebanchajkoʼoneʼ.
«Kex jach chak a kʼebaneʼexeʼ yaan u saktal bey jeʼex le nieveoʼ» (Isa. 1:18)
10. ¿Baʼax uláakʼ comparaciónil ku meyaj tiʼ Jéeoba utiaʼal u yáantkoʼon k-naʼat bix u perdonarkoʼon?
10 Jeʼex t-ilil teʼ xook manikoʼ le kʼebanoʼoboʼ ku comparartaʼal yéetel pʼaaxoʼob (Mat. 6:12; Luc. 11:4). Le beetkeʼ cada ken kʼebanchajkoʼon tu contra Jéeobaeʼ bey táan k-pʼaʼapʼaxikba tiʼ letiʼeʼ. Chéen baʼaleʼ le kéen u perdonartoʼoneʼ bey táan u yaʼaliktoʼon maʼ tsaaj k-boʼotiktiʼ le kʼebanoʼoboʼ. Lelaʼ u kʼáat u yaʼaleʼ maʼ tu exigirtik ka k-boʼot k-kʼebanoʼob tumen tsʼoʼok u perdonarkoʼon. ¡Jach ku líiʼsik k-óol k-naʼatik bix u perdonarkoʼon Jéeoba!
«Perdonart k-pʼaax» (Mat. 6:12)
11. ¿Baʼaxten le Bibliaoʼ ku yaʼalikeʼ Jéeobaeʼ ku tupik k-kʼebanoʼob? (Hechos 3:19).
11 Jéeobaeʼ maʼ chéen ku yaʼalik maʼ tsaaj k-boʼotik k-pʼaaxiʼ, baʼaxeʼ ku tupik wa ku borrartik (xok Hechos 3:19). Utiaʼal k-naʼatikeʼ koʼox tuklikeʼ juntúul máakeʼ pʼaaxnajaʼan, pero le máax u pʼaxmoʼ ku tachartik le u pʼaax le máakoʼ. Kex tsʼoʼok u tachartik le pʼaaxoʼ todavía ku páajtal u yilaʼal le bukaʼaj u pʼaxmaj kaʼach le máakoʼ tumen chéen junpʼéel tacha yaan tu yóokʼol, chéen baʼaleʼ le bix u perdonar Jéeobaoʼ maʼ chéen tacharbil u beetik le kʼebanoʼ, baʼaxeʼ ku borrartik. Utiaʼal k-naʼatik maas maʼalobeʼ kʼaʼajaktoʼoneʼ úuchjeakileʼ le tintaoʼ ku beetaʼal yéetel chúuk, u yiits cheʼ bey xan yéetel jaʼ. Le oʼolal jach fácil u borrartaʼal yéetel junxóotʼ esponja chʼuul. Le kéen borrartaʼak junpʼéel pʼaaxeʼ ku saʼatal. Mix máak jeʼel u yojéeltik le baʼax tsʼíibtaʼan kaʼachoʼ, hasta jeʼel u yaʼalaʼal maʼ tsʼíibtaʼan kaʼach mix baʼaleʼ. ¡Jach k-tsʼáaik u graciasil tiʼ Jéeoba ikil u perdonartik k-kʼebanoʼob, tumen letiʼeʼ ku láaj borrartik! (Sal. 51:9).
«Utiaʼal ka perdonartaʼak a kʼebaneʼex» (Hech. 3:19)
12. ¿Baʼax k-kanik tiʼ u comparaciónil le múuyaloʼ?
12 Teʼ Isaías 44:22, tiʼ Jéeobaeʼ ku meyaj junpʼéel comparación utiaʼal u yeʼesik baʼax ku beetik yéetel k-kʼebanoʼob, ku yaʼalik: «Teneʼ yaan in tupik le baʼaxoʼob maʼ maʼalob a beetmoʼ yéetel yaan in pixik a kʼebanoʼob yéetel junpʼéel múuyal». Jeʼex k-ilkoʼ le kéen u perdonartoʼon Jéeobaeʼ bey táan u pixik k-kʼebanoʼob yéetel junpʼéel nuxiʼ múuyaleʼ, beyoʼ mix máak kun kaʼa ilik.
«Yaan in tupik le baʼaxoʼob maʼ maʼalob a beetmoʼ» (Isa. 44:22)
13. ¿Bix a wuʼuyikaba ikil a wojéeltik Jéeobaeʼ ku perdonartik a kʼebanoʼob?
