María yéetel Juan, u yíichameʼ, a kajaʼanoʼob tiʼ junpʼéel lugar tuʼux jach yaʼab máakoʼob ku binoʼob meyaj Filipinas u taaloʼob, letiʼobeʼ ku aprovecharkoʼob u kʼaʼaytajoʼob tiʼ le máakoʼobaʼ. Le táan u pandemiail le COVID-19, Maríaeʼ maʼ chéen káaj u tsʼáaik xook tiʼ le máakoʼob kajaʼanoʼob teʼ luʼumiloʼ, baʼaxeʼ tak tiʼ le máakoʼob ku taaloʼob tiʼ uláakʼ luʼumiloʼoboʼ. ¿Bix úuchik u beetik?

Maríaeʼ suuk u kʼáatik tiʼ u j-xoknáaloʼob: «¿Yaan wa máax a kʼaj óol taak u kaanbal tiʼ le Bibliaoʼ?». Wa ku yaʼalikoʼob yaneʼ, ku kʼáatik ka presentartaʼakoʼobtiʼ. Le preguntaaʼ jach tu taasaj utsil. ¿Baʼaxten? Tumen u suukileʼ le máaxoʼob uts tu tʼaanoʼob baʼax ku kankoʼob teʼ Bibliaoʼ ku tsikbaltikoʼob tiʼ u láakʼtsiloʼob yéetel tiʼ u amigoʼob. ¿Baʼax utsiloʼob tu taasaj le pregunta tu beetaj Maríaoʼ?

Jasmin juntúul tiʼ u j-xoknáaloʼob Maríaeʼ tu presentartajtiʼ uláakʼ cuatro koʼoleloʼob utiaʼal ka tsʼaʼabak xook tiʼob. Juntúul tiʼ letiʼobeʼ Kristi, letiʼeʼ jach uts tu tʼaan le baʼax ku kanik teʼ Bibliaoʼ, le oʼolal tu yaʼalaj tiʼ María jeʼel u xook kaʼatéen tiʼ junpʼéel semanaeʼ. Le ka kʼáataʼabtiʼ tumen María wa yaan máax u kʼaj óol taak u kaanbal tiʼ le Bibliaoʼ, Kristieʼ tu yaʼalaj: «Yaan, jeʼel in presentartiktech in amigaʼobeʼ». Maʼ xáanchajeʼ Kristieʼ tu presentartaj tiʼ María uláakʼ cuatro u amigaʼob taak u kaanbaloʼob. Maʼ xáanchaj xaneʼ Kristieʼ tu presentartajtiʼ uláakʼ máakoʼob, jujuntúul tiʼ letiʼobeʼ bey xan tu beetiloʼoboʼ, tu presentartoʼob uláakʼ máakoʼob tiʼ María.

Kristieʼ u kʼáat xan ka kaanbalnak tiʼ le Biblia le u láakʼtsiloʼob yanoʼob Filipinasoʼ. Ka túun tu tsikbaltaj tiʼ Andrea, u hija, le baʼax táan u kanikoʼ. Chéen baʼaleʼ Andreaeʼ tu káajbaleʼ ku tuklik: «U testigoʼob Jéeobaeʼ jelaʼanoʼob, maʼ tu creerkoʼob Jesús. Tsʼoʼoleʼ chéen le Antiguo Testamento ku xokikoʼoboʼ». Chéen baʼaleʼ ka yáax xooknajeʼ kʼexpaj u tuukul. Cada ken xooknak kaʼacheʼ ku yaʼalik: «Wa le Biblia aʼalikoʼ, ¡u kʼáat u yaʼaleʼ jach jaaj!».

Ka máan kʼiineʼ Andreaeʼ tu presentartaj tiʼ María kaʼatúul u amigaʼob yéetel juntúul u yéet meyaj utiaʼal ka tsʼaʼabak xook tiʼob. Tsʼoʼoleʼ Andreaeʼ yaan kaʼach juntúul u tía ku kʼaabaʼtik Angela, letiʼeʼ chʼóop. Maríaeʼ maʼ u yojel kaʼachiʼ, pero Angelaeʼ ku yuʼubik le xook ku tsʼáaik tiʼ Andreaoʼ. Junpʼéel kʼiin túuneʼ Angelaeʼ tu yaʼalaj tiʼ Andrea ka presentartak tiʼ María utiaʼal ka tsʼaʼabak xook tiʼ. Angelaeʼ jach uts tu yich le baʼax ku kanikoʼ, ka máan junpʼéel meseʼ tu kanaj yaʼab tekstoʼob de memoriail. Tsʼoʼoleʼ taakchaj u xook cuatro u téenel tiʼ junpʼéel semana. Angelaeʼ yéetel u yáantaj  Andreaeʼ káaj u yuʼubik le reuniónoʼob tiʼ videoconferenciaoʼ.

Le ka tu yojéeltaj María de ke Josué, u yíicham Kristi, ku pʼáatal naatsʼ teʼ tuʼux ku yúuchul xookoʼ, tu kʼáatajtiʼ wa jeʼel u xook xaneʼ. Josuéeʼ tu yaʼalaj: «Maʼ, chéen yaan in wuʼuyik baʼax ka waʼalikeʼex. Maʼ in kʼáat ka a kʼáatten mix baʼaliʼ wa ka beetkeʼ kin bin». Mix cinco minutos káajak u xookoʼobeʼ maas yaʼab le preguntaʼob tu beetaj Josué ke Kristioʼ ka túun tu yaʼalaj jeʼel u yóotik ka tsʼaʼabak xook tiʼeʼ.

Chéen yéetel le pregunta tu beetaj Maríaoʼ káaj u xook yaʼab máakoʼob. Letiʼeʼ tu yilaj ka tsʼaʼabak xook tiʼob tumen jejeláas sukuʼunoʼob. Tuláakal le máakoʼob káaj u xookoʼob yéetel Maríaoʼ 28 u túulaloʼob yéetel tiʼ cuatro luʼumil u taaloʼob.

Jasmin, le yáax j-xoknáal t-chʼaʼchiʼitajoʼ okjaʼanaj abril tiʼ 2021. Kristieʼ okjaʼanaj mayo tiʼ 2022 yéetel suunaj Filipinas utiaʼal u yantal yéetel u familia. Le uláakʼ kaʼatúul j-xoknáaloʼob presentartaʼab tiʼ María tumen Kristioʼ tsʼoʼok xan u yokjaʼob. Angelaeʼ maʼ xáanchaj xan ka okjaʼanajiʼ, bejlaʼeʼ precursora regular. Josué, u yíicham Kristi, yéetel Andrea, u hijaeʼ, bey xan le uláakʼ j-xoknáaloʼoboʼ táan u progresaroʼob.

Teʼ yáax siglo xanoʼ le máakoʼoboʼ tu tsikbaltoʼob tiʼ u láakʼtsiloʼob bey xan tiʼ u amigoʼob u tʼaan Dios (Juan 1:​41, 42a; Hech. 10:​24, 27, 48; 16:​25-33). Maʼ xaaneʼ jeʼel u páajtal a kʼáatik tiʼ a j-xoknáaloʼob yéetel tiʼ le máaxoʼob ka xíimbaltik: «¿Yaan wa máax a kʼaj óol taak u kaanbal tiʼ le Bibliaoʼ?». Maʼ xaaneʼ chéen yoʼolal le chan preguntaaʼ jeʼel u páajtal a káajsik yaʼab xookoʼobeʼ.