In papáeʼ juntúul tiʼ u nojchiloʼob kaʼach le Iglesia Unida yaan Canadáoʼ. Le beetik cada domingo de tempranoeʼ ku túuxtikoʼon yéetel in wíitsʼin teʼ tuʼux ku kaʼansaʼal chéen paalaloʼob yéetel le Bibliaoʼ. Láas 11, k-múul bin templo tu yéetel. Tsʼoʼoleʼ de tardeeʼ k-láakʼintik in maama teʼ reunión ku beetik le Testigoʼoboʼ. Bey úuchik k-tsʼáaik cuenta maʼ igual le kaʼapʼéel religiónoʼobaʼ.

In maamaeʼ jach maʼalob kaʼach u biskuba yéetel Bob Hutcheson bey xan yéetel Marion, u yatan, le oʼolal tu tsikbaltajtiʼob le baʼax táan u kanikoʼ. Ka máan kʼiineʼ letiʼobeʼ tu beetubaʼob xan u testigoʼob Jéeoba. Tu añoil 1958, Bob yéetel u yataneʼ tu bisenoʼob yéetel u yóoxtúul paalal teʼ Asamblea Internacional beetaʼab Nueva Yorkoʼ. Le asambleaoʼ xáanchaj ocho días yéetel tu kʼaabaʼtaj «Voluntad Divina». Beoraaʼ kin tsʼáaik cuenta maʼ chéen chʼaʼabil úuchik u biskenoʼob tu paachoʼobiʼ, pero jach kin apreciartik le baʼax tu beetoʼoboʼ tumen jach jatsʼutschaj le asambleaoʼ.

Tin paalileʼ kajaʼanoʼon kaʼach tuʼux sen yaan baʼalcheʼob yéetel jach uts tin tʼaan in kanáantkoʼob, le oʼolal jach taak kaʼach in xokik in veterinarioil. In maamaeʼ tu tsikbaltaj tiʼ juntúul anciano le baʼax taak in beetkoʼ. Letiʼ túuneʼ tʼaanaj tin wéeteleʼ ka tu kʼaʼajsajten yéetel yaabilaj kuxaʼanoʼon «tu tsʼook kʼiinoʼob», tsʼoʼoleʼ tu kʼáatajten bix in tuklik jeʼel u afectartik in meyajtik Jéeoba wa kin bin yaʼab años xook  universidadeʼ (2 Tim. 3:1). Tuukulnajen tiʼ le baʼax tu yaʼaloʼ ka tin chʼaʼtuklaj maʼ in bin.

Pero maʼ in wojel kaʼach baʼax ken in beet le kéen tsʼoʼokok in xokik in preparatoriaiʼ. Cada fin de semana kin jóokʼol kʼaʼaytaj kaʼachi, pero u jaajileʼ maʼ jach uts tin tʼaaniʼ. Le oʼolal kin tuklik maʼ tu páajtal kaʼach in beetik in precursoril. Tsʼoʼoleʼ in papá yéetel in tíoeʼ maʼ Testigoʼobiʼ, letiʼobeʼ u kʼáatoʼob kaʼach ka meyajnaken bul semana tiʼ junpʼéel empresa yaan tu kaajil Toronto. In tíoeʼ nojoch puesto yaan tiʼ kaʼach teʼ empresaoʼ, le oʼolal tu tsʼookeʼ tin kʼamaj le meyajoʼ.

Jach yaʼab horas extras kin meyaj teʼ empresaoʼ, tsʼoʼoleʼ bul kʼiin yanen yéetel máakoʼob maʼ Testigoʼobiʼ. Yoʼolal leloʼ xuʼul in tsʼáaik in wóol in meyajtik Jéeoba. Teʼ kʼiinoʼob jeʼeloʼ yiknal in abuelo kajaʼanen, letiʼeʼ maʼ Testigoiʼ, le oʼolal ka kíimeʼ kʼaʼabéetchaj in kaxtik tuʼux in bin kajtal.

