XOOK 23
KʼAAY 28 In kʼáat in bisinba yéetel Jéeoba
Jéeobaeʼ ku invitarkoʼon tu yotoch
«In wotocheʼ yaan u yantal tu yóokʼoloʼob. Yaan in beetkinba u Diosoʼob»(EZE. 37:27).
BAʼAX KEN K-KANE
Le xookaʼ yaan u yáantkoʼon k-ileʼ junpʼéel nojoch privilegio u kʼamkoʼon Jéeoba ichil u yotoch, yéetel yaan u yáantkoʼon xan utiaʼal ka k-il bix u kanáantkoʼon.
1, 2. ¿Baʼax jatsʼuts privilegioil u tsʼaamajtoʼon Jéeoba?
WA KA kʼáataʼaktech máax tech Jéeobaeʼ, maʼ xaaneʼ jeʼel a waʼalikeʼ: «Jéeobaeʼ in amigo, in Taata yéetel in Dios». Wa maʼ xaaneʼ jeʼel xan a waʼalik uláakʼ baʼaloʼob beyoʼ. Chéen baʼaleʼ, ¿jeʼel wa a waʼalik letiʼe máax kʼammilech tu yotochoʼ?
2 Rey Davideʼ tu yaʼaleʼ le bix u biskuba Jéeoba yéetel le máaxoʼob meyajtikoʼ bey jeʼex le jatsʼuts bisbail ku yantal tiʼ juntúul máak yéetel u yuʼulaboʼoboʼ. Letiʼeʼ tu yaʼalaj: «Jéeoba Dios, ¿máax jeʼel a kʼamik bey uʼulab ta wotocheʼ? ¿Máax jeʼel u béeytal u kajtal teʼ montaña a yéeymoʼ?» (Sal. 15:1). Le baʼax ku yaʼalik le tekstoaʼ ku kaʼansiktoʼoneʼ jeʼel u páajtal u kʼamkoʼon Jéeoba tu yotocheʼ wa jeʼel u páajtal k-beetikba u amigoeʼ. ¿Máasaʼ le jeʼeloʼ junpʼéel nojoch privilegio?
JÉEOBAEʼ TAAK U INVITARKOʼON TU YOTOCH
3. 1) ¿Máax tu yáax kʼamaj Jéeoba tu yotoch? 2) ¿Bix tu yuʼubiluba Jéeoba yéetel u Hijo?
3 Jéeobaeʼ chéen tu juunal kaʼach yaan, chéen baʼaleʼ kʼuch u kʼiinil u beetik u yáax Hijo. Letiʼe yáax máax tu kʼamaj tu yotochoʼ. Jach kiʼimakchaj wal u yóol úuchik u kʼamik u Hijo tu yotocheʼ. Le Bibliaoʼ ku yaʼalikeʼ ‹jach ku beetaʼal u kiʼimaktal u yóol› tumen u Hijo. U Hijo xaneʼ ‹mantatsʼ kaʼach kiʼimak u yóol tu táan› (Pro. 8:30).
4. ¿Máaxoʼob xan tu invitartaj Jéeoba tu yotoch?
4 Le ka máan kʼiineʼ Jéeobaeʼ tu beetaj le ángeloʼoboʼ ka tu invitartoʼob xan tu yotoch. Le Bibliaoʼ ku yaʼalikeʼ le ángeloʼoboʼ «u paalal Dios» yéetel kiʼimak u yóoloʼob yanikoʼob tu yiknal Jéeoba (Job 38:7, nota; Dan. 7:10). Ichil yaʼab añoseʼ Jéeobaeʼ chéen páajchaj u biskuba yéetel le ángeloʼob yanoʼob teʼ kaʼanoʼ. Chéen baʼaleʼ le ka máan kʼiineʼ tu beetaj wíinik, ka túun tu invitartaj jujuntúul tiʼ letiʼob tu yotochiʼ. Ichiloʼobeʼ tiaʼan Enok, Noé, Abrahán yéetel Job. Yaan tiʼ letiʼobeʼ ku yaʼalaʼaleʼ u amigoʼob Dios wa yaan xan tiʼ letiʼobeʼ ku yaʼalaʼaleʼ «tu beetaj le baʼax uts tu tʼaan le u jaajil Diosoʼ» (Gén. 5:24; 6:9; Job 29:4; Isa. 41:8).
5. ¿Baʼax ku yeʼesiktoʼon le profecía yaan tiʼ Ezequiel 37:26, 27?
