1. ¿Baʼax maas jatsʼuts u yilik le máaxoʼob yáax u binoʼob reuniónoʼ? (Ilawil xan le fotooʼ).

 MÁANS ta tuukuleʼ juntúul máak yéetel u yataneʼ yáax u binoʼob reunión. Letiʼobeʼ jach jatsʼuts tu yililoʼob bix úuchik u kʼaʼamloʼob tumen le sukuʼunoʼoboʼ bey xan le yaabilaj ku yeʼeskoʼoboʼ. Le táan u suutoʼob tu yotochoʼ le atantsiloʼ ku yaʼalik tiʼ u yíicham: «Jach táaj jatsʼuts tin wilil u modos le Testigoʼoboʼ».

2. ¿Baʼaxten yaan máakoʼobeʼ ku xuʼulul u meyajtikoʼob Jéeoba?

² Jach jatsʼuts le yaabilaj ku yeʼesik le sukuʼunoʼoboʼ, pero kʼaʼajaktoʼoneʼ maʼ perfectoʼobiʼ (1 Juan 1:8). Jeʼex u bin a maas kʼaj óoltikoʼobeʼ maas séeb ken a wil le baʼaloʼob maʼ maʼalobtak ku beetkoʼoboʼ (Rom. 3:23). Yoʼolal le baʼaloʼobaʼ yaʼabeʼ ku xuʼulul u meyajtikoʼob Jéeoba.

3. ¿Baʼax eʼesik máaxoʼob u discípuloʼob Jesús? (Juan 13:34, 35).

³ Tuukulnen tiʼ le teksto tuʼux chʼaʼabaʼan le xookaʼ (xok Juan 13:34, 35). ¿Baʼax eʼesik máaxoʼob u discípuloʼob Jesús? Letiʼe yaabilajoʼ, maʼ tumen wa perfectoʼobiʼ. Jesúseʼ tu yaʼalaj: «Tuláakal máak ken u yojéelteʼ teʼexeʼ in discípuloʼex». Jeʼex k-ilkoʼ Jesúseʼ jach claro tu yaʼalileʼ maʼ chéen u discípuloʼob ken u yiloʼob le yaabilaj yaan ichil u kaajal Jéeobaoʼ, baʼaxeʼ tuláakal máak ken u tsʼáa cuenta.

4. ¿Baʼax ku taaktal u yojéeltik jujuntúul máakoʼob?

 ⁴ Le máaxoʼob maʼ Testigoʼoboʼ maʼ xaaneʼ taak u yojéeltikoʼob lelaʼ: «¿Baʼaxten letiʼe yaabilaj eʼesik máax u discípuloʼob Jesúsoʼ? ¿Bix tu yeʼesil Jesús u yaabiltmaj u apóstoloʼob? ¿Bix jeʼel k-eʼesik yaabilaj jeʼex Jesúseʼ?». Kex wa tsʼoʼok k-okjaʼeʼ maʼalob ka tuukulnakoʼon tiʼ le preguntaʼobaʼ, leloʼ yaan u yáantkoʼon utiaʼal ka k-eʼes yaabilaj kex wa ku beetaʼaltoʼon wa baʼax tumen u maasil (Efe. 5:2).

5. ¿Bix le clase yaabilaj tu chʼaʼchiʼitaj Jesús teʼ Juan 15:12 yéetel 13?

⁵ Jesúseʼ tu yaʼaleʼ maʼ tuláakal máak kun eʼesik le yaabilaj yaan ichil u discípuloʼoboʼ (xok Juan 15:12, 13). Letiʼeʼ tu yaʼalaj: «Paklan yaabiltabaʼex jeʼex teen tsʼoʼok in yaabiltikeʼexoʼ». Le clase yaabilaj beyaʼ jeʼel tak u beetik u kʼubik u kuxtal máak tu yoʼolal le sukuʼunoʼoboʼ. b

6. ¿Bix u yeʼesik le Biblia jach kʼaʼabéet k-eʼesik yaabilajoʼ?

