Le táan le Segunda Guerra Mundialoʼ in papáʼobeʼ lukʼoʼob Estoniaeʼ ka binoʼob kajtal Alemania, tiʼ síijeniʼ. Ka máan kʼiin túuneʼ tu chʼaʼtuklaj u binoʼob kajtal Canadá. Le ka kʼuchoʼon teʼeloʼ kajlajoʼon naatsʼ Ottawa, tu tuʼukʼil junpʼéel nuxiʼ soʼoy. Jach óotsiloʼon kaʼachi, pero kex chéen jeʼeʼ yaan utiaʼal k-jaantiʼ.

Juntéenjeakeʼ máan u testigoʼob Jéeoba tin wotocheʼ ka tu xokoʼob tiʼ in maama baʼax ku yaʼalik Apocalipsis 21:3 yéetel 4. Como jach kʼuch tu puksiʼikʼal le baʼax tu yuʼuboʼ káaj u yokʼol, le oʼolal maʼ xáanchaj ka okjaʼanaj in maama yéetel in papáiʼ.

Kex maʼ tu jach naʼatkoʼob ingléseʼ jach tu tsʼáaj u yóol u meyajtoʼob Jéeoba. In papáeʼ ku meyaj kaʼach tiʼ junpʼéel fábrica tuʼux ku yiʼibil níquel tu kaajil Sudbury (Ontario). Kex ku meyaj bul áakʼabeʼ cada sábadoeʼ ku bisken teen bey xan in wíitsʼin Sylvia teʼ kʼaʼaytajoʼ. Tsʼoʼoleʼ cada semana k-muchʼikba utiaʼal k-xokik le revista Le Máax ku Kananoʼ. In papá yéetel in maama áanten utiaʼal ka in yaabilt Jéeoba. Le oʼolal tu añoil 1956, le yaanten diez añosoʼ, tin kʼubaj in kuxtal tiʼ letiʼ. In papáʼobeʼ jach tu yaabiltoʼob Jéeoba, leloʼ tu yáanten utiaʼal ka in beet xan beyoʼ.

Le ka tin tsʼoʼoksaj in secundariaeʼ kʼexpaj in tuukul. Káaj in tuklikeʼ wa kin beetik in precursorileʼ maʼ ken in juntart taakʼin utiaʼal in viajar tiʼ avión utiaʼal in kʼaj óoltik uláakʼ lugaroʼob. Teʼ kʼiinoʼoboʼ káaj in meyaj tiʼ junpʼéel radiodifusora. Jach uts tin tʼaan le meyaj kin beetkoʼ tumen teen tsʼáaik kaʼach le paaxoʼ. Chéen baʼaleʼ como de áakʼab kin meyajeʼ maʼatech in jach bin teʼ reuniónoʼoboʼ, tsʼoʼoleʼ kin máansik yaʼab tiempo yéetel máaxoʼob maʼatech u meyajtikoʼob Jéeoba. Pero káaj u chiʼichnaktal in conciencia, le oʼolal joʼopʼ in beetik jujunpʼéel kʼeexoʼob ichil in kuxtal.

Binen kajtal Oshawa (Ontario). Teʼeloʼ tin kʼaj óoltaj yaʼab precursoroʼobiʼ, ichiloʼobeʼ tiaʼan kaʼach Ray Norman yéetel Lesli, u yíitsʼin. Tuláakloʼob jach maʼalob tu kʼamilenoʼob. Teneʼ tin wileʼ jach kiʼimak u yóoloʼob, le oʼolal taakchaj in beetik xan in precursoril. Le oʼolal tu mesil septiembre tiʼ 1966, káaj in beetik in precursoril. Jach kiʼimakchaj in wóol, chéen baʼaleʼ yaan baʼaloʼob ken u beet u kʼexpajal kaʼach in kuxtal.