5 Ichil yaʼab añoseʼ Jéeobaeʼ seguernaj u invitartik u amigoʼob tu yotoch (xok Ezequiel 37:26, 27). Le profecía tu yaʼalaj Ezequieloʼ ku yeʼesiktoʼoneʼ Dioseʼ jach taak u biskuba yéetel le máaxoʼob meyajtikoʼ. Letiʼeʼ tu yaʼaleʼ yaan u beetik «junpʼéel pacto tu yéeteloʼob utiaʼal u yantal jeetsʼelil» tiʼob. Le profecíaaʼ yaan kaʼach u béeytal le kéen pʼáatkoʼob «junmúuchʼ» ichil u yotoch Jéeoba le máaxoʼob kun binoʼob teʼ kaʼanoʼ yéetel le máaxoʼob kun pʼáatloʼob kajtal way Luʼumeʼ (Juan 10:16). Le profecíaaʼ táan u béeytal teʼ kʼiinoʼobaʼ.
JEʼEL TUʼUXAK YANOʼONEʼ JÉEOBAEʼ KU KANÁANTKOʼON
6. ¿Baʼax unaj k-beetik utiaʼal k-okol tu yotoch Jéeoba, yéetel tuʼux yaan le u yotochoʼ?
6 Úuchjeakileʼ ichil junpʼéel naj de nookʼeʼ jeʼel u páajtal u jeʼelel máakeʼ yéetel tiʼ ku kanáantkuba tiʼ jaʼ wa tiʼ kʼiiniʼ. Tsʼoʼoleʼ le kéen okok kaʼach máak tiʼ junpʼéel naj de nookʼeʼ u yojel yaan u kʼaʼamal maʼalob. Bey túun xanoʼ le kéen k-kʼub k-kuxtal tiʼ Jéeobaeʼ jeʼel u páajtal k-aʼalikeʼ bey táan k-okol tu yotocheʼ (Sal. 61:4). Teʼeloʼ ku páajtal k-disfrutartik yaʼab janal espiritual yéetel ku béeytal k-bisikba yéetel le uláakʼ máaxoʼob tsʼoʼok u invitartaʼaloʼob tumen Jéeobaoʼ. ¿Tuʼux túun yaan le u yotoch Jéeoba ku yaʼalik le Bibliaoʼ? Maʼ chéen tiʼ junpʼéel lugar yaniʼ, baʼaxeʼ tiaʼan tiʼ jeʼel tuʼuxak yaan máaxoʼob meyajtik Jéeobaeʼ. Leloʼ bey tsʼoʼok u yilik le sukuʼunoʼob tsʼoʼok u binoʼob táanxel luʼumiloʼ. Maʼ xaaneʼ binoʼob utiaʼal junpʼéel asamblea especial. Letiʼobeʼ tsʼoʼok u kʼaj óoltikoʼob uláakʼ máaxoʼob tsʼoʼok u invitartaʼaloʼob tumen Jéeoba (Apo. 21:3).
7. ¿Baʼaxten k-aʼalikeʼ le máaxoʼob chúukpaj u yóoloʼob tak ka kíimoʼoboʼ láayliʼ tiaʼanoʼob ichil u yotoch Jéeobaeʼ? (Ilawil xan le fotooʼ).
7 Kux túun le máaxoʼob chúukpaj u yóoloʼob tak ka kíimoʼoboʼ, ¿láayliʼ wa tiaʼanoʼob ichil u yotoch Jéeobaeʼ? ¡Láayliʼ tiaʼanoʼobeʼ! ¿Baʼaxten k-aʼalik leloʼ? Tumen le Bibliaoʼ ku yaʼalikeʼ láayliʼ kuxaʼanoʼobeʼ tumen maʼatech u tuʼubsaʼaloʼob tumen Jéeoba. Jesúseʼ tu yaʼalaj: «Le kimenoʼoboʼ yaan u kaʼa kuxkíintaʼaloʼob, tak Moiséseʼ bey tu yeʼesil teʼ tu tsikbalil le chan cheʼ ku tóochʼbal u kʼáakʼiloʼ. Teʼeloʼ tu yaʼaleʼ Jéeobaeʼ ‹u Dios Abrahán, u Dios Isaak yéetel u Dios Jacob›. Utiaʼal letiʼeʼ le máakoʼobaʼ kuxaʼanoʼob, tumen letiʼeʼ maʼ u Dios kimenoʼobiʼ, baʼaxeʼ u Dios máaxoʼob kuxaʼanoʼob» (Luc. 20:37, 38).
