U jaajileʼ maʼ chéen chʼaʼabil k-jóoʼsik tiempo utiaʼal k-xakʼalxoktik le Bibliaoʼ tumen yaʼab baʼaloʼob k-beetik. ¿Baʼax jeʼel u yáantkecheʼ? Yáaxeʼ, ilawil u meyajtech maʼalob le tiempo a jóoʼsmaj utiaʼal a xakʼalxookoʼ. Wa chéen ka jáajan xookeʼ maʼ ten a jóoʼs u yutsil, pero wa ka xokik chéen junpʼíit baʼaleʼ yaan u maas tʼíilil ta tuukul.

Kéen tsʼoʼokkeʼ ilawil máakalmáak le baʼaloʼob maas kʼaʼabéet a xokikoʼ (Efe. 5:15, 16). Lelaʼ jujunpʼéel tiʼ le baʼaloʼob jeʼel u páajtal a xokikoʼ:

• Xok le Biblia sáamsamaloʼ (Sal. 1:2). Junpʼéel baʼax jeʼel u yáantkech a beeteʼ letiʼe a xokik le capítuloʼob kun ilbil teʼ reunión ku beetaʼal yáam semanaoʼ.

• Líiʼsaba yéetel le baʼax kun ilbil teʼ reuniónoʼoboʼ, jeʼex utiaʼal u xookil le revista Le Máax ku Kananoʼ bey xan utiaʼal le baʼax kun xakʼaltbil teʼ reunión yáam semanaoʼ. Beet yéetel u tuukulil a comentar (Sal. 22:22).

• Wa ka wilik pʼaataltech junpʼíit tiempo maas utiaʼal a xakʼalxookeʼ ilawil a xokik le revistaʼob utiaʼal kʼaʼaytajoʼ bey xan a chaʼantik le videoʼob yéetel le uláakʼ baʼaloʼob ku tsʼaʼabal teʼ jw.org.

• Tsʼáa u metail a xakʼalxoktik junpʼéel baʼal taak a wojéeltik. Maʼ xaaneʼ jeʼel u páajtal a xakʼaltik baʼax ku yaʼalik le Biblia yoʼolal junpʼéel problema táan a aktáantikeʼ, a kaxtik u núukil junpʼéel pregunta yaantech wa a xakʼaltik junpʼéel tema taak a maas a naʼatik. Wa taak a wojéeltik u maasileʼ ilawil le jaats «Actividades para estudiar la Biblia», yaan teʼ jw.org ich españoloʼ.