In papá yéetel in maamaeʼ jach católicoʼob kaʼachi. Pero le ka tu kanoʼob teʼ Biblia bix u kʼaabaʼ Diosoʼ tu kaʼatúulaloʼob tu beetubaʼob u testigoʼob Jéeoba. In papáeʼ xuʼul u póolik u imágeniloʼob Jesús, tsʼoʼoleʼ como carpinteroeʼ tu yutskíintaj le cuarto yaan kabal utiaʼal ka beetaʼak le reuniónoʼoboʼ. Letiʼe yáax Salón anchaj San Juan del Monteoʼ, lelaʼ junpʼéel chan kajtalil yaan Manila, u noj kaajil Filipinas.

Síijen tu añoil 1952. Cuatro kaʼach in sukuʼunoʼob yéetel óoxtúul in kiikoʼob. In papáʼobeʼ jach maʼalob úuchik u kaʼanskoʼobtoʼon baʼax ku yaʼalik le Bibliaoʼ. Jeʼex u bin in nojochtaloʼ in papáeʼ ku yaʼalikten ka in xok junpʼéel u capítuloil le Biblia sáamsamaloʼ, tsʼoʼoleʼ t-múul xokaj xan yaʼab publicaciónoʼob. In papáʼobeʼ yaan kʼiineʼ tu invitartoʼob le superintendenteʼob tiʼ circuito utiaʼal ka pʼáatkoʼob t-otochoʼ bey xan le betelitaʼoboʼ. Jach ku kiʼimaktal k-óol le kéen k-uʼuy u tsikbaltik u experiencia le sukuʼunoʼobaʼ, leloʼ tu yáantoʼon utiaʼal ka k-tsʼáa táanil Jéeoba ichil k-kuxtal.

Jach maʼalob le ejemplo tu tsʼáajten in papáʼoboʼ. Tu añoil 1971, in maamaeʼ kʼojaʼanchajeʼ ka kíimi, teen yéetel in papáeʼ káaj k-beetik k-precursoril. Pero tu añoil 1973, le yaanten 20 añosoʼ, kíim xan in papá. Le ka kíimoʼobeʼ jach tin wuʼuyinba chéen tin juunal. Pero le esperanza ku yaʼalik le Bibliaoʼ tu yáanten utiaʼal maʼ in sen chiʼichnaktal bey xan utiaʼal ka pʼáatken naatsʼ tiʼ Jéeoba (Heb. 6:19). Le maʼ úuch kíimik in papáoʼ tin waʼalaj jeʼel in bin in beet in precursor especialil tu náanach islail Coron, tu estadoil Palawan.

Kʼuchen tu islail Coron le yaanten 21 añosoʼ. Teneʼ líikʼen tiʼ junpʼéel nojoch kaaj, le beetik jelaʼan tin wilil in kʼuchul tiʼ junpʼéel lugar tuʼux óoliʼ minaʼan corriente, jaʼ, cocheʼob mix motoʼobiʼ. Kex yaan kaʼach jujuntúul sukuʼunoʼobeʼ minaʼan mix juntúul precursoriʼ,  le oʼolal yaan kʼiineʼ chéen tin juunal kin jóokʼol kʼaʼaytaj. Teʼ yáax mesoʼ jach tin tuklaj in familia yéetel in amigoʼob, de áakʼab le kéen in pakt le kaʼanoʼ ku yáalal u jaʼil in wichoʼob, ku taaktal kaʼach in xúumpʼattik in asignación utiaʼal ka suunaken tin wotoch.