Bob yéetel Marion, le máaxoʼob tu bisenoʼob asamblea tu añoil 1958, tin wiloʼob bey in taataʼobeʼ. Letiʼobeʼ tu yaʼaloʼobten ka xiʼiken kajtal tu yéeteloʼob yéetel tu yáantenoʼob utiaʼal ka muʼukʼaʼanchajak in fe. Tu añoil 1960, igual úuchik in wokjaʼ yéetel John, juntúul tiʼ u hijoʼob. Johneʼ káaj u beetik u precursor regularil, le oʼolal taakchaj xan in maas tsʼáaik in wóol kʼaʼaytaj. Le sukuʼunoʼoboʼ tu yiloʼob bix in progresar ichil u kaajal Jéeoba, ka máan kʼiineʼ tsʼaʼab in wil le Escuela utiaʼal k-Kaʼansik u Tʼaan Diosoʼ. a

Tu añoil 1966, tsʼoʼok in beel yéetel Palmer Berge, juntúul precursora jach taak u bin áantaj tuʼux kʼaʼabéet. Le superintendente tiʼ circuito xíimbaltikoʼonoʼ tu yojéeltaj le baʼax taak k-beetkoʼ ka tu yaʼalajtoʼon ka xiʼikoʼon áantaj tu múuchʼulil Orillia (Ontario). ¡T-láaj tsʼapaj k-nuʼukuloʼobeʼ ka binoʼon!

Le ka kʼuchoʼon Orilliaeʼ, tin beetaj in precursoril yéetel tin chʼaʼtuklaj in maas maʼalobkíintik bix in kaʼansaj tumen jach jatsʼuts in wilik bix u beetik kaʼach Palmer. Jach kiʼimakchaj in wóol úuchik u meyajten le Biblia utiaʼal in wáantik le máakoʼob u natsʼubaʼob tu yiknal Diosoʼ. Tsʼoʼoleʼ jach jatsʼuts xan t-ilil úuchik k-áantik juntúul máak yéetel u yatan utiaʼal u kʼubik u kuxtaloʼob tiʼ Jéeoba.

Juntéenjeak le ka binen Torontoeʼ tin kʼaj óoltaj Arnold MacNamara, juntúul sukuʼun ku meyaj Betel. Letiʼeʼ tu kʼáatajten wa jeʼel k-beetik k-precursor especialileʼ. Maʼ tin tuklaj kaʼatéeniʼ, tin waʼalajtiʼ: «¡Jeʼeleʼ, pero maʼ túuxtikoʼon Quebec!». Teneʼ kin tuukul kaʼach jeʼex le máakoʼob tʼanik inglés kajaʼanoʼob Canadáoʼ, letiʼobeʼ u pʼekmoʼob le máaxoʼob kajaʼanoʼob Quebec ku tʼankoʼob le idioma francésoʼ. Teʼ kʼiinoʼob jeʼeloʼ le máakoʼoboʼ táan kaʼach u beetkoʼob protestaʼob tu contra le gobiernooʼ tumen u kʼáatoʼob ka pʼáatak independienteil Quebec.

Arnoldeʼ tu yaʼalajten: «Chéen tu kaajil Quebec táan u túuxtaʼal precursor especialoʼob». Teen túuneʼ tin waʼalaj jeʼel k-bineʼ tumen in wojel Palmereʼ deporsi taak kaʼach u bin áantajiʼ. Ka máan kʼiineʼ tin tsʼáaj cuentaeʼ jach maʼalob úuchik k-biniʼ.

