1. Jeʼex u yaʼalik 1 Pedro 5:2, ¿baʼax kʼubéentaʼan tiʼ le ancianoʼoboʼ?

 JÉEOBAEʼ u kʼubéentmaj tiʼ le ancianoʼob ka u kanáantoʼob le sukuʼunoʼob yanoʼob teʼ múuchʼuliloʼ. Le ancianoʼoboʼ jach nojoch baʼal u yilkoʼob le meyajaʼ yéetel jach ku tsʼáaik u yóol u beetoʼob (Jer. 23:4; xok 1 Pedro 5:2). ¿Máasaʼ kiʼimak k-óol tumen yaan ancianoʼob kanáantkoʼon teʼ múuchʼuliloʼ?

2. ¿Baʼax ku aktáantik jujuntúul ancianoʼob?

² Le ancianoʼoboʼ yaʼab baʼax ku aktáantkoʼob le táan u kanáantkoʼob le múuchʼuliloʼ. Tuukulnakoʼon tiʼ baʼax úuch tiʼ Tony, juntúul anciano kajaʼan Estados Unidos. Letiʼeʼ tu tsʼáaj cuentaeʼ kʼaʼabéet kabal u yóol utiaʼal u yilik bukaʼaj meyaj jeʼel u páajtal u kʼamkeʼ. Le sukuʼunoʼ ku yaʼalik: «Ka káaj le COVID-19, maas yaʼabchaj le meyaj ku beetaʼal utiaʼal u organizartaʼal le reuniónoʼob bey xan le kʼaʼaytajoʼ. Jeʼel baʼalak ka aʼalaʼakteneʼ kin beetik, chéen baʼaleʼ maʼatech u tsʼoʼokol le meyajoʼ. Como jach yaʼab baʼax kin beetkeʼ xuʼul in jach xokik le Bibliaoʼ, in xakʼalxook yéetel in orar». Ilir, juntúul sukuʼun kajaʼan Kosovoeʼ yaanal baʼax tu aktáantaj. Letiʼeʼ istikyaj u beetik le baʼax ku yaʼalik u kaajal Jéeobaoʼ tumen yaan guerra teʼ tuʼux kajaʼanoʼ. Letiʼeʼ ku yaʼalik: «Jach sajakchajen le ka aʼalaʼabten tumen le sucursal ka xiʼiken in wáant junjaats sukuʼunoʼob kajaʼanoʼob teʼ tuʼuxoʼob jach táan le guerraoʼ. Tin wuʼuyaj maʼ tu páajtal in beetik, tsʼoʼoleʼ bey maʼ tu nuʼuk le baʼax ku yaʼalaʼalten ka in beetoʼ». Tim, juntúul misionero kajaʼan Asiaeʼ ku yaʼalikeʼ istikyaj u yilik u tsʼoʼokbesik tuláakal le meyajoʼob ku tsʼaʼabaltiʼ teʼ múuchʼuliloʼ. Ku yaʼalik: «Yaan kʼiineʼ kin wuʼuyik jach kaʼanaʼanen». ¿Baʼax jeʼel u páajtal u beetik le ancianoʼob ken u aktáantoʼob baʼaloʼob beyaʼ?

3. ¿Baʼax tu beetaj Gedeón, yéetel baʼax ku kaʼansiktoʼon?

 ³ Le ancianoʼoboʼ jach yaʼab baʼal jeʼel u kankoʼob tiʼ le juez Gedeónoʼ (Heb. 6:12; 11:32). Letiʼeʼ tu nuʼuktaj yéetel tu kanáantaj u kaajal Dios úuchjeakil (Jue. 2:16; 1 Cró. 17:6). Le ancianoʼob xanoʼ kʼaʼabéet u kanáantkoʼob u kaajal Dios teʼ tu tsʼook kʼiinoʼobaʼ (Hech. 20:28; 2 Tim. 3:1). Letiʼobeʼ yaʼab baʼal jeʼel u kankoʼob tiʼ Gedeóneʼ tumen letiʼeʼ jach tu yeʼesaj kabal óolal, tu yuʼubaj u tʼaan Dios yéetel chúukpaj u yóol. U ejemplo Gedeóneʼ jeʼel xan u yáantik le máaxoʼob yanoʼob teʼ múuchʼulil utiaʼal ka u maas apreciartoʼob le meyaj ku beetik le ancianoʼoboʼ bey xan utiaʼal ka u beetoʼob le baʼax ku yaʼalikoʼoboʼ (Heb. 13:17).