⁶ Le Bibliaoʼ ku yaʼalikeʼ jach kʼaʼabéet u yeʼesik máak yaabilaj. Yaʼab máakeʼ jatsʼuts u yilik le tekstoʼobaʼ: «Dioseʼ yaabilaj» (1 Juan 4:8). «Kʼaʼabéet a yaabiltik a wéet máakil jeʼex a yaabiltikabaeʼ» (Mat. 22:39). «Le máax yaan u yaabilajoʼ mantatsʼ ku perdonartik u maasil» (1 Ped. 4:8). «Le yaabilajoʼ mix bikʼin kun xuʼulul» (1 Cor. 13:8). Yaʼab uláakʼ tekstoʼob aʼalik kʼaʼabéet k-yaabiltik u maasil.

7. ¿Baʼaxten Satanáseʼ maʼ tu páajtal u beetik u paklan yaabiltikuba máak?

⁷ Yaʼab máakoʼobeʼ taak u yojéeltikoʼob máakalmáak le religión kaʼansik u jaajiloʼ. U jaajileʼ tuláakal le religiónoʼoboʼ  ku yaʼalikoʼob ku kaʼanskoʼob u jaajil, chéen baʼaleʼ maʼ igual baʼax ku kaʼanskoʼob yoʼolal Diosiʼ. Lelaʼ ku yúuchul tumen Satanáseʼ tsʼoʼok u beetik u yantal yaʼab religiónoʼob. Kex beyoʼ maʼ tu páajtal u beetik u múul meyajoʼob mix u paklan yaabiltikubaʼob. Pero Jéeobaeʼ ku páajtal u beetik u paklan yaabiltikuba máak tumen tiʼ letiʼ u taal le yaabilajoʼ. Chéen le máaxoʼob meyajtik ku páajtal u yeʼeskoʼob le clase yaabilajaʼ (1 Juan 4:7). Le oʼolal Jesúseʼ tu yaʼaleʼ letiʼe yaabilaj kun eʼesik máax jach tu jaajil u discípuloʼoboʼ.

8, 9. ¿Baʼax tsʼoʼok u tsʼáaik cuenta yaʼabkach máakoʼob?

⁸ Yaʼab máakeʼ tsʼoʼok u tsʼáaik cuenta máax jach tu jaajil u discípuloʼob Jesús yoʼolal le yaabilaj ku yeʼeskoʼoboʼ. Por ejemploeʼ juntúul sukuʼun ku kʼaabaʼtik Ianeʼ jach ku kʼaʼajsik le yáax asamblea tuʼux binoʼ. Letiʼeʼ tsʼokaʼaniliʼ u yáax bin teʼ estadio utiaʼal u yilik junpʼéel partidooʼ. Ianeʼ ku yaʼalik: «Teʼ vezaʼ jach jelaʼan le baʼax beetaʼaboʼ. Le Testigoʼoboʼ jach uts u modosoʼob yéetel jach maʼalob bix u vestirmilubaʼob. Tsʼoʼoleʼ u mejen paalaloʼobeʼ jach maʼalob u portarkubaʼob». Letiʼeʼ ku yaʼalik xan: «Le baʼax maas jatsʼuts úuchik in wilkoʼ letiʼe in wilik jach maʼalob u biskubaʼob yéetel kiʼimak u yóoloʼoboʼ. Le jeʼeloʼ desde úuch joʼopʼok in tsʼíiboltik u yantalten. Maʼ kʼajaʼanten baʼax aʼalaʼab teʼ discursoʼob máansaʼaboʼ, pero le baʼax maʼ tuʼubten tak bejlaʼoʼ letiʼe bix úuchik u portarkuba le Testigoʼoboʼ». c Ianeʼ tu yilaj le clase yaabilaj ku yeʼesik le máaxoʼob adorartik Jéeobaoʼ. Como k-yaabiltmaj le sukuʼunoʼoboʼ k-eʼesik utsil tiʼob yéetel k-respetarkoʼob.

⁹ Juntúul sukuʼun ku kʼaabaʼtik Johneʼ jach jatsʼuts tu yilil bix tratartaʼabik le yáax ka bin reuniónoʼ. Letiʼeʼ tu yileʼ le sukuʼunoʼoboʼ jach uts u modosoʼob yéetel jach ku paklan respetarkubaʼob. Jhoneʼ tu yaʼalaj: «Yoʼolal le yaabilaj ku yeʼeskoʼob ichiloʼoboʼ tin tsʼáaj cuenta letiʼob u jaajil religiónoʼ». d Yaan xan uláakʼ experienciaʼob eʼesik de ke u testigoʼob Jéeobaeʼ letiʼob u discípuloʼob Jesús.