Le máaxoʼob chúukpaj u yóoloʼob tak ka kíimoʼoboʼ láayliʼ tiaʼanoʼob tu yotoch Jéeobaeʼ (Ilawil párrafo 7)
LE UTSILOʼOB K-KʼAMKOʼ YÉETEL LE BAʼAXOʼOB KU PÁAʼTAʼAL KA K-BEETOʼ
8. ¿Baʼax utsiloʼob k-kʼamik ichil u yotoch Jéeoba?
8 Ichil junpʼéel naj de nookʼeʼ ku béeytal u jeʼelel máakiʼ yéetel ku béeytal u kanáantkuba tiʼ le kʼiin yéetel tiʼ le jaʼoʼ. U yotoch xan Jéeobaeʼ ku kanáantkoʼon tiʼ le baʼaloʼob jeʼel u náachkuntkoʼon tiʼ letiʼoʼ yéetel ku tsʼáaiktoʼon esperanza. Wa k-pʼáatal naatsʼ tiʼ Jéeobaeʼ jeʼel baʼaxak ka u beettoʼon le Kʼaasilbaʼaloʼ Jéeobaeʼ yaan u yutskíintik (Sal. 31:23; 1 Juan 3:8). Tsʼoʼoleʼ teʼ túumben luʼumoʼ Jéeobaeʼ yaan u seguer u kanáantik le máaxoʼob kun chúukpajal u yóoloʼoboʼ. Yaan u kanáantkoʼob tiʼ jeʼel baʼaxakeʼ tak tiʼ le kíimiloʼ (Apo. 21:4).
9. ¿Baʼax unaj k-beetik utiaʼal u seguer k-pʼáatal tu yotoch Jéeoba?
9 Junpʼéel nojoch privilegio u chaʼik Jéeoba k-antal ichil u yotoch bey xan u béeytal k-bisikba tu yéetel utiaʼal mantatsʼ. Chéen baʼaleʼ, ¿baʼax unaj k-beetik utiaʼal u seguer k-pʼáatal ichil u yotoch? Wa ku invitarkoʼon juntúul máak tu yotocheʼ, ¿máasaʼ unaj k-ojéeltik baʼax ku páaʼtik tiʼ toʼon? Maʼ xaaneʼ letiʼeʼ uts tu tʼaan ka k-luʼs k-xaanab antes tiʼ k-okol tu yotoch. Leloʼ jeʼel k-beetik yéetel kiʼimak óolaleʼ. Bey túun xanoʼ, toʼon tiaʼanoʼon ichil u yotoch Jéeobaeʼ unaj k-ojéeltik baʼax ku páaʼtik ka k-beete utiaʼal u seguer k-pʼáatal ichil u yotoch. Toʼoneʼ k-yaabiltmaj Jéeoba, le oʼolal k-ilik beetik tuláakal le ku páajtal utiaʼal k-beetik baʼax «uts tu tʼaan» (Col. 1:10). Toʼoneʼ maʼalob k-bisikba yéetel Jéeoba, chéen baʼaleʼ maʼatech u tuʼubultoʼoneʼ letiʼeʼ k-Taata yéetel k-Dios, le oʼolal jach unaj k-respetartik (Sal. 25:14). Tumen k-respetarkeʼ k-ilik maʼ k-beetik mix baʼal kʼaas jeʼel u beetik u kʼuuxileʼ, toʼoneʼ k-kʼáat beetba mantatsʼ humildeil tu táan Dios (Miq. 6:8).
TEʼ DESIERTOOʼ IGUAL TU TRATARTIL TULÁAKAL
10, 11. ¿Baʼax ejemploil eʼesikeʼ Jéeobaeʼ igual bix u tratartik le máaxoʼob meyajtikoʼ?
10 Desde úuchjeakileʼ Jéeobaeʼ mix máak jelaʼan bix u paktik (Rom. 2:11). Leloʼ bey u yeʼesik le bix úuchik u tratartik le israelitaʼob le ka máanoʼob tu desiertoil Sinaíoʼ.