4. ¿Bix tu yeʼesil kabal óolal Gedeón?

⁴ Gedeóneʼ jach kabal u yóol kaʼachi. b Le ka aʼalaʼabtiʼ tumen juntúul ángel tsʼoʼok u yéeyaʼal utiaʼal u salvartik le israelitaʼob tiʼ u kaajil Madiánoʼ, letiʼeʼ tu yaʼalaj: «Le familia tuʼux in taaloʼ letiʼe maas chichan yaan ichil u tribu Manasésoʼ, tsʼoʼoleʼ teneʼ mix baʼalen wa kin comparartaʼal yéetel le máaxoʼob yanoʼob tu yotoch in papáoʼ» (Jue. 6:15). Gedeóneʼ tu yuʼubaj maʼ tu páajtal u tsʼoʼokbesik le meyaj kʼubéentaʼabtiʼoʼ, pero Jéeobaeʼ u yojel jeʼel u páajtal u tsʼoʼokbesikeʼ yéetel tu yáantaj utiaʼal u beetik.

5. ¿Baʼax jeʼel u beetik u difíciltal u yeʼesik kabal óolal le ancianoʼoboʼ?

⁵ Le ancianoʼoboʼ ku beetkoʼob tuláakal le ku páajtal utiaʼal u yeʼeskoʼob kabal óolal (Miq. 6:8; Hech. 20:18, 19). Letiʼobeʼ maʼatech u creerkubaʼob yoʼolal le baʼax u yojel u beetoʼoboʼ wa yoʼolal le privilegioʼob yaantiʼoboʼ. Maʼ tu tuklikoʼob xan wa mix baʼal u biilaloʼob wa maʼ tu jóokʼol tubeel le baʼax ku chʼaʼtuklikoʼoboʼ. Chéen baʼaleʼ yaan baʼax jeʼel u beetik u difíciltal u yeʼesik kabal óolal le ancianoʼoboʼ. Por ejemploeʼ juntúul ancianoeʼ jeʼel u kʼamik jejeláas meyajoʼob teʼ múuchʼuliloʼ, pero tu tsʼookeʼ maʼ tu páajtal u tsʼoʼokbesik. Wa jeʼel u káajal u creerkuba tumen ku sen alabartaʼal teʼ múuchʼuliloʼ wa maʼ xaaneʼ jeʼel u kʼuuxil kéen aʼalaʼaktiʼ maʼ maʼalob bix úuchik u beetik wa baʼaxiʼ. Kéen úuchuktiʼob beyaʼ, ¿bix jeʼel u yáantaʼaloʼob tumen u ejemplo Gedeóneʼ?

6. ¿Bix jeʼel u yeʼesik kabal u yóol le ancianoʼob jeʼex Gedeónoʼ? (Ilawil xan le fotooʼ).

⁶ Kʼáateʼex áantaj. Le máax kabal u yóoloʼ u yojel yaan baʼaxoʼob maʼ tu páajtal u beetik. Gedeóneʼ tu yeʼesaj le jatsʼuts modosaʼ tumen tu kʼáataj  u yáantaj u maasil (Jue. 6:27, 35; 7:24). Le ancianoʼoboʼ jeʼel xan u páajtal u beetkoʼob beyoʼ. Tony, le máax t-aʼalaj teʼ párrafo dosoʼ ku yaʼalik: «Desde tin chichnil kaʼansaʼabten kʼaʼabéet in kʼamik jeʼel baʼaxak meyajil ka tsʼaʼabakteneʼ kex in wojel maʼ tun béeytal in tsʼoʼokbesik. Le oʼolal tin chʼaʼtuklaj in tʼaan tiʼ le kabal óolal teʼ adoración ich familiaoʼ yéetel tin kʼáataj tiʼ in watan bix u yilik le baʼax kin beetkoʼ. Tin chaʼantaj xan junpʼéel video teʼ jw.org ku kʼaabaʼtik Kaʼans u maasil yéetel confiarnen tiʼob jeʼex Jesuseʼ». Yoʼolal leloʼ Tonyeʼ káaj u kʼáatik u yáantaj u maasil. Letiʼeʼ ku yaʼalik baʼax utsil tu kʼamaj: «Como kin wáantaʼaleʼ maas maʼalob bix u atendertaʼal le meyajoʼob teʼ múuchʼuliloʼ. Beoraaʼ maas yaanten tiempo utiaʼal in natsʼkinba yiknal Jéeoba».