Le táan in xook kaʼach secundariaoʼ tin chupaj u solicitudil utiaʼal in bin meyaj tu Betelil Toronto, Canadá. Ka máan kʼiin le táan in beetik in precursoriloʼ invitartaʼaben meyaj Betel cuatro años. Chéen baʼaleʼ como jach uts tin wich kaʼach Leslieʼ saajken maʼ  in kaʼa ilik wa kin bin Betel. Pero ka tsʼoʼok in sen orareʼ tin waʼalaj jeʼel in bineʼ, yéetel kex jach yaachaj in wóoleʼ tin despedirtinba tiʼ Lesli.

Le ka kʼuchen Beteleʼ meyajnajen junpʼéel tiempo lavandería, ka tsʼoʼokeʼ tin beetaj in secretarioil. Teʼ kʼiinoʼob xanoʼ Leslieʼ káaj u beet u precursora especialil tu kaajil Gatineau, (Quebec). Jach kin tuklik kaʼach Lesli, tsʼoʼoleʼ kin tuklik xan wa maʼalob le baʼax tin chʼaʼtuklaj in beetkoʼ. Chéen baʼaleʼ úuch junpʼéel baʼal jach maʼ tin páaʼtik kaʼachi. Invitartaʼab Ray, u sukuʼun Lesli meyaj Betel. ¡Hasta tsʼaʼab teʼ mismo cuarto tuʼux yanenoʼ! Bey úuchik in kaʼa biskinba yéetel Leslioʼ. Tsʼoʼok k-beel 27 tiʼ febrero tiʼ 1971, jach u tsʼook kʼiin tiʼ le cuatro años invitartaʼaben Beteloʼ.

Túuxtaʼaboʼon áantaj tiʼ junpʼéel múuchʼulil ich francés yaan Quebec. Ka máan kʼiineʼ invitartaʼaben in beet in superintendenteil tiʼ circuito, chéen baʼaleʼ como chéen 28 años yaanten kaʼacheʼ kin tuklik maʼ tin tsaʼayal in beet le meyajoʼ. Pero jach tu líiʼsaj in wóol le baʼax ku yaʼalik Jeremías 1:7 yéetel 8. Leslieʼ tsʼoʼok kaʼach u yantaltiʼ kaʼapʼéel accidenteʼob, tsʼoʼoleʼ istikyaj u yokol u wenel, le oʼolal jach kin tuklik kaʼach bix kun bintoʼon ken k-beet k-circuitoil. Chéen baʼaleʼ Leslieʼ tu yaʼalajten: «Wa Jéeoba aʼaliktoʼon ka k-beeteʼ, ¿maʼ wa túun kʼaʼabéet k-tsʼáaik k-óol beetiʼ?». Le oʼolal t-chʼaʼtuklaj k-kʼamik le invitaciónoʼ, 17 años t-beetaj le meyajoʼ.

Le táan in beetik in circuitoiloʼ jach yaʼab meyaj kin beetik, le oʼolal istikyaj in jóoʼsik tiempo utiaʼal in wantal yéetel Lesli. Chéen baʼaleʼ tin kanaj junpʼéel baʼal jach kʼaʼanaʼan. Junpʼéel lunes tempranoeʼ t-uʼuyaj u juum le timbreoʼ, chéen baʼaleʼ le ka tin jeʼekʼabtaj le joonajoʼ mix máak tin wiliʼ. Chéen yaan kaʼach junpʼéel canastaiʼ, ichileʼ yaan junpʼéel mantel, frutaʼob, waaj, queso, vino, copaʼob yéetel junpʼéel chan tarjeta ku yaʼalik: «Bis a watan xíimbal utiaʼal a jaantikeʼex le baʼaloʼobaʼ». U jaajileʼ jach maʼalob le kʼiin utiaʼal k-jóokʼol xíimbaloʼ, chéen baʼaleʼ kʼaʼabéet kaʼach in preparartik jujunpʼéel discursoʼob. Le oʼolal tin waʼalaj tiʼ Leslieʼ maʼ tun páajtal k-bin. Kex chan lúub u yóoleʼ tu yaʼalajten maʼalob. Le ka kulajen in preparart le discursoʼoboʼ káaj u chiʼichnaktal in conciencia, ka kʼaʼajten baʼax ku yaʼalik Efesios 5:25 yéetel 28. Ka túun tin tukleʼ míin Jéeoba táan u kʼaʼajsikten kʼaʼabéet in máansik tiempo yéetel in watan. Orarnajeneʼ ka tsʼoʼokeʼ tin waʼalaj tiʼ Lesli: «Koʼox». Letiʼeʼ jach kiʼimakchaj u yóol. Binoʼon tiʼ junpʼéel lugar jach jatsʼuts tu jáal junpʼéel río. Jach t-disfrutartaj le kʼiin jeʼeloʼ. Ka tsʼoʼokeʼ hasta anchajten tiempo utiaʼal in preparartik le discursoʼoboʼ.

