1. ¿Baʼaxten kʼaʼabéet u prepararkuba máak antes u yúuchul junpʼéel nojoch loob?

 JACH kʼaʼanaʼan u prepararkuba máak. Por ejemploeʼ wa u prepararmuba máak antes u yúuchul junpʼéel nojoch loobeʼ jeʼel u salvartik u kuxtaleʼ yéetel jeʼel u yáantik u maasileʼ. Junpʼéel organización yaan Europaeʼ tu yaʼaleʼ «wa maʼalob u prepararmuba máakeʼ jeʼel u salvartik u kuxtaleʼ».

2. ¿Baʼaxten kʼaʼabéet k-preparartikba antes tiʼ le nojoch muʼyajiloʼ? (Mateo 24:44).

² Le «nojoch muʼyajiloʼ» yaan u káajal teʼ súutuk maʼ tu páaʼtik máakoʼ (Mat. 24:21). U suukileʼ mix máak u yojel baʼax kʼiin ken úuchuk junpʼéel nojoch loob, pero maʼ bey kun úuchul yéetel le nojoch muʼyajiloʼ. ¿Baʼaxten bey k-aʼalikoʼ? Tumen Jesúseʼ tsʼoʼok kex 2,000 años u yaʼal tiʼ u discípuloʼob kʼaʼabéet u prepararkubaʼob utiaʼal le kʼiin jeʼeloʼ (xok Mateo 24:44). Wa k-beetik le baʼax tu yaʼaloʼ maas chéen chʼaʼabil jeʼel k-salvartikbaeʼ yéetel jeʼel k-áantik u maasil u salvartubaʼob xaneʼ (Luc. 21:36).

3. ¿Baʼaxten yaan u kʼaʼabéettal k-eʼesik chúukaʼan óolal, chʼaʼ óotsilil yéetel yaabilaj tu kʼiiniloʼob le nojoch muʼyajiloʼ?

³ Kʼaʼabéettoʼon óoxpʼéel jatsʼuts modos utiaʼal k-preparartikba utiaʼal le nojoch muʼyajiloʼ. Por ejemploeʼ ken joʼopʼok k-aʼalik baʼax kun úuchul tiʼ le máaxoʼob maʼ tu yuʼubikoʼob u tʼaan Diosoʼ, ¿baʼax ken k-beet wa ku tsʼáaikubaʼob t-contra? (Apo. 16:21). Teʼ súutukoʼ yaan u kʼaʼabéettaltoʼon chúukaʼan óolal tumen leloʼ yaan u yáantkoʼon k-beet baʼax ku yaʼalik Jéeoba yéetel k-confiar yaan u kanáantkoʼon. ¿Kux túun wa le sukuʼunoʼob ku perderkoʼob yaʼab baʼaloʼob wa hasta ku pʼáatal mix baʼal yaantiʼoboʼ? (Hab. 3:17, 18). Wa beyoʼ yaan u kʼaʼabéettal k-chʼaʼik óotsilil tiʼob yéetel k-tsʼáaik le baʼaxoʼob kʼaʼabéettiʼoboʼ. ¿Kux túun kéen atacartaʼakoʼon tumen le junmúuchʼ kaajoʼoboʼ? ¿Baʼax ken k-beet wa ku kʼaʼabéettal k-kajtal tiʼ junpʼéel  chan cuarto yéetel u maasil sukuʼunoʼob? (Eze. 38:10-12). Teʼ súutukoʼ yaan u kʼaʼabéettal k-eʼesik nojoch yaabilaj tiʼ le sukuʼunoʼoboʼ.

4. ¿Baʼax eʼesik kʼaʼabéet u maas yantaltoʼon chúukaʼan óolal, chʼaʼ óotsil yéetel yaabilaj?