13 ¿Baʼax ku kaʼansiktoʼon tuláakal le ejemploʼob tsʼoʼok k-ilkoʼ? Ku kaʼansiktoʼoneʼ le kéen u perdonartoʼon Jéeobaeʼ maʼ unaj k-tuklik wa láayliʼ yaan junpʼéel mancha ichil k-kuxtaliʼ. Tuláakal k-pʼaaxoʼob wa k-kʼebanoʼobeʼ tsʼoʼok u boʼotaʼal tumen Jesús, le beetik maʼ tsaaj k-boʼotkoʼobiʼ. Tsʼoʼok u láaj borrartaʼal, hasta bey mix juntéen k-beetoʼobeʼ. Leloʼ letiʼe baʼax ku beetik Jéeoba le kéen arrepentirnakoʼonoʼ, tu jaajil ku perdonarkoʼon.
JÉEOBAEʼ KU KAʼA BISKUBA T-ÉETEL
Úuchik u perdonarkoʼon Jéeobaeʼ ku páajtal k-bisikba maʼalob tu yéetel (Ilawil párrafo 14)
14. ¿Baʼaxten jach jatsʼuts bix u perdonarkoʼon Jéeoba? (Ilawil xan le fotoʼoboʼ).
14 Le kéen u perdonart k-kʼebanoʼob Jéeobaeʼ k-ojel yaan u páajtal k-kaʼa bisikba tu yéetel. Lelaʼ ku yáantkoʼon xan utiaʼal maʼ u seguer u yaatal k-óol yoʼolal le baʼax k-beetmoʼ, tsʼoʼoleʼ k-ojel xan de ke Jéeobaeʼ maʼ u pʼekmoʼoniʼ, yéetel maʼ ken u kaxt u súutukil utiaʼal u castigarkoʼon. ¿Baʼaxten jach seguroʼon de ke beyoʼ? Le profeta Jeremíasoʼ tu yaʼalaj: «Yaan in perdonartik le baʼax maʼ maʼalob u beetmoʼoboʼ yéetel maʼ ken in kaʼa kʼaʼajs u kʼebanoʼob» (Jer. 31:34). Apóstol Pabloeʼ tu chʼaʼchiʼitaj le baʼax ku yaʼalik le tekstooʼ, tu yaʼalaj: «Maʼ ken in kaʼa kʼaʼajs u kʼebanoʼob» (Heb. 8:12). ¿Baʼax wal tu yóotaj u yaʼaleʼ?
«Maʼ ken in kaʼa kʼaʼajs u kʼebanoʼob» (Jer. 31:34)
15. ¿Baʼax u kʼáat u yaʼal Jéeoba le kéen u yaʼal maʼ ken u kʼaʼajs k-kʼebanoʼob?
15 Teʼ Bibliaoʼ le tʼaan u kʼaʼajsaʼal junpʼéel baʼaloʼ maʼ mantatsʼ táan u tʼaan tiʼ u kʼaʼajsik máak junpʼéel baʼal beetaʼan úuchjeakiliʼ. Yaan kʼiineʼ le tʼaan jeʼelaʼ ku tsʼáaik naʼatbil u beetik máak wa baʼax. Por ejemploeʼ juntúul tiʼ le kʼasaʼan máakoʼob chʼuykíintaʼab tu tséel Jesúsoʼ tu yaʼalajtiʼ: «Kʼaʼajsen le kéen ookkech ta Reino» (Luc. 23:42, 43). Le máakoʼ maʼ táan u yaʼalik kaʼach tiʼ Jesús ka tuukulnak tu yoʼolal teʼ súutukil jeʼeloʼ. Tsʼoʼoleʼ Jesús xaneʼ tu tsʼáaj naʼatbileʼ yaan baʼax ken u beet tu yoʼolal le máakoʼ: u kaʼa kuxkíintik. Jéeoba túuneʼ le kéen u yaʼal maʼ ken u kʼaʼajs tu kaʼatéen k-kʼebanoʼobeʼ u kʼáat u yaʼaleʼ maʼ ken u beet mix baʼal t-contra. Letiʼeʼ mix juntéen ken u chʼin t-ich le baʼaxoʼob k-beetmoʼ, mix bejlaʼeʼ, mix sáamal, mix maas táanil tumen tsʼoʼok u perdonarkoʼon.
16. ¿Bix k-uʼuyikba le kéen u perdonartoʼon Jéeoba?
16 Koʼoneʼex ilik uláakʼ comparación ken u yaantoʼon k-naʼat bix k-uʼuyikba le kéen u perdonartoʼon Jéeobaoʼ. Como tuláakloʼon kʼebanoʼoneʼ jeʼel u páajtal k-aʼalikeʼ u ‹esclavoʼon le kʼebanoʼ›. Chéen baʼaleʼ le kéen u perdonartoʼon Jéeobaeʼ bey ka u ‹jáalkʼabtoʼon tiʼ le kʼebanoʼ› (Rom. 6:17, 18; Apo. 1:5). Jach ku kiʼimaktal k-óol k-ojéeltik ku perdonarkoʼon Jéeoba. K-uʼuyikba bey jeʼex juntúul esclavo kéen jáalkʼabtaʼakeʼ.