Le kéen in wuʼuyinba tin juunaleʼ kin jeʼekʼabtik in puksiʼikʼal tiʼ Jéeoba. Kin kʼaʼajsik xan le baʼaxoʼob tsʼoʼok in xokik teʼ Biblia yéetel teʼ publicaciónoʼoboʼ. Junpʼéel teksto mantatsʼ tin kʼaʼajseʼ Salmo 19:14 úuchik in beetik beyoʼ tin tsʼáaj cuentaeʼ wa kin tuukul tiʼ baʼaxoʼob uts tu tʼaan Jéeoba yéetel tiʼ u jatsʼuts modoseʼ yaan in wilkeʼ letiʼeʼ bey jeʼex ‹junpʼéel nuxiʼ tuunich tuʼux jeʼel in taʼakikinbaeʼ, yéetel in Salvador›. Jach tu yáanten xan junpʼéel u xookil le revista Le Máax ku Kananoʼ, lelaʼ tu kʼaabaʼtaj «Usted nunca está solo». a Jach yaʼab u téenel tin xokaj. Le kéen in xok kaʼacheʼ kin wuʼuyik tiaʼan Jéeoba tin wéeteleʼ. Leloʼ tu yáanten utiaʼal in orar, in xakʼalxook, bey xan utiaʼal in tuukul.

Le maʼ úuch kʼuchken Coronoʼ tsʼaʼab in beet in ancianoil. Como chéen teen u ancianoileʼ káaj in nuʼuktik le Escuela utiaʼal k-Kaʼansik u Tʼaan Diosoʼ, u Muchʼtáambalil Kʼaʼaytaj, u Xookil Libro teʼ Múuchʼuliloʼ yéetel u Xookil le revista Le Máax ku Kananoʼ. Tsʼoʼoleʼ cada semana kin máansik le discurso utiaʼal tuláakal máakoʼ. Teʼ kʼiinoʼob jeʼeloʼ mix tiempo yaanten utiaʼal in wuʼuyikinba chéen tin juunal.

Jach yaʼab utsil tu taasaj le kʼaʼaytaj tin beetaj Coronoʼ. Jujuntúul tiʼ in j-xoknáaloʼobeʼ okjaʼanajoʼob, chéen baʼaleʼ yaan baʼaloʼob xan tin aktáantaj. Por ejemploeʼ yaan kʼiineʼ ku bisikten kaʼach medio día in xíimbal utiaʼal in kʼuchul teʼ territoriooʼ, tsʼoʼoleʼ maʼ in wojel tuʼux kin kʼuchliʼ mix tuʼux kin weenliʼ. Tu territorio le múuchʼuliloʼ yaan kaʼach yaʼab mejen islaʼobiʼ. Tiʼ lancha kin bin kaʼach teʼ mejen islaʼobaʼ, yéetel u suukileʼ jach kʼaʼam le iikʼoʼ. Jach kin sajaktal tumen maʼ in wojel báabiʼ. Kex yaʼab baʼaxoʼob tiʼ aktáanteʼ Jéeobaeʼ mantatsʼ tu kanáanten. Ka máan kʼiineʼ tin tsʼáaj cuentaeʼ Jéeobaeʼ táan kaʼach u prepararken utiaʼal le asignaciónoʼob maas difíciltakoʼob kun antaltenoʼ.

Tu añoil 1978, túuxtaʼaben áantaj Papúa Nueva Guinea, lelaʼ tiaʼan tu xamanil Australiaeʼ. Teʼ luʼumilaʼ jach yaʼab montañaʼob yaniʼ, tsʼoʼoleʼ casi igual u nojchil yéetel España. Jach jaʼakʼ in wóol ka tin wojéelteʼ le tres millones máakoʼob kajaʼanoʼob teʼeloʼ ku tʼankoʼob maas tiʼ 800 idiomaʼob. U maʼalobileʼ u maas yaʼabil tiʼ le máakoʼoboʼ ku tʼankoʼob pidgin de Nueva Guinea, kʼaj óolaʼan xan bey tok pisineʼ.