⁴ Le Bibliaoʼ ku yaʼalikeʼ kʼaʼabéet k-maas eʼesik chúukaʼan óolal, chʼaʼ óotsilil yéetel yaabilaj. Lucas 21:19, ku yaʼalik: «Wa ku chúukpajal a wóoleʼexeʼ yaan a salvartik a kuxtaleʼex». Colosenses 3:12, ku yaʼalik xan: «Búukbesabaʼex yéetel le nojoch yaabilaj ku yeʼesaʼal tu yoʼolal le chʼaʼ óotsilaloʼ». Yáax tiʼ Tesalonicenses 4:9 yéetel 10, ku yaʼalik xan: «Dios kaʼanskeʼex utiaʼal ka a paklan yaabiltabaʼex. […] Chéen baʼaleʼ, sukuʼuneʼex, k-sen aʼalikteʼex ka maas nojochchajak a yaabilajeʼex». Lelaʼ aʼalaʼab tiʼ máaxoʼob táan u yeʼeskoʼob chúukaʼan óolal, chʼaʼ óotsilil yéetel yaabilaj. Pero kʼaʼabéet kaʼach u seguer u yeʼeskoʼob le jatsʼuts modosaʼ. Toʼon xaneʼ bey unaj k-beetkoʼ. ¿Baʼax jeʼel u yáantkoʼoneʼ? Teʼ xookaʼ yaan k-ilik baʼax tu beetaj le yáax cristianoʼob utiaʼal u yantaltiʼob le jatsʼuts modosaʼ yéetel bix jeʼel k-beetik jeʼex letiʼobeʼ, beyoʼ yaan k-preparartikba utiaʼal le nojoch muʼyajiloʼ.

5. ¿Baʼax áant le sukuʼunoʼob teʼ yáax siglo utiaʼal u chúukpajal u yóoloʼoboʼ?

⁵ Le sukuʼunoʼob teʼ yáax siglooʼ kʼaʼabéetchaj u chúukpajal u yóoloʼob (Heb. 10:36). Letiʼobeʼ sáamsamal ku aktáantkoʼob kaʼach problemas, chéen baʼaleʼ tumen ku meyajtikoʼob Jéeobaeʼ ku chʼaʼpachtaʼaloʼob xan. Por ejemploeʼ, yanoʼobeʼ chʼaʼpachtaʼaboʼob tumen u nuuktakil u religión le judíoʼoboʼ, u autoridadiloʼob Roma yéetel uláakʼoʼobeʼ pʼektaʼaboʼob tumen u láakʼtsiloʼob (Mat. 10:21). Tsʼoʼoleʼ kʼaʼabéet kaʼach u kanáantkubaʼob tiʼ le baʼaloʼob maʼ jaajtak ku kaʼansik le apóstataʼoboʼ, tumen letiʼobeʼ taak kaʼach u jatskoʼob le múuchʼuliloʼ (Hech. 20:29, 30). Kex beyoʼ le sukuʼunoʼoboʼ chúukpaj u yóoloʼob (Apo. 2:3). ¿Baʼax áantoʼob? Tuukulnajoʼob tiʼ u ejemplo le máaxoʼob chúukpaj u yóoloʼob jeʼex Job yéetel uláakʼ máaxoʼob ku chʼaʼchiʼitaʼaloʼob teʼ Tsʼíiboʼob ich Hebreooʼ (Sant. 5:10, 11). Orarnajoʼob xan tiʼ Jéeoba utiaʼal u kʼáatkoʼob u yáantaj (Hech. 4:29-31). Tsʼoʼoleʼ confiarnajoʼob yaan u bendecirtaʼaloʼob wa ku chúukpajal u yóoloʼob (Hech. 5:41).

6. ¿Baʼax k-kanik tiʼ le baʼax tu beetaj Merita utiaʼal u chúukpajal u yóoloʼ?

