Utiaʼal k-lúubul maʼalobil tiʼ Jéeobaeʼ kʼaʼabéet u yantaltoʼon fe. Pero le Bibliaoʼ ku yaʼalikeʼ «le fejoʼ maʼ tiʼ tuláakal máak yaniʼ» (2 Tes. 3:2). Teʼelaʼ apóstol Pabloeʼ táan kaʼach u tʼaan tiʼ le máaxoʼob chʼaʼpachtikoʼ, letiʼobeʼ ‹kʼasaʼan máakoʼob, ku beetkoʼob loob› le beetik kʼaʼabéet kaʼach u púutsʼul tiʼ letiʼob. Chéen baʼaleʼ le tʼaanoʼobaʼ jeʼel xan u páajtal u yaʼalaʼal yoʼolal uláakʼ máakoʼobeʼ, por ejemploeʼ le máakoʼob maʼ tu yóotik u reconocertoʼob Dios beet tuláakal baʼaloʼ (Rom. 1:20). Yaan máakoʼobeʼ ku yaʼalikoʼobeʼ yaan u fejoʼob tumen ku creerkoʼob yaan junpʼéel baʼal maas yaan u poder tiʼ wíinik. Pero lelaʼ maʼ letiʼe fe u kʼáat Jéeoba ka yanaktoʼonoʼ.

Utiaʼal k-lúubul utsil tiʼ Jéeobaeʼ kʼaʼabéet k-creertik jach tu jaajil yaan yéetel yaan u tsʼáaik baʼaloʼob maʼalobtak tiʼ le máaxoʼob muʼukʼaʼan u fejoʼob tiʼ letiʼoʼ (Heb. 11:6). Le fejoʼ junpʼéel tiʼ le jatsʼuts modos ku taal tiʼ le espíritu santooʼ. Le beetkeʼ wa k-kʼáat ka yanaktoʼoneʼ kʼaʼabéet k-kʼáatik tiʼ Jéeoba ich oración (Luc. 11:​9, 10, 13). Uláakʼ baʼal jeʼel u yáantkoʼon utiaʼal k-kʼamik espíritu santoeʼ letiʼe k-xokik le Bibliaoʼ. Chéen baʼaleʼ kʼaʼabéet k-tuukul tiʼ le baʼax ku yaʼalikoʼ yéetel k-tsʼáaik ichil k-kuxtal. Wa k-beetik beyoʼ le espíritu santooʼ yaan u nuʼuktik k-kuxtal yéetel yaan u yáantkoʼon utiaʼal ka yanaktoʼon le fe uts tu tʼaan Jéeobaoʼ.