7. Le ancianoʼoboʼ, ¿bix jeʼel u beetkoʼob jeʼex Gedeón le kéen aʼalaʼak baʼal tiʼoboʼ? (Sant. 3:13)

⁷ Maʼ a kʼuuxil kéen aʼalaʼaktech baʼal. Uláakʼ baʼal jeʼel u beetik maʼ u yeʼesik kabal óolal le ancianoʼoboʼ letiʼe kéen aʼalaʼak baʼal tiʼoboʼ. Teʼ súutukiloʼob beyaʼ le ancianoʼoboʼ jeʼel xan u yáantaʼaloʼob tumen u ejemplo Gedeóneʼ. Letiʼeʼ u yojel kʼeban máak, tsʼoʼoleʼ le ka aʼalaʼab baʼal tiʼ tumen u paalal Efraíneʼ maʼ kʼuuxilnajiʼ (Jue. 8:1-3). Baʼaxeʼ tu yeʼesaj kabal óolal yéetel tu chʼenxikintoʼob. Yoʼolal le utsil tu yeʼesoʼ le máakoʼoboʼ tu jetsʼkúuntubaʼob. Le ancianoʼob ku seguerkoʼob u ejemplo Gedeónoʼ le kéen aʼalaʼak baʼal tiʼobeʼ maʼatech u kʼuuxiloʼob, baʼaxeʼ ku yeʼesik u yutsiloʼob yéetel ku tuklikoʼob tubeel baʼax ken u núukoʼob (xok Santiago 3:13). Beyoʼ ku yáantajoʼob utiaʼal ka yanak jeetsʼeelil teʼ múuchʼuliloʼ.

8. ¿Baʼax unaj u beetik le ancianoʼob le kéen alabartaʼakoʼoboʼ? Tsikbalt junpʼéel baʼal uchaʼan.

⁸ Alabarteʼex Jéeoba. Le ka alabartaʼab Gedeón úuchik u ganartik Madiáneʼ, letiʼeʼ tu yilaj ka alabartaʼak Jéeoba (Jue. 8:22, 23). Le ancianoʼoboʼ jeʼel u beetkoʼob jeʼex Gedeón le kéen u beetoʼob u alabartaʼal Jéeoba yéetel le baʼaxoʼob ku beetkoʼoboʼ (1 Cor. 4:6, 7). Por ejemploeʼ wa juntúul anciano ku felicitartaʼal tumen jach maʼalob u kaʼansajeʼ jeʼel u páajtal u yaʼalikeʼ le baʼax ku kaʼansikoʼ teʼ Biblia u taaloʼ yéetel u kaajal Jéeoba kaʼanskoʼon. Le ancianoʼoboʼ maʼalob xan ka u tukloʼob wa le bix u kaʼansajoʼoboʼ ku beetik u alabartaʼal Jéeoba. Tuukulnakoʼon tiʼ le baʼax úuch tiʼ Timothyoʼ. Le ka tsʼaʼab u beet u ancianoileʼ jatsʼuts u yilik u máansik discursoʼob. Letiʼeʼ ku yaʼalik: «Kéen in preparartinbaeʼ jach yaʼab baʼaloʼob kin waʼalik tu káajbal in discurso yéetel ku meyajten ejemploʼob jach jatsʼutstak yéetel chowaktak. Yoʼolal leloʼ le sukuʼunoʼoboʼ mantatsʼ ku yaʼalikoʼobten jach maʼalob in máansik in discurso. Chéen baʼaleʼ chéen teen kin alabartaʼal maʼ Jéeobaiʼ, mix le Bibliaoʼ». Ka máan kʼiineʼ Timothyeʼ tu tsʼáaj cuenta kʼaʼabéet u kʼexik bix u kaʼansaj utiaʼal u alabartaʼal chéen Jéeoba (Pro. 27:21). ¿Baʼax utsil tu kʼamaj yoʼolal le baʼax tu beetoʼ? Letiʼeʼ ku yaʼalik: «Beoraaʼ le sukuʼunoʼoboʼ ku yaʼalikoʼobeʼ in discursoeʼ tu yáantoʼob utiaʼal u aktáantkoʼob junpʼéel problema, utiaʼal u chúukpajal u yóoloʼob wa utiaʼal u maas natsʼkubaʼob yiknal Jéeoba. Maas kiʼimak in wóol yoʼolal le baʼax ku yaʼalaʼalten beoraaʼ ke yoʼolal le baʼax ku yaʼalaʼalten kaʼachoʼ».