«Tsʼoʼok a jáalkʼabtaʼaleʼex tiʼ le kʼebanoʼ» (Rom. 6:18)
17. ¿Baʼaxten le Bibliaoʼ ku comparartik k-perdonartaʼal yéetel u tsʼaʼakal máak? (Isaías 53:5).
17 (Xok Isaías 53:5). Teʼ tu tsʼook comparación ken k-ilaʼ, le Bibliaoʼ ku comparartik le kʼeban yéetel junpʼéel kʼojaʼanil ku kíimsik máakoʼ. Pero Jéeobaeʼ tsʼoʼok u tsʼakikoʼon yoʼolal le u kuxtal u Hijo tu kʼuboʼ. Le kéen kʼebanchajkoʼoneʼ jeʼel u páajtal k-aʼalikeʼ k-kʼojaʼantal, le kéen u perdonartoʼon Jéeobaeʼ ku tojtal k-óol yéetel ku páajtal k-kaʼa bisikba tu yéetel (1 Ped. 2:24). Jeʼex juntúul máak táaj kʼojaʼan yéetel grave yanil jach ku kiʼimaktal u yóol kéen tsʼaʼakakeʼ, toʼon xaneʼ jach ku kiʼimaktal k-óol kéen u perdonartoʼon Jéeoba tumen ku páajtal k-kaʼa bisikba tu yéetel.
«Tu yoʼolal le loob beetaʼabtiʼoʼ béeychaj k-tsʼaʼakal» (Isa. 53:5)
¿BIX A WUʼUYIKABA IKIL A WOJÉELTIK KU PERDONARKECH JÉEOBA?
18. ¿Baʼax ku kaʼansiktoʼon tuláakal le comparaciónoʼob tsʼoʼok k-ilik yoʼolal bix u perdonartik máak Jéeobaoʼ? (Ilawil xan le cuadro «Bix u perdonarkoʼon Jéeoba»).
18 ¿Baʼax ku kaʼansiktoʼon tuláakal le comparaciónoʼob tsʼoʼok k-ilik yoʼolal bix u perdonartik máak Jéeobaoʼ? Ku kaʼansiktoʼoneʼ le kéen u perdonartoʼon Jéeobaeʼ k-kʼebanoʼobeʼ ku saʼatal, yéetel letiʼeʼ maʼ tu kaʼa kʼaʼajsik. Yoʼolal leloʼ ku páajtal k-bisikba maʼalob tu kaʼatéen yéetel k-Taata yaan teʼ kaʼanoʼ. Chéen baʼaleʼ maʼ unaj u tuʼubultoʼoneʼ Jéeobaeʼ ku perdonarkoʼon maʼ tumen wa k-náajaltmiʼ mix tumen wa kʼaʼabéet u beetkiʼ. Baʼaxeʼ lelaʼ junpʼéel siibal ku tsʼáaiktoʼon tumen jach u yaabiltmoʼon yéetel jach nojoch u yutsil (Rom. 3:24).
19. 1) ¿Baʼax beetik u jach kiʼimaktal k-óol? (Romanos 4:8). 2) ¿Baʼax ken k-ileʼex teʼ tuláakʼ xookoʼ?
19 (Xok Romanos 4:8). Jach kiʼimak k-óol k-ojéeltik Jéeobaeʼ tu «jaajil ku perdonartik máak» (Sal. 130:4). Chéen baʼaleʼ jeʼex tu yaʼalil Jesúseʼ wa k-kʼáat ka u perdonartoʼon Jéeobaeʼ kʼaʼabéet k-chʼaʼik en cuenta lelaʼ: «Wa maʼ ta perdonarkeʼex le kʼaas ku beetaʼalteʼexoʼ, a Taataʼexeʼ maʼ xan ken u perdonart le baʼaloʼob kʼaastak ka beetkeʼexoʼ» (Mat. 6:14, 15). Jeʼex k-ilkoʼ jach kʼaʼabéet k-perdonar jeʼex u beetik Jéeobaeʼ. Teʼ xook ku segueroʼ yaan k-ilik bix jeʼel k-beetkeʼ.
KʼAAY 46 Kin tsʼáaiktech gracias, Jéeoba
a Teʼ versículoaʼ le ka tsʼíibtaʼab le Biblia ich hebreooʼ meyajnaj le tʼaan «le perdónoʼ». Lelaʼ chéen ku meyaj utiaʼal u yúuchul tʼaan tiʼ le u jaajil perdónoʼ, kex yaan uláakʼ formaʼob bix u yúuchul perdonar. Teʼ Biblia Túumben Luʼumoʼ le ka traducirtaʼab le Salmo 130:4, ilaʼab u kʼaʼanaʼanil u tsʼaʼabal naʼatbil le jeʼeloʼ. Pero tiʼ uláakʼ bibliaʼobeʼ maʼ beetaʼab beyoʼ.