Yaʼab tuʼux t-beetaj k-circuitoil, desde Columbia Británica tak Terranova. ¡Jach táan kaʼach u béeytal le baʼax tin tsʼíiboltaj desde tin chichniloʼ! Teneʼ in tukultmaj kaʼach in bin tu Escuelail Galaad, pero u jaajileʼ maʼ taak kaʼach in beetik in misioneroil tiʼ yaanal luʼumiliʼ. Tsʼoʼoleʼ kin tuklik kaʼacheʼ maʼ tin tsaʼayal in beet in misioneroil tumen maʼ jeʼel máaxak jeʼel u páajtal u beetik le meyajoʼ. Saajken xan in túuxtaʼal  kaʼach África tumen teʼeloʼ yaʼab kʼojaʼaniloʼob yaniʼ, tsʼoʼoleʼ jach yaan guerraiʼ. U jaajileʼ jach kiʼimak in wóol kaʼach yéetel le asignación yaantenoʼ.

Tu añoil 1992, aʼalaʼab yaan u béeytal k-kʼaʼaytaj tiʼ jujunpʼéel luʼumiloʼob formarmil le Unión Soviéticaoʼ. Ka túun kʼáataʼabtoʼon wa jeʼel k-beetik k-misioneroil Estoniaeʼ. Jach maʼ t-tuklaj wa yaan u yaʼalaʼaltoʼoniʼ, le oʼolal orarnajoʼon tiʼ Jéeoba ka t-aʼalaj tu kaʼatéen: «Wa Jéeoba aʼaliktoʼoneʼ, kʼaʼabéet k-beetik». Ka túun t-aʼalaj jeʼel k-bineʼ. Kʼajaʼanten xaneʼ tin tuklaj: «U maʼalobileʼ maʼ África táan k-túuxtaʼaliʼ».

Tu séebaʼanil joʼopʼ k-kanik estonio. Pero maʼ úuch kʼuchkoʼon Estoniaeʼ ka aʼalaʼabtoʼon ka k-beet k-circuitoil. Teʼeloʼ t-xíimbaltaj 46 múuchʼuliloʼob yéetel grupoʼob yaan tiʼ óoxpʼéel luʼumiloʼob teʼ Mar Bálticooʼ yéetel Kaliningrado, Rusia. Le oʼolal kʼaʼabéetchaj k-kanik le idioma letónoʼ, lituano yéetel rusooʼ. U jaajileʼ jach maʼ chéen chʼaʼabil u kanik máak le idiomaʼoboʼ, pero le sukuʼunoʼoboʼ jach tu yáantoʼonoʼob yéetel jach kiʼimakchaj u yóoloʼob tumen tu yiloʼob táan k-tsʼáaik k-óoliʼ. Tu añoil 1999, anchaj junpʼéel sucursal Estonia, ka tsʼaʼaben meyaj teʼ comité yéetel Toomas Edur, Lembit Reile yéetel Tommi Kauko.

T-kʼaj óoltaj yaʼab sukuʼunoʼob bisaʼaboʼob Siberia. Letiʼobeʼ kex kʼaʼaloʼob cárcel yéetel maʼ tu yilik kaʼach u familiaʼobeʼ maʼ lúub u yóoloʼobiʼ, baʼaxeʼ jach tu tsʼáaj u yóoloʼob kʼaʼaytaj. Leloʼ tu kaʼansajtoʼoneʼ kex jeʼel bukaʼaj yajil le baʼax k-aktáantikoʼ jeʼel u kiʼimaktal k-óoleʼ yéetel jeʼel xan u chúukpajal k-óoleʼ.