Teen yéetel Palmereʼ t-chʼaʼaj junpʼéel curso xáanchaj cinco semanas utiaʼal k-kanik francés. Ka tsʼoʼokeʼ juntúul sukuʼun yéetel u yataneʼ túuxtaʼaboʼob t-éetel tu kaajil Rimouski, le lugaraʼ kex 540 kilómetros pʼaatal tu xaman-lakʼinil Montreal. Chéen baʼaleʼ maʼ jach séeb tin kanil in tʼan francésiʼ, lelaʼ jach chíikpaj le ka tin xokaj jujunpʼéel anuncioʼob teʼ reuniónoʼ. Tin waʼaleʼ yaan u yantal asamblea tuláakʼ semanaoʼ, pero tu lugar in waʼalik «yaan u kʼuchul yaʼab sukuʼunoʼob austriailoʼobeʼ» tin waʼalaj yaan u kʼuchul «yaʼab avestruzoʼob».

Le tiaʼanoʼon Rimouskioʼ le familia Huberdeauoʼ tu rentartoʼob junpʼéel naj yaan siete u cuartosil, teʼeloʼ tiʼ kajaʼan kaʼach le sukuʼun yéetel u yatanoʼ, kaʼatúul u hijaʼob, uláakʼ sukuʼun yéetel u yataniʼ, cuatro kiikoʼob maʼ tsʼokaʼan u beeloʼobiʼ bey xan teen yéetel Palmer. Ichil tuláakloʼon k-boʼotik kaʼach le rentaoʼ. Jeʼel u páajtal k-aʼalikeʼ teʼ najoʼ kajaʼan 12 wa 14 máakoʼobiʼ. Como teen yéetel Palmer precursor especialoʼon kaʼacheʼ ku káajal k-kʼaʼaytaj desde temprano hasta kéen áakʼabchajak. Jach k-agradecertik tiʼ le sukuʼunoʼoboʼ tumen mix juntéen tu pʼatoʼon t-juunal, letiʼobeʼ ku láakʼintikoʼonoʼob kʼaʼaytaj kex jach táaj keʼel yéetel éeʼjochʼeʼen.

Jach maʼalob k-bisikba kaʼach yéetel le precursoroʼoboʼ. Suuk kaʼach k-tʼabik kʼáakʼ utiaʼal k-kʼíich yéetel k-tsikbal. Tsʼoʼoleʼ k-jóoʼsmaj xan junpʼéel kʼiin utiaʼal k-beetik pierogis, lelaʼ bey junpʼéel empanadaeʼ yéetel jeʼel u páajtal u tsʼáaik máak jeʼel baʼaxak tu tsʼuʼeʼ. Juntúul tiʼ le sukuʼunoʼoboʼ u yojel paax, le oʼolal suukchaj k-muchʼikba sábado de áakʼab utiaʼal k-kʼaay yéetel k-óokʼot.

Jach kiʼimakchaj k-óol ka káaj u yantal Testigoʼob tu kaajil Rimouski. Ich cinco añoseʼ okjaʼanaj yaʼab j-xoknáaloʼob yéetel anchaj 35 publicadoroʼobiʼ.

Tu yáantoʼon k-maas maʼalobkíint k-kaʼansaj úuchik k-bin Quebec. T-ilaj bix u yáantkoʼon Jéeoba teʼ kʼaʼaytajoʼ yéetel bix u tsʼáaiktoʼon tuláakal baʼax kʼaʼabéettoʼon. Tsʼoʼoleʼ t-yaabiltaj u kajnáaliloʼob Quebec bey xan le idioma francésoʼ. Leloʼ tu yáantoʼon utiaʼal k-jeʼekʼabtik k-puksiʼikʼal tiʼ le máaxoʼob yaanal tuʼux u taaloʼoboʼ yéetel yaanal idioma ku tʼankoʼoboʼ (2 Cor. 6:13).