⁶ Toʼon xaneʼ jeʼel u chúukpajal k-óol wa k-tuukul tiʼ u ejemplo le máaxoʼob ku chʼaʼchiʼitaʼaloʼob teʼ Bibliaoʼ bey xan teʼ publicaciónoʼoboʼ. Leloʼ letiʼe baʼax tu beetaj Merita, juntúul kiik kajaʼan Albania jach pʼektaʼan kaʼach tumen u láakʼtsiloʼoboʼ. Ku yaʼalik: «Jach kʼuch tin puksiʼikʼal ka tin xokaj teʼ Biblia u tsikbalil Joboʼ. Letiʼeʼ jach yaʼab baʼaloʼob tu muʼyajtaj, tsʼoʼoleʼ maʼ u yojel máax beetik kaʼach u sen muʼyajiʼ. Kex beyoʼ tu yaʼalaj le baʼax ku chíikpajal teʼ Job 27:5, ku yaʼalik: ‹¡Mientras kuxaʼaneneʼ yaan u chúukpajal in wóol in beet baʼax maʼalob!›. Leloʼ tu beetaj in tsʼáaik cuentaeʼ le baʼaxoʼob kin aktáantikoʼ mix baʼal tu tséel le baʼaxoʼob tu muʼyajtaj Joboʼ, tsʼoʼoleʼ teneʼ in wojel máax beetik u yantal muʼyajil».

7. Kex beora maʼ táan a aktáantik mix junpʼéel problemaeʼ, ¿baʼax maʼalob ka a beete?

⁷ Uláakʼ baʼax jeʼel u yáantkoʼon utiaʼal u chúukpajal k-óoleʼ letiʼe k-aʼalik tiʼ Jéeoba jach bix k-uʼuyikbaoʼ (Fili. 4:6; 1 Tes. 5:17). Maʼ xaaneʼ beoraaʼ maʼ táan a aktáantik mix junpʼéel nojoch problemaiʼ. Chéen baʼaleʼ, ¿baʼax ka beetik wa yaan baʼax beetik a kʼuuxil bey xan wa yaan baʼax kʼaʼabéet a chʼaʼtuklik? ¿Ka orar wa tiʼ Jéeoba utiaʼal a kʼáatik u yáantaj? Wa desde bejlaʼa suuk a beetkeʼ láayliʼ bey ken a beetil kéen maas kʼaschajak le yóokʼol  kaabaʼ. Yaan a confiar de ke Jéeobaeʼ yaan u yáantkech jach teʼ kʼiin kʼaʼabéetoʼ (Sal. 27:1, 3).

8. ¿Baʼax ku kaʼansiktoʼon u ejemplo Mira? (Santiago 1:2-4; ilawil xan le fotooʼ).

⁸ Wa ku chúukpajal k-óol k-aktáant le problemas teʼ kʼiinoʼobaʼ yaan xan u chúukpajal k-óol tu kʼiiniloʼob le nojoch muʼyajiloʼ (Rom. 5:3). Yaʼab sukuʼunoʼobeʼ ku yaʼalikoʼobeʼ wa ku chúukpajal u yóoloʼob u aktáantoʼob junpʼéel problemaeʼ maas jeʼel u chúukpajal u yóoloʼob u aktáantoʼob uláakʼoʼobeʼ. Kéen u yiloʼob bix u yáantaʼaloʼob tumen Jéeobaeʼ ku maas muʼukʼaʼantal u fejoʼob yéetel ku páajtal u aktáantkoʼob uláakʼ pruebas (xok Santiago 1:2-4). Bey u yaʼalik Mira, juntúul kiik kajaʼan Albania. Letiʼeʼ ku tuklikeʼ chéen letiʼ chuup u kuxtal yéetel problemas. Teʼ súutukiloʼob beyoʼ ku tuukul tiʼ bix tsʼoʼok u yáantaʼal tumen Jéeoba tu yáamil le 20 años joʼopʼok u meyajtikoʼ. Tsʼoʼoleʼ ku tuklik: «Chúukpajak a wóol, Jéeobaeʼ maʼ u pʼatechiʼ, maʼ u xuʼulul a meyajtik chéen yoʼolal wa baʼax problemail». Teech xaneʼ maʼalob ka kulakech a tukult bix tsʼoʼok u yáantkech Jéeoba. Maʼ u tuʼubultecheʼ letiʼeʼ ku yilik tuláakal baʼax ka beetik yéetel yaan u bendecirkech (Mat. 5:10-12). Wa ka beetik beyoʼ, kéen káajak le nojoch muʼyajiloʼ yaan u chúukpajal a wóol kex jeʼel baʼaxak ka úuchkeʼ.