Yáaxeʼ asignartaʼaben tiʼ junpʼéel múuchʼulil ich inglés tu kaajil Port Moresby. Pero despuéseʼ máanen áantaj tiʼ junpʼéel múuchʼulil tuʼux ku tʼaʼanal tok pisin, tin chʼaʼaj junpʼéel curso utiaʼal in kanik le idiomaoʼ. Tuláakal le baʼax kin kanik teʼ cursooʼ ku meyajten kéen jóokʼken kʼaʼaytaj, leloʼ tu yáanten utiaʼal in maas séeb kanik le idiomaoʼ. Maʼ xáanchaj ka páajchaj in máansik junpʼéel discurso utiaʼal tuláakal máak ich tok pisiniʼ. Jach kiʼimakchaj in wóol tumen mix junpʼéel año kʼuchken Papúa Nueva Guinea ka tsʼaʼab in beet in superintendenteil tiʼ circuito utiaʼal ka in wáant le múuchʼuliloʼob ku tʼankoʼob tok pisinoʼ.

Le múuchʼuliloʼoboʼ jach náach yaniloʼob kaʼachi. Le oʼolal kʼaʼabéetchaj in nuʼuktik yaʼab asambleaʼob tiʼ circuito yéetel in sen viajar. Tu káajbaleʼ chéen tin juunal in wuʼuyikinba tumen maʼ in kʼaj óol le luʼumiloʼ, le idioma ku tʼaʼanloʼ mix le baʼaxoʼob suuk u  beetaʼaloʼ. Tsʼoʼoleʼ maʼ tu páajtal kaʼach in viajar tiʼ carretera tumen maʼ maʼalob le bejoʼoboʼ yéetel jach yaʼab montañaʼob yaniʼ. Óoliʼ cada semana viajarnajen tiʼ avión. Yaan kʼiineʼ chéen teen ku bisken junpʼéel úuchben avioneta. Jach tu chiʼichnakkúunten le viajeʼobaʼ jeʼex u yúuchulten kaʼach le kéen viajarnaken tiʼ lanchaoʼ.

Chéen junpʼíit máakoʼob yaan u teléfonoʼob kaʼachi, le oʼolal carta kin túuxtik tiʼ le múuchʼuliloʼoboʼ. Chéen baʼaleʼ yaʼab u téeneleʼ yáax teen kin kʼuchul tiʼ le cartaʼoboʼ. Le beetik le kéen kʼuchken teʼ lugaroʼ kin kʼáatik tiʼ le máakoʼob tuʼux kajaʼan le Testigoʼoboʼ. Cada ken kʼuchken yiknal le sukuʼunoʼoboʼ ku kʼamkenoʼob yéetel yaabilaj, leloʼ ku beetik u valer u penail tuláakal le baʼax kin beetik utiaʼal in bin in wiloʼoboʼ. Tiʼ tuláakal le baʼaxoʼob tin aktáantoʼ tin tsʼáaj cuentaeʼ Jéeobaeʼ mantatsʼ tu kanáanten, leloʼ tu beetaj in maas biskinba tu yéetel.

Le yáax ka binen tu islail Bougainvilleoʼ tin wilaj juntúul máak yéetel u yataneʼ táan u cheʼejoʼob, náatsʼoʼob tin wiknaleʼ ka tu yaʼaloʼob: «¿Kʼajaʼantech wa máaxoʼoniʼ?». Ka túun kʼaʼajteneʼ kʼaʼaytajnajentiʼob le ka binen Port Moresbyoʼ. Káaj in tsʼáaik xook tiʼob, pero despuéseʼ tin waʼalaj tiʼ juntúul sukuʼun kajaʼan teʼ lugar ka u tsʼáa xook tiʼoboʼ. ¡Beoraaʼ tu kaʼatúulaloʼob tsʼoʼok u yokjaʼob! Lelaʼ chéen junpʼéel tiʼ le yaʼab bendiciónoʼob tin kʼamaj tiʼ le tres años tin beetaj Papúa Nueva Guineaoʼ.

Antes in lukʼul Coron tu añoil 1978, tin kʼaj óoltaj juntúul kiik jach kiʼichpan yéetel jach x-meeyjil ku kʼaabaʼtik Adel. Le táan kaʼach u beetik u precursora regulariloʼ tu líiʼsaj kaʼatúul u paalal, Samuel yéetel Shirley. Tsʼoʼoleʼ táan xan kaʼach u kanáantik u maama tsʼoʼok u chʼíijil. Mayo tiʼ 1981, suunajen Filipinas utiaʼal u tsʼoʼokol in beel yéetel Adel. Le ka tsʼoʼok k-beeleʼ t-beetaj k-precursoril yéetel t-múul kanáantaj k-familia.