Ka máan kʼiineʼ kʼáataʼabtoʼon wa jeʼel k-bin áantaj Tracadieeʼ, lelaʼ junpʼéel kaaj yaan tu lakʼinil Nueva Brunswick. ¡Jach maʼ táan k-páaʼtik kaʼachiʼ! Tumen táant u tsʼoʼokol k-firmartik junpʼéel contrato utiaʼal k-alquilartik junpʼéel najeʼ, tsʼoʼoleʼ táan kaʼach in meyaj bey maestro wa jaypʼéel horaʼob tiʼ junpʼéel escuelaeʼ. Yéetel yaan tiʼ le máaxoʼob k-tsʼáaik xook tiʼoboʼ táant kaʼach u beetkubaʼob publicadoroʼobeʼ yéetel táan k-bin áantaj kaʼach construcción. Jach maʼ chéen chʼaʼabil t-ilil k-chʼaʼtuklik baʼax ken k-beetiʼ.

Sen orarnajoʼon utiaʼal k-ilik baʼax ken k-beete. Ka binoʼon Tracadieeʼ t-ileʼ jelaʼan tiʼ u kaajil Rimouski. Pero t-aʼaleʼ wa Jéeoba aʼaliktoʼon ka xiʼikoʼoneʼ yaan  k-biniʼ. Toʼoneʼ t-tsʼáaj a pruebail Jéeoba yéetel t-ilaj bix u bendecirkoʼon (Mal. 3:10). Jeʼex suukileʼ Palmereʼ jach tu yáanten utiaʼal maʼ u difíciltalten in wilik k-bin kajtal yaanal tuʼux, letiʼeʼ espiritual, maʼatech u quejarkuba yéetel mantatsʼ kiʼimak u yóol.

Tu kaajil Tracadieeʼ chéen sukuʼun Robert Ross ku meyaj bey ancianoeʼ. Letiʼ yéetel Linda, u yataneʼ, binoʼob áantaj bey precursoroʼobeʼ. Chéen baʼaleʼ le ka anchaj u yáax hijoʼobeʼ tu chʼaʼtukloʼob u pʼáatloʼob kajtaliʼ. Kex jach yaʼab meyaj ku beetkoʼob utiaʼal u líiʼskoʼob u chan hijoʼobeʼ, jach tu líiʼsoʼob k-óol tumen suuk u invitarkoʼonoʼob tu yotochoʼob yéetel jach u tsʼaamaj u yóoloʼob kʼaʼaytaj kaʼachi.

Dos años táan k-beetik k-precursoril Tracadie ka kʼuchten junpʼéel túumben invitación: in beetik in superintendenteil tiʼ circuito. Siete años t-xíimbaltaj múuchʼuliloʼob tuʼux ku tʼaʼanal inglés. Ka tsʼoʼokeʼ aʼalaʼabtoʼon ka k-xíimbalt junpʼéel circuito yaan Quebec ichil le idioma francesoʼ. Teʼeloʼ k-superintendente tiʼ distrito kaʼacheʼ sukuʼun Léonce Crépeault, letiʼeʼ suuk kaʼach u felicitarken kéen in máans junpʼéel discurso. b Pero ku yaʼalikten xan kaʼachi: «¿Baʼax ta tʼaan jeʼel u páajtal a beetik utiaʼal u maas áantik máak a discursoʼobe?». Jach tu yáanten le baʼax tu yaʼaloʼ tumen káaj in wilik ka séeb naʼataʼak in discursoʼob yéetel ka u yil máak bix jeʼel u séeb tsʼáaik ichil u kuxtal le baʼax ku kanikoʼ.