10. ¿Tiʼ baʼax súutukiloʼob kun ilbil wa jach tu jaajil k-yaabiltmaj le sukuʼunoʼoboʼ? (Ilawil xan le notaoʼ).

¹⁰ Jeʼex t-aʼalil tu káajbal le xookaʼ mix juntúul tiʼ le sukuʼunoʼob perfectoʼoboʼ, deporsi yaan u kʼuchul u kʼiinil u ofenderkoʼonoʼob yéetel baʼax ku yaʼalikoʼob wa yéetel baʼax ku beetkoʼob. Teʼ súutukiloʼob kun ilbil wa jach tu jaajil k-yaabiltmoʼoboʼ (Sant. 3:2). e Koʼox ilik baʼax jeʼel u yáantkoʼon k-eʼes yaabilaj jeʼex tu beetil Jesúseʼ (Juan 13:15).

11. ¿Baʼax modosil tu yeʼesaj Santiago yéetel Juan? (Ilawil xan le dibujoʼoboʼ).

¹¹ Jesúseʼ u yojel kaʼacheʼ u apóstoloʼobeʼ maʼ perfectoʼobiʼ, le oʼolal yaan u beetkoʼob baʼaloʼob maʼ maʼalobtakiʼ. Letiʼeʼ tu yáantoʼob u yutskíintoʼob le baʼaloʼob maʼ maʼalobtak ku beetkoʼoboʼ utiaʼal u kʼaʼamloʼob tumen Jéeoba. Juntéenjeakeʼ Santiago  yéetel Juaneʼ tu yaʼaloʼob tiʼ u maama ka u yaʼal tiʼ Jesús ka u tsʼáa nojoch puestoʼob tiʼob (Mat. 20:20, 21). Yéetel le baʼax tu yaʼaloʼoboʼ tu yeʼesoʼob nojbaʼal u taaskubaʼob yéetel chéen ku tuukuloʼob tu yoʼolaloʼob (Pro. 16:18).

12. ¿Baʼaxten k-aʼalik maʼ chéen Santiago yéetel Juan tu yeʼesoʼob kʼaakʼas modosiʼ?

¹² Maʼ chéen Santiago yéetel Juan tu yeʼesoʼob kʼaakʼas modos teʼ kʼiinoʼ. Koʼox ilik baʼax tu beetaj le uláakʼ apóstoloʼoboʼ. Le Bibliaoʼ ku yaʼalik: «Le ka tu yuʼuboʼob lelaʼ le uláakʼ diez discípuloʼoboʼ kʼuuxilnajoʼob yéetel le kaʼatúul sukuʼuntsiloʼobaʼ» (Mat. 20:24). Máans ta tuukul bix úuchik u baʼateltʼaanoʼob. Maʼ xaaneʼ le u maasil apóstoloʼoboʼ tu yaʼaloʼob tiʼ Santiago yéetel Juan: «¿Bix u táabal a kʼáateʼex ka tsʼaʼabakteʼex nukuch puestoʼob teʼ Reinooʼ? Maʼ chéen teʼex táan a meyajeʼex yéetel Jesúsiʼ. Tak toʼon yaantoʼon u derechoil ka tsʼaʼabaktoʼon nukuch puestoʼob». Jeʼex k-ilkoʼ le apóstoloʼoboʼ maʼ tu yeʼesoʼob yaabilaj teʼ kʼiin jeʼeloʼ.

13. ¿Bix tu tratartil Jesús u apóstoloʼob? (Mateo 20:25-28).