9. ¿Bix tu chʼaʼaj óotsilil le sukuʼunoʼob yanoʼob Antioquía de Siriaoʼ?

⁹ Le sukuʼunoʼob yanoʼob Judeaoʼ tu muʼyajtoʼob junpʼéel nojoch wiʼijil. Le ka tu yojéeltaj le sukuʼunoʼob yanoʼob Antioquía de Siria le baʼax ku yúuchloʼ, tu chʼaʼajoʼob óotsilil tiʼob, tsʼoʼoleʼ tu yáantoʼob. Le Bibliaoʼ ku yaʼalikeʼ «le discípuloʼob yanoʼob teʼeloʼ tu chʼaʼtukloʼob u yáantkoʼob le sukuʼunoʼob kajaʼanoʼob Judeaoʼ, le oʼolal cada juntúuleʼ tu tsʼáaj le bukaʼaj páajchaj u tsʼáaikeʼ» (Hech. 11:27-30). Jeʼex k-ilkoʼ kex náach kajaʼan le sukuʼunoʼob táan u muʼyajoʼoboʼ tu chʼaʼtuklaj u yáantkoʼob (1 Juan 3:17, 18).

10. ¿Bix jeʼel k-chʼaʼik óotsilil tiʼ le sukuʼunoʼob táan u muʼyajoʼoboʼ? (Ilawil xan le fotooʼ).

¹⁰ Toʼon xaneʼ maʼalob ka k-chʼaʼ óotsilil tiʼ le sukuʼunoʼob táan u muʼyajoʼoboʼ. ¿Bix jeʼel k-beetkeʼ? Maʼ xaaneʼ jeʼel u páajtal k-kʼáatik tiʼ le ancianoʼob bix jeʼel u páajtal k-áantajeʼ, k-tsʼáaik donación utiaʼal le meyaj ku beetaʼal tiʼ tuláakal yóokʼol kaaboʼ yéetel k-orar yoʼolal le sukuʼunoʼob táan u muʼyajoʼoboʼ (Pro. 17:17). b Por ejemploeʼ tu añoil 2020 beetaʼab maas tiʼ 950 Comités tiʼ Socorro utiaʼal u yáantaʼal le sukuʼunoʼob táan u muʼyajoʼob yoʼolal le COVID-19. Jach k-tsʼáaik u graciasil tiʼ tuláakal le sukuʼunoʼob ku yáantajoʼob teʼ comitéʼobaʼ. Letiʼobeʼ tumen ku chʼaʼikoʼob óotsilileʼ ku tsʼáaikoʼob baʼax kʼaʼabéet tiʼ le sukuʼunoʼoboʼ, ku líiʼskoʼob u yóoloʼob yéetel yaan horaeʼ ku yutskíintikoʼob u yotochoʼob bey xan le lugaroʼob tuʼux ku muchʼkubaʼob u adorartoʼob Jéeobaoʼ (ket yéetel 2 Corintios 8:1-4).

11. ¿Bix u alabartaʼal Jéeoba kéen k-áant u maasil?

