LE KA yanchajtech problemaseʼ, ¿ta wuʼuyaj wa bey mix máak áantkecheʼ? Le Bibliaoʼ ku yaʼalikeʼ kuxaʼanoʼon tiʼ «yaayaj kʼiinoʼob yéetel istikyaj ken u máansil u kuxtal máak». Le oʼolal yaan horaeʼ ku lúubul k-óol yéetel k-uʼuyik mix máak áantkoʼon (2 Tim. 3:1). Chéen baʼaleʼ maʼ unaj k-aktáantik k-problemas chéen t-juunaliʼ. Le Bibliaoʼ ku yaʼalikeʼ le maʼalob amigoʼoboʼ jeʼel u yáantkoʼonoʼob teʼ kʼiinoʼob táan k-muʼyajoʼ (Pro. 17:17).

Pabloeʼ jach áantaʼab tumen u amigoʼob le ka bin jejeláas tuʼuxoʼob kʼaʼaytajoʼ (Col. 4:​7-11). Le ka kʼaʼal Pablo tu kaajil Romaeʼ, u amigoʼobeʼ tu beetoʼob le baʼaloʼob maʼ tu páajtal u beetik kaʼachoʼ. Por ejemploeʼ Epafroditoeʼ tu bisajtiʼ le baʼaxoʼob tu túuxtaj le sukuʼunoʼob yanoʼob Filiposoʼ (Fili. 4:18). Tíquico xaneʼ tu bisaj le cartaʼob tu tsʼíibtaj Pablo tiʼ le jejeláas múuchʼuliloʼoboʼ. Jeʼex k-ilkoʼ le ka kʼaʼal Pablo cárcel yéetel le ka aʼalaʼabtiʼ maʼ u jóokʼol tu yotochoʼ yéetel u yáantaj u amigoʼobeʼ seguernaj u líiʼsik u yóol le múuchʼuliloʼoboʼ. Kux túun teech, ¿bix jeʼel a beetkaba juntúul jach maʼalob amigoeʼ?

Teʼ kʼiinoʼobaʼ yaʼab sukuʼunoʼob yéetel kiikoʼobeʼ ku yeʼeskoʼob bix juntúul maʼalob amigo. Koʼoneʼex k-ilik baʼax úuch tiʼ Elísabet, juntúul precursora España u taal. Aʼalaʼabtiʼeʼ u maamaeʼ yaan cáncer tiʼ. Juntúul u amiga Elísabeteʼ tu túuxtajtiʼ yaʼab mensajeʼob tuʼux ku chʼaʼchiʼitik jujunpʼéel versículoʼob tiʼ le Biblia jach jatsʼutstakoʼ. Elísabeteʼ ku yaʼalik: «Le mensajeʼoboʼ tu yáantenoʼob in wil maʼ chéen tin juunal yaneniʼ, yéetel tu yáantenoʼob in aktáant le baʼaxoʼob táan u yúuchultenoʼ» (Pro. 18:24).

Jeʼel k-maas bisikba yéetel le sukuʼunoʼob le kéen k-áantoʼob u adorartoʼob Jéeobaoʼ. Por ejemploeʼ jeʼel u páajtal k-ofrecertikba k-bis reunión wa teʼ kʼaʼaytaj juntúul sukuʼun wa juntúul kiik tsʼoʼok u yantal u jaʼabileʼ. Wa k-beetik beyoʼ jach yaan k-paklan líiʼsik k-óol tu yéeteloʼob (Rom. 1:12). Chéen baʼaleʼ yaan sukuʼunoʼobeʼ maʼ tu páajtal u jóokʼloʼob tu yotochoʼob. Le kéen úuchuk beyoʼ, ¿bix jeʼel k-eʼesik jach maʼalob amigoʼoneʼ?

Yaan sukuʼunoʼob yéetel kiikoʼobeʼ maʼ tu páajtal u binoʼob reunión teʼ salónoʼ tumen kʼojaʼanoʼob. Bey úuchik tiʼ Davidoʼ, tiʼ letiʼeʼ aʼalaʼab yaan junpʼéel clase cáncer tiʼ ku kʼaabaʼtik linfoma. Maas tiʼ seis meses tsʼaʼab quimioterapia tiʼ. Tiʼ tuláakal le tiempo jeʼeloʼ David yéetel Lidia, u yataneʼ, desde tu yotoch tu yiloʼob le reuniónoʼob tiʼ videoconferenciaoʼ.

¿Bix úuchik u yáantaʼaloʼob tumen le múuchʼuliloʼ? Kéen tsʼoʼokok le reuniónoʼ jujuntúul sukuʼunoʼob  yanoʼob teʼ salónoʼ ku yilik u tsikbaloʼob tiʼ videoconferencia yéetel David bey xan yéetel Lidia. Tsʼoʼoleʼ le kéen comentarnak David yéetel Lidiaeʼ le sukuʼunoʼoboʼ ku túuxtikoʼob mensaje tiʼob utiaʼal u yaʼalikoʼob jach jatsʼuts le comentario tu tsʼáajoʼoboʼ. ¿Baʼax utsil tu taasaj? David yéetel Lidiaeʼ tu yuʼuboʼob yaabiltaʼanoʼob tumen u amigoʼob.