Kex beora yaan in familiaaʼ tu añoil 1983, tsʼaʼab in beet tu kaʼatéen in precursor especialil, ka túun túuxtaʼaben tu islail Linapacan, tu estadoil Palawan. Tuláakal k-familiaeʼ bin teʼ islaoʼ, teʼeloʼ minaʼan kaʼach mix juntúul Testigoiʼ. Junpʼéel año kʼuchkoʼoneʼ ka kíim u maama Adel. Jach yaachaj k-óol, pero tu yáantoʼon k-tsʼáaik k-óol teʼ kʼaʼaytajoʼ. Yaʼabchaj le máaxoʼob k-tsʼáaik xook tiʼoboʼ yéetel taakchaj xan u binoʼob reunión tu islail Linapacan. Yoʼolal leloʼ maʼ xáanchajeʼ kʼaʼabéetchaj junpʼéel lugar utiaʼal k-muchʼikba, ka túun t-beetaj junpʼéel chan salón utiaʼal ka beetaʼak le reuniónoʼoboʼ. Kex chéen tres años kʼuchkoʼon teʼ islaoʼ tu chukaj 110 máakoʼob teʼ Kʼaʼajsajiloʼ. Yaʼab tiʼ letiʼobeʼ okjaʼanajoʼob le tsʼoʼok k-lukʼloʼ.

Tu añoil 1986, túuxtaʼaben áantaj tu islail Culion. Teʼeloʼ yaan kaʼach yaʼab máakoʼob kʼojaʼanoʼob yéetel lepra. Maʼ xáanchajeʼ Adeleʼ tsʼaʼab xan u beet u precursora especialil. Tu káajbaleʼ saajkoʼon kʼaʼaytaj tiʼ le máakoʼoboʼ tumen kʼaschajaʼan u wíinkliloʼob yoʼolal le lepraoʼ. Chéen baʼaleʼ le sukuʼunoʼob kajaʼanoʼob teʼ lugaroʼ tu yaʼaloʼobtoʼoneʼ tsʼoʼok u tsʼaʼabal tratamiento tiʼ le máakoʼoboʼ, le oʼolal maʼ tu jáan pakʼikoʼob tiʼ máak le kʼojaʼaniloʼ. Jujuntúul tiʼ le máaxoʼob kʼojaʼanoʼoboʼ ku binoʼob kaʼach reunión tu yotoch juntúul kiik. Maʼ xáanchaj ka jatsʼutschaj k-ilik k-tsikbaltik tiʼ le máakoʼob le baʼax ku yaʼalik le Bibliaoʼ. Letiʼobeʼ pʼektaʼanoʼob kaʼach tumen u  maasil, le oʼolal uts t-tʼaan k-ilik bix u kiʼimaktal u yóoloʼob le kéen u kanoʼob yaan u kʼuchul u kʼiinil u yutstaloʼob (Luc. 5:​12, 13).

¿Baʼax áant k-paalal utiaʼal u suuktaloʼob teʼ islaoʼ? Teen yéetel Adeleʼ t-invitartaj kaʼatúul kiikoʼob coroniloʼob utiaʼal ka xiʼikoʼob teʼ isla t-éeteloʼ. Letiʼobeʼ jach áantajnajoʼob utiaʼal maʼ u yuʼubikuba k-paalal chéen tu juunaloʼob. Le kaʼatúul kiikoʼob bey xan Samuel yéetel Shirleyeʼ jach uts tu tʼaanoʼob kaʼach u kaʼansajoʼob. Letiʼobeʼ tu tsʼáajoʼob xook tiʼ yaʼab mejen paalal, yéetel toʼoneʼ t-tsʼáaj xook tiʼ u papáʼob le mejen paalaloʼoboʼ. Kʼuch u kʼiinileʼ k-tsʼáaik xook tiʼ 11 familiaʼob. Le j-xoknáaloʼobaʼ jach séeb úuchik u natsʼkubaʼob tu yiknal Jéeoba, le oʼolal séeb xan úuchik u formar junpʼéel múuchʼuliliʼ.