Tiʼ le bukaʼaj años joʼopʼok k-meyajtik Jéeobaoʼ óoliʼ maʼatech k-jeʼelel, Lesli túuneʼ káaj u sen kaʼanal. Maʼ k-ojel kaʼach wa yaan fibromialgia tiʼiʼ, le oʼolal káaj k-tuklik maas maʼalob ka suunakoʼon Canadá. Ka invitartaʼaboʼon tiʼ junpʼéel xook ku beetaʼal Patterson, Nueva Yorkeʼ tin tuklaj maʼ tun páajtal k-bineʼ. Pero ka tsʼoʼok k-sen orareʼ t-kʼamaj le invitaciónoʼ. Jéeobaeʼ jach tu bendecirtoʼon tumen le tiaʼanoʼon teʼeloʼ tsʼaʼab le tratamiento kʼaʼabéet tiʼ Leslioʼ. Le oʼolal páajchaj u seguer k-meyaj Betel.

Le tsʼoʼok k-suut Estonia tu añoil 2008, junpʼéel áakʼabeʼ le sukuʼunoʼob yanoʼob teʼ central mundialoʼ tu tʼanenoʼobeʼ ka tu kʼáatoʼobten wa jeʼel k-bin áantaj República Democrática del Congoeʼ. Maʼ tin kaxtaj baʼax in waʼaliʼ, letiʼobeʼ tu yaʼaloʼobeʼ tu séebaʼanil kʼaʼabéet k-aʼalik baʼax ken k-beete. Teʼ áakʼaboʼ maʼ tin waʼalaj mix baʼal tiʼ Lesliiʼ utiaʼal maʼ u bin u wenel. Pero teneʼ maʼ weenen bul áakʼabiʼ tumen táan kaʼach in waʼalik tiʼ Jéeoba baʼaxten saajken bin África.

Ka sáaschajeʼ tin tsikbaltaj tiʼ Lesli, ka túun t-aʼalaj: «Jéeoba aʼaliktoʼon ka xiʼikoʼon África, maʼ tu páajtal k-aʼalik maʼ t-tsaʼayal wa mix juntéen xiʼikoʼoniʼ». Bey túunoʼ kex tsʼoʼok 16 años táan k-áantaj Estoniaeʼ, binoʼon Kinsasa. Jach jatsʼuts t-ilil le jardín yaan teʼ sucursaloʼ yéetel jach táaj yaan jeetsʼeliliʼ. Junpʼéel tiʼ le yáax baʼaloʼob tu tsʼáaj Lesli teʼ cuarto tsʼaʼabtoʼonoʼ junpʼéel tarjeta u líiʼsmaj desde ka lukʼoʼon Canadá. Teʼeloʼ ku yaʼalik: «¡Kiʼimakchajak a wóol jeʼel tuʼuxak ka túuxtaʼakecheʼ!». T-tsʼáaj cuentaeʼ jach yaan u kiʼimaktal k-óol yéetel le  túumben asignación le ka t-kʼaj óoltaj le sukuʼunoʼoboʼ, ka joʼopʼ k-tsʼáaik xook yéetel le Bibliaoʼ bey xan ka t-ilaj bix u kuxtal le misioneroʼoboʼ. Ka máan kʼiineʼ páajchaj k-bin tiʼ 13 u luʼumiloʼob yanoʼob África utiaʼal k-xíimbaltik jujunpʼéel sucursaloʼob. Lelaʼ tu beetaj k-kʼaj óoltik yaʼab máakoʼob yéetel bix kuxlikoʼob. Yoʼolal leloʼ xuʼul in chiʼichnaktal yéetel t-tsʼáaj gracias tiʼ Jéeoba úuchik u túuxtikoʼon África.

Le tiaʼanoʼon Kinsasa, u noj kaajil el Congooʼ, tsʼaʼabtoʼon k-jaant baʼaloʼob maʼ t-tuklaj wa yaan k-jaantikiʼ. Chéen baʼaleʼ le ka t-ilaj bix kiʼil u jaantik le sukuʼunoʼoboʼ káaj k-jaantik yéetel jach kiʼ t-uʼuyil.