11 Le ka tsʼoʼok u jáalkʼabtik u kaajal esclavizartaʼan kaʼach Egiptooʼ Jéeobaeʼ tu tsʼáaj sacerdoteʼob utiaʼal ka meyajnakoʼob teʼ tabernáculooʼ. Tsʼoʼoleʼ tu kʼubéentaj xan tiʼ le levitaʼob ka u beetoʼob uláakʼ meyajoʼob yaan u yil yéetel le tabernáculooʼ. ¿Maas wa maʼalob bix u kanáantik kaʼach le máaxoʼob ku meyajoʼob teʼ tabernáculo wa le máaxoʼob kajaʼanoʼob naatsʼ tiʼoʼ? Maʼatech, Jéeobaeʼ igual kaʼach bix u kanáantik le israelitaʼoboʼ.
12. ¿Baʼax eʼesik Jéeobaeʼ igual bix tu tratartil le israelitaʼob teʼ desiertooʼ? (Éxodo 40:38; ilawil xan le dibujoʼoboʼ).
12 Cada juntúul israelitaeʼ tsʼaʼantiʼ kaʼach u oportunidadil u beetkuba u amigo Jéeoba, kex jeʼel baʼalak meyajil tsʼaʼan kaʼach tiʼ tumen Dioseʼ, kex wa náach wa naatsʼ kajaʼan tiʼ le tabernáculooʼ. Leloʼ k-aʼalik beyoʼ tumen le múuyal yéetel le kʼáakʼ tu tsʼáaj Jéeoba yóokʼol le tabernáculooʼ béeychaj u yilaʼal tumen tuláakal le kaajoʼ (xok Éxodo 40:38). Bey túunoʼ le kéen péeknak le múuyal utiaʼal u bin wa tuʼuxoʼ tuláakal le israelitaʼoboʼ ku páajtal u yilkoʼob. Le oʼolal ku molik u nuʼukuloʼob, ku desarmartik u yotochoʼob yéetel ku páajtal u binoʼob tuʼux ku bin u maasiloʼoboʼ (Núm. 9:15-23). Tsʼoʼoleʼ tuláakal kaʼach ku yuʼubik u juum le kaʼapʼéel trompeta de plata ku yustaʼal utiaʼal u káajal u binoʼoboʼ (Núm. 10:2). Leloʼ ku yeʼesikeʼ le u kajtal máak kaʼach maas naatsʼ tiʼ le tabernáculooʼ maʼ u kʼáat u yaʼal wa maas jach ku biskuba yéetel Jéeobaiʼ. Baʼaleʼ tuláakal le israelitaʼoboʼ jeʼel u páajtal u yantaloʼob ichil u yotoch Jéeoba utiaʼal u kanáantaʼaloʼob yéetel utiaʼal u nuʼuktaʼaloʼobeʼ. Bejlaʼeʼ láayliʼ xan bey u yúuchloʼ, kex jeʼel tuʼuxak kajaʼanoʼoneʼ Jéeobaeʼ u yaabiltmoʼon yéetel ku kanáantkoʼon.
Le tabernáculooʼ tiaʼan kaʼach chúumuk teʼ tuʼux kajaʼan le israelitaʼoboʼ, leloʼ ku yeʼesikeʼ igual bix úuchik u tratartaʼaloʼob (Ilawil párrafo 12)
JÉEOBAEʼ IGUAL U TRATARTIK LE MÁAXOʼOB MEYAJTIKOʼ
13. Teʼ kʼiinoʼobaʼ, ¿bix u yeʼesik Jéeoba igual bix u tratartik tuláakal le máaxoʼob meyajtikoʼ?
13 Jujuntúul sukuʼunoʼobeʼ kajaʼanoʼob naatsʼ tiʼ le sede mundialoʼ wa tiʼ junpʼéel u najil Betel. Como naatsʼ kajlikoʼob teʼ lugaroʼobaʼ, ku páajtal u beetkoʼob jejeláas meyajoʼobiʼ yéetel maas naatsʼ yaniloʼob tiʼ le sukuʼunoʼob nuʼuktik le meyaj k-beetkoʼ. Tsʼoʼoleʼ yaan sukuʼunoʼobeʼ ku beetik u superintendenteiloʼob tiʼ circuito wa tsʼaʼantiʼob uláakʼ jatsʼuts meyajoʼob ichil u kaajal Jéeoba. Chéen baʼaleʼ u maas yaʼabil tiʼ le máaxoʼob meyajtik Jéeobaoʼ minaʼantiʼob mix junpʼéel tiʼ le jatsʼuts privilegioʼob tsʼoʼok k-aʼalikoʼ. Wa tiʼ teech minaʼan mix junpʼéel tiʼ le privilegioʼobaʼ maʼ u tuʼubultecheʼ Jéeobaeʼ u yaabiltmech, ku kʼamkech ichil u yotoch yéetel ku kanáantkech (1 Ped. 5:7). Jach beyoʼ Jéeobaeʼ yaan u tsʼáaiktech le janal espiritualoʼ, yaan u kanáantkech yéetel yaan u nuʼuktikech jeʼex u beetik yéetel tuláakal le máaxoʼob meyajtikoʼ.