¹¹ Tuláakal le baʼax k-beetik utiaʼal k-áantik u maasil kéen úuchuk junpʼéel nojoch loobeʼ ku yilaʼal tumen u maasil. Koʼox ilik junpʼéel baʼal uchaʼan. Tu añoil 2019, le ciclón Dorianoʼ tu jutaj le tuʼux ku muchʼkuba u testigoʼob Jéeoba Bahamasoʼ. Le táan u jel beetaʼal le salónoʼ le sukuʼunoʼoboʼ tu kʼáatoʼob tiʼ juntúul contratista bey bajux jeʼel u tojoltik le meyaj kun beetbiloʼ. Le máak túunoʼ tu yaʼalaj: «Taak in wáantkeʼex, jeʼel in majáantikteʼex le maquinariaoʼ, le meyaj kun beetbiloʼ maʼ ken  in cobrarteʼex yéetel teen xan ken in tsʼáa le materialoʼob kun kʼaʼabéettaloʼ. Jach jatsʼuts in wilik bix a wáantkeʼex a amigoʼex». Jeʼex k-ilkoʼ tak le máaxoʼob maʼ tu adorarkoʼob Jéeoba ku tsʼáaikoʼob cuenta bix k-áantik u maasiloʼ. Jach kiʼimak k-óol tumen le baʼaxoʼob k-beetkoʼ ku yáantaj utiaʼal u náatsʼal u maasil yiknal Jéeoba Dios (Efe. 2:4).

12. ¿Baʼaxten yaan u kʼaʼabéettal k-chʼaʼik óotsilil tu kʼiiniloʼob le nojoch muʼyajiloʼ? (Apocalipsis 13:16, 17).

¹² ¿Baʼaxten yaan u kʼaʼabéettal k-chʼaʼik óotsilil tu kʼiiniloʼob le nojoch muʼyajiloʼ? Tumen le Bibliaoʼ ku yaʼalikeʼ le máaxoʼob maʼ tu apoyarkoʼob le gobiernoʼoboʼ yaan u muʼyajoʼob teʼ kʼiinoʼobaʼ bey xan tu kʼiiniloʼob le nojoch muʼyajiloʼ (xok Apocalipsis 13:16, 17). Teʼ kʼiinoʼoboʼ yaan u kʼaʼabéettal k-tsʼáaik baʼax kʼaʼabéet tiʼ le sukuʼunoʼoboʼ. Wa k-chʼaʼik óotsilil tiʼobeʼ le kéen taalak Jesús u juzgart le máakoʼoboʼ yaan u yaʼaliktoʼon: «Tiaʼalinteʼex le Reino[oʼ]» (Mat. 25:34-40).

13. ¿Baʼax tu beetaj le sukuʼunoʼob teʼ yáax siglo utiaʼal u maas yaabiltkubaʼoboʼ? (Romanos 15:7).

¹³ Teʼ yáax siglooʼ tuláakal máax ojéeltmil jach u yaabiltmuba le sukuʼunoʼoboʼ. ¿Pero chéen chʼaʼabil wa úuchik u yeʼeskoʼob yaabilaj ichiloʼob? Tuukulnakoʼon tiʼ le múuchʼulil yaan kaʼach Romaoʼ, teʼeloʼ jejeláas sukuʼunoʼob yanoʼobiʼ. Yaneʼ judíoʼob, desde tu chichnil kaʼansaʼabtiʼob u Ley Moisés. Pero uláakʼoʼobeʼ táanxel luʼumil u taaloʼob yéetel jejeláas baʼax suuk u beetkoʼob kaʼachi. Maʼ xaaneʼ yanoʼobeʼ esclavoʼob, pero uláakʼoʼobeʼ yaan tak u esclavoʼob. ¿Baʼax áant le sukuʼunoʼob utiaʼal u maas yaabiltkubaʼoboʼ? Apóstol Pabloeʼ tu yaʼalajtiʼob: «Unaj a kʼamkabaʼex yéetel kiʼimak óolal ta baatsileʼex» (xok Romanos 15:7). ¿Baʼax tu yóotaj u yaʼal Pablo? Le baʼax tu yaʼaloʼ ku beetik k-tuukul tiʼ bix u yeʼesik u yutsil máak, jeʼex kéen u kʼam u yuʼulaboʼob tu yotoch wa kéen u táakbes wa máax ichil u amigoʼob. Por ejemploeʼ Pabloeʼ tu yaʼalaj tiʼ Filemón bix unaj u kʼamik Onésimo, le u esclavo púutsʼoʼ. Tu yaʼalaj: «Kʼam Onésimo yéetel kiʼimak óolal» (File. 17). Priscila yéetel Áquila xaneʼ yéetel kiʼimak óolal tu bisoʼob Apolos tu yotochoʼob utiaʼal u jach tsolkoʼob «u bejil Dios tiʼ» (Hech. 18:26). Jeʼex k-ilkoʼ le sukuʼunoʼobaʼ jelaʼan bix líiʼsaʼabikoʼob, pero maʼalob tu bisilubaʼob. Jeʼex tu yaʼalil Pablooʼ tu kʼamubaʼob yéetel kiʼimak óolal yéetel tu yaabiltubaʼob.