Páajchaj k-bin tu lakʼinil le luʼumiloʼ, teʼeloʼ t-líiʼsaj u yóol le sukuʼunoʼoboʼ yéetel t-bisaj le baʼaxoʼob kʼaʼabéettiʼoboʼ. Teʼeloʼ jach yaan máakoʼob ku beetkoʼob u kʼasaʼanil tiʼ le koʼoleloʼoboʼ bey xan tiʼ le mejen paalaloʼoboʼ. U maas yaʼabil tiʼ le sukuʼunoʼoboʼ óotsiloʼob, pero kex beyoʼ jach u yaabiltmoʼob Jéeoba, jach ku creerkoʼob yaan u kaʼa kuxtal le kimenoʼoboʼ yéetel chúukaʼan u yóoloʼob tiʼ baʼax ku yaʼalik u kaajal Jéeoba. U ejemplo le sukuʼunoʼobaʼ jach tu líiʼsaj k-óol. Yaan tiʼ letiʼobeʼ tu perdertaj u yotoch yéetel u paakʼaloʼob. Leloʼ tu kaʼansajteneʼ jach séeb jeʼel u perdertik máak le baʼaxoʼob yaantiʼoʼ, le oʼolal maas maʼalob ka k-muchʼkíint ayikʼaliloʼob teʼ kaʼanoʼ. Kex jach ku muʼyajoʼobeʼ le sukuʼunoʼoboʼ maʼatech u quejarkubaʼob, le chúukaʼan óolal tu yeʼesoʼoboʼ tu yáantoʼon utiaʼal u chúukpajal k-óol kex yaantoʼon problemas yéetel kex kʼojaʼanoʼon.

Junpʼéel kʼiineʼ chéen ka aʼalaʼabtoʼon yaan k-bin áantaj tu sucursalil Hong Kong. Junpuliʼ maʼ máan t-tuukul wa yaan k-bin áantaj Asiaiʼ. Como tsʼoʼok k-ilik bix u yáantkoʼon Jéeoba tiʼ tuláakal le asignaciónoʼob tsʼoʼok u tsʼaʼabaltoʼonoʼ, teʼ vezaʼ hasta maʼ t-tukliʼ. Tu añoil 2013 kaʼ lukʼoʼon África, hasta táan k-okʼol le táan k-despedirtikba tiʼ le sukuʼunoʼoboʼ yéetel tiʼ le jatsʼuts luʼumiloʼ.

Jach kʼexpaj k-kuxtal ka binoʼon kajtal Hong Kong, le kaajoʼ jach táaj nojoch yéetel kajaʼan máakoʼob jejeláas tuʼux u taaloʼob, tsʼoʼoleʼ maʼ chéen chʼaʼabil t-ilil k-kanik chino cantonesiʼ. Como táan u maas yaʼabtal le meyajoʼ, kʼaʼabéetchaj xan u maas nojochkíintaʼal le sucursaloʼ, pero le terrenoʼoboʼ jach táaj koʼojtakoʼob. Le oʼolal le Cuerpo Gobernanteoʼ tu chʼaʼtuklaj u bisaʼal le sucursal yaanal tuʼuxoʼ yéetel u  koʼonol u maas yaʼabil tiʼ le propiedadoʼoboʼ. Tu añoil 2015, túuxtaʼaboʼon Corea del Sur, tak bejlaʼa kajaʼanoʼon teʼeloʼ. Anchaj xan k-kanik coreano. Kex maʼ t-jach tʼanik tubeeleʼ, le sukuʼunoʼoboʼ ku yaʼalikoʼobeʼ ku naʼatkoʼob le baʼax k-aʼalikoʼ.