14. ¿Baʼax uláakʼ eʼesik Jéeobaeʼ igual bix u tratartik tuláakal máak?
14 Uláakʼ baʼax eʼesik Jéeobaeʼ igual bix u tratartik tuláakal máakeʼ letiʼe úuchik u tsʼáaik u páajtalil u xoʼokol le Biblia tumen tuláakal máakoʼ. Tu káajbaleʼ le Bibliaoʼ tsʼíibtaʼab ichil le óoxpʼéel idiomaʼobaʼ: hebreo, arameo yéetel griego. ¿U kʼáat wa túun u yaʼaleʼ le máaxoʼob ku béeytal u xokikoʼob le Biblia ichil le idiomaʼobaʼ maas naatsʼ yaniloʼob tiʼ Jéeoba? Maʼ, maʼatech (Mat. 11:25).
15. Aʼal uláakʼ baʼax eʼesik Jéeobaeʼ igual bix u tratartik tuláakal máak (ilawil xan le fotoʼoboʼ).
15 Jéeobaeʼ ku kʼamik tak le máaxoʼob maʼ kaʼanchajaʼan u xookoʼoboʼ bey xan le máaxoʼob maʼ u yojloʼob le idiomaʼob meyajnaj le ka yáax tsʼíibtaʼab le Bibliaoʼ. Le naʼat ku taal tiʼ le Bibliaoʼ jeʼel u páajtal u yantal tiʼ tuláakal máakeʼ kex tak maʼ kaʼanchajaʼan u xookiʼ. Le Bibliaoʼ tsʼoʼok u traducirtaʼal ichil u milesil idiomaʼob. Le oʼolal le máakoʼob tiʼ tuláakal yóokʼol kaaboʼ jeʼel u páajtal u jóoʼskoʼob u yutsil le baʼax ku kaʼansikoʼ yéetel u beetkubaʼob u amigo Dios (2 Tim. 3:16, 17).
Le Bibliaoʼ tsʼoʼok u traducirtaʼal ichil u milesil idiomaʼob, leloʼ ku yeʼesikeʼ Jéeobaeʼ igual bix u tratartik tuláakal máak (Ilawil párrafo 15)
UNAJ K-PʼÁATAL ICHIL U YOTOCH JÉEOBA
16. ¿Máaxoʼob ku kʼamik Jéeoba ichil u yotoch? (Hechos 10:34, 35).
16 Junpʼéel nojoch privilegio k-antal ichil u yotoch Jéeoba. Letiʼeʼ jach maʼalob bix u kʼamkoʼon, ku yeʼesiktoʼon utsil bey xan yaabilaj. Ku kʼamik tuláakal máak ichil u yotoch kex jeʼel tuʼuxak u taaleʼ, jeʼel bixak líiʼsaʼanileʼ, kex wa xooknajaʼan wa maʼatech, kex jeʼel baʼalak razaileʼ, kex jeʼel jaypʼéel años yaan tiʼeʼ bey xan wa xiib wa koʼolel, chéen baʼax ku kʼáatiktoʼoneʼ ka k-tsʼáa ichil k-kuxtal le baʼax ku yaʼalikoʼ (xok Hechos 10:34, 35).
17. ¿Baʼax ken k-il teʼ tuláakʼ xookoʼ?
17 Teʼ Salmo 15:1, Davideʼ tu kʼáataj: «Jéeoba Dios, ¿máax jeʼel a kʼamik bey uʼulab ta wotocheʼ? ¿Máax jeʼel u béeytal u kajtal teʼ montaña a yéeymoʼ?». Ka tsʼoʼokeʼ Jéeobaeʼ tu tsʼáaj tu tuukul David u núukil le preguntaʼobaʼ. Teʼ tuláakʼ xookoʼ yaan k-ilik jujunpʼéel baʼaxoʼob kʼaʼabéet k-beetik utiaʼal u seguer k-pʼáatal tu yotoch Jéeoba.
KʼAAY 32 Pʼáaten tu tséel Jéeoba