Tu káajbaleʼ chéen teen u ancianoil. Le oʼolal u najil Beteleʼ tu yaʼalajten ka in nuʼukt le reuniónoʼob utiaʼal le ocho publicadoroʼob yaan Culionoʼ, bey xan utiaʼal le nueve publicadoroʼob yaan tu kaajil Marilyoʼ. Le kaajaʼ kex tres horas u viajeil tiʼ barco. Kéen tsʼoʼokok le reuniónoʼoboʼ tuláakal k-familiaeʼ ku xíimbal yaʼab horaʼob ich montañaʼob utiaʼal k-bin tiʼ junpʼéel kaaj ku kʼaabaʼtik Halsey, teʼeloʼ k-tsʼáaik kaʼach yaʼab xookoʼobiʼ.

Ka máan kʼiineʼ yaʼab tiʼ le máakoʼob kajaʼanoʼob Marily yéetel Halseyoʼ ookoʼob ichil u kaajal Jéeoba. Le oʼolal t-beetaj Salónoʼob xaniʼ. Jeʼex úuchik Linapacaneʼ le sukuʼunoʼob yéetel le máaxoʼob ku binoʼob reuniónoʼ tu tsʼáajoʼob le baʼaxoʼob kʼaʼabéetoʼ yéetel áantajnajoʼob xan utiaʼal u beetaʼal. Le lugar tuʼux k-muchʼikba beetaʼab Marilyoʼ ku bisik kaʼach 200 máakoʼob, tsʼoʼoleʼ ku páajtal u maas nojochtal, le oʼolal ku beetaʼal kaʼach asambleaʼobiʼ.

Tu añoil 1993, tsʼoʼok kaʼach u nuuktal k-paalal. Teen yéetel Adeleʼ káaj k-beetik k-circuitoil Filipinas. Teʼ año 2000 xanoʼ binen teʼ Escuela de Entrenamiento Ministerialoʼ utiaʼal ka in kan bix ken in tsʼáa xook teʼ escuelaoʼ. Kin tuklik kaʼacheʼ maʼ tin tsaʼayal, pero Adeleʼ mantatsʼ tu líiʼsaj in wóol, tu kʼaʼajsajteneʼ Jéeobaeʼ yaan u yáantken utiaʼal ka in beet le meyajaʼ (Fili. 4:13). Adeleʼ u yojel de ke beyoʼ tumen letiʼeʼ kex kʼojaʼaneʼ táan kaʼach u tsʼáaik u yóol u beet le meyaj kʼubéentaʼantoʼonoʼ.

 Tu añoil 2006 le táan kaʼach in beetik in instructoriloʼ, Adeleʼ aʼalaʼab yaan junpʼéel kʼojaʼanil tiʼ ku kʼaabaʼtik párkinson. Jach jaʼakʼ k-óol ka t-ojéeltaj. Tin waʼalajtiʼ ka k-pʼat k-asignación utiaʼal ka in kanáante, pero Adeleʼ tu yaʼalaj: «Maas kaxt juntúul doctor utiaʼal ka u yáanten. In wojel Jéeobaeʼ yaan u yáantkoʼon utiaʼal ka seguernakoʼon t-asignación». Adeleʼ seis años maas páajchaj u meyajtik Jéeoba, letiʼeʼ mix juntéen tu quejartuba. Le ka pʼáat maʼ tu páajtal u xíimbaleʼ tiʼ silla de ruedas ku jóokʼol kʼaʼaytaj, le ka pʼáat maʼ tu jach tʼaaneʼ ku comentar chéen yéetel junpʼéel wa kaʼapʼéel tʼaanoʼob teʼ reuniónoʼoboʼ. Tak le ka kíim tu añoil 2013, Adeleʼ mantatsʼ kaʼach ku túuxtaʼaltiʼ mensajeʼob tumen le sukuʼunoʼob yéetel le kiikoʼoboʼ utiaʼal u yaʼalaʼaltiʼ jach maʼalob le ejemplo ku tsʼáaikoʼ. Maas tiʼ 30 años tsʼokaʼan in beel tu yéetel, letiʼeʼ juntúul koʼolel jach uts yéetel tu kʼubaj u yóol tiʼ Jéeoba. Le oʼolal le ka kíimoʼ jach yaachaj in wóol yéetel tin wuʼuyinba tu kaʼatéen chéen tin juunal.