U jaajileʼ maʼ chéen chʼaʼabil u yantal u amigoʼob máakiʼ. Pero tsʼoʼok k-kanikeʼ wa desde tu káajbal k-eʼesik utsil tiʼ u maasileʼ, maas chéen chʼaʼabil jeʼel u káajal k-bisikba tu yéeteloʼobeʼ. Tiʼ le bukaʼaj tuʼux tsʼoʼok k-máanoʼ tsʼoʼok k-ilkeʼ jeʼel u páajtal k-bisikba yéetel le sukuʼunoʼoboʼ bey xan k-yaabiltikoʼob, chéen kʼaʼabéet «k-jeʼik k-puksiʼikʼal» tiʼ letiʼob (2 Cor. 6:11).

Tsʼoʼok k-kanikeʼ kʼaʼabéet k-yaabiltik tuláakal máak jeʼex u beetik Jéeobaoʼ. Kʼaʼabéet xan k-ilik baʼaxoʼob eʼesik jach yaabiltaʼanoʼon tumen Jéeoba yéetel bix u nuʼuktik k-kuxtal. Cada ken lúubuk k-óol wa kéen k-tukult maʼ maʼalob k-lúubul tiʼ u maasileʼ k-jóoʼsik le tarjetaʼob yéetel le cartaʼob ku túuxtaʼaltoʼon tumen k-amigoʼob utiaʼal u líiʼskoʼob k-óoloʼ. Tsʼoʼok k-ilik bix u núukik Jéeoba k-oraciónoʼob, bix u líiʼsik k-óol yéetel bix u tsʼáaiktoʼon muukʼ jach teʼ súutukil kʼaʼabéettoʼonoʼ.

Tiʼ tuláakal le años tsʼoʼok u máanoʼ, teen yéetel Leslieʼ tsʼoʼok k-tsʼáaik cuentaeʼ kex jeʼel bukaʼaj baʼaloʼob yaan k-beeteʼ kʼaʼabéet k-múul máansik tiempo. Tsʼoʼok xan k-kanikeʼ maʼ unaj u lúubul u yóol máak kex wa chich u pool utiaʼal u kanik junpʼéel túumben idiomaiʼ. Sáamsamal de áakʼabeʼ k-tuukul tiʼ junpʼéel baʼal jach jatsʼuts t-ilil teʼ kʼiinoʼ utiaʼal k-tsʼáaik gracias tiʼ Jéeoba.

U jaajileʼ junpuliʼ maʼ máan tin tuukul wa yaan in beetik in misioneroiliʼ bey xan wa yaan in bin kajtal tiʼ uláakʼ luʼumiloʼobiʼ. Pero jach kiʼimak in wóol tumen tsʼoʼok in wilkeʼ tuláakal baʼal jeʼel u páajtal k-beetik yéetel u yáantaj Jéeobaeʼ. Kin waʼalik jeʼex profeta Jeremíaseʼ: «Jéeoba Dios, techeʼ ta beetaj in kʼexik le bix in tuukul kaʼachoʼ» (Jer. 20:7) Jéeobaeʼ jach tsʼoʼok u bendecirkoʼon, tu tsʼáajtoʼon baʼaloʼob junpuliʼ maʼ t-páaʼtik kaʼachi. ¡Hasta tu beetaj in viajar tiʼ avión, le baʼax kin tsʼíiboltik kaʼach desde tin paaliloʼ! Tsʼoʼok xan in bin tiʼ lugaroʼob maʼ máan tin tuukul wa yaan in biniʼ. T-xíimbaltaj u sucursaliloʼob cinco continenteʼob. Jach kin tsʼáaik u diosboʼotikil tiʼ Lesli tumen jach tu yáanten yéetel jach tu tsʼáaj u yóol tiʼ tuláakal le asignaciónoʼob anchajtoʼonoʼ.

Mantatsʼ k-kʼaʼajsikeʼ tuláakal le baʼaxoʼob k-beetkoʼ k-beetik tumen k-yaabiltmaj Jéeoba. Le bendiciónoʼob yaantoʼon bejlaʼeʼ chéen junpʼíit tiʼ le bukaʼaj bendiciónoʼob ken u tsʼáatoʼon Jéeoba teʼ túumben luʼumoʼ. Letiʼeʼ yaan u jeʼekʼabtik u kʼab utiaʼal u tsʼáaik «baʼax ku tsʼíiboltik tuláakal baʼal kuxaʼan» (Sal. 145:16).