9. ¿Bix tu yeʼesil Gedeón ku yuʼubik u tʼaan Jéeoba yéetel maʼ saajkiʼ? (Ilawil le dibujo yaan tu yáax páginail le revistaaʼ).

⁹ Ka tsʼoʼok u yéeyaʼal utiaʼal ka u beet u juezileʼ Gedeóneʼ kʼaʼabéetchaj u yeʼesik maʼ saajkiʼ yéetel u yuʼubik u tʼaan Jéeoba. Tiʼ letiʼeʼ aʼalaʼab tumen Jéeoba kʼaʼabéet u nikik le altar u beetmaj u papá tiʼ Baaloʼ (Jue. 6:25, 26). Ka tsʼoʼokeʼ Gedeóneʼ tu muchʼaj yaʼab soldadoʼob, chéen baʼaleʼ kaʼatéen aʼalaʼabtiʼ tumen Jéeoba ka u junpʼíitkunt u soldadoʼob (Jue. 7:2-7). Tu tsʼookeʼ Jéeobaeʼ tu yaʼalajtiʼeʼ de áakʼab kʼaʼabéet u bin u atacart u enemigoʼob (Jue. 7:9-11).

10. ¿Baʼaxten yaan horaeʼ maʼ chéen chʼaʼabil u yuʼubik tʼaan le ancianoʼoboʼ?

 ¹⁰ Le ancianoʼoboʼ mantatsʼ ku beetkoʼob baʼax ku yaʼalaʼaltiʼob (Sant. 3:17). Wa suuk u beetkoʼob beyoʼ maas chéen chʼaʼabil ken u beetoʼob baʼax ku yaʼalik le Bibliaoʼ bey xan baʼax ku yaʼalik u kaajal Jéeoba. Tsʼoʼoleʼ yaan u tsʼáaikoʼob junpʼéel maʼalob ejemplo tiʼ u maasil. Pero yaan horaeʼ maʼ chéen chʼaʼabil u yuʼubik tʼaan juntúul ancianoiʼ, por ejemploeʼ maʼ xaaneʼ jeʼel u tuklik jach yaʼab le instrucciónoʼob ku túuxtik u kaajal Jéeobaoʼ. Wa jeʼel u tuklik maʼ maʼalob le baʼax ku yaʼalik u kaajal Jéeoba ka beetaʼakoʼ. Wa maʼ xaaneʼ jeʼel u yaʼalaʼaltiʼ ka u beet wa baʼax jeʼel tak u beetik u kʼaʼalaleʼ. Teʼ súutukiloʼob beyaʼ, ¿bix jeʼel u yeʼesik le ancianoʼob ku yuʼubikoʼob tʼaan jeʼex Gedeóneʼ?

11. ¿Baʼax jeʼel u yáantik le ancianoʼob u yuʼuboʼob tʼaanoʼ?