¹³ ¿Baʼax tu beetaj Jesús? Letiʼeʼ maʼ tu kʼeyoʼobiʼ. Maʼ tu yaʼalaj wa yaan u kaxtik uláakʼ apóstoloʼob maas kabal u yóoloʼob yéetel maas u yaabiltmubaʼobiʼ. Baʼaxeʼ tu yeʼesaj paciencia tiʼob tumen u yojel maʼ u yóoliliʼob u yeʼeskoʼob kʼaakʼas  modoseʼ (xok Mateo 20:25-28). U jaajileʼ maʼ yáax u baʼateltik le apóstoloʼob máax u maas nojchil ichiloʼoboʼ, kex beyoʼ Jesúseʼ mantatsʼ tu yeʼesaj yaabilaj tiʼob (Mar. 9:34; Luc. 22:24).

14. ¿Bix u tuukul le máakoʼob tu kʼiiniloʼob le apóstoloʼoboʼ?

¹⁴ Jesúseʼ tu chʼaʼaj en cuenta bix líiʼsaʼabik u apóstoloʼob (Juan 2:24, 25). Teʼ kʼiinoʼoboʼ u nuuktakil u religión le judíoʼoboʼ jach kʼaʼanaʼan u yilkoʼob u yantal taakʼin tiʼ máak yéetel junpʼéel nojoch puesto (Mat. 23:6; ket yéetel le xook Le sinagogaʼob tu kʼiiniloʼob Jesús yéetel u disipuloʼoboʼ). U nuuktakil le religiónoʼoboʼ ku tuklikoʼob kaʼacheʼ maas maʼaloboʼob tiʼ u maasil (Luc. 18:9-12). f Jesúseʼ u yojleʼ wa maʼ tu kanáantkuba le apóstoloʼoboʼ jeʼel u káajal u tuukuloʼob jeʼex u nuuktakil le religiónoʼoboʼ (Pro. 19:11). Letiʼeʼ u yojleʼ chéen kʼeban máakoʼob, le oʼolal maʼ tsʼíikilnaj le ka tu beetoʼob baʼaloʼob maʼ maʼalobtakiʼ. Como u yojel utsul máakoʼobeʼ tu yáantoʼob u yeʼesoʼob kabal óolal yéetel yaabilaj.

15. ¿Baʼax k-kanik tiʼ le baʼax úuch tiʼ Santiago yéetel Juanoʼ?

¹⁵ Jach yaʼab baʼax jeʼel k-kanik tiʼ le baʼax úuch tiʼ Santiago yéetel Juanoʼ. U jaajileʼ maʼ unaj u kʼáatkoʼob ka tsʼaʼabaktiʼob nojoch puestoʼob teʼ Reinooʼ. Pero maʼ maʼalob xan le baʼax tu beetaj le u maasil apóstoloʼoboʼ tumen maʼ unaj kaʼach u kʼuuxiloʼobiʼ. Kex beyoʼ Jesúseʼ tu yeʼesaj yaabilaj tiʼ le 12 apóstoloʼoboʼ. ¿Baʼax k-kanik tiʼ le baʼax úuchoʼ? K-kanikeʼ kʼaʼabéet k-kanáantik baʼax k-aʼalik yéetel baʼax k-beetik le kéen u beet baʼax maʼ maʼalob u maasiliʼ. Le beetkeʼ le kéen ofendertaʼakech tumen juntúul sukuʼun wa juntúul kiikeʼ tukle: «¿Baʼaxten jach tu molestarten le baʼax tu beetoʼ? ¿Kʼaʼabéet wa in maas jatsʼutskíintik in modos? ¿Yaan wa baʼax táan u aktáantik ichil u kuxtal? Kex jach yaj le baʼax tu beetajtenoʼ, ¿maʼ wa maas maʼalob ka in perdonartiʼ?». Wa mantatsʼ k-tratartik u maasil yéetel yaabilajeʼ yaan k-eʼesik jach tu jaajil u discípuloʼon Jesús.

16. ¿Baʼax jeʼel k-kanik tiʼ u ejemplo Jesúseʼ?

¹⁶ U ejemplo Jesúseʼ ku kaʼansiktoʼoneʼ kʼaʼabéet k-naʼatik bix u yuʼubikuba le sukuʼunoʼoboʼ (Pro. 20:5). Toʼoneʼ maʼ tu páajtal k-ilik baʼax yaan tu puksiʼikʼaloʼob jeʼex tu beetil Jesúsoʼ. Pero le baʼax ku páajtal k-beetkoʼ letiʼe k-eʼesik paciencia tiʼob le kéen u beetoʼob baʼax maʼ maʼaloboʼ (Efe. 4:1, 2; 1 Ped. 3:8). Pero utiaʼal leloʼ kʼaʼabéet k-kʼaj óoltikoʼob tubeel. Koʼox ilik bix tu beetil juntúul sukuʼun.