Adeleʼ u kʼáat kaʼach ka seguernak in beetik le meyajaʼ, bey xan tin beetiloʼ. Leloʼ tu yáanten utiaʼal maʼ in wuʼuyikinba chéen tin juunal. Tu año 2014 tak 2017, aʼalaʼabten ka xiʼiken in xíimbalt le múuchʼuliloʼob tuʼux ku tʼaʼanal tagalo teʼ lugaroʼob tuʼux maʼ tu chaʼabal u meyajtaʼal Jéeobaoʼ. Ka tsʼoʼokeʼ binen in xíimbalt le múuchʼuliloʼob tuʼux xan ku tʼaʼanal tagalo tu luʼumiloʼob Taiwán, Estados Unidos yéetel Canadáoʼ. Tu añoil 2019, tin beetaj in instructoril teʼ Escuela utiaʼal Máaxoʼob Kʼaʼaytik le Reino ich inglésoʼ tu luʼumiloʼob India yéetel Tailandia. Jach kiʼimakchaj in wóol le táan in beetik le meyajoʼobaʼ. Tsʼoʼok in tsʼáaik cuentaeʼ wa jach in kʼubmaj in wóol in meyajt Jéeobaeʼ maas ku kiʼimaktal in wóol.

Tiʼ tuláakal le asignaciónoʼob yanchajtenoʼ kʼuchen in yaabilt le sukuʼunoʼob yéetel le kiikoʼoboʼ, le oʼolal maʼ chéen chʼaʼabil in lukʼliʼ. Pero teʼ súutukiloʼob beyoʼ tin kanaj confiar tiʼ Jéeoba. Le áantaj tu tsʼáajtenoʼ tu yáanten utiaʼal ka in kʼam jeʼel baʼaxak kʼexil ka yanak ichil in kuxtaleʼ. Bejlaʼeʼ táan in beetik in precursor especialil Filipinas. Tsʼoʼok in suuktal teʼ múuchʼuliloʼ letiʼobeʼ jach u yaabiltmenoʼob yéetel kin wilkoʼob bey in familiaeʼ. Jach ku kiʼimaktal in wóol in wilik xan bix Samuel yéetel Shirleyeʼ jach yaan u fejoʼob jeʼex u maamaʼobeʼ (3 Juan 4).

Jach yaʼab baʼaxoʼob tsʼoʼok in aktáantik ichil in kuxtal. Jeʼex le ka tin wilaj u sufrir tak ka kíim in watan yoʼolal le kʼojaʼanil yanchajtiʼoʼ. Tsʼoʼok xan in suuktal teʼ túumben asignación tsʼaʼabtenoʼ. Tsʼoʼok in wilkeʼ Jéeobaeʼ «maʼ náach yanil tiʼ máakiʼ» (Hech. 17:27). ‹U kʼab letiʼeʼ› ku páajtal u yáantik le máaxoʼob meyajtik kex tiaʼanoʼob tiʼ náanach lugaroʼoboʼ (Isa. 59:1). Jéeobaeʼ bey junpʼéel Nojoch Tuunicheʼ, letiʼeʼ tiaʼan tin wéeteleʼ jach kin tsʼáaik u graciasil tumen mix juntéen tu pʼaten.