¿Bix jeʼel k-kʼaʼaytaj yéetel le sukuʼunoʼob maʼ tu páajtal u jóokʼloʼob tu yotochoʼoboʼ? Maʼ xaaneʼ yaan u kʼaʼabéettal k-beetik jujunpʼéel kʼeexoʼob tiʼ bix k-kʼaʼaytaj utiaʼal k-eʼesik k-chʼaʼikoʼob en cuenta (Pro. 3:27). Por ejemploeʼ jeʼel u páajtal k-tsʼíibtik cartas yéetel k-kʼaʼaytaj tu yéeteloʼob tiʼ teléfonoeʼ. Tsʼoʼoleʼ le ancianoʼoboʼ jeʼel u yaʼalikoʼob ka u conectartubaʼob tiʼ videoconferencia utiaʼal u reunióniloʼob le kʼaʼaytajoʼ. David yéetel Lidiaeʼ jach tu apreciartoʼob bix úuchik u yáantaʼaloʼob. Davideʼ ku yaʼalik: «Jach ku kiʼimaktal k-óol kéen k-conectarba yéetel u grupoil le kʼaʼaytajoʼ, k-uʼuyik u tsikbaloʼob bey xan le oraciónoʼob ku beetaʼaloʼ». Wa ka wilik maʼalobeʼ cada wa baʼax kʼiineʼ jeʼel u páajtal a bisik a j-xoknáal utiaʼal ka a tsʼáa xook tiʼ yéetel le sukuʼun maʼ tu páajtal u jóokʼol tu yotochoʼ.

Le kéen k-máans tiempo yéetel le sukuʼunoʼob bey xan yéetel le kiikoʼob maʼ tu páajtal u jóokʼloʼob tu yotochoʼoboʼ, k-maas kʼaj óoltikoʼob yéetel k-ilik u jatsʼuts modosoʼob. Leloʼ ku yáantaj utiaʼal ka k-maas bisba tu yéeteloʼob. Por ejemploeʼ le kéen kʼaʼaytajnakoʼon yéetel le sukuʼunoʼobaʼ k-ilik bix séebaʼanil u kaxtikoʼob tekstoʼob jeʼel u kʼuchul tu puksiʼikʼal le máakoʼoboʼ. Leloʼ ku yáantkoʼon k-maas respetartoʼob. Le kéen k-áant le sukuʼunoʼob u adorartoʼob Diosoʼ ku maas yaʼabtal xan k-amigoʼob (2 Cor. 6:13).

Apóstol Pabloeʼ líikʼ u yóol tumen tiaʼan kaʼach Tito tu yiknaleʼ (2 Cor. 7:​5-7). Lelaʼ ku kaʼansiktoʼoneʼ jeʼel u páajtal k-líiʼsik u yóol k-amigoʼob maʼ chéen yéetel le baʼaxoʼob k-aʼalikoʼ, baʼaxeʼ tak ikil k-antal tu yéeteloʼob bey xan yéetel le baʼaxoʼob k-beetik utiaʼal k-áantkoʼoboʼ (1 Juan 3:18).

Le sukuʼunoʼob yéetel le kiikoʼob yanoʼob Rusiaoʼ jach tsʼoʼok u yeʼeskoʼob ku paklan áantkubaʼob. Koʼoneʼex ilik baʼax úuch tiʼ Sergey yéetel Tatiana, u yatan. Letiʼobeʼ xakʼaltaʼab u yotochoʼob tumen le policíaʼoboʼ yéetel bisaʼaboʼob utiaʼal ka kʼáataʼak u chiʼob. Yáax Tatiana chaʼab u suut tu yotoch. Sergeyeʼ ku yaʼalik: «Jach táant u kʼuchul Tatianaeʼ ka kʼoopnaj juntúul kiik teʼ joonajoʼ, maʼ xáanchajeʼ taal uláakʼ k-amigoʼob utiaʼal ka k-tsʼáa tuláakal le baʼaloʼob tu lugaroʼ».

Sergeyeʼ ku yaʼalik xan: «Teneʼ jach jatsʼuts in wilik baʼax ku yaʼalik Proverbios 17:​17, ku yaʼalik: ‹Juntúul jach maʼalob amigoeʼ ku yeʼesik yaabilaj tiʼ tuláakal súutukil, tu kʼiinil táan u muʼyaj máakeʼ letiʼeʼ bey juntúul sukuʼuneʼ›. Tsʼoʼok in wilik jach jaaj le baʼax ku yaʼalik le tekstoaʼ, maases teʼ kʼiinoʼob táan k-chʼaʼpachtaʼalaʼ. Tumen chéen tin juunaleʼ maʼ tu páajtal in beetik mix baʼal. Jéeobaeʼ tsʼoʼok u tsʼáaikten amigoʼob jach maʼ saajkoʼobiʼ».

Le kéen k-aktáant baʼaloʼob jach difíciltakeʼ yaan u kʼaʼabéettal k-áantaʼal tumen k-amigoʼob. Lelaʼ maases yaan u yúuchul le táan le nojoch muʼyajiloʼ. Le beetkeʼ desde beoraaʼ tak toʼon kʼaʼabéet k-beetik tuláakal le ku páajtal utiaʼal k-beetikba juntúul maʼalob amigo utiaʼal u maasil (1 Ped. 4:​7, 8).