17. ¿Baʼax kʼuch u yil juntúul superintendente tiʼ circuito le ka tu maas kʼaj óoltaj juntúul sukuʼunoʼ?

¹⁷ Juntúul sukuʼun ku beetik kaʼach u superintendenteil tiʼ circuito África orientaleʼ tu kʼaj óoltaj juntúul sukuʼun. Pero tu yileʼ le sukuʼunoʼ bey kʼasaʼaneʼ. ¿Baʼax túun tu beetaj le superintendente tiʼ circuitooʼ? Letiʼeʼ ku yaʼalik: «Tu lugar in tuklik deporsi bey u modooʼ tin wilaj in maas kʼaj óoltik». Úuchik u beetik  beyoʼ kʼuch u naʼateʼ le sukuʼunoʼ bey u modooʼ yoʼolal le bix líiʼsaʼaniloʼ. Le sukuʼunoʼ ku yaʼalik: «Le ka tin wojéeltaj bukaʼaj kʼeexoʼob tu beetaj ichil u kuxtal utiaʼal u páajtal u biskuba yéetel u maasileʼ tin tsʼáaj cuentaeʼ maʼ chéen chʼaʼabil le baʼax tu beetoʼ. Jeʼex úuchik in maas kʼaj óoltikeʼ bey úuchik in maas biskinba tu yéeteloʼ». Wa k-ilik k-kʼaj óoltik le sukuʼunoʼob yéetel k-naʼatik bix u yuʼubikubaʼobeʼ maas chéen chʼaʼabil ken k-eʼes yaabilaj tiʼob.

18. ¿Tiʼ baʼax preguntailoʼob unaj k-tuukul kéen ofendertaʼakoʼon? (Proverbios 26:20).

¹⁸ Yaan kʼiineʼ ku kʼaʼabéettal k-tʼaan yéetel juntúul sukuʼun wa kiik tu ofendertoʼon. Pero anteseʼ maʼalob ka tuukulnakoʼon tiʼ le preguntaʼobaʼ: «¿Jach wa tu jaajil bey úuchik jeʼex in tuklikoʼ?» (Pro. 18:13). «¿Tu yóoliliʼ wa u beetkeʼ?» (Ecl. 7:20). «¿Yaan wa máax tsʼoʼok xan in ofendertik?» (Ecl. 7:21, 22). «Wa kin tʼaan tu yéeteleʼ, ¿maʼ wa chéen yaan in maas nojochkíint le baʼax úuchoʼ?» (xok Proverbios 26:20). Wa k-tuukul tiʼ le preguntaʼobaʼ yaan k-tsʼáaik cuentaeʼ maas maʼalob ka k-eʼes yaabilaj yéetel ka k-tuʼubs le baʼax úuchoʼ.

19. ¿Baʼax tsʼoʼok k-chʼaʼtuklik k-beetik?

¹⁹ Yaʼab baʼaxoʼob eʼesik u testigoʼob Jéeobaeʼ u discípuloʼob Jesús. Pero, ¿bix jeʼel k-eʼesik cada juntúul tiʼ toʼon u discípuloʼoneʼ? Letiʼe kéen k-eʼes yaabilaj tiʼ le sukuʼunoʼob kex ka u beetoʼob baʼaloʼob maʼ maʼalobtakoʼ. Wa k-beetik beyoʼ le máakoʼoboʼ yaan u tsʼáaikoʼob cuenta máakalmáak le religión ku kaʼansik u jaajiloʼ yéetel yaan u taaktal u adorarkoʼob Jéeoba, u Diosil le yaabilajoʼ. Le oʼolaleʼ koʼox chʼaʼtuklik k-eʼesik yaabilaj tiʼ tuláakal máak, beyoʼ yaan k-eʼesik u discípuloʼon Cristo.