¹¹ Beeteʼex baʼax ku yaʼalik u kaajal Jéeoba. Dioseʼ tu yaʼalaj tiʼ Gedeón bix ken u xuʼulsil le altar tu beetaj u papáoʼ, tuʼux ken u beet le altar utiaʼal u adorartaʼaloʼ yéetel baʼax baʼalcheʼil ken u kʼube. Gedeóneʼ maʼ tu tuklaj kaʼatéen le baʼax aʼalaʼabtiʼoʼ, tu séebaʼanil tu beetaj. Teʼ kʼiinoʼobaʼ u kaajal Jéeobaeʼ ku túuxtik cartaʼob, anuncioʼob yéetel uláakʼ instrucciónoʼob tiʼ le ancianoʼoboʼ. Tuláakal lelaʼ ku beetaʼal utiaʼal u tsʼaʼabal baʼax kʼaʼabéet tiʼ le sukuʼunoʼoboʼ bey xan utiaʼal maʼ u náachtaloʼob tiʼ Jéeoba. Toʼoneʼ k-yaabiltmaj le ancianoʼoboʼ tumen ku beetkoʼob tuláakal le baʼax ku yaʼalaʼaltiʼob tumen u kaajal Jéeobaoʼ. Tsʼoʼoleʼ tuláakal le múuchʼulil ku jóoʼsik u yutsil le baʼax ku beetkoʼoboʼ (Sal. 119:112).

12. Le ancianoʼoboʼ, ¿bix jeʼel u beetkoʼob baʼax ku yaʼalik Hebreos 13:17 le kéen beetaʼak wa baʼax kʼeexil tumen u kaajal Jéeobaeʼ?

¹² Kʼameʼex le kʼeexoʼob ku beetaʼaloʼ. Maʼalob ka k-kʼaʼajseʼ Jéeobaeʼ tu yaʼalaj tiʼ Gedeón ka pʼáatak chéen yéetel 300 soldadoʼob (Jue. 7:8). Maʼ xaaneʼ Gedeóneʼ tu tuklaj: «¿Maʼalob wa le baʼax ku yaʼalaʼaltenaʼ? ¿Jeʼel wa in ganar chéen yéetel junpʼíit soldadoʼobeʼ?». Kex maʼ u yojel baʼaxten táan u yaʼalaʼaltiʼeʼ Gedeóneʼ tu beetaj. Teʼ kʼiinoʼobaʼ le ancianoʼoboʼ ku beetkoʼob jeʼex Gedeón kéen u beetoʼob le baʼax ku yaʼalik u kaajal Jéeobaoʼ (xok Hebreos 13:17). Por ejemploeʼ tu añoil 2014, le Cuerpo Gobernanteoʼ tu kʼexaj tuʼux kun chʼaʼabil u tojol utiaʼal u beetaʼal le lugaroʼob tuʼux k-muchʼikba utiaʼal le reuniónoʼoboʼ bey xan utiaʼal le asambleaʼoboʼ (2 Cor. 8:12-14). Kaʼacheʼ ku majáantaʼal taakʼin tiʼ le múuchʼuliloʼob utiaʼal ka u beetoʼob u salónoʼoboʼ, kéen tsʼoʼokkeʼ ku sutkoʼob le taakʼinoʼ. Pero bejlaʼeʼ tiʼ tuláakal le donación ku tsʼaʼabal tiʼ tuláakal yóokʼol kaaboʼ ku chʼaʼabal junjaats tiʼ le taakʼin utiaʼal u beetaʼal salónoʼob teʼ tuʼux kʼaʼabéetoʼ. Beyoʼ le sukuʼunoʼob kajaʼanoʼob teʼ tuʼux ku beetaʼal le salónoʼ maʼ tun chiʼichnaktaloʼob utiaʼal u sutkoʼob le taakʼinoʼ. Juntúul sukuʼun ku kʼaabaʼtik Joséeʼ le ka tu yojéeltaj le baʼax kun beetbilaʼ, tu tuklaj: «Maʼ xaaneʼ lelaʼ jeʼel u taasik utsil tuláakʼ tuʼuxeʼ, pero wayeʼ mix junpʼéel salón kun beetbil, jeʼel a wilkeʼexeʼ». Kex beyoʼ tu apoyartaj le kʼeex beetaʼaboʼ. ¿Baʼaxten? Letiʼeʼ ku yaʼalik: «Tin kʼaʼajseʼ Proverbios 3:5 yéetel 6, ku yaʼalikeʼ kʼaʼabéet in confiar tiʼ Jéeoba. Tin wileʼ le kʼeexaʼ tu taasaj yaʼab utsiloʼob tumen táan u beetaʼal yaʼab  salónoʼob yéetel táan u yáantaʼal yaʼab sukuʼunoʼob».