Jach maʼ tu tuʼubulten le Asamblea Internacional tu kʼaabaʼtaj «Fe Victoriosa» beetaʼab Montreal tu añoil 1978. Meyajnajen teʼ departamento tuʼux ku beetaʼal janal teʼ asambleaoʼ, yaan kaʼach u beetaʼal janal utiaʼal kex 80,000 máakoʼobiʼ. Pero teʼ vezoʼ kʼexpaj bix kun beetbil le janaloʼ tumen kʼeʼex le máquinasoʼoboʼ, le baʼax kun tsʼaabil utiaʼal jaantbiloʼ bey xan le bix kun prepararbiloʼ. Yaan kaʼach 20 nuxiʼ refrigeradoroʼob utiaʼal u líiʼsaʼal le janal utiaʼal maʼ u kʼastaloʼ, pero yaan horaeʼ ku fallaroʼob. Tu tsʼookeʼ junpʼéel kʼiin antes tiʼ le asambleaoʼ meyajnaj le estadiooʼ, le beetik hasta chúumuk áakʼab chaʼab k-okol utiaʼal ka káajak k-preparartik tuláakal le baʼax kun kʼaʼabéettaloʼ. ¡Tsʼoʼoleʼ kʼaʼabéet k-tʼabik kaʼach le hornoʼob utiaʼal u káajal k-beetik le ukʼul utiaʼal u listotal antes tiʼ u sáastaloʼ! Le kʼiin jeʼeloʼ jach kaʼanoʼon. Pero jach yaʼab baʼax tin kanaj tiʼ le sukuʼunoʼob meyajnajoʼob tin wéeteloʼ tumen jach tu tsʼáaj u yóoloʼob meyaj, yiijchajaʼan u tuukuloʼob yéetel jach kiʼimak u yóoloʼob. Jach maʼalob úuchik k-bisikba, tak bejlaʼa kin biskinba tu yéeteloʼobeʼ. U jaajileʼ jach jatsʼutschaj le asamblea beetaʼab Quebecoʼ, le asambleaaʼ beetaʼab jach teʼ  tuʼux chʼaʼpachtaʼab le sukuʼunoʼob tu yáamil u añoiloʼob 1940 tak 1960.

Yaʼab baʼax tin kanaj tiʼ le superintendenteʼob binoʼob teʼ asambleaʼob beetaʼab Montrealoʼ. Juntéenjeakeʼ David Splane, bejlaʼeʼ táakaʼan ichil le Cuerpo Gobernanteoʼ, tu nuʼuktaj junpʼéel asamblea. Ka máan kʼiineʼ le ka beetaʼab uláakʼ asambleaeʼ teen beet le meyaj tu beetoʼ, le sukuʼun Splaneoʼ jach tu yáanten.

Teneʼ 36 años tin beetaj in circuitoil. Tu añoil 2011, invitartaʼaben utiaʼal ka in beet in instructoril tiʼ le Escuela utiaʼal Ancianoʼoboʼ. Jeʼel u páajtal k-aʼalikeʼ ich dos añoseʼ teen yéetel Palmereʼ weenoʼon tiʼ 75 jejeláas camaʼob. U jaajileʼ valernaj u penail le bukaʼaj meyaj t-beetoʼ tumen kéen tsʼoʼokok u semanail le xookoʼ le ancianoʼoboʼ jach kiʼimak u yóoloʼob tumen ku tsʼáaikoʼob cuentaeʼ le Cuerpo Gobernanteoʼ jach u kʼáat ka muʼukʼaʼanchajak u fejoʼob.

Ka máan kʼiineʼ tsʼaʼab in beet in instructoril teʼ Escuela utiaʼal le Máaxoʼob Kʼaʼaytik le Reinooʼ. Yaʼab u téeneleʼ tin wileʼ le sukuʼunoʼoboʼ ku chiʼichnaktaloʼob yoʼolal tuláakal le xook ken u beetoʼoboʼ tumen le xookoʼ ku xáantal siete horaʼob, tsʼoʼoleʼ sáamsamaleʼ tres horas yaan u beetkoʼob tarea. Tsʼoʼoleʼ cada semanaeʼ yaan u prepararkoʼob cuatro wa cinco asignaciónoʼob. Teen yéetel le uláakʼ instructoroʼ suuk k-aʼaliktiʼob kaʼacheʼ jeʼel u páajtal u tsʼoʼokbeskoʼob u asignaciónoʼob yéetel u yáantaj Jéeobaeʼ. Jach maʼ tu tuʼubulten bix u kiʼimaktal u yóoloʼob kéen u tsʼáaʼob cuenta ku páajtal u beetkoʼob u maasil tiʼ le baʼax ku kʼáataʼaltiʼob wa ku confiaroʼob tiʼ Jéeoba.