14. ¿Bix tu yeʼesil Anna yéetel u yíicham u yaabiltmoʼob le sukuʼunoʼoboʼ?

¹⁴ Toʼon xaneʼ jeʼel u páajtal k-eʼesik k-yaabiltmaj k-sukuʼunoʼob le ken k-iloʼob bey k-amigoʼobeʼ. Wa k-beetkeʼ letiʼobeʼ yaan u yaabiltkoʼonoʼob (2 Cor. 6:11-13). Koʼox ilik baʼax úuch tiʼ Anna yéetel u yíicham, letiʼobeʼ táan kaʼach u beetik u misioneroiloʼob África Occidental. Chéen baʼaleʼ le maʼ úuch túuxtaʼakoʼob tiʼ junpʼéel luʼumil yaan teʼ África Occidentaloʼ káaj le COVID-19, le oʼolal maʼ páajchaj u muchʼkubaʼob yéetel le sukuʼunoʼob teʼ túumben múuchʼuliloʼ. ¿Baʼax tu beetaj kiik Anna yéetel u yíicham utiaʼal u yeʼeskoʼob yaabilaj tiʼ le sukuʼunoʼoboʼ? Káaj u tʼankoʼob tiʼ videoconferencia utiaʼal u maas kʼaj óoltikoʼob, lelaʼ jach kʼuch tu puksiʼikʼal le sukuʼunoʼoboʼ. Le beetkeʼ letiʼobeʼ káaj xan u tʼankoʼob yéetel u túuxtikoʼob mensaje tiʼ Anna yéetel tiʼ u yíicham. ¿Baʼaxten le misioneroʼobaʼ tu yilaj u maas kʼaj óoltikoʼob le sukuʼunoʼoboʼ? Annaeʼ ku yaʼalik: «Teneʼ mantatsʼ kin kʼaʼajsik bix tsʼoʼok u yeʼesaʼaltoʼon yaabilaj tumen le sukuʼunoʼoboʼ, tak teʼ súutukiloʼob táan k-muʼyajoʼ. In tuukul tiʼ leloʼ ku péeksiken xan in tratart yéetel yaabilaj le sukuʼunoʼoboʼ».

15. ¿Baʼax ku kaʼansiktoʼon u ejemplo Vanessa? (Ilawil xan le fotooʼ).

¹⁵ Tuláakal le sukuʼunoʼob yéetel kiikoʼob yanoʼob  teʼ múuchʼuliloʼoboʼ maʼ igual u modosoʼobiʼ yéetel maʼ igual baʼax suuk u beetkoʼobiʼ. ¿Baʼax jeʼel u yáantkoʼon utiaʼal k-maas yaabiltikoʼobeʼ? Letiʼe k-ilik u jatsʼuts modosoʼoboʼ. Vanessa, juntúul kiik kajaʼan Nueva Zelandaeʼ, jach istikyaj kaʼach u yilik u biskuba yéetel le sukuʼunoʼob teʼ múuchʼuliloʼ tumen jach u pʼeek bix u modosoʼob. Chéen baʼaleʼ, tu lugar u xuʼulul u biskuba tu yéeteloʼobeʼ tu yilaj u maas kʼaj óoltikoʼob. Leloʼ le áant u yil le jatsʼuts modos yaantiʼoboʼ. Letiʼeʼ ku yaʼalik: «Desde ka káaj u beetik u superintendenteil tiʼ circuito in wíichameʼ, k-antal yéetel jejeláas sukuʼunoʼob maʼ igual u modosoʼobiʼ. Pero beoraaʼ maas chéen chʼaʼabil in wilik in biskinba tu yéeteloʼob. Jach jatsʼuts in wilik in wantal yéetel sukuʼunoʼob jejeláas tuʼux u taaloʼob. Jéeoba xaneʼ u yaabiltmaj máakoʼob jejeláas tuʼux u taaloʼob, le oʼolal tsʼoʼok u natsʼkoʼob tu yiknal». Bey túunoʼ wa k-ilik le sukuʼunoʼob jeʼex u yilaʼaloʼob tumen Jéeobaoʼ k-eʼesik k-yaabiltmoʼob (2 Cor. 8:24).