13. 1) ¿Baʼax ku creertik kaʼach Gedeón? 2) Le ancianoʼoboʼ, ¿bix jeʼel u beetkoʼob jeʼex Gedeóneʼ? (Ilawil xan le fotooʼ).

¹³ Maʼ a sajaktal a beeteʼex baʼax ku yaʼalik Jéeoba. Gedeóneʼ tu yuʼubaj u tʼaan Jéeoba kex sajak yéetel kex jeʼel tak u kíimsaʼaleʼ (Jue. 9:17). Letiʼeʼ jach tu creertaj yaan u yáantaʼal tumen Jéeoba u kanáant u kaajaloʼ. Le ancianoʼob kajaʼanoʼob teʼ tuʼux prohibirtaʼan u adorartaʼal Jéeobaoʼ ku beetkoʼob jeʼex Gedeóneʼ, maʼ tu chʼaʼikoʼob saajkil. Ku yilkoʼob ka beetaʼak reuniónoʼob yéetel ku nuʼuktikoʼob le kʼaʼaytaj kex u yojloʼob jeʼel u kʼaʼalaloʼobeʼ, jeʼel u luʼsaʼal meyajtiʼobeʼ wa jeʼel tak u jaʼajatsʼaʼaloʼobeʼ. c Teʼ nojoch muʼyajiloʼ le ancianoʼoboʼ yaan u kʼaʼabéettal maʼ u chʼaʼikoʼob saajkil utiaʼal u beetkoʼob le baʼax ku yaʼalik u kaajal Diosoʼ. Maʼ xaaneʼ yaan u yaʼalaʼal ka kʼaʼaytaʼak le yaayaj baʼaloʼob kun úuchul tiʼ le máaxoʼob maʼ tu yuʼubikoʼob u tʼaan Diosoʼ. Lelaʼ bey jeʼex ka kʼáaxak bat tu yóokʼoloʼobeʼ. Wa maʼ xaaneʼ yaan u yaʼalaʼal baʼax unaj u beetik máak utiaʼal u salvarkuba kéen atacarnak Gog ku taal tiʼ u luʼumil Magog (Eze. 38:18; Apo. 16:21).

14. ¿Baʼax tu beetaj Gedeón kex jach kaʼanaʼan kaʼachi?

¹⁴ Gedeóneʼ jach tu xupuba u tsʼoʼokbes le meyaj kʼubéentaʼabtiʼoʼ. Jeʼex le áakʼab ka baʼatelnaj yéetel le madianitaʼoboʼ tu chʼaʼpachtoʼob desde tu táax luʼumil Jezreel tak teʼ río Jordánoʼ. Maʼ xaaneʼ u jáal le ríooʼ chuup yéetel kʼiʼix (Jue. 7:22). Kex tsʼoʼok u sen kaʼanal Gedeón yéetel le 300 soldadoʼoboʼ tu kʼáatmáansoʼob le ríooʼ ka seguernaj u chʼaʼpachtikoʼob le madianitaʼoboʼ. Tu tsʼookeʼ tu chukpachtoʼob le madianitaʼoboʼ ka tu ganartoʼob (Jue. 8:4-12).

15. ¿Baʼax jeʼel u beetik u kaʼanal le ancianoʼoboʼ?

¹⁵ Le ancianoʼoboʼ kʼaʼabéet u kanáantkoʼob le múuchʼuliloʼ bey xan u familiaʼob. Chéen baʼaleʼ lelaʼ jach jeʼel u beetik u kaʼanaloʼobeʼ. Kéen u yuʼububaʼob beyoʼ, ¿bix jeʼel u yáantaʼaloʼob tumen u ejemplo Gedeóneʼ?

16, 17. 1) ¿Baʼax áant Gedeón kex tsʼoʼok u sen kaʼanal? 2) ¿Baʼax jach u yojel le ancianoʼoboʼ? (Isaías 40:28-31; ilawil xan le fotooʼ).