In maamaeʼ jach tu chʼaʼaj en cuenta u maasil. Letiʼeʼ tu yáantaj le máaxoʼob tu tsʼáaj xook tiʼob utiaʼal ka progresarnakoʼob ichil u káajal Jéeobaoʼ. Tsʼoʼoleʼ tu yáantaj xan in papá utiaʼal ka u kʼam baʼax ku yaʼalik le Bibliaoʼ. Tres días kíimik in maamaeʼ in papáeʼ bin teʼ Salón utiaʼal u yuʼubik le discurso ku máansaʼal teʼ reunión tu jóokʼbal semanaoʼ. Desde le kʼiin jeʼeloʼ maʼ tu pʼaxaj mix junpʼéel reunión tu yáamil 26 añosiʼ. Kex maʼ okjaʼanajeʼ le ancianoʼoboʼ ku yaʼalikoʼobeʼ in papá ku yáax kʼuchul kaʼach teʼ reuniónoʼoboʼ.

In maamaeʼ jach maʼalob ejemplo tu tsʼáaj tiʼ teen bey xan tiʼ in wíitsʼinoʼob. Letiʼob yéetel u yíichamoʼobeʼ jach u kʼubmaj u yóol u meyajtoʼob Jéeoba. Kaʼatúul tiʼ letiʼobeʼ táan u meyajoʼob Betel: juntúuleʼ tiaʼan Portugaleʼ yéetel le uláakʼ juntúuloʼ Haití.

Teen yéetel Palmereʼ beoraaʼ precursor especialoʼon tu kaajil Hamilton (Ontario). Le táan k-beetik k-circuitoil kaʼachoʼ jatsʼuts k-ilik k-láakʼintik le sukuʼunoʼob u beet u revisitaʼoboʼ yéetel u tsʼáaikoʼob xookoʼ. Pero bejlaʼeʼ yaantoʼon u privilegioil u yantaltoʼon j-xoknáaloʼob yéetel k-ilik bix u progresaroʼob. Tsʼoʼoleʼ ku páajtal xan k-kʼaj óoltik maʼalob le sukuʼunoʼob yanoʼob teʼ múuchʼuliloʼ. Ku líiʼsik k-óol k-ilik bix Jéeobaeʼ tiaʼan tu yéeteloʼob tiʼ tuláakal súutukil, tak teʼ kʼiinoʼob talamtakoʼoboʼ.

K-tsʼáaik u graciasil tiʼ tuláakal le máaxoʼob tu yáantoʼonoʼoboʼ. Toʼon xaneʼ k-ilik k-tuukul tu yoʼolal u maasil, k-ilik líiʼsik u yóoloʼob yéetel k-áantkoʼob utiaʼal u maas meyajtikoʼob Jéeoba (2 Cor. 7:6, 7). Kʼajaʼanteneʼ juntúul maamatsil yéetel kaʼatúul u paalaloʼobeʼ precursoroʼob. Teen túuneʼ tin kʼáataj tiʼ le taatatsil wa jeʼel xan u beetik u precursorileʼ, pero letiʼeʼ tu yaʼalajteneʼ táan u yáantik le óoxtúul precursoroʼob yaan ichil u familiaoʼ. Ka túun tin kʼáatajtiʼ: «¿Maʼ wa maas jeʼel u kanáantaʼaloʼob maʼaloʼob tumen Jéeobaeʼ?». Tin líiʼsaj u yóol utiaʼal ka u beet u precursoril, ka máan seis meseseʼ káaj u beetik le jatsʼuts meyajoʼ.

Teen yéetel Palmereʼ yaan u seguer k-kaʼansik tiʼ uláakʼ generaciónoʼob «le nukuch baʼaloʼob» ku beetik Jéeobaoʼ. Beyoʼ yaan u disfrutarkoʼob u meyajtikoʼob jeʼex toʼonoʼ (Sal. 71:17, 18).