16. ¿Baʼaxten yaan u kʼaʼabéettal k-yaabiltik yéetel u jaajil k-óol le sukuʼunoʼob tu kʼiiniloʼob le nojoch muʼyajiloʼ? (Ilawil xan le fotooʼ).

¹⁶ Tu kʼiiniloʼob le nojoch muʼyajiloʼ, yaan u kʼaʼabéettal k-maas yaabiltik le sukuʼunoʼoboʼ. ¿Bix ken u kanáantiloʼon Jéeoba kéen káajak le nojoch muʼyajiloʼ? Úuchjeakileʼ tu yaʼalaj tiʼ u kaajal baʼax unaj u beetik utiaʼal u salvarkuba kéen atacartaʼak Babilonia. Tu yaʼalaj: «In kaajal, ookkech ta wotocheʼ ka a kʼalaba ta cuarto. Taʼakaba junsúutuk, páaʼt u máan u pʼujaʼanil Dios» (Isa. 26:20). Maʼ xaaneʼ tu kʼiiniloʼob le nojoch muʼyajiloʼ láayliʼ letiʼe baʼax kun aʼalbiltoʼon ka k-beetoʼ. Le tʼaan «ookkech ta wotocheʼ» maʼ xaaneʼ táan u tʼaan tiʼ le múuchʼuliloʼoboʼ. Wa maʼ t-náachtal tiʼ le sukuʼunoʼob tu kʼiiniloʼob le nojoch muʼyajiloʼ Jéeobaeʼ yaan u kanáantkoʼon jeʼex u yaʼalmiloʼ. Bey túunoʼ maʼ chéen unaj k-bisikba yéetel le sukuʼunoʼoboʼ, kʼaʼabéet k-yaabiltikoʼob yéetel u jaajil k-óol, beyoʼ yaan k-salvartikba.

17. ¿Baʼax ken k-beet tu kʼiiniloʼob le nojoch muʼyajil wa k-preparartikba desde beoraaʼ?

¹⁷ Tu «nojoch kʼiinil Jéeobaeʼ» jach yaan u difíciltal le kuxtaloʼ (Sof. 1:14, 15). Tak le máaxoʼob meyajtik Jéeoba kun muʼyajoʼoboʼ. Pero wa k-preparartikba desde beoraaʼ, maʼ ten k-sajaktal yéetel yaan u páajtal k-áantik u maasil. Wa yaantoʼon chúukaʼan óolaleʼ yaan k-aktáantik jeʼel baʼalak ka úuchkeʼ. Wa k-chʼaʼik óotsilil tiʼ le sukuʼunoʼoboʼ yaan k-áantkoʼob yéetel yaan k-tsʼáaik baʼax kʼaʼabéet tiʼob. Tsʼoʼoleʼ wa k-yaabiltmoʼobeʼ maʼ ken k-náachtal tiʼob. Wa k-eʼesik le jatsʼuts modosaʼ Jéeobaeʼ yaan u tsʼáaiktoʼon kuxtal minaʼan u xuul tiʼ junpʼéel paraíso tuʼux maʼ tun kʼaʼajsbil le baʼaxoʼob k-muʼyajtikoʼ (Isa. 65:17).