 ¹⁶ Jéeoba kun tsʼáaikteʼex muukʼ. Le ka tu yuʼubaj jach tsʼoʼok u kaʼanaleʼ Gedeóneʼ confiarnaj yaan u tsʼaʼabal muukʼ tiʼ tumen Jéeoba (Jue. 6:14, 34). Juntéenjeakeʼ Gedeón yéetel u soldadoʼobeʼ áalkabil tu chʼaʼpachtiloʼob kaʼatúul tiʼ u reyiloʼob Madián, maʼ xaaneʼ le reyoʼoboʼ u natʼmaj u camelloʼob le táan u púutsʼloʼoboʼ (Jue. 8:12, 21). Pero yéetel u yáantaj Jéeobaeʼ le israelitaʼoboʼ tu chukpachtoʼob le reyoʼoboʼ ka tu ganartoʼob. Le ancianoʼoboʼ jeʼel xan u páajtal u confiaroʼob tiʼ Jéeoba, le Máax «mix juntéen ku kaʼanal» yéetel «mix juntéen ku yuʼubik minaʼan u muukʼ[oʼ]». Jéeoba kun tsʼáaik u muukʼoʼob le kéen u yuʼuboʼob tsʼoʼok u kaʼanaloʼob (xok Isaías 40:28-31).

¹⁷ Koʼox ilik baʼax úuch tiʼ Matthew, letiʼeʼ ku meyaj tiʼ junpʼéel Comité de Enlace yéetel le Hospitaloʼoboʼ. ¿Baʼax áantik utiaʼal u tsʼoʼokbesik u asignación? Letiʼeʼ ku yaʼalik: «Tsʼoʼok in wilik jach jaaj baʼax ku yaʼalik Filipenses 4:13. Kéen in wuʼuy jach kaʼanaʼanen yéetel mix tuʼux u taal u maasileʼ kin orar tiʼ Jéeoba yéetel kin kʼáatiktiʼ ka u tsʼáaten u muukʼil utiaʼal ka seguernak in wáantik le sukuʼunoʼoboʼ. Kéen tsʼoʼokok in orareʼ kin wuʼuyik bix u tsʼáaikten muukʼ Jéeoba utiaʼal in tsʼoʼokbesik in asignaciónoʼ». Jeʼex Gedeóneʼ le ancianoʼob xanoʼ jach ku xupkubaʼob utiaʼal u kanáantkoʼob le sukuʼunoʼob kex yaan hora maʼ chéen chʼaʼabil u beetkoʼoboʼ. Chéen baʼaleʼ kʼaʼabéet kabal u yóoloʼob tumen maʼ tuláakal baʼal jeʼel u páajtal u beetkoʼobeʼ. Letiʼobeʼ u yojloʼob Jéeoba kun áantkoʼob yéetel letiʼ kun tsʼáaik u muukʼil tiʼob utiaʼal ka chúukpajak u yóoloʼob (Sal. 116:1; Fili. 2:13).

18. ¿Baʼax jeʼel u kanik le ancianoʼob tiʼ Gedeónoʼ?

¹⁸ Jeʼex k-ilkoʼ le ancianoʼoboʼ yaʼab baʼal jeʼel u kankoʼob tiʼ Gedeóneʼ. Por ejemploeʼ kʼaʼabéet u yeʼeskoʼob kabal óolal kéen tsʼaʼabaktiʼob wa baʼax meyajil teʼ múuchʼuliloʼ, kéen sen alabartaʼakoʼob yéetel maʼ unaj u kʼuuxiloʼob kéen aʼalaʼak baʼal tiʼobiʼ. Kʼaʼabéet maʼ u chʼaʼikoʼob saajkil yéetel u beetkoʼob baʼax ku yaʼalik u kaajal Jéeoba maases teʼ tu tsʼook kʼiinoʼobaʼ. Tsʼoʼoleʼ kʼaʼabéet u kʼaʼajskoʼobeʼ kéen u yuʼuboʼob kaʼanaʼanoʼobeʼ Jéeobaeʼ yaan u tsʼáaik muukʼ tiʼob. Le oʼolal kʼaʼabéet k-yaabiltik le ancianoʼoboʼ tumen jach yaʼab baʼax ku beetkoʼob utiaʼal u kanáantkoʼonoʼob (Fili. 2:29).